Ta 3
Amekae Nye Mawu Vavãtɔ La?
1. Nukatae ame geɖe lɔ̃ ɖe nya siwo wotsɔ ʋu Biblia nui dzi?
NE ÈFƆ mo dzi le zã si me yame kɔ nyuie la, ɖe ɣletivi gbogbo siwo nèkpɔna la mewɔa nuku na wò oa? Afikae nàgblɔ be wodzɔ tso? Ke nu gbagbe siwo le anyigba dzi hã ɖe—seƒoƒo dzeaniwo, xevi siwo ƒe xɔxlɔ̃ nya sena, boso gã siwo tia kpo le atsiaƒu me? Míate ŋu ayɔ wo katã avɔ o. Nusiawo katã mate ŋu adzɔ le wo ɖokui si o. Eyata mewɔ nuku o be ame geɖe lɔ̃ ɖe nya siwo wotsɔ dze Biblia gɔmee dzi, be: “Le gɔmedzedzea me Mawu wɔ dziƒo kple anyigba”!—Mose I, 1:1.
2. Nukae Biblia gblɔ le Mawu ŋu, eye nukae wòde dzi ƒo na mí be míawɔ?
2 Ameƒomea ƒe susu mã ale gbegbe le amesi Mawu nye la ŋu. Ame aɖewo susuna be Mawu nye ŋusẽ aɖe si si amenyenye mele o. Ame miliɔn geɖe subɔa tɔgbui kukuwo, eye woxɔe se be Mawu le adzɔge ʋĩ ale gbegbe be womate ŋu ate ɖe eŋu o. Gake Biblia ɖee fia be Mawu vavã la nye ame ŋutɔŋutɔ si tsɔa ɖe le eme na mía dometɔ ɖesiaɖe lɔlɔ̃tɔe. Ema tae wòdea dzi ƒo na mí be ‘míadi Mawu,’ eye wògblɔ be: “Mele adzɔge tso mía dome amesiame gbɔ hafi o.”—Dɔwɔwɔwo 17:27.
3. Nukatae míate ŋu awɔ Mawu ƒe nɔnɔme aɖeke o?
3 Aleke Mawu ƒe dzedzeme le? Esubɔlawo dometɔ ʋee aɖewo kpɔ eƒe anyinɔnɔ ƒe ŋutikɔkɔe le ŋutegawo me. Le wo me la, eɖe eɖokui fia le kpɔɖeŋumɔ nu abe amesi bɔbɔ nɔ fiazikpui dzi, eye kekeli wɔnuku aɖe klẽna tsoa egbɔ ene. Gake amesiwo kpɔ ŋutega mawo la meɖɔ eƒe mo ƒe dzedzeme ŋutɔŋutɔ aɖeke kpɔ o. (Daniel 7:9, 10; Nyaɖeɖefia 4:2, 3) Esi ‘Mawu nye Gbɔgbɔ’ tae; ŋutilã si wokpɔna kple ŋku mele esi o. (Yohanes 4:24) Le nyateƒe me la, míate ŋu awɔ mía Wɔla la ƒe nɔnɔme aɖeke si aɖi eƒe dzedzeme tututu o, elabena “ame aɖeke mekpɔ Mawu ɣeaɖekeɣi kpɔ o.” (Yohanes 1:18; Mose II, 33:20) Gake Biblia fia nu geɖe mí le Mawu ŋu.
ŊKƆ LE MAWU VAVÃTƆ LA SI
4. Dzesideŋkɔ aɖewo siwo ŋu gɔmesese le kawoe wozã na Mawu le Biblia me?
4 Le Biblia me la, wotsɔ nyagbɔgblɔ siwo nye “Mawu ŋusẽkatãtɔ,” “Dziƒoʋĩtɔ,” ‘Wɔla Wɔnuku,’ ‘Nufiala Gãtɔ,’ ‘Aƒetɔ Dziɖulagã,’ kple “Fia mavɔmavɔtɔ” yɔ Mawu vavã lae. (Mose I, 17:1; Psalmo 50:14; Nyagblɔla 12:1; Yesaya 30:20; Dɔwɔwɔwo 4:24; Timoteo I, 1:17) Ŋugbledede le bubuŋkɔ mawo ŋu ate ŋu akpe ɖe mía ŋu be míatsi le sidzedze Mawu me.
