Yehowa Ƒe Amewo ‘Tena Ða Le Nu Madzɔmadzɔ Wɔwɔ Gbɔ’

 1. Nu kae wɔa akpa vevi aɖe le míaƒe tadedeagu me?

ÈKPƆ woŋlɔ ŋkɔ Yehowa ɖe xɔ aɖe alo nane ŋu kpɔa? Ðikeke mele eme o be dzi dzɔ wò ŋutɔ! Nu si tae nye be Yehowa Ðasefowoe míenye, eye Mawu ƒe ŋkɔa wɔa akpa vevi aɖe le míaƒe tadedeagu me! Le xexea me godoo la, ƒuƒoƒo bubu aɖeke megali si zãa Mawu ƒe ŋkɔa abe míawo ene o. Gake míenyae be Mawu ƒe ŋkɔ si le mía ŋu la da agba gã aɖe hã ɖe mía dzi.

 2. Agba kae Mawu ƒe ŋkɔ si le mía ŋu la da ɖe mía dzi?

² Menye Yehowa Mawu ƒe ŋkɔa zazã koe ana wòakpɔ ŋudzedze ɖe mía ŋu o. Nu vevitɔe nye be míanɔ agbe ɖe eƒe nudidi dzɔdzɔewo nu. Esia tae Biblia ɖo aɖaŋu na mí Yehowa ƒe amewo be ‘míate ɖa le vɔ̃ ŋu.’ (Ps. 34:15) Apostolo Paulo na esia me kɔ nyuie esi wògblɔ be: ‘Ame sia ame si yɔa Yehowa ƒe ŋkɔ la, nete ɖa le nu madzɔmadzɔ wɔwɔ gbɔ.’ (Mixlẽ 2 Timoteo 2:19.) Amewo nya mí Ðasefowo nyuie be míeyɔa Mawu ƒe ŋkɔ Yehowa. Gake aleke míawɔ ‘aɖe asi le madzɔmadzɔnyenye ŋu,’ alo ate ɖa le nu madzɔmadzɔ wɔwɔ gbɔ?

3, 4. Nya kawo gɔmee Biblia ŋuti nunyalawo mese tututu o hena ɣeyiɣi didi aɖe, eye nu ka tae?

³ Mina míagade ŋugble le nu si ŋu Paulo nɔ nu ƒom tsoe le 2 Timoteo 2:19 esime wòzã nyagbɔgblɔ “Mawu ƒe gɔmeɖoanyi sesẽ” la ŋu. Nuŋɔŋlɔ evee dze le gɔmeɖoanyi sia ŋu. Edze ƒãa be 4 Mose 16:5 mee wòyɔ nya si dze le nuŋɔŋlɔ gbãtɔ me, si nye ‘Yehowa nya ame siwo nye etɔwo,’ la tsoe. (Kpɔ nyati si do ŋgɔ na esia.) Ke nuŋɔŋlɔ evelia, si nye ‘ame sia ame si yɔa Yehowa ƒe ŋkɔ la, nete ɖa le nu madzɔmadzɔ wɔwɔ gbɔ,’ ya ɖe? Ɣeyiɣi didi aɖee nye esia si Biblia ŋuti nunyalawo mese nya mawo gɔme tututu o. Nu ka tae?

⁴ Nya siwo Paulo zã la fia be teƒe bubu aɖee wòyɔ nya mawo tsoe. Gake mawunyakpukpui aɖeke mele Hebri Ŋɔŋlɔawo me si sɔ kple Paulo ƒe nyawo o. Eya ta nu kae dzie apostoloa nɔ susu hem yi esi wògblɔ be: ‘Ame sia ame si yɔa Yehowa ƒe ŋkɔ la, nete ɖa le nu madzɔmadzɔ wɔwɔ gbɔ’? Esi Paulo yɔ nya tso 4 Mose ta 16, afi si woƒo nu tso Korax ƒe aglãdzedze ŋu le, me teti ye wògblɔ nya mawo. Ðe wòanye be nuŋɔŋlɔ evelia sia hã ku ɖe ame mawo ƒe aglãdzedzea ke ŋua?

