Ta Wuievelia

Mawu Ƒe Dɔla Va Do Ŋusẽe

 1. Aleke woyra Daniel ɖe alesi wòtsɔ ɖe le Yehowa ƒe tameɖoɖo me vava me vevie tae?

WOÐO Daniel ƒe ɖetsɔtsɔ le Yehowa ƒe tameɖoɖo me vava me teƒe nɛ geɖe. Wona wòkpɔ kwasiɖa 70 ŋuti ŋutega ʋãme si ku ɖe Mesia ƒe vavaɣi ŋu. Wogayra Daniel hã wòkpɔ eteƒe esime wo detɔ wɔnuteƒewo ƒe ame susɔeawo trɔ yi wo denyigba dzi. Esia dzɔ le ƒe 537 D.M.Ŋ. me, le “Persia-fia Kores ƒe ƒe gbãtɔ” ƒe nuwuwu lɔƒo.—Ezra 1:1-4.

 2, 3. Anye be nukata Daniel menɔ Yudatɔ susɔeawo dome trɔ yi Yuda-nyigba dzi o?

² Daniel menɔ amesiwo trɔ yi Yuda-nyigba dzi dome o. Ðewohĩ esesẽ nɛ be wòazɔ mɔ le eƒe tsitsi ta. Aleke ke wònɔ o, dɔ bubuwo ganɔ Mawu si nɛ be wòawɔ le Babilon. Ƒe eve va yi. Azɔ nuŋlɔɖia gblɔ na mí be: “Le Persia-fia Kores ƒe ƒe etɔ̃lia me la woɖe nya aɖe fia Daniel, amesi ŋkɔ nye Beltsazar; nya la nye nyateƒe kple nuxaxa gã; elé nya la ɖe ta me, eye wòlé ŋku ɖe ŋutega la ŋu.”—Daniel 10:1.

³ “Kores ƒe ƒe etɔ̃lia” anye ƒe 536/535 D.M.Ŋ. me. Ƒe 80 kple edzivɔ va yi tso esime wokplɔ Daniel kple amesiwo tso fiaƒome kple Yuda bubumewo dome va Babilon. (Daniel 1:3) Ne ege ɖe ƒewuiwo me tetie wokplɔe va Babilon la, ke agogo ƒe 100 xɔxɔ fifia. Subɔsubɔ nuteƒewɔwɔtɔe ƒe nuŋlɔɖi nyui ka gbegbee nye si nɔ esi!

 4. Togbɔ be Daniel tsi xɔ ƒe geɖe hã la, dɔ vevi kae wòagawɔ le Yehowa subɔsubɔ me?

⁴ Togbɔ be Daniel tsi hã la, eƒe dɔ le Yehowa subɔsubɔ me mevɔ o. Mawu ato edzi agaɖe gbeƒã nyagblɔɖinya aɖe si aku ɖe nu geɖe ŋu. Anye nyagblɔɖi si akeke ta aɖo míaƒe ɣeyiɣiawo me kple etsɔme. Yehowa kpɔe be anyo be yeakpe ɖe Daniel ŋu atsɔ adzrae ɖo ɖe dɔ sia si wògale wɔwɔ ge ŋu, eye wòado ŋusẽe be wòawɔ subɔsubɔdɔ si dze ŋgɔe la.

NUSI ŊU WÒTSI DZI ÐO

 5. Anye nya kawo tae Daniel tsi dzi ɖo?

⁵ Togbɔ be Daniel menɔ Yudatɔ susɔeawo dome wotrɔ yi Yuda-nyigba dzi o hã la, etsɔ ɖe le nusiwo nɔ edzi yim le wo denyigba lɔlɔ̃a dzi me vevie. Nyatakaka siwo ɖo Daniel gbɔ na wòkpɔe be nuwo menɔ yiyim nyuie o. Wogbugbɔ vɔsamlekpuia ɖi eye woɖo gbedoxɔa gɔme anyi le Yerusalem. (Ezra, ta 3 lia) Gake dukɔ siwo ƒo xlã wo tsi tre ɖe xɔgbugbɔtudɔa ŋu, eye wonɔ tame vɔ̃ ɖom ɖe Yudatɔ siwo trɔ yi ŋu. (Ezra 4:1-5) Le nyateƒe me la, ele bɔbɔe be Daniel natsi dzi ɖe nu geɖe ŋu.