5. Mawu ƒe ŋkɔ ɖe, eye zi gbɔ zi nenie wòdze le Hebri Ŋɔŋlɔawo me?
5 Gake ŋkɔ aɖe le Mawu si si to vovo tso bubuawo katã gbɔ si dze zi gbɔ zi 7,000 kloe le Hebri Ŋɔŋlɔawo ɖeɖe dzaa me—edze zi geɖe wu eƒe dzesideŋkɔwo dometɔ ɖesiaɖe. Anye ƒe 1,900 enye sia la, Yudatɔwo tsɔ aʋatsodzixɔse dzudzɔ Mawu ƒe ŋkɔ la yɔyɔ. Ablɔɖegbeɖiɖiwo menɔ Hebrigbe si wotsɔ ŋlɔ Bibliae me o. Eyata mɔ aɖeke meli si dzi míato anya alesi tututu Mose, Dawid, alo blematɔ bubuwo yɔ xaxagbeɖiɖi ene (יהוה) siwo wotsɔ ŋlɔ Mawu ƒe ŋkɔe la o. Agbalẽnyala aɖewo do susu ɖa be anye “Yahweh” ye nye Mawu ƒe ŋkɔ la ƒe yɔyɔ, gake womete ŋu ka ɖe edzi o. Eyɔyɔ si nye “Yehowa” ye wonya le Eʋegbe me ƒe gbogbo aɖee nye sia eye woda asi ɖe eƒe yɔyɔ si sɔ kplii dzi le gbegbɔgblɔ geɖe me le teƒe geɖe egbea.—Kpɔ Mose II, 6:3 kple Yesaya 26:4.
NUSITA WÒLE Be NÀZÃ Mawu Ƒe Ŋkɔ La
6. Nya kae Psalmo 83:19 gblɔ le Yehowa ŋu, eye nukata wòle be míazã eƒe ŋkɔ la?
6 Mawu ƒe ŋkɔ tɔxɛ Yehowa de vovototo eya kple mawu bubuwo katã dome. Ema tae ŋkɔ ma dze zi geɖe le Biblia me ɖo, vevietɔ le eƒe akpa si woŋlɔ ɖe Hebrigbe me. Gbegɔmeɖela geɖe mezãa Mawu ƒe ŋkɔ la o, gake Psalmo 83:19 gblɔ kɔte be: “Ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi.” Eyata esɔ be míazã Mawu ƒe ŋkɔa ŋutɔŋutɔ ne míele nu ƒom le eŋu.
7. Nukae gɔmesese si le ŋkɔ Yehowa ŋu fia mí le Mawu ŋu?
7 Ŋkɔ Yehowa nye Hebrigbe me dɔwɔnya si fia be “wòava eme” ƒe tɔtrɔ aɖe. Eyata Mawu ƒe ŋkɔ la gɔmee nye “Enaa Wòvaa Eme.” Yehowa Mawu ɖe eɖokui fia to esia me be yee nye Tameɖola Gãtɔ. Enaa eƒe tameɖoɖowo vaa eme ɣesiaɣi. Mawu vavãtɔ koe ate ŋu atsɔ ŋkɔ sia, elabena amegbetɔwo mate ŋu aka ɖe edzi gbeɖe be yewoƒe ɖoɖowo adze edzi o. (Yakobo 4:13, 14) Yehowa ɖeɖekoe ate ŋu agblɔ be: “Nenema ke nye nya, si do tso nye nu me la anɔ: . . . ɖeko wòawɔ nye lɔlɔ̃nu, eye wòawɔ nusi gbe meɖoe ɖo.”—Yesaya 55:11.