5-7. Anɔ eme be Mose ƒe ŋkekea me nudzɔdzɔ kawo dzie Paulo nɔ susu hem yi le 2 Timoteo 2:19? (Kpɔ nɔnɔmetata si le nyati sia ƒe gɔmedzedze.)

⁵ Biblia gblɔ be Datan kple Abiram, siwo nye Eliab viŋutsuwo, hã wɔ ɖeka kple Korax le aglãdzedze ɖe Mose kple Aron ŋu me. (4 Mose 16:1-5) Woɖoe koŋ gbe bubudede Mose ŋu, eye wotsi tsitre ɖe ɖoƒe si Mawu nɛ ŋu. Aglãdzela mawo siwo kpɔtɔ nɔ Yehowa ƒe amewo dome la nye afɔku na nuteƒewɔlawo. Eya ta esi ɣeyiɣia de be Yehowa nana vovototo si le esubɔla wɔnuteƒewo kple aglãdzelawo dome nadze ƒãa la, ede se aɖe si me kɔ nyuie.

⁶ Biblia gblɔ be: “Yehowa ƒo nu kple Mose bena: Gblɔ na ha la bena: Mide megbe le Korax, Datan kple Abiram ƒe aƒewo ŋu! Eye Mose tso yi Datan kple Abiram gbɔ, eye Israel-ame tsitsiwo kplɔe ɖo. Eye wògblɔ na ha la bena: Mite ɖa le ame mavɔ̃mawu siawo ƒe agbadɔwo gbɔ, eye migaka asi woƒe nu aɖeke ŋu, bena miawo hã miagatsrɔ̃ le woƒe nu vɔ̃wo ta o. Tete wode megbe le Korax, Datan kple Abiram ƒe aƒewo ŋu.” (4 Mose 16:23-27) Yehowa tsrɔ̃ aglãdzela mawo katã. Gake nuteƒewɔlawo ya tsi agbe le esi wote ɖa le nu madzɔmadzɔ wɔla mawo gbɔ ta.

⁷ Yehowa kpɔa dziwo me vavã! Edea dzesi ame siwo wɔa nuteƒe nɛ. Gake ehiã be nuteƒewɔla siawo hã nawɔ kaba aɖe wo ɖokui ɖa tso nu madzɔmadzɔ wɔlawo gbɔ. Eya ta anɔ eme be nudzɔdzɔ si ŋu nya woŋlɔ ɖe 4 Mose 16:5, 23-27 dzie Paulo nɔ susu hem yi esi wògblɔ be: ‘Ame sia ame si yɔa Yehowa ƒe ŋkɔ la, nete ɖa le nu madzɔmadzɔ wɔwɔ gbɔ.’ Nyataƒoƒo sia sɔ, elabena ewɔ ɖeka kple nya si Paulo gblɔ, be: ‘Yehowa nya ame siwo nye etɔwo.’​—2 Tim. 2:19.

 8. Nu ka tae Yehowa ƒe ŋkɔa zazã alo Kristo hamea me nɔnɔ ɖeɖe mesu o?

⁸ Paulo he susu yi Mose ƒe ŋkekea me nudzɔdzɔ ma dzi tsɔ ɖo ŋku edzi na Timoteo be ehiã be wòaɖe afɔ kaba atsɔ akpɔ eya kple Yehowa dome ƒomedodo xɔasia ta. Kristo hamea me nɔnɔ ɖeɖe mesu o, abe ale si ko wòhiã be ame siwo nɔ anyi le Mose ƒe ŋkekea me nawɔ nu geɖe wu Yehowa ƒe ŋkɔa yɔyɔ ko ene. Ele be Mawu subɔla wɔnuteƒewo katã nawɔ kaba ate ɖa le nu madzɔmadzɔ wɔwɔ gbɔ. Nu kae esia bia be Timoteo nawɔ? Eye nu kawoe Yehowa ƒe ame siwo li egbea ate ŋu asrɔ̃ tso Paulo ƒe nuxlɔ̃amea me?

