Àte Ŋu Anɔ Te Ðe Dziɖeleameƒo Nu!

NUNYALA aɖe ŋlɔ ɣeaɖeɣi be: “Ne ègbɔdzɔ le xaxaɣi la, ekema ŋusẽ boo mele ŋuwò o.” (Lododowo 24:10) Ne dzi ɖe le ƒowò kpɔ la, ɖewohĩ àlɔ̃ ɖe nya ma dzi.

Ame aɖeke meli si ƒo dzi meɖena le o. Ðewohĩ ŋkeke ɖeka alo eve koe dziɖeleameƒo si nu mesẽ akpa o la anɔ anyi. Gake ne enye dzivenya alo dzikunya ye la, kuxia ate ŋu anɔ anyi wòadidi wu. Dzi ɖe le Kristotɔ aɖewo siwo wɔ nuteƒe ƒe geɖe la ƒo ale gbegbe be wodzudzɔ hame ƒe kpekpewo dede kple gomekpɔkpɔ le gbeadzisubɔsubɔdɔa me.

Ne dzi ɖe le ƒowò la, lé dzi ɖe ƒo! Subɔla wɔnuteƒe siwo nɔ anyi le blema ɣeyiɣiwo me la nɔ te ɖe dziɖeleameƒo nu dzidzedzetɔe, eye le Mawu ƒe kpekpeɖeŋu me la, wò hã ate ŋui.

Ne Amewo Do Nuxaxa na Wò

Màte ŋu akpɔ mɔ be womawɔ ameŋumabunu alo tamemabunu aɖeke ɖe ye ŋu o. Gake àte ŋu agbe be yemaɖe mɔ be ame bubuwo ƒe blibomademade nado kplamatse yeƒe Yehowa subɔsubɔ o. Ne ame aɖe do nuxaxa na wò la, ɖewohĩ ŋugbledede le alesi Samuel dada, Xana, wɔ nui ɖe nɔnɔme ɖedzileameƒo ŋu akpe ɖe ŋuwò.

Xana nɔ vi dim vevie, elabena etsi ko. Atsusia, Penina, dzi ŋutsuviwo kple nyɔnuviwo xoxo. Le esi teƒe be Penina nawɔ nu ɖe Xana ŋu nublanuikpɔnametɔe la, ebunɛ abe futɔ ene eye wòwɔa nu ɖe Xana ŋu ale gbegbe be “wòléa avi me, eye wòdoa kpo nu ɖuɖu.”—Samuel I, 1:2, 4-7.

Gbeɖeka Xana yi gbedoɖaƒe le avɔgbadɔa me. Israel nunɔlagã, Eli, kpɔe be eƒe nuyiwo nɔ ʋaʋãm. Esi Eli medze sii be gbe domee Xana nɔ ɖa o ta la, eƒo nya ta be anya mu aha. Ebiae be: “Ɣekaɣi namu aha ase ɖo? Na wein la nakɔ le mo na wò!” (Samuel I, 1:12-14) Àte ŋu akpɔ alesi Xana ase le eɖokui mee ɖa le susu mea? Ðe wòva avɔgbadɔa me be woade dzi ƒo na ye. Le nyateƒe me la, mebui kura be ŋutsu siwo kpɔ ŋusẽ ɖe ame dzi wu le Israel la dometɔ ɖeka atsɔ nya ɖe ye ŋu vodadatɔe o!

Esia ate ŋu ana dzi naɖe le Xana ƒo vevie. Ate ŋu ado le avɔgbadɔa me enumake ahaka atam be zi alesi Eli gakpɔtɔ le subɔsubɔm le afima abe nunɔlagã ene la, yemagatrɔ ayi gbeɖe o. Gake edze ƒã be Xana de asixɔxɔ eya kple Yehowa dome ƒomedodo ŋu. Enya be ne yeɖe afɔ ma la, madzɔ dzi nɛ o. Avɔgbadɔa nye tadedeagu dzadzɛtɔ teƒe. Yehowa ƒe ŋkɔ le teƒe ma ŋu. Eye togbɔ be Eli nye ame madeblibo hã la, enye Yehowa teƒenɔla si wotia.

Alesi Xana wɔ nui ɖe nya si Eli tsɔ ɖe eŋu la ŋu le mawusosroɖa me nye kpɔɖeŋu nyui aɖe na mí egbea. Meɖe mɔ wotso enu vodadatɔe o, ke boŋ ewɔ nu bubutɔe. Eɖo ŋu be: “Gbeɖe, nye aƒetɔ, nyɔnu nuxala menye, nyemeno wein alo aha muame aɖeke o; ke boŋ nye dzimenyawoe meɖe ɖe go le Yehowa ŋku me. Megabu wò dɔlanyɔnu ame ɖigbɔe o, nye hiãwo kple nuxaxawo ŋu meƒo nu le vaseɖe fifi!”—Samuel I, 1:15, 16.

