Dzɔdzɔenyenye Doa Dukɔ Ðe Dzi

NE TSI dza ŋkeke geɖe heke vɔ la, enyea dzidzɔ ŋutɔ be woafɔ ahakpɔ be yame kɔ nyuie eye ŋdɔ le ʋuʋum! Ede fafa anyigba la, eye nukuwo ate ŋu atsi ade ama nyuie. Yehowa Mawu zã kpɔɖeŋu sia tɔgbe ɣeaɖeɣi tsɔ ɖɔ dziɖuɖu dzɔdzɔe ƒe yayrawo. Egblɔ na Fia Dawid be: “Amesi ɖu amegbetɔwo dzi dzɔdzɔe kple amesi ɖu dzi le mawuvɔvɔ̃ me la, le abe alesi ŋdi kɔna, ne ɣe dze ene, ele abe ŋdi, si alilikpo aɖeke medo o ene, eye ele abe keklẽ, si nana gbe miena tso anyigba me le tsidzadza megbe ene.”—Samuel II, 23:3, 4.

Mawu ƒe nyawo va eme le Dawid vi, Fia Salomo, ƒe dziɖuɣi dzɔdzɔe la me. Biblia gblɔ tso eŋu be: “Yuda kple Israel dome amesiame nɔ eƒe weinka kple gboti te bɔkɔɔ tso Dan vaseɖe Beer-Seba le Salomo ƒe agbe me ŋkekewo me.”—Fiawo I, 5:5.

Blema Israel nye Mawu ƒe dukɔ tiatia. Etsɔ eƒe sewo na wo eye wògblɔ na wo be ne wose yeƒe gbe la, ekama yeatsɔ wo “aɖo gã ɖe anyigba dzi dukɔwo katã nu.” (Mose V, 28:1) Menye Israel ŋutɔ ƒe dzɔdzɔenyenyee do wo ɖe dzi o ke Yehowa ƒe dzɔdzɔenyenye ye. Se siwo Mawu na wo la de ŋgɔ boo wu dukɔ siwo ƒo xlã wo ƒe sewo. Esi wonye amegbetɔwo ta la, wonye blibomadelawo abe dukɔ siwo katã ƒo xlã wo ke ene. Eyata Yehowa ƒe Se deŋgɔ la kple alesi wolé eme ɖe asi goŋgoŋ gbɔe wòtso be wodo wo ɖe dzi wu dukɔwo. Ne wowɔ ɖe Yehowa ƒe sewo dzi la, wokpɔa eƒe ŋudzedzekpɔkpɔ kple yayra. Fia Salomo kpɔ esia teƒe le eƒe dziɖuɣi. Ete ŋu gblɔ be: “Dzɔdzɔenyenye doa dukɔ ɖe dzi; ke,” exlɔ̃ nu be, “nuvɔ̃ enye anyigbadzitɔwo ƒe ahɔhlɔ̃bɔbɔ.”—Lododowo 14:34.

Nublanuitɔe la, woɖiɖi Israel-dukɔa ɖe anyi le woƒe tomaɖomaɖo edziedzi ta. Dukɔ bliboa ɖu ŋukpe. Esia wɔe be wogbe wo kura eye gbɔgbɔ me dukɔ yeye aɖe va xɔ ɖe eteƒe.—Mateo 21:43.

Gbɔgbɔ me Israel

Gbɔgbɔ ʋã Yakobo si nye Yuda-vidzidzi wògblɔ le Kristotɔwo ƒe dziɖuha la ƒe takpekpe me le Yerusalem be Mawu “kpɔ trɔ̃subɔlawo . . . bena yeaxɔ dukɔ tso wo dome hena eƒe ŋkɔ la.” (Dɔwɔwɔwo 15:14) Apostolo Paulo yɔ Kristotɔwo ƒe dukɔ yeye sia be “Mawu ƒe Israel.” (Galatiatɔwo 6:16) Petro ŋlɔ tso tameɖoɖo si le woƒe yɔyɔa ŋu be: “Miawoe nye dzidzime tiatia la, fia nunɔlanyenye, dukɔ kɔkɔe, dukɔ, si nye Mawu ŋutɔ tɔ, bene miaɖe gbeƒã amesi yɔ mi tso viviti me va ye ŋutɔ ƒe nukukekeli gbɔ la, ƒe nutsuwɔwɔwo afia.” (Petro I, 2:9) Esi wonye Mawu ƒe dukɔ tiatia ta la, ele be woaklẽ abe akaɖiwo ene le xexeame. Yehowa ƒe dzɔdzɔenyenye ado wo ɖe dzi.—Filipitɔwo 2:15.