 9. Aleke ‘bometsinyahehe siwo me susu aɖeke mele o’ nɔ nu gblẽm le Kristotɔ gbãtɔwo ŋui?

⁹ Mawu ƒe Nya la ɖo aɖaŋu na mí tẽe ku ɖe nu madzɔmadzɔ wɔwɔ aɖewo siwo gbɔ wòle be Kristotɔwo nate ɖa le alo agbe nu le ŋu. Le kpɔɖeŋu me, Paulo gblɔ na Timoteo be “woaganɔ dzre wɔm le nyawo ŋu o,” eye be ‘woagbe dzeɖoɖo ƒuƒluwo.’ (Mixlẽ 2 Timoteo 2:14, 16, 23.) Hamea me tɔ aɖewo nɔ xɔsegbelawo ƒe nufiafiawo dom ɖe ŋgɔ. Eye ewɔ abe ame aɖewo hã nɔ nya siwo hea nyaʋiʋliwo vanɛ la dom ɖa ene. Ne woƒe nya mawo metsi tre ɖe Ŋɔŋlɔawo ŋu o hã la, wodea mama nɔviwo dome. Wohea nyahehe kple nyaʋiʋliwo vanɛ, si dea hamea ƒe ɖekawɔwɔ afɔku me. Esia tae Paulo te gbe ɖe edzi be ‘woagbe bometsinyahehe siwo me susu aɖeke mele o’ ɖo.

10. Nu kae wòle be míawɔ ne xɔsegbelawo do woƒe nufiafia ɖe mía gbɔ?

¹⁰ Egbea, mebɔ be míakpɔ xɔsegbelawo le hamea me o. Ke hã ne ame aɖe do nufiafia siwo mesɔ ɖe Ŋɔŋlɔawo nu o ɖa, afi ka kee nufiafia mawo ɖatso o la, ele be míagbe wo enumake. Susu manɔ eme be míanɔ nya hem kple xɔsegbelawo ŋutɔ tẽe, alo anɔ nu me ɖem na wo to Internet dzi, alo to mɔ bubu aɖe nu o. Ne míaƒe taɖodzinue nye be míakpe ɖe ame mawo ŋu gɔ̃ hã la, dzeɖoɖo kpli wo nye nu si tsi tre ɖe aɖaŋu si Ŋɔŋlɔawo ɖo na mí ŋu. Esi míenye Yehowa subɔlawo ta la, míetena ɖa le xɔsegbelawo ŋu, ɛ̃, míeƒoa asa na wo keŋkeŋ.

11. Nu kae ate ŋu ahe ‘nyaʋiʋliwo’ va hamea me, eye kpɔɖeŋu nyui kae wòle be Kristotɔ hamemetsitsiwo naɖo?

¹¹ Menye xɔsegbelawo ƒe nyawo koe ate ŋu agblẽ hamea ƒe ŋutifafa me o. Nu bubuwo hã li. Le kpɔɖeŋu me, ne susu vovovowo le nɔviwo si ku ɖe modzakaɖeɖe siwo sɔ na Kristotɔwo ŋu la, esia ate ŋu ahe ‘bometsinyahehe siwo me susu aɖeke mele o’ vɛ. Ne nɔvi aɖewo le modzakaɖeɖe aɖe si tsi tre ɖe Yehowa ƒe nudidi dzɔdzɔewo ŋu dom ɖe ŋgɔ la, mele be Kristotɔ hamemetsitsiwo naŋe aɖaba aƒu edzi le esi womedi be nyaʋiʋli naɖo nɔviwo dome o ta ko o. (Ps. 11:5; Ef. 5:3-5) Ke hã hamemetsitsiwo ƒoa asa na woawo ŋutɔwo ƒe susu dodo ɖe ŋgɔ. Kristotɔ dzikpɔlawo wɔna ɖe Ŋɔŋlɔawo me nuxlɔ̃ame sia dzi be: “Mikplɔ Mawu ƒe alẽha si le miaƒe dzikpɔkpɔ te la, . . . menye abe ame siwo ɖua aƒetɔ ɖe ame siwo nye Mawu ƒe domenyinu la dzi ene o, ke boŋ abe ame siwo zua kpɔɖeŋu na alẽha la ene.”​—1 Pet. 5:2, 3; mixlẽ 2 Korintotɔwo 1:24.

