Yehowa Nye Nubablawo Ƒe Mawu
“Mabla nu yeye kple Israel ƒe aƒe kpakple Yuda ƒe aƒe.”—YEREMYA 31:31.
1, 2. (a) Azã kae Yesu ɖo anyi le Nisan 14, 33 M.Ŋ. me? (b) Nubabla ka ŋue Yesu ƒo nu tsoe be edo ƒome kple yeƒe ku?
YESU ɖu Ŋutitotoa kple eƒe apostolo 12 le Nisan 14, 33 M.Ŋ. ƒe zã me. Esi Yesu nya be esia nye nu mamlɛtɔ si yeaɖu kpli wo eye be eteƒe madidi o futɔwo awu ye ta la, ezã mɔnukpɔkpɔa tsɔ ɖe nya vevi geɖe me na eƒe nusrɔ̃la siwo nɔa eŋu kplikplikpli wu la.—Yohanes 13:1–17:26.
2 Ɣeyiɣi sia mee Yesu ɖo mawusubɔsubɔzã ɖeka kolia si ƒe se wode na Kristotɔwo be woaɖu ƒe sia ƒe la anyi, esi wòna Yuda Iskariot do go vɔ megbe—si nye eƒe ku ƒe Ŋkuɖodzia. Nuŋlɔɖia gblɔ be: “Esi wole nua ɖum la, Yesu tsɔ abolo ɖe asi, eye esi wògblɔ akpedanya la, eŋe eme hetsɔ na nusrɔ̃lawo gblɔ bena: Mixɔe ɖu! Esia nye nye ŋutilã! Eye wòtsɔ kplu ɖe asi, eye esi wòda akpe le eta la, etsɔe na wo gblɔ bena: Mi katã mino le enu; elabena esiae nye nye ʋu, si nye nubabla yeye la tɔ, si wokɔ ɖe anyi le ame geɖewo ŋuti hena nuvɔ̃keke la.” (Mateo 26:26-28) Yesu ɖoe na eyomedzelawo be woaɖo ŋku yeƒe ku dzi le wɔna bɔbɔe aɖe si ŋu bubu le me. Eye Yesu tsɔ eƒe kua do ƒome kple nubabla aɖe. Woyɔe le Luka ƒe nuŋlɔɖia me be “nubabla yeye.”—Luka 22:20.
3. Biabia kawoe fɔ ɖe te ku ɖe nubabla yeyea ŋu?
3 Nukae nubabla yeye sia nye? Ne nubabla yeye wònye la, ke ɖe wòfia be nubabla xoxo aɖe lia? Ðe nubabla bubu aɖewo li siwo do ƒome kpliia? Nyabiabia siawo le vevie elabena Yesu gblɔ be woakɔ nubabla ƒe ʋua ɖi hena ‘nuvɔ̃wo ƒe tsɔtsɔke.’ Mí katã míehiã tsɔtsɔke sia vevie.—Romatɔwo 3:23.
Nu Babla Kple Abraham
4. Blema ŋugbedodo kae kpe ɖe mía ŋu míese nusi nubabla yeyea nye gɔme?
4 Be míase nusi nubabla yeyea nye gɔme la, ele be míayi megbemegbe ƒe 2,000 kloe do ŋgɔ na Yesu ƒe anyigba dzi subɔsubɔdɔa wɔwɔ esime Tarax kple eƒe ƒomea—si me Abram (si wova yɔ be Abraham) kple Abram srɔ̃ Sarai (si wova yɔ be Sara) nɔ—zɔ mɔ tso Ur si nye Kaldeatɔwo ƒe du si me kesinɔnuwo bɔ ɖo me yi Xaran le Mesopotamia ƒe dzigbe. Wonɔ afima vaseɖe esime Tarax ku. Azɔ Yehowa de se na Abraham si xɔ ƒe 75 la be wòatso Frat Tɔsisia ayi Kanaan-nyigba dzi le anyigbeɣetoɖoƒe gome be wòava zu tsatsala agbadɔmenɔla. (Mose I, 11:31–12:1, 4, 5; Dɔwɔwɔwo 7:2-5) Ƒe 1943 D.M.Ŋ. mee nye ma. Esime Abraham kpɔtɔ nɔ Xaran la, Yehowa gblɔ nɛ be: “Mawɔ wò dukɔ gã, eye mayra wò, mana wò ŋkɔ nanyɔ, eye nazu yayra. Mayra amesiwo yra wò, ke amesiwo doa vlo wò la, maƒo fi ade wo, eye le wò me woayra anyigba dzi ƒomeawo katã le.” Emegbe esi Abraham va ɖo Kanaan la, Yehowa gagblɔ be: “Wò dzidzimeviwo matsɔ anyigba sia ana.”—Mose I, 12:2, 3, 7.
