Henox Zɔ Kple Mawu le Xexe Mavɔ̃mawu Me

ABOSAM gblɔ be yeate ŋu ahe amewo katã ɖa tso Mawu gbɔ, eye edzena ɣeaɖewoɣi abe ɖe wòle dzidzedze kpɔm ene. Anɔ ƒe alafa atɔ̃ le Abel ƒe ku megbe la, ame aɖeke meɖee fia be yenye Yehowa subɔla nuteƒewɔla o. Ðe eteƒe la, nuvɔ̃wɔwɔ kple mawumavɔ̃mavɔ̃e zu numame na amewo.

Henox nɔ agbe le ɣeyiɣi si me amewo ƒe gbɔgbɔmemenyenye gblẽ alea gbegbe la me. Biblia ƒe ɣeyiɣikɔntabubu fia be wodzii le ƒe 3404 D.M.Ŋ. To vovo na eŋɔlimetɔwo la, Henox va nye amesi ƒe nu nyo Mawu ŋu. Apostolo Paulo tsɔ eya hã kpe ɖe Yehowa subɔla siwo ƒe xɔse ɖe dzesi wònye kpɔɖeŋu na Kristotɔwo ŋu. Amekae nye Henox? Kuxi kawoe dze ŋgɔe? Aleke wòwɔ kpe akɔ kple wo? Eye aleke eƒe nuteƒewɔwɔa ka míi?

Le Enos ƒe ŋkekeawo me, si nye ƒe alafa ene kloe do ŋgɔ na Henox ƒe ɣeyiɣia la, “amewo de asi Yehowa ƒe ŋkɔyɔyɔ me.” (Mose I, 4:26) Wote Mawu ƒe ŋkɔ zazã tso ameƒomea ƒe ŋutinya ƒe gɔmedzedze ke. Eyata edze kɔte be nusi wɔm wonɔ le Enos ƒe agbemeŋkekeawo me menye Yehowa ƒe ŋkɔa yɔyɔ le xɔse kple tadedeagu vavãtɔ me o. Hebrigbenyalagã aɖewo gblɔ be ele be woaxlẽ Mose I, 4:26 ale, “wote ɖiƒoƒo,” alo “eye ɖiƒoƒo dze egɔme.” Amewo anya tsɔ Yehowa ƒe ŋkɔ na wo ɖokui alo tsɔe na ame bubu siwo wòdze abe woawo dzie wotona subɔa Mawu ene. Alo ɖewohĩ woanya tsɔ eƒe ŋkɔa na legbawo.

‘Henox Zɔ Kple Mawu Vavã La’

Togbɔ be mawumavɔ̃mavɔ̃ nuwɔna ƒo ɣla Henox hã la, ‘eyi edzi zɔ kple Mawu vavã,’ Yehowa. Womeƒo nu tso etɔgbuiwo—Set, Enos, Mahalalel, kple Yered—ŋu be wozɔ kple Mawu o. Ðewohĩ womewɔe wòde Henox, amesi edze ƒã be eƒe agbenɔnɔ na wòɖe dzesi, tɔ nu o.—Mose I, 5:3-27.

Zɔzɔ kple Yehowa fia be woanɔ ƒomedodo kplikplikpli me kple Mawu eye enɔ bɔbɔe na Henox elabena enɔ agbe wòsɔ kple Mawu ƒe lɔlɔ̃nu. Yehowa kpɔ ŋudzedze ɖe Henox ƒe mawusosroɖa ŋu. Le nyateƒe me, Helagbe me Septuagint gblɔ be, ‘Henox ƒe nu nyo Mawu ŋu ale gbegbe,’ eye apostolo Paulo hã ɖe susu ma ke gblɔ.—Mose I, 5:22; Hebritɔwo 11:5.

Xɔse si nɔ Henox si enye nu vevi si na ƒomedodo nyui nɔ eya kple Yehowa dome. Anya xɔ Mawu ƒe “nyɔnua” ƒe “dzidzimevi” ŋuti ŋugbedodoa dzi se. Ne Henox nya Adam nyuie la, ke anya xɔ nyatakaka siwo ku ɖe alesi Mawu wɔ nu kple ame eve gbãtɔawo le Eden-bɔa me ŋu. Mawu ŋuti sidzedze si su Henox sie na wònye ‘amesi dinɛ vevie.’—Mose I, 3:15; Hebritɔwo 11:6, 13.

