Kpe Ðe Viwò Ƒewuivi Ŋu be Agbe Nadze Edzi Nɛ

1, 2. Kuxi kple dzidzɔ kawoe ƒewuiwo hena vɛ?

ƑEWUIVI ƒe amesinɔnɔ le aƒeme to vovo na ƒe atɔ̃ vi alo ƒe ewo vi gɔ̃ hã ƒe amesinɔnɔ sasasã. Ƒewuiwo ŋutɔ me fukpekpe kple kuxiwo li, gake woate ŋu ahe dzidzɔ kple teƒeɖoɖowo hã vɛ. Kpɔɖeŋuwo, abe Yosef, Dawid, Yosiya, kple Timoteo tɔ ene, fia be sɔhɛwo ate ŋu anɔ agbe si ana woaɖo ŋu ɖe wo ŋu eye ƒomedodo nyui nanɔ wo kple Yehowa dome. (Mose I, 37:2-11; Samuel I, 16:11-13; Fiawo II, 22:3-7; Dɔwɔwɔwo 16:1, 2) Egbea ƒewuivi geɖe hã ɖo kpe nya sia ke ƒe nyateƒenyenye dzi. Anɔ eme be ènya wo dometɔ aɖewo.

² Gake ƒewuiwo nyea tɔtɔƒewo na wo dometɔ aɖewo. Ƒewuiviwo toa seselelãme nyui kple vɔ̃wo me. Ðekakpuivi kple ɖetugbivi ƒewuiviwo adi be woana ablɔɖe geɖe wu yewo ne yewoanɔ yewo ɖokui si, eye ɖewohĩ woadi be yewoatsi tre ɖe yewo dzilawo ƒe mɔxeɖenuwo ŋu. Gake sɔhɛ siawo gakpɔtɔ nye amesiwo si nuteƒekpɔkpɔ boo aɖeke mesu haɖe o eye wo dzilawo ƒe lɔlɔ̃ kple kpekpeɖeŋu dzigbɔɖitɔe gahiã wo kokoko. Ẽ, ƒewuiwo ate ŋu anye dzidzɔƒewo, gake woagate ŋu atɔtɔ ame hã—woana dzilawo kple ƒewuiviawo siaa natɔtɔ. Aleke woawɔ akpe ɖe sɔhɛwo ŋu le ƒe siawo me?

 3. Mɔ ka nue dzilawo ate ŋu ana agbe me mɔnukpɔkpɔ nyui wo vi ƒewuiviwo le?

³ Dzila siwo wɔna ɖe Biblia ƒe aɖaŋuɖoɖo dzi la naa mɔnukpɔkpɔ nyuitɔ kekeake si woate ŋui la wo vi ƒewuiviwo bene woate ŋu ato nɔnɔme sesẽ mawo me dzidzedzetɔe ava zu ame tsitsi ɖotawo. Le dukɔ ɖesiaɖe me kple le ɣeyiɣi ɖesiaɖe me la, nu dze edzi nyuie na dzila kple ƒewuivi siwo tsɔ Biblia ƒe gɔmeɖosewo wɔ dɔe ɖekae.—Psalmo 119:1.

 4. Nukatae dɔmenyawo gbɔgblɔ hiã vevietɔ le ƒewuiwo me?

⁴ Biblia gblɔ be: “Afisi adaŋudede mele o la, tameɖoɖowo tsia akpo dzi.” (Lododowo 15:22) Ne ame ƒe dɔmenyawo gbɔgblɔ hiã le ɣeyiɣi si me ɖeviawo nɔ sue la, ƒewuiwo me koŋ ye wògahiã le vevie wu—esime wòate ŋu adzɔ be ɖeviawo manɔ aƒeme ɣeyiɣi didi boo o ke woanɔ wo xɔlɔ̃ sukuhatiwo alo woƒe zɔhɛ bubuwo gbɔ wu. Ne womegblɔa ame ƒe dɔmenyawo o—dzeɖoɖo faa nanekemaɣlamaɣlae mele ɖeviwo kple dzilawo dome o—la, ƒewuiviwo ate ŋu azu amedzrowo le aƒeme. Eyata aleke woate ŋu awɔ be dzeɖoɖomɔnuwo nanɔ ʋuʋu ɖi?

