Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽ Ƒe Nyatsoƒewo
APRIL 13-19
NU XƆASI SIWO LE MAWU ƑE NYA LA ME | 1 MOSE 31
Esi wokpɔ masɔmasɔ si do mo ɖa gbɔ le ŋutifafa me vɔ la, Yakob kple Laban bla nu kple wo nɔewo. Le esia wɔwɔ me la, Yakob ɖi ŋkuɖodzikpe eye wògblɔ na “nɔviawo” be woaƒo kpewo nu ƒu wòanye kpekɔ, ɖewohĩ wòanɔ abe kplɔ̃ ene, si dzi woɖu nu le tsɔ ɖo kpe nubablaa dzi. Emegbe, Laban yɔ teƒea le Aramgbe (Siriagbe) me be “Yegar-Sahaduta,” gake Yakob ya yɔe be “Galed,” si nye ale si woyɔnɛ le Hebrigbe me. Laban gblɔ be: “Kpekɔ [Heb., gal] siae nye ɖase [Heb., ʽedh] le nye kpli wò dome egbea.” (1Mo 31:44-48) Kpekɔa (kple ŋkuɖodzikpea) nye ɖaseɖiɖi na ame siwo katã tsoa eme va yina. Abe ale si kpukpui 49 lia gblɔe ene la, enye, “Gbetakpɔxɔ [Heb., mits·pahʹ],” si le kpe ɖom edzi be Yakob kple Laban lɔ̃ be yewoana ŋutifafa nanɔ yewo kple yewoƒe ƒomewo dome. (1Mo 31:50-53) Emegbe amewo va zã kpewo abe ɖasefowo ene.—Yos 4:4-7; 24:25-27.
Yakob ɖi kpekɔ eye wòyɔe be “Galed” (si gɔmee nye “Ðaseɖiɖikpekɔ”) kple “Gbetakpɔxɔ.” Emegbe Laban gblɔ be: “Yehowa nenɔ nye kpli wò dome ŋu dzɔm ne míeva le teƒe si míegale mía nɔewo kpɔm le o.” (1Mo 31:45-49) Kpekɔ sia aɖo ŋku edzi na Yakob kple Laban be Yehowa le ŋku lém ɖe wo ŋu be yeakpɔe ɖa be woayi edzi alé ŋutifafa nubablaa me ɖe asi hã.
Mawu Ƒe Nyaa Me Kesinɔnuwo Didi
Tomenu siwo ŋu woke ɖo le Mesopotamia kple teƒe siwo te ɖe eŋu la ɖee fia be ame si si terafim kpakpɛwo le lae xɔa ƒomea ƒe domenyinu. Le kpe aɖe si dzi woŋlɔ nu ɖo si ŋu woke ɖo le Nuzi ƒe nya nu la, le go aɖewo me la, toyɔvi si si aƒeliwo le la ate ŋu ayi ʋɔnu be yeaxɔ ye to si ku la ƒe domenyinuwo. (Ancient Near Eastern Texts, si me J. Pritchard gbugbɔ to le ƒe 1974, axa 219, 220, kple etenuŋɔŋlɔ 51) Ðewohĩ esi esia le susu me na Rahel ta la, ekpɔe be enye nu si sɔ be yeatsɔ terafim la, elabe ye fofo mewɔ nu si sɔ ɖe yesrɔ̃ Yakob ŋu o. (Tsɔe sɔ kple 1Mo 31:14-16.) Esi terafim la naa gome ame si si wòle be woaxɔ domenyinuwo ta la, anɔ eme be ema tae Laban tsi dzi vevie be yeaxɔ wo, si wɔe be wòkplɔ nɔviaŋutsuwo ɖe eɖokui ŋu eye woti Yakob yome hezɔ mɔ ŋkeke adre sɔŋ. (1Mo 31:19-30) Le nyateƒe me la, nu si Rahel wɔ la menɔ nyanya na Yakob o (1Mo 31:32), eye naneke hã meɖee fia be Yakob tee kpɔ be yeazã terafim la atsɔ axɔ domenyiwo le Laban viwo si o. Yakob malɔ̃ asubɔ legbawo o. Emegbe la, Yakob anya ɖe terafim la ɖa esime wòɖi dutamawu siwo katã eƒemetɔwo tsɔ nɛ la ɖe ati gã si gogo Sekem la te.—1Mo 35:1-4.
