Nu Si Tae Wòle Be Míanɔ Kɔkɔe

 1. Aleke Mose ƒe Agbalẽ Etɔ̃lia ate ŋu akpe ɖe mía ŋui?

YEHOWA di tso esubɔlawo katã si be woanɔ kɔkɔe. Togbɔ be woƒo nu tso kɔkɔenyenye ŋu zi geɖe le Biblia bliboa me hã la, Mose ƒe Agbalẽ Etɔ̃lia mee woƒo nu tso eŋu le zi geɖe wu. Agbalẽ sia me nyawo gɔme sese kple ŋudzedzekpɔkpɔ ɖe eŋu akpe ɖe mía ŋu míanya ale si míanɔ kɔkɔe.

 2. Nu kawoe dze le Mose ƒe Agbalẽ Etɔ̃lia me?

² Mose ye ŋlɔ Mose ƒe Agbalẽ Etɔ̃lia, eye agbalẽ sia hã kpe ɖe “Ŋɔŋlɔ blibo” si ‘nyo na nufiafia’ la ŋu. (2 Timoteo 3:16) Le mama dedie nu la, Yehowa ƒe ŋkɔ dze zi ewo le agbalẽ sia ƒe ta ɖe sia ɖe me. Mose ƒe Agbalẽ Etɔ̃lia me nyawo gɔme sese ado ŋusẽ mí be míaƒo asa na nu sia nu si ahe vlodoame ava Mawu ƒe ŋkɔ dzi la wɔwɔ. (3 Mose 22:32) Ele be nyagbe si nye “nyee nye Yehowa,” si dze le agbalẽ sia me enuenu la naɖo ŋku edzi na mí be míaɖo to Mawu. Le nyati sia kple esi kplɔe ɖo me la, míade dzesi nya vevi aɖewo le Mose ƒe Agbalẽ Etɔ̃lia me siwo akpe ɖe mía ŋu be míanɔ kɔkɔe le míaƒe tadedeagu na Mawu me.

3, 4. Nu kae tsilele na Aron kple viaŋutsuwo le tsitre ɖi na? (Kpɔ nɔnɔmetata si le nyati sia ƒe gɔmedzedze.)

³ Mixlẽ 3 Mose 8:5, 6. Yehowa ɖo Aron be wòanye Israel-viwo ƒe nunɔlagã eye viawo hã nanye nunɔlawo na dukɔa. Aron le tsitre ɖi na Yesu, eye Aron viŋutsuwo hã le tsitre ɖi na Kristotɔ amesiaminawo. Nu kae tsilele na Aron fia? Ðe wòfia be ehiã be woakɔ Yesu ŋua? Ao. Yesu nye ame si ŋu nu vɔ̃ alo ‘ɖiƒoƒo’ aɖeke mele o. (Hebritɔwo 7:26; 9:14) Ke hã esi wole tsi na Aron vɔ la, eva le tsitre ɖi na Yesu, ame si le dzadzɛ hele kɔkɔe. Ke nu kae tsilele na Aron viŋutsuwo fia?

⁴ Tsilele na Aron viwo le tsitre ɖi na ale si wokɔ ame siwo wotia be woanye nunɔlawo le dziƒo la ŋu. Amesiaminawo ƒe nyɔnyrɔxɔxɔ dzie woto kɔ wo ŋua? Ao, elabena nyɔnyrɔxɔxɔ meklɔa nu vɔ̃wo ɖa o. Ke boŋ ɖe wòɖoa kpe edzi be ame tsɔ eɖokui ɖe adzɔgbe na Mawu. Wokɔa amesiaminawo ŋu “to nya la dzi,” eya ta ele be woanɔ agbe ɖe Kristo ƒe nufiafiawo nu bliboe. (Efesotɔwo 5:25-27) To mɔ sia dzi la, wonɔa kɔkɔe henɔa dzadzɛ. Ke ‘alẽ bubuawo’ ya ɖe?—Yohanes 10:16.