 5. Aleke wode dzi ƒo na ƒewuiviwo be woabu dzeɖoɖo kple wo dzilawoe?

⁵ Ele be ƒewuiviawo kple wo dzilawo siaa nawɔ woƒe akpa dzi le nya sia me. Ele eme baa be ate ŋu asesẽ na ƒewuiviwo be woaɖo dze kple wo dzilawo wu esime wonɔ sue ya. Gake miɖo ŋku edzi be “ne kplɔla meli o la, dukɔa yia to, ke ɖeɖe toa adaŋudela geɖewo dzi.” (Lododowo 11:14) Nya siawo ku ɖe amesiame ŋu, eku ɖe ɖeviwo kple ame tsitsiwo siaa ŋu. Ƒewuivi siwo nya esia la ase egɔme be yewogahiã mɔfiafia si me aɖaŋudzedze le kokoko, elabena yewole ŋgɔ dzem kuxi siwo sesẽ fifia wu tsã. Ele be woakpɔe adze sii be yewo dzilawo dze nyuie aɖo aɖaŋu na yewo elabena wokpɔ nuteƒe le agbe me wu yewo eye wotsɔ ɖe le yewo me lɔlɔ̃tɔe ƒe geɖe. Eyata ƒewuivi nyanuwo matrɔ megbe de wo dzilawo le woƒe agbemeɣeyiɣi sia me o.

 6. Nukae anye dzila nyanu siwo lɔ̃a wo viwo ƒe nɔnɔme ɖe dzeɖoɖo kple wo vi ƒewuiviwo ŋu?

⁶ Be dzeɖoɖo faa nanɔ anyi la, efia be dzila la nadze agbagba vevie anɔ anyi ne ƒewuivi la di be yeaɖo dze kplii. Ne dzilae nènye la, ke dze agbagba be ne eglo la, le gowòme ya la, dzeɖoɖomɔnu nanɔ ʋuʋu ɖi. Esia wɔwɔ manɔ bɔbɔe o. Biblia gblɔ be “ɖoɖoeziɣi li, eye nuƒoɣi li.” (Nyagblɔla 3:7) Ne viwò si nye ƒewuivi se le eɖokui me be nuƒoɣi ɖo na ye la, ɖewohĩ ɣemaɣie anye wò ya wò ɖoɖoeziɣi. Ðewohĩ èɖo ɣeyiɣi ma ɖi na ɖokuisinusɔsrɔ̃, ɖiɖiɖeme, alo dɔwɔwɔ le aƒea me. Ke hã ne viwòa di be yeagblɔ nya aɖe na wò la, dze agbagba nàtrɔ asi le wò ɖoɖowɔɖiawo ŋu ne nàse nya si le esi la nɛ. Ne menye nenema o magadi be yeagblɔ yeƒe nya na wò ake o. Ðo ŋku Yesu ƒe kpɔɖeŋu la dzi. Ɣeaɖeɣi la, eɖo ɣeyiɣi aɖe ɖi be yeagbɔ ɖe eme. Gake esi amehawo va ƒo zi ɖe eŋu be yewoase eƒe nyawo la, eɖe asi le gbɔɖemea ŋu eye wòdze nufiafia wo gɔme. (Marko 6:30-34) Ƒewuivi akpa gãtɔ nya be vovo mele yewo dzilawo ŋu o, gake ehiã be wo dzilawo naka ɖe edzi na wo be yewoli na wo ne wohiã yewoƒe kpekpeɖeŋu. Eyata tsɔ ɖokuiwò na wo eye nàse nu gɔme na wo.

