“Ŋutsu Kple Nyɔnu Wòwɔ”
“Mawu wɔ ame ɖe ye ŋutɔ ƒe nɔnɔme, Mawu ƒe nɔnɔme nue wòwɔe ɖo; ŋutsu kple nyɔnu wòwɔ.”—MOSE I, 1:27.
1. Aleke nyateƒea nye yayra na ŋutsu kple nyɔnu Kristotɔwoe?
ALEKE wòvivinae nye si be míanɔ Yehowa ƒe amewo dome ade ha kple ŋutsuwo kple nyɔnuwo, kpakple ŋutsuviwo kple nyɔnuviwo, amesiwo ƒe nu vevitɔ le agbe me enye be woalɔ̃ Mawu ahaɖo toe! Nyateƒea hã ɖe mí tso nuwɔna kple agbenɔnɔ siwo medzea Yehowa Mawu ŋu o me, eye efiaa alesi wòle be Kristotɔwo míanɔ agbee la mí. (Yohanes 8:32; Kolosetɔwo 3:8-10) Le kpɔɖeŋu me, dekɔnuwo alo nukpɔsusuwo le amewo si le afisiafi le alesi wòle be ŋutsuwo naɖe woƒe ŋutsunyenye afia eye nyɔnuwo hã naɖe woƒe nyɔnunyenye afia ŋu. Esi wodzi ŋutsuwo ŋutsuwoe hedzi nyɔnuwo hã nyɔnuwoe ta ko yea? Alo ɖe nu bubu aɖewo hã li siwo ŋu wòle be míabua?
2. (a) Nuka dzie wòle be míaƒe nukpɔsusu le ŋutsunyenye kple nyɔnunyenye ŋu nanɔ te ɖo? (b) Nukae dzɔ ɖe ŋutsu kple nyɔnu ŋuti nukpɔsusuwo dzi?
2 Le Kristotɔwo gome la, Mawu ƒe Nya lae nye mɔfianu si ƒe nyawo dzi míewɔna ɖo eɖanye ame ŋutɔ ƒe susu, dekɔnu, alo blemanukpɔsusu kawoe ɖale mía si o. (Mateo 15:1-9) Biblia meƒo nu tso ŋutsunyenye kple nyɔnunyenye ƒe akpa vovovoawo katã ŋu tsitotsito o. Ke boŋ eɖe mɔ ɖe mɔnu vovovowo ŋu abe alesi míekpɔnɛ le teƒe vovovowo ene. Ele be ŋutsuwo nawɔ nu ŋutsutɔe, eye nyɔnuwo hã nawɔ nu nyɔnutɔe ale be woanɔ abe alesi Mawu wɔ woe ene. Nukatae? Elabena hekpe ɖe alesi wowɔ ŋutsu kple nyɔnu be woanye kpeɖeŋutɔwo na wo nɔewo le ŋutilã me ŋu la, wowɔ wo hã be woanye kpeɖeŋutɔwo na wo nɔewo le ŋutsu kple nyɔnu ƒe nɔnɔmewo me. (Mose I, 2:18, 23, 24; Mateo 19:4, 5) Gake amewo ƒe nukpɔsusu tro hetɔtɔ le ŋutsunyenye kple nyɔnunyenye ŋu. Ame geɖe tsɔnɛ be amedziɖuɖu sesẽe, mokplalaɖoɖo, alo sesẽnuwɔwɔe nye ŋutsunyenye. Le teƒe aɖewo la, mebɔ o alo anye ŋukpe be ŋutsu nafa avi le dutoƒo alo le bebeme. Gake “Yesu fa avi” esime wònɔ amehawo dome le Lazaro ƒe yɔdo gbɔ. (Yohanes 11:35) Yesu si ƒe ŋutsunyenye de blibo la mebu ema be mesɔ o. Egbea ame geɖe ƒe nukpɔsusu meda sɔ le nyɔnunyenye ŋu o, eye wobunɛ be tugbedzedze kple gbɔdɔdɔ ƒe dzodzro nyɔnyɔ ko wònye.
