Gbɔgbɔ Kɔkɔe La—Ŋusẽ Si Wozã Le Nuwo Wɔwɔ Me!

‘Yehowa ƒe nya wotsɔ wɔ dziƒowoe, eye eƒe nu me gbɔgbɔ wotsɔ wɔ wo ŋu nuwo katãe.’—PS. 33:6.

1, 2. (a) Alekee nu siwo amegbetɔwo nya tso dziƒoŋunuwo kple anyigbaa ŋu la le dzidzim ɖe edzi esi ɣeyiɣiawo va le yiyim? (b) Nyabiase kae wòhiã be míakpɔ ŋuɖoɖo na?

ESIME Albert Einstein ɖe eƒe agbalẽ si ƒo nu tso ƒomedodo tɔxɛ si le nuwo dome ŋu ɖe go le ƒe 1905 me la, eya kple dzɔdzɔmeŋutinunyala bubu geɖe xɔe se be ɣletivihatsotso ɖeka—míaƒe Milky Way (la Voie lactée) la—koe nye xexe blibo la. Aleke gbegbee wobu xexea be ele sue ŋutɔ ye nye esi! Egbea la, wosusu be ɣletivihatsotso biliɔn 100 kple edzivɔwoe le dziƒonutowo me, eye wogblɔ be ɣletivi biliɔn geɖewoe ƒo ƒu wɔ wo dometɔ aɖewo. Esi wole didiƒekpɔmɔ̃ sesẽ siwo tea ŋu kpɔa didiƒe ʋĩ ke la zãm le anyigba dzi fifia alo le wo dam ɖe yame be woanɔ xlã ƒom anyigbaa ta la, ɖeko ɣletivihatsotso siwo ŋu woke ɖe la ƒe xexlẽme le dzidzim ɖo edzi.

² Ale si dzɔdzɔmeŋutinunyalawo menya nu geɖe tso dziƒoŋunuwo ŋu le ƒe 1905 me o la, nenema kee womenya nu geɖe tso anyigba la hã ŋu o. Enye nyateƒe be, ame siwo nɔ anyi ƒe alafa ɖekae nye esi va yi la nya nu geɖe wu wo tɔgbuitɔgbuiwo. Gake egbea la, míenya nu geɖe tso ale si gbegbe nu gbagbewo li hamehame kple woƒe atsyɔ̃ɖoɖo kpakple anyigbaa dzi ɖoɖo siwo léa agbe ɖe te la ŋu wu nu siwo wonya tso wo ŋu ɣemaɣi. Eye ɖikeke mele eme o be, míava nya nu geɖe wu tso anyigbaa kple dziƒoŋunuwo ŋu le ƒe siwo gbɔna me. Gake nya si le vevie be míabiae nye, Aleke nu siawo katã wɔ va dzɔ? Ne menye ɖee Wɔla la ɖe nya sia ƒe ŋuɖoɖo fia le Ŋɔŋlɔ Kɔkɔeawo me o la, anye ne míake ɖe eŋu gbeɖe o.

Nukunue Nuwɔwɔwo Nye

3, 4. Nu ka dzie Mawu to wɔ xexea, eye alekee eƒe dɔwɔwɔwo hea ŋutikɔkɔe vana nɛ?

³ Woɖe ale si xexea wɔ va dzɔ me le nya siwo wotsɔ ʋu Biblia nui la me be: “Le gɔmedzedzea me Mawu wɔ dziƒo kple anyigba.” (1 Mose 1:1) Le ɣeyiɣi si me naneke menɔ anyi o me la, Yehowa zã eƒe gbɔgbɔ kɔkɔea, si nye eƒe dɔwɔŋusẽ triakɔ la, tsɔ wɔ dziƒoŋunu siwo míekpɔna, anyigba la, kple nu bubu siwo katã le xexea me. Amegbetɔ aɖaŋudɔwɔla zãa eƒe asiwo kple dɔwɔnuwo tsɔ wɔa nuwoe, gake Mawu ya ɖoa eƒe gbɔgbɔ kɔkɔea ɖa wòwɔa eƒe dɔ klitsuwo.

