Fia Siwo Nye Nunɔlawo, Siwo Ahe Yayrawo Avae Na Ameƒomea Katã
“Mienye dzidzime tiatia, nunɔla siwo nye fiawo, dukɔ kɔkɔe, ame siwo nye Mawu tɔ koŋ.”—1 PET. 2:9.
ÀTE ŊU AÐE WO MEA?
Ɣekaɣie nye zi gbãtɔ si wodo fia siwo nye nunɔlawo ƒe ŋugbe?
Aleke wòdzɔe be fia siwo nye nunɔlawo do tso nubabla yeyea me?
Yayra kawoe fia siwo nye nunɔlawo ahe avae na ameƒomea?
1. Nu ka tae wogayɔa “Aƒetɔ ƒe fiẽnuɖuɖu la” be Ŋkuɖodzi la, eye nu kae nye eƒe taɖodzinu?
LE NISAN 14 lia, ƒe 33 M.Ŋ., ƒe fiẽ me la, Yesu Kristo kple eƒe apostolo 12-awo ɖu Yudatɔwo ƒe Ŋutitotoŋkekenyuia zi mamlɛtɔ. Esi Yesu na Yuda Iskariot, yomemɔfiala la, dzo vɔ la, eɖo wɔna bubu aɖe anyi, si wova yɔ emegbe be “Aƒetɔ ƒe fiẽnuɖuɖu la.” (1 Kor. 11:20) Yesu gblɔ zi eve sɔŋ be: “Minɔ esia wɔm hena ŋkuɖoɖo dzinye.” Wogayɔna wɔna sia be Ŋkuɖodzi la—enye ŋkuɖoɖo Kristo ƒe kua koŋ dzi. (1 Kor. 11:24, 25) Le se sia dzi wɔwɔ me la, Yehowa Ðasefo siwo le xexea me godoo la wɔa Ŋkuɖodzia ƒe sia ƒe. Le ƒe 2012 sia me la, Biblia ƒe ɣletiŋkeke si nye Nisan 14 lia adze egɔme le Yawoɖagbe, April 5 lia dzi, ne ɣea ɖo to.
2. Nya kae Yesu gblɔ tso kpɔɖeŋunu siwo wòzã ŋu?
2 Nusrɔ̃la Luka gblɔ nu si Yesu wɔ kple nya siwo wògblɔ le wɔna sia ɖoɖo anyi me kpokploe ɖe mawunyakpukpui eve me ale: “Etsɔ abolo hã, da akpe, ŋe eme, eye wòtsɔe na wo gblɔ be: ‘Esia tsi tsitre ɖi na nye ŋutilã si woatsɔ ana ɖe mia ta. Minɔ esia wɔm hena ŋkuɖoɖo dzinye.’ Eye nenema kee wòwɔ le kplu la hã gome le fiẽnuɖuɖu la megbe hegblɔ be: ‘Kplu sia tsi tsitre ɖi na nubabla yeye si wowɔ to nye ʋu, si woakɔ ɖe anyi ɖe mia ta dzi la.’” (Luka 22:19, 20) Aleke apostoloawo se nya siawo gɔme?
3. Aleke apostoloawo se nu siwo aboloa kple wain la le tsitre ɖi na la gɔme?
3 Esi apostoloawo nye Yudatɔwo ta la, wonya nu tso lãwo ƒe vɔsa siwo nunɔlawo sana na Mawu le gbedoxɔa me le Yerusalem la ŋu nyuie. Wosaa vɔ siawo be Yehowa nakpɔ ŋudzedze ɖe yewo ŋu, eye vɔsa mawo dometɔ geɖewo nyea esiwo wosana hena nu vɔ̃wo tsɔtsɔ ke. (3 Mose 1:4; 22:17-29) Eya ta esi Yesu gblɔ be ‘woatsɔ yeƒe ŋutilã ana ɖe wo ta eye woakɔ yeƒe ʋu ɖe anyi ɖe wo ta la,’ apostoloawo anya se egɔme be nu si wòwɔnɛ ye nye be yele ye ŋutɔ yeƒe agbe deblibo la tsɔ ge ana abe vɔsa ene. Anye vɔsa si xɔ asi sãsãsã wu lãwo ƒe vɔsawo.