APRIL 20-26
NU XƆASI SIWO LE MAWU ƑE NYA LA ME | 1 MOSE 32-33
Yakob Ƒe Aligokpeƒe Gli. Esi Yakob xɔ abe ƒe 97 ene la, ete kame zã blibo kple mawudɔla aɖe si trɔ eɖokui zu amegbetɔ. Egbe asiɖeɖe le mawudɔlaa ŋu va se ɖe esime mawudɔlaa yrae. Esi wonɔ kamea tem la, mawudɔlaa tɔ asi Yakob ƒe aligokpeƒe eye eƒe aligokpeƒe gli. Esia wɔe be Yakob va nɔ tɔtɔm ɖe aku dzi. (1Mo 32:24-32; Ho 12:2-4) Emegbe ele be Yakob nanɔ ŋku ɖom edzi be, togbɔ be yete “kame kple Mawu [mawudɔla] kpakple amegbetɔ, eye [yete ŋui]” abe ale si mawudɔlaa gblɔe ene hã la, yemeɖu Mawu ƒe dɔla sẽŋu la dzi ŋutɔŋutɔ o. Mawu ƒe tameɖoɖo kple lɔlɔ̃nue wònye be wòɖe mɔ na Yakob wòte kame kple mawudɔlaa, ale be wòanye kpeɖodzi be Yakob kpɔ ŋudzedze ɖe Mawu ƒe yayra ŋu eye wòʋli be wòasu ye si.
1. Enye ŋkɔ si Mawu na Yakob esime wòxɔ abe ƒe 97 ene. Zã si me Yakob tso Yabok tɔʋua esime wòyi nɔvia Esau kpe ge ye wòte kame kple ame aɖe si nye mawudɔla. Esi Yakob ku kutri te kame ta la, wotrɔ ŋkɔ nɛ wòva zu Israel, wònye yayraawo ƒe akpa sue aɖe. Yakob na ŋkɔ teƒea be Peniel alo Penuel be yeatsɔ anɔ ŋku ɖom nudzɔdzɔa dzi. (1Mo 32:22-31) Emegbe, le Betel la Mawu ɖo kpe ŋkɔ si wòtrɔ nɛ la dzi, eye tso ɣemaɣi va se ɖe Yakob ƒe kugbe la, woyɔnɛ zi geɖe be Israel. (1Mo 35:10, 15; 50:2; 1Kr 1:34) Ŋkɔ Israel si dze wu zi 2,500 kple edzivɔ le Biblia me la, ku ɖe Yakob ƒe dzidzimevi siwo nye dukɔ la ŋu.—2Mo 5:1, 2.
Mawu Ƒe Nyaa Me Kesinɔnuwo Didi
Esi Yakob te kame kple Yehowa ƒe dɔla le Peniel ta la, wona ŋkɔ Yakob be Israel, eye esi wòwɔ ŋutifafa kple nɔvia Esau vɔ megbe la, eva nɔ Sukot eye emegbe wòyi Sekem. Le afi sia la, eƒle anyigba le Hamor viwo si eye wòtu agbadɔ ɖe edzi. (1Mo 32:24-30; 33:1-4, 17-19) “Eɖi vɔsamlekpui ɖe afi ma, eye wòyɔe be Mawu, Israel ƒe Mawu.” (1Mo 33:20) Esi wòyɔ eƒe ŋkɔ yeyea, si nye Israel, tɔ ɖe vɔsamlekpuia ŋu ta la, eɖee fia be yelɔ̃ ɖe ŋkɔa dzi eye yekpɔ ŋudzedze ɖe ŋkɔa kple ale si Mawu kpe ɖe ye ŋu yetrɔ gbɔ va Ŋugbedodonyigbaa dzi la ŋu. Zi ɖeka koe nya sia dze le Ŋɔŋlɔawo me.
APRIL 27–MAY 3
NU XƆASI SIWO LE MAWU ƑE NYA LA ME | 1 MOSE 34-35
Mawu Ƒe Nyaa Me Kesinɔnuwo Didi
1. Ame si na no Rebeka. Esi Rebeka dzo le fofoa Betuel ƒe aƒe me yina Palestina be yeaɖe Isak la, Debora yi kplii. (1Mo 24:59) Esi Debora subɔ le Isak ƒe aƒe me ƒe aɖewo megbe la, eva zu Yakob ƒe aƒemetɔ, ɖewohĩ le Rebeka ƒe ku megbe. Edze ƒãa be le Rebeka kple Isak ƒe srɔ̃ɖeɖe ƒe 125 megbe la, Debora ku eye woɖii ɖe ati gã aɖe te le Betel. Ŋkɔ si wona atia (Alon-Bakut, si gɔmee nye “Konyifalogoti”) ɖe ale si gbegbe Yakob ƒe ƒomea melɔ̃a nu le egbɔ o la fia.—1Mo 35:8.