Ƒome Vɔ̃mawu Siwo Nɔ Anyi Le Blema​—Wonye Kpɔɖeŋu na Mí Egbea

ƑOMEA—Dukɔ Ƒoƒuawo dze agbagba be woana xexeame katã ƒe susu nanɔ eŋu. To mɔ ka nu? Le esi woyɔ ƒe 1994 be “Ƒomea ƒe Dukɔwo Dome Ƒe.” Togbɔ be xexemedziɖulawo, hadomegbenɔnɔ ŋuti nunyalawo, kple ƒomeɖaŋuɖolawo xaa nu ɖe gbɔmeyaviwo dzidzi kple srɔ̃gbegbe ƒe dzidziɖedzi ŋu vevie hã la, womete ŋu le kekem ɖe kuxi siawo gbɔ kpɔnu gbati aɖeke ŋu o.

Ðe wòanye be ƒomekuxiwo gbɔ kpɔnuwo le Biblia mea? Ame aɖewo abui nya maɖinyae be woagblɔ be Biblia ate ŋu akpe ɖe ƒomewo ŋu egbea. Woagblɔ be ƒe alafa nanewoe nye sia si woŋlɔe le Titina Ɣedzeƒetɔ aɖewo ƒe nɔnɔmewo kple kɔnuwo nu. Agbenɔnɔ trɔ ŋutɔ le xexeame ƒe akpa geɖe tso Biblia ƒe ɣeyiɣia me. Gake Yehowa Mawu si gbɔ ƒomewo katã kpɔa woƒe ŋkɔ tsonɛ ƒe gbɔgbɔ mee Biblia tso. (Efesotɔwo 3:14, 15; Timoteo II, 3:16) Nya kae Biblia gblɔ le ƒomekuxiwo ŋu?

Yehowa nya nusi tututu hiã hafi ƒomegbenɔnɔ navivi ahadze edzi. Eyata eƒe Nya Biblia gblɔ nya geɖe le ƒomegbenɔnɔ ŋu, ɖewo nye nuxlɔ̃ame. Ƒome siwo nɔ agbe ɖe mawusosroɖa ƒe gɔmeɖosewo nu ƒe kpɔɖeŋuwo hã le Biblia me. Esia te wo ƒo ƒui eye woƒe dzi dze eme. Mina míakpɔ alesi ƒomewo nɔ agbee le Biblia ƒe ɣeyiɣiwo me eye míakpɔ nusi míate ŋu asrɔ̃ tso eme ɖa.

Tanyenye—Dɔ Sesẽ Yea?

Le kpɔɖeŋu me, bu ƒometanyenye ƒe nya la ŋu kpɔ. Abraham, Isak, kple Yakob wonye ‘ƒome ƒe ta’ siwo ɖeke mesɔ kple o le blemafofowo ŋɔli. (Dɔwɔwɔwo 7:8, 9; Hebritɔwo 7:4) The New Manners and Customs of Bible Times si Ralph Gower ŋlɔ la gblɔ be: “Ƒomea nye . . . ‘fiaɖuƒe sue’ aɖe si dzi vifofoa ɖu. Eɖu srɔ̃a, viawo, tɔgbuiyɔviawo, kple dɔlawo—aƒea me tɔ ɖesiaɖe dzi.” Le nyateƒe me la, blemafofowo kpɔa ŋusẽ ɖe wo viwo ƒe ƒomewo hã dzi zi geɖe.—Tsɔe sɔ kple Mose I, 42:37.

Ðe esia mena ŋusẽ ŋutsuwo be woate wo srɔ̃wo kple wo viwo ɖe anyi oa? Kura o. Nyateƒee, Mawu gblɔ na nyɔnu gbãtɔ Xawa be: “Wò tame anɔ srɔ̃wò ŋu, eye eya anye gã ɖe dziwò.” (Mose I, 3:16) Alesi nuwo anɔ na srɔ̃nyɔnuwo katãe nya mawo ɖe fia, gake menye alesi wòle be nuwo nanɔ le mawuvɔ̃la vavãwo domee wowɔnɛ o. Ele be Yehowa ƒe gɔmedzetameɖoɖo nanɔ susu me na srɔ̃ŋutsu mawuvɔ̃lawo. Ðe Yehowa wɔ nyɔnu be wòanye ŋutsu ƒe “kpeɖeŋutɔ,” menye eƒe kluvi o. (Mose I, 2:20) Esi blemaŋutsu mawuvɔ̃lawo kpɔe be ele be yewoabɔbɔ yewo ɖokui ɖe Mawu te ahabu akɔnta nɛ ta la, womezã woƒe ŋusẽ ɖe mɔ gbegblẽ nu o. Blemafofo mawuvɔ̃lawo mewɔ wo srɔ̃wo kple wo viwo kluvi maɖinuwoe kura o, ke boŋ woɖe lɔlɔ̃ kple vividoɖeameŋu vavãtɔ fia wo.

