Mawu Ƒe Nufiafia Kple Gbɔgbɔ Vɔ̃wo Ƒe Nufiafiawo
“Ame aɖewo ade megbe atso xɔse la me, eye woaɖo to beblegbɔgbɔwo kple gbɔgbɔ vɔ̃wo ƒe nufiafia.”—TIMOTEO I, 4:1.
1. Aʋa ka mee Kristotɔwo le?
TSƆE be afisi aʋa dzɔna le ye nànɔ le wò agbe me katã. Aleke wòanɔ na wò ne ànɔ tu ƒe ɖiɖi sem hafi ava mlɔ anyi eye ne èfɔ hã la nànɔ aʋawɔtuwo ƒe wowo sem? Nublanuitɔe la, nɔnɔme ma tututu mee ame aɖewo nɔa agbe le le xexeame ƒe akpa aɖewo. Gake le gbɔgbɔ me gɔmesese nu la, nɔnɔme sia mee Kristotɔwo katã le. Wole aʋa gã aɖe si le edzi yim anye ƒe 6,000 sɔŋ enye sia la me eye enu sẽ ɖe edzi le míaƒe ŋkekeawo me. Aʋa kae nye sia li eteƒe didi alea? Eyae nye aʋa si le nyateƒe kple aʋatso, Mawu ƒe nufiafia kple gbɔgbɔ vɔ̃wo ƒe nufiafiawo dome. Manye nusi agbɔ eme akpa ne woyɔ aʋa sia—le adikãtɔwo dometɔ ɖeka ya teti ƒe nuwɔna nu—be enye aʋawɔwɔ si me nublanuimakpɔmakpɔ kple amewuwu gãtɔ kekeake le le ameƒomea ƒe ŋutinya me o.
2. (a) Le Paulo ƒe nya nu la, akpa eve kawoe tsi tre ɖe wo nɔewo ŋu? (b) Nukae nye “xɔse” si Paulo wɔnɛ?
2 Apostolo Paulo yɔ akpa eve siwo le aʋa sia wɔm esi wòŋlɔ na Timoteo be: “Gbɔgbɔ la gblɔe kɔte bena, le ŋkeke mamleawo me la ame aɖewo ade megbe atso xɔse la me, eye woaɖo to beblegbɔgbɔwo kple gbɔgbɔ vɔ̃wo ƒe nufiafia.” (Timoteo I, 4:1) De dzesii be “ŋkeke mamleawo” koŋ mee gbɔgbɔ vɔ̃wo ƒe nufiafia akpɔ ŋusẽ ɖe amewo dzi vevie. Abe alesi wokpɔe le Paulo ƒe ŋkekea me ene la, ɣeyiɣi ma mee míele fifia. Gade dzesii hã be “xɔse” ye nye nusi tsi tre ɖe gbɔgbɔ vɔ̃wo ƒe nufiafiawo ŋu. Mawu ƒe nufiafia si wotu ɖe eƒe nya siwo gbɔgbɔ ʋã amewo woŋlɔ ɖe Biblia me dzi lae “xɔse” tsi tre ɖi na le afisia. Xɔse sia naa agbe ame. Efiaa Kristotɔ be wòawɔ Mawu ƒe lɔlɔ̃nu. Eyae nye nyateƒe si kplɔa ame yia agbe mavɔ mee.—Yohanes 3:16; 6:40.
3. (a) Nukae adzɔ ɖe amesiwo atsi nyateƒe kple aʋatso dome ʋa me la dzi? (b) Amekae le megbe na gbɔgbɔ vɔ̃wo ƒe nufiafiawo?
3 Amesiame si ade megbe tso xɔsea me la makpɔ agbe mavɔ o. Woawoe atsi aʋa la me. Aleke wòawɔ nublanui enye si be míaɖe mɔ gbɔgbɔ vɔ̃wo ƒe nufiafiawo nable mí! (Mateo 24:24) Nukae mía dometɔ ɖesiaɖe ate ŋu awɔ be míagatsi aʋa la me o? Eyae nye be míagbe aʋatsonufiafia siawo siwo doa Satana Abosam si nye “gbɔgbɔ vɔ̃wo ƒe fia” ƒe tameɖoɖowo ɖe ŋgɔ la keŋkeŋ. (Mateo 12:24) Míate ŋu agblɔe be Satana ƒe nufiafiawo nye aʋatso elabena ‘aʋatsokafofoe’ Satana nye. (Yohanes 8:44) De ŋugble le alesi wòka aʋatso aɖaŋutɔe tsɔ ble mía dzila gbãtɔwoe ŋu kpɔ.
