Yehowa Si Mee Xɔname Le
‘Mawu vavã lae nye míaƒe xɔname ƒe Mawu.’—PSALMO 68:21.
1, 2. (a) Nukata míate ŋu agblɔ be Yehowae nye Amesi xɔna na ame? (b) Aleke nàɖe Lododowo 21:31 mee?
YEHOWA nye Xɔla na amegbetɔ siwo lɔ̃nɛ. (Yesaya 43:11) Nusiwo me Israel Fia Dawid to na wònya nusia eye etso dzi blibo me dzi ha be: “Yehowa si me xɔname le.” (Psalmo 3:9) Nya siawo tɔgbee nyagblɔɖila Yona hã zã le gbedodoɖa vevie me esime wònɔ tɔmelã gã la ƒe dɔme.—Yona 2:9.
2 Dawid vi Salomo hã nya be Yehowa Gbɔe xɔname tsona, elabena egblɔ be: “Woblaa akpa na sɔ ɖe aʋawɔgbe ŋu, ke Yehowa si mee [xɔname] le.” (Lododowo 21:31) Le blema Titinaɣedzeƒe la, nyiwoe hea anyigbadzobonu, tedziwoe tsɔa agba, amewoe doa tedzisɔ, eye wozãa sɔwo le aʋawɔwɔ me. Gake hafi Israel-viwo naɖo Ŋugbedodonyigbaa dzi la, Mawu de se be “sɔ geɖe naganɔ” amesiwo ava nye woƒe fiawo “si o.” (Mose V, 17:16) Aʋawɔsɔwo mahiã o elabena Yehowa axɔ na eƒe amewo.
3. Biabia kawo ŋue wòle be míade ŋugble le?
3 Yehowa Aƒetɔ Dziɖulagã la nye “xɔname ƒe Mawu.” (Psalmo 68:21) Nya dedziƒoname ka gbegbee nye si! Gake ‘xɔnamedɔ’ kawoe Yehowa wɔ? Eye amekawoe wòxɔ na?
Yehowa Xɔna na Ame Dzɔdzɔewo
4. Aleke míewɔ nya be Yehowa xɔna na mawuvɔ̃lawo?
4 Amesiwo katã nye Mawu subɔla ɖeadzɔgbe siwo le nudzɔdzɔewɔwɔ yome la ate ŋu akpɔ akɔfafa tso apostolo Petro ƒe nya siawo me be: “Aƒetɔ la nya alesi wòaɖe mawumemewo atso tetekpɔwo me, eye wòadzra ame madzɔmadzɔwo ɖo hena ʋɔnudrɔ̃gbe, bene woatu fe vɔ̃ na wo.” Esi Petro nɔ kpe ɖom nya sia dzi la, egblɔ be Mawu “mekpɔ blema xexeme la ƒe nublanui o, negbe Noa, dzɔdzɔenyenye ƒe gbeƒãɖela la, hekpe ɖe ame adre bubuawo ŋu ko wòdzra ɖo, esime wòhe tɔɖɔɖɔ va ame mavɔ̃mawuwo ƒe xexeme dzi.”—Petro II, 2:5, 9.
5. Nɔnɔme kawo mee Noa nye “dzɔdzɔenyenye ƒe gbeƒãɖela” le?
5 Tsɔe be yenɔ nɔnɔme siwo nɔ Noa ƒe ɣeyiɣia me la me. Gbɔgbɔ vɔ̃ siwo do amegbetɔŋutilã la le anyigba dzi. Vi siwo mawudɔla dzeaglã siawo dzi la sẽa ŋuta le amewo ŋu, eye ‘ŋutasesẽ yɔ anyigba la dzi.’ (Mose I, 6:1-12) Gake womete ŋu wɔ anyra le Noa ŋu kaka wòdzudzɔ Yehowa subɔsubɔ o. Ke boŋ enye “dzɔdzɔenyenye ƒe gbeƒãɖela.” Eya kple eƒe ƒometɔwo kpa aɖakaʋu eye ɖikeke aɖeke menɔ wo me be woaɖe vɔ̃ɖinyenye ɖa le yewoƒe agbenɔɣi o. Noa ƒe xɔse bu fɔ xexeme ma. (Hebritɔwo 11:7) Egbeŋkekeawo me ƒe nɔnɔmewo sɔ kple Noa ŋɔli tɔ, eye wonye dzesi be enye nuɖoanyi vɔ̃ɖi sia ƒe ŋkeke mamlɛawo. (Mateo 24:37-39; Timoteo II, 3:1-5) Ekema ɖe wò hã ànye dzɔdzɔenyenye ƒe gbeƒãɖela asubɔ kple Mawu ƒe amewo ahanɔ Yehowa ƒe xɔname lalam abe alesi Noa wɔ enea?