4. Nu kae Yesu wɔnɛ esi wògblɔ be: “Kplu sia tsi tsitre ɖi na nubabla yeye si wowɔ to nye ʋu . . . dzi”?
4 Ke nya si Yesu gblɔ be “kplu sia tsi tsitre ɖi na nubabla yeye si wowɔ to nye ʋu . . . dzi” ya ɖe? Apostoloawo nya nu tso nyagblɔɖi si ku ɖe nubabla yeyea ŋu, si woŋlɔ ɖe Yeremiya 31:31-33 la, ŋu. (Mixlẽe.) Yesu ƒe nyaa ɖee fia be, azɔ la, yele nubabla yeyea ɖom anyi, eye axɔ ɖe Se ƒe nubabla si Yehowa wɔ kple Israel dukɔa to Mose dzi la teƒe. Ðe ƒomedodo aɖe le nubabla eveawo domea?
5. Mɔnukpɔkpɔ kae Se ƒe nubabla la ʋu ɖi na Israel viwo?
5 Ɛ̃, ƒomedodo kplikplikpli aɖe le taɖodzinu siwo tae wowɔ nubabla eveawo ɖo la dome. Esime Yehowa nɔ Se ƒe nubablaa ɖom anyi la, egblɔ na dukɔa be: “Ne miaɖo to nye gbe [pɛpɛpɛ], eye mialé nye nubabla me ɖe asi la, ekema mianye tɔnye koŋ le dukɔwo katã dome, elabena anyigba blibo la tɔnyee. Eye mianye nunɔlawo ƒe fiaɖuƒe kple dukɔ kɔkɔe nam!” (2 Mose 19:5, 6) Nu kae nya siawo fia na Israel viawo?
FIA SIWO NYE NUNƆLAWO SIWO ƑE ŊUGBE WODO
6. Ŋugbedodo kae Se ƒe nubabla la ana wòava eme?
6 Israel viwo nya nu si “nubabla” alo atamkaka, nye, elabena Yehowa bla nu kple wo tɔgbui Noa kpakple Abraham va yi. (1 Mose 6:18; 9:8-17; 15:18; 17:1-9) Le nu si Yehowa bla kple Abraham me la, Edo ŋugbe nɛ be: “To wò dzidzimeviwo me woayra anyigba dzi dukɔwo katã le, elabena èɖo to nye gbe.” (1 Mose 22:18) Yehowa ɖo Se ƒe nubabla la anyi be yeana ŋugbedodo sia nava eme. Eye to esia dzi la, Israel dukɔa ate ŋu ‘azu Yehowa tɔ koŋ le dukɔwo katã dome.’ Le taɖodzinu ka ta? Be ‘woava nye nunɔlawo ƒe fiaɖuƒe na Yehowa.’
7. Nu kae nyagbɔgblɔ si nye “nunɔlawo ƒe fiaɖuƒe” fia?
7 Israel viwo nya nu tso fiawo kple nunɔlawo ŋu nyuie, gake Melxizedek koe nye blematɔ aɖe si Yehowa ɖe mɔ wònye fia kpakple nunɔla le ɣeyiɣi ɖeka me kpɔ. (1 Mose 14:18) Azɔ la, Yehowa na mɔnukpɔkpɔ dukɔa be “nunɔlawo ƒe fiaɖuƒe” aɖe nado tso wo me. Abe ale si ŋɔŋlɔ siwo tso gbɔgbɔ me ɖee fia emegbe ene la, esia nye mɔnukpɔkpɔ na wo be fia siwo nye nunɔlawo nado tso wo me—woanye fiawo aganye nunɔlawo hã.—1 Pet. 2:9.
8. Dɔ kawoe nunɔla si Mawu tia la wɔna?
8 Le nyateƒe me la, fia ye ɖua dzi. Ke nu kae nunɔla ya wɔna? Hebritɔwo 5:1 ɖe eme be: “Nunɔlagã ɖe sia ɖe si wotia tso amegbetɔwo dome la, woɖonɛ be wòawɔ Mawu ƒe subɔsubɔdɔ le amegbetɔwo ta, bene wòatsɔ nunanawo ana, eye wòasa vɔ ɖe nu vɔ̃wo ta.” Eya ta nunɔla aɖe si Yehowa tia la nɔa nu vɔ̃ mewo teƒe le Mawu ŋkume, eye wòsaa vɔwo tsɔ ɖea kuku na Yehowa be wòatsɔ woƒe nu vɔ̃wo ake wo. Nenema kee nunɔlaa nɔa Yehowa teƒe le dukɔ la ŋkume hefiaa Mawu ƒe sewo woamawo. (3 Mose 10:8-11; Mal. 2:7) To mɔ siawo dzi la, nunɔla si Mawu tia la kpena ɖe dukɔa ŋu be woadzra woa kple Mawu dome ɖo.