Woʋu Go Gbɔgbɔ Vɔ̃wo ƒe Nufiafiawo
4, 5. Aʋatso kae Satana ka na Xawa, eye nukatae wònye ŋutasesẽ vɔ̃ɖi?
4 Woŋlɔ nudzɔdzɔawo ɖe Biblia me le Mose I, 3:1-5. Satana to da dzi te ɖe Xawa si nye nyɔnua ŋu hebiae be: “Vavãe Mawu gblɔ bena, migaɖu abɔmetiawo katã ƒe tsetse aɖeke o mahã?” Edze abe ɖe naneke megblẽ le biabia la ŋu o ene, gake galé ŋku ɖe eŋu ake. ‘Vavãea?’ Satana ƒo nu abe ɖe nya la wɔ nuku nɛ eye wòdi be yeagblɔ be ‘Nukatae Mawu gblɔ nya ma?’ ene.
5 Xawa ɖee fia le manyamanya me be nenemae wòle. Enya nusi Mawu ƒe nufiafia nye le nya sia ŋuti be Mawu gblɔ na Adam bena ne yewoɖu sidzedze nyui kple vɔ̃ ƒe atia la, yewoaku. (Mose I, 2:16, 17) Edze ƒã be nya si Satana bia la na be nyɔnua di be yease nya la ƒe dziyiyi, eyata eɖo to vaseɖe esime wògblɔ nya vevi si wòdi be yeagblɔ la nɛ be: “Da la gblɔ na nyɔnua bena: Miele kuku ge akpɔ o.” Nya vɔ̃ɖi kae nye esi wògblɔ! Satana bu fɔ Yehowa, Mawu nyateƒetɔ, Mawu lɔlɔ̃tɔ si nye Wɔla la be Eble via siwo nye amegbetɔwo!—Psalmo 31:6; Yohanes I, 4:16; Nyaɖeɖefia 4:11.
6. Aleke Satana tɔ gbe Yehowa ƒe dɔmenyonyo kple dziɖulanyenyee?
6 Gake Satana gblɔ nya si yi ŋgɔ wu ema. Egagblɔ be: “Ke boŋ Mawu nyae bena, gbesigbe ke miaɖu eƒe ɖe la, miaƒe ŋkuwo laʋu, eye mianɔ abe Mawu ene, anya nyui kple vɔ̃.” Satana gblɔ be Yehowa Mawu—amesi na nu geɖe mía dzila gbãtɔwo—di be yeate nu wɔnuku aɖe wo. Edi be yeaxe mɔ na wo be woaganɔ abe mawuwo ene o. Eyata Satana tɔ gbe Mawu ƒe dɔmenyonyo. Ede ɖokuiŋudzedze kple eɖoɖo koŋ aŋe aɖaba aƒu Mawu ƒe sewo dzi ƒe susu hã wo me, esi wògblɔ be nuwɔwɔ alea aɖe vi na wo. Le nyateƒe me la, Satana tɔ gbe gome si le Mawu si be wòaɖu Eya ŋutɔ ƒe nuwɔwɔwo dzi, be Mawu mekpɔ mɔ aɖo seɖoƒewo na nusi amegbetɔ awɔ o.
7. Ɣekaɣie nye zi gbãtɔ si wose gbɔgbɔ vɔ̃wo ƒe nufiafiawo, eye aleke woɖi egbe tɔwoe?
7 Wova nɔ gbɔgbɔ vɔ̃wo ƒe nufiafiawo sem to Satana ƒe nya siawo me. Gbɔgbɔ vɔ̃wo ƒe nufiafia siawo gakakaa mawumavɔ̃mavɔ̃ ƒe gɔmeɖose mawo ke kokoko. Alesi Satana tɔ gbe gome si le Mawu si be wòaɖo dzidzenu na nusi ame awɔ lae le Eden-bɔa me la, nenema ke eya kple gbɔgbɔmeme dzeaglã siwo kpe ɖe eŋu fifia la gale gbe tɔmee. Egatsia tre ɖe Yehowa ƒe dziɖulanyenye ŋu kokoko eye wòdzea agbagba be yeana amewo nagaɖo to woƒe Dziƒofofo la o.—Yohanes I, 3:8, 10.