Woate ŋu atsɔ gbɔgbɔ me Israel-vi siawo tiatia asɔ kple diamond kuku. Ne woku ke si me diamond le va gota la, ɖewohĩ karat 1 (miligram 200) ko woakpɔ le ke tɔn 3 me. Mɔnu si wozãna tsã tsɔ ɖea diamand lae nye be woablu kea le tsi me akɔ ɖe kplɔ̃ siwo dzi wotsɔ ami sisi ɖo la dzi. Tsi meɖoa diamond o eyata woléna ɖe amia ŋu eye tsia kplɔa ɖia dzonae. Le nɔnɔme sia me la, diamond la ŋuti mezrɔ̃ haɖe o. Gake ne wozrɔ̃ wo ŋu hekɔ wo ŋu la, woƒe akpa ɖesiaɖe klẽna.

Woɖe Yehowa ƒe amewo ɖe vovo tso xexeame abe diamond si tsi meɖona o eye menye ɖinu siwo ƒo xlãe ƒe akpa ɖeke o la ene. (Yohanes 17:16) Esi wohe wo va kekeli gbɔ zi gbãtɔ la, anye be womenɔ keklẽm o. Gake Yehowa ƒe Nya kple gbɔgbɔ na amenyenye yeye wo eye woklẽna abe akaɖiwo ene le xexe sia me. Menye woawo ŋutɔ ƒe dzɔdzɔenyenye tae wodo wo ɖe dzi eye woklẽa Fiaɖuƒe nyateƒe la ƒe ŋutikɔkɔe kekeli la le goawo katã me o, ke Yehowa ƒe dzɔdzɔenyenye tae.

Gake le ƒe alafa gbãtɔ M.Ŋ. ƒe nuwuwu lɔƒo la, xɔsegbegbe va tra ɖe hameawo me eye wògblẽ nu le ame geɖe ŋu. Yeaɖi Kristotɔwo va wɔ ɖeka kple xexemedukɔwo eye vovototo megava nɔ wo kple xexeme si ƒo xlã wo dome o.

Wogaɖo gbɔgbɔ me Israel-viwo ƒe ame susɔe nuteƒewɔlawo te egbea na Yehowa ƒe ŋudzedzekpɔkpɔ. Woɖe wo ɖokui ɖa tso xexeame eye wokɔ wo ɖokui ŋu tso “ŋutilã kple gbɔgbɔ ƒe ɖiƒoƒo sia ɖiƒoƒo me.” (Korintotɔwo II, 7:1) Esi wo ŋu dza eye wole dzɔdzɔe le Yehowa ŋkume ta la, woléa eƒe dzɔdzɔenyenye me ɖe asi. Esia na wole ŋudzedzekpɔkpɔ ƒe nɔƒe kɔkɔ aɖe tso xexemedukɔwo gbɔ. To woƒe gbeƒãɖeɖe Fiaɖuƒe ŋuti nyanyuia dzonɔamemetɔe me la, wohe ameha gã siwo tso dukɔwo me la va Yehowa gbɔ eye wova zu eƒe amewo.—Nyaɖeɖefia 7:9, 10.