5. Nyagblɔɖi xɔŋkɔ kae wotsɔ do ƒome kple ŋugbe si Yehowa do na Abraham?
5 Ŋugbe si wodo na Abraham la do ƒome kple Yehowa ƒe ŋugbedodo bubuwo. Le nyateƒe me la, ena Abraham va zu ame vevi aɖe le amegbetɔ ƒe ŋutinya me, amesi dzi woato ana nyagblɔɖi gbãtɔ si woŋlɔ ɖi nava eme. Esi Adam kple Xawa wɔ nuvɔ̃ le Eden-bɔa me megbe la, Yehowa drɔ̃ ʋɔnu wo ame evea, eye le ɣeyiɣi ma ke dzi egblɔ na Satana, amesi ble Xawa la be: “Made adikã mia kple nyɔnu la dome, wò dzidzime kple nyɔnu la ƒe dzidzime dome, eya la agbã ta na wò, eye wò la àɖu afɔkpodzi nɛ.” (Mose I, 3:15) Nu si Yehowa bla kple Abraham ɖee fia be blemafofo ma ƒe ƒomea mee Dzidzimevi si dzi woato aɖe Satana ƒe dɔwɔwɔwo ɖa la adzɔ ɖo.
6. (a) Ameka dzie woato ana ŋugbe si Yehowa do na Abraham nava eme? (b) Nukae nye Abraham ƒe nubabla la?
6 Esi Yehowa ƒe ŋugbedodoa ku ɖe dzidzimevi ŋu ta la, ehiã be Abraham nadzi viŋutsu si dzi Dzidzimevia ato ava. Evɔ woa kple Sara wotsi ƒo wɔ gake vi menɔ wo si o. Gake Yehowa va yra wo mlɔeba, egado ŋusẽ woƒe vidziŋutetewo, eye Sara dzi ŋutsu si ŋkɔe nye Isak na Abraham, eye esia na kakaɖedzi gava nɔ dzidzimevi si ŋugbe wodo la ƒe vava ŋu. (Mose I, 17:15-17; 21:1-7) Esi ƒe geɖe va yi, eye wodo Abraham ƒe xɔse kpɔ—ale gbegbe be wòlɔ̃ be yeatsɔ ye vi Isak si gbɔ melɔ̃a nu le o asa vɔe gɔ̃ hã—megbe la, Yehowa gagbugbɔ ŋugbe si wòdo na Abraham la gblɔ be: “Mayra wò geɖe ŋutɔ, eye viwòwo asɔ gbɔ fũ abe dziƒoɣletiviwo kple ƒutake ene, eye wò dzidzimeviwo atsɔ woƒe futɔwo ƒe duwo anyi domee. To wò dzidzimeviwo me woayra anyigba dzi dukɔwo katã le, elabena èɖo to nye gbe.” (Mose I, 22:15-18) Woyɔa ŋugbedodo sia si wokeke ɖe enu la zi geɖe be Abraham ƒe nubabla, eye nubabla yeye si wowɔ emegbe la va do ƒome kplii.
7. Aleke Abraham ƒe dzidzimeviwo va te agbɔ sɔsɔe, eye nukae na wova nɔ Egipte?
7 Le ɣeyiɣi aɖe megbe la, Isak dzi venɔvi ŋutsuwo, siwo nye Esau kple Yakob. Yehowa tia Yakob be wòanye amesi dzi Ŋugbedodovi la ato ava. (Mose I, 28:10-15; Romatɔwo 9:10-13) Yakob dzi ŋutsuvi 12. Edze ƒã be ɣeyiɣia de azɔ be Abraham ƒe dzidzimeviwo nasɔ gbɔ. Esime Yakob viwo tsi, eye ƒome nɔ wo dometɔ geɖe si la, dɔwuame aɖe wɔe be wo katã woʋu yi Egipte, afisi Mawu wɔ ɖoɖo ale be Yakob vi Yosef va dzra mɔ dzi ɖo le. (Mose I, 45:5-13; 46:26, 27) Le ƒe ʋee aɖewo megbe la, dɔwuamea nu va yi le Kanaan. Gake Yakob ƒe ƒomea nɔ Egipte—woxɔ wo amedzrowoe gbã gake emegbe wova zu kluviwo. Ƒe 1513 D.M.Ŋ. me, si nye ƒe 430 megbe tso esime Abraham tso Frat-tɔsisia, hafi Mose kplɔ Yakob ƒe dzidzimeviwo do goe le Egipte yi ɖe ablɔɖe me. (Mose II, 1:8-14; 12:40, 41; Galatiatɔwo 3:16, 17) Fifia Yehowa atrɔ susu ɖe nu si wòbla kple Abraham ŋu etɔxɛe.—Mose II, 2:24; 6:2-5.