Ŋutsunyenye Kple Nyɔnunyenye Vavãtɔ
3. Aleke ŋutsuwo kple nyɔnuwo to vovoe?
3 Nukae nye ŋutsunyenye vavãtɔ, eye nukae nye nyɔnunyenye vavãtɔ? The World Book Encyclopedia gblɔ be: “Menye wɔwɔme koe ŋutsu kple nyɔnu akpa gãtɔ to vovo na wo nɔewo le o, ke woto vovo le nuwɔna kple nudidiwo hã me. Domenyiŋusẽe hea vovototo siawo dometɔ aɖewo vɛ. . . . Ke edze abe vovototo siwo menɔ te ɖe wɔwɔme dzi o dometɔ geɖe tsoa ŋutsu alo nyɔnu ƒe nɔnɔme si amesiame srɔ̃ gbɔ. Wodzia amewo ŋutsuwo alo nyɔnuwoe, gake ɖe wosrɔ̃a ŋutsunyenye alo nyɔnunyenye.” Nu geɖe atso míaƒe domenyiŋusẽ gbɔ ya, gake ŋutsunyenye alo nyɔnunyenye nyuitɔ tutuɖo nɔ te ɖe nusi Mawu di tso mía si sɔsrɔ̃ kple nusi míatia be míaminyã le agbe me dzi.
4. Nukae Biblia gblɔ le ŋutsu kple nyɔnu ƒe wɔƒewo ŋu?
4 Biblia me ŋutinya ɖee fia be woɖoe be Adam naxɔ ŋgɔ anye ta na srɔ̃a kple viawo. Enɔ nɛ hã be wòawɔ Mawu ƒe lɔlɔ̃nu be woadzi ayɔ anyigba dzi, anye agbo ɖe edzi, eye wòaɖu anyigba dzi nuwɔwɔ siwo bɔbɔ ɖe anyi wu la katã dzi. (Mose I, 1:28) Nyɔnu ƒe ɖoƒe si nɔ Xawa hã si le ƒomea me enye be wòanye “kpeɖeŋutɔ” kple ‘evelia’ na Adam, wòabɔbɔ ɖe eƒe tanyenye te, ahawɔ ɖeka kplii be woana Mawu ƒe tameɖoɖo si wògblɔ na wo nava eme.—Mose I, 2:18; Korintotɔwo I, 11:3.
5. Aleke ƒomedodo si le ŋutsu kple nyɔnu dome va gblẽe?
5 Gake Adam mete ŋu tsɔ eƒe agbanɔamedzi la o, eye Xawa zã eƒe nyɔnunyenye tsɔ ble Adam nu wòwɔ ɖeka kplii wogbe toɖoɖo Mawu. (Mose I, 3:6) Adam mete ŋu ɖe ŋutsunyenye vavãtɔ fia o le esi wòɖe mɔ le eɖokui ŋu hewɔ nusi wònya be menyo o ta. Etsɔ gbɔdzɔgbɔdzɔ lɔ̃ ɖe srɔ̃a si woble ƒe nyawo dzi le esi teƒe be wòaɖo to nya si Fofoa kple Ewɔla gblɔ boŋ. (Mose I, 2:16, 17) Eteƒe medidi o ame eve gbãtɔwo te nusiwo Yehowa kpɔ do ŋgɔ be tomaɖomaɖo ahe vɛ la ƒe fu kpekpe. Adam si tsɔ hakpanya ŋɔnɔewo ƒo nu tso srɔ̃a ŋui tsã la yɔe vivimadoɖeameŋutɔe azɔ be ‘nyɔnu si nètsɔ nam la.’ Eƒe blibomademade gblẽ eƒe ŋutsunyenye me heflui, si na wòva ‘zu gã ɖe’ srɔ̃a dzi. Xawa hã ƒe ‘susu anɔ srɔ̃a ŋu,’ anye be agbɔ eme alo mada asɔ o.—Mose I, 3:12, 16.
6, 7. (a) Aleke ŋutsunyenye tɔtɔe do ŋgɔ na Tsiɖɔɖɔa? (b) Nukae míate ŋu asrɔ̃ tso nɔnɔme si nɔ anyi do ŋgɔ na Tsiɖɔɖɔa me?