8. Tameɖoɖo kae Yehowa ɖe gbeƒãe to Mose dzi?
8 Blemafofo Hebritɔ Abraham, Isak, kple Yakob dometɔ ɖesiaɖe ‘yɔ Yehowa ƒe ŋkɔ,’ gake womenya nusi Mawu ƒe ŋkɔa fia bliboe o. (Mose I, 21:33; 26:25; 32:9; Mose II, 6:3) Esime Yehowa ɖe eƒe tameɖoɖo fia emegbe be yeaɖe woƒe dzidzimevi siwo nye Israel-viwo tso kluvinyenye me le Egipte eye yeana ‘anyigba si dzi notsi kple anyitsi bɔ ɖo’ wo la, awɔ na wo abe ɖe mate ŋu ava eme o ene. (Mose II, 3:17) Gake Mawu te gbe ɖe gɔmesese mavɔ si le eƒe ŋkɔa ŋu la dzi esi wògblɔ na eƒe nyagblɔɖila Mose be: “Ale nàgblɔ na Israel-viwo enye esi, ‘Yehowa mia tɔgbuiwo ƒe Mawu, Abraham ƒe Mawu, Isak ƒe Mawu kple Yakob ƒe Mawu, lae dɔm ɖe mia gbɔ.’ Esiae nye nye ŋkɔ tegbee, eye esiae woatsɔ aɖo ŋku dzinyee tso dzidzime yi dzidzime.”—Mose II, 3:15, NW.
9. Aleke Farao bu Yehowae?
9 Mose bia tso Egipte-fia, Farao, si be wòaɖe asi le Israel-viwo ŋu ne woayi aɖade ta agu na Yehowa le gbedzi. Gake Farao si hã wobuna mawui evɔ wòhesubɔa Egipte-mawu bubuwo la ɖo eŋu nɛ be: “Ameka nye Yehowa, ne maɖo to eƒe gbe aɖe asi le Israel-viwo ŋuti woayi? Nyemenya Yehowa la o, eye nyemaɖe asi le Israel ŋuti wòayi hã o!”—Mose II, 5:1, 2.
10. Nukae Yehowa wɔ le blema Egipte tsɔ na tame si wòɖo ɖe Israel-viwo ŋu va eme?
10 Yehowa ɖe afɔ siwo ana eƒe tameɖoɖo nava eme vivivi azɔ, eye wòwɔ nusi sɔ kple gɔmesese si le eƒe ŋkɔa ŋu. Ehe fukpekpe ewo va blema Egiptetɔawo dzii. Fukpekpe susɔea wu Egiptetɔwo ƒe ŋgɔgbeviwo katã, Farao dadala ƒe viŋutsu hã nɔ wo dome. Egiptetɔwo di vevie azɔ be Israel-viwo nadzo. Gake Yehowa ƒe ŋusẽ wɔ dɔ ɖe Egiptetɔ aɖewo dzi ale gbegbe be wokplɔ Israel-viwo ɖo dzo le Egipte.—Mose II, 12:35-38.
11. Nukunu kae Yehowa wɔ le Ƒudzĩa nu, eye nuka dzi esia zi eƒe futɔwo dzi be woalɔ̃ ɖo?
11 Farao si ƒe dzime sẽ, kple eƒe aʋakɔ, tsɔ aʋawɔtasiaɖam alafa geɖe ho be yeagbugbɔ yeƒe kluviawo gbɔe. Esi Egiptetɔawo nɔ wo gogom la, Mawu na Ƒudzĩa me mã nukutɔe ale be Israel-viwo te ŋu zɔ ƒuƒuiƒe to ƒu la me. Esi wo yometilawo ge ɖe ƒua me la, Yehowa “[na] woƒe tasiaɖamfɔwo gli, ale be ŋgɔyiyi zu dɔ na wo.” Egipte-ʋakɔwo do ɣli be: “Mina míasi le Israel nu, elabena Yehowa le aʋa wɔm na wo ɖe Egiptetɔwo ŋuti.” Gake etsi megbe akpa. Tsia nyè zi va kpe eye “wòŋe ɖe tasiaɖamwo, sɔdolawo kple Farao ƒe aʋakɔ blibo, siwo ti wo yome va ƒua me la dzi.” (Mose II, 14:22-25, 28) Ale Yehowa wɔ ŋkɔ gã aɖe na eɖokui, eye womeŋlɔ nudzɔdzɔ ma be kpɔ gbeɖe vaseɖe míaƒe ŋkekea me o.—Yosua 2:9-11.