6. Aleke Petro II, 2:7, 8 ɖo kpe edzi be Yehowa xɔna na ame dzɔdzɔewoe?
6 Petro gagblɔ kpeɖodzi bubu siwo fia be Yehowa xɔna na ame dzɔdzɔewo. Apostoloa gblɔ be “[Mawu ɖe] Lot dzɔdzɔetɔ, si ŋu ame gblẽkuwo ƒe hadzedzegbenɔnɔ sẽ ŋuta le la, tso me; elabena esi ame dzɔdzɔe ma nɔ wo dome, eye wòkpɔ, eye wòse woƒe dɔwɔwɔ, siwo mele sea nu o la, ewɔa fu eƒe luʋɔ dzɔdzɔe la gbesiagbe.” (Petro II, 2:7, 8; Mose I, 19:1-29) Gbɔdɔdɔ ƒe agbegbegblẽnɔnɔ zu gbesiagbenuwɔna na ame miliɔn geɖe le ŋkeke mamlɛ siawo me. Ðe wò hã ‘èxaa nu vevie le hadzegbe si ame geɖe nɔna egbea ta’ abe alesi Lot hã xa nui enea? Ne èxaa nu eye nèwɔa nu dzɔdzɔe la, ke ɖewohĩ ànɔ amesiwo Yehowa aɖe esime woatsrɔ̃ nuɖoanyi vɔ̃ɖi sia dome.
Yehowa Xɔa Eƒe Amewo le Ameteɖeanyilawo Si Me
7. Aleke alesi Yehowa wɔ nu kple Israel-viwo le Egipte ɖo kpe edzi be eɖea eƒe amewo le teteɖeanyi me?
7 Zi alesi nuɖoanyi vɔ̃ɖi sia gali ko la, woati Yehowa subɔlawo yome eye futɔwo ate wo ɖe anyi. Gake kakaɖedzi ate ŋu anɔ wo si be Yehowa axɔ na yewo, elabena exɔ na eƒe ame siwo wonɔ tetem ɖe anyi la le blema. Tsɔe be yenye Israel-vi si Egiptetɔwo le tetem ɖe anyi le Mose ŋɔli. (Mose II, 1:1-14; 6:8) Mawu tsɔ fuwɔamewo ɖe fu na Egiptetɔwo tre ɖe enu. (Mose II, 8:5–10:29) Esi fuwɔame wuame ewolia wu Egiptetɔwo ƒe ŋgɔgbeviwo vɔ la, Farao ɖe asi le Israel-viwo ŋu wodzo gake emegbe egayɔ eƒe asrafowo ƒo ƒu wokplɔ wo ɖo. Gake eteƒe medidi o, eya kple eƒe amewo tsrɔ̃ le Ƒudzĩa me. (Mose II, 14:23-28) Wò hã èkpe ɖe Mose kple Israel-viwo katã ŋu miedzi ha be: “Yehowa enye aʋawɔla, eŋkɔe nye Yehowa. Ede Farao ƒe tasiaɖam kple eƒe aʋakɔ la ƒu, eye eƒe aʋawɔla veviwo nyrɔ ɖe [Ƒudzĩa] me. Ƒuɖɔɖɔ gbagba ɖe wo dzi, eye wodze to abe kpe ene.” (Mose II, 15:3-5) Tsɔtsrɔ̃ ma ƒomevi le amesiwo katã tea Mawu ƒe amewo ɖe to le ŋkeke mamlɛ siawo me lalam.