6 Ŋutsunyenye kple nyɔnunyenye ŋudɔwɔwɔ ɖe mɔ gbegblẽ nu va do fievo do ŋgɔ na Tsiɖɔɖɔa. Mawudɔla siwo gblẽ woƒe nɔƒe gbãtɔ ɖi le dziƒo la do amegbetɔŋutilã be woadɔ kple nyɔnuwo. (Mose I, 6:1, 2) Ŋutsuwo koe nuŋlɔɖia gblɔ be wodzi le gbɔdɔdɔ manɔdzɔdzɔme nu mawo me. Eye edze abe ɖeviawo nye dzidehlɔ̃mevi siwo mate ŋu adzi vi o ene. Wova yɔ wo be ame kakowo, Nefilimwo, alo Ameƒuanyilawo, elabena wote ŋu ƒoa ame bubuwo ƒua anyi. (Mose I, 6:4, NW ƒe etenuŋɔŋlɔ) Edze ƒã be wowɔa adã kple akpasesẽnu, eye womekpɔa nublanui o.
7 Edze ƒã be nyonyo, dzedzeme, lolome, alo ŋusẽ ɖeɖe mefia ŋutsunyenye alo nyɔnunyenye si dzea ame ŋu o. Anɔ eme be mawudɔla siwo do amegbetɔŋutilã la dze ɖeka. Eye Nefilimawo hã tri hekako, gake woƒe tamesusu vɔ̃ɖi. Mawudɔla maɖotoawo kple wo viwo tsɔ gbɔdɔdɔ ƒe agbegbegblẽnɔnɔ kple adãwɔwɔ yɔ anyigba dzii. Eyata Yehowa he xexe ma va nuwuwui. (Mose I, 6:5-7) Gake Tsiɖɔɖɔa meɖe gbɔgbɔ vɔ̃wo ƒe ŋusẽkpɔɖeamedzi ɖa o, eye meɖe Adam ƒe nuvɔ̃ me tsonuwo hã ɖa o. Ŋutsunyenye kple nyɔnunyenye ɖeɖefia si mesɔ o gado ake le Tsiɖɔɖɔa megbe, eye eƒe kpɔɖeŋuwo le Biblia me, nyuia kple gbegblẽa siaa, siwo me míate ŋu asrɔ̃ nu tsoe.
8. Ŋutsunyenye ƒe kpɔɖeŋu nyui kae Yosef ɖo?
8 Yosef kple Potifar srɔ̃ na vovototo si le ŋutsunyenye nyuitɔ kple xexeame ƒe nyɔnunyenye dome dze ƒã. Esi Yosef dzeɖekɛ la ƒe nu va lé dzi na Potifar srɔ̃ la, edi be yeablee. Ɣemaɣi la, Mawu mede se aɖeke ɖe matrewɔwɔ alo ahasiwɔwɔ nu woŋlɔ ɖi o. Gake Yosef si le nyɔnu ahasitɔ ma gbɔ eye wòɖee fia be yenye Mawu ƒe ame nyateƒe, amesi ɖea ŋutsunyenye si ŋu Mawu kpɔ ŋudzedze ɖo fiana.—Mose I, 39:7-9, 12.
9, 10. (a) Aleke Fianyɔnu Wasti wɔ eƒe nyɔnunyenye ŋudɔ le mɔ gbegblẽ nui? (b) Nyɔnunyenye ƒe kpɔɖeŋu nyui kae Ester ɖo na mí?
9 Ester kple Fianyɔnu Wasti nye kpɔɖeŋu ɖedzesi vovovo eve na nyɔnuwo. Anɔ eme be Wasti bui be yedze tugbe ale gbegbe be Fia Axasweros awɔ yeƒe didiwo dzi ɣesiaɣi. Gake gota gome tugbe ko wòdze. Ʋuɖɔɖɔ kple nyɔnunyenye menɔ esi o elabena mebɔbɔ eɖokui na srɔ̃a si nye fia la o. Fia la gbee eye wòtia nyɔnu si ɖea nyɔnunyenye vavãtɔ fiana, amesi vɔ̃a Yehowa nyateƒetɔe, be wòanye fiasrɔ̃.—Ester 1:10-12; 2:15-17.