12, 13. (a) Gɔmesese kae le Mawu ƒe ŋkɔ la ŋu na mí egbea? (b) Nukae wòhiã kpata be amewo nasrɔ̃, eye nukatae?
12 Gɔmesese vevi aɖe le ŋkɔ si Mawu wɔ na eɖokui la ŋu na mí egbea. Eƒe ŋkɔ, Yehowa, nye kpeɖodzi be ana nusiwo katã ƒe tame wòɖo la nava eme. Wo dometɔ ɖekae nye eƒe tameɖoɖo gbãtɔ be míaƒe anyigba la nazu paradiso. (Mose I, 1:28; 2:8) Eyata Mawu aɖe amesiwo katã tsia tre ɖe eƒe dziɖulanyenye ŋuti egbea ɖa, elabena egblɔ be: “Woadze sii be, nyee nye Yehowa.” (Xezekiel 38:23) Ekema Mawu ana ŋugbe si wòdo be yeaɖe ye subɔlawo akplɔ wo ayi dzɔdzɔenyenyexexe yeye me la nava eme.—Petro II, 3:13.
13 Ele be amesiwo katã le Mawu ƒe amenuveve dim la nasrɔ̃ alesi woayɔ eƒe ŋkɔ lae le xɔse me. Biblia do ŋugbe be: “Amesiame, si ayɔ [Yehowa] ƒe ŋkɔa dzi la, woaɖee.” (Romatɔwo 10:13) Ẽ, asixɔxɔ gã aɖe le Yehowa ƒe ŋkɔa ŋu. Yehowa yɔyɔ be wòanye wò Mawu kple Ðela ate ŋu akplɔ wò ayi dzidzɔ mavɔ mee.
MAWU VAVÃ LA ƑE NƆNƆMEWO
14. Mawu ƒe nɔnɔme vevi kawoe Biblia na wodze ƒã?
14 Nusɔsrɔ̃ tso Israel-viwo ƒe ɖeɖe tso Egipte ŋu ana míakpɔ nɔnɔme vevi ene siwo le Mawu si, esiwo katã me wòda sɔ le pɛpɛpɛ la kɔte. Nusiwo wòtu kple Farao ɖe eƒe ŋusẽ gã fia. (Mose II, 9:16) Aɖaŋudzedze gã si Mawu tsɔ kpɔ nya sesẽ ma gbɔe la ɖe eƒe nunya si ɖeke mesɔ kplii o la fia. (Romatɔwo 11:33) Eɖe eƒe dzɔdzɔenyenye fia esi wòhe to na tsitretsiɖeŋula dzimesesẽtɔ mawo siwo te eƒe amewo ɖe to. (Mose V, 32:4) Mawu ƒe nɔnɔme vevitɔe nye lɔlɔ̃. Yehowa ɖe lɔlɔ̃ si ɖe dzesi ŋutɔ fia esi wòwɔ ɖe ŋugbe si wòdo ku ɖe Abraham ƒe dzidzimeviwo ŋu la dzi. (Mose V, 7:8) Egaɖe lɔlɔ̃ fia esi wòɖe mɔ na Egiptetɔ aɖewo be woaɖe asi le woƒe alakpamawuwo ŋu eye woava Mawu vavãtɔ ɖeka kolia la ƒe akpa dzi be wòaɖe vi gã aɖe na wo.
15, 16. Mɔ kawo nue Mawu ɖe lɔlɔ̃ fia le?