9. (a) Nu ɖeka kae wòle be Israel dukɔa nawɔ hafi “nunɔlawo ƒe fiaɖuƒe” aɖe nate ŋu ado tso wo me? (b) Nu ka tae Yehowa wɔ ɖoɖo be nunɔlawo nasubɔ le Israel ɖo? (d) Nu ka tae “nunɔlawo ƒe fiaɖuƒe” la mete ŋu do tso Israel dukɔa me le Se ƒe nubablaa te o?
9 Eya ta Se ƒe nubabla la na mɔnukpɔkpɔ Israel dukɔa be fia siwo nye nunɔlawo nado tso wo me be wòaɖe vi na “dukɔwo katã.” Ke hã hafi mɔnukpɔkpɔ wɔnuku sia nasu wo si la, Mawu bia nu ɖeka aɖe tso wo si. Egblɔ na wo be: “Miaɖo to nye gbe [pɛpɛpɛ], eye mialé nye nubabla me ɖe asi.” Ðe Israel viwo ate ŋu ‘aɖo to Yehowa ƒe gbe pɛpɛpɛa’? Ɛ̃, woate ŋui va ɖo afi aɖe. Gake womate ŋu aɖo toe bliboe o. (Rom. 3:19, 20) Le susu sia ta la, Yehowa wɔ ɖoɖo be ame aɖewo nasubɔ abe nunɔlawo ene le Israel, womanye fiawo o; ale be woatsɔ lãwo anɔ vɔ sam ɖe nu vɔ̃ siwo Israel viwo mate ŋu aƒo asa na o la ta. (3 Mose 4:1–6:7) Nu vɔ̃ siwo nunɔlawo ŋutɔwo wɔna hã le eme. (Heb. 5:1-3; 8:3) Yehowa kpɔ ŋudzedze ɖe vɔsa mawo ŋu, gake vɔsa mawo mete ŋu ɖe Israel viwo ƒe nu vɔ̃wo ɖa keŋkeŋ o. Nunɔla siwo nɔ Se ƒe nubablaa te la mete ŋu kpe ɖe Israel vi anukwaretɔwo gɔ̃ hã ŋu wodzra woa kple Mawu dome ɖo bliboe o. Apostolo Paulo ɖe eme ale: “Nyitsuwo kple gbɔ̃wo ƒe ʋu mate ŋu aɖe nu vɔ̃wo ɖa o.” (Heb. 10:1-4) Esi Israel viwo daa Sea dzi ta la, fiƒode va wo dzi. (Gal. 3:10) Esi nɔnɔmea le alea ta la, womate ŋu asubɔ ɖe dukɔwo katã ta abe fiawo kple nunɔlawo ene o.
10. Taɖodzinu ka tae woɖo Se ƒe nubabla la anyi ɖo?
10 Ekema ɖe esia fia be ŋugbe ƒuƒlue wònye Yehowa do na wo be “nunɔlawo ƒe fiaɖuƒe” aɖe ado tso wo mea? Kura o. Ne ɖe wodze agbagba anukwaretɔe be yewoaɖo to la, ŋugbedodoa ava eme na wo—gake manye le Se la te o. Nu ka tae? (Mixlẽ Galatiatɔwo 3:19-25.) Hafi míase egɔme la, ele be míanya taɖodzinu si tae woɖo Se ƒe nubablaa anyi ɖo. Se la kpɔ Israel vi toɖolawo ta tso alakpasubɔsubɔ me. Ena Yudatɔwo kpɔe dze sii be nu vɔ̃ wɔlawoe yewonye eye yewohiã vɔsa aɖe si ƒo esi yewoƒe nunɔlagã sana la ta sãsãsã. Se la nye mɔfiala si akplɔ wo ayi Kristo la, alo Mesia la, gbɔe; dzesideŋkɔ siawo fia “Amesiamina.” Ke hã ne Mesia la va ɖo la, aɖo nubabla yeye si ŋu nya Yeremiya gblɔ ɖi la anyi. Wokpe ame siwo xɔ Kristo la be woanye nubabla yeyea me tɔwo eye woazu “nunɔlawo ƒe fiaɖuƒe” la. Mina míakpɔ ale si wòdzɔe ɖa.
