Adzɔgbeɖeɖe—Na Ameka?

“Nya, siwo katã Yehowa gblɔ la, míawɔe, eye míalé eme ɖe asi.”—MOSE II, 24:7.

 1, 2. (a) Nukawoe ame aɖewo tsɔ wo ɖokui ke? (b) Amesiwo le subɔsubɔha aɖe me koe ɖea adzɔgbea?

LE FEBRUARY 1945 me la, woƒo Zero-ʋawɔyameʋukula siwo le Japan ƒe Yatabe Yamesrafowo ƒe Aʋalɔgo me la nu ƒu ɖe takpexɔ aɖe me. Wona agbalẽ ɖeɖee wo dometɔ ɖesiaɖe be ne amesi lɔ̃ be yeatsɔ ye ɖokui ana be yeanɔ kamikaze alo ameɖokuitsrɔ̃yameʋu ƒe amedzidzesrafoha me la naŋlɔe ɖe edzi. Asrafo aɖe si nɔ afima ɣemaɣi la gblɔ be: “Mebui be enye dɔdasi si mexɔ tso mawu gbɔ be matsɔ ɖokuinye asa vɔe le ɣeyiɣi si me míaƒe dukɔa ɖo afɔku me la me. Nye seselelãmewo ʋãm be matsɔ ɖokuinye ana eye le esia ta melɔ̃ faa be mawɔ dɔ sia.” Wofia alesi wòawɔ dɔ le Ohka yameʋu la (ameɖokuitsrɔ̃yameʋua) ŋu kple alesi wòakui aɖalɔ futɔwo ƒe aʋawɔtɔdziʋuwo ne wo kple evea siaa nagbã. Gake aʋa la ke hafi yameʋua kuku ƒe mɔnukpɔkpɔ su esi be wòato eme aku ɖe eƒe dukɔ kple fiagã la ta. Esi woɖu Japan dzi le aʋa la me la, eƒe fiagã la dzixɔxɔse dome gblẽ keŋkeŋ.

² Ɣeaɖeɣi va yi la, Japantɔ geɖe tsɔ wo ɖokui ke woƒe fiagã si dzi woxɔ se be mawu gbagbee wònye la be yewoasubɔe. Le dukɔ bubuwo me la, nu bubuwo nɔ anyi siwo amewo tsɔ wo ɖokui ke be yewoasubɔ eye nu mawo gali fifia hã. Ame miliɔn geɖe tsɔ wo ɖokui ke be yewoasubɔ Maria, Buddha, alo mawu bubuwo—siwo teƒe legbawo nɔna zi geɖe. Television dzi mawunyagblɔlawo ƒe nyagbɔgblɔ wɔdɔɖeamedziwo kpɔ ŋusẽ ɖe ame aɖewo dzi be wodzɔa ga si woɖi hiã kpɔ la na wo tsɔ ɖea woƒe megbedada kple dzi blibo na wo si sɔ kple ɖokuitsɔtsɔna la fianae. Esi aʋa la ke la, Japantɔ siwo ƒe mɔkpɔkpɔ meva eme na wo o la di nu bubu si woate ŋu atsɔ woƒe agbe aɖe adzɔgbe na. Dɔwɔwɔ va zu nusia na ame aɖewo. Le Ɣedzeƒe alo Ɣetoɖoƒe o, ame geɖe tsɔa wo ɖokui ɖea adzɔgbe na kesinɔnuwo nu ƒoƒo ƒu. Sɔhɛwo tua woƒe agbenɔnɔ ɖe hadzilawo, amesiwo ƒe agbenɔnɔ wosrɔ̃na la dzi. Ame geɖe va zu ɖokuisubɔlawo egbea, eye wonaa woawo ŋutɔ ƒe nudidiwo zua nusi wotsɔa wo ɖokui ɖoa anyi na. (Filipitɔwo 3:19; Timoteo II, 3:2) Gake ɖe nusiawo alo amesiawo dze na luʋɔ blibo ƒe ɖokuitsɔtsɔna nyateƒea?

