Ðe Nèbua Agbe Nu Xɔasii Abe Mawu Enea?

1, 2. Mawu ƒe nunana kae le vi ɖem na mí egbea, eye nu ka tae?

MÍA Fofo si le dziƒo la tsɔ nunana xɔasi aɖe na mí—eyae nye agbe si wòna mí abe amegbetɔ siwo si nunya le ene, siwo ate ŋu aɖe nɔnɔme nyui siwo le eya ŋutɔ si afia. (1 Mose 1:27) Nunana xɔasi siae na be míete ŋu dea ŋugble tso Biblia ƒe gɔmeɖosewo ŋu. Ne míewɔ wo dzi la, míazu ame siwo tsi le gbɔgbɔ me, siwo lɔ̃ Yehowa, eye ‘wona hehe woƒe nugɔmeseseŋutetewo, be woate ŋu ade vovo nyui kple vɔ̃ dome.’—Hebritɔwo 5:14.

² Ŋutete si le mía si be míade ŋugble tso Biblia ƒe gɔmeɖosewo ŋu la ŋu dɔ wɔwɔ le vevie ŋutɔ egbea, elabena xexea wɔ ŋgɔyiyi ale gbegbe be womate ŋu ade se ku ɖe nɔnɔme ɖe sia ɖe si ate ŋu ado mo ɖa le agbe me ŋu o. Nu siwo me esia dzena le la dometɔ ɖekae nye egbegbe atikewɔnyawo, vevietɔ nya siwo ku ɖe atike kple dɔdamɔnu siwo me wozãa ʋu le ŋu. Ŋkubiãnyae nya sia nye na ame siwo di be yewoaɖo to Yehowa. Gake ne míese Biblia ƒe gɔmeɖose siwo ku ɖe nya sia ŋu me nyuie la, míate ŋu awɔ nyametsotso siwo maɖe fu na míaƒe dzitsinya o, eye wòana míanɔ Mawu ƒe lɔlɔ̃ la me ɖaa. (Lododowo 2:6-11) Bu gɔmeɖose siawo dometɔ aɖewo ŋu kpɔ.

3, 4. Ɣekaɣie wona míenya zi gbãtɔ le Ŋɔŋlɔawo me be agbe nye nu kɔkɔe, eye gɔmeɖose kawo dzie wotu esia ɖo?

³ Zi gbãtɔ si Yehowa ɖee fia be kadodo kplikplikpli aɖe le agbe kple ʋu dome eye be wonye nu kɔkɔe ye nye esime Kain wu Abel megbe teti. Mawu gblɔ na Kain be: “Se ɖa! Nɔviwò ƒe ʋu le ɣli dom nam tso anyigba dzi!” (1 Mose 4:10) Le Yehowa ŋkume la, Abel ƒe ʋu le tsitre ɖi na eƒe agbe, si dzi nɔvia tso ŋutasesẽtɔe. Eya ta le mɔ aɖe nu la, Abel ƒe ʋu nɔ ɣli dom na Mawu be wòabia hlɔ̃.—Hebritɔwo 12:24.

⁴ Le Noa ƒe Tsiɖɔɖɔa megbe la, Mawu ɖe mɔ na amegbetɔwo be woaɖu lã, gake womaɖu ʋua ya o. Mawu gblɔ be: “Ðeko migaɖu lã si me eƒe agbe, si nye eƒe ʋu, le la o. Mabia miaƒe ʋu hã ŋuti kɔnta.” (1 Mose 9:4, 5) Sedede sia yi na Noa ƒe dzidzimeviwo katã, míawo hã míele eme. Se sia te gbe ɖe nya si Mawu do ŋgɔ gblɔ na Kain dzi be, nu gbagbewo katã ƒe ʋu le tsitre ɖi na woƒe agbe, alo luʋɔ. Se sia gaɖo kpe edzi hã be Yehowa, si nye Agbedzɔtsoƒe la, abia akɔnta tso amegbetɔ siwo katã medea bubu agbe kple ʋu ŋu o si.—Psalmo 36:9.