FIA SIWO NYE NUNƆLAWO DO TSO NUBABLA YEYEA ME
11. Aleke Yesu ʋu mɔnukpɔkpɔ ɖi na ame bubuwo hã be woava zu fiawo kple nunɔla vavãwo?
11 Le ƒe 29 M.Ŋ. me la, Mesia la va ɖo; eyae nye Yesu Nazaretetɔ la. Ɣemaɣi la, exɔ abe ƒe 30 ene esime wòtsɔ eɖokui na Yehowa be yeawɔ Eƒe lɔlɔ̃nu tɔxɛ si le esi na ye la, eye wòxɔ nyɔnyrɔ ɖe tsi me wònye esia ƒe dzesi. Yehowa kpɔ ŋudzedze ɖe eŋu eye wògblɔ tso eŋu be “ame siae nye Vinye,” eye wòsi ami nɛ, menye kple ami kɔkɔe o, ke boŋ kple gbɔgbɔ kɔkɔe la. (Mat. 3:13-17; Dɔw. 10:38) Esi wosi ami nɛ alea la, efia be woɖoe Nunɔlagãe na ame siwo axɔ edzi ase le amegbetɔwo katã dome eye wòganye Fia si ava ɖu wo dzi le etsɔme hã. (Heb. 1:8, 9; 5:5, 6) Aʋu mɔnukpɔkpɔ ɖi na ame bubuwo hã be woava zu fiawo kple nunɔla vavãwo.
12. Nu kawoe Yesu ƒe vɔsaa na wote ŋu wɔ?
12 Abe Nunɔlagã ene la, nu kae Yesu ate ŋu atsɔ asa vɔe si atsyɔ nu vɔ̃ si ƒe dome ame siwo xɔ edzi se nyi la dzi keŋkeŋ? Abe ale si Yesu ɖee fia esime wònɔ eƒe ku ƒe Ŋkuɖodzia ɖom anyi ene la, eya ŋutɔ ƒe amegbetɔ ƒe agbe deblibo lae wòtsɔ sa vɔe. (Mixlẽ Hebritɔwo 9:11, 12.) Tso esime Yesu xɔ nyɔnyrɔ le ƒe 29 M.Ŋ. me la, abe Nunɔlagã ene la, elɔ̃ faa to dodokpɔwo me hexɔ hehe va se ɖe esime ɣeyiɣia de nɛ be wòaku. (Heb. 4:15; 5:7-10) Esi wofɔe ɖe tsitre megbe la, elia yi dziƒo eye wòtsɔ eƒe vɔsaa ƒe asixɔxɔ yi na Yehowa ŋutɔ. (Heb. 9:24) Tso ekema dzi la, Yesu ate ŋu aɖe kuku na Yehowa ɖe ame siwo xɔa eƒe vɔsaa dzi sena la ta ahakpe ɖe wo ŋu woasubɔ Mawu hena agbe mavɔ kpɔkpɔ. (Heb. 7:25) Eƒe vɔsaa na hã be woɖo nubabla yeyea anyi le se nu.—Heb. 8:6; 9:15.
13. Mɔnukpɔkpɔ kawoe asu ame siwo wokpe be woanye nubabla yeyea me tɔwo la si?
13 Woatsɔ gbɔgbɔ kɔkɔe asi ami na ame siwo wokpe be woanye nubabla yeyea me tɔwo hã. (2 Kor. 1:21) Yudatɔ wɔnuteƒewo kple Ame siwo menye Yudatɔwo o hã le eme. (Ef. 3:5, 6) Mɔnukpɔkpɔ kae asu ame siwo le nubabla yeyea me la si? Woatsɔ woƒe nu vɔ̃wo ake wo keŋkeŋ. Yehowa do ŋugbe be: “Matsɔ woƒe vodadawo ake wo, eye nyemagaɖo ŋu woƒe nu vɔ̃wo azɔ o.” (Yer. 31:34) Ne wotsɔ woƒe nu vɔ̃wo ke wo le se nu la, woate ŋu azu “nunɔlawo ƒe fiaɖuƒe.” Petro gblɔ le eƒe agbalẽa me na Kristotɔ amesiaminawo be: “Miawo . . . mienye ‘dzidzime tiatia, nunɔla siwo nye fiawo, dukɔ kɔkɔe, ame siwo nye Mawu tɔ koŋ, bene miaɖe gbeƒã’ ame si yɔ mi tso viviti me va eƒe kekeli wɔnukua me la ‘ƒe nɔnɔme nyuiwo.’” (1 Pet. 2:9) Le afi sia la, Petro yɔ nya siwo Yehowa gblɔ na Israel viwo esime wònɔ Sea nam wo la eye wòɖee fia be eku ɖe Kristotɔ siwo le nubabla yeyea me ŋu.—2 Mose 19:5, 6.