 3. Aleke nane siwo amewo tsɔ wo ɖokui kee la va zu dzodzroe?

³ Ne nya ŋutɔŋutɔ aɖe dzɔ ɖe legbasubɔlawo dzi la, dzi ɖena le wo ƒo zi geɖe. Legbasubɔsubɔ zua nuxaxa ne wo subɔlawo kpɔe be “amegbetɔwo ƒe asinudɔwɔwɔwo” koe yewoƒe legbaawo nye. (Psalmo 115:4) Ne woklo nu le mawunyagblɔla xɔŋkɔwo ƒe nugbegblẽwɔwɔwo dzi la, eɖea dzi le anukwaretɔwo ƒo. Esi ganyawo ƒe nyonyo “si ble ame geɖe” me gblẽ la, eɖe fu na dɔwɔlawo ƒe susu ŋutɔ esi wokpɔe be yewole amesiwo ŋu wole asi ɖem le la dome. Ganyawo ƒe anyidzedze nyitsɔ laa sia zu taɖui gã aɖe na Kesinɔnu subɔlawo. Fe siwo amewo nyi kple susu be yewoawɔ ga geɖe la va zu agba eye mɔkpɔkpɔ gobi aɖeke mele wo si be yewoate ŋu ava xe wo o. (Mateo 6:24) Ne rock hadzila siwo wotsɔ wɔ mawuwoe ku alo alo womegale tsia dzi o la, wo subɔlawo tsia yame. Eye zi geɖe la, amesiwo tsɔa agbeɖuɖu ɖoa ta la ŋea eme kutsetse siwo nyea vevesese.—Galatiatɔwo 6:7

 4. Nukae na amewo tsɔa woƒe agbe ɖea adzɔgbe na nu dzodzrowo?

⁴ Nukae ʋãa amewo be woatsɔ wo ɖokui aɖe adzɔgbe na nu gbɔlo siawo? Le go geɖe me la, xexeame ƒe gbɔgbɔ si le Satana ƒe ŋusẽkpɔɖeamedzi tee. (Efesotɔwo 2:2, 3) Gbɔgbɔ sia ƒe ŋusẽkpɔɖeamedzi dzena le mɔ vovovowo nu. Ƒomekɔnyinyi si wo tɔgbuiwo gblẽ ɖi ate ŋu akpɔ ŋusẽ ɖe ame aɖewo dzi. Sukudede kple alesi wonyi amee ate ŋu akpɔ ŋusẽ gã aɖe ɖe ame ƒe tamebubu dzi. Nɔnɔme si le dɔwɔƒe ate ŋu atutu “amesiwo ƒe ŋku biã ɖe gakpɔkpɔ ŋu” be woagbla ɖe dɔ ŋu gbɔɖememanɔmee si ate ŋu ade woƒe agbe afɔku me. Xexeame ƒe nukpɔsusu le ŋutilãmenuwo ŋu ƒãnɛ ɖe amewo me be woadi be nu geɖe wu nasu yewo si. Nu gblẽ le ame geɖe ƒe dzi ŋu, eye esia tutua wo wotsɔa wo ɖokui kea woawo ŋutɔ ƒe ɖokuitɔdidinudzodzrowo. Womenɔa anyi bua eŋu kpɔ be ɖe wòdze be yewoatsɔ yewo ɖokui aɖe adzɔgbe na nusiawo siwo yome yewotina la hã o.

Dukɔ aɖe si Tsɔ Eɖokui Ðe Adzɔgbee

 5. Adzɔgbe kae woɖe na Yehowa ƒe 3,500 kple edzivɔe nye sia?

⁵ Ƒe 3,500 kple edzivɔe nye esia la, dukɔ aɖe ke ɖe nane si nyo wu sã si dze be woatsɔ ame ɖokui ana ŋu. Wotsɔ wo ɖokui ɖe adzɔgbe na Yehowa, Mawu gãtɔ. Israel-dukɔa gblɔ wo ɖokui tsɔtsɔ ɖe adzɔgbee na Mawu le ƒuƒoƒo me le Sinai-gbedzi.

 6. Nukae Mawu ƒe ŋkɔ la afia na Israel-viwo?

⁶ Nukae ʋã Israel-viwo be wowɔ nusia? Esime wonɔ kluvinyenye me le Egipte la, Yehowa dɔ Mose ɖa be wòakplɔ ayi ablɔɖe mee. Mose bia alesi wòayɔ Mawu si dɔe ɖa la na woe, eye Mawu ɖe eɖokui fia be yenye ‘Maɖee fia be nusi manye lae manye.’ Egblɔ na Mose be wòagblɔ na Israel-viwo be: “Maɖo kpe edzi be nusi manye lae dɔm ɖe mia gbɔ.” (Mose II, 3:13, 14) Nyagbɔgblɔ sia fia be Yehowa zua nusianu si hiã bene wòana eƒe tameɖoɖowo nava eme. Aɖee afia be yenye Ŋugbedododziwɔla le mɔ si nu Israel-viwo tɔgbuiwo mekpɔ kpɔ o nu.—Mose II, 6:2, 3.