Woƒo nu tso alesi wolɔ̃a ɖeviwoe ŋu kpuie le Mose I, 50:23, NW. Wogblɔ le Yosef ƒe viviɖewo ŋu le afima be: “Wodzi wo ɖe Yosef ƒe ata dzi.” Togbɔ be nya sia ate ŋu afia ko be Yosef xɔ ɖeviawo abe eƒe dzidzimeviwo ene hã la, ate ŋu afia hã be efena kple ɖeviawo lɔlɔ̃tɔe, hekɔa wo ɖe ata dzi. Anyo be vifofo siwo li egbea hã nalɔ̃ wo viwo nenema ke.

Esi blemafofo mawuvɔ̃laawo nye ƒome ƒe tawo ta la, wokpɔ woƒe ƒomewo ƒe gbɔgbɔmenuhiahiãwo hã gbɔ. “Noa ɖi vɔsamlekpui . . . na Yehowa hemé [nu] le vɔsamlekpui la dzi” esi wòdo tso aɖakaʋua me le xexeame katã ƒe Tsiɖɔɖɔa megbe. (Mose I, 8:20; tsɔe sɔ kple Hiob 1:5) Blemafofo nuteƒewɔla Abraham ɖo kpɔɖeŋu nyui aɖe ɖi le beléle na ƒomea me tɔ ɖesiaɖe me. ‘Ede se na viawo kple eƒeme katã bena woalé ŋku ɖe Yehowa ƒe mɔ ŋuti, eye woawɔ nu dzɔdzɔe kple nu nyui.’ (Mose I, 18:19) Eyata tanyenye si me lɔlɔ̃ le wɔe be ƒomewo ƒe seselelãme kple gbɔgbɔmemenyenye nyo nyuie.

Kristotɔ ŋutsu siwo li egbea srɔ̃a kpɔɖeŋu sia. Wokpena ɖe woƒe ƒomewo ŋu be woawɔ Mawu ƒe nudidiwo dzi, eye woa ŋutɔwo ɖoa kpɔɖeŋu nyui ɖi tsɔ wɔa tanyenye ŋudɔ le subɔsubɔnyawo me. (Mateo 28:19, 20; Hebritɔwo 10:24, 25) Srɔ̃ŋutsu Kristotɔwo hã dia ɣeyiɣi fiaa nu wo ƒemetɔwo abe alesi blemafofoawo wɔe ene.

Afɔɖeɖe Kaba

Esi Yakob xe fe gbogbo aɖe na toa megbe la, ebia be: “Ɣekaɣi gɔ̃e nye hã mawɔ dɔ na nye ƒomea?” (Mose I, 30:30, NW) Abe vifofo ɖesiaɖe ene la, Yakob kpɔe be agba le ye dzi be yeakpɔ yeƒe ƒomea ƒe ŋutilãmenuhiahiãwo gbɔ, eye ewɔ dɔ sesĩe tsɔ kpɔ wo gbɔe. Mose I, 30:43 gblɔ be: “Ŋutsu la ƒe kesinɔnuwo le dzidzim ɖe edzi ŋutɔ, eye wòkpɔ alẽwo kple gbɔ̃wo, kosiviwo kple kluviwo, kposɔwo kple tedzi geɖewo.”

Gake esi Yakob ʋu yi Kanaan-nyigba dzi ƒe aɖewo megbe la, edze ƒã be menya be hadede kple Kanaan-nyɔnuviwo zu dɔ vɔ̃ɖi Dina ɖo te o.a (Mose I, 34:1) Eye meɖe afɔ aɖeke hã esi wòva nya be trɔ̃subɔsubɔnuwo va ge ɖe eƒeme o. Gake esi Kanaanitɔ aɖe dɔ Dina gbɔ sesẽe nublanuitɔe vɔ la, Yakob ɖe afɔ azɔ. Eɖe gbe be: “Miɖe dzromawu, siwo le mia dome la ɖa, mikɔ mia ɖokui ŋuti.”—Mose I, 35:2-4.

Ele be vifofo Kristotɔwo nanɔ ŋudzɔ ɖe woƒe ƒomewo ƒe gbɔgbɔmenyenye ŋu vevie. Ne nanewo abe agbegbegblẽnɔnɔ ƒe agbalẽwo alo hadzidzi gbegblẽwo ene ƒe gege ɖe aƒea me de ƒomea ƒe gbɔgbɔmenyenye afɔku me la, ele be woatso ɖe eŋu kaba.