Ðe Xana gblɔ kuxi si nɔ fu ɖem nɛa? Ẽ. Ke hã eƒo nu na Eli ŋuɖɔɖotɔe eye mete kpɔ be yeatsɔ nya ɖe eŋu le eƒe aʋatsonutsotsoa ta o. Eyata eya hã wɔ nu tufafatɔe ɖe eŋu hegblɔ be: “Yi le ŋutifafa me, Israel ƒe Mawu la awɔ nusi nèbiae la na wò!” Esi wokpɔ nyaa gbɔ ta la, Xana “lé eƒe mɔ, eye wòɖu nu, eye megato mo azɔ o.”—Samuel I, 1:17, 18.

Nukae míesrɔ̃ tso nuŋlɔɖi sia me? Xana wɔ nu enumake tsɔ ɖɔ masɔmasɔ aɖe ɖo, gake ewɔ esia le bubu deto me. Nusi do tso emee nye be, ƒomedodo nyui gakpɔtɔ nɔ eya kple Yehowa kpakple Eli dome. Aleke gbegbe dzeɖoɖo nyui kple ŋuɖɔɖɔɖo vie te ŋu tsia kuxi suewo nu zi geɖe be womagava zu kuxi gãwo o enye si!

Ele be míanyae be ame nɔewo dome masɔmasɔwo gbɔ kpɔkpɔ bia ɖokuibɔbɔ kple asitɔtrɔ wɔwɔ tso akpa evea gbɔ. Ne haxɔsetɔ aɖe sẽ dzi me ɖe agbagba siwo dzem nèle be yewoakpɔ masɔmasɔ aɖe gbɔ ŋu la, ahiã be nagble nyaa ɖe Yehowa si me ahaka ɖe edzi be akpɔ egbɔ le eya ŋutɔ ƒe ɣeyiɣi ɖoɖi dzi kple eƒe mɔ nu.

Ðe Subɔsubɔmɔnukpɔkpɔ aɖe Ge le Asiwòa?

Ame aɖewo lé blanui le esi wòhiã be woaɖe asi le Mawu subɔsubɔ ƒe mɔnukpɔkpɔ aɖe si gbɔ womelɔ̃a nu le o ŋu ta. Wo nɔviwo subɔsubɔ dzɔa dzi na wo, eye ne mɔnukpɔkpɔa bu la, wosena le wo ɖokui me be viɖe aɖeke megale yewo ŋu na Yehowa alo na eƒe habɔbɔa o. Ne nenemae nèsena le ɖokuiwò me la, ŋugbledede le Biblia ŋlɔla Marko, si wogayɔna be Yohanes, ƒe nuteƒekpɔkpɔ ŋu ate ŋu ana gɔmesese nyui nasu asiwò.—Dɔwɔwɔwo 12:12.

Marko kplɔ Paulo kple Barnaba ɖo le woƒe dutanyanyuigbɔgblɔ mɔzɔzɔ gbãtɔ me, gake le mɔzɔzɔa ƒe domedome la, egblẽ wo ɖi hetrɔ yi Yerusalem. (Dɔwɔwɔwo 13:13) Emegbe la, Barnaba di be yewoakplɔ Marko ɖe asi le mɔzɔzɔ bubu me. Gake Biblia gblɔ be: “Paulo ɖo bena, yewomatsɔ amesia, si trɔ le wo yome le Pamfilia, eye meyi ɖawɔ dɔ kpli yewo o la, akpe ɖe yewo ɖokui ŋu o.” Barnaba melɔ̃ ɖe edzi o. Nuŋlɔɖia yi edzi be: “Eye wòzu dɔmedzoe na wo, eye [Paulo kple Barnaba ma] tso wo nɔewo gbɔ. Barnaba tsɔ Marko kpe ɖe eɖokui ŋu, eye woɖo ʋu yi Kipro. Ke Paulo tia Sila kpe ɖe eɖokui ŋu, eye [wodze mɔ] heyi.”—Dɔwɔwɔwo 15:36-40.

Anya te ɖe Marko dzi vevie be wòase be apostolo Paulo si ŋu wodea bubui la medi be yeawɔ dɔ kpli ye o eye be yeƒe dzedze ŋuti nyaʋiʋlie de masɔmasɔ Paulo kple Barnaba dome. Gake nyaa mese ɖe afima o.

