Vɔ Nyoameŋuwo Sasa Na Yehowa

ƔEAÐEƔI le blema la, nukpɔkpɔ wɔnuku aɖe nɔ dzedzem le Eden-bɔa ƒe ɣedzeƒe mɔ nu.a Kerubi sesẽwo nɔ mɔa nu dzɔm, eye woƒe dzedzeme si ɖi vɔvɔ̃ la na eme kɔ ƒã be ame aɖeke nagaka atse ato afima o. Nenema ke yi si nɔ eɖokui trom henɔ keklẽm abe dzo ƒe aɖe ene si anya klẽ ɖe ati siwo nɔ afima dzi le zã me la hã mana ame aɖeke nagogo afima o. (Mose I, 3:24) Togbɔ be nusia kpɔkpɔ adzro ame vevie hã la, ekpɔla ɖesiaɖe anɔ adzɔge nɛ.

Ðewohĩ Kain kple Habel wode teƒe sia zi geɖe. Esi wònye abɔa godo ye Adam kple Xawa nɔ hafi dzi wo ta la, susu koe woatsɔ akpɔ alesi Paradiso me nɔnɔ anɔ ɖa, abe alesi wo dzilawo nɔ eme tsã ene, afisi gbe dama siwo kpɔa tsi ɣesiaɣi kple atikutsetsewo kpakple agblemenu bubuwo bɔ ɖo. Ðikekemanɔmee la, teƒe si womegaŋlɔna o wòto gbe ŋutɔ koe Eden ƒe akpa si woate ŋu akpɔ fifia nye.

Kokoko la, Adam kple Xawa agblɔ nusita womegaŋlɔa abɔa me o kple nusita wonyã wo ɖa le eme la na wo viwo. (Mose I, 2:17; 3:6, 23) Aleke gbegbe wòate ɖe Kain kple Habel dzi vevie enye si! Wote ŋu kpɔa abɔa, gake womate ŋu age ɖe eme o. Wonɔ Paradiso kpɔm alea, gake woƒe afɔ mede eme o. Blibomademade gblẽ wo dome eye naneke meli Kain alo Habel nawɔ le eŋu o.

Alesi wo dzilawo dome nɔ hã mate ŋu ana nɔnɔmea naka ɖe eme gbeɖe o. Esime Mawu nɔ Xawa ƒe tohenyawo gblɔm la, egblɔ be: “Wò tame anɔ srɔ̃wò ŋu, eye eya anye gã ɖe dziwò.” (Mose I, 3:16) Le nyagblɔɖi sia me vava me la, ɖewohĩ Adam va nɔ aƒetɔ ɖum ɖe srɔ̃a dzi azɔ eye meganɔ nu wɔm ɖe eŋu abe zɔhɛ kple kpeɖeŋutɔ ene o. Eye edze abe Xawa va nɔ ŋutsu sia sinu kpɔm akpa ene. Numeɖegbalẽ aɖe gagblɔ nyaa yi ŋgɔe gɔ̃ hã be ‘eƒe tame si nɔ srɔ̃a ŋu’ “va nye dzodzro si le abe dɔléle ene.”

Biblia megblɔ alesi gbegbe srɔ̃ɖegbenɔnɔ sia gblẽ nu le bubu si ŋutsuviawo tsɔ naa wo dzilawo ŋu o. Gake edze ƒã be Adam kple Xawa ɖo kpɔɖeŋu ɖefuname aɖe ɖi na wo viwo.