 6. Nukata alesi nuwo nɔ le Yerusalem ɖe fu na Daniel?

⁶ Daniel nya Yeremya ƒe nyagblɔɖia me nyawo nyuie. (Daniel 9:2) Enya be Yerusalem-gbedoxɔa gbugbɔgatu kple tadedeagu vavãtɔ gbugbɔɖoanyi le afima do ƒome kplikplikpli kple tame si Yehowa ɖo ɖe Eƒe dukɔa ŋu eye be nusiawo katã adzɔ hafi Mesia si ŋugbe wodo la nava. Le nyateƒe me la, enye mɔnukpɔkpɔ tɔxɛ na Daniel be wòxɔ “kwasiɖa blaadre” ŋuti nyagblɔɖia tso Yehowa gbɔ. Ekpɔe le eme be Mesia la ava ne wode se be woagbugbɔ Yerusalem aɖo anyi ahagbugbɔe atso ƒe “kwasiɖa” 69 megbe. (Daniel 9:24-27) Gake le alesi wogbã Yerusalem gudugudui kple alesi wonɔ gbedoxɔa tutu hem ɖe megbe ta la, ele bɔbɔe be míakpɔ nusita dzi ate ŋu aɖe le Daniel ƒo, wòalé blanui, ahanɔ nu xam ɖo.

 7. Nukae Daniel tsɔ kwasiɖa etɔ̃ wɔ?

⁷ Nuŋlɔɖia gblɔ be: “Ɣemaɣi nye Daniel mexa nu kwasiɖa etɔ̃ sɔŋ. Nyemeɖu nu vivi aɖeke o, lã kple wein mede nu me nam o, eye nyemesi ami hã o, vaseɖe esime kwasiɖa etɔ̃awo de.” (Daniel 10:2, 3) Konyifafa kple nutsitsidɔ “kwasiɖa etɔ̃,” alo ŋkeke 21, nye ɣeyiɣi didi si mebɔ o. Edze ƒã be ewu enu le “dzinu gbãtɔ ƒe ŋkeke blave vɔ enelia” dzi. (Daniel 10:4) Eyata Ŋutitotoŋkekenyui si woɖuna le ɣleti gbãtɔ, Nisan, ƒe ŋkeke 14 lia dzi kple abolo maʋãmaʋã ƒe azã si woɖuna ŋkeke adre ɖe eyome la nɔ ɣeyiɣi si Daniel tsi nu dɔ la me.

 8. Ɣekaɣie Daniel di Yehowa ƒe mɔfiafia vevie tsã, eye nukae do tso eme?

⁸ Daniel wɔ nusia tɔgbe kpɔ va yi. Yehowa ƒe nyagblɔɖi le Yerusalem ƒe aƒedozuzu ƒe 70 ŋuti me vava ŋue wòtsi dzi ɖo ɣemaɣi. Nukae Daniel wɔ ɣemaɣi? Daniel gblɔ be: “Tete metrɔ mo ɖe [Mawu vavã Yehowa, NW ] ŋu, ne matsɔ nutsitsidɔ, akpanyatata kple dzowɔ ado gbe ɖa, eye maƒo koko.” Yehowa ɖo Daniel ƒe gbedodoɖaa ŋu esi wòdɔ mawudɔla Gabriel ɖe egbɔ wòtsɔ gbedasi si de dzi ƒo nɛ ŋutɔ vɛ nɛ. (Daniel 9:3, 21, 22) Ðe Yehowa agawɔ nu ma tɔgbe fifia eye wòana dzideƒo si Daniel hiã vevie laea?

ŊUTEGA DZIŊƆ AÐE

 9, 10. (a) Afikae Daniel nɔ esime wona wòkpɔ ŋutega aɖe? (b) Ƒo nu tso nusi Daniel kpɔ le ŋutegaa me ŋu.

⁹ Womegblẽ Daniel ɖi o. Eyi edzi gblɔ nusi gadzɔ na mí be: “Menɔ Xidekel tɔsisi gã la to. Eye esi mefɔ kɔ dzi ɖo ŋku anyi la, kpɔ ɖa, ŋutsu aɖe le awu ɣi me, eye sika nyuitɔ ƒe alidziblanu le ali nɛ.” (Daniel 10:4, 5) Xidekel nye tɔsisi ene siwo dzɔtsoƒe le Eden-bɔa me la dometɔ ɖeka. (Mose I, 2:10-14) Woyɔa Xidekel le Persiagbe Xoxotɔ me be Tigra, si me woɖe Helagbe me ŋkɔ Tigris tsoe. Wova yɔ nuto si le wo kple Frat dome be Mesopotamia, si gɔmee nye “Anyigba si le Tɔsisiwo Dome.” Esia ɖo kpe edzi be esime Daniel xɔ ŋutega sia la, ekpɔtɔ nɔ Babilonia-nyigba dzi, togbɔ be ɖewohĩ menɔ Babilon-dua me o hã.