Paulo kple Sila gakpɔtɔ hiã mɔzɔhati aɖe kokoko. Esi woɖo Listra la, wokpɔ ame aɖe, si nye ɖekakpui si ŋkɔe nye Timoteo, be woatsɔ aɖo Marko teƒe. Timoteo anya xɔ nyɔnyrɔ ƒe eve alo ƒe etɔ̃ koe nye ma wotiae. Gake Marko ya nɔ ha dem kple Kristo-hamea tso esime woɖoe anyi ke—le nyateƒe me la, do ŋgɔ na Paulo ŋutɔ hã xoxoxo. Ke hã Timoteo ye xɔ dɔdasi ƒe mɔnukpɔkpɔa.—Dɔwɔwɔwo 16:1-3.

Aleke Marko wɔ nui esime wòse be wotsɔ ame bubu si metsi o eye nuteƒekpɔkpɔ boo aɖeke mele esi o la ɖo ye teƒee? Biblia megblɔe o. Ke hã eɖee fia be Marko yi Yehowa subɔsubɔ dzi moveviɖoɖotɔe. Ewɔ mɔnukpɔkpɔ si nɔ esi la ŋudɔ bliboe. Togbɔ be mete ŋu subɔ kple Paulo kpakple Sila o hã la, ete ŋu zɔ mɔ kple Barnaba yi Kipro, si nye Barnaba de. Marko subɔ kple Petro hã le Babilon. Mlɔeba, mɔnukpɔkpɔ su esi be wòwɔ dɔ kple Paulo—kpakple Timoteo—le Roma. (Kolosetɔwo 1:1; 4:10; Petro I, 5:13) Emegbe gbɔgbɔ ʋã Marko gɔ̃ hã be wòŋlɔ Nyanyui gbalẽ eneawo dometɔ ɖeka!

Nusɔsrɔ̃ xɔasi aɖe le esia katã me. Marko mena mɔnukpɔkpɔ si ge le esi la vee ale gbegbe be wòɖe ŋudzedzemakpɔmakpɔ fia ɖe mɔnukpɔkpɔ siwo ŋudɔ wòagate ŋu awɔ la ŋu o. Marko do vevie nu le Yehowa subɔsubɔ me, eye Yehowa yrae.

Eyata ne mɔnukpɔkpɔ aɖe ge le asiwò la, dzi megaɖe le ƒowò o. Ne èlé nɔnɔme nyui me ɖe asi eye nèdo vevie nu la, mɔnukpɔkpɔ bubuwo ate ŋu asu asiwò. Dɔ geɖe li woawɔ le Aƒetɔ la ƒe dɔa me.—Korintotɔwo I, 15:58.

Dzi Ðe Le Subɔvi Wɔnuteƒe aɖe Ƒo

Xɔse la ta ʋiʋli menye nu bɔbɔe o. Ɣeaɖewoɣi la, dzi aɖe le ƒowò. Emegbe àbu fɔ ɖokuiwò be dzi ɖe le ye ƒo, ahaƒo nya ta be mele be Mawu subɔla wɔnuteƒe nase le eɖokui me nenema gbeɖe o. Bu tame le Israel ƒe nyagblɔɖila veviwo dometɔ ɖeka, si nye Eliya, ŋu kpɔ.

Esi Israel Fianyɔnu Izebel, si hea zazɛ̃nya le Baal subɔsubɔ me, se be Eliya wu Baal ƒe nyagblɔɖilawo la, eka atam be yeawu eya hã. Eliya nɔ te ɖe futɔ siwo sesẽ wu Izebel nu kpɔ, gake enumake la, dzi ɖe le eƒo ale gbegbe be wòdi be yeaku. (Fiawo I, 19:1-4) Aleke ema te ŋu dzɔe? Eŋlɔ nane be.

Eliya ŋlɔ be be yeatrɔ ɖe Yehowa ŋu be Wòado ŋusẽ ye. Amekae na ŋusẽ Eliya wòtsɔ fɔ ame kukuwo ɖe tsitre henɔ te ɖe Baal ƒe nyagblɔɖilawo nu? Yehowae. Le nyateƒe me la, Yehowa ate ŋu ana ŋusẽ si wòatsɔ anɔ te ɖe Fianyɔnu Izebel ƒe dɔmedzoea nu hafi.—Fiawo I, 17:17-24; 18:21-40; Korintotɔwo II, 4:7.