Mɔ Vovovo Tiatia

Le ɣeyiɣi aɖe megbe la, Habel va zu lãnyila eye Kain zu agbledela. (Mose I, 4:2) Ðikeke mele eme o be esi Habel nɔ lãawo gbɔ kpɔm la, ɣeyiɣi geɖe su esi wòtsɔ de ŋugble le nya tɔxɛ si wogblɔ ɖi hafi nyã wo dzilawo le Eden ŋu, si nye be: “Made adikã mia kple nyɔnu la dome, wò dzidzime kple nyɔnu la ƒe dzidzime dome, eya la agbã ta na wò, eye wò la àɖu afɔkpodzi nɛ.” (Mose I, 3:15) Ðewohĩ Habel abia eɖokui be, ‘Aleke Mawu ƒe ŋugbe si wòdo be dzidzimevi aɖe ava gbã ta na da la ava emee, eye aleke woaɖu afɔkpodzi na dzidzimevi siae?’

Le ɣeyiɣi aɖe megbe ɖewohĩ esi Kain kple Habel wozu ame tsitsiwo vɔ la, wo dometɔ ɖesiaɖe sa vɔ na Yehowa. Esi Habel nye lãnyila ta la, mewɔ nuku o be etsɔ “eƒe lãwo ƒe ŋgɔgbevi, siwo dami la ƒe ɖewo” sa vɔe. Gake Kain ya tsɔ “agblemenu aɖewo” sa vɔe. Habel ƒe vɔsa nyo Yehowa ŋu, gake “Kain kple eƒe nunana ya medze eŋu o.” (Mose I, 4:3-5) Nukatae medze eŋu o?

Ame aɖewo gblɔna be esi Habel ƒe vɔsawo nye “eƒe lãwo ƒe ŋgɔgbevi,” eye Kain tɔ nye “agblemenu aɖewo” dzro ko tae. Gake kuxia metso agblemenu siwo Kain tsɔ sa vɔe ƒe nyonyome gbɔ o, elabena nuŋlɔɖia gblɔ be “Habel kple eƒe nunana dze [Yehowa] ŋu,” “ke Kain kple eƒe nunana ya medze eŋu o.” Eyata tadeagula la ƒe dzi ƒe nɔnɔme koŋue Yehowa kpɔ. Nukae wòde dzesii esi wòkpɔe? Hebritɔwo 11:4 gblɔ be Habel sa eƒe vɔa “le xɔse me.” Eyata edze ƒã be xɔse si na Habel ƒe vɔsa nyo Mawu ŋu la menɔ Kain si o.

Ele be míade dzesii le go sia me be wokɔ ʋu ɖi le Habel ƒe vɔsasa me. Ðewohĩ esusui wòsɔ be ŋugbe si Mawu do be woaɖu afɔkpodzi na dzidzimevi aɖe la abia agbe tsɔtsɔ sa vɔe. Eyata Habel ƒe vɔsaa anye kukuɖeɖe be woalé avu, eye enye xɔse ɖeɖe fia be Mawu ana avulévɔsa si sɔ le ɣeyiɣi nyuitɔ dzi.

Gake ɖewohĩ Kain ya mebu vɔsaa ŋu boo o. Ƒe alafa 19 lia me Biblia-meɖela aɖe gblɔ be: “Eƒe vɔsaa fia ko be eya hã lɔ̃ be Mawu nye nunala. Edze ƒã be medze sii ŋutɔŋutɔ be naneke gblẽ le ye kple ye Wɔla dome o, eye mekpɔe gɔ̃ hã be nuvɔ̃meʋuʋu hiã loo alo be ehiã be woalé avu ɖe ye ta o.”

Gakpe ɖe eŋu la, ɖewohĩ esi Kain nye ŋgɔgbevi ta esusu dadatɔe be yee nye dzidzimevi si ŋugbe wodo si atsrɔ̃ Satana si nye Da la. Nugãdidi ƒe susu sia anya nɔ Xawa hã me na eƒe ŋgɔgbevi la. (Mose I, 4:1) Le nyateƒe me ne nusiae Kain kple Xawa kpɔ mɔ na la, ke woda ƒu ŋutɔ.