¹⁰ Ŋutega kae nye si Daniel kpɔ! Edze ƒã be menye amegbetɔ dzro aɖe ko wòkpɔ esime wòfɔ mo dzi o. Daniel ɖɔ amea tsitotsito be: “Eŋuti ɖi adzagba, eƒe mo le abe dzikedzo ene, eye eƒe ŋkuwo ɖi akakati, eƒe abɔwo kple afɔwo le abe ayawa, si le dzo dam ene, eye eƒe nuƒoƒo ƒe ɖiɖi le abe amehawo ƒe hoowɔwɔ ene.”—Daniel 10:6.

11. Dɔ kae ŋutega la wɔ ɖe Daniel kple ŋutsu siwo nɔ eŋu dzi?

¹¹ Togbɔ be keklẽ gã aɖe nɔ ŋutega la me hã, Daniel gblɔ be “ŋutsu, siwo le ŋunye la, mekpɔ ŋutega la o.” Le susu aɖe si womeɖe gblɔ o ta la, “ŋɔdzi gã aɖe lé wo, eye wosi, be woaɣla wo ɖokui.” Eyata wogblẽ Daniel ɖeka ɖe tɔsisia to. “Ŋutega gã” sia kpɔkpɔ dzi ŋɔ ale gbegbe be egblɔ be: “Ŋusẽ vɔ le ŋunye, nye mo ƒe nyonyome trɔ ɖe ƒomevii, eye ŋusẽ aɖeke menɔ ŋunye o.”—Daniel 10:7, 8.

12, 13. Nukae dɔla la ƒe (a) avɔ (b) dzedzeme, ɖe fia le eŋu?

¹² Mina míagbugbɔ alé ŋku ɖe dɔla ɖedzesi sia si ƒe nɔnɔme na vɔvɔ̃ ɖo Daniel nenema gbegbe la ŋu nyuie kpɔ. Enɔ “awu ɣi me, eye sika nyuitɔ ƒe alidziblanu le ali nɛ.” Le blema Israel la, avɔ ɣi si wolɔ̃ ye wotsɔ wɔ nunɔlagã ƒe alidziblanu, kɔmewu, kple akɔtaɖonu eye wotsɔ sika ɖo atsyɔ̃ na wo. (Mose II, 28:4-8; 39:27-29) Eyata dɔla la ƒe awudodo fia kɔkɔenyenye kple bubunɔƒe si wòle.

¹³ Dɔla la ƒe nɔnɔme hã dzi ŋɔ na Daniel—eƒe ametia si le dzo dam abe kpe xɔasi ene, eƒe mo si klẽna sesĩe, eƒe ŋku siwo le abe dzo ene si kpɔa nusianu, kple eƒe abɔwo kple afɔwo ƒe dzodada. Ŋɔdzi nɔ eƒe gbe gã la gɔ̃ hã ŋu. Nusiawo katã fia be etri akɔ wu amegbetɔ. ‘Ŋutsu sia si le awu ɣi me’ la menye ame aɖeke wu mawudɔla aɖe si si ɖoƒe kɔkɔ le o, amesi subɔna le Yehowa ƒe nɔƒe kɔkɔe, afisi wòtso va kple gbedasi aɖe.a

WODO ŊUSẼ “AME MALƆ̃NUGBƆA”

14. Kpekpeɖeŋu kae Daniel hiã ale be wòate ŋu axɔ mawudɔla la ƒe gbedasia?

¹⁴ Gbedasi si me nya gã gbogbo aɖewo le ye nɔ Yehowa ƒe dɔla la si na Daniel. Hafi Daniel nate ŋu axɔe la, ehiã be woakpe ɖe eŋu ŋusẽ nagaɖo eŋu le esi wòtɔtɔ le ŋutilã kple susu me ta. Edze ƒã be esi mawudɔlaa nya esia ta la, eya ŋutɔ kpe ɖe Daniel ŋu lɔlɔ̃tɔe hede dzi ƒo nɛ. Mina míase alesi Daniel ŋutɔ gblɔ nusi dzɔ lae.