 7. Nukae wòle be dzilawo natsri?

⁷ Dze agbagba nàɖo ŋku alesi wònɔ esime nènye ƒewuivi la dzi, eye mègaɖe asi le nukokoedodoname ƒe nɔnɔme si le asiwò la ŋu o! Ehiã be dzilawo nase vivi na woƒe anyinɔnɔ kple wo viwo. Ne vovoɣi aɖe va la, aleke dzilawo zãnɛ? Ne wozãa woƒe vovoɣiwo ɣesiaɣi tsɔ wɔa nusiwo me womedea woƒe ƒomeae o la, madidi hafi wo vi ƒewuiviwo nakpɔe adze sii o. Ne ƒewuiviwo va tsɔe be yewoƒe sukuhati xɔlɔ̃wo bua yewo ŋu wu yewo dzilawo la, woado go kuxiwo godoo.

 8. Aleke woawɔ aƒã ŋudzedzekpɔkpɔ ɖe anukwareɖiɖi, dɔsesẽwɔwɔ, kple agbenɔnɔ si sɔ ŋu ɖe ɖeviwo me?

⁸ Ne dzilawo meƒã ŋudzedzekpɔkpɔ ɖe nyateƒetoto kple dɔsesẽwɔwɔ ŋu ɖe wo viwo me haɖe o la, ke ele be woadze agbagba ɖesiaɖe aƒãe ɖe wo me le woƒe ƒewuiwo me. (Tesalonikatɔwo I, 4:11; Tesalonikatɔwo II, 3:10) Ele vevie ale gbegbe hã be woakpɔ egbɔ be yewo viwo lɔ̃ ɖe agbe nyui kple agbe dzadzɛ nɔnɔ ƒe vevienyenye dzi tso dzi blibo me. (Lododowo 20:11) Dzila ŋutɔ ƒe kpɔɖeŋuɖoɖo dzie wòtona fiaa nu geɖe le nusiawo gome. Abe alesi ‘nyɔnuwo ƒe agbenɔnɔ nya aɖeke magblɔmagblɔe ate ŋu aɖe’ wo srɔ̃ŋutsu dzimaxɔsetɔwoe la, nenema ke ƒewuiviwo ate ŋu asrɔ̃ gɔmeɖose dzɔdzɔewo to wo dzilawo ƒe agbenɔnɔ mee. (Tsɔe sɔ kple Petro I, 3:1.) Ke hã esi ɖeviwo kpɔa kpɔɖeŋu gbegblẽ geɖewo kpakple boblododo heame geɖewo ne wodo le aƒea me ta la, kpɔɖeŋuɖoɖo ɖeɖe mesɔ gbɔ o. Eyata ehiã be dzila siwo tsɔ ɖe le eme na wo viwo la nanya wo vi ƒewuiviwo ƒe susu le nusiwo wokpɔna kple nusiwo wosena ŋu, eye esia bia dzeɖoɖo nyui ƒe anyinɔnɔ.—Lododowo 20:5.

9, 10. Nukata wòle be dzilawo nakpɔ egbɔ be yewofia gbɔdɔdɔ ŋu nyawo yewo viwo, eye aleke woate ŋu afiae?

⁹ Esia hiã vevietɔ le gbɔdɔdɔnyawo gome. Dzilawo, ɖe dzeɖoɖo le gbɔdɔdɔnyawo ŋu kple mia viwo kpea ŋu na mia? Ne ekpenɛ na mi hã la, midze agbagba miaɖo dze le eŋu kple mia viwo, elabena wogbɔna ese ge le ame aɖe gbɔ kokoko. Ne womesrɔ̃e le gbɔwò o la, amekae nya nya totro siwo woagblɔ na wo? Yehowa mesi le nuƒoƒo tso gbɔdɔdɔnyawo ŋu nu le Biblia me o, eye mele be dzilawo hã nasi le enu o.—Lododowo 4:1-4; 5:1-21.