 5. Nu ka tae míate ŋu agblɔ be wokɔa alẽ bubuawo ŋu to Mawu ƒe Nya la dzi?

⁵ Aron viŋutsuwo mele tsitre ɖi na Yesu ƒe alẽ bubuawo, siwo nye “ameha gã” la o. (Nyaɖeɖefia 7:9) Gake alẽ bubuawo hã va nɔa kɔkɔe henɔa dzadzɛ to Mawu ƒe Nya la dzi. Ne ame siwo si anyigba dzi nɔnɔ ƒe mɔkpɔkpɔ le la xɔ nya si Biblia gblɔ tso asixɔxɔ si le Yesu ƒe vɔsaa ŋu dzi se la, eʋãa wo be woasubɔ Yehowa “zã kple keli.” (Nyaɖeɖefia 7:13-15) Amesiaminawo kple alẽ bubuawo ŋu kɔkɔ la yia edzi ɖaa. Eya ta wonɔa agbe dzadzɛ ɣeawokatãɣi. (1 Petro 2:12) Dzi dzɔa Yehowa ne ekpɔe be yeƒe amewo katã le dzadzɛ hewɔ ɖeka eye woɖoa to woƒe Kplɔla Yesu hedzea eƒe afɔɖoƒewo yome nuteƒewɔwɔtɔe!

 6. Nu ka tae wòhiã be míanɔ mía ɖokui me dzrom kpɔ edziedzi?

⁶ Nu kae míesrɔ̃ tso ale si wodi tso Israel ƒe nunɔlawo si be woanɔ dzadzɛ le ŋutilã me la me egbea? Ame geɖe siwo míesrɔ̃a Biblia kplii la dea dzesii be míaƒe dzedzeme kple míaƒe tadeaguƒewo nɔa dzadzɛ. Tsɔ kpe ɖe eŋu la, ele be ame siwo di be yewoasubɔ Yehowa la nawɔ esia kple ‘dzi si me kɔ.’ (Mixlẽ Psalmo 24:3, 4; Yesaya 2:2, 3.) Eya ta ele be míasubɔ Yehowa kple susu, dzi, kple ŋutilã si le dzadzɛ. Ele be míanɔ mía ɖokui me dzrom edziedzi. Ɣeaɖewoɣi la, míakpɔe be ehiã be míawɔ tɔtrɔ gãwo be míanɔ kɔkɔe. (2 Korintotɔwo 13:5) Le kpɔɖeŋu me, ele be ame si xɔ nyɔnyrɔ evɔ wòkpɔa amamaɖeɖenuwɔnawo la nabia eɖokui be, ‘Ðe mele kɔkɔe vavã?’ Eyome ele be wòana woakpe ɖe eŋu wòadzudzɔ nuwɔna gbegblẽ ma.—Yakobo 5:14.

 7. Le ɖekawɔwɔ me kple 3 Mose 8:22-24 la, kpɔɖeŋu kae Yesu ɖo?

⁷ Esi woɖo nunɔlanyenyea anyi le Israel la, wosisi agbo ƒe ʋu ɖe Nunɔlagã Aron kple viaŋutsuwo ƒe ɖusitogboe, ɖusidegblefetsu kple ɖusifɔdegblefetsuwo ŋu. (Mixlẽ 3 Mose 8:22-24.) Ʋu ŋu dɔ wɔwɔ alea fia be nunɔlawo aɖo to ahazɔ ɖe ɖoɖoawo dzi le dɔ si wode wo si la wɔwɔ me. Nenema kee Yesu, si nye Nunɔlagã hã ɖo kpɔɖeŋu deblibo ɖi na amesiaminawo kple alẽ bubuawo. Ewɔ ɖe Mawu ƒe mɔfiamewo dzi, ewɔ Yehowa ƒe lɔlɔ̃nu eye wònɔ kɔkɔe le eƒe agbenɔnɔ katã me.—Yohanes 4:31-34.

 8. Nu kae wòle be mí katã míawɔ?

⁸ Esi míenye Yehowa subɔlawo ta la, ele be mí katã míasrɔ̃ Yesu, ame si lé nuteƒewɔwɔ me ɖe asi na Mawu la ƒe kpɔɖeŋu. Ele be míawɔ Mawu ƒe mɔfiame siwo le Biblia me dzi pɛpɛpɛ ale be míaganɔ “nuxaxa dom na Mawu ƒe gbɔgbɔ kɔkɔe” la o. (Efesotɔwo 4:30) Ðoe kplikpaa be nàɖe ‘mɔ dzɔdzɔe na wò afɔwo.’—Hebritɔwo 12:13.