⁴ Ŋɔŋlɔawo yɔ gbɔgbɔ kɔkɔea le kpɔɖeŋunyagbɔgblɔ nu be Mawu ƒe “asibide.” (Luka 11:20; Mat. 12:28) Eye “eƒe asinudɔwɔwɔ”—nu siwo Yehowa to eƒe gbɔgbɔ kɔkɔea dzi wɔ la—hea ŋutikɔkɔe geɖe vana nɛ. Hakpala David dzi ha be: ‘Dziƒowo le Mawu ƒe bubu xlẽm fia, eye dziŋgɔli le gbeƒã ɖem eƒe asinudɔwɔwɔ.’ (Ps. 19:2) Vavãe, nuwɔwɔ siwo míekpɔna la ɖea ŋusẽ wɔnuku si gbegbe Mawu ƒe gbɔgbɔ kɔkɔea nye la fiana. (Rom. 1:20) Le mɔ ka nu?

Mawu Ƒe Ŋusẽ Si Seɖoƒe Meli Na O

 5. Wɔ nuwɔŋusẽ si gbegbe Yehowa ƒe gbɔgbɔ kɔkɔea nye la ƒe kpɔɖeŋu.

⁵ Míaƒe xexe gbahoo sia, si ƒe lolome míate ŋu asusu agblɔ o la, nye kpeɖodzi be ŋusẽ mavɔ ye le Yehowa si. (Mixlẽ Yesaya 40:26.) Dzɔdzɔmeŋutinunyalawo nyae egbea be woate ŋu atrɔ nu ŋutɔŋutɔwo abe ya, nu sesẽwo, kple tsi ene woazu ŋusẽtsoƒe alo dzoxɔxɔ, eye nenema kee woate ŋu atrɔ ŋusẽ alo dzoxɔxɔ wòazu nu mawo ke. Míaƒe ɣe la, si hã nye ɣletivi la, nye esia ƒe kpɔɖeŋu ɖeka. Le sɛkɛnd ɖe sia ɖe me la, ɣea trɔa nu siwo le etome la ƒe ɖe, si ƒe kpekpeme ade tɔn miliɔn ene lɔƒo, wòzua kekeli kple keklẽŋusẽ bubu ƒomeviwo. Keklẽŋusẽ ma ƒe kakɛ sue aɖe si ɖoa mía gbɔ la ɖeɖe su be wòalé agbe ɖe te le anyigba dzi. Edze ƒãa be, ebia ŋusẽ geɖe ŋutɔ kple alɔkame sesẽ hafi woate ŋu awɔ ɣe la kple ɣletivi biliɔn gbogboawo katã. Ŋusẽ si hiã be woatsɔ awɔ nu siawo kple esi wu ema kura ye le Yehowa si.

6, 7. (a) Nu ka tae míate ŋu agblɔ be Mawu zã eƒe gbɔgbɔ kɔkɔea le ɖoɖo nu? (b) Nu kae ɖee fia be xexea medzɔ le vo me o?

⁶ Nu geɖewo ƒo xlã mí siwo ɖo kpe edzi be Mawu zã eƒe gbɔgbɔ kɔkɔea le ɖoɖo manyagblɔ aɖe nu. Míawɔ esia ƒe kpɔɖeŋu ale: Tsɔe be èlé nugo aɖe si me bɔl siwo le amadede vovovowo me la le ɖe asi. Èʋuʋu nugoa be bɔl siwo le eme la natsaka nyuie. Azɔ ètrɔ wo katã kɔ ɖe anyigba zi ɖeka. Ðe nàkpɔ mɔ be woakɔ ɖi le ƒuƒoƒo me le woƒe amadedewo nu—blɔawo nanɔ du, aŋutiɖiɖiawo naƒo ƒu ɖekae, eye wòanɔ nenema le amedede bubuawo hã gomea? Gbeɖe! Tɔtɔ koe nu sia nu si womewɔ le ɖoɖo aɖeke nu o la hena vanɛ ɣesiaɣi, mewu nenema o. Ame sia ame lɔ̃ ɖe nyateƒenya sia dzi be enye dzɔdzɔmese.a

