Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽ Ƒe Nyatsoƒewo

JUNE 1-7

NU XƆASI SIWO LE MAWU ƑE NYA LA ME | 1 MOSE 44-45

Mawu Ƒe Nyaa Me Kesinɔnuwo Didi

Ne Yudatɔwo kple du siwo ƒo xlã wo se be woƒe ƒometɔ kpaŋkpaŋ aɖe ku la, wodzea woƒe awu tsɔ ɖea ale si wole veve semee la fiana. Zi geɖe la, akɔta gbɔe wodzea awua le gake womedzenɛ fũu be awu bliboa dome nagblẽ o.

Ame gbãtɔ si dze eƒe awu si ŋu Biblia ƒo nu tsoe nye Yakob viŋutsu tsitsitɔ, Ruben. Esi wòtrɔ va vudoa to eye mekpɔ Yosef le eme o la, edze eƒe awu eye wògblɔ be: “Ðevi la megali o! Nu ka wɔ gee mala?” Esi wònye Ruben ye nye ŋgɔgbevia ta la, agba le edzi be wòakpɔ nɔvia ta. Esi wo fofo Yakob se be ye via anya ku la, eya hã dze eƒe awu, ta akpanya eye wòfa konyi (1Mo 37:29, 30, 34), eye esi woda alakpa ɖe Benyamin si le Egipte be efi fi la, Yosef nɔviŋutsuawo dze woƒe awuwo tsɔ ɖe ale si wose vevee la fia.—1Mo 44:13.

JUNE 8-14

NU XƆASI SIWO LE MAWU ƑE NYA LA ME | 1 MOSE 46-47

² Ƒe adre siwo me nuɖuɖu bɔ la va wu enu, eye dɔwuame si ŋu nya Yehowa gblɔ ɖi la dze egɔme. Menye Egipte ɖeɖe koe dɔa to le o, ke boŋ “le anyigba blibo la katã dzi.” Esi Egiptetɔwo te avifafa na Farao be dɔ le yewo wum la, egblɔ na wo be: “Miyi Yosef gbɔ. Nu sia nu si wòagblɔ na mi la, miwɔe.” Yosef dzra nuɖuɖu na Egiptetɔwo va se ɖe esime ga vɔ le wo si. Eyome wotsɔa woƒe lãhawo vana na Yosef eye wòdzraa nuɖuɖu na wo ɖe eteƒe. Mlɔeba wogblɔ na Yosef be: “Ƒle míawo kple míaƒe anyigbawo ɖe nuɖuɖu teƒe, eye míawo ŋutɔwo míazu kluviwo na Farao, eye míaƒe anyigbawo nazu etɔ.” Eya ta Yosef ƒle Egiptetɔwo ƒe anyigbawo katã na Farao.—1Mo 41:53-57; 47:13-20.

Mawu Ƒe Nyaa Me Kesinɔnuwo Didi

Ŋkumiamia na ame si ku. Nya si Yehowa gblɔ na Yakob be, “Yosef ƒe asie amia wò ŋkuwo” (1Mo 46:4), la fia be Yosef ye amia Yakob ƒe ŋkuwo ne eku. Zi geɖea, ŋgɔgbeviwoe wɔa esia. Eya ta edze be Yehowa le gbɔgblɔm na Yakob be Yosef boŋ ye axɔ ŋgɔgbevinyenyea.—1Kr 5:2.