Le Henox kple mía gome siaa la, kadodo nyui me nɔnɔ kple Yehowa bia nu geɖe wu Mawu ŋuti sidzedze ɖeɖeko ƒe amesi susu. Ne míedea asixɔxɔ kadodo si le mía kple ame aɖe dome ŋu la, ɖe menye nyateƒe be eƒe nukpɔsusu kpɔa ŋusẽ ɖe míaƒe tamesusu kple nuwɔnawo dzi oa? Míeƒoa asa na nya alo nuwɔna siwo agblẽ míaƒe xɔlɔ̃wɔwɔa dome. Eye ne míele ŋugble dem le asitɔtrɔ wɔwɔ le míaƒe nɔnɔmewo ŋu la, ɖe míebua alesi nusia akpɔ ŋusẽ ɖe ƒomedodo ma dzi ŋu oa?

Didi be míalé ƒomedodo kplikplikpli me nɔnɔ kple Mawu me ɖe asi hã kpɔa ŋusẽ ɖe nusiwo míewɔna dzi. Nu vevitɔ wu enye sidzedze vavãtɔ si asu mía si le nusiwo dzea eŋu kple nusiwo wòtsri ŋu. Emegbe ele be míana sidzedze sia nakplɔ mí, anɔ kutri kum be míadze eŋu le míaƒe tamesusu kple nuwɔna me.

Nyateƒee, ne míazɔ kple Mawu la, ke ele be míawɔ nusiwo dzea eŋu. Esiae Henox wɔ ƒe alafa geɖe. Le nyateƒe me, Hebrigbe me dɔwɔnya si fia be Henox “zɔ” kple Mawu fia nuwɔna si yia edzi ɖaa. Ame bubu aɖe si ‘zɔ kple Mawu’ enye Noa.—Mose I, 6:9.

Henox nye ƒome ƒe ta si si srɔ̃ kple ‘viŋutsuwo kple vinyɔnuwo’ nɔ. Viawo dometɔ ɖekae nye Metusala. (Mose I, 5:21, 22) Henox anya wɔ etɔ sinua le eƒe ƒomea dzikpɔkpɔ nyuie me godoo. Esi mawumavɔ̃mavɔ̃ ƒo ɣlae ta la, Mawu subɔsubɔ menɔ bɔbɔe nɛ o. Anye be Lamex, Noa fofo, koe nye Henox ŋɔlimetɔ si hã xɔ Yehowa dzi se. (Mose I, 5:28, 29) Ke hã Henox wɔ tadedeagu vavãtɔ ŋudɔ dzinɔameƒotɔe.

Nukawoe kpe ɖe Henox ŋu wòwɔ nuteƒe na Mawu? Ðikeke mele eme o be mede ha kple amesiwo ƒoa ɖi Yehowa ƒe ŋkɔ alo ame bubu siwo medze be Mawu subɔla nade ha kplii o. Yehowa ƒe kpekpeɖeŋu biabia le gbedodoɖa me anya do ŋusẽ Henox ƒe tameɖoɖo kplikpaa be yeaƒo asa na nusiwo katã medzea Ewɔla la ŋu o.

Egblɔ Nya Ði ɖe Ame Mavɔ̃mawuwo Ŋu

Dzidzenu kɔkɔwo me léle ɖe asi sesẽna ŋutɔ ne míele ame mavɔ̃mawuwo dome. Gake Henox gblɔ ʋɔnudrɔ̃gbedasi sesẽ aɖe ɖe ame vɔ̃ɖiwo ŋu. Mawu ƒe gbɔgbɔ ʋã Henox wògblɔ nya ɖi be: “Kpɔ ɖa, [Yehowa] kple eƒe ame kɔkɔe akpe nanewo gbɔna, bene wòadrɔ ʋɔnu wo katã, eye woaka mo na wo dome amesiwo katã mevɔ̃a Mawu o la, le woƒe dɔwɔwɔ vlo, siwo katã wowɔ mawumavɔ̃mavɔ̃e kple nya sesẽ, siwo katã nuvɔ̃wɔla mavɔ̃mawuwo gblɔ ɖe eŋuti la ta.”—Yuda 14, 15.