⁷ Ke hã, ne míetsɔ didiƒekpɔmɔ̃wo kpɔ dziƒowo la, nu kae míakpɔ? Míakpɔ ɣletivihatsotsowo, ɣletiviwo, kple ɣletinyigba gbogbo siwo le ɖoɖo nu ale gbegbe siwo katã le zɔ ɖem le ɖoɖo nu pɛpɛpɛ. Nu siawo mate ŋu adzɔ le vo me alo adzɔ ɖoɖo aɖeke manɔmee o. Eya ta ele be míabia be, Ŋusẽ kae wozã le gɔmedzedzea me tsɔ wɔ míaƒe xexe sia si le ɖoɖo nu alea gbegbe? Mí amegbetɔwo míate ŋu ato dzɔdzɔmeŋutinunya ƒe numekuku kple nuwo dodo kpɔ dzro ko dzi ade dzesi ŋusẽ ma o, elabena seɖoƒe li na nu siwo míate ŋu awɔ. Gake Biblia ya ɖee fia be Mawu ƒe gbɔgbɔ kɔkɔe, si nye ŋusẽ triakɔtɔ kekeake le xexea me godoo, lae wotsɔ wɔ wo. Hakpalaa dzi ha be: ‘Yehowa ƒe nya wotsɔ wɔ dziƒowoe, eye eƒe nu me gbɔgbɔ wotsɔ wɔ wo ŋu nuwo katãe.’ (Ps. 33:6) Gake ne míefɔ mo dzi kpɔ dziƒo le zã me la, ‘nu mawo’ ƒe akpa sue aɖe ŋutɔ koe míate ŋu akpɔ kple ŋku gbɔlo!

Ale Si Wozã Gbɔgbɔ Kɔkɔea Tsɔ Wɔ Anyigba Lae

 8. Nu agbɔsɔsɔme kae míenya tso Yehowa ƒe dɔwɔwɔwo ŋu?

⁸ Nu si míenya tso dzɔdzɔmenuwo ŋu fifia la meɖi naneke kura o, ne míetsɔe sɔ kple nu siwo gakpɔtɔ li míasrɔ̃. Le sidzedze agbɔsɔsɔme si su mía si le Mawu ƒe dɔwɔwɔwo ŋu ya gome la, nuteƒewɔla Hiob ƒo nya ta be: ‘Kpɔ ɖa, esiawo nye eƒe mɔwo to ko, eye nu si sem míele la, nye dalĩdodo!’ (Hiob 26:14) Ƒe alafa aɖewo le esia megbe la, Fia Salomo si dze aɖaŋu le ŋkuléle ɖe Yehowa ƒe nuwɔwɔwo ŋu me la gblɔ be: ‘[Mawu wɔ] nuwo katã nyuie ɖe wo wɔɣi, eye wòde mavɔmavɔ dzi me na wo, negbe ɖeko amegbetɔ menya mɔnu le nu siwo Mawu wɔ la ƒe agɔmegbɔ kple tagbɔ ŋu o.’—Nyagb. 3:11; 8:17.

9, 10. Ŋusẽ kae Mawu zã le anyigba la wɔwɔ me, eye nu kawoe yi edzi le nuwɔwɔ ƒe ŋkeke etɔ̃ gbãtɔawo me?

⁹ Ke hã, Yehowa ɖe eƒe nuwɔwɔwo ŋuti nyatakaka veviwo fia. Le kpɔɖeŋu me, Ŋɔŋlɔawo gblɔ na mí be Mawu ƒe gbɔgbɔ nɔ dɔ wɔm le anyigbaa dzi xoxoxo ƒe gbogbo manyaxlẽ aɖewo. (Mixlẽ 1 Mose 1:2.) Ɣemaɣi la, anyigba ƒuƒui aɖeke menɔ anyi o, kekeli menɔ anyi o, eye edze abe ya nyui aɖeke menɔ anyigbaa dzi woagbɔ o ene.