 7, 8. Kpeɖodzi kawoe nɔ Israel-viwo si be Yehowa nye Mawu si dze be yewoatsɔ yewo ɖokui aɖe adzɔgbe na?

⁷ Israel-viwo kpɔ alesi wòhe Fuwɔame Ewoawo va Egipte-nyigba kple edzinɔlawo dzii teƒe. (Psalmo 78:44-51) Emegbe ameha si ate ŋu awu miliɔn etɔ̃, si me nyɔnuwo, kple ɖeviwo nɔ, ƒo woƒe nuwo nu ƒu eye woʋu le Gosen-nyigba dzi le zã ɖeka me, esi hã nye nudzɔdzɔ ɖedzesi aɖe. (Mose II, 12:37, 38) Eyome le Ƒudzĩa nu la, Yehowa ɖe eɖokui fia be ‘aʋakalẽtɔe’ yenye esime wòɖe eƒe dukɔ la tso Farao ƒe asrafowo si me esi wòmã ƒu la me be Israel-viwo nato eme eye emegbe wògatui be Egiptetɔ siwo nɔ wo yome tim la nanyrɔ̃. Esia na “Israel kpɔ ŋusẽ gã, si Yehowa ɖe fia ɖe Egiptetɔwo ŋuti la. Eye dukɔ la vɔ̃ Yehowa, eye woxɔ Yehowa kple ƒe dɔla Mose dzi se.”—Mose II, 14:31; 15:3; Psalmo 136:10-15.

⁸ Israel-viwo wɔ nu abe ɖe womekpɔ nusi Mawu ƒe ŋkɔa fia la ƒe kpeɖodzi vaseɖe ɣemaɣi ke o ene, esi woli liʋiliʋi le Yehowa kple eteƒenɔla Mose ŋu le nuɖuɖu kple tsi manɔanyi ta. Yehowa ɖo tegliwo ɖa, ena mana dza, eye eye wòna tsi do bababa tso agakpe aɖe me le Meriba. (Mose II, 16:2-5, 12-15, 31; 17:2-7) Yehowa ɖe Israel-viwo tso Amalekitɔwo ƒe amedzidzedze hã me. (Mose II, 17:8-13) Israel-viwo mate ŋu agbe nya si Yehowa gblɔ na Mose emegbe le mɔ aɖeke nu o: “Yehowa, Yehowa, nublanuikpɔla kple amenuve Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ, amesi dzra amenuveve ɖo na ame akpe nanewo, eye wòtsɔa vodada, dzidada kple nuvɔ̃ kena.” (Mose II, 34:6, 7) Le nyateƒe me, Yehowa ɖo kpe edzi be yedze na woƒe ɖokuitsɔtsɔna ƒe subɔsubɔ.

 9. Nukatae Yehowa na mɔ Israel-viwo be woagblɔ woƒe adzɔgbeɖeɖe be yewoasubɔe, eye nya kae wogblɔ?

⁹ Togbɔ be enye Yehowa ƒe gome be Israel-viwo nanye etɔ le esi wòɖe wo tso Egipte ta hã la, eya amesi nye nublanuikpɔla kple amenuveve Mawu na mɔnukpɔkpɔ wo be woawo ŋutɔ natso le woƒe lɔlɔ̃nu faa me agblɔe ne wodi be yewoasubɔ ye. (Mose V, 7:7, 8; 30:15-20) Eɖe nubabla si le wo kple Israel-viwo dome la ŋuti ɖoɖowo hã me na wo nyuie. (Mose II, 19:3-8; 20:1–23:33) Esi Mose gblɔ ɖoɖo siawo la, Israel-viwo gblɔ be: “Nya, siwo katã Yehowa gblɔ la, míawɔe, eye míalé eme ɖe asi!” (Mose II, 24:3-7) Woawo ŋutɔ ƒe lɔlɔ̃nu faae wotsɔ zu dukɔ si tsɔ eɖokui ɖe adzɔgbe na Aƒetɔ Dziɖulagã Yehowa.