15. Nukae mawudɔla la wɔ tsɔ kpe ɖe Daniel ŋu?

¹⁵ “Esi mese eƒe nuƒoƒo ƒe ɖiɖi la, ŋuzi tsɔm metsyɔ mo anyi hetsɔ ŋku me bu anyigba.” Anye be vɔvɔ̃ kple dzitsitsie na Daniel ku ƒenyi. Nukae mawudɔla la wɔ tsɔ kpe ɖe eŋu? Daniel gblɔ be: “Kpɔ ɖa, asi aɖe va ka ŋunye, eye wòfɔm ɖe nye klo kple asi dzi.” Tsɔ kpe ɖe eŋu la, mawudɔla la tsɔ nya siawo de dzi ƒo na nyagblɔɖila la be: “Wò Daniel, ame malɔ̃nugbɔa, lé to ɖe nya, si gblɔ ge mala na wò la ŋu, eye natsi tre ɖe tewòƒe, elabena azɔ wodɔm ɖe gbɔwò!” Asi si woka Daniel ŋu tsɔ kpe ɖe eŋu kple dzideƒonyaawo na agbe gaɖo eŋu. Togbɔ be Daniel nɔ “dzodzom nyanyanya” hã la, ‘etsi tre.’—Daniel 10:9-11.

16. (a) Aleke wòdzee be Yehowa ɖoa esubɔlawo ƒe gbedodoɖawo ŋu kaba? (b) Nukae na mawudɔla la mete ŋu va ɖo Daniel gbɔ kaba o? (Tsɔ aɖakaa kpee) (d) Gbedasi kae mawudɔla la tsɔ vɛ na Daniel?

¹⁶ Mawudɔla la gblɔ be ɖe yeva koŋ be yeado ŋusẽ Daniel. Mawudɔla la gblɔ be: “Daniel, megavɔ̃ o, elabena tso gbesigbe nèdi tso dzi me be, yease nya gɔme, eye nètsi nu dɔ le wò Mawu ŋku me la, wose wò nyawo, eye wò nyawo dzi mezɔ ɖo va.” Azɔ mawudɔla la gblɔ nusita wòtsi megbe va. Egblɔ be: “Persia-fiaɖuƒe la ƒe amegã nɔ te ɖe nunye ŋkeke blave vɔ ɖekɛ sɔŋ, eye Mixael, amegãwo ƒe tatɔwo dometɔ ɖeka, va xɔ nam, eye megblẽe ɖe Persia-fiawo gbɔ le gama.” Mixael va kpe ɖe mawudɔla la ŋu wòte ŋu wɔ nusi gbe wodɔe ɖo, si nye be wòatsɔ gbedasi vevi aɖe vɛ na Daniel: “Meva, be magblɔ nusi gbɔna dzɔdzɔ ge ɖe wò dukɔ dzi emegbe la afia wò, elabena gbaɖegbe ŋu ŋutega la le ɖo.”—Daniel 10:12-14.

17, 18. Aleke wokpe ɖe Daniel ŋu zi eveliae, eye nukae esia na wòte ŋu wɔ?

¹⁷ Le esi teƒe be Daniel nadi be yease gbedasi ʋãme sia la, edze abe ɖe nya siwo wòse la gblẽ nu le eŋu boŋ ene. Nuŋlɔɖia gblɔ be: “Esi wògblɔ nya siawo nam la, mede kɔ to, eye gbɔgblɔ bu ɖem.” Gake mawudɔla si wodɔ la nɔ klalo be yeakpe ɖe eŋu lɔlɔ̃tɔe—zi evelia. Daniel gblɔ be: “Nɔnɔme aɖe, si ɖi amegbetɔvi la, ka asi nye nuyi ŋu, tete nye nu ʋu meƒo nu.”b—Daniel 10:15, 16a.

¹⁸ Ŋusẽ ɖo Daniel ŋu esi mawudɔla la ka asi eƒe nuyi ŋu. (Tsɔe sɔ kple Yesaya 6:7.) Esi wona Daniel gate ŋu ƒo nu ta la, ete ŋu ƒo nu tso nɔnɔme sesẽ si me tom wònɔ ŋu na mawudɔla si wodɔ la. Daniel gblɔ be: “Nye Aƒetɔ, ŋutega la na dzidzi ƒom, eye ŋusẽ vɔ le ŋunye. Aleke nye aƒetɔ ƒe dɔla ate ŋu aƒo nu kple ame abe wò, nye aƒetɔ, ene? Elabena azɔ ŋusẽ vɔ le ŋunye, eye gbɔgbɔ aɖeke megale menye o.”—Daniel 10:16b, 17.