5, 6. Aleke Mose ƒe Sea ɖee fia be ʋu nye nu kɔkɔe kple nu xɔasii? (Kpɔ aɖaka si nye “De Bubu Lãwo Ƒe Agbe Ŋu.”)

⁵ Mose ƒe Sea ɖo kpe gɔmeɖose vevi eve siawo dzi. Míexlẽ le 3 Mose 17:10, 11 be: “Ne [ame aɖe] ɖu ʋu aɖe la, maɖe ŋku atɔ ame si ɖu ʋua, eye matsrɔ̃e ɖa le eƒe dukɔ la dome. Elabena ŋutilã ɖe sia ɖe ƒe agbe le ʋu la me, eya ta metsɔe na be miatsɔ alé avu le vɔsamlekpui la dzi ɖe mia ɖokuiwo ta, elabena ʋu wotsɔ léa avu, le agbe si le eme la ta.”a—Kpɔ aɖaka si nye “Ʋu Ƒe Avuléŋusẽ La.”

⁶ Le blema la, ne womazã lã si wowu ƒe ʋu le vɔsamlekpui dzi o la, ke ele be woaɖuɖui ɖe anyigba. Esia fia be wogbugbɔ lãa ƒe agbe na ame si tɔ wònye, si nye Agbenala la, le kpɔɖeŋu mɔ nu. (5 Mose 12:16; Ezekiel 18:4) Gake de dzesii be ema mefia be Israel-viwo nawɔ nu si gbɔ eme, be woadze agbagba atsyɔ ʋu gege toŋtoŋ ɖe sia ɖe le lãa me o. Ne Israel-viwo nya tso ʋu lãa nyuie ko la, woate ŋu atsɔ dzitsinya dzadzɛ aɖui, elabena ema wɔwɔ afia be wode bubu Agbenala la ŋu ale si dze.

 7. Aleke David de bubu ʋu ƒe nu kɔkɔenyenye ŋui?

⁷ David, ‘ame si ƒe nu dze Mawu ƒe dzi ŋu’ la se gɔmeɖose si dzi Mawu tu eƒe se si ku ɖe ʋu ŋu ɖo la gɔme. (Dɔwɔwɔwo 13:22) Ɣeaɖeɣi esi tsikɔ wui vevie la, eƒe kalẽtɔ etɔ̃ dze agbagba yi futɔwo ƒe asaɖa me ɖaku tsi tso vudo aɖe me va nɛ be wòano. Aleke David wɔ nui? Egblɔ be: “Ðe mano ŋutsu siawo, siwo tsɔ woƒe agbe de afɔku me la, ƒe ʋua?” David kpɔe be tsi sia si ŋutsuawo tsɔ woƒe agbe de afɔku me yi ɖaku vɛ la sɔ kple woƒe ʋu. Eya ta togbɔ be tsikɔ nɔ ewum vevie hã la, menoe o, ke boŋ “ekɔe ɖe anyi na Yehowa.”—2 Samuel 23:15-17.

8, 9. Ðe Mawu ƒe nukpɔsusu le agbe kple ʋu ŋu trɔ esime wova ɖo Kristo hamea anyia? Ðe eme.

⁸ Anɔ abe ƒe 2,400 tso esime wode se tso ʋu ŋu na Noa megbe ene, si nye ƒe 1,500 tso esime Yehowa wɔ Se ƒe nubablaa la, Yehowa ƒe gbɔgbɔ ʋã ƒe alafa gbãtɔ me Kristo hamea ƒe dɔdzikpɔha la woŋlɔ ɖi be: “Enyo gbɔgbɔ kɔkɔe la kple míawo ŋutɔwo hã ŋu be, míagatsɔ agba bubu aɖeke akpee na mi wu nu vevi siawo ko o: be miatsri nu siwo wotsɔ sa vɔ na trɔ̃wo, kple ʋu kple lã tsiʋumewo kpakple gbɔdɔdɔ manɔsenu.”—Dɔwɔwɔwo 15:28, 29.