8. Nukae Adam kple Xawa bu le Eden, gake aleke Yehowa ƒe nyateƒetɔnyenye dzee?
8 Le aʋa si le Mawu ƒe nufiafia kple gbɔgbɔ vɔ̃wo ƒe nufiafiawo dome ƒe ŋgokpekpe gbãtɔ ma me la, Adam kple Xawa wɔ nyametsotso gbegblẽ eye wobu agbe mavɔ ƒe mɔkpɔkpɔ si le wo si. (Mose I, 3:19) Esi ɣeyiɣiawo va nɔ yiyim eye nu vanɔ gbegblẽm le woƒe ŋutilã ŋu la, amesi ka aʋatso kple amesi to nyateƒe le Eden ɣemaɣi la ƒe kpeɖodzi dze na wo ƒã. Gake ƒe alafa geɖe do ŋgɔ hafi woaku le ŋutilã me le gɔmesesea nu la, wova zu ame gbãtɔ siwo tsi nyateƒe kple aʋatso dome ʋa la me esime wo Wɔla si nye Agbedzɔƒe la drɔ̃ ʋɔnu wo be womedze anɔ agbe o. Ɣemaɣie woku le gbɔgbɔ me gɔmesese nu.—Psalmo 36:10; tsɔe sɔ kple Efesotɔwo 2:1.
Gbɔgbɔ Vɔ̃wo ƒe Nufiafiawo Egbea
9. Aleke gbegbe gbɔgbɔ vɔ̃wo ƒe nufiafiawo kpɔ ŋusẽ ɖe amewo dzi le ƒe alafawo mee?
9 Abe alesi woŋlɔe ɖe Nyaɖeɖefia ƒe agbalẽa me ene la, wokplɔ apostolo Yohanes le gbɔgbɔ me yi “Aƒetɔ ƒe ŋkeke” si dze egɔme le ƒe 1914 me la mee. (Nyaɖeɖefia 1:10) Ɣemaɣi la, wonyã Satana kple eƒe gbɔgbɔ vɔ̃wo tso dziƒo va anyigba dzi nutowo me—esia nye megbedede gã aɖe na mía Wɔla Gãtɔ ƒe futɔ sia. Womegase eŋkɔ kpɔ le dziƒo wògale Yehowa subɔlawo nu tsom o. (Nyaɖeɖefia 12:10) Gake aleke gbɔgbɔ vɔ̃wo ƒe nufiafiawo yi ŋgɔe le anyigba dzi tso esime wodze egɔme le Eden ke? Nuŋlɔɖia gblɔ be: “Wotsɔ ʋɔ driba gã, si nye da xoxo la, esi woyɔna be: Abosam kple Satana, amesi nye xexeame katã blela la, ƒu gbe.” (Nyaɖeɖefia 12:9) Satana ble xexeme bliboa katã! Mewɔ nuku o be woyɔ Satana be “xexe sia me fia”!—Yohanes 12:31; 16:11.
10, 11. Mɔ kawo nue Satana kple eƒe gbɔgbɔ vɔ̃wo ƒe ŋku biã le egbea?
10 Ðe Satana xɔe de eme be woɖu ye dzi esi wonyãe le dziƒoa? Gbeɖe, melɔ̃ o! Eɖoe kplikpaa be yeawɔ aʋa kple Mawu ƒe nufiafia kpakple amesiwo lé eme ɖe asi goŋgoŋ la. Esi wonyã Satana le dziƒo vɔ megbe la, egayi eƒe aʋawɔwɔa dzi: “Dzi ku ʋɔ driba la [Satana] ɖe nyɔnua ŋuti, eye wòdzo yi aʋa wɔ ge kple nyɔnua ƒe ƒome, siwo susɔ, amesiwo léa Mawu ƒe seawo me ɖe asi, eye Yesu ƒe ɖaseɖiɖi le wo si la.”—Nyaɖeɖefia 12:17.