¹⁰ Biblia la yi edzi ƒo nu tso nu siwo Mawu wɔ le nuwɔwɔ ƒe ŋkeke vovovowo me la ŋu. Menye gaƒoƒo 24 ƒe ŋkekewoe esiawo nye o, ke boŋ ɣeyiɣi ƒe didime aɖewoe wonye. Le nuwɔwɔ ƒe ŋkeke gbãtɔ dzi la, Yehowa na kekeli te dzedze le anyigba la dzi. Nuwɔwɔ ƒe akpa sia wu enu esime ɣe kple ɣleti va nɔ dzedzem keŋ tso anyigba dzi. (1 Mose 1:3, 14) Le ŋkeke evelia dzi la, Mawu te ya siwo ƒo xlã anyigba la wɔwɔ. (1 Mose 1:6) Va se ɖe ɣemaɣi la, tsi, kekeli, kple ya nɔ anyigba la dzi, gake anyigba ƒuƒui aɖeke menɔ anyi o. Le nuwɔwɔ ƒe ŋkeke etɔ̃lia ƒe gɔmedzedze la, Yehowa to gbɔgbɔ kɔkɔea dzi wɔ anyigba ƒuƒui, ɖewohĩ ewɔ anyigbatumeŋusẽ triakɔwo ŋu dɔ tsɔ na be anyigbagãwo do tso atsiaƒu gbanaa si xɔ anyigba katã ŋkume la te. (1 Mose 1:9) Nu wɔnuku bubuwo gadzɔ le ŋkeke etɔ̃lia kple nuwɔwɔ ƒe ŋkeke siwo kplɔe ɖo la me.

Ale Si Wozã Gbɔgbɔ Kɔkɔea Tsɔ Wɔ Nu Gbagbewoe

11. Nu kae ale si nu gbagbewo wɔ nukui, ale si wosɔ le go ɖe sia ɖe me, kpakple woƒe atsyɔ̃ɖoɖo ɖe fia?

¹¹ Mawu gato gbɔgbɔ kɔkɔea dzi wɔ nu gbagbe siwo le ɖoɖo deŋgɔwo nu la. Tso nuwɔwɔ ƒe ŋkeke etɔ̃lia dzi yi adelia dzi la, Mawu to gbɔgbɔ kɔkɔea dzi wɔ nu miemie kple lã hamehame siwo wɔ nuku ŋutɔ. (1 Mose 1:11, 20-25) Eya ta ale si nu gbagbewo sɔ gbɔ hewɔ nukui, ale si wosɔ pɛpɛpɛ le go ɖe sia ɖe me, kpakple woƒe atsyɔ̃ɖoɖo ɖee fia be woƒe wɔwɔme ƒo aɖaŋudɔ nyuitɔ kekeake ta.

12. (a) Dɔ kae DNA la wɔna? (b) Nu kae wòle be míasrɔ̃ tso ale si DNA la yi edzi le eƒe dɔa wɔm dzidzedzetɔe la me?

¹² Bu domenyiŋusẽmanu alo DNA si nye lãmetsi aɖe si nana be nuwɔwɔ ƒomevi aɖe ƒe dzedzeme kple nɔnɔme tɔxɛwo nɔa anyi tso dzidzime yi dzidzime ŋu kpɔ. DNA sia wɔa dɔ le nu gbagbe siwo katã le anyigba dzi—siwo dome nugbagbeviwo, gbewo, atiglinyiwo, boso gãtɔwo, kple amegbetɔwo le la—me ne wole dzidzim. Togbɔ be anyigba dzi nuwɔwɔwo to vovo tso wo nɔewo gbɔ sãsãsã hã la, dzɔdzɔmese si fiaa mɔ dzedzeme kple nɔnɔme tɔxɛ siwo dome wonyina ne wole dzidzim la dometɔ geɖe metrɔna gbeɖe o, eye esia wɔe be vovototo si le nuwɔwɔ aɖe ƒomeviwo dome la gakpɔtɔ li va se ɖe egbe. Eya ta le Yehowa Mawu ƒe tameɖoɖo nu la, anyigba dzi nugbagbevi vovovowo yi edzi le woƒe dɔwo wɔm le kadodo si le anyigba dzi nu gbagbewo dome la me. (Ps. 139:16) Ðoɖo nyui sia si ɖea vi ŋutɔ la ganye kpeɖodzi bubu be Mawu ƒe “asibide” alo gbɔgbɔ kɔkɔea dzie woto wɔ nuwo.