⁹ Edze ƒãa be dɔdzikpɔha la kpɔe be ʋu nye nu kɔkɔe eye se siwo ku ɖe eŋu dzi mawɔmawɔ nye nu vɔ̃ abe trɔ̃subɔsubɔ alo gbɔdɔdɔ ƒe agbe gbegblẽ nɔnɔ ke ene. Nenemae Kristotɔ vavãwo hã bunɛ egbea. Esi wodea ŋugble tso Biblia ƒe gɔmeɖosewo ŋu hewɔa wo dzi ta la, nyametsotso siwo wowɔna le ʋu zazã ƒe nyawo me la dzea Yehowa ŋu.

10, 11. (a) Aleke Yehowa Ðasefowo bua ʋudodo kple ʋumenu vevi eneawo zazã le atikewɔwɔ mee? (b) Nu ka tae Kristotɔwo ƒe nukpɔsusu ate ŋu ato vovo le ʋumenu suesue bubuwo zazã me?

¹⁰ Yehowa Ðasefowo nyae be, ‘be yewoatsri ʋu’ fia be yewomalɔ̃ woado ʋu na yewo, alo woaɖe yewoƒe ʋu ado na ame bubu, alo woaɖee ada ɖi be woava do na yewo emegbe o. Esi wodea bubu Mawu ƒe se ŋu ta la, womelɔ̃na hã be woado ʋumenu vevi ene siwo gbɔna la na yewo o: ʋumenugbagbevi dzĩwo (red cells [globules rouges]), ʋumenugbagbevi ɣiwo (white cells [globules blancs]), ʋumenugbagbevi gbabɛwo (platelets [plaquettes]), alo ʋutsi (plasma).

¹¹ Egbegbe mɔ̃ɖaŋununya wɔe be wogate ŋu ɖea ʋumenu suesue bubuwo tso ʋumenu veviawo me hezãna le mɔ vovovowo nu. Ðe Kristotɔ ate ŋu alɔ̃ azã ʋumenu suesue bubuawoa? Ðe wòle be wòabui be ekpɔtɔ nye “ʋua”? Ele be ame sia ame ŋutɔ natso nya me le esia ŋu. Nenema kee wòle be ame ŋutɔ natso nya me le amekomɔnu siwo nye hemodialysis, hemodilution, kple cell salvage (récupération du sang épanché) hã gome, zi ale si womaɖe amea ƒe ʋu ada ɖi ava do nɛ emegbe o ko.—Kpɔ Megbenya si nye “Ʋumenu Suesuewo Kple Amekomɔnuwo.”

12. Aleke wòle be míabu nu siwo ŋu wòle be míanɔ te ɖe míaƒe dzitsinya dzi atso nya me le lae, eye aleke míawɔ nyametsotso siawoe?

¹² Ðe nu siwo ŋu ame ŋutɔ atso nya me le la mele vevie na Yehowa oa? Ele vevie nɛ, elabena etsɔ ɖe le míaƒe tamesusuwo kple dzimedidiwo me vevie. (Xlẽ Lododowo 17:3; 24:12.) Eya ta ne míedo gbe ɖa vevie hewɔ numekuku tso atike alo dɔdamɔnu aɖe ŋu vɔ la, ele be míanɔ te ɖe míaƒe dzitsinya si míetsɔ Biblia na hehee dzi awɔ nyametsotso. (Romatɔwo 14:2, 22, 23) Mele be ame bubuwo nazi woƒe dzitsinya ɖe mía dzi o, eye mele be míabia hã be, “Nenye wòe ɖe, nu kae nàwɔ?” o. Kristotɔ ɖe sia ɖe “atsɔ ye ŋutɔ ƒe agbanɔamedzi” le nya siawo me.b—Galatiatɔwo 6:5; Romatɔwo 14:12; kpɔ aɖaka si nye “Ðe Mebua Ʋu Nu Kɔkɔea?”