“Nubabla Xoxo” La
8. Nubabla kae Yehowa wɔ kple Yakob ƒe dzidzimeviwo le Sinai-toa gbɔ, eye aleke esia ku ɖe Abraham ƒe nubabla la ŋui?
8 Ƒome si keke ta ye Yakob kple viaŋutsuwo nye esime woʋu yi Egipte, gake hafi woadzo le Egipte la, woƒe dzidzimeviwo zu towo ƒe ameha siwo me tɔwo sɔ gbɔ ŋutɔ. (Mose II, 1:5-7; 12:37, 38) Hafi Yehowa nakplɔ wo ava Kanaan la, ekplɔ wo yi anyigbe gome le to aɖe si ŋkɔe nye Xoreb (alo Sinai) te le Arabia. Afimae wòwɔ nubabla kpli wo le. Wova yɔe be “nubabla xoxo” ne wotsɔe sɔ kple “nubabla yeye” la. (Korintotɔwo II, 3:14) Yehowa to nubabla xoxoa dzi na nu si wòbla kple Abraham la te emevava le kpɔɖeŋumɔ nu.
9. (a) Nu ene kawo ƒe ŋugbee Yehowa do le Abraham ƒe nubabla la me? (b) Mɔnukpɔkpɔ bubu kawoe nubabla si Yehowa wɔ kple Israel la ʋu ɖi, eye nuka dzie wònɔ te ɖo?
9 Yehowa ɖe nusi wòbia tso Israel-viwo si le nubabla sia me la me na wo be: “Ne miaɖo to nye gbe, eye mialé nye nubabla me ɖe asi la, ekema mianye tɔnye koŋ le dukɔwo katã dome, elabena anyigba blibo la tɔnyee. Eye mianye nunɔlawo ƒe fiaɖuƒe kple dukɔ kɔkɔe nam!” (Mose II, 19:5, 6) Yehowa do ŋugbe be Abraham ƒe dzidzimeviwo (1) ava zu dukɔ gã aɖe, (2) woana woaɖu woƒe futɔwo dzi, (3) woanyi Kanaan-nyigba la dome, eye (4) woato wo dzi ayra dukɔwo. Fifia eɖee fia be woa ŋutɔwo woate ŋu azu yeƒe ame tɔxɛwo anye Israel, “nunɔlawo ƒe fiaɖuƒe kple dukɔ kɔkɔe,” axɔ yayra siawo ne woawɔ ɖe yeƒe sededewo dzi ko. Ðe Israel-viwo lɔ̃ be yewoanɔ nubabla sia mea? Wotsɔ ɖekawɔwɔ ɖo eŋu be: “Nya, siwo katã Yehowa gblɔ la, míawɔe.”—Mose II, 19:8.
10. Ðoɖo kae Yehowa wɔ ɖe Israel-viwo ŋu be wova zu dukɔ, eye nukae wòdi tso wo si?
10 Tso ɣemaɣi la, Yehowa wɔ ɖoɖo na Israel-viwo wozu dukɔ. Ena se siwo ku ɖe tadedeagu kple alesi woanɔ agbee ŋu. Ewɔ ɖoɖo ɖe avɔgbadɔ (emegbe eva nye gbedoxɔ le Yerusalem) kple nunɔla siwo awɔ subɔsubɔ kɔkɔe le avɔgbadɔa me ŋu na wo. Nubabla la me léle ɖe asi fia be woawɔ ɖe Yehowa ƒe sewo dzi eye vevietɔ, woade ta agu na eya ɖeka ko. Se Ewoawo siwo dzi se mawo nɔ te ɖo la ƒe gbãtɔ gblɔ be: “Nyee nye Yehowa wò Mawu, si kplɔ wò tso kluvinyenyeƒe me le Egipte-nyigba dzi: Mawu bubu aɖeke meganɔ asiwò kpe ɖe ŋunye o.”—Mose II, 20:2, 3.
