Ehud Xɔse Kple Dzideƒo Nɔ Esi

ƑE GEÐE va yi tso esime Israel-viwo ɖo Ŋugbedodonyigba la dzi. Mose kple Yosua, amesi xɔ ɖe eteƒe la ku xoxoxo. Esi xɔsetɔ siawo megali o la, amewo ƒe ŋudzedzekpɔkpɔ ɖe tadedeagu dzadzɛtɔ ŋu yi to. Kura gɔ̃ hã Israel-viwo dze Baalwo kple aserawo subɔsubɔ gɔme.a Eyata Yehowa tsɔ eƒe dukɔa de asi na Siriatɔwo ƒe enyi. Ke Israel-viwo do ɣli na Mawu be wòakpe ɖe yewo ŋu. Ekpɔ nublanui see na wo. Yehowa ɖo ʋɔnudrɔ̃la aɖe si ŋkɔe nye Otniel be wòaɖe Yeƒe dukɔ la.—Ʋɔnudrɔ̃lawo 3:7-11.

Ðe wòle be Israel-viwo nasrɔ̃ nyateƒe vevi aɖe tso nudzɔdzɔ siawo me hafi—be yayra tsoa toɖoɖo Yehowa me, gake tomaɖomaɖo dzia fiƒode. (Mose V, 11:26-28) Gake Israel-viwo gbe nusia sɔsrɔ̃. Esi wonɔ ŋutifafa me ƒe 40 vɔ megbe la, wogaɖe asi le tadedeagu dzadzɛtɔ ŋu ake.—Ʋɔnudrɔ̃lawo 3:12.

Moab Ðu Wo Dzi

Fifia Yehowa na eƒe dukɔ la ge ɖe Moab-fia Eglon si me. Biblia gblɔ be enye “ame lolo dami” aɖe. Amon-viwo kple Amalekitɔwo kpe ɖe Eglon ŋu wòdze Israel dzi eye wòtu eƒe fiasã ɖe Yerixo, “devedu” la me. Busunya kae nye si be fifia alakpamawu Kemos subɔla nava ali eƒe fiazikpui ɖe Kanaanitɔwo ƒe du gbãtɔ si dzi Israel-viwo ɖu la me!b—Ʋɔnudrɔ̃lawo 3:12, 13, 17.

Eglon te Israel-viwo ɖe anyi le ƒe 18 siwo kplɔe ɖo me, eye anye be ebia adzɔ gbogbo aɖe tso wo si. Nudzɔdzɔ siwo Moab biana la na wokpɔ ga gake enɔ Israel ƒe kesinɔnuwo ya dome gblẽm. Eyata ele bɔbɔe be míase nusita Mawu ƒe dukɔa do ɣli be woaxɔ na yewo ɖo la gɔme, eye Yehowa gasee na wo ake. Egaɖo ɖela bubu na wo—fifia eyae nye Benyamintɔ aɖe si ŋkɔe nye Ehud. Ehud wɔ ɖoɖo be yeatso aɖe Eglon ƒe ŋutasesẽa le Israel ŋu la ɖa gbesigbe yewoagatsɔ nudzɔdzɔ ayi nɛ.—Ʋɔnudrɔ̃lawo 3:14, 15.

Le dzadzraɖo ɖe dɔ sia si bia dzideƒo blibo ŋu me la, Ehud tu yi nuevee aɖe si didi abɔklugui ɖeka. Ne abɔklugui kpuitɔe la, ke lãnua ƒe didime anɔ sentimeta 38. Ame aɖewo bunɛ be adekpui ye. Edze be ati aɖeke metso ga ɖe asiléƒea kple hɛa ŋutɔ dome o. Eyata Ehud ate ŋu aɣla eƒe yi kpui la ɖe eƒe awu me. Gakpe ɖe eŋu la, esi wònye miawɔlae Ehud nye ta la, ete ŋu ɣla eƒe yia ɖe ɖusime—afisi womelɔ̃a lãnu kpakpla ɖo o.—Ʋɔnudrɔ̃lawo 3:15, 16.

Afɔku nɔ Ehud ƒe aɖaŋua me. Le kpɔɖeŋu me, ne fia la ƒe subɔviwo va ka Ehud ŋu be woakpɔ ɖa be ɖe lãnu aɖe le eŋu hã ɖe? Eye ne womeka eŋu kpɔ o hã la, womagblẽ woƒe fia la ɖeɖe ɖi ɖe Israel-vi gbɔ akpɔ o! Gake ne wogagblẽe ɖi eye Ehud te ŋu wu Eglon hã la, afikae wòle sisi ge atoe? Afikae wòate ŋu aƒu du aɖo hafi Eglon ƒe subɔviwo nanya nusi dzɔ?