8, 9. Wɔ kpɔɖeŋu aɖe tso Ʋɔnudrɔ̃lawo ƒe agbalẽa me si fia be Yehowa xɔa eƒe amewo tso ameteɖeanyilawo si me.
8 Esime Israel-viwo ɖo Ŋugbedodonyigbaa dzi ƒe geɖe megbe la, ʋɔnudrɔ̃lawo nɔ wo dome eye wokpɔa egbɔ be wowɔ nu dzɔdzɔe. Ɣeaɖewoɣi dutatɔwo va tea wo ɖe anyi, gake Mawu zãa ʋɔnudrɔ̃la wɔnuteƒewo tsɔ ɖea wo. Togbɔ be ɖewohĩ míanɔ ‘hũ ɖem le fuɖenamelawo kple amesiwo sẽa ŋuta le mía ŋu ta’ hã la, Yehowa aɖe mí amesiwo nye esubɔla wɔnuteƒewo hã. (Ʋɔnudrɔ̃lawo 2:16-18; 3:9, 15) Le nyateƒe me la, Biblia-gbalẽ si nye Ʋɔnudrɔ̃lawo ka ɖe nusia kple alesi Mawu ato Yesu Kristo, Ʋɔnudrɔ̃la si wòtia, dzi axɔ na mí le mɔ gãtɔ nu la dzi na mí.
9 Mina míatrɔ ɖe Ʋɔnudrɔ̃la Barak ƒe ŋkekewo ŋu. Le Israel-viwo ƒe alakpasubɔsubɔ kple alesi Mawu megakpɔ ŋudzedze ɖe wo ŋu o ta la, Kanaanitɔwo ƒe Fia Yabin tsɔ asi sesẽ ɖu wo dzi ƒe 20 sɔŋ. Sisera ye nye Kanaanitɔwo ƒe aʋakɔ gã la ƒe aʋafia. Gake togbɔ be dukɔa me nɔlawo ade ame miliɔn ene hã la, “womegakpɔ akpoxɔnu kple akplɔ aɖeke le Israel ƒe ame akpe blaeneawo dome o.” (Ʋɔnudrɔ̃lawo 5:6-8) Israel-viawo trɔ dzime ƒo koko na Yehowa. Abe alesi Mawu fia mɔ to nyɔnunyagblɔɖila Debora dzi ene la, Barak ƒo ŋutsu 10,000 nu ƒu ɖe Tabor-to dzi, eye Yehowa kplɔ futɔawo va bali si le Tabor-to kɔkɔ la gɔme. Sisera ƒe aʋakɔwo kple aʋatasiaɖam 900 ƒe hoowɔwɔ le ɖiɖim le gbadzaƒea kple Kison-tɔʋu ƒuƒua me. Gake tsi gã aɖe dza wòna Kison ɖɔ gbagba. Esi Barak kple eƒe amewo nɔ Tabor-toa ƒe aga ɖim le tsidzadzaa me la, wokpɔ nusi gbegbe Yehowa ƒe dziku si wòɖe fia gblẽ. Barak ƒe amewo wu Kanaanitɔ siwo vɔvɔ̃ ɖo wonɔ sisim la ɖeka ɖeka, eye wo dometɔ aɖeke mesi o. Nuxlɔ̃ame ka gbegbee nye si wònye na amesiwo tea mí ɖe to eye wosusu be yewole avu wɔm kple Mawu!—Ʋɔnudrɔ̃lawo 4:3-16; 5:19-22.
10. Nukata míate ŋu aka ɖe edzi be Mawu axɔ na esubɔla siwo li egbea tso wo teɖeanyilawo si me?
10 Yehowa axɔ na esubɔla siwo li egbea tso woƒe futɔ siwo katã tea wo ɖe to si me, abe alesi wòxɔ na Israel-vi siwo vɔ̃a Mawu le xaxaɣiwo ene. (Yesaya 43:3; Yeremya 14:8) Mawu xɔ Dawid ‘tso eƒe futɔwo katã si me.’ (Samuel II, 22:1-3) Eyata ne wote mí ɖe anyi alo woti mía yome le esi míenye Yehowa ƒe amewo ta gɔ̃ hã la, mina dzi nanɔ mía ƒo, elabena eƒe Mesia Fia la aɖe mí tso teteɖeanyi me. Ẽ, “[aɖe] ame dahewo ƒe luʋɔ. Aɖe woƒe luʋɔ tso teteɖeanyi kple ŋutasesẽ me.” (Psalmo 72:13, 14) Ðeɖe ma gogo ale gbegbe.