Xexeame Le Vovototoa Kpɔm

Ɣeaɖewoɣi la, xexemedziɖulawo kafua Mawu ƒe amewo ƒe nɔnɔme. Ɣeaɖeɣi la, dedienɔnɔdzikpɔlawo ƒe amegã si le Pretoria Fefewɔƒe le South Africa la kafu Yehowa Ðasefo siwo tso ameƒomevi vovovowo me va zã teƒea na woƒe ƒe sia ƒe takpekpewo la ƒe agbenɔnɔ. Nya siwo wòŋlɔ̃ ƒe ɖee nye be: “Amesiame wɔ nudzeame, amewo ƒo nu kple gbeɖɔɖɔe na wo nɔewo, nɔnɔme si woɖe fia le ŋkeke ʋee siwo va yi me—wo katã ɖo kpe miaƒe habɔbɔa me tɔwo ƒe agbenyuinɔnɔ dzi, eye be mienɔa anyi ɖekae abe ƒome kpɔdzidzɔ ɖeka ene.”

Menye ƒuƒoƒo gã mawo me koe Yehowa ƒe amewo te ŋu wɔa nu be eƒe dukɔa nanɔ dzɔdzɔe o ke wowɔnɛ le woawo ŋutɔ ƒe agbenɔnɔ me hã. Le kpɔɖeŋu me, Gbetakpɔxɔ Habɔbɔa ƒe alɔdze si le South Africa xɔ agbalẽ tso nyɔnu aɖe si le Johannesburg gbɔ, si gblɔ be: “Le kwasiɖa si va yi me la, megblẽ nye gakotokuvi ɖe nye ʋu tame eye meho ʋua. Ege le Jan Smuts Mɔdodo dzi eye miaƒe hamevi ɖeka, Aƒetɔ R—, fɔe kple emenuwo katã, eye wòƒo ka nam gbugbɔe vɛ nam. . . . Mekpɔ ŋudzedze ɖe anukwareɖiɖi sia si tɔgbe megabɔ kura le fifi ɣeyiɣiwo me o la ŋuti ŋutɔ eye mekafu miaƒe hamea be eɖo gɔmeɖose siwo dzi miaƒe hameviwo zɔna ɖo la anyi.”

Ẽ, to Yehowa ƒe gɔmeɖose dzɔdzɔewo me lelé ɖe asi me la, ena eƒe amewo ɖe dzesi be woto vovo tso xexeame gbɔ. Esi amesiawo ɖea Yehowa ƒe dzɔdzɔenyenye fiana ta la, ehea dzianukwaretɔwo vaa Kristo-hamea me. Esɔ le dzɔdzɔme nu be nane si le kɔkɔe hele dzadzɛ la nahe ame. Le kpɔɖeŋu me, amedzro aɖe va Yehowa Ðasefowo ƒe kpekpe aɖe me le Zurich, Switzerland, eye wògblɔ be yedi be yeazu hamevi. Eɖe eme be woɖe ye nɔvinyɔnu le hamea me le agbegbegblẽnɔnɔ ta, eye wògblɔ kpee be yedi be yeanɔ habɔbɔ si “meɖea mɔ ɖe nɔnɔme gbegblẽ ŋu o” la me. New Catholic Encyclopedia kura gɔ̃ hã gblɔ be wonya Yehowa Ðasefowo be wonye “ƒuƒoƒo siwo wɔa nu nyui wu le xexeame la dometɔ ɖeka.”

Togbɔ be dzɔdzɔenyenye doa ame ɖe dzi hã la, nuvɔ̃ ate ŋu ahe ŋukpe ava ame ƒe ŋkɔ nyui dzi, vevietɔ ne nuvɔ̃ gã aɖe si wòwɔ la va le nyanya le nutoa me. Ele be ɣeaɖewoɣi Kristo-hamea nakpe akɔ kple ŋukpe si nuvɔ̃ gã aɖe si wo dometɔ aɖe wɔ la he va edzi. Susu le eme be hamea me tɔ nuteƒewɔlawo ate ŋu aʋli hamea ƒe ŋkɔ nyui la ta to eɖeɖefia be wohe to na nuvɔ̃wɔla la le nublanuikpɔkpɔ me, si nye be esɔ kple Ŋɔŋlɔawo ƒe gɔmeɖosewo. Ne ame aɖe wɔ nuvɔ̃ hegbe dzimetɔtrɔ la, woagbee le hamea me—woaɖee ɖa.—Korintotɔwo I, 5:9-13.