Biblia megblɔ alesi Yehowa ɖe eƒe ŋudzedzekpɔkpɔ fia ɖe Habel ƒe vɔsa la ŋu o. Ame aɖewo gblɔ be ɖewohĩ dzoe tso dziƒo va fiãe. Aleke kee nya la nɔ o, esi Kain kpɔe be womexɔ yeƒe vɔsaa o ko la, “[ebi] dzi ŋutɔ, eye wòɖo adã.” (Mose I, 4:5) Kain ɖo ta afɔku me.

Aɖaŋu si Yehowa Ðo Kple Alesi Kain Xɔe

Yehowa dzro nu me kple Kain. Ebiae be: “Nukaŋuti nèle dzi bim, eye nukaŋuti nèle adã ɖom?” Esia na mɔnukpɔkpɔ geɖe Kain be wòagbugbɔ adzro eƒe seselelãmewo kple nukpɔsusuwo me hafi. Yehowa yi edzi be: “Ne èwɔ nyui la, wò ŋku me akɔ, ke ne mèwɔ nyui o la, ekema nuvɔ̃ de xa ɖe ʋɔtru nu, eye wòɖo tame aɖe ɖe ŋuwò; ke wò la ɖu edzi!”—Mose I, 4:6, 7. (Kpɔ aɖaka si le axa 23.)

Kain sẽ to. Nusi wòwɔ boŋ enye be ekplɔ Habel yi gbeme va wui. Emegbe esi Yehowa bia Kain be afika Habel nɔ hã la, egada alakpa ƒu eƒe nuvɔ̃a dzi. Eda gbe ɖo ɖa be: “Nyemenyae o! Alo nɔvinye dzikpɔla menyea?”—Mose I, 4:8, 9.

Do ŋgɔ hafi Kain nawu Habel kple emegbe siaa la, egbe be ‘yematrɔ ɖe nunyuiwɔwɔ ŋu o.’ Elɔ̃ ɖe mɔ nuvɔ̃a ɖu edzi, eye le esia ta wonyã Kain ɖa le nuto si me amegbetɔƒomea nɔ. Wode “dzesi” aɖee, ɖewohĩ anye sedede sesẽ aɖe koe, be ame aɖeke nagawu Kain atsɔ abia hlɔ̃ ɖe Habel ƒe ku ta o.—Mose I, 4:15.

Emegbe Kain va tso du, eye wòtsɔ viaŋutsu ƒe ŋkɔ nɛ. Mewɔ nuku o be eƒe dzidzimeviwo va xɔ ŋkɔ le woƒe ŋutasesẽ ta. Mlɔeba la, Kain ƒe ƒome nu tso esime Tsiɖɔɖɔ lé ame madzɔmadzɔwo katã le Noa ŋɔli.—Mose I, 4:17-24; 7:21-24.

Womekpɔ Kain kple Habel ƒe ŋutinya si le Biblia me ta be míaxlẽ atsɔ aɖe modzakae ko o. Ke boŋ ɖe “woŋlɔe le míaƒe nufiafia” ta eye “enyo hã na nufiafia, na ɖɔɖɔɖo.” (Romatɔwo 15:4; Timoteo II, 3:16) Nukae míate ŋu asrɔ̃ tso ŋutinya sia me?

Nusɔsrɔ̃ si Le Eme na Mí

Abe Kain kple Habel ene la, wobia tso Kristotɔwo hã si egbea be woasa vɔ na Mawu—menye numevɔsa ŋutɔŋutɔ o, ke boŋ “kafukafuvɔsa . . . [si] nye nuyi, siwo ʋua eŋkɔ me la, ƒe kutsetse.” (Hebritɔwo 13:15) Wole nusia wɔm le xexeame katã fifia, le esime Yehowa Ðasefowo le gbeƒã ɖem Mawu ƒe Fiaɖuƒe ŋuti nyanyuia le dukɔ 230 kple edzivɔ me. (Mateo 24:14) Ðe nèle gome kpɔm le dɔ sia wɔwɔ mea? Ekema kakaɖedzi nenɔ asiwò be ‘Mawu menye madzɔmadzɔtɔ be, wòaŋlɔ wò dɔwɔwɔ kple lɔlɔ̃, si nèɖe fia le eƒe ŋkɔ ta, la be o.’—Hebritɔwo 6:10.

