Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽ Ƒe Nyatsoƒewo
MAY 4-10
NU XƆASI SIWO LE MAWU ƑE NYA LA ME | 1 MOSE 36-37
Mawu Ƒe Nyaa Me Kesinɔnuwo Didi
(Edom) [Dzĩ], Edomtɔwo.
Edom ye nye ŋkɔ bubu alo ŋkɔ evelia si wotsɔ na Esau, si nye Yakob ƒe vedzɔ. (1Mo 36:1) Wotsɔ ŋkɔ sia nɛ le esi wòdzra eƒe ŋgɔgbevinyenye ɖe atadi dzĩ aɖe ta. (1Mo 25:30-34) Nudogoɖenunutɔe la, Esau nye ame dzĩ tso edziɣi ke (1Mo 25:25) eye ŋutigbãle ƒe amadede ma kee ɖe dzesi le anyigba ƒe akpa si eya kple eƒe dzidzimeviwo va nɔ emegbe la dzi.
Ne alẽkplɔla alo lãkplɔvi aɖe di be yeakplɔ ame aɖe ƒe alẽwo alo lãha alo be yeanyi wo la, efia be ele lɔlɔ̃m ɖe edzi le se nu be yeakpɔ egbɔ be alẽawo alo lãhaa anɔ dedie. Ele kpe ɖom edzi na nutɔa be yeanyi lãawo nyuie eye ne wo dometɔ aɖe bu la yeaɖoe eteƒe. Ke hã, mate ŋu akpɔ alẽawo ta le nu sia nu me o, eya ta nenye be nane si gbɔ ame ƒe ŋutete ŋu la dzɔ, abe ne lã wɔadãwo va dze lãhaa dzi ene la, se mate ŋu akui o. Ne nane dzɔ alea la, ke ele be lãkplɔvia natsɔ lã kukua alo eƒe akpa si susɔ la ava fia nutɔa wòanye kpeɖodzi be yemeɖi fɔ o. Ekema ame si tɔe lãwo nye la, alé ŋku ɖe lã kukua alo eƒe akpa si susɔ la ŋu nyuie eye wòatso nya me be lãkplɔvia meɖi fɔ o.
Wowɔa gɔmeɖose sia ke hã ŋu dɔ le mɔ geɖe nu ne wotsɔ nunɔamesi aɖe de asi na ame aɖe, le ƒomekadodowo gɔ̃ hã me, le kpɔɖeŋu me, wobunɛ be viŋutsu tsitsitɔ ƒe agbanɔamedzie wònye be wòakpɔ nɔvia siwo wòtsi wu la ta. Le susu sia ta, míate ŋu ase nu si tae Ruben, si nye vi ŋutsu tsitsitɔ la, tsi dzi ɖe Yosef ƒe agbe ŋu la gɔme, esi nɔviawo nɔ nugbe ɖom be yewoawui, abe ale si wòdze le 1 Mose 37:18-30 ene. “Egblɔ be: ‘Migana míaɖe eƒe agbe ɖa madzemadze o.’ . . . ’Migakɔ ʋu ɖi o. . . . migasẽ ŋuta le eŋu o.’ Eɖoe be yeaɖee le wo si me, ne yeagbugbɔe aɖo ɖe fofoa.” Esi Ruben trɔ gbɔ, eye mekpɔ Yosef o la, ete ɖe edzi ale gbegbe be “edze eƒe awuwo” eye wòdo ɣli be: “Ðevi la megali o! Nu ka wɔ gee mala?” Enyae be woate ŋu abia Yosef ƒe agbe tso ye si. Be woagabia Yosef ƒe agbe tso wo si o ta la nɔviawo tsɔ aɖaŋudzedze trɔ asi le nane si aɖo kpe edzi be lã wɔadã aɖee wui la ŋu. Wowɔ esia esime wotsɔ Yosef ƒe awu ʋlaya la nyrɔ̃ ɖe gbɔ̃ ƒe ʋu me. Esi wotsɔ awu sia va fia wo fofo Yakob ame si nye ƒome ma ƒe ʋɔnudrɔla la, mebu fɔ Ruben ɖe Yosef ƒe kua ta o, ke boŋ Yosef ƒe awu ʋlaya si ƒo ʋu, si wòkpɔ abe kpeɖodzi ene na wòƒo nya ta be Yosef anya ku nyateƒe.—1Mo 37:31-33.