12, 13. (a) Aleke Yehowa Ðasefowo wɔna tiaa modzakaɖeɖe siwo sɔ, eye Biblia me mɔfiame kawo dzie wowɔna ɖo? (b) Aleke míate ŋu awɔ mɔfiame si le memama 12 lia me dzi le ame ŋutɔ ƒe nya bubuwo gome?

¹² Habɔbɔa menɔa filmwo, video dzi fefewo, agbalẽwo, alo hadzidziwo me tom be woayɔ esiwo sɔ alo esiwo míaƒo asa na la na mí o. Nu ka ta? Elabe Biblia de dzi ƒo na Mawu ƒe amewo katã be woana hehe “woƒe nugɔmesese ƒe ŋutetewo . . . bene woade vovototo nyui kple vɔ̃ dome.” (Heb. 5:14) Mɔfiame veviwo le Ŋɔŋlɔawo me siwo ate ŋu akpe ɖe mí Kristotɔwo ŋu míatia modzakaɖeɖe siwo sɔ. Le míaƒe agbemenuwɔna ɖe sia ɖe me la, míaƒe taɖodzinue nye be ‘míakpɔ egbɔ be nu siwo míewɔna la dzea Aƒetɔ la ŋu.’ (Ef. 5:10) Biblia na míenya be wona ŋusẽ ƒome ƒe tawo be woakpɔ woƒe ƒomea ta, eya ta woate ŋu atiae be yewomaɖe mɔ ɖe modzakaɖeɖe aɖewo ŋu le yewoƒe aƒewo me o.a​—1 Kor. 11:3; Ef. 6:1-4.

¹³ Menye modzakaɖeɖewo ŋu koe mɔfiame vevi siwo le Biblia me siwo me míedzro fifia la ku ɖo o. Susu vovovowo ate ŋu anɔ mía si ku ɖe awudodo kple dzadzraɖo, lãmesẽ kple nuɖuɖu kpakple ame ŋutɔ ƒe nya bubuwo ŋu. Ne ame aɖewo dina be yewoazi yewoƒe susu ɖe nɔvi bubuwo dzi la, esia hã ate ŋu ahe nyaʋiʋliwo vɛ. Ne tiatia si Kristotɔ aɖe wɔ meda Ŋɔŋlɔawo me gɔmeɖose aɖeke dzi o la, mehiã be Yehowa subɔlawo nanɔ nya hem le nya siawo ŋu o. Biblia gblɔ be: “Mele be Aƒetɔ la ƒe kluvi nawɔ dzre o, ke boŋ ele be wòafa tu na amewo katã.”​—2 Tim. 2:24.