11 Hekpe ɖe avu si wɔm Satana le kple Mawu subɔlawo ŋuti la, ele eƒe aʋatsonyawo kakam ɖe xexeame, eye wòle agbagba dzem be yeakpɔ ŋusẽ ɖe ameƒomea dzi. Le apostolo Yohanes ƒe Nyaɖeɖefia me ŋutega siwo ku ɖe Aƒetɔ la ƒe ŋkekea ŋuti dometɔ ɖeka me la, ekpɔ lã wɔadã etɔ̃ siwo tsi tre ɖi na Satana, eƒe anyigba dzi dunyahehawo, kple míaƒe ɣeyiɣia me xexemeŋusẽ gãtɔ. Akpɔkplɔwo do go tso nu etɔ̃ siawo ƒe nu me. Nukae wotsi tre ɖi na? Yohanes ŋlɔe bena: “Wonye gbɔgbɔ vɔ̃wo ƒe gbɔgbɔ, siwo nɔa dzesiwo wɔm, eye wonɔa xexeame katã ƒe fiawo gbɔ yim, bena woaƒo wo nu ƒu hena Mawu, ŋusẽkatãtɔ la, ƒe ŋkeke gã la ƒe aʋawɔwɔ.” (Nyaɖeɖefia 16:14) Edze kɔte be gbɔgbɔ vɔ̃wo ƒe nufiafiawo bɔ ɖe anyigba dzi egbea ŋutɔ. Satana kple eƒe gbɔgbɔ vɔ̃wo gale aʋa wɔm kple Mawu ƒe nufiafia kokoko, eye woayi edzi vaseɖe esime Yesu Kristo, Mesia Fia, la azi wo dzi be woatɔ te.—Nyaɖeɖefia 20:2.
Sidzedze Gbɔgbɔ Vɔ̃wo ƒe Nufiafiawo
12. (a) Nukata wòanya wɔ be míatsri gbɔgbɔ vɔ̃wo ƒe nufiafiawo? (b) Aleke Satana tenɛ kpɔ be yeaɖo yeƒe taɖodzinuwo gbɔ le Mawu subɔlawo gomee?
12 Ðe amegbetɔ Mawu-vɔ̃lawo ate ŋu atsi tre ɖe gbɔgbɔ vɔ̃wo ƒe nufiafiawo ŋua? Ẽ, woate ŋui, le nu eve ta. Gbãtɔe nye be Mawu ƒe nufiafia sẽ ŋu wu; eye eveliae nye be Yehowa klo nu le Satana ƒe ayemɔwo dzi bene míate ŋu atsi tre ɖe wo ŋu. Abe alesi apostolo Paulo gblɔe ene la, “míenya eƒe tameɖoɖowo keŋkeŋ.”—Korintotɔwo II, 2:11) Míenya be Satana zãa yometiti wònye mɔ siwo dzi wòtona ɖoa eƒe taɖodzinuwo gbɔ la dometɔ ɖeka. (Timoteo II, 3:12) Gake edzea agbagba ayetɔe wu be yeakpɔ ŋusẽ ɖe amesiwo subɔa Mawu la ƒe susu kple dzi dzi. Eble Xawa eye wòde dzodzro vɔ̃wo eƒe dzi me. Egatea esia kpɔna egbea hã. Paulo ŋlɔ ɖo ɖe Korintotɔwo be: “Mele vɔvɔ̃m bena, ame aɖe menya nu o, alesi da la tsɔ eƒe aɖaŋu vɔ̃ ble Xawa la, nenema ke woagblẽ miaƒe tamesusuwo tso dzimekɔkɔ, si miekɔ na Kristo la me mahĩ.” (Korintotɔwo II, 11:3) Bu alesi wògblẽ ameƒomea ƒe akpa gãtɔ ƒe tamesusui ŋu kpɔ.