10 Ester nye kpɔɖeŋu nyui aɖe na nyɔnu Kristotɔwo. Ðetugbi la “nyo, eye wòdze tugbe,” ke hã atsyɔ̃ɖoɖo si nye “dzime ƒe ame ɣaɣla le gbɔgbɔ fatu, si nɔa anyi kpoo la, ƒe nɔnɔme magblẽmagblẽ” lae nɔ esi. (Ester 2:7; Petro I, 3:4) Mebu gota gome atsyɔ̃ɖoɖo be eyae nye nu vevitɔ o. Ester ɖe ŋuɖɔɖo kple ɖokuidziɖuɖu fia, eye ebɔbɔ eɖokui na srɔ̃a Axasweros, esime wo detɔwo ƒe agbe ɖo afɔku me gɔ̃ hã. Ester zi ɖoɖoe esime nunya nɔ eme be wòawɔ nenema gake eƒo nu vɔvɔ̃manɔmee esi wòhiã le ɣeyiɣi nyuitɔ dzi. (Ester 2:10; 7:3-6) Ese tɔgãavi Mardoxai si tsi la ƒe aɖaŋuɖoɖo. (Ester 4:12-16) Eɖe lɔlɔ̃ kple nuteƒewɔwɔ na wo detɔwo fia.
Gota Gome Dzedzeme
11. Nukae wòle be wòanɔ susu me na mí le gota gome dzedzeme ŋu?
11 Aleke woawɔ nyɔnunyenye nyuitɔ ƒe nɔnɔme nasu ame si? Vidada aɖe gblɔ be: “Nyonyo la, alakpae, eye tugbedzedze la, yae; nyɔnu, si vɔ̃a Yehowa la, ele be, woakafui.” (Lododowo 31:30) Eyata Mawu vɔvɔ̃ bubutɔe hiã, eye amenuveve, nudzeamewɔwɔ, ʋuɖɔɖɔ, kple aɖe fatu ɖea nyɔnunyenye fiana sã wu ŋutilã me tugbedzedze.—Lododowo 31:26.
12, 13. (a) Nublanuitɔe la, nukawoe dzena le ame geɖe ƒe nuƒoƒo me? (b) Gɔmesese kae le Lododowo 11:22 ŋu?
12 Nublanuitɔe la, ŋutsu kple nyɔnu geɖe medzea nunya le nuƒoƒo me o, eye amenuveve hã mele woƒe aɖe dzi o. Dzugbewo, nya madzetowo, nya ƒaƒãwo, kple ameŋumabumabunyawo koe woƒe nuƒoƒo nye. Ŋutsu aɖewo buna be nya ƒaƒãwo gbɔgblɔe nye ŋutsunyenye, eye nyɔnu aɖewo nɔa wo srɔ̃m movitɔe. Gake ne nyɔnu dze tugbe evɔ mesea nu gɔme o, ehea nya, hegblɔa nya madzetowo, alo dana la, ɖe woate ŋu abui be edze tugbe ŋutɔŋutɔ, wònye nyɔnu vavãtɔ le gɔmesese nyuitɔ nua? ‘Nyɔnu si dze tugbe evɔ mesea nu gɔme o la le abe aƒeha si sikagɛ le ŋɔti me na ene.’—Lododowo 11:22.
13 Tugbedzedze si ŋu nya ƒaƒãwo, nya madzetowo gbɔgblɔ, alo nugɔmemasemase kpe ɖo la masɔ ɖe nyɔnu ƒe dzedzeme ɖesiaɖe si adze le ame ŋu nu o. Le nyateƒe me la, mawumavɔ̃mavɔ̃ ƒe nɔnɔme sia ana amesi dze tugbe alo dze ɖeka gɔ̃ hã maganya kpɔ o. Míate ŋu akpɔe bɔbɔe be ŋutsu alo nyɔnu ƒe dzedzeme ɖeɖe mate ŋu axɔ ɖe dɔmedzoedodo, ɣlidodo, alo amedzudzu teƒe alo ana wòasɔ o. Kristotɔwo katã ate ŋu atsɔ woƒe nuƒoƒo kple nuwɔna si nɔ te ɖe Biblia dzi awɔ nu wòanya kpɔ na Mawu kple wo havi amegbetɔwo, eye ele be woawɔe hã.—Efesotɔwo 4:31.