Wo katã wole ame blaadre vɔ atɔ̃: Anɔ eme be menye Hebri Ŋɔŋlɔawo ƒe kpukpui aɖe dzi koŋ ye Stefano nɔ asi tɔmee esi wògblɔ be Yakob ƒe aƒemetɔ siwo katã yi Egipte la nye 75 o. Xexlẽme sia medze le Masoretwo Ƒe Hebri Ŋɔŋlɔawo me o. 1Mo 46:26 gblɔ be: “Ame siwo katã wodzi na Yakob, siwo katã ʋu kplii yi Egipte, ne woɖe viaŋutsuwo srɔ̃wo le eme la, le blaade vɔ ade.” Kpukpui 27 lia yi edzi be: “Ame siwo katã tso Yakob ƒe me va Egipte la le blaadre.” Le afi sia, woxlẽ ameawo le mɔ eve nu. Anɔ eme be ame siwo nye Yakob ƒe dzidzimeviwo tẽe ye nye xexlẽme gbãtɔ, eye xexlẽme evelia nye ame siwo katã va Egipte. Wogayɔ Yakob ƒe dzidzimeviwo ƒe xexlẽme “blaadre” la le 2Mo 1:5 kple 5Mo 10:22. Anɔ eme be Stefano yɔ xexlẽme bubu si lɔ Yakob ƒe ƒome abɔ legbee la ɖe eme. Ame aɖewo gblɔ be elɔ Yosef ƒe vi Manase kple Efrayim ƒe viwo kple tɔgbuiyɔvi siwo woyɔ le 1Mo 46:20 le Septuagint Biblia me hã ɖe eme. Ame bubuwo hã gblɔ be wotsɔ Yakob viwo srɔ̃wo siwo wometsɔ kpe xexlẽme si le 1Mo 46:26 o la kpee. Eya ta xexlẽme “blaadre vɔ atɔ̃” la nye xexlẽme bliboa katã. Gake anɔ eme be xexlẽme sia dze le Hebri Ŋɔŋlɔ siwo nɔ anyi le ƒe alafa gbãtɔ Kristotɔwo Ŋɔli me siwo wozã ɣemaɣi la hã me. Ƒe geɖee nye esia agbalẽnyalawo nyae be xexlẽme “blaadre vɔ atɔ̃” ye woyɔ le 1Mo 46:27 kple 2Mo 1:5 le Helagbe me Septuagint la me. Azɔ hã, le ƒe alafa 20 lia me la, woke ɖe agbalẽ xatsaxatsa kakɛ eve siwo me 2Mo 1:5 dze le le Hebrigbe me la ŋu le Ƒu Kukua me, eye woawo hã zã xexlẽme “blaadre vɔ atɔ̃.” Anye blema nuŋlɔɖi mawo dometɔ aɖe mee Stefano tsɔ xexlẽme ma tsoe. Xexlẽmeawo dometɔ kae de wu o, ɖeko xexlẽme si Stefano yɔ la na míekpɔ mɔ bubu si dzi wòto xlẽ ame siwo katã nye Yakob ƒe dzidzimeviwo.

JUNE 15-21

NU XƆASI SIWO LE MAWU ƑE NYA LA ME | 1 MOSE 48-50

Do ŋgɔ teti na Yakob ƒe ku la, Mawu na wòyra etɔgbuiyɔvi siwo nye Yosef vi ŋutsu eveawo. Gake eyra Efrayim si nye ɖevitɔ gbã hafi yra Manase si nye tsitsitɔ. Eyome Yakob gblɔ na Yosef si axɔ ŋgɔgbevinyenye ƒe domenyinua ƒe teƒe eve be: “Metsɔ anyigba aɖe, si metsɔ nye yi kple nye dati xɔ le Amoritɔwo si la na wò, be tɔwò nawu nɔviwòwo tɔ.” (1Mo 48:1-22; 1Kr 5:1) Gake esi wònye ɖe Yakob ƒle anyigba ma si te ɖe Sekem ŋu la le Hamor viwo si le ŋutifafa me ta la (1Mo 33:19, 20), edze abe ŋugbe sia si Yakob do na Yosef la ɖo kpe xɔse si nɔ esi la dzi ene. Eka ɖe edzi be yeƒe dzidzimeviwo ava xɔ Kanaan-nyigba le etsɔme, si na wògblɔ nyaa ɖi abe ɖee eya ŋutɔ tsɔ eƒe yi kple dati xɔe xoxo ene. Domenyinu ƒe teƒe eve si Yosef axɔ le anyigba ma si woava xɔ mee nye anyigba ƒe gome eve siwo wova tsɔ na Efrayim kple Manase toawo.

Nya Si Yakob Gblɔ Ði Le Eƒe Kuba Dzi. Esi Yakob gblɔ na via ŋutsuawo be, “Miƒo ƒu, ne magblɔ nu si gbɔna dzɔdzɔ ge ɖe mia dzi le ɣeyiɣi siwo gbɔna me la na mi” la, enɔ nu ƒom tso ɣeyiɣi si me eƒe nyawo ate emevava la ŋu. (1Mo 49:1) Ƒe alafa eve kple edzivɔ do ŋgɔ la, Yehowa gblɔ na Yakob tɔgbui Abram (Abraham) be woawɔ fu eƒe dzidzimeviwo ƒe alafa ene sɔŋ. (1Mo 15:13) Eya ta le go sia me la, nya si Yakob gblɔ ɖi be “le ɣeyiɣi siwo gbɔna me” la adze emevava gɔme ne fuwɔwɔ eƒe dzidzimeviwo hena ƒe alafa ene la wu enu. (Ne èdi numekɔkɔ geɖe tso Mose Ƒe Agbalẽ Gbãtɔ ta 49 lia ŋu la, di nyati siwo ƒo nu tso Yakob viwo dometɔ ɖe sia ɖe ŋu le woƒe ŋkɔwo te.) Míagate ŋu akpɔ mɔ na ale si nyagblɔɖi sia ava eme ɖe “Mawu ƒe [gbɔgbɔ me] Israel” la hã dzi.—Ga 6:16; Ro 9:6.