19. Aleke wokpe ɖe Daniel ŋu zi etɔ̃liae, eye nukae do tso eme?

¹⁹ Menye ɖe Daniel nɔ nyatoƒoe tom alo nɔ taflatse dom o. Nɔnɔme si me wòle ko gblɔm wònɔ, eye mawudɔlaa lɔ̃ ɖe eƒe nyaa dzi. Ewɔe be mawudɔla si wodɔ la gakpe ɖe Daniel ŋu zi etɔ̃lia. Nyagblɔɖila la gblɔ be: “Tete nɔnɔme, si ɖi amegbetɔ la, gaka asi ŋunye, eye wòdo ŋusẽm.” Esi dɔla la ka asi eŋu tsɔ do ŋusẽe vɔ la, egblɔ dzideƒonamenya siawo nɛ be: “Ame malɔ̃nugbɔa, megavɔ̃ o, ŋuwò nefa, sẽ ŋu, eye nalé dzi ɖe ƒo!” Edze abe asikaka ame ŋu lɔlɔ̃tɔe kple nya tuameɖo mawo tututue Daniel hiã ene. Nukae do tso eme? Daniel gblɔ be: “Esi wòƒo nu kplim la, agbe ɖo ŋunye, megblɔ bena: Nye aƒetɔ neƒo nu, elabena èdo ŋusẽm!” Fifia Daniel le klalo na dɔdasi sesẽ bubu aɖe wɔwɔ.—Daniel 10:18, 19.

20. Nukata wòhiã agbagbadzedze hafi mawudɔla si wodɔ la nate ŋu awɔ eƒe dɔ?

²⁰ Esi mawudɔla la do ŋusẽ Daniel hekpe ɖe eŋu eƒe susu va le te eye lãmesẽ ɖo eŋu la, egbugbɔgblɔ nusita wòva. Egblɔ be: “Ènya nusi ta meva gbɔwò ɖoa? Azɔ magbugbɔ aɖawɔ aʋa kple Persia-amegã, eye ne medzo la, ekema Hela-amegã le vava ge. Ke magblɔ nusi woŋlɔ ɖe nyateƒe-gbalẽ me la, na wò; ame aɖeke made dzinye ɖe wo ŋu o, negbe miaƒe amegã Mixael ko.”—Daniel 10:20, 21.

21, 22. (a) Nukae míate ŋu asrɔ̃ tso nusi teƒe Daniel kpɔ me le alesi Yehowa wɔa nu ɖe esubɔlawo ŋu me? (b) Nukae wodo ŋusẽ Daniel be wòawɔ azɔ?

²¹ Aleke gbegbe Yehowa lɔ̃a ame hebua ame ŋu enye si! Ewɔa nu ɖe esubɔlawo ŋu le woƒe ŋutete kple gbɔdzɔgbɔdzɔwo nu ɣesiaɣi. Le go aɖewo me la, edea dɔ wo si ɖe nusi wònya be woate ŋu awɔ nu, togbɔ be ɣeaɖewoɣi woa ŋutɔwo abu be yewomate ŋu awɔe o hã. Le go bubuwo me la, elɔ̃na ɖoa to wo eye wònaa nusi hiã si akpe ɖe wo ŋu be woawɔ woƒe dɔdasiwoe la wo. Mina míasrɔ̃ Yehowa, mía Fofo si le dziƒo, ɣesiaɣi to dzidedeƒo na mía hati tadeagulawo kple ŋusẽdodo wo me.—Hebritɔwo 10:24.

²² Gbedasi si mawudɔla la tsɔ vɛ de dzi ƒo na Daniel ŋutɔ. Togbɔ be Daniel ku amegã hã, fifia ŋusẽ ɖo eŋu eye wònɔ klalo be yeaxɔ nyagblɔɖi ɖedzesi bubu ahaŋlɔe ɖi be wòaɖe vi na mí.

[Etenuŋɔŋlɔwo]

NUKAWO GƆMEE NÈVA SE?

• Nukata Yehowa ƒe dɔla la mete ŋu va ɖo Daniel gbɔ kaba o le ƒe 536/535 D.M.Ŋ. me?

• Nukae mawudɔla si Mawu dɔ la ƒe awudodo kple dzedzeme ɖe fia le eŋu?

• Kpekpeɖeŋu kae hiã Daniel, eye aleke mawudɔla la kpe ɖe eŋu zi etɔ̃ sɔŋ?

• Gbedasi kae mawudɔla la tsɔ vɛ na Daniel?