 9. Nya kae nɔviŋutsu etɔ̃ aɖewo siwo wɔ dɔ kple Dɔdzikpɔhaa me tɔwo la gblɔ, eye aleke woƒe nyawo ate ŋu akpe ɖe ŋuwò nànɔ kɔkɔe?

⁹ Na míadzro nya siwo nɔviŋutsu etɔ̃ siwo wɔ dɔ kplikplikpli kple Dɔdzikpɔhaa me tɔwo ƒe geɖe gblɔ la me kpɔ. Wo dometɔ ɖeka gblɔ be: “Subɔsubɔ ƒe mɔnukpɔkpɔ tɔxɛe wònye nam, ke hã enuenu la, dɔwɔwɔ kpli wo ɖekae na mekpɔe be togbɔ be wotsɔ gbɔgbɔ si ami na nɔviŋutsu siawo hã la, womede blibo o. Gake ƒe geɖewoe nye esia la, enye nye taɖodzinu be maɖo to ame siwo le ŋgɔ xɔm.” Nɔviŋutsu evelia gblɔ be: “Mawunyakpukpuiwo abe 2 Korintotɔwo 10:5, siwo ƒo nu tso ‘toɖoɖo Kristo’ ŋu la kpe ɖe ŋunye be meɖo to ame siwo le ŋgɔ xɔm la hewɔ dɔ aduadu kpli wo. Esiae nye toɖoɖo tso dzi me.” Nɔviŋutsu etɔ̃lia gblɔ be: “Ne míelɔ̃a nu siwo Yehowa lɔ̃ heléa fu nu siwo wòlé fui eye míedia eƒe mɔfiamewo ɣesiaɣi hewɔa nu si wòdi tso mía si la, ekema míaɖo to eƒe habɔbɔa kpakple ame siwo zãm wòle be eƒe tameɖoɖo na anyigba nava eme.” Nɔviŋutsu sia ɖoa ŋku Nathan Knorr ƒe kpɔɖeŋu dzi. Nɔviŋutsu Knorr, si va zu Dɔdzikpɔhaa me tɔ la lɔ̃ ɖe nya si wogblɔ ɖe ƒe 1925 ƒe Gbetakpɔxɔ me nyati si nye “Wodzi Dukɔ Yeye” la dzi, togbɔ be ame bubuwo ke ɖi nyatia me nyawo hã. Toɖoɖo sia wɔ dɔ ɖe nɔviŋutsua dzi ŋutɔ. Ŋugbledede le nɔviŋutsu etɔ̃ siawo ƒe nyawo ŋu ate ŋu akpe ɖe ŋuwò nàɖo to Mawu ahayi edzi anɔ kɔkɔe.

10. Aleke gbegbee wòle vevie be míawɔ se si Mawu de ku ɖe ʋu ŋu la dzi?

¹⁰ Mixlẽ 3 Mose 17:10. Yehowa de se na Israel-viwo be woagaɖu ‘ʋu’ o. Wode se na Kristotɔwo hã be woatsri amegbetɔwo kple lãwo siaa ƒe ʋu. (Dɔwɔwɔwo 15:28, 29) Míadi gbeɖe be míawɔ nane si ana Mawu nagbe mí eye wòaɖe mí ɖa le eƒe hamea me o. Míelɔ̃ Yehowa eye míedi be míaɖo toe. Ne míaƒe agbe ɖo afɔku me, eye ame siwo menya Yehowa o alo wometsɔ ɖeke le eƒe nya me o ƒoe ɖe mía nu be míagbe toɖoɖoe hã la, míenaa ta o. Míenya be ame aɖewo aɖe alɔme le mía ŋu le esi míedoa ʋu o ta, gake Mawue míedi be míaɖo toe. (Yuda 17, 18) Nu kae ana míaɖoe kplikpaa be míagaɖu ʋu alo alɔ̃ woado ʋu na mí o?—5 Mose 12:23.