Abe alesi wònɔ le Kain kple Habel ƒe vɔsawo gome ene la, menye wò vɔsaa ƒe gotagomedzedzemee wotsɔ nyaa eƒe nyonyome o—le kpɔɖeŋu me, menye gaƒoƒo agbɔsɔsɔme si nèzã le gbeadzie wotsɔ kpɔnɛ o. Yehowa kpɔa nu wòdea to wu ema. Yeremya 17:10 gblɔ be “[edzroa] dziwo me” eye ‘edoa ayikuwo’—si nye ame ƒe tamesusu goglowo, seselelãmewo, kple nusiwo ʋãnɛ—gɔ̃ hã ‘kpɔna.’ Eyata nu vevitɔe nye ameʋãŋusẽ, ke menye agbɔsɔsɔme o. Le nyateƒe me la, eɖanye ɖe vɔsaa lolo alo le sue o, exɔa asi le Mawu ŋkume ne wonae tso dzi si lɔlɔ̃ ʋã me ko.—Tsɔ Marko 12:41-44 sɔ kple 14:3-9.

Le ɣeyiɣi ma ke me la, ele be míanya be vɔsa siwo metso dzi me o madze Yehowa ŋu o, abe alesi ko mexɔ Kain ƒe vɔsa si metso eƒe dzi blibo me o ene. (Maleaxi 1:8, 13) Yehowa bia be nàwɔ tɔwò sinua katã, be nàtsɔ wò dzi, luʋɔ, susu, kple ŋusẽ katã asubɔ ye. (Marko 12:30) Èle ewɔm nenema? Ke susu geɖe le asiwò siwo ta wò vɔsawo nadze ŋuwò. Paulo ŋlɔ bena: “Amesiame nado ye ŋutɔ ƒe dɔwɔwɔ akpɔ, ekema akpɔ nu aƒo adegbe le ye ŋutɔ ɖokui ɖeɖeko me, eye menye le ame bubu me o.”—Galatiatɔwo 6:4.

Hehe ɖeka ƒomevie wona Kain kple Habel. Gake ɣeyiɣi siwo va yi kple nɔnɔme siwo me woto wɔe be mɔnukpɔkpɔ su wo dometɔ ɖesiaɖe si be wòtu nɔnɔme tɔxɛwo ɖo. Vivivi la, ŋuʋaʋã, dzrehehe, kple dɔmedzoedodowo va gblẽ Kain ƒe nɔnɔme dome.

Gake Mawu gaɖoa ŋku Habel dzi le ame dzɔdzɔe si wònye ta. (Mateo 23:35) Alesi Habel ɖoe kplikpaa be yeadze Mawu ŋu nuka kee ɖadzɔ o na wòto vovo ale gbegbe tso ame madakpe siwo le eƒe ƒomea me gbɔ—siwo nye Adam, Xawa, kple Kain. Biblia gblɔ na mí be togbɔ be Habel ku hã la, “egale nu ƒom.” Alesi wòsubɔ Mawu nuteƒewɔwɔtɔe hã le ŋutinya siwo woŋlɔ ɖe Biblia me siwo anɔ anyi ɖaa la dome. Mina míato vɔsa siwo nyoa Mawu ŋu sasa nɛ ɣesiaɣi me anye Habel ƒe kpɔɖeŋu srɔ̃lawo.—Hebritɔwo 11:4.