Mawu Xɔna na Amesiwo Ðoa Ŋu Ðe Eŋu
11. Ŋuɖoɖo ɖe Yehowa ŋu ƒe kpɔɖeŋu kae ɖekakpui Dawid ɖo ɖi?
11 Ne Yehowa aɖe mí la, ke ele be dzi nanɔ mía ƒo míaɖo ŋu ɖe eŋu. Dawid ɖe dzinɔameƒo si wotsɔ ɖoa ŋu ɖe Mawu ŋu fia esime wòyi ame dzɔtsu Goliat kpe ge. Kpɔe ɖa ko be Filistitɔ kɔkɔ dzɔtsu ma tsi tre ɖe Dawid si nye ɖekakpui la ŋkume hafi wòle ɣli dom be: “Wòa ètsɔ yi, tunuhlo kple akplɔ gbɔna gbɔnyee; ke nye la megbɔna gbɔwò le Yehowa Zebaot, Israel ƒe aʋalɔgo, siwo ŋu nèɖe alɔme le la ƒe Mawu ƒe ŋkɔ me. Yehowa atsɔ wò ade asi nam egbea, eye mawu wò atso ta le nuwò, eye matsɔ Filistitɔwo ƒe aʋakɔ la ƒe kukuwo ana dziƒoxewo kple anyigba dzi lãwo egbe sia, ne anyigba blibo la nadze sii bena, Mawu aɖe li na Israel; eye ameha blibo sia nadze sii bena, Yehowa metsɔa yi alo akplɔ ɖea ame o; elabena aʋa enye Yehowa tɔ.” Eteƒe medidi o Goliat ku mlɔ anyigba, eye wosi Filistitɔwo gbidigbidi. Edze ƒã be Yehowa xɔ na eƒe amewo.—Samuel I, 17:45-54.
12. Nukata wòanyo be míaɖo ŋku Dawid ƒe kalẽtɔ Eleazar dzi?
12 Ne yometilawo tso ɖe mía ŋu la, ahiã be ‘dzi naɖo mía ƒo’ eye míaɖo ŋu ɖe Mawu ŋu bliboe. (Yesaya 46:8-13; Lododowo 3:5, 6) Se nusi dzɔ le teƒe si woyɔna be Pas-Xamim ɖa. Israel-viwo si le Filistitɔwo ƒe aʋakɔwo nu. Gake vɔvɔ̃ meɖu Eleazar si nye Dawid ƒe kalẽtɔ ɖedzesiawo dometɔ ɖeka dzi o. Etsi tre ɖe ƒogble aɖe me eye eya ɖeka tsɔ yi wu Filistitɔwo ƒu anyi. Aleae ‘Yehowa kpɔ dziɖuɖu gã aɖe eye wòxɔ na Israel enye si.’ (Kronika I, 11:12-14; Samuel II, 23:9, 10) Ame aɖeke mele biabiam tso mía si be míawo ɖeɖe míasi asrafowo o. Gake ate ŋu adzɔ ɣeaɖewoɣi be míawo ɖeɖe míatsi teƒe aɖe eye futɔwo ayɔ ʋu ɖe mía te. Ðe míatsɔ ŋuɖoɖeŋu ado gbe ɖa na Yehowa, xɔname ƒe Mawu la? Ðe míabiae be wòakpe ɖe mía ŋu bene míagade haxɔsetɔwo asi na yometilawo oa?