¹⁰ Míeda akpe be mɔfiafia si me kɔ le gbɔdɔdɔnyawo ŋu la le Biblia me, eye Gbetakpɔxɔ Habɔbɔa ta nyatakaka nyui gbogbo aɖe si fia be mɔfiame sia gasɔ na egbe xexeame kokoko. Nukata màwɔ kpekpeɖeŋu sia ŋudɔ o? Le kpɔɖeŋu me, nukata màdzro agbalẽ si nye Questions Young People Ask—Answers That Work ƒe akpa si nye “Gbɔdɔdɔ Kple Agbenyuinɔnɔ” me kple viwòŋutsu alo viwònyɔnu o? Vi siwo wòaɖe la awɔ nuku na wò eye wòagado dzidzɔ na wò hã.

11. Mɔ kae nye nyuitɔ kekeake si nu dzilawo afia Yehowa subɔsubɔ wo viwo le?

¹¹ Nukae nye nu vevitɔ si me wòle be dzilawo kple ɖeviwo nadzro? Apostolo Paulo yɔe esi wòŋlɔ be: ‘Minyi mia viwo le Yehowa ƒe hehe kple nuxɔxlɔ̃ la me.’ (Efesotɔwo 6:4) Ehiã be ɖeviwo nayi edzi anɔ nu srɔ̃m le Yehowa ŋu. Vevietɔ ele be woasrɔ̃ alesi woalɔ̃ eyamae, eye ele be woadi be yewoasubɔe. Woate ŋu atsɔ woƒe kpɔɖeŋu si woɖona afia nu geɖe ɖeviawo le go sia hã me. Ne ƒewuiviwo kpɔ be yewo dzilawo lɔ̃ Mawu tso ‘woƒe dzi blibo kple woƒe luʋɔ blibo kpakple woƒe tamesusu blibo’ me eye be esia le vi ɖem le yewo dzilawo ƒe agbenɔnɔ me la, ate ŋu akpɔ ŋusẽ ɖe wo dzi be woawo hã nalɔ̃e nenema ke. (Mateo 22:37) Nenema ke ne ɖeviwo kpɔ be yewo dzilawo ƒe nukpɔsusu le ŋutilãmenuwo ŋu sɔ eye woɖoa Mawu Fiaɖuƒea ƒe nuwo nɔƒe gbãtɔ la, akpe ɖe wo ŋu woatu tamesusu ƒe nɔnɔme ma ke ɖo.—Nyagblɔla 7:12; Mateo 6:31-33.

12, 13. Nukawoe wòle be wòanɔ susu me na ame bene ƒomenusɔsrɔ̃ nate ŋu akpɔ dzidzedze?

¹² Ƒome Biblia nusɔsrɔ̃ wɔwɔ kwasiɖa sia kwasiɖa nye kpekpeɖeŋunu tɔxɛ aɖe le gbɔgbɔmenu xɔasiwo fiafia ɖeviwo me. (Psalmo 119:33, 34; Lododowo 4:20-23) Nusɔsrɔ̃ sia wɔwɔ edziedzi hiã vevie ŋutɔ. (Psalmo 1:1-3) Ele be dzilawo kple ɖeviwo nanyae be ele be ƒomenusɔsrɔ̃a naxɔ ŋgɔgbe na nu bubu ɖesiaɖe, menye be nu bubuwo nava xɔ ŋgɔ nɛ o. Tsɔ kpe ɖe eŋu la, nɔnɔme nyuitɔ ƒe anyinɔnɔ le vevie hafi ƒomenusɔsrɔ̃a naɖe vi. Vifofo aɖe gblɔ be: “Nusi naa wokpɔa dzidzedzee nye be ele be edzikpɔla nade dzi ƒo be amesiame navo le eɖokui me aƒo nu le ƒomenusɔsrɔ̃a me gake woawɔ nu le bubumɔ nu—megasesẽ akpa o gake megazu fefe hã o. Manɔ bɔbɔe be woada asɔ pɛpɛpɛ ɣesiaɣi o, eye ahiã enuenu be woana ɖeviwo natrɔ asi le nɔnɔme si woɖena fiana ŋu. Ne nuwo meyi edzi nyuie zi ɖeka alo zi eve aɖe o la, mègana ta o ke kpɔ mɔ boŋ be anyo gbebubugbe.” Vifofo sia ke gblɔ be le yeƒe gbedodoɖa hafi yewoadze nusɔsrɔ̃ ɖesiaɖe gɔme me la, yebiana tẽ be Yehowa nekpe ɖe yewo ŋu be nukpɔsusu si sɔ nanɔ amesiame si.—Psalmo 119:66.