[Etenuŋɔŋlɔ]

[Aɖaka/Nɔnɔmetata si le axa 23]

Kpɔɖeŋu na Kristotɔ Aɖaŋuɖolawo

“NUKAŊUTI nèle dzi bim, eye nukaŋuti nèle adã ɖom?” Nya siae Yehowa bia tsɔ dzro nu me kple Kain tufafatɔe. Mezi Kain dzi be wòatrɔ o, elabena tiatiawɔwɔblɔɖe le esi. (Tsɔe sɔ kple Mose V, 30:19.) Ke hã Yehowa megbe nusiwo ado tso Kain ƒe godzenuwɔwɔa me gbɔgblɔ nɛ o. Exlɔ̃ nu Kain be: “Ne mèwɔ nyui o la, ekema nuvɔ̃ de xa ɖe ʋɔtru nu, eye wòɖo tame aɖe ɖe ŋuwò.”—Mose I, 4:6, 7.

Nusi wòle be míade dzesii enye be togbɔ be Yehowa na mokaka sẽŋu sia hã la, mewɔ nu ɖe Kain ŋu abe ‘amesi ŋu wɔna vɔ le’ ene o. Ke boŋ egblɔ yayra siwo Kain akpɔ ne wòtrɔ eƒe nɔnɔme, eye kakaɖedzi nɔ esi be Kain ate ŋu aɖu kuxi sia dzi ne edi be yeaɖu edzi. Yehowa gblɔ be: “Alo menye ale wòle oa? Ne èwɔ nyui la, wò ŋku me akɔ.” Azɔ egblɔ na Kain le eƒe dziku vɔ̃ɖia ŋu be: “Ke wò la ɖu edzi!”

Egbea ele be hamemegã siwo le Kristo-hamea me nasrɔ̃ Yehowa ƒe kpɔɖeŋua. Abe alesi woŋlɔe ɖe Timoteo II, 4:2 ene la, ɣeaɖewoɣi ele be ‘woaka mo’ ‘ahagbe nya,’ eye woagblɔ nusi ado tso agɔdzela la ƒe godzenuwɔna me nɛ tẽ. Le ɣeyiɣi ma ke me la, ele be hamemegãwo ‘naxlɔ̃ nu.’ Helagbe me nya pa·ra·ka·leʹo fia “be woade dzi ƒo.” Theological Dictionary of the New Testament gblɔ be: “Nuxlɔ̃amea menye nyatɔame, nyaheɖeameŋu, alo ɖeklemiɖeɖe o. Esi nyaa agate ŋu afia akɔfafa ta la, efia be ­gɔmesese ɖeka koe le eŋu.”

Nya vevi aɖee nye be, Helagbe me nya bubu si de eɖi ge, si nye pa·raʹkle·tos, ate ŋu afia kpeɖeŋutɔ alo ametaʋlila le ʋɔnunya me. Eyata ne hamemegãwo le mo kam tẽ hã la, ele be woaɖo ŋku edzi be kpeɖeŋutɔwoe yewo nye—yewomenye adikãtɔwo o—na amesi yewole aɖaŋua ɖom na. Ele be nukpɔsusu nyui nanɔ hamemegãawo si abe Yehowa ene, woaka ɖe edzi be amesi yewole aɖaŋua ɖom na ate ŋu aɖu eƒe kuxia dzi.—Tsɔe sɔ kple Galatiatɔwo 6:1.

Gake mlɔeba la, ekpɔ amea ƒe ŋkume be wòawɔ nuxlɔ̃amea dzi. (Galatiatɔwo 6:5; Filipitɔwo 2:12) Ðewohĩ aɖaŋuɖolawo akpɔ be ame aɖewo mexɔa yewoƒe aɖaŋuɖoɖowo o, abe alesi Kain gbe Wɔla la ŋutɔ ƒe mokaname xɔxɔ ene. Gake ne hamemegãwo srɔ̃ Yehowa, amesi nye Kpɔɖeŋuɖola deblibo na Kristotɔ aɖaŋuɖolawo la, kakaɖedzi ate ŋu anɔ wo si be nusi wòle be yewoawɔe yewowɔ.