13. Nu kae Yehowa ƒe se kple gɔmeɖosewo ɖe fia tso eyama ŋu? Gblɔ kpɔɖeŋu aɖe si ɖo kpe esia dzi.

¹³ Se kple gɔmeɖose siwo le Biblia me la ɖee fia be Yehowa nye Senala nyanu kple Vifofo lɔ̃ame si tsɔ ɖe le viawo ƒe dedienɔnɔ me vevie. (Psalmo 19:7-11) Togbɔ be menye lãmesẽmenɔnɔ ŋuti aɖaŋuɖoɖoe sedede be ‘míatsri ʋu’ nye o hã la, edzi wɔwɔ kpɔa mía ta tso lãmesẽkuxi siwo dona tso ʋudodo me la me. (Dɔwɔwɔwo 15:20) Le nyateƒe me la, atikewɔla geɖe gblɔ tso amekoko ʋumadomadoe ŋu be enye “amekomɔnu nyuitɔ kekeake” le egbegbe atikewɔnyawo me. Nya siawo ɖo kpe edzi na mí Kristotɔ vavãwo be Yehowa nye vifofo lɔ̃ame kple Mawu si ƒe nunya de ŋgɔ.—Xlẽ Yesaya 55:9; Yohanes 14:21, 23.

14, 15. (a) Se kawoe ɖe ale si Mawu lɔ̃ eƒe amewoe fia? (b) Aleke nàte ŋu anɔ agbe ɖe gɔmeɖose siwo dzi wotu dedienɔnɔ ŋuti se mawo ɖo la nui?

¹⁴ Ale si gbegbe Mawu tsɔ ɖe le eƒe amewo ƒe dedienɔnɔ me le blema Israel la dze le se siwo wòde na wo la dometɔ geɖe me. Le kpɔɖeŋu me, esi wònye be Israel-viwo tua xɔ siwo tame nɔna gbadza eye wowɔa dɔ geɖewo le xɔa tame ta la, Yehowa bia tso wo si be woatɔ kpɔ ɖe xɔa ta bene ame aɖeke nagage tso edzi o. (5 Mose 22:8; 1 Samuel 9:25, 26; Nehemiya 8:16; Dɔwɔwɔwo 10:9) Mawu de se hã be woakpɔ nyi wɔadãwo dzi bene woagatu dzo ame aɖeke o. (2 Mose 21:28, 29) Ne ame aɖe ŋe aɖaba ƒu se siawo dzi la, afia be metsɔ ɖeke le ame bubuwo ƒe dedienɔnɔ me o, eye ne ku do tso eme la, ke eɖi ʋufɔ.

¹⁵ Aleke nàte ŋu atsɔ gɔmeɖose siwo dzi wotu se siawo ɖo la awɔ dɔe? Ðe manyo be nàlé ŋku ɖe wò modzakaɖeɖewo, wò ʋu ƒe nɔnɔme, ale si nèkua ʋui, ale si wò lãwo, wò aƒe, kple wò dɔwɔƒe le la ŋu oa? Le dukɔ aɖewo me la, ame ɖokui ƒoƒo ɖe nuwɔna siwo me afɔku le me gbɔe wòtsona be sɔhɛ geɖewo kuna. Gake sɔhɛ siwo di be yewoanɔ Mawu ƒe lɔlɔ̃ la me ɖaa la dea asixɔxɔ agbe ŋu eye womeƒoa wo ɖokuiwo ɖe dzidzɔdonamenu siwo me afɔku le me o. Womesusuna vodadatɔe be afɔku mate ŋu adzɔ ɖe sɔhɛwo dzi o. Ke boŋ wokpɔa dzidzɔ le woƒe sɔhɛmenɔɣi ne woƒo asa na nuwɔna siwo ate ŋu ade woƒe agbe afɔku me.—Nyagblɔla 11:9, 10.

16. Biblia ƒe gɔmeɖose kae tsi tre ɖe fuɖeɖe ŋu? (Kpɔ etenuŋɔŋlɔa hã.)

¹⁶ Vinɔdɔme ƒe agbe gɔ̃ hã xɔ asi le Yehowa ŋkume. Le blema Israel la, ne ame aɖe wɔ nuvevi funɔ eye wòku alo fua ge le eƒo la, Mawu bua amea be ewu ame, eye ele be woabia “agbe ɖe agbe teƒe.”c (Xlẽ 2 Mose 21:22, 23.) Ekema bu ale si Yehowa sena le eɖokui me le fu gbogbo siwo amewo ɖona koŋ ɖena ƒe sia ƒe le woƒe agbe gbegblẽ nɔnɔ alo didi be yewoavo ta la ŋu kpɔ.