¹³ Dzila xɔsetɔwo ƒe agbanɔamedzie ƒomenusɔsrɔ̃ wɔwɔ nye. Nyateƒee, dzila aɖewo manye nufiala bibiwo o, eye ate ŋu asesẽ na wo be woanya alesi woawɔe be ƒomenusɔsrɔ̃a navivi. Gake ne mielɔ̃ mia vi ƒewuiviwo “le nuwɔwɔ kple nyateƒe” me la, miadi be yewoakpe ɖe wo ŋu le mɔ suetɔ ke hã nu anukwaretɔe be woayi ŋgɔ le gbɔgbɔ me. (Yohanes I, 3:18) Ɣeaɖewoɣi woato nyatoƒoe, gake anɔ eme be woakpɔ alesi mietsɔ ɖe le woƒe nyonyo mee.

14. Aleke woate ŋu awɔ Mose V, 11:18, 19 me nyawo ŋudɔe ne wole gbɔgbɔmenuwo fiam ƒewuiviwo?

¹⁴ Menye ƒomenusɔsrɔ̃a me koe woafia nusiwo le vevie le gbɔgbɔ me le o. Èɖo ŋku se si Yehowa de na dzilawo dzia? Egblɔ be: “Mina nye nya siawo nage ɖe miaƒe dzi kple miaƒe luʋɔ me, mibla wo ɖe asi ŋu abe dzesi ene, eye mibla wo ɖe ŋgonu le ŋudome. Mifia wo mia viwo, eye miƒo nu le wo ŋu, ne miebɔbɔ nɔ miaƒe aƒewo me, alo miele mɔ dzi, ne miemlɔ anyi, alo miefɔ.” (Mose V, 11:18, 19; kpɔ Mose V, 6:6, 7 hã.) Mefia be ɣesiaɣi ko dzilawo nanɔ mawunya gblɔm na wo viwo o. Gake ele be ƒometa si lɔ̃a eƒe ƒomea la nanɔ ŋudzɔ ɣesiaɣi ɖe mɔnukpɔkpɔ siwo me wòatu eƒe ƒomea ƒe gbɔgbɔmemenyenye ɖo la ŋu.

15, 16. (a) Nukae nye amehehe? (b) Ameka ŋkumee wòkpɔ be wòana hehe, eye ameka ƒe agbanɔamedzie wònye be wòazɔ ɖe edzi?

¹⁵ Amehehee nye mamlã si ɖɔa ame ɖo, eye eƒe akpa aɖee nye dzeɖoɖo. Ðɔɖɔɖo dze le amehehe me wu tohehe—togbɔ be tohehe ahiã hã. Viwòwo hiã amehehe esime wonɔ sue wu, eye fifia si wozu ƒewuiviwo la, wogahiã eƒomevi aɖe, ɖewohĩ wohiãe fifia kura wu. Ƒewuivi nyanuwo nya be nyateƒee nya sia nye.