14. Atsyɔ̃ɖoɖo ka ƒomevie wokafu le Petro I, 3:3-5, eye nukae nèkpɔ tso eŋu?
14 Togbɔ be gbɔgbɔ me nɔnɔmewo dzie nyɔnunyenye kple ŋutsunyenye vavãtɔ nɔ te ɖo hã la, ŋutilã me tutume kple dzedzeme, kpakple awu siwo míedona kple alesi míedonɛ hã, ƒoa nu le mía ŋu. Ðikeke mele eme o be ƒe alafa gbãtɔ me awudodo kple lekewɔwɔ ƒomevi aɖewoe nɔ susu me na apostolo Petro esime wòɖo aɖaŋu na nyɔnu Kristotɔwo be: “[Miaƒe] lekewɔwɔ naganye gota gome lekewɔwɔ to ɖaƒoƒo kple sikadodo kple awudodo me o, ke boŋ wòanye dzime ƒe ame ɣaɣla le gbɔgbɔ fatu, si nɔa anyi kpoo la, ƒe nɔnɔme magblẽmagblẽ me, si xɔ asi sesẽ le Mawu ƒe ŋku me. Elabena nenema ke nyɔnu kɔkɔewo hã, amesiwo kpɔ mɔ na Mawu la, wɔ leke na wo ɖokui tsã, eye wobɔbɔ wo ɖokui na woa ŋutɔwo srɔ̃wo.”—Petro I, 3:3-5.
15. Nukae wòle be nyɔnu Kristotɔwo nadze agbagba aɖe afia le woƒe awudodo me?
15 Paulo hã ƒo nu tso nyɔnuwo ƒe awudodo ŋu le Timoteo I, 2:9, 10 be: “Nyɔnuwo nado awu ɖe nɔnɔme nyui me, eye woawɔ leke na wo ɖokui le ŋukpekpe kple ɖokuidziɖuɖu me . . . nusi dze nyɔnu, siwo ʋua Mawu ƒe subɔsubɔ me la, enye be, woawɔ leke na wo ɖokui to dɔwɔwɔ nyuiwo me.” Ete gbe ɖe ŋuɖɔɖo kple awudodo ɖe nɔnɔme nyui me si ɖea ɖokuidziɖuɖu fiana ƒe hiahiã dzi le afima.
16, 17. (a) Aleke ŋutsu kple nyɔnu geɖe zã awudodo ɖe mɔ gbegblẽ nui egbea? (b) Nya kae míagblɔ le aɖaŋuɖoɖo si le Mose V, 22:5 ŋu?
16 Ne ŋutsu alo nyɔnu, ŋutsuvi alo nyɔnuvi, awɔ nu alo ado awu si anyɔ gbɔdɔdɔ ɖe ame me la, maɖe ŋutsunyenye alo nyɔnunyenye vavãtɔ afia o, eye madze Mawu ŋu kura o. Ame geɖe siwo le xexeame ɖea ŋutsu alo nyɔnu ƒe nɔnɔmewo fiana le awudodo kple nuwɔna me wògbɔa eme. Ame aɖewo hã mena vovototo si le ŋutsu kple nyɔnu dome dzena o le taɖodzinu gbegblẽwo ta. Aleke gbegbe mí Kristotɔwo míate ŋu ada akpee nye si be Biblia ɖe Mawu ƒe susu fia mí! Yehowa gblɔ na blema Israel-viwo be: “Nyɔnu aɖeke megado ŋutsuwu o, eye ŋutsu aɖeke megado nyɔnuwu o; elabena amesi wɔ nusia la, enye ŋunyɔnu na Yehowa.”—Mose V, 22:5.
17 Adzɔ dzi na wò godoo be nàdzro nya si Gbetakpɔxɔ, October 1, 1988, ƒe axa 17 gblɔ le nya sia ŋu me: “Menye atsyã aɖe ƒe tsiadzinɔnɔ wòagbɔ eme ŋue nya la ku ɖo o ke eƒe sɔsɔ na amesi yɔ eɖokui Mawu ƒe subɔla boŋ ye. (Romatɔwo 12:2; Korintotɔwo II, 6:3) Awudodo ɖewoɖewoe wòagbɔ eme alo awu siwo miã ame akpa ate ŋu ahe susu ɖa tso míaƒe gbedasia dzi. Atsyã siwo woɖona koŋ tɔna siwo dzena gaglã be wonaa ŋutsuwo ɖia nyɔnuwo alo nyɔnuwo dzena ŋutsuwoe la mesɔ koŋ o. (Tsɔe sɔ kple Mose V, 22:5.) Le nyateƒe me la, nɔnɔmewo ate ŋu ato vovo le afisi míele, le yame ƒe nɔnɔme, nusiwo hiã le dɔwɔwɔ me, kple nu bubuwo nu, ale be Kristo-hamea medea se sesẽwo tsɔ blaa xexeame katã ƒe nɔviwo ƒe habɔbɔ la o.”