Ŋudzedzekpɔkpɔ Kplɔa Ame Yia Adzɔgbeɖeɖe Gbɔe

10. Nuka dzie wòle be míatu míaƒe adzɔgbeɖeɖe na Yehowa ɖo?

¹⁰ Yehowa, Wɔla la, gadze kokoko na míaƒe ɖokuitsɔtsɔna si tso dzi blibo me. (Maleaxi 3:6; Mateo 22:37; Nyaɖeɖefia 4:11) Gake mele be míaƒe adzɔgbeɖeɖe nanye le nyadzixɔxɔse bɔbɔe, seselelãme siwo hona ɖe ame me zi ɖeka, alo ame bubuwo ƒe dzizizi ta o—dzilawo kura gɔ̃ hã tɔ le eme. Ele be wòanye le nyateƒe si ku ɖe Yehowa ŋu ŋuti sidzedze vavãtɔ ƒe amesisusu kple ŋudzedzekpɔkpɔ ɖe nusi Yehowa wɔ na mí ŋu la ta. (Romatɔwo 10:2; Kolosetɔwo 1:9, 10; Timoteo I, 2:4) Abe alesi Yehowa na mɔ Israel-viwo be woawo ŋutɔ woagblɔ woƒe adzɔgbeɖeɖe ene la, nenema ke wònaa mɔ mí be míatsɔ mía ɖokui aɖe adzɔgbee kple lɔlɔ̃nu faa eye be míana woanya adzɔgbeɖeɖe ma le gaglãgbe.—Petro I, 3:21.

11. Nukae nusi míesrɔ̃ tso Biblia me fia mí tso Yehowa ŋu?

¹¹ To Biblia sɔsrɔ̃ me la, míeva nyaa Mawu abe ame ene. Eƒe Nya la kpena ɖe mía ŋu míedzea si eƒe nɔnɔmewo abe alesi wodzena le eƒe asinudɔwɔwɔwo mee ene. (Psalmo 19:2-5) Míete ŋu kpɔnɛ le eƒe Nya la me be menye Mawuɖekaetɔ̃ ɣaɣla si gɔme womate ŋu asee wònye o. Womeɖua edzi le aʋa me o eye le esia ta mehiã be wòagbe nu le eƒe Mawunyenye gbɔ o. (Mose II, 15:11; Korintotɔwo I, 8:5, 6; Nyaɖeɖefia 11:17, 18) Esi wòwɔ eƒe ŋugbedodowo dzi ta la, ena míeɖoa ŋku nusi eƒe ŋkɔ dzeani, Yehowa, tsi tre ɖi na la dzi. Eyae nye Tameɖola Gãtɔ. (Mose I, 2:4, NW etenuŋɔŋlɔ; Psalmo 83:19; Yesaya 46:9-11) Ne míesrɔ̃ Biblia la, míeva sea alesi gbegbe wònye nuteƒewɔla kple amesi ŋu woate ŋu aɖo ŋu ɖo la me kɔte.—Mose V, 7:9; Psalmo 19:8, 10; 111:7.

12. (a) Nukae hea mí ɖe Yehowa ŋu? (b) Aleke agbemenudzɔdzɔ ŋutɔŋutɔ siwo woŋlɔ ɖe Biblia me ʋãa amee be wòadi be yeasubɔ Yehowa? (d) Aleke nèsena le ɖokuiwò me ɖe Yehowa subɔsubɔ ŋu?