17. Aleke nàte ŋu afa akɔ na ame si ɖe fu kpɔ hafi va srɔ̃ nu tso Mawu ƒe dzidzenuwo ŋu?

¹⁷ Ke ne ame aɖe ɖe fu kpɔ hafi va nya Biblia me nyateƒea ya ɖe? Ðe wòfia be Mawu mate ŋu akpɔ nublanui nɛ oa? Mefia nenema kura o! Le nyateƒe me la, ame sia ame si trɔ dzi me vavã la ate ŋu aka ɖe edzi be Yehowa anɔ te ɖe Yesu ƒe ʋu si wokɔ ɖi la dzi atsɔ yeƒe nu vɔ̃wo ake ye. (Psalmo 103:8-14; Efesotɔwo 1:7) Ɛ̃, Kristo ŋutɔ gblɔ be: “Menye ame dzɔdzɔewo yɔ gee meva o, ke boŋ nu vɔ̃ wɔlawo yɔ gee meva be woatrɔ dzi me.”—Luka 5:32.

18. Aleke Biblia ɖe nu si koŋ gbɔe ʋukɔkɔɖi geɖe tsona la mee?

¹⁸ Menye ɖeko Yehowa di be míaƒo asa na nuvevi wɔwɔ ame bubuwo o, ke edi hã be míaɖe fuléle, si koŋ gbɔ ʋukɔkɔɖi geɖe tsona la ɖa le míaƒe dzi me keŋkeŋ. Apostolo Yohanes gblɔ be: “Ame sia ame si léa fu nɔvia la, amewulae wònye.” (1 Yohanes 3:15) Menye ɖeko ame si léa fu nɔvia la melɔ̃a eƒe nya ko o, ke boŋ edia eƒe ku gɔ̃ hã. Eƒe fuléle sia ate ŋu ana wòagblɔ ameŋugblẽnya vɔ̃ɖiwo alo amenutsonyawo tso amea ŋu, siwo nenye be wole eme vavã la, afia be amea dze na Mawu ƒe ʋɔnudɔdrɔ̃. (3 Mose 19:16; 5 Mose 19:18-21; Mateo 5:22) Ekema aleke gbegbe wòle vevie be míaɖe fuléle ɖe sia ɖe si ɣla ɖe míaƒe dzi me la ɖae nye esi!—Yakobo 1:14, 15; 4:1-3.

19. Aleke ame si nɔa agbe ɖe Biblia ƒe gɔmeɖosewo nu bua nya siwo le Psalmo 11:5 kple Filipitɔwo 4:8, 9 lae?

¹⁹ Ame siwo bua agbe nu xɔasii abe ale si Yehowa bunɛ ene eye wodi be yewoanɔ eƒe lɔlɔ̃ la me ɖaa la ƒoa asa na ŋutasẽnuwɔna le mɔ sia mɔ nu hã. Psalmo 11:5 gblɔ tso Yehowa ŋu be: “Eléa fu ame sia ame si lɔ̃a ŋutasẽnuwɔwɔ.” Menye Mawu ƒe amenyenye ŋu koe mawunyakpukpui sia le nu ƒom tsoe o, ke boŋ enye gɔmeɖose si nu wòle be míanɔ agbe ɖo hã. Eʋãa ame siwo lɔ̃ Mawu be woaƒo asa na modzakaɖeɖe ɖe sia ɖe si me ŋutasẽnuwɔnawo le. Nenema kee nya si wogblɔ tso Yehowa ŋu be enye “ŋutifafa ƒe Mawu” la hã ʋãa esubɔlawo be woana nu nyui siwo dze na lɔlɔ̃, siwo dze na kafukafu, eye wonana wonyea ŋutifafame la naxɔ woƒe susu kple dziwo me.—Xlẽ Filipitɔwo 4:8, 9.

20-22. Xexe sia ƒe nu kawo mee Kristotɔ vavãwo meƒoa wo ɖokuiwo ɖo o, eye nu ka tae?