15 Ne èle Biblia xlẽm la, àkpɔe be lɔlɔ̃e nye Mawu ƒe nɔnɔme vevitɔ, eye eɖenɛ fiana le mɔ geɖe nu. Le kpɔɖeŋu me, lɔlɔ̃e na wòva zu Nuwowɔla eye wòna dzidzɔ si le agbenɔnɔ me va su gbɔgbɔmenuwɔwɔwo si zi gbãtɔ. Mawudɔla miliɔn alafa gbogbo mawo lɔ̃ Mawu eye wokafunɛ. (Hiob 38:4, 7; Daniel 7:10) Mawu gaɖe lɔlɔ̃ fia esi wòwɔ anyigba la hedzra edzi ɖo be amegbetɔwo nase vivi le edzi.—Mose I, 1:1, 26-28; Psalmo 115:16.
16 Mɔ siwo nu Mawu ƒe lɔlɔ̃ ɖea vi na mí le la sɔ gbɔ fũ akpa be míayɔ wo ɖekaɖekae. Wo dometɔ ɖekae nye be Mawu wɔ míaƒe ŋutilã le lɔlɔ̃ me le nukumɔ nu ale gbegbe be míate ŋu ase vivi le agbe me. (Psalmo 139:14) Eɖea eƒe lɔlɔ̃ fiana esi “[wònaa] tsidzadza mí tso dziƒo kple nuƒãɣiwo, eye wòtsɔ nuɖuɖu kple dzidzɔ yɔ míaƒe dziwo me fũ.” (Dɔwɔwɔwo 14:17) Mawu “nana eƒe ɣe dzena na ame vɔ̃ɖiwo kple ame nyuiwo, eye wònana tsi dzana na ame dzɔdzɔewo kple ame madzɔmadzɔwo” gɔ̃ hã. (Mateo 5:45) Lɔlɔ̃ kee ʋãa mía Wɔla la be wòkpena ɖe mía ŋu bene Mawu ŋuti sidzedze nasu mía si eye míanye esubɔla kpɔdzidzɔwo. Nyateƒee, “Mawu enye lɔlɔ̃.” (Yohanes I, 4:8) Gake eƒe amenyenye ƒe akpa bubuwo gali.
“NUBLANUIKPƆLA KPLE AMENUVE MAWU”
17. Nukae míesrɔ̃ tso Mawu ŋu le Mose II, 34:6, 7?
17 Le Israel-viwo ƒe Ƒudzĩa tsotso vɔ megbe la, egahiã be woanya Mawu nyuie wu. Mose kpɔ be esia hiã eye wòdo gbe ɖa be: “Ne ève nunye vavã la, ekema na manya wò mɔwo, eye madze si wò be, ève nunye.” (Mose II, 33:13) Mose va nya Mawu nyuie wu esime wòsee le Mawu ŋutɔ nu be: “Yehowa, Yehowa, nublanuikpɔla kple amenuve Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ, amesi dzra amenuveve ɖo na ame akpe nanewo, eye wòtsɔa vodada, dzidada kple nuvɔ̃ kena; ke megbea tohehe o.” (Mose II, 34:6, 7) Mawu zãa eƒe lɔlɔ̃ wòdana sɔna kple eƒe dzɔdzɔenyenye, metɔa kpɔ ɖe amesiwo ɖonɛ wɔa nuvɔ̃ ŋu be woƒe nuwɔnawo metsonuwo megagblẽ nu le wo ŋu o.