11. Nu ka tae míate ŋu agblɔ be menye kɔnu dzro aɖe koe nu si wowɔna le Avuléŋkekea dzi la nye o?

¹¹ Nu si Israel ƒe nunɔlagã wɔna ƒe ɖeka zi ɖeka le Avuléŋkekea dzi la akpe ɖe mía ŋu míakpɔ ale si Mawu bua ʋui. Ɣemaɣi la, wozãa ʋu le mɔ tɔxɛ aɖe nu. Wozãnɛ tsɔ léa avu ɖe nu vɔ̃wo ta, ale be Israel-viwo nanɔ ƒomedodo nyui me kple Mawu. Wohlẽa nyitsu kple gbɔ̃ ƒe ʋu ɖe nubablaɖakaa ƒe nutsyɔnu la ŋgɔ. (3 Mose 16:14, 15, 19) To ʋu sia dzi la, Mawu atsɔ Israel-viwo ƒe nu vɔ̃wo ake wo. Yehowa de se hã be ne ame aɖe de ade wu lã aɖe la, wòakɔ eƒe ʋu ɖe anyigba eye wòaxe ke ɖe edzi, elabena “lãwo katã ƒe agbe le woƒe ʋu me.” (3 Mose 17:11-14) Menye kɔnu dzro aɖe koe sedede mawo nye o. Ƒe alafa geɖe do ŋgɔ la, Mawu de se na Noa kple eƒe dzidzimeviwo be woagaɖu ʋu o. (1 Mose 9:3-6) Aleke nya sia ka Kristotɔwoe?

12. Aleke Paulo ɖe ƒomedodo si le ʋu kple nu vɔ̃ tsɔtsɔke dome fiae?

¹² Apostolo Paulo ɖe eme be woate ŋu atsɔ ʋu aklɔ nu vɔ̃wo ɖa esi wògblɔ be: “Wotsɔ ʋu klɔa nu sia nu kloe ŋu le Se la nu, eye ne womekɔ ʋu ɖi o la, tsɔtsɔke aɖeke menɔa anyi o.” (Hebritɔwo 9:22) Ke hã asixɔxɔ si le lãwo ƒe vɔsawo ŋu la nɔ anyi ɣeyiɣi kpui aɖe ko. Paulo gblɔ be vɔsa mawo ɖoa ŋku edzi na Israel-viwo be wonye nuvɔ̃mewo, eye wohiã na vɔsa si ƒe asixɔxɔ de ŋgɔ wu, be wòaɖe woƒe nu vɔ̃wo ɖa keŋkeŋ. Se la nye ‘nu nyui siwo ava la ƒe vɔvɔli, ke menye nuawo ŋutɔŋutɔ o.’ (Hebritɔwo 10:1-4) Ekema aleke wòanya wɔ be woatsɔ nu vɔ̃wo ake?

13. Aleke nèse le ɖokuiwò me tso ale si Yesu tsɔ asixɔxɔ si le eƒe ʋua ŋu do ɖe Yehowa ŋkume la ŋu?

¹³ Mixlẽ Efesotɔwo 1:7. Yesu ku ɖe amegbetɔwo katã ta, eye viɖe gãe eƒe vɔsakua nye na ame siwo lɔ̃ eyama kple Fofoa. (Galatiatɔwo 2:20) Ke hã nu si Yesu wɔ le eƒe tsitretsitsi megbe ye ɖe mí tso nu vɔ̃ me, abe ale si esia ƒe kpɔɖeŋu dze le nu si wowɔna le Avuléŋkekea dzi me ene. Ne nunɔlagã la yi Kɔkɔeƒewo Ƒe Kɔkɔeƒea la, ɖeko wòle abe ɖe wòdo ɖe Mawu ƒe ŋkume ene. Le afi ma la, nunɔlaa tsɔa lãawo ƒe ʋu vaa Mawu ŋkume. (3 Mose 16:11-15) Le Yesu ƒe tsitretsitsi megbe la, eyi dziƒo eye wòtsɔ asixɔxɔ si le eƒe ʋu si wokɔ ɖi ŋu la do ɖe Mawu ŋkume. (Hebritɔwo 9:6, 7, 11-14, 24-28) Aleke gbegbe míedaa akpee nye esi be woate ŋu atsɔ míaƒe nu vɔ̃wo ake mí, eye dzitsinya dzadzɛ nanɔ mía si, le esi míexɔ Yesu ƒe vɔsaa ƒe ʋu dzi se ta!

14, 15. Nu ka tae wòle vevie be míase se si Yehowa de le ʋu ŋu la gɔme ahawɔ edzi?

