Sixem—Du si Le Bali Me

SIXEM-DU le Ebal-to kple Gerizim-to dome, le keke anyigba si Mawu tia na eƒe dukɔ la ƒe titina ke. Afisiae—ade ƒe akpe ene kloe fifia—Yehowa do ŋugbe na Abraham le be: “Wò dzidzimeviwo matsɔ anyigba sia ana.”—Mose I, 12:6, 7.

Le ŋugbedodo sia nu la, Abraham tɔgbuiyɔvi Yakob va tu agbadɔ ɖe Sixem eye wòtu vɔsamlekpui si wòyɔ be “Mawu, si enye Israel ƒe Mawu.” Ðewohĩ Yakob ɖe vudo si woava yɔ le ƒe alafa geɖe megbe be “Yakob ƒe vudo” la ɖe nuto sia me be woadu tsi le eme na eƒe ƒometɔwo kple lãhawo.—Mose I, 33:18-20, NW, etenuŋɔŋlɔ; Yohanes 4:5, 6, 12.

Gake menye Yakob ƒe ƒometɔwo katãe tsɔ dzo ɖe tadedeagu vavãtɔ ŋu o. Vianyɔnu Dina, va dze xɔ̃ Kanaan-nyɔnuvi siwo tso Sixem. Dina si kpɔtɔ nye ɖetugbi ɣemaɣi la dzona le eƒe ƒometɔwo ƒe agbadɔ siwo nye dedienɔƒe la me yia du sia si te ɖe wo ŋu me, ɖanɔ xɔlɔ̃wo dzem le afima.

Aleke du sia me ɖekakpuiwo abu ɖetugbi nɔaƒe sia si vaa woƒe dua me ɣesiaɣi—amesi anɔ eme be ame aɖeke medoa evelia nɛ o? Fiavi aɖe “kpɔe, eye wòlée de asi eŋu, hegblẽe sesẽe.” Nukata Dina di nya na eɖokui yi ɖade ha kple Kanaanitɔ agbegbegblẽnɔla siawo? Ðe wòanye be ese le eɖokui me be ehiã be yeazɔ kple nyɔnuvi siwo nye yeƒe hanuhɛwoa? Anye tosẽlae wònye eye wòdia ɖokuisinɔnɔ abe nɔviaŋutsuwo dometɔ aɖewo enea? Xlẽ nuŋlɔɖi si le Mose ƒe Agbalẽ Gbãtɔ me, eye nàdze agbagba akpɔ alesi Yakob kple Lea axa nu eye ŋu akpe woe le dzɔgbevɔ̃e si do tso wo vinyɔnua ƒe Sixem yiyi me la ɖa.—Mose I, 34:1-31; 49:5-7; kpɔ Eŋlisigbe me Gbetakpɔxɔ, June 15, 1985 tɔ, axa 31 hã.

Le ƒe 300 kloe megbe la, teokrasi mɔfiamewo dzi mawɔmawɔ me tsonuwo ƒe nya la gafɔ ɖe te ake. Yosua wɔ takpekpe siwo dzi woɖoa ŋkui wu le Israel ƒe ŋutinya me la dometɔ ɖeka le Sixem. Kpɔ alesi nɔnɔmea nɔ le balia me ɖa le susu me. Ame miliɔn ɖeka kple edzivɔ—ŋutsuwo, nyɔnuwo, kple ɖeviwo—siwo tso Israel-to ade me la tsi tre ɖe Gerizim-toa ŋgɔ. Ame xexlẽme ma ke lɔƒo siwo nye to ade bubuawo me tɔwo tsi tre ɖe Ebal-to ŋgɔ le balia ƒe akpa kemɛ.a Eye le agame le afima la, nunɔlawo kple Yosua tɔ ɖe nubablaɖaka la xa le Israel-viwo ƒe ha eveawo dome. Nukpɔkpɔ kae nye si!—Yosua 8:30-33.

To eve siawo siwo kɔ ta gbɔ ameha gbogbo sia ŋu la nye vovototo gã si le nyonyo kple kuɖiɖi dome. Gerizim tame de ama eye wòwɔ vlɔvlɔvlɔ, gake Ebal tɔ fu kpii eye wòƒu kplakplakpla. Àte ŋu akpɔ alesi teƒea atɔ zii esime Israel-viwo nɔ Yosua lalam be wòava ƒo nua? Gbeɖiɖi ɖesiaɖe gagbugbɔ ɖina sesĩe le teƒe sia si nye dzɔdzɔmefefewɔƒe la.

Le gaƒoƒo ene va ɖo ade siwo Yosua tsɔ xlẽ ‘Mose ƒe segbalẽa’ me la, dukɔa hã kpɔ gome le eme. (Yosua 8:34, 35) Anɔ eme be Israel-vi siwo nɔ Gerizim ŋgɔ la gblɔna Amen! alo Neva me nenema! ne wogblɔ yayranya ɖesiaɖe vɔ, eye amesiwo le Ebal ŋgɔ gblɔa Neva me nenema! tsɔ ƒua fiƒodenya ɖesiaɖe dzi. Ðewohĩ alesi Ebal-toa nye kuɖiɖinyigbae la ɖoa ŋku tomaɖomaɖo me tsonu dziŋɔwo dzi na dukɔa.