18. Afɔ kawoe míate ŋu aɖe be míawɔ ɖe Biblia ƒe aɖaŋuɖoɖo le awudodo kple lekewɔwɔ ŋu dzi?
18 Aɖaŋuɖoɖo nyui si da sɔ kae nye si! Nublanuitɔe la, Kristotɔ aɖewo, ŋutsuwo kple nyɔnuwo, dzea nusianu si xexeame dona ɖe ŋgɔ le awudodo kple lekewɔwɔ me la yome ko, eye womebua nusi wòɖena fiana le Yehowa kple Kristo-hamea ŋu la ŋuti o. Anyo be mía dometɔ ɖesiaɖe míalé ŋku ɖe mía ɖokui ŋu akpɔ be ɖe xexeame ƒe tamesusu kpɔ ŋusẽ ɖe mía dzi hã. Alo míate ŋu ate ɖe nɔviŋutsu alo nɔvinyɔnu kpɔnuteƒe aɖe si ŋu bubu le ŋu wòagblɔ nusi wòkpɔ na mí le asitɔtrɔ ɖesiaɖe si míate ŋu awɔ le awu si tɔgbe míedona ŋu eye míada aɖaŋuɖoɖoawo akpɔ vevie.
Ŋutsu Kple Nyɔnu Kristotɔwo —Ŋutsu Kple Nyɔnu Vavãwoe Wonye
19. Ŋusẽkpɔɖeamedzi gbegblẽ ka ŋue wòhiã be míawɔ avu atsi tre ɖo?
19 Satana Abosam ye nye xexe sia me mawu eye míate ŋu akpɔ eƒe ŋusẽkpɔɖeamedzi le alesi wòtɔtɔ ŋutsuwo kple nyɔnuwo dome nyae, eye menye le awudodo ɖeɖeko me o. (Korintotɔwo II, 4:4) Le dukɔ aɖewo me la, nyɔnu geɖe ʋlia ho kple ŋutsuwo le tanyenye ŋu, eye wotua afɔkpo Biblia ƒe gɔmeɖosewo. Le go bubu me la, ŋutsu gbogbo aɖewo ɖea ta le woƒe tanyenye ƒe agbanɔamedziwo te abe alesi Adam wɔe ene. Ame aɖewo li siwo dina gɔ̃ hã be yewoatrɔ yewoƒe dzɔdzɔme be woazu ŋutsuwo loo alo nyɔnuwo. (Romatɔwo 1:26, 27) Biblia meyɔ agbenɔnɔ bubu ƒomevi aɖeke si gadzea Mawu ŋu o. Eye amesiame si tɔtɔ le wɔƒe si le esi alo le gbɔdɔdɔ ƒomevi si nyo nɛ ŋu hafi va zu Kristotɔ la ate ŋu aka ɖe edzi be yeƒe viɖe mavɔe wònye be yeanɔ agbe ɖe Mawu ƒe dzidzenu, si adze amesiwo katã aɖo amegbetɔ ƒe blibodede gbɔ ŋu godoo la nu.
20. Ŋusẽ kae wòle be Galatiatɔwo 5:22, 23 nakpɔ ɖe míaƒe nukpɔsusu le ŋutsunyenye kple nyɔnunyenye ŋu dzi?
20 Ŋɔŋlɔawo ɖee fia be ele be ŋutsu kple nyɔnu Kristotɔwo natu Mawu ƒe gbɔgbɔ ƒe kutsetsewo ɖo ahaɖee afia—woawoe nye lɔlɔ̃, dzidzɔ, ŋutifafa, dzigbɔgbɔ blewu, dɔmekɔkɔ, dɔmenyonyo, xɔse, dɔmefafa, kple ɖokuidziɖuɖu. (Galatiatɔwo 5:22, 23) Le Mawu ƒe nunya gã ta la, ewɔ ŋutsuwo be woate ŋu ana woƒe ŋutsunyenye nanyo ɖe edzi eye nyɔnuwo nate ŋu ana woƒe nyɔnunyenye nanyo wu to nɔnɔme mawo tutuɖo me. Ele bɔbɔe be woade bubu ŋutsu si tsea gbɔgbɔa ƒe kuwo la ŋu eye nyɔnu si tsenɛ hã nya lɔ̃na.
21, 22. (a) Kpɔɖeŋu kae Yesu ɖo le agbenɔnɔ gome? (b) Aleke Yesu ɖe eƒe ŋutsunyenye fiae?