13. Aʋatso kawoe Satana ka na ameƒomea tso Eden ke?
13 Satana bu fɔ Yehowa na Xawa be ele aʋatso kam, eye wògblɔ be ne amegbetɔwo gbe toɖoɖo wo Wɔla la, woanɔ abe mawuwo ene. Amegbetɔ ƒe nuvɔ̃menyenye egbea ɖo kpe edzi be Satanae nye aʋatsokala ke menye Yehowa o. Amegbetɔwo mezu mawuwo egbea o ɖe! Gake Satana gaka aʋatso bubuwo kpe aʋatso gbãtɔ ma. Edo susua ɖa be amegbetɔ ƒe luʋɔ nye nu makumaku, mekuna o. Eyata eto ayeme tsɔe ɖo amegbetɔwo ŋkume le mɔ bubu nu be woate ŋu anɔ abe mawuwo ene. Emegbe enɔ te ɖe aʋatsonufiafia ma dzi ɖo dzo mavɔ, ŋutiklɔdzo, gbɔgbɔyɔyɔ, kple tɔgbui kukuwo subɔsubɔ ƒe nufiafiawo anyi. Aʋatso siawo gale ame miliɔn alafa geɖewo ɖem aboyoe.—Mose V, 18:9-13.
14, 15. Nukae nye nyateƒea le ku kple ameƒomea ƒe etsɔ me mɔkpɔkpɔ ŋuti?
14 Ẽ, nya si Yehowa gblɔ na Adam ye nye nyateƒea. Adam ku esi wòwɔ nuvɔ̃ ɖe Mawu ŋu. (Mose I, 5:5) Ne Adam kple eƒe dzidzimeviwo ku la, wozua luʋɔ kukuwo, womeganyaa naneke alo wɔa dɔ aɖeke o. (Mose I, 2:7; Nyagblɔla 9:5, 10; Xezekiel 18:4) Esi míenyi nuvɔ̃ ƒe dome tso Adam gbɔ ta la, luʋɔ siwo katã nye amegbetɔwo kuna. (Romatɔwo 5:12) Gake le Eden-bɔa me ke la, Yehowa do ŋugbe be dzidzimevi aɖe ava dzɔ si aɖu Abosam ƒe nuwɔnawo dzi. (Mose I, 3:15) Dzidzimevi mae nye Yesu Kristo, Mawu ŋutɔ ƒe Tenuvi la. Yesu ku nuvɔ̃ manɔŋui eye eƒe agbe si wòtsɔ sa vɔe la va zu tafe si wotsɔ ƒle ameƒomea tso ku mee. Mɔnukpɔkpɔ asu amesiwo atsɔ toɖoɖo axɔ Yesu dzi ase la si be woava kpɔ agbe mavɔ si Adam bu la.—Yohanes 3:36; Romatɔwo 6:23; Timoteo I, 2:5, 6.
15 Tafevɔsa lae nye amegbetɔ ƒe mɔkpɔkpɔ vavãtɔ, menye susu dzro aɖe ko be luʋɔ la nɔa agbe le ku megbe o. Mawu ƒe nufiafiae wònye. Nyateƒee. Egaɖe Yehowa ƒe lɔlɔ̃ kple nunya hã fia le mɔ wɔnuku nu. (Yohanes 3:16) Aleke gbegbe wòle be míada akpee nye si be míesrɔ̃ nyateƒe sia eye be ena míevo tso gbɔgbɔ vɔ̃wo ƒe nufiafiawo me le nya siawo me!—Yohanes 8:32.
16. Nukawoe va do tso eme mlɔeba esi amegbetɔwo dze woa ŋutɔwo ƒe nunya yome?
16 Satana to aʋatso si wòka le Eden-bɔa me dzi de dzi ƒo na Adam kple Xawa be woadi be yewomaganɔ Mawu te o eye woaɖo ŋu ɖe woa ŋutɔwo ƒe nunya ŋu. Egbea la, míekpɔ nusi esia he vɛ la le nuvlowɔwɔ, gakuxiwo, aʋawɔwɔwo, kple masɔmasɔ gã siwo le xexeame egbea la me. Mewɔ nuku o be Biblia gblɔ be: “Xexe sia me nunya enye bometsitsi le Mawu gbɔ.” (Korintotɔwo I, 3:19) Gake ame akpa gãtɔ tsɔ movidzɔdzɔ tiae be yewoakpe fu tsɔ wu be yewoalé to ɖe Yehowa ƒe nufiafiawo ŋuti. (Psalmo 14:1-3; 107:17) Kristotɔ siwo xɔ Mawu ƒe nufiafia ƒoa asa na mɔ̃ siawo.