Anyigba Dzi Nuwɔwɔ Vevitɔ

13. Alekee Mawu wɔ ame?

¹³ Esi ƒe gbogbo manyagblɔ aɖe va yi eye Mawu wɔ nu gbogbo manyaxlẽ siwo me agbe le kple esiwo me agbe mele o vɔ la, womagate ŋu agblɔ be “nɔnɔme meli [na anyigba la] o.” Ke hã, Yehowa mewu nu siwo wòɖo be yeatsɔ yeƒe gbɔgbɔa awɔ la wɔwɔ nu haɖe o. Azɔ la, ɣeyiɣia de be wòawɔ eƒe anyigba dzi nuwɔwɔ si ƒo ɖe sia ɖe ta. Le nuwɔwɔ ƒe ŋkeke adelia dzi la, Mawu wɔ ame. Aleke Yehowa wɔe? Eto eƒe gbɔgbɔ kɔkɔea dzi zã anyigba me nuwo tsɔ wɔe.—1 Mose 2:7.

14. Mɔ vevi ka nue amegbetɔwo to vovo na lãwo le?

¹⁴ Mose ƒe Agbalẽ Gbãtɔ 1:27 gblɔ be: ‘Mawu wɔ ame ɖe ye ŋutɔ ƒe nɔnɔme, Mawu ƒe nɔnɔme nue wòwɔe ɖo; ŋutsu kple nyɔnu wòwɔ.’ Esi wogblɔ be wowɔ mí ɖe Mawu ƒe nɔnɔme nu la, efia be, Yehowa wɔ mí kple ŋutete be míaɖe lɔlɔ̃ afia, awɔ tiatiawɔblɔɖe ŋu dɔ, eye kura gɔ̃ hã, míanɔ ƒomedodo me kple eya si nye mía Wɔla. Esia tae míaƒe ahɔhɔ̃ to vovo na lãwo tɔ ɖo. Ðe Yehowa wɔ amegbetɔ ƒe ahɔhɔ̃ le mɔ aɖe nu koŋ be míate ŋu ayi edzi anɔ nu srɔ̃m tso eya kple eƒe asinudɔwɔwɔwo ŋu tegbee.

15. Mɔnukpɔkpɔ kae nɔ ʋuʋu ɖi na Adam kple Xawa?

¹⁵ Le amegbetɔwo ƒe ŋutinya ƒe gɔmedzedze la, Mawu tsɔ anyigba la kple nu wɔnuku siwo katã le edzi la na Adam kple srɔ̃a, Xawa, be woasrɔ̃ nu tso wo ŋu eye woatsɔ wo ado dzidzɔ na wo ɖokuiwo. (1 Mose 1:28) Yehowa na nuɖuɖu gbogbo aɖe wo eye wòwɔ paradisoƒe aɖe na wo. Mɔnukpɔkpɔ nɔ ʋuʋu ɖi na wo be woanɔ agbe tegbee eye woazu amegbetɔ deblibo biliɔn geɖewo dzilawo, siwo gbɔ wo viwo malɔ̃ nu le o. Ke hã, nuwo meva yi alea o.

Lɔ̃ Ðe Akpa Si Gbɔgbɔ Kɔkɔea Wɔ Dzi

16. Mɔkpɔkpɔ kae le mía si togbɔ be mía dzila gbãtɔwo dze aglã hã?

¹⁶ Le esi Adam kple Xawa naɖo to wo Wɔla ahada akpe nɛ teƒe la, ɖe woɖe mɔ ɖokuitɔdidi na wodze aglã ɖe eŋu boŋ. Amegbetɔ madeblibowo katã dzɔ tso wo me eye wole fu kpem le woƒe nuwɔnaa ta. Gake Biblia la gblɔ ale si Mawu ava ɖɔ nu gbegblẽ siwo katã do tso nu vɔ̃ si mía dzila gbãtɔawo wɔ me ɖo la na mí. Ŋɔŋlɔawo ɖee fia hã be, Yehowa ana eƒe gɔmedzetameɖoɖoa nava eme. Anyigba la ava zu paradiso si me amegbetɔ kpɔdzidzɔ siwo anɔ lãmesẽ me eye woanɔ agbe tegbee la anɔ. (1 Mose 3:15) Míehiã Mawu ƒe gbɔgbɔ kɔkɔea ƒe kpekpeɖeŋu be míakpɔtɔ axɔ mɔkpɔkpɔ dodzidzɔname ma dzi ase.