¹² Nusi koŋ hea mí va Yehowa gbɔe nye eƒe amenyenye si nye lɔlɔ̃. Biblia fia alesi gbegbe wòlɔ̃a amee, eye wòtsɔna kea ame hekpɔa nublanui ne ele nu wɔm ɖe amegbetɔwo ŋu. Bu alesi wòna nu gadze edzi na Hiob esime Hiob lé nuteƒewɔwɔ me ɖe asi pɛpɛpɛ nɛ vɔ megbe ŋu kpɔ. Nusi dzɔ ɖe Hiob dzi na wògadze nyuie be “[Yehowa] yɔ fũ kple dɔmetɔtrɔ kple nublanuikpɔkpɔ.” (Yakobo 5:11; Hiob 42:12-17) Bu alesi Yehowa wɔ nu ɖe Dawid ŋu le eƒe ahasiwɔwɔ kple amewuwu vɔ megbe la ŋu kpɔ. Nyateƒee, Yehowa lɔ̃ faa be yeatsɔ nuvɔ̃ gãwo gɔ̃ hã ake ne nuvɔ̃wɔla la va ye gbɔ kple “dzi gbagbã, si tugu.” (Psalmo 51:5-13, 19) Bu alesi Yehowa wɔ nu ɖe Saul si tso Tarso si nye Mawu ƒe amewo yometila sesẽ aɖe tsã la ŋu kpɔ. Kpɔɖeŋu siawo ɖe Mawu ƒe nublanuikpɔkpɔ kple alesi wòlɔ̃na faa be yeazã dzimetrɔlawo la fia kɔte. (Korintotɔwo I, 15:9; Timoteo I, 1:15, 16) Paulo se le eɖokui me be yeate ŋu atsɔ yeƒe agbe ŋutɔŋutɔ ake ɖe lɔlɔ̃ Mawu sia subɔsubɔ ta. (Romatɔwo 14:8) Ðe wò hã nèsena le ɖokuiwò me nenemaa?

13. Yehowa ƒe lɔlɔ̃ ɖeɖefia kae ʋã dzi dzɔdzɔetɔwo be woatsɔ wo ɖokui aɖe adzɔgbe nɛ?

¹³ Yehowa ɖe Israel-viwo tso kluvinyenye me le Egipte, eye edzra mɔnu aɖe ɖo be yeatsɔ aɖe míawo hãe tso nuvɔ̃ kple ku ƒe kluvinyenye me—Yesu Kristo ƒe tafevɔsa la. (Yohanes 3:16) Paulo gblɔ be: “Mawu ɖe ye ŋutɔ ƒe lɔlɔ̃, si wòtsɔ lɔ̃ mí la fia bena, esime míeganye nuvɔ̃wɔlawo la, Kristo ku ɖe mía ta.” (Romatɔwo 5:8) Mawu ƒe ɖoɖo sia si me lɔlɔ̃ le la ʋãa dzi dzɔdzɔetɔwo be woatsɔ wo ɖokui aɖe adzɔgbe na Yehowa to Yesu Kristo dzi. “Elabena Kristo ƒe lɔlɔ̃ la le mía kplɔm, eye míedzro eme kpɔ kpɔ esia bena, esi ame ɖeka ku ɖe amewo katã ta, eyata amewo katã ku. Eye wòku ɖe wo katã ta, bene amesiwo le agbe la, naganɔ agbe na wo ɖokui o, ke ne woanɔ agbe hena amesi ku, eye wògatsi tre le wo ta la boŋ.”—Korintotɔwo II, 5:14, 15; Romatɔwo 8:35-39.

14. Ðe sidzedze Yehowa ƒe nuwɔnawo ɖeɖe sɔ gbɔ aʋã mí be míatsɔ míaƒe agbe aɖe adzɔgbe nɛa? Ðe eme.

¹⁴ Gake Yehowa ƒe amenyenye kple alesi wòwɔa nu ɖe ameƒomea ŋui nyanya ɖeɖe mesu o. Ele be míasrɔ̃ ŋudzedzekpɔkpɔ ɖe Yehowa ŋu. Aleke míasrɔ̃e? To Mawu ƒe Nya la tsɔtsɔ wɔ dɔe le míaƒe agbenɔnɔ me kple alesi mía ŋutɔwo míakpɔe be gɔmeɖose siwo le eme wɔa dɔ nyateƒe dzie. (Yesaya 48:17) Ele be míasee le mía ɖokui me be Yehowa ɖe mí tso xexe vɔ̃ɖi sia si dzi Satana nye fia ɖo la ƒe ba me. (Tsɔe sɔ kple Korintotɔwo I, 6:11.) Esime míele ʋiʋlim be míawɔ nu nyui la, míesrɔ̃a alesi míaɖo ŋu ɖe Yehowa ŋui, eye mía ŋutɔwo míekpɔnɛ be Yehowa ye nye Mawu gbagbe si nye ‘Gbedodoɖasela’ la. (Psalmo 62:9; 65:3) Eteƒe medidina hafi míesena le mía ɖokui me be mía kplii dome le kplikplikpli ale gbegbe eye míete ŋu gblɔa míaƒe seselelãme ememetɔwo kekeake nɛ o. Yehowa lɔlɔ̃ ƒe didi vevie tsina ɖe mía me. Ðikekemanɔmee la, esia ʋãa mí be míatsɔ míaƒe agbe aɖe adzɔgbe nɛ.