Yosua gblɔ be: “Amesi do vlo fofoa kple dada la, aɖi eŋu!” Ame miliɔn ɖeka kple edzivɔ tsɔ nusɔsɔe ɖo eŋu be: “Neva me nenema!” Yosua lala be ŋuɖoɖo hoo sia natɔ te vɔ hafi wògayi edzi be: “Amesi ŋe ehavi ƒe liƒo ɖe eme la, aɖi ŋu!” Fifia hã, to ade siwo ŋu amedzroviwo kpe ɖo la do ɣli be: “Neva me nenema!” (Mose V, 27:16, 17) Ne ɖe nènɔ afima la, ɖe nàŋlɔ takpekpe ma si wowɔ le toawo dome bea? Ðe toɖoɖo ƒe vevienyenye matsi susu me na wò ɖikaa oa?

Le ƒe 20 megbe esi wòsusɔ vie Yosua naku la, egaƒo dukɔa nu ƒu ɖe Sixem bene woado ŋusẽ woƒe tameɖoɖoa. Etsɔ tiatia si wòle be amesiame nawɔ la ɖo wo ŋkume. Egblɔ be: “Mitia, amesi subɔ ge miala, egbea . . . Ke mía kple nye aƒe ya míasubɔ Yehowa!” (Yosua 24:1, 15) Edze ƒã be takpekpe siawo siwo tua xɔse ɖo siwo wowɔ le Sixem la wɔ dɔ ɖe ame dzi ŋutɔ. Ƒe geɖe le Yosua ƒe ku megbe la, Israel-viwo srɔ̃ eƒe nuteƒewɔwɔ.—Yosua 24:31.

Anɔ ƒe alafa 15 megbe la, woɖo dze dodzidzɔname aɖe esime Yesu nɔ ɖiɖim ɖe eme le Gerizim-toa ƒe vɔvɔ̃li te. Mɔ didi zɔzɔ te ɖeɖi Yesu ŋu ale be wòbɔbɔ nɔ Yakob ƒe vudo to hafi Samaria-nyɔnu aɖe si lé tɔmedeze ɖe asi la va do. Ewɔ nuku na nyɔnua ale gbegbe esime Yesu bia tsinonoe, elabena Yudatɔwo meƒoa nu kple Samariatɔwo o, kaka wòazu be woano tsi le woƒe tsinonuwo nu. (Yohanes 4:5-9) Nya siwo Yesu gagblɔ la gawɔ nuku nɛ wu kura.

“Amesiame, si le tsi sia ƒe ɖe nom la, tsikɔ agawui; ke amesi ke lano tsi, si nye manae ƒe ɖe la, tsikɔ megale eya wu ge akpɔ o vaseɖe mavɔmavɔ me; elabena tsi, si nye manae la, latrɔ azu tsivudo le eme, esi anɔ dzidzim ayi ɖe agbe mavɔ me.” (Yohanes 4:13, 14) Kpɔ alesi nyɔnua atsi dzi ɖe ŋugbedodo ma ŋui ɖa, elabena tsidudu tso vudo sia me nye dɔ sesẽ. Yesu gaɖe eme nɛ be togbɔ be Yerusalem kple Gerizim-toa xɔ ŋkɔ veviwo le ŋutinya me hã la, wo dometɔ aɖeke menye tadeaguƒe si hiã hafi woate ɖe Mawu ŋu o. Dzime ƒe nɔnɔme kple agbenɔnɔe le vevie, ke menye teƒe aɖeke ye o. Egblɔ be: “Nyateƒegbedoɖalawo ado gbe ɖa na Fofo la le gbɔgbɔ kple nyateƒe me; elabena Fofo la dia gbedoɖala siawo tɔgbe.” (Yohanes 4:23) Aleke nya siawo anya fa akɔe nye si! Wogade dzi ƒo na amewo le bali sia ke me be woasubɔ Yehowa.

Egbea la, Nablus ye nye du le blema Sixem ƒe gligbagbãwo xa. Gerizim kple Ebal towo gaxɔ balia me kokoko, eye wonye nusiwo dzɔ va yi ŋuti ɖaseɖinuwo. Woate ŋu agayi Yakob ƒe vudo si le to siawo gɔme la gbɔ kokoko. Esi míele ŋugble dem le nusiwo dzɔ le afima ŋu la, míaɖo ŋku alesi wòle vevie be míalé tadedeagu vavãtɔ me ɖe asi dzi, abe alesi Yosua kple Yesu fia mí be míawɔe ene.—Tsɔe sɔ kple Yesaya 2:2, 3.

[Etenuŋɔŋlɔ]

[Nɔnɔmetata Tsoƒe si le axa 31]

Pictorial Archive (Near Eastern History) Est.