Yehowa Xɔna na Nuteƒewɔlawo
13. Nukatae wòsesẽ be woawɔ nuteƒe na Mawu le Israel ƒe to ewo fiaɖuƒea me?
13 Ne Yehowa axɔ na mí la, ke ele be nuka kee ɖadzɔ o míawɔ nuteƒe. Mawu ƒe ame siwo nɔ anyi le blema to dodokpɔ vovovo me. De ŋugble le nusi ɖewohĩ adze ŋgɔwò ne ɖe ènɔ Israel ƒe to ewo fiaɖuƒea me ŋu kpɔ. Rexabeam ƒe sesẽnuwɔwɔ wɔe be to ewo gbe be yewomaganɔ eyome o eye wova ɖo Israel ƒe dzigbe fiaɖuƒea. (Kronika II, 10:16, 17; 11:13, 14) Le dukɔa ƒe fia geɖeawo dome la, Yehu ye nye nyuitɔ kekeake, gake eya gɔ̃ hã “melé ŋku ɖe Yehowa ƒe seawo ŋu, ne wòazɔ ɖe wo nu kple eƒe dzi blibo o.” (Fiawo II, 10:30, 31) Ke hã nuteƒewɔlawo nɔ to ewo fiaɖuƒea me. (Fiawo I, 19:18) Woɖe Mawu dzixɔxɔse fia eye wònɔ kpli wo. Togbɔ be woado wò xɔse akpɔ zi geɖe hã la, ɖe nègakpɔtɔ le nuteƒe wɔm na Yehowaa?
14. Xɔnamedɔ kae Yehowa wɔ le Fia Xizkiya ŋɔli, eye nukae na Babilontɔwo va si Yuda?
14 Bubumademade Mawu ƒe Se ŋu kplɔ Israel-fiaɖuƒea de dzɔgbevɔ̃e me. Esime Asiriatɔwo va sii le ƒe 740 D.M.Ŋ. me la, ɖikeke mele eme o be ame ɖekaɖeka aɖewo tso wo dome si yi Yuda to eve fiaɖuƒea me, afisi woate ŋu asubɔ Yehowa le le gbedoxɔ me. Yuda-fia 19 siwo tso Dawid ƒe ƒomea me dometɔ ene—Asa, Yosafat, Xizkiya, kple Yosia—ɖe dzesi le Mawu sosroɖa me. Le Xizkiya amesi nye nuteƒewɔla ŋɔli la, Asiriatɔwo ƒe aʋakɔ sesẽ aɖe ho ɖe Yuda ŋu. Le Xizkiya ƒe gbedodoɖawo ŋu ɖoɖo me la, Mawu na eƒe dɔla ɖeka va wu Asiriatɔ 185,000 le zã ɖeka me, ale be Wòxɔ na esubɔlawo! (Yesaya 37:36-38) Emegbe esi dukɔa do kpo Sea dzi wɔwɔ kpakple Mawu ƒe nyagblɔɖilawo ƒe nuxlɔ̃ame sese ta la, Babilontɔwo va si Yuda eye wotsrɔ̃ eƒe fiadu, Yerusalem, kple gbedoxɔa le ƒe 607 D.M.Ŋ. me.
15. Nukatae dzidodo hiã Yudatɔ siwo nɔ aboyome le Babilon, eye aleke Yehowa va ɖe woe mlɔeba?
15 Eva hiã be Yudatɔ siwo nɔ aboyome nado dzi hafi ate ŋu awɔ nuteƒe na Mawu esime wonye kluviwo le Babilontɔwo te anɔ ƒe 70 sɔŋ si nye nublanui ɣeyiɣi. (Psalmo 137:1-6) Daniel nye nuteƒewɔla ɖedzesi aɖe. (Daniel 1:1-7; 9:1-3) Kpɔ alesi gbegbe dzi adzɔe ɖa esime Persia Fia Kores ƒe sedede dze dɔwɔwɔ gɔme le ƒe 537 D.M.Ŋ. me, eye woɖe mɔ na Yudatɔwo be woatrɔ ayi Yuda agbugbɔ gbedoxɔa atu! (Ezra 1:1-4) Daniel kple etɔwo do dzi ƒe geɖe, gake mlɔeba wokpɔ eteƒe esime womu Babilon eye woxɔ na Yehowa ƒe amewo. Ele be nusia nakpe ɖe mía ŋu míado dzi esi míele ‘Babilon Gã’ si nye xexeame ƒe alakpasubɔsubɔhawo ƒe fiaɖuƒe ƒe tsɔtrɔ̃ lalam.—Nyaɖeɖefia 18:1-5.