15. Nukae ʋã ŋutsu aɖe si tsɔ eɖokui ɖe adzɔgbe na dɔ tsã la be wòva le Yehowa subɔm?

¹⁵ Ame geɖe va nya Yehowa, lɔlɔ̃ Mawu sia, eye wotsɔ woƒe agbe ɖe adzɔgbe be yewoasubɔe. Le kpɔɖeŋu me, bu tame le elektrikdɔwɔla aɖe si dɔ dze edzi na la ŋu kpɔ. Ɣeaɖewoɣi la, edzea dɔ gɔme tso ŋdi eye wòwɔa dɔ ŋkeke kple zã bliboa katã, eye fɔŋli ga atɔ̃ me hafi wògbɔna vaa aƒeme. Ne egbɔ ɖe eme abe gaƒoƒo ɖeka ko ene la, egayia dɔ bubu wɔƒe. Egblɔ be “meƒo ɖokuinye katã ɖe nye dɔa me.” Esi srɔ̃a dze Biblia sɔsrɔ̃ gɔme la, eya hã va srɔ̃e kplii. Egblɔ be: “Ðeko mawu siwo katã menya vaseɖe ɣemaɣi la bɔbɔ nɔa anyi nɔa lalam be woava subɔ yewo, womewɔa naneke be wòaɖe vi na mí o. Gake Yehowa ya xɔ ŋgɔ eye wòɖo eƒe Tenuvi ɖe anyigba dzi si nye nu xɔasi aɖe si eya ŋutɔ tsɔ sa vɔe.” (Yohanes I, 4:10, 19) Le ɣleti ewo ko me la, ŋutsu sia ɖe adzɔgbe na Yehowa. Le ema megbe la, ezã eƒe ŋutetewo katã tsɔ subɔ Mawu gbagbe lae. Ege ɖe ɣeyiɣiawo katã ƒe subɔsubɔdɔa me eye wòʋu yi ɖasubɔ le afisi hiahiã la lolo le wu. Abe apostoloawo ene la, ‘egblẽ nuwo katã ɖi dze Yesu yome.’ (Mateo 19:27) Le ɣleti eve megbe la, woyɔ wo kple srɔ̃a be woava subɔ le dukɔ si me wòle ƒe Gbetakpɔxɔ Habɔbɔa ƒe alɔdzedɔwɔƒe, be wòakpe asi ɖe elektrikdɔwo ŋu. Ƒe 20 kple edzivɔe nye sia wòle dɔ wɔm le alɔdzedɔwɔƒea, le dɔ si dzɔa dzi nɛ wɔm—menye na eɖokui o—ke boŋ na Yehowa.

Na Woanya Wò Adzɔgbeɖeɖe la le Dutoƒo

16. Afɔ siwo woaɖe hafi aɖe adzɔgbe na Yehowa dometɔ aɖewo ɖe?

¹⁶ Le Biblia sɔsrɔ̃ va de asi na ɣeyiɣi aɖe megbe la, ɖeviwo kple ame tsitsiwo siaa ava kpɔ ŋudzedze ɖe Yehowa kple nusi wòwɔ na wo la ŋu. Ele be esia naʋã wo woatsɔ wo ɖokui ana Mawu. Ðewohĩ èle amesiawo dome. Aleke nàwɔ atsɔ ɖokuiwò aɖe adzɔgbee na Yehowa? Ne sidzedze vavãtɔ si tso Biblia me su asiwò vɔ la, ele be nàwɔ nu wòasɔ ɖe sidzedze ma nu eye nàtsɔ Yehowa kple Yesu Kristo dzixɔse awɔ dɔe. (Yohanes 17:3) Trɔ dzime eye nàgbugbɔ le nuvɔ̃gbe ɖesiaɖe si nènɔ va yi kpɔ la me. (Dɔwɔwɔwo 3:19) Ekema àɖo afɔɖeɖe si nye adzɔgbeɖeɖe gbɔ, gblɔe moveviɖoɖotɔe le gbedodoɖa me na Yehowa. Ðikekemanɔmee la, gbedodoɖa sia atsi susu me na wò, elabena eyae nye ƒomedodo yeye aɖe me ɖoɖo kple Yehowa ƒe gɔmedzedze.