17. Nuŋububu ka ƒomevie wòle be míaƒo asa na?

¹⁷ Ele be míado gbe ɖa na Yehowa abia eƒe gbɔgbɔ kɔkɔea. (Luka 11:13) Esia wɔwɔ akpe ɖe mía ŋu be kakaɖedzi si le mía si be nuwɔwɔwo nye Mawu ƒe asinudɔwɔwɔwo la me nagasẽ ɖe edzi. Egbea la, wole boblo dom mawudzimaxɔse kple nɔnɔmetɔtrɔ ƒe nufiafia siwo yɔ fũu kple alakpadada eye womenɔ te ɖe gɔmeɖose aɖeke dzi o la wu tsã. Mele be míaɖe mɔ nuŋububu totro siwo le agbogbo dom la nana míatɔtɔ alo ŋɔ nadzi mí o. Ele be Kristotɔwo katã nadzra wo ɖokui ɖo be woatsi tsitre ɖe nukpɔsusu sia si le gã dom ɖe edzi la kple hatiwo ƒe nyaƒoɖeamenu siwo wòate ŋu ahe ava wo dzi la ŋu.—Mixlẽ Kolosetɔwo 2:8.

18. Ne wole numekuku wɔm tso ale si xexea kple ameƒomea wɔ va dzɔ ŋu la, nu ka tae wòanye nuŋumabumabu yi ŋgɔe be woaŋe aɖaba aƒu Wɔla nyanu aɖe ƒe anyinɔnɔ dzi?

¹⁸ Nu siwo ɖo kpe edzi be ɖe wowɔ nuwo la me dzodzro anukwaretɔe ado ŋusẽ míaƒe Biblia dzi xɔxɔ se eye wòana míagaxɔ Mawu dzi ase geɖe wu godoo. Ne ame geɖe le numekuku wɔm tso ale si xexea kple ameƒomea wɔ va dzɔ ŋu la, woadi be yewoaŋe aɖaba aƒu nyateƒe si wònye be ŋusẽ alo ame aɖe si womekpɔna o, gbɔe wòanya tso la dzi. Ne míebu nuwo ŋu alea la, afia be míele kpeɖodzi siwo katã li la me dzrom akpa aɖeke dzi mademadee o. Gakpe ɖe eŋu la, afia be míeŋe aɖaba ƒu nyateƒe si wònye be nuwɔwɔ hamehame siwo “xexlẽme meli na o” la li eye wole ɖoɖo nu la dzi. (Hiob 9:10; Ps. 104:25) Mí Kristotɔwo ya míeka ɖe edzi be dɔwɔŋusẽ si nɔ megbe na nuwo wɔwɔe nye gbɔgbɔ kɔkɔe la, si Yehowa tsɔ eya ŋutɔ ƒe nunya fia mɔe la.