17. “Aʋatsosidzedze” kae Satana do ɖe ŋgɔ, eye ku kawoe wòtse?
17 Paulo ŋlɔ na Timoteo be: “Oo, Timoteo! Dzra nusi wode asi na wò la ɖo; gbe dzeɖoɖo ƒuƒlu makɔmakɔwo kple aʋatsosidzedze ƒe nudadafiafia, si me ame aɖewo ʋu, eye wogatre mɔ tso xɔse la gbɔ.” (Timoteo I, 6:20, 21) “Sidzedze” ma tsi tre ɖi na gbɔgbɔ vɔ̃wo ƒe nufiafiawo hã. Le Paulo ƒe ŋkekea me la, anye xɔsegbegbenufiafia siwo ame aɖewo nɔ dodom ɖa le hamea me ŋue wòku ɖo. (Timoteo II, 2:16-18) Emegbe aʋatsosidzedze sia, abe nuwo katã nye vɔ̃ ƒe nufiafia kple Hela-xexemenunya ene, va gblẽ hamea. Le xexeame egbea la, mawudzimaxɔse, makamaka ɖe Mawu ƒe anyinɔnɔ dzi, nɔnɔmetɔtrɔ ƒe nufiafiawo, kple ɖeklemiɖeɖe Biblia la nye aʋatsosidzedze ƒe kpɔɖeŋu aɖewo, nenema ke enye egbegbe xɔsegbelawo ƒe nufiafia siwo mewɔ ɖeka kple Ŋɔŋlɔawo o. Ku siwo aʋatsosidzedze siawo katã tse la dze le agbenɔnɔ ƒe gbegblẽ, bubumademade dziɖuɖuwo ŋu si bɔ, anukwaremaɖimaɖi, kple ɖokuitɔdidi si ɖe dzesi le Satana ƒe nuɖoanyia ŋu la me.
Mawu ƒe Nufiafia Me Léle Ðe Asi Sesĩe
18. Amekawoe dia Mawu ƒe nufiafiawo egbea?
18 Togbɔ be Satana le gbɔgbɔ vɔ̃wo ƒe nufiafiawo kakam ɖe xexeame katã tso Eden ke hã la, ame aɖewo nɔa anyi ɣesiaɣi siwo dia Mawu ƒe nufiafia. Ame siawo ƒe xexlẽme de miliɔn geɖe egbea. Kristotɔ amesiamina susɔe siwo si mɔkpɔkpɔ si ŋu kakaɖedzi le be yewoaɖu dzi kple Yesu le eƒe Dziƒofiaɖuƒea me le kple “ale bubuwo” ƒe ameha gã si le dzidzim ɖe edzi, amesiwo ƒe mɔkpɔkpɔe nye be yewoanɔ agbe le anyigba dzi le Fiaɖuƒe ma te la hã le amesiawo dome. (Mateo 25:34; Yohanes 10:16; Nyaɖeɖefia 7:3, 9) Woƒo amesiawo nu ƒu egbea ɖe xexeame katã ƒe habɔbɔ ɖeka si ŋu Yesaya ƒe nya siawo ku ɖo me: “Viwòwo katã anye Yehowa ƒe nusrɔ̃viwo, eye viwòwo ƒe ŋutifafa asɔ gbɔ.”—Yesaya 54:13.
19. Nuka hãe Yehowa ƒe nufiafia ame bia?
19 Mawu ƒe nufiafia ame yi ŋgɔ wu nyateƒenufiafia ɖeɖeko nyanya—togbɔ be esia le vevie hã. Yehowa fiaa alesi míanɔ agbee, alesi míawɔ Mawu ƒe nufiafia ŋudɔ le mía ŋutɔwo ƒe agbenɔnɔ mee la mí. Le kpɔɖeŋu me, míetsria ɖokuitɔdidi, agbegbegblẽnɔnɔ, kple ɖokuisinɔnɔgbɔgbɔ siwo bɔ ɖe xexeme si ƒo xlã mi me la. Míenya nusi dona tso kesinɔnudidi vivivo si le xexe sia me la me—be ekplɔa ame yia ku mee. (Yakobo 5:1-3) Míeŋlɔa Mawu ƒe nufiafia si apostolo Yohanes gblɔ la be gbeɖe o be: “Migalɔ̃ xexeame kple nusiwo le eme o. Ne ame aɖe lɔ̃ xexeame la, Fofoa ƒe lɔlɔ̃ mele eme o.”—Yohanes I, 2:15.