18. Aleke Yehowa ɖo kpe edzii be yenye nublanuikpɔla?
18 Abe alesi Mose see ene la, Yehowa kpɔa nublanui. Ame ƒe nu wɔa nublanui na nublanuikpɔla eye wòdzea agbagba be yeaɖe ame tso xaxa me. Eyata Mawu ɖe veveseseɖeamenu fia ameƒomea esi wòwɔ ɖoɖo be woaɖe wo tso fukpekpe, dɔléle, kple ku si me tegbee. (Nyaɖeɖefia 21:3-5) Afɔkuwo ate ŋu adzɔ ɖe Mawu subɔlawo dzi le nɔnɔme siwo le xexe vɔ̃ɖi sia me ta, alo ɖewohĩ woawɔ nusi me nunya mele o eye woadze xaxa me. Gake ne wotrɔ va Yehowa gbɔ ɖokuibɔbɔtɔe be wòakpe ɖe yewo ŋu la, afa akɔ na wo eye wòakpe ɖe wo ŋu. Nukatae? Esi wòsea veve ɖe esubɔlawo nu nublanuikpɔkpɔtɔe tae.—Psalmo 86:15; Petro I, 5:6, 7.
19. Nukatae míate ŋu agblɔ be Mawu nye amenuvela?
19 Ame geɖe siwo le ŋusẽnɔƒewo wɔa nu ɖe ame bubuwo ŋu tagbɔsesẽtɔe. Gake aleke gbegbe Yehowa ya vea esubɔla siwo bɔbɔa wo ɖokui nu enye si! Togbɔ be eyae nye ŋusẽtɔ gãtɔ le xexeame godoo hã la, eƒe dɔmenyonyo na ameƒomea katã ɖe dzesi ale gbegbe. (Psalmo 8:4, 5; Luka 6:35) Yehowa vea ame ɖekaɖekawo hã nu, eɖoa woƒe gbe siwo wodona ɖa be wòave yewo nu la ŋu. (Mose II, 22:25, 26; Luka 18:13, 14) Gake menye dzizizie wònye na Mawu be wòave ame aɖeke nu alo akpɔ nublanui nɛ o. (Mose II, 33:19) Eyata ele be míakpɔ ŋudzedze deto ɖe Yehowa ƒe nublanuikpɔkpɔ kple amenuveve ŋu.—Psalmo 145:1, 8.
EGBƆA DZI BLEWU, MEKPƆA AME ŊKUME O, EYE WÒNYE DZƆDZƆETƆ
20. Nukae ɖee fia be Yehowa gbɔa dzi blewu eye mekpɔa ame ŋkume o?
20 Yehowa mebia dzi kabakaba o. Gake mefia be mehea to o, elabena ehe to na dzimesesẽtɔ Farao kple eƒe aʋakɔ la le Ƒudzĩa me. Yehowa mekpɔa ame ŋkume hã o. Eyata eƒe ŋudzedzekpɔkpɔ va ge le Israel-viwo, dukɔ si nu wòve, la si le woƒe nugbegblẽwɔwɔ atraɖii ta. Mawu lɔ̃na be dukɔ sia dukɔ me tɔwo nasubɔ ye, gake amesiwo nɔa agbe wòsɔna ɖe eƒe mɔ dzɔdzɔewo nu koe wòxɔna.—Dɔwɔwɔwo 10:34, 35.
21. (a) Nukae Nyaɖeɖefia 15:2-4 fia mí le Mawu ŋu? (b) Nukae ana be nusi Mawu gblɔ be ele dzɔdzɔe la wɔwɔ nanɔ bɔbɔe na mí wu?
21 Biblia ƒe agbalẽ si nye Nyaɖeɖefia te gbe ɖe alesi gbegbe Mawu ƒe ‘se dzɔdzɔewo’ sɔsrɔ̃ le vevie dzi. Egblɔ na mí be nuwɔwɔ siwo le dziƒo dzi ha be: “[Yehowa], Mawu ŋusẽkatãtɔ, gã kple nuku nye wò dɔwɔwɔwo; wò dukɔwo dzi fia la, dzɔdzɔe kple nyateƒe enye wò mɔwo! [Yehowa], amekae mavɔ̃ wò o, eye makafu wò ŋkɔ la o mahã? Elabena wò ɖeka hɔ̃ koe le kɔkɔe; elabena dukɔwo katã woava ade ta agu le ŋkuwò me; elabena woɖe wò nu dzɔdzɔe wɔwɔwo ɖe go fia.” (Nyaɖeɖefia 15:2-4) Míeɖea Yehowa vɔvɔ̃ nyuitɔ, alo bubu deto dede eŋu, fiana ne míenɔ agbe ɖe nusi wògblɔ be eyae le dzɔdzɔe la nu. Ne míeɖo ŋku Mawu ƒe nunya kple lɔlɔ̃ dzi na mía ɖokui la, ena esia wɔwɔ nɔa bɔbɔe na mí wu. Míaƒe nyonyo tae eƒe sewo katã li ɖo.—Yesaya 48:17, 18.