Yayra Siwo Se ƒe Nubabla He Vɛ
11, 12. Mɔ kawo nue nubabla xoxoa me ŋugbedodowo va eme na Israel le?
11 Ðe ŋugbe siwo wodo le Se ƒe nubabla la te va eme na Israel-viwoa? Ðe Israel va zu ‘dukɔ kɔkɔea’? Esi Israel-viwo nye Adam ƒe dzidzimeviwo ta la, wonye nuvɔ̃mewo. (Romatɔwo 5:12) Gake wosa vɔwo le Sea te tsɔ tutu woƒe nuvɔ̃wo. Yehowa gblɔ le vɔsasa siwo wowɔna le ƒe sia ƒe Avuléŋkekea dzi ŋu be: “Gbemagbe wolé avu na mi, bena woakɔ mia ŋu; azɔ nuvɔ̃wo katã kɔ le mia ŋu le Yehowa ŋku me.” (Mose III, 16:30) Eyata le ɣeyiɣi siwo me Israel wɔ nuteƒe la, wonye dukɔ kɔkɔe si ŋu wokɔ na Yehowa subɔsubɔ. Gake woƒe wɔwɔ ɖe Sea dzi kple vɔwo sasa ɣesiaɣi dzie kɔkɔenyenye sia nɔ te ɖo.
12 Ðe Israel va zu ‘nunɔlawo ƒe fiaɖuƒea’? Fiaɖuƒe wònye tso esime wowɔ nubabla la, eye Yehowae nye eƒe Fia si le dziƒo. (Yesaya 33:22) Tsɔ kpe ɖe eŋu la, ɖoɖowo nɔ Se ƒe nubablaa me na amegbetɔ ƒe fiaɖuɖu ɖe wo dzi, ale be emegbe fia siwo ɖu dzi le Yerusalem la va nɔ Yehowa teƒe. (Mose V, 17:14-18) Gake ɖe Israel nye nunɔlawo ƒe fiaɖuƒea? Nunɔlawo nɔ wo si siwo wɔa subɔsubɔdɔ kɔkɔe le avɔgbadɔa me. Avɔgbadɔa (si va zu gbedoxɔ emegbe) nye tadeaguƒe dzadzɛ na Israel-viwo kple amesiwo menye Israel-viwo o siaa. Eye dukɔa ɖeɖeko dzie woto tsɔ nyateƒe si woɖe fia na ameƒomea. (Kronika II, 6:32, 33; Romatɔwo 3:1, 2) Israel-vi nuteƒewɔlawo katã nye Yehowa ƒe “ɖasefowo,” menye Lewi-nunɔlawo ɖeɖeko o. Yehowa ƒe ‘dɔlae’ Israel nye, eye woɖo wo be ‘woaxlẽ eƒe kafukafu afia.’ (Yesaya 43:10, 21) Amedzro ɖokuibɔbɔla geɖe kpɔ alesi Yehowa ƒe ŋusẽ nɔ dɔ wɔm na eƒe amewo eye tadedeagu dzadzɛ dzro wo. Wova zu dzimetrɔlawo. (Yosua 2:9-13) Gake to ɖeka me tɔwo koe nye nunɔla siwo wosi ami na siwo subɔna ŋutɔŋutɔ.
Dzimetrɔlawo le Israel
13, 14. (a) Nukata míate ŋu agblɔ be dzimetrɔlawo mele Se ƒe nubabla la me o? (b) Aleke dzimetrɔlawo va nɔ Se ƒe nubabla la tee?
13 Tenɔnɔ kae nɔ dzimetrɔla siawo si? Esime Yehowa wɔ eƒe nubabla la, wo kple Israel-viwo dome ko wònɔ; togbɔ be “amedzro geɖewo” nɔ eteƒe hã la, womeyɔ wo de eme o. (Mose II, 12:38; 19:3, 7, 8) Esi wonɔ tafe si woaxe ɖe Israel-ŋgɔgbeviwo nu bum la, womexlẽ woƒe ŋgɔgbeviwo kpe ɖe eŋu o. (Mose IV, 3:44-51) Ƒe bla nanewo megbe esi womã Kanaan-nyigba la na Israel-toawo la, womena ɖeke xɔsetɔ siwo menye Israel-viwo o la o. (Mose I, 12:7; Yosua 13:1-14) Nukatae? Elabena menye dzimetrɔlawoe wowɔ Se ƒe nubabla la kpli o. Gake wotsoa aʋa na ŋutsu dzimetrɔlawo abe alesi Sea bia ene. Wowɔ ɖe eƒe nudidiwo dzi, eye eƒe ɖoɖowo ɖe vi na wo. Dzimetrɔlawo kple Israel-viwo siaa va nɔ Se ƒe nubabla la te.—Mose II, 12:48, 49; Mose IV, 15:14-16; Romatɔwo 3:19.