Ðikekemanɔmee la, Ehud de ŋugble le nya mawo ŋu, eye ɖewohĩ eƒe susu gblɔ afɔku gbogbo siwo anɔ eme la nɛ. Gake eyi nugbe si wòɖo la dzi eye wòɖe dzideƒo kple Yehowa dzixɔse fia.

Ehud Do Go Eglon

Gbesigbe woagatsɔ nudzɔdzɔ yii la ɖo. Ehud kple etɔwo ge ɖe fiasã la me. Kasia woawoe nye si va do ɖe Fia Eglon ŋkume. Gake game mesu haɖe na Ehud be wòadze edzi o. Esi wotsɔ nudzɔdzɔa na vɔ la, Ehud kplɔ amesiwo tsɔ nudzɔdzɔa vɛ la ɖo ɖa.—Ʋɔnudrɔ̃lawo 3:17, 18.

Nukatae Ehud mewu Eglon zi ɖeka o? Vɔvɔ̃e naa? Kura o! Ehiã be wo kple fia la woaɖe kpɔ hafi wòate ŋu awɔ nugbe si wòɖo la—mekpɔ mɔnu sia zi gbãtɔ si wova o. Hekpe ɖe eŋu la, ele be Ehud nesi dzo kaba. Ame ɖeka ƒe sisi anɔ bɔbɔe wu amesiwo tsɔ nudzɔdzɔa vɛ la ƒe ha bliboa ƒe sisi. Eyata Ehud gbɔ dzi ɖi. Ɣeyiɣi kpui si wòtsɔ nɔ Eglon gbɔ la kpe ɖe eŋu wònya fiasã la ƒe teƒeteƒewo eye wòkpɔ alesi fia la ŋudzɔnyawo le.

Esi woɖo ‘kpegbãƒe siwo nɔ Gilgal gbɔ’ la, Ehud trɔ le wo tɔwo yome eye wòtrɔ va Eglon ƒe fiasã me. Ehud kpɔ ɣeyiɣi vi aɖe bu eƒe nugbeɖoɖoa ŋu eye wòdo gbe ɖa bia Yehowa ƒe yayra esi wòzɔ azɔli si gogo kilometa eve la gbɔna.—Ʋɔnudrɔ̃lawo 3:19.

Ehud Trɔ Gbɔ

Anɔ eme be woxɔ Ehud atuu va fiasã la me esi wòtrɔ gbɔ. Ðewohĩ nudzɔdzɔ gbogbo si wotsɔ vɛ na Eglon la na dzi nɔ edzɔm. Ate ŋu anye be togbɔ be sasrãkpɔ gbãtɔa nɔ kpuie hã la, ena mɔnukpɔkpɔ Ehud be kadodo va ɖo wo kple fia la dome. Eɖanye kae o, Ehud trɔ va Eglon gbɔ.

Ehud gblɔ be: “Fia, nya ɣaɣla aɖe le asinye na wò!” Alesi wòte ŋu va ɖo afisia ke la fia be Yehowa nɔ mɔ fiamee. Gake kuxi aɖe nɔ eŋu. Ehud mate ŋu agblɔ “nya ɣaɣla” si wòtsɔ vɛ la le fia subɔviwo ƒe ŋkume o. Ne Yehowa ade asi eme la, ke Ehud hiã kpekpeɖeŋu ma enumake. Fia la ɖe gbe be: “Ðoɖoe nezi!” Esi Eglon medi be woase “nya ɣaɣla” sia o ta la, enyã eƒe subɔviwo. Kpɔ alesi Ehud agbɔ fũ la ɖa!—Ʋɔnudrɔ̃lawo 3:19.

Eglon bɔbɔ nɔ eƒe dziƒoxɔ me esime Ehud va egbɔ va gblɔ nɛ be: “Mehe Mawu ƒe gbe vɛ na wò!” Esi Ehud yɔ “Mawu” la, anye Kemos ye wòwɔnɛa? Ðewohĩ nenemae Eglon susui. Nya la wɔ dɔ ɖe edzi wòtso le eƒe fiazikpui dzi nɔ to dzi le tsitrenu. Ehud te ɖe eŋu, anye be ezɔ aɖaŋutɔe be fia la naganya be egbɔna nane wɔ ge ye o. Ke elũ ɖe edzi enumake, “Ehud do mia ɖa di adekpui la le ɖusiklito heƒo ɖe dɔme [na Eglon], ale be atia ke hã bu ɖe me, eye ami nyè tsyɔ adekpui la; mete ŋu ɖe adekpui la le dɔme nɛ o, elabena enu do go ɖe megbe.”—Ʋɔnudrɔ̃lawo 3:20-22.