21 Yesu Kristo enye ame vevitɔ kekeake si nɔ anyi kpɔ, eye alesi wònɔ agbee ye wòle be Kristotɔwo nasrɔ̃. (Petro I, 2:21-23) Ele be ŋutsuwo kple nyɔnuwo nawɔ nuteƒe na Mawu eye woawɔ ɖe Eƒe Nya la dzi abe alesi Yesu wɔe ene. Yesu ɖe nɔnɔme nyui siwo nye lɔlɔ̃, belélename, kple dɔmenyo fia. Wodi tso mí nyateƒe Kristotɔwo si be míasrɔ̃ eyama atsɔ aɖee fia be eƒe nusrɔ̃lawoe míenye.—Yohanes 13:35.
22 Yesu Kristo nye ŋutsu ɖota, eye míate ŋu akpɔ eƒe ŋutsunyenye ƒe nɔnɔmewo ne míesrɔ̃ eƒe agbemeŋutinya siwo le Ŋɔŋlɔawo me. Meɖe srɔ̃ o, gake Biblia gblɔ be ede ha kple nyɔnuwo wòda sɔ. (Luka 10:38, 39) Eƒe hadede kple ŋutsuwo kple nyɔnuwo nɔ dzadzɛ eye bubu nɔ eme ɣesiaɣi. Enye ŋutsunyenye ƒe kpɔɖeŋu deblibo. Meɖe mɔ ame aɖeke—ŋutsu, nyɔnu, alo mawudɔla maɖoto—gblẽ eƒe mawu me ŋutsunyenye kple nuteƒewɔwɔ na Yehowa me o. Mehe ɖe megbe le eƒe agbanɔamedziwo xɔxɔ ŋu o eye etsɔ wo nyatoƒoematomatoe.—Mateo 26:39.
23. Aleke woyra Kristotɔwo etɔxɛe le akpa siwo ŋutsu kple nyɔnuwo wɔna gome?
23 Dzidzɔ ka gbegbee nye si wònye be míanɔ Yehowa ƒe amewo dome ade ha kple ŋutsuwo kple nyɔnuwo, kpakple ŋutsuviwo kple nyɔnuviwo, amesiwo ƒe nu vevitɔ le agbe me enye be woalɔ̃ Yehowa Mawu ahaɖo toe! Toɖoɖo Mawu ƒe Nya mexaxaa mí o. Ke boŋ ena míevo tso xexe sia kple eƒe mɔ siwo gblẽa ŋutsuwo kple nyɔnuwo ƒe atsyɔ̃, tameɖoɖo, kple woƒe ɖoƒe vovovoawo me la me. Míate ŋu akpɔ dzidzɔ vavãtɔ si tsoa ɖoƒe si Mawu na mí le agbe me dzi wɔwɔ me, míeɖanye ŋutsu alo nyɔnu o. Ẽ, aleke gbegbe míedaa akpe na Yehowa Mawu, Wɔla la enye si, ɖe lɔlɔ̃ ƒe ɖoɖo siwo katã wòwɔ na mí, kple alesi wòwɔ mí ŋutsuwo kple nyɔnuwoe ta!
Aleke Nàɖo Wo Ŋui?
◻ Ŋutsuwo kple nyɔnuwo ƒe wɔƒe nyui kawo ŋue Biblia ƒo nu tsoe?
◻ Aleke wotɔtɔ ŋutsunyenyee do ŋgɔ na Tsiɖɔɖɔa, eye aleke wotro eya kple nyɔnunyenye le míaƒe ɣeyiɣia me?
◻ Aɖaŋuɖoɖo kae Biblia ɖo le ame ƒe dzedzeme ŋu si nàdi be yeatsɔ awɔ dɔe?
◻ Aleke ŋutsu kple nyɔnu Kristotɔwo ate ŋu aɖee fia be ŋutsu kple nyɔnu vavãwoe yewonye?
[Nɔnɔmetata si le axa 17]
Togbɔ be Ester dze tugbe hã la, eƒe ʋuɖɔɖɔ kple eɖokuiléle kpakple tufafa ƒe nɔnɔme koŋ dzie míeɖoa ŋkui
[Nɔnɔmetata si le axa 18]
Lé ŋku ɖe wò lekewɔwɔ ŋu wòasɔ gake nàlé fɔ ɖe ememe ƒe tugbedzedze ŋu geɖe wu