14. Kpɔɖeŋu kae Paulo wɔ tsɔ te gbe ɖe ale si wòle vevie be míatsri hadede vɔ̃wo dzi?

¹⁴ Mɔ bubu ka nue mí ame siwo yɔa Yehowa ƒe ŋkɔ ‘míate ɖa le nu madzɔmadzɔ wɔwɔ gbɔ’ le? Eyae nye be míatsri hadede kplikplikpli kple nu madzɔmadzɔ wɔlawo. Eɖe dzesi be Paulo gawɔ kpɔɖeŋu bubu aɖe le “Mawu ƒe gɔmeɖoanyi sesẽ” ŋuti kpɔɖeŋua yome. Egblɔ be: “Le aƒe gã me la, menye nugoe siwo wotsɔ sika kple klosalo wɔ la ɖeɖe koe nɔa anyi o, ke boŋ esiwo wotsɔ ati kple anyi wɔ hã nɔa anyi, ɖewo li siwo woazã na nu si ŋu bubu le, gake ɖewo hã li siwo woazã na nu si ŋu bubu mele o.” (2 Tim. 2:20, 21) Eyome exlɔ̃ nu Kristotɔwo be ‘woate ɖe aga tso’ “nugoe” siwo wozãna na “nu si ŋu bubu mele o” gbɔ.

15, 16. Nu kae míate ŋu asrɔ̃ tso “aƒe gã” ƒe kpɔɖeŋua me?

¹⁵ Aleke míase Paulo ƒe kpɔɖeŋu sia gɔme? Le eƒe kpɔɖeŋunyagbɔgblɔ sia me la, etsɔ Kristo hamea sɔ kple “aƒe gã,” eye wòtsɔ aƒea me tɔ ɖekaɖekawo sɔ kple “nugoewo,” alo aƒea me nuwo. Ate ŋu adzɔ be aƒea me nu aɖewo ŋu makɔ o eye dɔlékuiwo nanɔ wo ŋu. Eya ta aƒea tɔ ɖea nu siwo ŋu kɔ, abe nuɖazewo ene, la ɖe vovo tso nu siwo ŋu mekɔ o gbɔ.

¹⁶ Nenema kee Yehowa ƒe ame siwo li egbea hã dzea agbagba be yewoanɔ agbe dzadzɛ, eye wotsria hadede kplikplikpli kple hamea me tɔ siwo ɖonɛ koŋ gbea Yehowa ƒe nudidiwo dzi wɔwɔ. (Mixlẽ 1 Korintotɔwo 15:33.) Ne ele be míatsri hadede vɔ̃wo le hamea me la, ke ehiã vevie wu be ‘míate mía ɖokui ɖa’ alo míatsri hadede kplikplikpli kple ame siwo le hamea godo. Elabena wo dometɔ geɖe nye ‘galɔ̃lawo, ame maɖoto dzilawo, ame mawɔnuteƒewo, ameŋugblẽlawo, ame wɔadãwo, ame siwo melɔ̃a nu nyui o, yomemɔfialawo, ame siwo lɔ̃a dzidzɔkpɔkpɔ le esi teƒe be woalɔ̃ Mawu.’​—2 Tim. 3:1-5.

17. Aleke Israel vi wɔnuteƒewo wɔ nui esi wobia tso wo si be woade megbe le nu madzɔmadzɔ wɔlawo ŋu?

¹⁷ Biblia na míenya be esi Yehowa de se na Israel viwo be ‘woade megbe le Korax, Datan kple Abiram ƒe aƒewo ŋu’ la, wowɔ esia enumake! (4 Mose 16:24, 27) Womehe ɖe megbe kura o. Wote ɖa le aglãdzela mawo ƒe agbadɔwo gbɔ le akpa sia akpa. Nuteƒewɔlaawo medi be yewoade yewoƒe agbe afɔku me le mɔ aɖeke nu o. Wowɔ ɖe mɔfiameawo dzi tso dzi blibo me. Wona wòdze ƒãa be yewole Yehowa ƒe akpa dzi, eye yewogbe nu madzɔmadzɔ wɔlawo ƒe ha la keŋkeŋ. Nu kawoe míate ŋu asrɔ̃ tso esia me?