20, 21. (a) Nukawo ŋudɔe Satana wɔna bene yeagbã ŋku na amewo? (b) Yayra kawoe amesiwo léa Mawu ƒe nufiafia me ɖe asi sesĩe la kpɔna?
20 Ŋusẽ si gbɔgbɔ vɔ̃wo ƒe nufiafiawo kpɔna ɖe amesiwo wòble dzi la dze le Paulo ƒe nya siwo wògblɔ na Korintotɔwo me be: “[Satana] gbã ŋku na dzimaxɔsetɔwo ƒe tamesusu, bene Kristo, si nye Mawu ƒe nɔnɔme la, ƒe ŋutikɔkɔe nyanyuie la ƒe kekeli nagaklẽ na wo o.” (Korintotɔwo II, 4:4) Satana adi be yeagbã ŋku na Kristotɔ vavãwo hã le mɔ sia ke nu. Eto da dzi ble Mawu subɔlawo dometɔ ɖeka le Eden-bɔa me. Egbea la, ewɔa nuvlowɔwɔ alo agbegbegblẽnɔnɔ ƒe sinimawo kple television dzi nukpɔkpɔwo ŋudɔ. Etoa radio, agbalẽwo kple hadzidzi dzi. Hadede vɔ̃woe nye aʋawɔnu sesẽtɔ kekeake si wòzãna. (Lododowo 4:14; 28:7; 29:3) De dzesi nusi nusiawo nye la ɣesiaɣi—wonye gbɔgbɔ vɔ̃wo ƒe ayemɔwo kple nufiafiawo.
21 Ðo ŋku edzi be aʋatsonya sɔŋ Satana gblɔ le Eden; Yehowa ƒe nyawo nye nyateƒe. Nenema koe nuwo gale tso ɣemaɣi ke. Aʋatsokala koe Satana nye ɣesiaɣi, eye Mawu ƒe nufiafia nyea nyateƒe matrɔmatrɔ. (Romatɔwo 3:4) Ne míelé ɖe Mawu ƒe Nya la ŋu goŋgoŋ la, míanye aʋadziɖulawo ɣesiaɣi le aʋa si le nyateƒe kple aʋatso dome la me. (Korintotɔwo II, 10:4, 5) Eyata mina míaɖoe kplikpaa be míagbe gbɔgbɔ vɔ̃wo ƒe nufiafia ɖesiaɖe. Ne míewɔe alea la, míado dzi vaseɖe esime nyateƒe kple aʋatso dome ʋa la nake. Nyateƒe aɖu dzi godoo. Satana nu ayi eye Mawu ƒe nufiafia koe amewo ase le anyigba dzi.—Yesaya 11:9.
Àte Ŋu Aɖe Wo Mea?
◻ Ɣekaɣie wose gbɔgbɔ vɔ̃wo ƒe nufiafia zi gbãtɔ?
◻ Nukawoe nye aʋatso siwo Satana kple eƒe gbɔgbɔ vɔ̃wo ka la dometɔ aɖewo?
◻ Mɔ kawo nue Satana ƒe ŋku biã le wu egbea?
◻ Nukawoe Satana zãna tsɔ kakaa gbɔgbɔ vɔ̃wo ƒe nufiafiawo?
◻ Yayra kawoe amesiwo léa Mawu ƒe nufiafia me ɖe asi sesĩe la kpɔna?
[Nɔnɔmetata si le axa 9]
Eden-bɔa mee wose gbɔgbɔ vɔ̃wo ƒe nufiafia le zi gbãtɔ
[Nɔnɔmetata si le axa 10]
Mawu ƒe nufiafia le tafea kple Fiaɖuƒea ŋu koe nye ameƒomea ƒe mɔkpɔkpɔ ɖeka kolia