17. (a) Nukata hamemegãwo dzroa nyabiabia siwo wodzra ɖo ɖi me kple adzɔgbeɖela yeyewo? (b) Afɔ vevi kae wòle be woaɖe le ame ƒe adzɔgbeɖeɖe megbe teti, eye kple taɖodzinu ka?

¹⁷ Abe alesi Mose ɖe nusiwo wòbia be woawɔ hafi woaɖo nubabla ƒe ƒomedodo me kple Yehowa me na Israel-viwoe ene la, hamemegã siwo le Yehowa Ðasefowo ƒe hamewo me hã kpena ɖe ame yeye siwo ɖe adzɔgbe ŋu be woade ŋugble le nusi tututu wobia tso wo si ŋu. Wozãa nyabiabia siwo wodzra ɖo tsɔ kpɔna be wo dometɔ ɖesiaɖe se Biblia ƒe nufiafia veviwo kple nusi Yehowa Ðasefo nyenye bia tso ame si la gɔme. Emegbe esɔna be wowɔa wɔna aɖe si naa wonyaa adzɔgbeɖeɖea le dutoƒo. Le alesi wòdzɔnɛ nu la, adzɔgbeɖela yeye la dina vevie be yeana ame bubuwo nanya be yeva ge ɖe ƒomedodo xɔasi sia me kple Yehowa. (Tsɔe sɔ kple Yeremya 9:24.) Esɔ be wotsɔa nyɔnyrɔ̃xɔxɔ ɖe tsi me wɔa esia ƒe kpɔɖeŋui. Ame nyɔnyrɔ̃ ɖe tsi me kple amea fɔfɔ tso tsia me fia be woku na ɖokuitɔdidigbe si wonɔ va yi eye fifia wofɔ na agbenɔnɔ ƒomevi yeye si nye Mawu ƒe lɔlɔ̃nu wɔwɔ. Menye sakramento alo kɔnu si wɔa ame kɔkɔe wònye o, eye menye kɔnu hãe abe Shintotɔwo ƒe kɔnu si nye misogi si me wobua amea be tsia kɔ eŋu ene ye o.a Ke boŋ nyɔnyrɔ̃xɔxɔ nye adzɔgbe si woɖe le gbedodoɖa me xoxo la ɖeɖefia le dutoƒo.

18. Nukata míate ŋu aka ɖe edzi be míaƒe adzɔgbeɖeɖe mazu dzodzro o?

¹⁸ Moveviɖoɖo ƒe wɔna sia nye nusi Mawu subɔla yeyea meŋlɔna be eye wòɖoa ŋku ƒomedodo mavɔ si le wo Yehowa dome la dzi nɛ. To vovo na adzɔgbe si ameɖokuitsrɔ̃yameʋukula la ɖe na eƒe dukɔ kple fiagã la, adzɔgbeɖeɖe na Yehowa sia mazu dzodzro o, elabena Mawu ŋusẽkatãtɔ mavɔ si wɔa nusiwo katã ƒe tame wòɖo lae wònye. Eya ɖeɖe dzaa koe dze na míaƒe luʋɔ blibo ƒe ɖokuitsɔtsɔna.—Yesaya 55:9-11.

19. Nuka mee míadzro le nyati si kplɔe ɖo me?

¹⁹ Gake adzɔgbeɖeɖe bia nu geɖe wu ema tso ame si. Le kpɔɖeŋu me, aleke adzɔgbeɖeɖe kpɔa ŋusẽ ɖe míaƒe gbesiagbenɔnɔ dzii? Míadzro nya sia me le nyati si kplɔe ɖo me.

[Etenuŋɔŋlɔ]

Èɖo Ŋku Wo Dzia?

◻ Nukatae adzɔgbe siwo woɖena le xexeame va zua dzodzro?

◻ Nukae ʋã Israel-viwo be wotsɔ wo ɖokui ɖe adzɔgbe na Yehowa?

◻ Nukae ʋãa mí be míatsɔ mía ɖokui aɖe adzɔgbe na Yehowa egbea?

◻ Aleke míetsɔa mía ɖokui ɖea adzɔgbee na Mawu?

◻ Nukae nyɔnyrɔ̃ɖetsime fia?

[Nɔnɔmetata si le axa 10]

Israel tsɔ eɖokui ɖe adzɔgbe na Yehowa le Sinai-toa gbɔ