FIA SIWO NYE NUNƆLAWO LE YAYRAWO HEM VAE NA AMEƑOMEA KATÃ
14. Afi kae fia siwo nye nunɔlawo la asubɔ le?
14 Afi kae ame siwo le nubabla yeyea me la asubɔ le? Woasubɔ le anyigba dzi, afi si woawɔ nunɔladɔ le abe ƒuƒoƒo ene, eye woanɔ Yehowa teƒe ‘anɔ gbeƒã ɖem eƒe nɔnɔme nyuiwo’ ahanɔ gbɔgbɔmenuɖuɖu nam Mawu ƒe aƒemetɔwo. (Mat. 24:45; 1 Pet. 2:4, 5) Le woƒe ku kple tsitretsitsi megbe la, woasubɔ kple Kristo le dziƒo abe fiawo kple nunɔlawo ene, eye woawɔ ɖoƒe evea siaa ŋu dɔ bliboe. (Luka 22:29; 1 Pet. 1:3-5; Nyaɖ. 1:6) Apostolo Yohanes kpɔ esia ƒe kpeɖodzi le ŋutega me esi wòkpɔ gbɔgbɔmenuwɔwɔ geɖewo le Yehowa ƒe fiazikpuia gbɔ le dziƒo. “Wodzi ha yeye aɖe” na “Alẽvi la” gblɔ bena: “Nètsɔ wò ʋu ƒle amewo tso to sia to kple gbegbɔgblɔ sia gbegbɔgblɔ kple ame ƒomeviwo katã kple dukɔ sia dukɔ me na Mawu, eye nèwɔ wo wonye [fiawo kple nunɔlawo] na mía Mawu la, eye woaɖu fia ɖe anyigba la dzi.” (Nyaɖ. 5:8-10) Emegbe la, Yohanes gblɔ le ŋutega bubu aɖe me tso dziɖula siawo ŋu be: “Woanye Mawu kple Kristo la ƒe nunɔlawo, eye woaɖu fia kplii hena ƒe akpe ɖeka.” (Nyaɖ. 20:6) Woa kple Kristo siaa woƒo ƒu nye nunɔlawo ƒe fiaɖuƒe, siwo ƒe subɔsubɔdɔ ahe yayrawo avae na ameƒomea katã.
15, 16. Yayra kawoe fia siwo nye nunɔlawo ahe avae na ameƒomea?
15 Yayra kawoe ame 144,000 la ahe avae na anyigbadzitɔwo? Woɖɔ ame siawo le Nyaɖeɖefia ta 21 lia me abe du si le dziƒo ene, si nye Yerusalem Yeye, si woyɔ be “Alẽvi la srɔ̃.” (Nyaɖ. 21:9) Eƒe kpukpui 2 lia va ɖo 4 lia gblɔ be: “Mekpɔ du kɔkɔe, si nye Yerusalem Yeye, la hã wònɔ ɖiɖim tso dziƒo gbɔna tso Mawu gbɔ, eye wodzrae ɖo abe ŋugbetɔ aɖe si woɖo atsyɔ̃ na hena srɔ̃a ene. Tete mese gbe gã aɖe tso fiazikpui la gbɔ wònɔ gbɔgblɔm be: ‘Kpɔ ɖa! Mawu ƒe agbadɔ la le amegbetɔwo gbɔ, eye wòanɔ anyi kpli wo, eye woanye eƒe dukɔwo. Eye Mawu ŋutɔ anɔ anyi kpli wo. Eye wòatutu aɖatsi sia aɖatsi ɖa le woƒe ŋkume, eye ku maganɔ anyi o, eye konyifafa kple ɣlidodo kple vevesese hã maganɔ anyi o. Nu siwo nɔ anyi tsã la nu va yi.’” Yayra wɔnuku kawo gbegbee nye esi! Avifafa, konyifafa, ɣlidodo kple vevesese maganɔ anyi o, elabena ku maganɔ anyi o. Ekema amegbetɔ wɔnuteƒewo ade blibo, eye woadzra woa kple Mawu dome ɖo keŋkeŋ.