Ŋusẽ kae gbedasi ma akpɔ ɖe dzimaxɔsetɔ vɔ̃ɖiwo dzi? Míate ŋu akpɔe le susu me be nya siawo atɔ tome na ameawo eye womadi be yewoakpɔ Henox o, ɖewohĩ woanɔ ɣli dom ɖe eta, anɔ fewu ɖum, eye woanɔ ŋɔdzi dom nɛ. Ame aɖewo adi be yewoabù mo nɛ kura. Gake esia medo ŋɔdzi na Henox o. Enya nusi dzɔ ɖe ame dzɔdzɔe Abel dzi, eyata Henox hã ɖoe kplikpaa be yeasubɔ Mawu nuka kee ɖadzɔ o.

“Mawu Kplɔe Dzoe”

Edze ƒã be Henox ƒe agbe ɖo afɔku me esime “Mawu kplɔe dzoe.” (Mose I, 5:24) Yehowa meɖe mɔ be eƒe nyagblɔɖila nuteƒewɔla la nakpe fu le futɔ ŋutasẽlawo si me o. Apostolo Paulo gblɔ be, “wotsɔ Henox yii, bene magakpɔ ku o.” (Hebritɔwo 11:5) Ame geɖe gblɔna be Henox meku o—be Mawu kplɔe yi dziƒo afisi wòyi edzi nɔ agbe le. Gake Yesu gblɔe eme kɔ ƒã be: “Ame aɖeke melia yi dziƒo kpɔ o, negbe amesi ɖi tso dziƒo va ko, eyae nye Amegbetɔvi, si le dziƒo.” Yesu enye amesiwo katã yi dziƒo ƒe “mɔtala.”—Yohanes 3:13; Hebritɔwo 6:19, 20.

Ekema nukae dzɔ ɖe Henox dzi? Etsɔtsɔ “yii bene magakpɔ ku o” ate ŋu afia be Mawu na wònɔ ŋutega vevi aɖe kpɔm eye wòna eƒe agbe nu tso esime wògakpɔtɔ le nɔnɔme ma me. Le nɔnɔme ma me la, Henox magate ŋu ase veve heliheli hafi aku o. Emegbe “womegakpɔe o,” anɔ eme be Yehowa ɖi eƒe ŋutilã abe alesi wòɖi Mose tɔ ene.—Mose V, 34:5, 6.

Henox nɔ agbe ƒe 365—esia mede eŋɔlimetɔ geɖe ƒe agbenɔƒe nu o. Nusi le vevie na Yehowa subɔlawo enye be woasubɔe nuteƒewɔwɔtɔe vaseɖe woƒe agbe ƒe nuwuwu. Míenyae be Henox wɔ esia “elabena hafi woatsɔe ayii la, woɖi ɖase nɛ bena, edze Mawu ŋu nyuie.” Ŋɔŋlɔawo megblɔ alesi Yehowa wɔ ɖe esia fia Henox o. Ke hã hafi Henox naku la, wona kakaɖedzii be Mawu kpɔ ŋudzedze ɖe eŋu, eye míate ŋu aka ɖe edzi be Yehowa aɖo ŋku edzi le tsitretsitsia me.

Srɔ̃ Henox ƒe Xɔse

Míate ŋu asrɔ̃ mawumemewo ƒe xɔse memie. (Hebritɔwo 13:7) Xɔse mee Henox to zu Mawu ƒe nyagblɔɖila nuteƒewɔla gbãtɔ. Xexe si nɔ anyi le Henox ƒe ŋkekeawo me le abe mía tɔ ene—ŋutasesẽ, busunuwɔwɔ, kple mawumavɔ̃mavɔ̃ ye bɔ. Ke hã Henox to vovo. Xɔse vavãtɔ nɔ esi eye wònye kpɔɖeŋuɖola le mawusosroɖa me. Nyateƒee, Yehowa tsɔ ʋɔnudrɔ̃gbedasi sẽŋu aɖe nɛ be wòagblɔ, gake edo ŋusẽe be wòate ŋu agblɔe. Henox tsɔ dzinɔameƒo wɔ eƒe dɔdasia, eye Mawu kpɔ eta le futɔwo ƒe tsitretsiɖeŋu me.