14 Le kpɔɖeŋu me, ne dzimetrɔla mebua wu ame o la, ate ŋu asi ayi sitsoƒedu me abe Israel-vi ke ene. (Mose IV, 35:15, 22-25; Yosua 20:9) Le Avuléŋkekea dzi la, wosaa vɔ ɖe “Israel ƒe aƒe blibo” la nu. Esi dzimetrɔlawo nye ha la ƒe akpa aɖe ta la, wokpɔ gome le wɔnaawo me eye vɔsa la ɖea vi na wo. (Mose III, 16:7-10, 15, 17, 29; Mose V, 23:8, 9) Ƒomedodo kplikplikpli nɔ dzimetrɔlawo kple Israel-viwo dome le Sea te ale gbegbe be le Pentekoste 33 M.Ŋ. me esime wowɔ ‘fiaɖuƒea ƒe safui’ gbãtɔ ŋudɔ na Yudatɔwo la, eɖe vi na dzimetrɔlawo hã. Esia na “Nikolao, si nye trɔ̃subɔla-zu-Yudatɔ tso Antioxia” va zu Kristotɔ eye enɔ “ŋutsu adre, amesiwo kpɔ ɖaseɖiɖi nyui” siwo wotia be woakpɔ Yerusalem-hamea ƒe nuhiahiãwo gbɔ la dome.—Mateo 16:19; Dɔwɔwɔwo 2:5-10; 6:3-6; 8:26-39.
Yehowa Yra Abraham ƒe Dzidzimeviwo
15, 16. Aleke nu si Yehowa bla kple Abraham va eme le Se ƒe nubabla la tee?
15 Esi wowɔ ɖoɖo ɖe Abraham ƒe dzidzimeviwo ŋu wozu dukɔ le Sea te la, Yehowa yra wo abe alesi wòdo ŋugbe na blemafofo la ene. Le ƒe 1473 D.M.Ŋ. me la, Yosua si va xɔ ɖe Mose teƒe la kplɔ Israel-viwo yi Kanaan. Emegbe womã anyigba la na toawo eye wòna ŋugbe si Yehowa do be yeatsɔ anyigba la ana Abraham ƒe dzidzimeviwo la va eme. Le ɣeyiɣi siwo me Israel wɔ nuteƒe la, Yehowa wɔ ɖe ŋugbe si wòdo be yeana woaɖu woƒe futɔwo dzi la dzi. Esia va eme vevietɔ le Fia Dawid ƒe dziɖuɣi. Kaka Dawid vi Salomo ƒe ɣeyiɣia naɖo la, wona nu etɔ̃lia si nɔ Abraham ƒe nubabla me la va eme. “Yuda kple Israel sɔ gbɔ abe ƒutake ene; woɖua nu, noa nu, eye wokpɔa dzidzɔ.”—Fiawo I, 4:20.
16 Gake aleke dukɔwo akpɔ yayra to Israel si nye Abraham ƒe dzidzimeviwo dzii? Abe alesi míegblɔ va yi ene la, Israel nye Yehowa ƒe dukɔ tɔxɛ, eye wonɔ Yehowa teƒe le dukɔwo dome. Esi wòsusɔ vie Israel-viwo nage ɖe Kanaan la, Mose gblɔ be: “Mi dukɔwo, mitso aseye ɖe eƒe dukɔ ŋu.” (Mose V, 32:43) Amedzrovi geɖe wɔ ɖe edzi. “Amedzro geɖewo” nɔ Israel-viwo dome xoxo wodzo le Egipte, wokpɔ Yehowa ƒe ŋusẽ ƒe dɔwɔwɔwo le gbeadzi, eye wose nya si Mose gblɔ be dzi nadzɔ wo la. (Mose II, 12:37, 38) Emegbe Moab-nyɔnu Rut ɖe Boaz si nye Israel-vi eye wòva zu Mesia la mama. (Rut 4:13-22) Kenitɔ Yonadab kple eƒe dzidzimeviwo kpakple Etiopiatɔ Ebed-Melex wowɔ ɖe gɔmeɖose dzɔdzɔewo dzi wòɖe dzesi esime dzɔdzɔme Israel-vi geɖe mewɔ nuteƒe o. (Fiawo II, 10:15-17; Yeremya 35:1-19; 38:7-13) Le Persia Fiaɖuƒea te la, amedzrovi geɖe va zu dzimetrɔlawo eye wokpe ɖe Israel ŋu wowɔ aʋa kple woƒe futɔwo.—Ester 8:17, NW ƒe etenuŋɔŋlɔ.