16 Nyaɖeɖefia 22:1, 2 gblɔ yayra bubu siwo fia siwo nye nunɔlawo ahe avae la na mí, esi wògblɔ be: “Eye wòfia agbetsitɔsisi aɖem, si me kɔ abe kristalokpe ene, eye wòle sisim tso Mawu kple Alẽvi la ƒe fiazikpui la gbɔ, eye wòto [Yerusalem Yeye la] ƒe ablɔ gã la titina. Eye agbetiwo nɔ tɔsisi la ƒe go si kple ekemɛ dzi, eye wotsea ku zi wuieve, eye wotsena ɣleti sia ɣleti. Eye wotsɔa atiawo ƒe aŋgbawo yɔa dɔ dukɔwo.” Ŋutega sia na míekpɔ ale si woada gbe le “dukɔwo,” alo ƒomewo ƒe hatsotsowo, siwo nyi blibomademade ƒe dome tso Adam gbɔ la ŋu keŋkeŋ. Vavãe, ‘nu siwo nɔ anyi tsã la nu ayi.’
FIA SIWO NYE NUNƆLAWO WU WOƑE DƆA NU
17. Dɔ kae fia siwo nye nunɔlawo awɔ ade goe mlɔeba?
17 Kaka ƒe 1,000 ƒe subɔsubɔdɔ si anye yayra na ameƒomea ƒe nuwuwu naɖo la, fia siwo nye nunɔlawo la ana ame siwo le anyigba dzi nazu amegbetɔ deblibowo. Ɣemaɣi la, Kristo, si nye Nunɔlagã kple Fia la atsɔ amegbetɔƒome, si wona wòde blibo keŋkeŋ la ade asi na Yehowa. (Mixlẽ 1 Korintotɔwo 15:22-26.) Afia be fia siwo nye nunɔlawo wɔ woƒe dɔa de goe keŋkeŋ.
18. Ne fia siwo nye nunɔlawo la wɔ woƒe dɔa de goe vɔ la, aleke Yehowa azã wo ame siawo siwo nye Kristo ƒe hadɔwɔlawo lae?
18 Esia megbe la, aleke Yehowa azã Kristo ƒe hadɔwɔla siawo siwo si mɔnukpɔkpɔ gã sia su lae? Le Nyaɖeɖefia 22:5 ƒe nya nu la, “woaɖu fia tso mavɔ me yi mavɔ me.” Ame kawo dzie woaɖu fia ɖo? Biblia megblɔe o. Gake asixɔxɔ gã aɖe anɔ wo ŋu na Yehowa. Magblemagblẽnyenye kple makumakunyenye asu wo si eye woanye ame siwo si nuteƒekpɔkpɔ su le esi wokpe ɖe ameƒomea ŋu wode blibo ta. Eya ta woakpɔtɔ anye fiawo eye Yehowa anɔ wo zãm le eƒe tameɖoɖowo me vava me yi ɖe mavɔmavɔ me.
19. Nu ka dzie Ŋkuɖodzia aɖo ŋkui na ame siwo adee?
19 Ne míeƒo ƒu hena Yesu ƒe ku ƒe Ŋkuɖodzia le Yawoɖagbe, April 5, 2012, dzi la, woaɖo ŋku Biblia ƒe nufiafia siawo dzi na mí. Kristotɔ amesiamina susɔe ʋɛ siwo gakpɔtɔ le anyigba dzi la aɖu abolo maʋamaʋã la ahano wain dzĩ la hã atsɔ aɖee afia be yewonye nubabla yeyea me tɔwo. Kristo ƒe vɔsaa ƒe kpɔɖeŋunu siawo ana woagaɖo ŋku mɔnukpɔkpɔ kple agbanɔamedzi wɔnuku siwo su wo si le Mawu ƒe tameɖoɖo mavɔ la me dzi na wo. Mina mí katã míade Ŋkuɖodzia atsɔ aɖe ale si gbegbe míekpɔ ŋudzedze ɖe fia siwo nye nunɔlawo siwo ƒe ɖoɖo Yehowa Mawu wɔ be woahe yayrawo avae na ameƒomea katã ŋu la afia.
[Nɔnɔmetata si le axa 29]
Fia siwo nye nunɔlawo ahe yayra mavɔwo avae na ameƒomea