Ne míeɖe xɔse fia abe Henox ene la, Yehowa ado ŋusẽ mí be míagblɔ eƒe gbedasia le ŋkeke mamlɛ siawo me. Ado ŋusẽ mí be míato tsitretsiɖeŋuwo me dzinɔameƒotɔe, eye míaƒe mawusosroɖa ana míato vovo kura na ame mavɔ̃mawuwo. Xɔse akpe ɖe mía ŋu míazɔ kple Mawu eye míawɔ nu le mɔ si dzea eŋu nu. (Lododowo 27:11) Xɔsee na ame dzɔdzɔe Henox te ŋu kpɔ dzidzedze le zɔzɔ kple Yehowa me le xexe mavɔ̃mawu me, eye míawo hã míate ŋui.

[Aɖaka si le axa 30]

Ðe Biblia Yɔ Nya Tso Henox ƒe Agbalẽ Mea?

Henox ƒe Agbalẽ nye ŋɔŋlɔ ɣaɣla siwo ŋu kakaɖedzi mele o dometɔ aɖe. Wogblɔnɛ vodadatɔe be Henox ye ŋlɔe. Agbalẽ sia si woanya ŋlɔ le ƒe alafa gbãtɔ kple evelia D.M.Ŋ. me la me nyawo nye nyakpakpawo kple Yudatɔwo ƒe alakpadzixɔsewo, si dze ƒã be wonye Henox ƒe ŋutinya kpui si le Mose ƒe Agbalẽ Gbãtɔa me la me ɖeɖe si gbɔ eme. Esia ɖeɖe sɔ gbɔ na amesiwo lɔ̃a Mawu ƒe Nya si tso gbɔgbɔ me la be woaƒo asa nɛ.

Le Biblia me la, Yuda ƒe agbalẽ me koe Henox ƒe nyagblɔɖinya siawo le: “Kpɔ ɖa, [Yehowa] kple eƒe ame kɔkɔe akpe nanewo gbɔna, bene wòadrɔ ʋɔnu wo katã, eye woaka mo na wo amesiwo katã mevɔ̃a Mawu o la, le woƒe dɔwɔwɔ vlo, siwo wowɔ mawumavɔ̃mavɔ̃e kple nya sesẽ, siwo katã nuvɔ̃wɔla mavɔ̃mawuwo gblɔ ɖe eŋuti la ta.” (Yuda 14, 15) Agbalẽnyala geɖe gblɔ be woyɔ Henox ƒe nyagblɔɖi si wògblɔ ɖe eŋɔlimetɔ mavɔ̃mawuwo ŋu tẽ tso Henox ƒe Agbalẽa me. Ðe wòanya wɔ be Yuda nazã nyakpakpa siwo ŋu kpeɖodzi mele o abe eƒe nyawo tsoƒe enea?

Ŋɔŋlɔawo megblɔ alesi Yuda wɔ nya Henox ƒe nyagblɔɖia o. Anya yɔ nya tso blema ŋutinya siwo ŋu kakaɖedzi nɔ siwo wogbugbɔ gblɔna tso blema ɣeyiɣiwo me ke me. Paulo hã wɔ nusi ɖi ema esi wòyɔ Yane kple Yambre be wonye akunyawɔla siwo ƒe ŋkɔ menɔ nyanya o, amesiwo nɔ Farao ƒe fiasã me siwo tsi tre ɖe Mose ŋu. Ne Henox ƒe Agbalẽa ŋlɔla te ŋu ke ɖe blema nyatakaka siawo tɔgbe ŋu ɖe, ke nukatae míagbe le Yuda ya gome?a—Mose II, 7:11, 22; Timoteo II, 3:8.

Mɔ si dzi Yuda to xɔ nyatakaka tso Henox ƒe gbedasi si ku ɖe ame mavɔ̃mawuwo ŋu menye nu sesẽ o. Eƒe nyateƒenyenye dze le mɔ sia nu be gbɔgbɔ kɔkɔe ƒe mɔfiafia tee Yuda ŋlɔ eƒe agbalẽa le. (Timoteo II, 3:16) Mawu ƒe gbɔgbɔ fia mɔe ale be maŋlɔ nya siwo mele eteƒe o.

[Etenuŋɔŋlɔ]

[Nɔnɔmetata si le axa 31]

Henox gblɔ Yehowa ƒe gbedasi dzinɔameƒotɔe