Kakaɖedzi si le amesiame si ɖe Yehowa ŋu la ate ŋu aʋuʋu vie ɣeaɖewoɣi. Abe Eliya ene la, ɖewohĩ àtsɔ amegbetɔ ƒe nukpɔsusu akpɔ kuxi aɖee ɣeaɖewoɣi tsɔ wu be nàzã “nunya, si tso dziƒo la” atsɔ akpɔ egbɔe. (Yakobo 3:17) Gake Yehowa megblẽ Eliya ɖi le gbɔdzɔgbɔdzɔ sue sia ta o.

Eliya si yi Beer-Seba eye wòto edzi yi gbedadaƒo, afisi wòbu be ame aɖeke mate ŋu ake ɖe ye ŋu le o. Gake Yehowa ke ɖe eŋu. Edɔ mawudɔla ɖa be wòava afa akɔ nɛ. Mawudɔla la kpɔ egbɔ be Eliya kpɔ abolo dzodzoe ɖu kple tsi vivi no. Esi Eliya ɖi ɖe eme vɔ la, mawudɔla la fia mɔe be woazɔ mɔ si ade kilometa 300 ayi Xoreb-to dzi afisi Yehowa agado ŋusẽe ɖe edzi le.—Fiawo I, 19:5-8.

Le Xoreb-toa dzi la, Eliya kpɔ Yehowa ƒe ŋusẽ ɖeɖefia aɖe si do ŋusẽ eƒe xɔse. Emegbe Yehowa tsɔ gbe ɖɔɖɔe fatu aɖe gblɔ nɛ kakaɖedzitɔe be metsi akogo o. Togbɔ be Eliya menya o hã la, Yehowa nɔ eŋu, eye nɔvia 7,000 hã nɔ eŋu. Mlɔeba, Yehowa de dɔ asi nɛ be wòawɔ. Meɖe asi le Eliya ŋu abe eƒe nyagblɔɖila ene o!—Fiawo I, 19:11-18.

Kpekpeɖeŋu Li

Ne dzi ɖena le ƒowò vie ɣeaɖewoɣi la, àkpɔe be wò dzi adze eme ne èɖi ɖe eme alo ɖu nu si me nunyiame le. Nathan H. Knorr, amesi nye Yehowa Ðasefowo ƒe Dziɖuhaa me tɔ vaseɖe esime wòku le ƒe 1977 me, gblɔ ɣeaɖeɣi be zi geɖe la, kuxi gãwo dzena nusi le sue wu le alɔ̃dɔdɔ aɖi ɖe eme le zãme megbe. Gake ne kuxia gbe vɔvɔ la, esia ɖeɖe masu o—àhiã kpekpeɖeŋu be nàtsɔ awɔ aʋa kple dziɖeleameƒo.

Yehowa dɔ mawudɔla aɖe ɖa be wòava do ŋusẽ Eliya. Egbea, Mawu dea dzi ƒo na mí to hamemegãwo kple Kristotɔ tsitsi bubuwo dzi. Hamemegãwo ate ŋu anye “sitsoƒe tso ya nu” nyateƒe. (Yesaya 32:1, 2) Gake be nàkpɔ dzideƒo tso wo gbɔ la, ahiã be nàwɔ afɔɖeɖea. Togbɔ be dzi ɖe le Eliya ƒo nenema gbegbe hã la, ezɔ mɔ yi Xoreb-to dzi va xɔ nufiame tso Yehowa gbɔ. Míexɔa nufiame doŋusẽamewo to Kristo-hamea dzi.

Ne míexɔ kpekpeɖeŋu hetsɔ dzideƒo kpe akɔ kple dodokpɔwo, abe dzivedoname alo mɔnukpɔkpɔ ƒe gege le ame si ene la, míedea Yehowa dzi le nya vevi aɖe gbɔ kpɔkpɔ me. Nya kae? Satana he nya be ɖokuitɔdidi tae amegbetɔwo subɔa Yehowa ɖo. Satana megbe be míasubɔ Mawu ne nusianu tsɔ afɔ nyuie le míaƒe agbe me o, ke boŋ egblɔ be ne kuxiwo tu mí la, míadzudzɔ Mawu subɔsubɔ. (Hiob, ta 1 kple 2) Ne míeyi edzi subɔ Yehowa maʋamaʋae le dziɖeleameƒo me gɔ̃ hã la, míate ŋu ana kpekpeɖeŋu be woaɖo Abosam ƒe aʋatso nutsotsoa ŋu.—Lododowo 27:11.

Kuxiwo va Xana, Marko, kple Eliya dzi siwo na wobu woƒe dzidzɔkpɔkpɔ vie. Gake wonɔ te ɖe woƒe kuxiawo nu henɔ agbe si ŋu viɖe le. Le Yehowa ƒe kpekpeɖeŋu me la, wò hã àte ŋu anɔ te ɖe dziɖeleameƒo nu!