Mawu Ƒe Nyaa Me Kesinɔnuwo Didi

Le aʋawɔwɔ ƒe ŋutete si anɔ Benyamin ƒe dzidzimeviwo ŋu ta la, Yakob ƒo nu tso nya ma ŋu le eƒe kuba dzi tsɔ gblɔ nya ɖi tso via lɔlɔ̃ sia ŋu be: “Benyamin anɔ nu vuvum abe amegãxi ene. Ŋdi la aɖu eƒe nuléle, eye wòama aboyonu le fiẽ.” (1Mo 49:27) Wonya Benyamin ƒe dzidzimeviwo be wobi ɖe akafo dada me ale gbegbe, wowɔa ɖusi kple mia le kpedada me “wòlɔa ɖakui ɖeka gɔ̃ hã.” (Ʋɔn 20:16; 1Kr 12:2) Ʋɔnudrɔ̃la Ehud, si nye miawɔla, ame si wu Fia Eglon ameteɖeanyila la, nye Benyamintɔ. (Ʋɔn 3:15-21) Eɖe dzesi hã be le Israel fiaɖuƒea ƒe “ŋdi” si nye woƒe ŋutinyaa ƒe gɔmedzedze ye woɖo Israel Fia gbãtɔ Saul, Kis vi ame si ho aʋa ɖe Filistitɔwo ŋu vevie la, tso Benyamin-to la me, togbɔ be enye ‘Israel-to suetɔwo’ dometɔ ɖeka hã. (1Sa 9:15-17, 21) Nenema kee “le fiẽ” si nye Israel-viwo ƒe ŋutinyaa ƒe nuwuwu la, Fianyɔnu Esta kple Dudɔnunɔla Mordekai, siwo tso Benyamin-toa me la, xɔ na Israel-viwo ale be wometsrɔ̃ wo ɖa le Persia Fiaɖuƒea me o.—Es 2:5-7.

JUNE 29–JULY 5

NU XƆASI SIWO LE MAWU ƑE NYA LA ME | 2 MOSE 4-5

Mawu Ƒe Nyaa Me Kesinɔnuwo Didi

Be ame “nanya,” nane alo ame aɖe mefia be woanya nua ɖe-kple-ɖe alo anya nu ʋɛ aɖe ko tso amea alo nua ŋu o. Nabal yakame la, nya David gake egabia be, “Ame kae nye David?” si fia be, “Nu kae wòate ŋu awɔ?” (1Sa 25:9-11; tsɔe sɔ kple 2Sa 8:13.) Nenema kee Farao hã bia Mose be: “Ame kae nye Yehowa, ne maɖo to eƒe gbe ahaɖe asi le Israel ŋu wòayi? Nyemenya Yehowa la o, eye nyemaɖe asi le Israel ŋu hã o.” (2Mo 5:1, 2) Le Farao ƒe nyaa nu la, ele gbɔgblɔm be yemelɔ̃ ɖe edzi be Yehowa, ye nye Mawu vavã o, alo be wòakpɔ ŋusẽ ɖe Egipte Fia kple eƒe nyawo dzi, loo alo kpɔ mɔ azi Eƒe didi siwo wòna Mose kple Aron va gblɔ la ɖe ye dzi o. Gake fifia Farao kple Egipte bliboa, tsɔ kpe ɖe Israel-viwo ŋu, ava nya gɔmesese si ŋutɔŋutɔ le ŋkɔ ma kple ame si tɔ ŋkɔa ŋu. Abe ale si Yehowa ɖee fia Mose ene la, woava nya esia ne Mawu wɔ tame si wòɖo ɖe Israel-viwo ŋu la dzi, eye wòɖe wo, kplɔ wo yi Ŋugbedodonyigbaa dzi, tsɔ wɔ ɖe nu, si wòbla kple wo tɔgbuiwo la dzi. Ne nya siawo va eme, abe ale si Mawu gblɔe ene la: “Miadze sii [alo anyae] be nyee nye Yehowa mia Mawu.”—2Mo 6:4-8.