[Aɖaka si le axa 204, 205]

Mawudɔla Ameŋudzɔlawoe loo alo Dziɖula Gbɔgbɔ Vɔ̃woe?

MÍATE ŋu asrɔ̃ nu geɖe tso nya si Daniel ƒe agbalẽa gblɔ le mawudɔlawo ŋu me. Egblɔ akpa si wowɔna le Yehowa ƒe nyawo me vava me kple agbagba si wodzena be woawɔ woƒe dɔdasiwo na mí.

Mawu ƒe dɔla la gblɔ be esi yeyina be yeaɖaƒo nu na Daniel la, “Persia-fiaɖuƒe la ƒe amegã” xe mɔ na ye. Esi mawudɔla si wodɔ wɔ avu kplii ŋkeke 21 la, “Mixael, amegãwo ƒe tatɔwo dometɔ ɖeka” ye va kpe ɖe eŋu hafi wòte ŋu de. Mawudɔla la gblɔ hã be ele be yeagawɔ aʋa kple futɔ ma kple ɖewohĩ “Hela-amegã” la. (Daniel 10:13, 20) Menye dɔ feŋue wònye na mawudɔla gɔ̃ hã o! Gake amekawoe nye Persia kple Hela megã siawo?

Gbã la, míede dzesii be woyɔ Mixael be “amegãwo ƒe tatɔwo dometɔ ɖeka” kple “miaƒe amegã.” Emegbe wogblɔ be Mixael nye ‘amegãwo ƒe tatɔ si le Daniel deviwo nu.’ (Daniel 10:21; 12:1) Esia fia be Mixael ye nye mawudɔla si Yehowa dɔ be wòanɔ ŋgɔ na Israel-viwo le gbeadzi mɔzɔzɔa me.—Mose II, 23:20-23; 32:34; 33:2.

Nya si nusrɔ̃la Yuda gblɔ hã ɖo kpe nyataƒoƒo sia dzi, si nye be “Mixael, mawudɔla gã la, [le] anuku tsyɔm hele nu ƒom kple Abosam le Mose ƒe kukua ŋuti.” (Yuda 9) Mixael ƒe ɖoƒe, ŋusẽ, kple dɔ vevi si wòwɔna na wònye “mawudɔla gã” nyateƒe, si fia be enye “mawudɔlawo ƒe tatɔ,” alo “mawudɔla vevitɔ.” Esɔ nyuie be Yesu Kristo, Mawu ƒe Vi, la koe woate ŋu agblɔ be ele ɖoƒe kɔkɔ sia do ŋgɔ na eƒe agbenɔnɔ le anyigba dzi kple emegbe.—Tesalonikatɔwo I, 4:16; Nyaɖeɖefia 12:7-9.

Ðe esia fia be Yehowa tsɔ mawudɔlawo ɖo dukɔwo abe Persia kple Hela ene nu be woafia mɔ woƒe nuwɔnawoa? Mawu ƒe Vi Yesu Kristo gblɔe eme kɔ ƒã be: “Xexeamefia . . . mekpɔ naneke le ŋunye o.” Yesu gblɔ hã be: “Nye fiaɖuƒe metso xexe sia me o; . . . nye fiaɖuƒe metso afisia o.” (Yohanes 14:30; 18:36) Apostolo Yohanes gblɔ be “xexeme blibo la katã le vɔ̃ɖitɔ la me.” (Yohanes I, 5:19) Eme kɔ be xexemedukɔwo menɔ Mawu alo Kristo ƒe mɔfiafia alo dziɖuɖu te kpɔ o eye womele ete fifia hã o. Togbɔ be Yehowa ɖe mɔ “dziɖuɖu, siwo ŋusẽ li na” li eye wokpɔa dziɖuɖunyawo dzi le anyigba dzi hã la, metsɔa eƒe dɔlawo ɖoa wo nu o. (Romatɔwo 13:1-7) Satana Abosam si nye “xexeamefia” la koe aɖo “amegã” alo “dziɖula” ɖesiaɖe si anɔ wo nu. Dziɖula gbɔgbɔ vɔ̃woe woanye ke menye mawudɔla ameŋudzɔlawoe o. Efia be gbɔgbɔ vɔ̃ makpɔmakpɔwo, alo “amegãwo” le megbe na dziɖula siwo nye amegbetɔwo, eye menye amegbetɔ dzrowo koe wɔa aʋa siwo nɔa dukɔwo dome o.

[Nɔnɔmetata si xɔ axa 199]

[Nɔnɔmetata si xɔ axa 207]