Yehowa Xɔna na Eƒe Amewo Ɣesiaɣi
16. Aleke Mawu xɔ na amewo le Fianyɔnu Ester ŋɔli?
16 Yehowa xɔna na eƒe amewo ɣesiaɣi wowɔ nuteƒe na eƒe ŋkɔ. (Samuel I, 12:22; Yesaya 43:10-12) De ŋugble le Fianyɔnu Ester ŋɔli—si nye ƒe alafa atɔ̃lia D.M.Ŋ. ŋu kpɔ. Fia Axasweros (Xerxes I) ɖo Haman wònye dumegãwo ƒe tatɔ. Esi Yudatɔ Mardoxai gbe be yemabɔbɔ ta na Haman o ta la, eɖo nugbe be yeawu eya kple Yudatɔ siwo katã le Persia Fiaɖuƒea me. Etso wo nu be wonye sedzidalawo, edo ŋugbe be yeana ga ɖe wo wuwu ta, eye wona mɔe wòtsɔ fia la ƒe ŋkɔsigɛ tu nuŋlɔɖia dzi bene woatsrɔ̃ wo. Dzi ɖo Ester ƒo wòna fia la nya be Yuda-vidzidzi yenye eye wòʋu go Haman ƒe amewuwu nugbeɖoɖoa. Eteƒe medidi o wova he Haman ɖe ati ma ke si wòtu ɖe Mardoxai ŋu la ŋuti. Wova ɖo Mardoxai wònye dumegãwo ƒe tatɔ, eye ŋusẽ le esi be wòana mɔ Yudatɔwo woaɖe wo ɖokui nu. Woɖu woƒe futɔwo dzi le mɔ gã aɖe nu. (Ester 3:1–9:19) Ele be nudzɔdzɔ sia nado ŋusẽ míaƒe xɔse be Yehowa axɔ na esubɔla toɖola siwo li egbea.
17. Aleke toɖoɖo wɔ akpa aɖe le ƒe alafa gbãtɔ me Yudatɔ Kristotɔ siwo nɔ Yudea ƒe ɖeɖekpɔkpɔ mee?
17 Susu bubu si ta Mawu xɔna na eƒe amewoe nye be woɖoa to eya kple Via. Tsɔe be yenɔ Yesu ƒe nusrɔ̃la Yudatɔ siwo nɔ anyi le ƒe alafa gbãtɔ me la dome. Egblɔ na wo be: “Ne miekpɔ aʋakɔwo ɖe to ɖe Yerusalem ŋu la, ekema midze sii bena, eƒe aƒedozuɣi ɖo vɔ. Ekema amesiwo le Yudea la, nasi ayi towo dzi.” (Luka 21:20-22) Ƒe geɖe va yi, eye mènya nenye be nya siawo agava eme o. Tete Yudatɔwo va dze aglã le ƒe 66 M.Ŋ. me. Roma-ʋakɔ siwo nɔ Cestius Gallus te va ɖe to ɖe Yerusalem eye wogogo gbedoxɔa ƒe gliwo. Kasia ko, ame aɖeke menya nusi dzɔ o, Romatɔawo gatrɔ dzo. Nukae Yudatɔ Kristotɔwo awɔ? Eusebius gblɔ le eƒe agbalẽ si nye Ecclesiastical History (Agbalẽ III, ta V, 3) me be wosi dzo le Yerusalem kple Yudea. Esi wowɔ ɖe Yesu ƒe nyagblɔɖi me nuxlɔ̃amea dzi tae wotsi agbe ɖo. Ðe wò hã èle klalo nenema be yeawɔ ɖe Ŋɔŋlɔawo me mɔfiame si woana to “xɔnuvi nuteƒewɔla” si woɖo Yesu ƒe “aƒemetɔwo” nu la dzia?—Luka 12:42-44.
Xɔxɔ Yi ɖe Agbe Mavɔ Me
18, 19. (a) Xɔname ƒe mɔnu kae Yesu ƒe ku ʋu ɖi, eye na amekawo? (b) Nukae apostolo Paulo ɖo tame be yeawɔ?
