Tsi Xɔdzo Me Nyo Yea?

ARCTIC alo Antarctic tsi fafɛ si zu tsikpe mee wogblɔna zi geɖe be nyowo nɔna. Gake ènya be nyo aɖewo te ŋu nɔa anyigba siwo mexɔ dzo fũ o dzi, henɔa ŋdɔ nu le ƒuta siwo amewo medena o ƒe kewo mea?

Kpɔ Mediterranea-saɖaganyo ɖa. Tsi xɔdzo me nyo sia didi meta 3.5, fu kpui sesẽ si me nu yibɔɔ le li nɛ, eye eƒe ƒodo kple no le ɣie. Ðewohĩ amadede ɖedzesi siawo siwo ɖi subɔsubɔha aɖe me tɔwo ƒe hatsotso aɖe ƒe awudodo la aɖe eŋkɔ gɔme.

Woyɔ lãgbalẽ si woyɔna be taʹchash (le Hebrigbe me), si tsyɔ agbadɔ la kple kɔkɔeƒe la me nuwo dzi le Biblia ƒe teƒe geɖe. (Mose II, 25:5; 26:14; Mose IV, 4:8) Eŋutinunyala aɖewo gblɔ be nyogbalẽe taʹchash tsi tre ɖi na. Ðe wòanye be Mediterranea-saɖaganyo ƒe agbalẽe wowɔnɛa? Lã sia ƒe blema Mediterranea-tsiwo me nɔnɔ na susu le nususukpɔ sia me.

Blema xotutuwo gblɔ be ŋusẽ tɔxɛ aɖewo le saɖaganyo si. Ame aɖewo xɔe se be eƒe agbalẽ ate ŋu axe mɔ na dzikedzo eye wòana tsikpe madza ɖe agble me o. Wogblɔ be ne nyogbalẽfuwo hlo alo womlɔ anyi la, efia dziɖegbe ƒe gɔmedzedze alo eƒe nuwuwu.

Ŋusẽ si wobu be ele saɖaganyo si wɔe be adela sẽŋutawo de etsrɔ̃ ge kloe. Gake wokpɔe le Sardinia ƒe titina ɣedzeƒeƒuwo me nyitsɔ laa. Ne wogaɖo amegbetɔwo kple lãwo dome ɖekawɔwɔ te le Mawu ƒe xexe yeyea me la, ɖikeke mele eme o be Mediterranea-saɖaganyo agaxɔ ƒuta fafa siwo li bɔkɔɔ, afisi wòaƒu ŋdɔ le eye amegbetɔ ŋuklẽlawo mado ŋɔdzi nɛ le o.—Yesaya 11:6-9.

[Nɔnɔmetata Tsoƒe si le axa 31]

Panos Dendrinos/HSSPMS