²⁰ Satana ƒe xexe bliboa ɖi ʋufɔ le Mawu ŋkume. Dunyahedziɖuɖuwo, siwo ŋu woƒo nu tsoe le Ŋɔŋlɔawo me be wonye lã wɔadãwo la, wu ame miliɔn gbogbo aɖewo, siwo dome Yehowa subɔla geɖewo hã le. (Daniel 8:3, 4, 20-22; Nyaɖeɖefia 13:1, 2, 7, 8) Asitsahabɔbɔwo kple dzɔdzɔmeŋutinunyalawo hã wɔ ɖeka kple dziɖuɖu siawo siwo le abe lã wɔadãwo ene la le ʋufɔɖiɖi sia me esi wowɔ aʋawɔnu gblẽnu geɖewo hele ga geɖe kpɔm tso eme. Aleke wòhenye nyateƒee nye esi be “xexe blibo la katã le vɔ̃ɖitɔ la ƒe ŋusẽ te”!—1 Yohanes 5:19.

²¹ Esi Yesu yomedzelawo menye “xexea ƒe akpa aɖeke o” eye womedea nu dunyahehe me alo kpɔa gome le aʋawɔwɔ me o ta la, womedina be yewo ŋutɔ yewoaɖi ʋufɔ loo alo anɔ habɔbɔ siwo dzi ʋufɔɖiɖi le me o.d (Yohanes 15:19; 17:16) Wosrɔ̃a Kristo le mɔ sia nu be womewɔa ŋutasẽnu ɖe ame siwo tia wo yome la ŋu o. Ke boŋ wolɔ̃a woƒe futɔwo, eye wodoa gbe ɖa ɖe wo ta gɔ̃ hã.—Mateo 5:44; Romatɔwo 12:17-21.

²² Vevietɔ wu la, Kristotɔ vavãwo tea wo ɖokui ɖe aga tso “Babilon Gã la,” si nye alakpasubɔsubɔ ƒe xexemefiaɖuƒea, si dzi ʋufɔɖiɖi le wu la gbɔ. Mawu ƒe Nya la gblɔ tso eŋu be: “Wokpɔ nyagblɔɖilawo kple ame kɔkɔewo kpakple ame siwo katã wowu le anyigba dzi la ƒe ʋu le [eme].” Eya ta woxlɔ̃ nu mí be: “Nye dukɔ, mido go le eme.”—Nyaɖeɖefia 17:6; 18:2, 4, 24.

23. Nu kae wòfia be woado go le Babilon Gã la me?

²³ Be míado go le Babilon Gã la me la, mefia be míana woatutu míaƒe ŋkɔ ɖa le sɔlemeha aɖe ƒe agbalẽwo me ko evɔ o. Ke boŋ efia be míalé fu nuwɔna vɔ̃ɖi siwo dzi alakpasubɔsubɔhawo da asi ɖo alo dona ɖe ŋgɔ gaglã la hã, abe agbe gbegblẽ nɔnɔ, nudede dunyahenyawo me, kple kesinɔnuwo yome nɔnɔ ŋukeklẽtɔe ene. (Xlẽ Psalmo 97:10; Nyaɖeɖefia 18:7, 9, 11-17) Alo ɖe nuwɔna siawo mehea ʋufɔɖiɖi geɖe vɛ oa?

24, 25. (a) Nu ka dzie Mawu anɔ te ɖo akpɔ nublanui na ʋufɔɖila si trɔ dzi me? (b) Ðoɖo aɖe si nɔ anyi le blema Israel ka dzie esia nana míeɖoa ŋkui?

²⁴ Hafi mía dometɔ ɖe sia ɖe nava zu mawusubɔla vavãwo la, míanya kpe asi ɖe Satana ƒe nuɖoanyia ŋu le mɔ aɖe nu, si wɔe be eƒe ʋufɔɖiɖia ƒe akpa aɖe nɔ mía dzi. Gake esi míetrɔ míaƒe agbenɔnɔ, xɔ Kristo ƒe tafevɔsaa dzi se, eye míetsɔ míaƒe agbe ɖe adzɔgbe na Mawu ta la, ekpɔ nublanui na mí, eye wòle mía ta kpɔm le gbɔgbɔ me. (Dɔwɔwɔwo 3:19) Gbɔgbɔmetakpɔkpɔ sia nana míeɖoa ŋku sitsoƒedu siwo nɔ anyi le blema Israel la dzi.—4 Mose 35:11-15; 5 Mose 21:1-9.