Enyo ŋutɔ be nyɔnuwo abe Sara, Rebeka, kple Raxel ene hã kpɔ ŋusẽ ɖe ƒomea dzi wòɖe dzesi. Togbɔ be wobɔbɔ wo ɖokui na wo srɔ̃wo hã la, ne esɔ eye wòhiã be woaɖe afɔ aɖewo la, womexea mɔ na wo o. Le kpɔɖeŋu me, Mose II, 4:24-26 gblɔ na mí be esi Mose kple eƒe ƒomea yina Egipte la, “Yehowa [“Yehowa ƒe dɔla” Septuagint] va, eye wòdi be, [yeawu Mose ƒe vi].” Edze ƒã be Mose viŋutsu ƒe agbe ɖo afɔku me elabena Mose metso aʋa nɛ o. Zipora wɔ kaba tso aʋa na via. Esia ta mawudɔla la mede asi eŋu o. Kristotɔ nyɔnuwo hã ate ŋu aɖe afɔ ne nɔnɔmea bia nenema.

Vifofo ƒe Nufiafia le Mose ƒe Sea Te

Le ƒe 1513 D.M.Ŋ. me la, blemafofowo ƒe ɣeyiɣia wu nu esi Israel va zu dukɔ. (Mose II, 24:3-8) Vifofowo kpɔtɔ nye ƒome ƒe tawo. Gake ƒomea ƒe se va le dukɔa ƒe Se si Mawu tsɔ na Mose eye ʋɔnudrɔ̃la siwo woɖo nana eŋuti mɔfiame la te. (Mose II, 18:13-26) Lewi-vi nunɔlawo ƒe dɔe nye subɔsubɔvɔwo sasa. Ke hã la, vifofowo gawɔa akpa vevi ɖe kokoko. Mose xlɔ̃ nu be: “Nya, siwo megblɔ na wò egbe la, natsi dzi me na wò. Ku wo ɖe to me na viwòwo, eye naƒo nu le wo ŋu, ne èbɔbɔ nɔ aƒewò me, alo nèle mɔ dzi, ne èmlɔ anyi, alo nèfɔ.”—Mose V, 6:6, 7.

Woɖo ɣeyiɣiwo abe Ŋutitotoŋkekenyui ene ɖi le Sea me be woana nufiame le dutoƒo kple aƒeme. Ne Ŋutitotoŋkekenyui si dze Nisan 14 lia dzi le aƒe tum la, Yuda-ƒomewo dzea dzadzraɖo gɔme ɖe mɔzɔzɔ yi Yerusalem ŋu. (Mose V, 16:16; tsɔe sɔ kple Luka 2:41.) Ðevi ka nue dzadzraɖo sia mavivi o? Mɔzɔzɔa ŋutɔ hã avivi. Tsidzaŋɔli va yina ɣemaɣi eye dzomeŋɔli ƒe ŋdɔʋuʋu ɖea vuvɔŋɔli ƒe fafa ɖa. Ne Hermon-to dzi sno le nyinyim la, ena Yordan-tɔsisia ɖɔna gbagba.

Menye woƒe anyigba ƒe nɔnɔme koe vifofowo ate ŋu afia wo viwo le mɔa dzi o, ke woate ŋu agblɔ teƒe siwo woato ƒe ŋutinya gbogbo siwo li hã na wo. Ebal kple Gerizim Towo, afisi woxlẽ Sea ƒe fiƒode kple yayrawo le hã anɔ eme. Ðewohĩ woto Betel hã, afisi Yakob kpɔ dziƒotrakpui ŋuti ŋutega le. Dze dodzidzɔname kae nye si woaɖo! Ne wole mɔa dzi eye ƒome bubuwo tso dua ƒe teƒeteƒewo va kpe ta la, wo katã wodea ha tuameɖowo.

Ƒomea va ɖoa Yerusalem si nye “nyonyowo ƒe ta” azɔ. (Psalmo 50:2) Agbalẽnyalagã Alfred Edersheim gblɔ be: “Subɔsubɔmɔzɔla siawo dometɔ geɖe ƒua asaɖa anyi ɖe dua godo. Wonaa dzeƒe amesiwo dze dua me la femaxee.” Ẽ, Hebritɔwo ƒe viwo ŋutɔ srɔ̃a nu tso havilɔlɔ̃ kple amedzrowɔwɔ ŋu. Yehowa Ðasefowo ƒe ƒe sia ƒe takpekpe gãwo hã wɔa dɔ ma ke egbea.