18. Nu kae nɔ susu me na Paulo esi wòxlɔ̃ nu Timoteo be ‘wòasi le sɔhɛmenɔɣi ƒe nudzodzrowo nu’?

¹⁸ Ele be míatso enumake ɖe nu sia nu si wòle be míawɔ atsɔ akpɔ mía kple Yehowa dome ƒomedodo ta la ŋu. Esiae nɔ susu me na Paulo esi wòxlɔ̃ nu Timoteo be ‘wòasi le sɔhɛmenɔɣi ƒe nudzodzrowo nu.’ (2 Tim. 2:22) Ɣemaɣi la, Timoteo tsi, eye anɔ eme be exɔ ƒe 30 to eŋu. Ke hã ame tsitsiwo hã ate ŋu awɔ ɖevinu ahawɔ “sɔhɛmenɔɣi ƒe nudzodzrowo” dzi. Ele be Timoteo ‘nasi’ le dzodzro mawo tɔgbi nu. Ne míagblɔe bubui la, ele be Timoteo ‘nate ɖa le nu madzɔmadzɔ wɔwɔ gbɔ.’ Yesu ɖo aɖaŋu sia tɔgbi esi wògblɔ be: “Ne wò ŋku zua nukikli na wò la, hoe le [eto me], eye nàtsɔe aƒu gbe.” (Mat. 18:9) Egbea, Kristotɔ siwo lɔ̃ faa be yewoawɔ ɖe nuxlɔ̃ame sia dzi la tsona kpla ɖe nu sia nu si ate ŋu agblẽ woa kple Yehowa dome la ɖɔɖɔɖo ŋu.

19. Afɔ kae nɔvi aɖewo ɖe be woagawɔ naneke si agblẽ woa kple Yehowa dome o?

¹⁹ Kristotɔ aɖewo siwo ŋu ahanono ƒe kuxi nɔ tsã hafi wova zu Ðasefowo la tso nya me be yewomagano aha sesẽ aɖeke kura o. Nɔvi aɖewo siwo ŋu gbɔdzɔgbɔdzɔ aɖewo ƒomevi le la ɖoe be yewoaƒo asa na modzakaɖeɖe ɖe sia ɖe si ate ŋu anyɔ dzodzro vɔ̃ ɖe yewo me. (Ps. 101:3) Le kpɔɖeŋu me, hafi nɔviŋutsu aɖe nava zu Ðasefo la, elɔ̃a ɣeɖuƒe siwo agbe ƒaƒã nɔnɔ yia edzi le la dede. Gake esi wòva srɔ̃ nyateƒea la, etso nya me be yemagaɖu ɣe azɔ o, eɖanye Ðasefowoe le modzaka ɖem o, elabena medi be dzodzro vɔ̃wo nagava nyɔ ɖe ye me alo ava susu me na ye o. Ele eme baa be womede se be Kristotɔwo nagano aha muame, aɖu ɣe, alo awɔ nu bubu siwo menye nu gbegblẽ le wo ɖokui si o ya. Gake wodi tso mí katã si be míakpɔ nyuie be naneke nagagblẽ mía kple Yehowa dome ƒomedodoa me o.

20. Togbɔ be menɔa bɔbɔe ɣesiaɣi be ‘woate ɖa le nu madzɔmadzɔ wɔwɔ gbɔ’ o hã la, nu kae faa akɔ na mí?

²⁰ Mawu ƒe ŋkɔ si le mía ŋu la da agba gã aɖe ɖe mía dzi. Ele be ‘míate ɖa le nu madzɔmadzɔ wɔwɔ gbɔ,’ eye ‘míate ɖa le vɔ̃ ŋu.’ (Ps. 34:15) Nyateƒee wònye be esia wɔwɔ menɔa bɔbɔe ɣesiaɣi o. Gake efaa akɔ na mí ŋutɔ be míanyae be Yehowa lɔ̃a “ame siwo nye etɔ” siwo wɔa eƒe nudidi dzɔdzɔewo dzi ɣesiaɣi.​—2 Tim. 2:19; mixlẽ 2 Kronika 16:9a.