“YEHOWA, MÍA MAWU LA, YEHOWA ÐEKA KOE”
22. Nukata amesiwo xɔ Biblia la medea ta agu na Mawuɖekaetɔ̃ o?
22 Blema Egiptetɔwo de ta agu na mawu geɖewo, gake “Mawu si dia ɖokuitsɔtsɔna blibo” ye Yehowa ya nye. (Mose II, 20:5, NW) Mose ɖo ŋku edzi na Israel-viwo be “Yehowa, mía Mawu la, Yehowa ɖeka koe.” (Mose V, 6:4) Yesu Kristo hã gagblɔ nya mawo ake. (Marko 12:28, 29) Eyata amesiwo xɔ Biblia be enye Mawu ƒe Nya la medea ta agu na Mawuɖekaetɔ̃ si me ame alo mawu etɔ̃ siwo le ɖeka le o. Le nyateƒe me, nya “Mawuɖekaetɔ̃” medze le Biblia me gɔ̃ hã o. Ame ɖekae Mawu vavãtɔ la nye, eto vovo na Yesu Kristo. (Yohanes 14:28; Korintotɔwo I, 15:28) Menye amee Mawu ƒe gbɔgbɔ kɔkɔe la nye o. Yehowa ƒe dɔwɔŋusẽe wònye, eyae Ŋusẽkatãtɔ la zãna tsɔ wɔa eƒe tameɖoɖowo dzii.—Mose I, 1:2; Dɔwɔwɔwo 2:1-4, 32, 33; Petro II, 1:20, 21.
23. (a) Aleke nàwɔ wò lɔlɔ̃ na Mawu natsi ɖe edzi? (b) Nukae Yesu gblɔ le lɔlɔ̃ na Mawu ŋu, eye nukae wòle be míasrɔ̃ le Kristo ŋu?
23 Ne ède ŋugble le alesi Yehowa wɔ nukui ŋu la, ɖe màlɔ̃ ɖe edzi be edze yeade ta agu nɛ oa? Ne èle eƒe Nya, Biblia, srɔ̃m la, ana nàva dze sii nyuie wu eye nàsrɔ̃ nu le nusi wòdi tso asiwò hena wò nyonyo kple dzidzɔkpɔkpɔ mavɔ la ŋu. (Mateo 5:3, 6) Hekpe ɖe eŋu la, wò lɔlɔ̃ na Mawu adzi ɖe edzi. Esɔ nenema, elabena Yesu gblɔ be: “Nalɔ̃ [Yehowa], wò Mawu la, kple wò dzi blibo kple wò luʋɔ blibo kple wò tamesusu blibo kpakple wò ŋusẽ blibo.” (Marko 12:30) Edze ƒã be lɔlɔ̃ ma nɔ Yesu me na Mawu. Gake nukae Biblia ɖe fia le Yesu Kristo ŋu? Akpa kae wòwɔna le Yehowa ƒe tameɖoɖo me?
DO WÒ SIDZEDZE KPƆ
Mawu ƒe ŋkɔ ɖe, eye zi nenie wozãe le Hebri Ŋɔŋlɔawo me?
Nukatae wòle be nàzã Mawu ƒe ŋkɔ la?
Yehowa Mawu ƒe nɔnɔme kawoe léa dzi na wò vevie?
[Nɔnɔmetata si le axa 29]
Aleke gbegbe nènya xexeame katã Wɔla lae?