Nisan 14 lia ɖo azɔ. Wowua Ŋutitotolã la eye woménɛ gaƒoƒo geɖe. Ne zãtiƒe ɖo la, ƒomea ɖua alẽvi la, abolo maʋãmaʋã, kple ama veve. Ðeviwo biana be: “Miaƒe subɔsubɔ sia gɔme ɖe?” Azɔ vifofowo fiaa nu wo tẽ be: “Esia enye ŋutitotovɔsa na Yehowa, amesi tso míaƒe aƒewo ɖi le Egipte-nyigba dzi, eye wòwu Egiptetɔwo; ke ekpɔ míaƒe aƒewo ta.”—Mose II, 12:26, 27; 13:8.

Israel Fia Salomo gblɔ be: ‘Nukoɣi li eye fefeɣi li.’ (Nyagblɔla 3:4) Woɖea mɔ na Israel-viwo woɖea modzaka. Edze ƒã be Yesu Kristo kpɔ ɖeviwo wonɔ fefem le asime. (Zaxarya 8:5; Mateo 11:16) Eye dzila siwo si alɔme le hã wɔa ɖoɖo ɖe ƒometakpekpe vivi siwo me wodzia ha, ɖua ɣe, heɖua nu le la ŋu. (Luka 15:25) Nenema ke dzila Kristotɔ siwo li egbea hã wɔa ɖoɖo ɖe modzakaɖeɖe kple hadede nyuiwo ŋu na wo viwo.

Vidadawo Kple Ðeviwo le Yudatɔwo Dome

Akpa kae vidadawo wɔ le Mose ƒe Sea te? Lododowo 1:8 de se be: “Vinye, se fofowò ƒe amehehe, eye megagblẽ dawò ƒe nufiame ɖi o.” Srɔ̃nyɔnu Yudatɔ wɔa nudidi siwo Mawu ɖo le ƒomegbenɔnɔ ŋu la ŋuti dɔ le srɔ̃a ƒe ŋusẽ te. Wobia be viawo nade bubu eŋu ne eva ku nyagã gɔ̃ hã.—Lododowo 23:22.

Vidada hã wɔa dɔ geɖe le viawo hehe me. Vidada ɖeka kloe koe léa be na vidzĩa vaseɖe esime wòtsi nyuie atso no, eye ɖikeke mele eme o be esia na vidada kple via dome vivi nyuie. (Yesaya 49:15) Ne vifofowo le asinudɔ fiam wo viŋutsuwo la, vidadawo hã fiaa aƒemedɔwo wo vinyɔnuwo. Vidadawo hã kpɔa ŋusẽ geɖe ɖe wo viŋutsuwo dzi. Le kpɔɖeŋu me, fia Lemuel kpɔ viɖe tso “nya, siwo dadaa ku ɖe to me nɛ” la me.—Lododowo 31:1.

Srɔ̃nyɔnu zãzɛ Yudatɔ hã wɔa nu geɖe tsɔ “[léa] ŋku ɖe nuwɔwɔwo ŋu le eƒe me.” Lododowo 31:10-31 gblɔ be ete ŋu ƒlea aƒemenuzazãwo, eƒlea aƒe alo anyigba hedzranɛ, eye wòtsaa nu kpotoekpotoewo hã ƒe asi. Le srɔ̃a si kpɔa ŋudzedze ɖe eŋu gbɔ la, eƒe asime “sẽ wu adzagba tɔ”!

Enye Kpɔɖeŋu Egbea

Le Biblia ƒe ɣeyiɣiwo me la, ƒome ƒe ɖoɖoa kpɔa emetɔwo katã ƒe seselelãme kple gbɔgbɔ me tsitsi gbɔ. Wobia tso vifofowo si be woawɔ woƒe ŋusẽ ŋudɔ le lɔlɔ̃ me wòaɖe vi na woƒe ƒomewo. Ele be woaxɔ ŋgɔ le subɔsubɔ me. Vifofowo kple vidadawo siaa tsɔa ɖe le wo viwo me—wofiaa nu wo henaa hehe wo, wosubɔna kpli wo, eye wona woɖea modzaka. Vidada mawuvɔ̃lawo nye kpeɖeŋutɔ veviwo, wodea bubu wo srɔ̃wo ƒe tanyenye ŋu, eye wowɔa nuwo ɖe woƒe ƒomewo ta. Ðevi buamewo do dzidzɔ na wo dzilawo kple Yehowa Mawu. Nyateƒee, ƒome vɔ̃mawu siwo nɔ anyi le Biblia ƒe ɣeyiɣiwo me nye kpɔɖeŋu nyui aɖe na mí egbea.

[Etenuŋɔŋlɔ]

[Nɔnɔmetata si le axa 23]

Wò ƒomea ate ŋu akpɔ dzidzɔ abe ƒome siwo subɔ Yehowa le Biblia ƒe ɣeyiɣiwo me ene