¹⁴ Ðewohĩ nu si tae Yehowa de se be míagaɖu ‘ʋu’ ƒomevi aɖeke o la me kɔ na wò wu azɔ. (3 Mose 17:10) Èse nu si tae ʋu nye nu kɔkɔe na Mawu nenema gbegbe ɖo la gɔmea? Ʋu le tsitre ɖi na agbe. (1 Mose 9:4) Ðikeke mele eme o be, àlɔ̃ ɖe edzi be ele be míabu ʋu abe ale si Mawu bunɛ ene ahawɔ se si wòde be míatsri ʋu la dzi. Mɔ si ko dzi míato anɔ ŋutifafa me kple Mawu ye nye be míaxɔ Yesu ƒe tafevɔsaa dzi ase ahalɔ̃ ɖe edzi be ʋu nye nu xɔasi ŋutɔ na mía Wɔla la.—Kolosetɔwo 1:19, 20.

¹⁵ Nane ate ŋu adzɔ ɖe mía dometɔ ɖe sia ɖe dzi kpata si ta wòahiã be míatso nya me nenye be míalɔ̃ woado ʋu alo ʋumenu suesuewo na mí loo, alo be woazã dɔdamɔnu siwo me wozãa ʋu le la na mí. Eya ta ele vevie be nàdo gbe ɖa na Yehowa, aku nu me ahatso nya me le nu si nàwɔ ŋu hafi nane nadzɔ kpata. Esia awɔe be dzi nanɔ ƒowò be nàtsri ʋu. Míadi gbeɖe be míaxɔ nane si ŋu Yehowa ƒo nu tsi tre ɖo ale be míado nuxaxa nɛ o! Egbea, ɖɔktawo kple ame bubuwo dea dzi ƒo na mí be míaɖe ʋu ana, kple susu be woatsɔe axɔ amewo ɖe agbe. Gake abe Mawu ƒe ame kɔkɔewo ene la, míenya be Yehowa sie gome le be wòagblɔ ale si woazã ʋui. Le eyama gbɔ la, ‘ʋu’ ƒomevi ɖe sia ɖe nye nu kɔkɔe. Eya ta ele be míaɖoe kplikpaa be míawɔ se si wòde le ʋu ŋu la dzi. Míate ŋu ato míaƒe agbe dzadzɛ nɔnɔ hã dzi aɖee afia be míedea asixɔxɔ Yesu ƒe vɔsaa ƒe ʋu ŋu. Eƒe ʋu dzi koe míate ŋu ato akpɔ nu vɔ̃ tsɔtsɔke kple agbe mavɔ.—Yohanes 3:16.

16. Nu ka tae wòle be Yehowa ƒe amewo nanɔ kɔkɔe?

¹⁶ Esi Yehowa ɖe Israel-viwo tso kluvinyenye me le Egipte la, egblɔ na wo be: “Nyee nye Yehowa, ame si kplɔ mi tso Egipte-nyigba dzi be manye miaƒe Mawu; minɔ kɔkɔe, elabena mele kɔkɔe.” (3 Mose 11:45) Yehowa di tso Israel-viwo si be woanɔ kɔkɔe, elabena eya ŋutɔ hã le kɔkɔe. Eye nu ma kee Yehowa di tso míawo hã si egbea. Mose ƒe Agbalẽ Etɔ̃lia na esia me kɔ ƒãa.

17. Aleke nèse le ɖokuiwò me tso Biblia gbalẽ si nye Mose ƒe Agbalẽ Etɔ̃lia ŋu azɔ?

¹⁷ Ðikeke mele eme o be, nu siwo me míedzro le Mose ƒe Agbalẽ Etɔ̃lia me la ɖe vi na wò. Anɔ eme be ègava kpɔ ŋudzedze ɖe Biblia gbalẽ sia ŋu geɖe wu eye èva se nu si tae wòle be míanɔ kɔkɔe la gɔme ɖe edzi. Gake nu bubu kawo hãe míate ŋu asrɔ̃ tso Mose ƒe Agbalẽ Etɔ̃lia me? Aleke Biblia gbalẽ sia ate ŋu akpe ɖe mía ŋu be míaƒe tadedeagu na Mawu nanɔ dzadzɛ? Míadzro esia me le nyati si kplɔ esia ɖo me.