Fia ƒe subɔviwo nɔ dodonu le afima bɔkɔɔ. Gake Ehud ŋu mefa haɖe o. Eglon ƒe subɔviawo ate ŋu age ɖe xɔa me ʋla ɣesiaɣi akpɔ woƒe fia si mu dze anyi la ƒe kukua. Ehiã be Ehud nasi adzo kaba! Edo ʋɔ ɖe enu eye wòsi to dziƒoxɔa ƒe yaxɔƒe.—Ʋɔnudrɔ̃lawo 3:23, 24a.

Keke Ðe Eŋu Kple Dziɖuɖukpɔkpɔ

Esi wòwɔ sẽ la, nya la me meganɔ kɔkɔm na Eglon ƒe subɔviwo o. Gake dzi meble wo be woagblẽ dalĩ si me woyi la me ne fia la nava ado dziku ɖe wo ŋu o. Ke wokpɔ be wotu dziƒoxɔa ƒe ʋɔtruwo. Wobu be “afɔdzi dem wòanya le le yaxɔƒe la.” Gake esi eteƒe nɔ didim la, nya si me menɔ kɔkɔm na wo la na wotsi dzodzodzoe. Dzi meganya le dodom na Eglon ƒe subɔviwo o. “Wotsɔ safui va ʋu [dziƒoxɔa ƒe] ʋɔ lae, eye kpɔ ɖa, woƒe amegã la ku ɖe anyigba.”—Ʋɔnudrɔ̃lawo 3:24b, 25.

Ɣemaɣi la, Ehud ya si dzo. Eto Gilgal ƒe kpegbãƒea do eye wòva ɖo Seira, si nye teƒe aɖe le Efrayim ƒe towo dome. Ehud yɔ Israel-ŋutsuwo eye wònɔ ŋgɔ na wo katã wova dze Moabitɔwo dzi. Nuŋlɔɖia gblɔ be “wowu Moabitɔwo anɔ ame akpe ewo ɣemaɣi, ŋutsu, siwo nye ame kakowo kple aʋamewo, eye ame ɖeka hɔ̃ hã mesi o.” Esi woɖu Moabitɔwo dzi la, Israel-nyigba dzi fa ƒe 80 sɔŋ.—Ʋɔnudrɔ̃lawo 3:26-30.

Nusɔsrɔ̃ tso Ehud ƒe Kpɔɖeŋua Me

Mawu dzixɔse ye ʋã Ehud. Hebritɔwo ta 11 meyɔ eŋkɔ tẽ be enɔ amesiwo “ɖu fiaɖuƒewo dzi to xɔse me, . . . wosẽ ŋu le aʋawɔwɔ me, eye wosi futɔwo ƒe aʋakɔwo” dome ya o. (Hebritɔwo 11:33, 34) Gake hã, Yehowa nɔ megbe na Ehud esi wòwɔ nu le xɔse me tsɔ ɖe Israel tso Fia Eglon ƒe ŋutasesẽ me.

Ehud ƒe nɔnɔmewo dometɔ ɖekae nye dzideƒo. Ele be dzi nanɔ eƒo hafi wòaƒo yi ɖe ame wòayi eme nenema. Megahiã be mí Mawu subɔla siwo li egbea ya míatsɔ yi ɖe ame ŋu o. (Yesaya 2:4; Mateo 26:52) Gake míezãa “gbɔgbɔ ƒe yi” la si nye Mawu ƒe Nya la. (Efesotɔwo 6:17) Ehud bi ɖe eƒe lãnu la zazã me. Ehiã be míawo hã míabi ɖe Mawu ƒe Nya la zazã me esime míele gbeƒã ɖem Fiaɖuƒe nyanyuia. (Mateo 24:14) Ðokuisi Biblia sɔsrɔ̃, Kristotɔwo ƒe kpekpewo dede edziedzi, dzonɔameme tsɔtsɔ wɔ subɔsubɔdɔ lae, kple ŋuɖoɖo ɖe mía Fofo si le dziƒo ŋu le gbedodoɖa me akpe ɖe mía ŋu be míasrɔ̃ nɔnɔme siwo Ehud, amesi si xɔse kple dzideƒo nɔ vavã, ɖe fia la.

[Etenuŋɔŋlɔwo]

[Nɔnɔmetata si le axa 31]

Ehud kple eƒe amewo tsɔ nudzɔdzɔ yi na Fia Eglon

[Afi Si Míexɔ Mɔɖeɖe Tso]

Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s mee míeɖe nutataa tsoe