¹⁶ Biblia gblɔ be: “Bometsila doa vlo fofoa ƒe amehehe; ke amesi bua mokaname la, adze nunya.” (Lododowo 15:5) Míesrɔ̃ nu geɖe le ŋɔŋlɔ sia me. Efia be ele be woana hehe vi. Ƒewuivi mate ŋu ‘abu mokaname’ ne womeka mo nɛ o. Dzilawoe Yehowa tsɔ amehehedɔ la de asi na, vevietɔ vifofo la. Gake toɖoɖo amehehe ma ƒe agbanɔamedzia ya yi na ƒewuivi la. Ne eɖoa to fofoa kple dadaa ƒe amehehe si me nunya le la, asrɔ̃ nu geɖe eye vodada siwo wòawɔ la masɔ gbɔ o. (Lododowo 1:8) Biblia gblɔ be: “Ahedada kple ŋukpe ava amesi gbe amehehe la dzi; ke amesi bu mokaname la, woade bubu eŋu.”—Lododowo 13:18.

17. Dadasɔ kae wòle be wòanye dzilawo ƒe taɖodzinu ne wole wo viwo hem?

¹⁷ Ne dzilawo le wo vi ƒewuiviwo hem la, ele be woada asɔ. Mele be woana woƒe nya dzi nasẽ ale gbegbe be woado dziku na wo viwo, eye ɖewohĩ ɖeviawo magaka ɖe wo ɖokui dzi o. (Kolosetɔwo 3:21) Ke hã dzilawo madi be yewoaɖe mɔ ɖe nuwo ŋu na yewo viwo ale gbegbe be hehe si wòhiã be woana wo la nato wo ŋu o. Mɔɖeɖeɖenuŋu ƒe nɔnɔme sia ate ŋu anye afɔku. Lododowo 29:17 gblɔ be: “He to na viwò, ekema ana gbɔɖeme wò, eye wòado vivi na wò luʋɔ.” Gake kpukpui 21 lia gblɔ be: “Ne ame aɖe wɔ vinugbee na eƒe kluvi tso ɖevime la, [ava zu akpemadala gɔ̃ hã le eƒe tsitsime, NW].” Togbɔ be kluvi ƒe nya gblɔm kpukpui sia le hã la, emenyawo ku ɖe ɖevi ɖesiaɖe si le aƒea me ŋu.

18. Nuka ƒe kpeɖodzie tohehe nye, eye nukae woaxe mɔ na ne dzilawo ƒe tohehe toa mɔ ɖeka?

¹⁸ Le nyateƒe me la, dzila ƒe lɔlɔ̃ na via ƒe kpeɖodzie tohehe si sɔ la nye. (Hebritɔwo 12:6, 11) Ne dzilae nènye la, ke ènyae be mele bɔbɔe be woana tohehe si toa mɔ ɖeka eye wòsɔ la ɣesiaɣi o. Adze nusi le bɔbɔe wu be woaɖe asi le ƒewuivi si ƒe to tri ŋu be wòawɔ nusi dze eŋu bene ŋutifafa nanɔ anyi. Gake mlɔeba la, dzila si wɔnɛ alea la ƒe ƒome azu aƒe si mele hehe aɖeke te o.—Lododowo 29:15; Galatiatɔwo 6:9.

19, 20. Aleke dzilawo ate ŋu awɔ nu le nunya me le wo vi ƒewuiviwo ƒe modzakaɖeɖe mee?

¹⁹ Tsã la, wokpɔa mɔ be ɖeviwo nawɔ aƒemedɔ alo agbledɔ akpe ɖe ame ŋu. Egbea ya vovoɣi gbogbo aɖe si ŋu ame aɖeke meléa ŋku ɖo o nɔa ƒewuivi geɖe si. Asitsatsaxexeame wɔa modzakaɖenu gbogbo aɖewo na wo si xɔa woƒe vovoɣiwo katã. Ne ètsɔ alesi xexeame medea asixɔxɔ aɖeke Biblia ƒe agbenyuinɔnɔ ƒe dzidzenuwo ŋu o kpe ɖe eŋu la, ana nàkpɔ nusiwo li siwo ate ŋu ahe afɔku vɛ la adze sii.