MAY 11-17
NU XƆASI SIWO LE MAWU ƑE NYA LA ME | 1 MOSE 38-39
Mawu Ƒe Nyaa Me Kesinɔnuwo Didi
(Onan) [egɔmee nye “vidziŋusẽ; ŋusẽ tɔxɛ”].
Enye Yuda ƒe vi evelia si Kanaantɔ Sua ƒe vinyɔnu dzi nɛ. (1Mo 38:2-4; 1Kr 2:3) Esi Yehowa wu Er si nye Onan fo le eƒe nugbegblẽ wɔwɔ ta la, Yuda gblɔ na Onan be wòaɖe foa srɔ̃ Tamar si zu ahosi la, elabe Er medzi vi aɖeke hafi ku o. Ne wodzi ŋutsuvi la, ɖevia manye Onan tɔ o, eye ɖevia axɔ Er ƒe ŋgɔgbevinyenye ƒe domenyinuwo; gake ne domenyila aɖeke meli o la, domenyinuawo azu Onan tɔ. Eya ta ne Onan dɔ kple Tamar la, “enana tsi la duduna ɖe anyigba,” menyèa tsia nɛ o. Onan ƒe nuwɔna sia menye ameɖokuigbɔdɔdɔ o, elabe nuŋlɔɖia gblɔ be “ne edɔ kple nɔvia srɔ̃ la,” enana tsi la duduna ɖe anyigba. Anɔ eme be Onan ɖoe koŋ gbe be yemanyè tsia ɖe Tamar ƒe nyɔnu me o. Esi vi menɔ Onan ŋutɔ hã si o, evɔ wògbe toɖoɖo fofoa, klẽ ŋu, eye wògbe wɔwɔ ɖe ɖoɖo si Mawu wɔ ɖe srɔ̃ɖeɖe ŋu dzi ta la, menye eya ɖeka ko ŋue nuwɔna sia gblẽ nu le o. Ema tae Yehowa wui ɖo.—1Mo 38:6-10; 46:12; 4Mo 26:19.
MAY 25-31
NU XƆASI SIWO LE MAWU ƑE NYA LA ME | 1 MOSE 42-43
Nu siwo me tom Yosef nɔviwo nɔ ta la, woƒo nya ta be Mawue nɔ to hem na yewo le esi yewodzra yewo nɔvia wòzu kluvi ƒe aɖewoe nye esi va yi ta. Wonɔ nu gbegblẽ si wowɔ va yi la me dzrom le wo nɔvi si womega dze si o la ŋkume. Esi Yosef nɔ woƒe nya siwo ɖee fia be wotrɔ dzi me sem la, ewɔ dɔ ɖe edzi ale gbegbe be edzo le wo ŋkume eye wòfa avi. Esi wòtrɔ va la, ena wobla Simeon va se ɖe esime woakplɔ wo nɔvi ɖevitɔ la vɛ.—1Mo 42:21-24.
Mawu Ƒe Nyaa Me Kesinɔnuwo Didi
Nɔnɔme nyui siwo le Ruben si la dometɔ aɖewo dze esi nɔviawo ɖoe be yewoawu Yosef. Eƒoe ɖe nɔvia asiekeawo nu be woatsɔ Yosef aƒu gbe ɖe vudo aɖe si me tsi mele o me kple susu be yeate ŋu atrɔ dzaa ava ɖee le vudoa me. (1Mo 37:18-30) Le ƒe 20 kple edzivɔ megbe esi nya sia gafɔ ɖe te eye nɔviawo nɔ eme dzrom be Yosef si ŋu yewo sẽŋuta le tae wotso yewo nu le Egipte be ŋkutsalawoe yewonye la, Ruben ɖo ŋku edzi na wo be yemenɔ nugbe si woɖo ɖe Yosef ŋu la me o. (1Mo 42:9-14, 21, 22) Azɔ hã, esi Yakob gbe be yemana Benyamin nakplɔ nɔviawo ɖo le woƒe mɔzɔzɔ evelia ayi Egipte me o la, Ruben ye tsɔ via eveawo da megbe gblɔ be: “Ne [nyemekplɔ Benyamin] gbɔe na wò o la, ekema wu [wo].”—1Mo 42:37.