Gbɔgbɔ Kɔkɔea Doa Ŋusẽ Míaƒe Mawu Dzi Xɔse

19. Nu kawoe naa kakaɖedzi míawo ŋutɔwo ku ɖe Mawu ƒe anyinɔnɔ kple gbɔgbɔ kɔkɔea ƒe dɔwɔwɔ ŋu?

¹⁹ Mehiã be míanya nu sia nu tso nuwɔwɔwo ŋu hafi míate ŋu axɔ Mawu dzi se, alɔ̃e ahade bubu deto eŋu o. Abe ale si wòle le amegbetɔwo dome xɔlɔ̃dzedze gome ene la, Yehowa dzi xɔxɔ se lɔ nu geɖe ɖe eme wu nyateƒenyawo nyanya tso eŋu ko. Ale si ko kadodo si le xɔlɔ̃wo dome la me sẽna ɖe edzi ne wole wo nɔewo nyam nyuie wu la, nenema kee míaƒe Mawu dzi xɔse me sẽna ɖe edzi ne míele nu geɖe wu srɔ̃m tso eŋu. Vavãe, ne míede dzesii be eɖoa míaƒe gbedodoɖawo ŋu na mí eye be nu nyuiwo dona tso eƒe gɔmeɖosewo dzi wɔwɔ me la, míegakana ɖe edzi geɖe wu be eli. Míetena ɖe Yehowa ŋu geɖe wu ne kpeɖodzi geɖewo su mía si be ele mɔ fiam míaƒe afɔɖeɖewo, ele mía ta kpɔm, ele yayram ɖe agbagba siwo dzem míele le eƒe subɔsubɔdɔa me dzi, eye wòle nu siwo míehiã la nam mí. Esiawo katã nyea Mawu ƒe anyinɔnɔ kple gbɔgbɔ kɔkɔea ƒe dɔwɔwɔ ŋuti kpeɖodzi sẽŋuwo.

20. (a) Nu ka tae Mawu wɔ xexea kple amegbetɔwo? (b) Ne míeɖe mɔ Mawu ƒe gbɔgbɔ kɔkɔea yi edzi le mɔ fiam mí la, nu kae ado tso eme?

²⁰ Biblia la nye ale si Yehowa zãa eƒe gbɔgbɔ kɔkɔea ƒe kpɔɖeŋu ɖedzesi aɖe, elabena “gbɔgbɔ kɔkɔe ye ʋã [ame siwo ŋlɔe la] wogblɔ Mawu ƒe nyawo ɖi.” (2 Pet. 1:21) Ŋɔŋlɔawo sɔsrɔ̃ nyuie ate ŋu ana míagaxɔ edzi ase geɖe wu be Mawu ye wɔ nuwo katã. (Nyaɖ. 4:11) Yehowa ƒe nɔnɔme nyoameŋu si nye lɔlɔ̃ ye ʋãe wòwɔ nuwo. (1 Yoh. 4:8) Eya ta mina míawɔ míaƒe ŋutete ɖe sia ɖe be míakpe ɖe ame bubuwo ŋu woasrɔ̃ nu tso mía Fofo lɔ̃ame kple mía Xɔlɔ̃ si le dziƒo la ŋu. Le míawo gome la, ne míeɖe mɔ Mawu ƒe gbɔgbɔ kɔkɔea yi edzi le mɔ fiam mí la, mɔnukpɔkpɔ asu mía si be míasrɔ̃ nu tso Mawu ŋu tegbee. (Gal. 5:16, 25) Neva eme be mía dometɔ ɖe sia ɖe nayi edzi anɔ nu srɔ̃m tso Yehowa kple eƒe dɔ klitsuwo ŋu, eye míanɔ lɔlɔ̃ gã si wòɖe fia esi wòzã eƒe gbɔgbɔ kɔkɔea tsɔ wɔ dziƒowo, kple anyigbaa, kpakple amegbetɔwo, la ɖem fia le míaƒe agbe me.

[Etenuŋɔŋlɔ]

Àte Ŋu Aɖe Wo Mea?

• Nu kae dziƒowo kple anyigba ƒe anyinɔnɔ fia mí tso ale si Mawu zã gbɔgbɔ kɔkɔe lae ŋu?

• Mɔnukpɔkpɔ kawoe sua mía si le esi wowɔ mí ɖe Mawu ƒe nɔnɔme nu ta?

• Nu ka tae wòhiã be míaku kpeɖodzi siwo ɖee fia be ɖe wowɔ nuwo la me?

• Nu kawoe míate ŋu awɔ be mía kple Yehowa dome ƒomedodoa me nanɔ sesẽm ɖe edzi?

[Nɔnɔmetata si le axa 7]

Nu kae ale si nuwo le ɖoɖo nu le xexea me la fia mí tso nuwɔwɔwo ŋu?

[Afi Si Miìexɔ Mɔɖeɖe Tso]

Ɣletiviwo: Anglo-Australian Observatory/David Malin Images

[Nɔnɔmetata si le axa 8]

Alekee DNA la wɔa dɔ le nu siawo katã me?

[Nɔnɔmetata si le axa 10]

Èle dzadzraɖoɖi be nàʋli wò xɔse ta?