18 Yesu ƒe nuxlɔ̃amea dzi wɔwɔ xɔ Yudatɔ Kristotɔ siwo nɔ Yudea ɖe agbe. Gake Yesu ƒe kue ʋu mɔ be ‘amewo katã’ nate ŋu akpɔ agbe mavɔ. (Timoteo I, 4:10) Tafe va hiã ameƒomea esime Adam wɔ nuvɔ̃, ale be agbe va bu ɖee eye wòtsɔ amegbetɔƒomea dzra wozu nuvɔ̃ kple ku ƒe kluviwo. (Romatɔwo 5:12-19) Mɔ sue aɖe ko nue lãwo ƒe vɔ siwo wosana le Mose ƒe Sea te la tsyɔa nuvɔ̃wo dzi le. (Hebritɔwo 10:1-4) Esi fofo si nye amegbetɔ mele Yesu si o eye edze ƒã be Mawu ƒe gbɔgbɔ kɔkɔea ‘do vɔvɔli ɖe Maria dzi’ tso esime wòfɔ Yesu ƒe fu vaseɖe esime wòdzii ta la, menyi nuvɔ̃ alo blibomademade aɖeke ƒe dome esi wodzii o. (Luka 1:35; Yohanes 1:29; Petro I, 1:18, 19) Esi Yesu ku nuteƒewɔla debliboe la, etsɔ eya ŋutɔ ƒe agbe deblibo na bene yeagbugbɔ ameƒomea aƒle eye be yeana ablɔɖe wo. (Hebritɔwo 2:14, 15) Aleae Kristo ‘tsɔ eɖokui na tafe si sɔ ɖe enui ɖe amewo katã ta.’ (Timoteo I, 2:5, 6) Menye amewo katãe alɔ̃ axɔ xɔname ƒe nunana sia o, gake Mawu daa asi ɖe edzi be eƒe viɖewo nawɔ dɔ na amesiwo ɖea edzixɔxɔse fiana.
19 Esi Kristo tsɔ eƒe tafevɔsa la ƒe asixɔxɔ na Mawu le dziƒo la, egbugbɔ Adam ƒe dzidzimeviwo ƒle. (Hebritɔwo 9:24) Aleae Ŋugbetɔ va su Yesu sii, eye emetɔwo nye eyomedzela amesiamina 144,000 siwo wofɔ ɖe tsitre na dziƒogbenɔnɔ. (Efesotɔwo 5:25-27; Nyaɖeɖefia 14:3, 4; 21:9) Azɔ hã azu ‘Fofo Mavɔ’ na amesiwo xɔ eƒe vɔsa eye wona agbe mavɔ nɔnɔ wo le anyigba dzi la. (Yesaya 9:5, 6; Yohanes I, 2:1, 2) Lɔlɔ̃ ƒe ɖoɖo ka gbegbee nye si! Alesi gbegbe Paulo kpɔ ŋudzedze ɖe eŋui la dze le eƒe lɛta evelia si tso gbɔgbɔ me wòŋlɔ na Kristotɔ siwo nɔ Korinto me, abe alesi míakpɔe le nyati si kplɔe ɖo me ene. Le nyateƒe me la, Paulo ɖo tame be yemana naneke naxe mɔ na ye o bene yeakpe ɖe amewo ŋu ne Yehowa ƒe xɔname nunana wɔnuku si ana woanɔ agbe mavɔ la nasu wo si.
Aleke Nàɖo Wo Ŋui?
◻ Kpeɖodzi kae le Ŋɔŋlɔawo me be Mawu xɔna na eƒe ame dzɔdzɔewo?
◻ Aleke míewɔ nya be Yehowa xɔna na amesiwo ɖoa ŋu ɖe eŋu hewɔa nuteƒe?
◻ Nukae Mawu wɔ be wòaxɔ na amewo bene woakpɔ agbe mavɔ?
[Nɔnɔmetata si le axa 12]
Dawid ɖo ŋu ɖe Yehowa, ‘Xɔname ƒe Mawu’ la ŋu. Èɖoa ŋu ɖe eŋua?
[Nɔnɔmetata si le axa 15]
Yehowa xɔna na eƒe amewo ɣesiaɣi, abe alesi wòxɔ na wo le Fianyɔnu Ester ŋɔli ene