²⁰ Eyata dzila nyanu meɖea asi le gome si le esi be wòawɔ nyametsotso mlɔea le modzakaɖeɖe ŋu la ŋu o. Gake mègaŋlɔ be o be ƒewuivia le tsitsim. Ƒe sia ƒe si ava la, adi be woawɔ nu ɖe ye ŋu abe ame tsitsi ene. Eyata nunya le eme be dzila la nanɔ mɔ ɖem le modzakaɖeɖe ƒe tiatiawɔwɔblɔɖe geɖe wu ŋu na ƒewuivia esime wòle tsitsim—zi alesi wòadze le eƒe tiatiaawo me be ele ŋgɔ yim ɖo ta gbɔgbɔmetsitsi gbɔ ko. Ɣeaɖewoɣi la, ƒewuivia ate ŋu awɔ tiatia siwo me nunya mele o le hadzidzi, zɔhɛwo, kple nu bubuwo ŋu. Ne edzɔ alea la, ele be woaɖo dze tso eŋu kple ƒewuivia ale be wòawɔ tiatia siwo nyo wu le etsɔme.

21. Aleke ɣeyiɣi si woazã ɖe modzakaɖeɖe ŋuti ŋu bubu nyuie akpɔ ƒewuiviwo tae?

²¹ Ɣeyiɣi agbɔsɔsɔme kae wòle be woatsɔ aɖe modzakae? Le dukɔ aɖewo me la, wowɔe be ƒewuiviwo xɔ se be ele be ɣesiaɣi ko yewoanɔ modzakaɖeɖe dzi. Eyata ƒewuivi ate ŋu awɔ ɖoɖo be yeanɔ agbeɖuɖu dzi. Enye dzilawo ƒe agbanɔamedzi be woafia wo viwo be ele be woazã ɣeyiɣi ɖe nu bubuwo hã ŋu, abe ɖe ƒomea, ɖokuisinusɔsrɔ̃, hadede kple gbɔgbɔmemetsitsiwo, Kristotɔwo ƒe kpekpewo dede, kple aƒemedɔwo ene ŋu. Esia wɔwɔ ana ‘agbe sia me ƒe dzidzɔkpɔkpɔwo’ mavu atsyɔ Mawu ƒe Nya la dzi o.—Luka 8:11-15.

22. Nuka kple modzakaɖeɖee wòle be woana woada asɔ le ƒewuiviwo ƒe agbenɔnɔ me?

²² Fia Salomo gblɔ be: “Medze sii bena, nu nyui aɖeke meli na wo wu be, woakpɔ dzidzɔ, eye woaɖu agbe le woƒe agbenɔɣi o. Ke be ame aɖe naɖu nu ano nu, eye wòanyo nɛ le eƒe agbagbadzedzewo katã me la, Mawu ƒe nunanae.” (Nyagblɔla 3:12, 13) Nyateƒee, agbenɔnɔ si da sɔ ƒe akpa aɖee dzidzɔkpɔkpɔ nye. Gake nenema kee nye dɔsesẽwɔwɔ hã. Egbea ƒewuivi geɖe megasrɔ̃a dzidzeme si tsoa dɔsesẽwɔwɔ me alo bubudedeameɖokuiŋu si wosena le ame ɖokui me ne wodze ŋkume kuxi eye wote ŋu kpɔ egbɔ o. Womenaa mɔnukpɔkpɔ wo dometɔ aɖewo be woasrɔ̃ aɖaŋudɔ alo asinudɔ si woatsɔ akpɔ wo ɖokui dzii le woƒe tsitsime o. Dɔ gã aɖe si dze ŋgɔ dzila lae nye esia. Ðe nàkpɔ egbɔ be mɔnukpɔkpɔ siawo su ye vi sia? Ne ète ŋu fiae viwò ƒewuivi la be wòade asixɔxɔ dɔsesẽwɔwɔ ŋu eye kura gɔ̃ hã wòase vivi nɛ la, ana be vivivi la, nukpɔsusu nyui si ava ɖe vi nɛ le eƒe agbemeŋkekewo katã me la nasu esi.