²⁵ Aleke ɖoɖo ma nɔ? Ne Israel-vi aɖe meɖoe hafi wu ame o la, ele be wòasi ayi sitsoƒedu siawo dometɔ ɖeka me. Ne ʋɔnudrɔ̃la siwo dze kpɔ nyaa gbɔ vɔ la, ame si meɖoe hafi wu ame o la anɔ sitsoƒedua me va se ɖe esime nunɔla gã la ku. Ema megbe la, ekpɔ mɔ anɔ du sia du me faa. Mawu ƒe nublanuikpɔkpɔ kple asixɔxɔ gã si wòdea amegbetɔ ƒe agbe ŋu ƒe kpɔɖeŋu ɖedzesi kae nye esi! Ðoɖo si Mawu wɔ to Kristo ƒe tafevɔsaa dzi be yeakpɔ mía ta tso ku me ne míeda le eƒe se si ku ɖe agbe kple ʋu ƒe nu kɔkɔenyenye ŋu dzi le manyamanya me egbea la le ko abe sitsoƒedu siwo nɔ anyi le blema ene. Ðe nèdea asixɔxɔ ɖoɖo ma ŋua? Aleke nàte ŋu aɖe esia afiae? Mɔ siwo dzi nàto dometɔ ɖekae nye be nàkpe ame bubuwo be woana ɖoɖo si Mawu wɔ ɖe mía takpɔkpɔ ŋu naɖe vi na wo, vevietɔ le esi “xaxa gã” si gbɔna la tu aƒe ŋutɔ ta.—Mateo 24:21; 2 Korintotɔwo 6:1, 2.

26-28. Aleke nɔnɔme si me míele egbea la sɔ kple nyagblɔɖila Ezekiel tɔe, eye nu ka wɔwɔ hãe ana míanɔ Mawu ƒe lɔlɔ̃ la me ɖaa?

²⁶ Nɔnɔme si me mí Mawu ƒe amewo míele egbea la sɔ kple blema nyagblɔɖila Ezekiel tɔ, ame si Yehowa de dɔ asi na be wòanye gbɔgbɔmegbetakpɔla na Israel ƒe aƒe la. Mawu gblɔ nɛ be: “Ne èse nya tso nunye la, nàtsɔ nye nyawo axlɔ̃ nu wo.” Ne Ezekiel melé fɔ ɖe dɔ sia ŋu wɔ o la, Mawu abia ame siwo aku ne ehe hlɔ̃biabia va Yerusalem dzi la ƒe ʋu tso esi me. (Ezekiel 33:7-9) Ezekiel wɔ dɔ sia nyuie, si wɔe be meɖi ʋufɔ o.

²⁷ Egbea, míenya be Satana ƒe xexe bliboa ƒe nuwuwu gogo. Eya ta Yehowa Ðasefowo nyae be enye agbanɔamedzi kple mɔnukpɔkpɔ na yewo be yewoato gbeƒãɖeɖe Fiaɖuƒegbedeasia dzi axlɔ̃ nu amewo tso Mawu ƒe “hlɔ̃biaŋkeke la” ŋu. (Yesaya 61:2; Mateo 24:14) Ðe nèkpɔa gome le dɔ vevi sia me bliboea? Apostolo Paulo wɔ gbeƒãɖeɖedɔ si wode esi la ŋkubiãtɔe. Eya ta ete ŋu gblɔ be: “Ŋutinye kɔ tso amewo katã ƒe ʋu me.” (Dɔwɔwɔwo 20:26, 27) Kpɔɖeŋu nyui kae nye esi wònye na mí!

²⁸ Gake hafi míayi edzi anɔ mía Fofo lɔ̃ame Yehowa ƒe lɔlɔ̃ me la, menye ɖeko míabu agbe kple ʋu abe ale si Yehowa bunɛ ene ko evɔ o. Ele be míanɔ dzadzɛ, alo anɔ kɔkɔe, le eŋkume hã abe ale si míakpɔe le ta si kplɔe ɖo me ene.