Nubabla Yeye aɖe Va Hiã
17. (a) Nukata Yehowa gbe Israel dziehe kple anyiehe fiaɖuƒeawo? (b) Nukae na wogbe Yudatɔwo keŋkeŋ mlɔeba?
17 Ele kokoko be Mawu ƒe dukɔ tɔxɛa nawɔ nuteƒe hafi Mawu ƒe ŋugbedodo nava eme na wo bliboe. Gake womewɔ nuteƒe o. Enye nyateƒe be Israel-vi aɖewo ɖe xɔse fia wòɖe dzesi ya. (Hebritɔwo 11:32–12:1) Gake dukɔ la subɔ trɔ̃wo zi geɖe, hekpɔ mɔ be ana yewoakpɔ ŋutilãmenuwo. (Yeremya 34:8-16; 44:15-18) Ame aɖewo wɔ Sea ŋudɔ ɖe mɔ gbegblẽ nu alo woŋe aɖaba ƒu edzi. (Nexemya 5:1-5; Yesaya 59:2-8; Maleaxi 1:12-14) Le Salomo ƒe ku megbe la, Israel mã va zu dziehe kple anyiehe fiaɖuƒe. Esime dziehe fiaɖuƒea dze aglã wògbɔ eme la, Yehowa gblɔ be: “Èdo vlo sidzedze, eyata nye hã mado vlo wò be, màganye nunɔla nam o.” (Hosea 4:6) Wohe to na anyiehe fiaɖuƒea hã vevie le esi woda le nubabla la dzi ta. (Yeremya 5:29-31) Esi Yudatɔwo gbe Yesu be menye Mesia ye wònye o la, Yehowa hã gbe wo. (Dɔwɔwɔwo 3:13-15; Romatɔwo 9:31–10:4) Mlɔeba Yehowa wɔ ɖoɖo yeye be wòana Abraham ƒe nubabla la nava eme bliboe.—Romatɔwo 3:20.
18, 19. Ðoɖo yeye kae Yehowa wɔ ale be Abraham ƒe nubabla la nate ŋu ava eme bliboe?
18 Ðoɖo yeye si wòwɔ lae nye nubabla yeye la. Yehowa gblɔ esia ɖi esi wògblɔ be: “Kpɔ ɖa, ŋkeke li gbɔna, eye mabla nu yeye kple Israel ƒe aƒe kpakple Yuda ƒe aƒe. . . . Nusi mele babla ge kple Israel ƒe aƒe la le ŋkeke siawo megbe la, enye esi: Matsɔ nye se la ade woƒe dɔ me, eye maŋlɔe ɖe woƒe dzi ŋu, manye Mawu na wo, eye woawo nanye nye dukɔ, Yehowa ye gblɔe.”—Yeremya 31:31-33.
19 Esiae nye nubabla yeye si ŋu Yesu ƒo nu tsoe le Nisan 14, 33 M.Ŋ. me. Le ŋkeke ma dzi la, eɖee fia be nubabla ma wɔ gee yewo gbɔna le eƒe nusrɔ̃lawo kple Yehowa dome, eye Yesu nanye domenɔla. (Korintotɔwo I, 11:25; Timoteo I, 2:5; Hebritɔwo 12:24) To nubabla yeye sia dzi la, ŋugbe si Yehowa do na Abraham ava eme le ŋutikɔkɔe geɖe wu me eye wòanɔ anyi ɖaa, abe alesi míakpɔe le nyati si kplɔe ɖo me ene.
Àte Ŋu Aɖe Wo Mea?
◻ Nuka ƒe ŋugbee Yehowa do le Abraham ƒe nubabla la me?
◻ Aleke Yehowa na Abraham ƒe nubabla la va eme ɖe ŋutilã me Israel dzii?
◻ Vi kae nubabla xoxoa ɖe na dzimetrɔlawo?
◻ Nukae na nubabla yeye va hiã?
[Nɔnɔmetata si le axa 9]
Yehowa na Abraham ƒe nubabla va eme le kpɔɖeŋumɔ nu to Se ƒe nubabla la dzi