23. Aleke dzilawo awɔ ade dzi ƒo na wo vi ƒewuiviwo?

²³ Ne kuxi aɖewo le mia kple viwò ƒewuivia dome hã la, ŋɔŋlɔ sia me nya ate ŋu akpe ɖe ŋuwò kokoko, be: “Lɔlɔ̃ la nu metsina o.” (Korintotɔwo I, 13:8) Mègadzudzɔ lɔlɔ̃ si le mewò nɛ ɖikekemanɔmee la ɖeɖe fiae gbeɖe o. Bia ɖokuiwò se be, ‘Ðe mekafua ɖevi ɖesiaɖe ɖe eƒe dzidzedzekpɔkpɔ ta ne ete ŋu kpɔ kuxiwo gbɔ alo ɖu mɔxenuwo dzia? Ðe mezãa mɔnukpɔkpɔwo tsɔ ɖea nye lɔlɔ̃ na vinyewo kple ŋudzedzekpɔkpɔ ɖe wo ŋu fiana, hafi mɔnukpɔkpɔ mawo nu nava yia?’ Togbɔ be masɔmasɔwo ate ŋu ava ɣeaɖewoɣi hã la, ne ƒewuiviwo ka ɖe edzi be èlɔ̃a yewo la, anɔ bɔbɔe wu be woawo hã nalɔ̃ wò nenema ke.

24. Ŋɔŋlɔawo me gɔmeɖose kae vaa eme zi geɖe le vinyinyi me, gake nukae wòle be nenɔ susu me na ame?

²⁴ Nyateƒee, ne ɖeviwo va zu ame tsitsiwo la, woawo ŋutɔ woava wɔ nyametsotso sesẽwo na wo ɖokui. Le wo dometɔ aɖewo me la, nyametsotso mawo madze wo dzilawo ŋu o. Ne wo via gbe be yemagasubɔ Yehowa Mawu o ɖe? Nusia ate ŋu adzɔ. Yehowa ŋutɔ ƒe vi siwo nye gbɔgbɔmeviwo gɔ̃ hã gbe eƒe ɖoɖowo eye wozu vi dzeaglãwo. (Mose I, 6:2; Yuda 6) Menye kɔmpiuta si wɔa dɔ abe alesi míedii ene le ɖoɖo si woŋlɔ de eme nue ɖeviwo nye o. Nuwɔwɔ siwo si tiatiawɔwɔblɔɖe le, eye woabu akɔnta na Yehowa le woƒe nyametsotsowo ŋue wonye. Gake Lododowo 22:6 me nyawo vaa eme zi geɖe, be: “Mlã ɖevi ɖe mɔ, si wòato la ŋu, ne eva tsi la, mate ɖa le edzi o.”

25. Mɔ kae nye nyuitɔ kekeake si nu dzilawo ate ŋu aɖe woƒe akpedada na Yehowa ɖe vidzidzi ta afia le?

²⁵ Eyata esi wòle alea la, ɖee fia viwòwo be yelɔ̃ wo vevie. Dze agbagba ɖesiaɖe be nàwɔ ɖe Biblia ƒe gɔmeɖosewo dzi le wo nyinyi me. Ðo mawusosroɖagbenɔnɔ ƒe kpɔɖeŋu nyui ɖi na wo. Esia wɔwɔ ana nàna mɔnukpɔkpɔ nyuitɔ wo be woatsi azu Mawuvɔ̃la ɖotawo. Esiae nye mɔ nyuitɔ si nu dzilawo ate ŋu aɖe woƒe akpedada na Yehowa ɖe vidzidzi ƒe mɔnukpɔkpɔ si wòna wo ta afia le.