Nusita Woɖea Ame Aɖewo le Hamea Me

Togbɔ be woɖea ame akpe geɖe le Kristo-hamea me ƒe sia ƒe hã la, Ðasefo siwo ade miliɔn atɔ̃ le xexeame katã ƒe akpa sue aɖe koe xexlẽme ma nye. Nukatae wòle be woaɖe afɔ sesẽ ma ɖe ame ŋu le Kristo-hamea me? Nuvɔ̃ si ƒomevi wònye lae nye nusiwo dzi wonɔa te ɖo la dometɔ ɖeka. Gake nusi dzi wonɔa te ɖo wue nye nenye be nuvɔ̃wɔla la trɔ dzi me vavã tso nuvɔ̃ gã si wòwɔ me alo metrɔe o. Ne ese veve le dzi me vavã, ne etrɔ ɖe Yehowa ŋu le gbedodoɖa me, hebia be wòatsɔ nuvɔ̃ si yewɔ ɖe Eŋu ake ye, eye wòbia kpekpeɖeŋu tso amesiwo xɔ ŋgɔ le hamea me gbɔ la, woakpe ɖe eŋu be wòagakpɔ Mawu ƒe ŋudzedzekpɔkpɔ eye wòayi edzi anye hamea me tɔ.—Lododowo 28:13; Yakobo 5:14, 15.

Ne ɖevi si le ƒomedodo nyui ɖɔʋu aɖe me kple fofoa wɔ nane wòve fofoa la, ele be wo ame evea siaa natso kaba adzra ƒomedodo xɔasi ma ɖo. Nenema ke ne míetsɔ míaƒe agbe ɖe adzɔgbe na Yehowa la, míeva nɔa ƒomedodo xɔasitɔ me kplii. Eyata ne míewɔ nane si vee la, ele be míatso kaba adi mɔ si dzi míato adzra ƒomedodo ma ɖo kple míaƒe Dziƒofofo la.

Dzidzɔtɔe la, ame aɖewo siwo woɖe le hamea me la wɔ nu ɖe vi bubu la ŋuti kpɔɖeŋu dzi. Wotsɔ Yehowa sɔ kple Fofo lɔlɔ̃tɔ si le lɔlɔ̃m faa be yeagbugbɔ axɔ nuvɔ̃wɔla si trɔ dzi me eye wòdi Mawu ƒe tsɔtsɔke la ene. (Luka 15:11-24) Dzimetɔtrɔ vavãtɔ kple vɔ̃ tsitsri nye mɔ si dzi woato agbugbɔ va Yehowa ƒe ŋudzedzekpɔkpɔ kple Kristo-hamea me. Nuvɔ̃wɔla trɔdzime siwo dzi nu te ɖo le woƒe fɔɖiɖi ƒe agba te la dometɔ aɖewo trɔ dzi me eye wowɔ afɔɖeɖe gbugbɔ va Kristo-hame si me lɔlɔ̃ le la me. Eyata wova kpɔ gɔmesese na Yehowa ƒe nya siwo le Yesaya 57:15.

Satana adi be yeawɔe wòadze abe ɖe tsɔtsɔke meli na nuvɔ̃ si wowɔ la o ene, ale be woagatrɔ ava Yehowa ƒe beléle si me lɔlɔ̃ le la gbɔ o. Gake Kristo Yesu ƒe tafevɔsa la sẽ ŋu be wòatsyɔ dzimetrɔla ɖesiaɖe ƒe nuvɔ̃wo dzi—ẽ, nuvɔ̃ si dome “xexe blibo la” nyi gɔ̃ hã. (Yohanes I, 2:1, 2) Nuvɔ̃ ɖeka si dzi tafe la metsyɔna o lae nye esi wowɔ ɖe Mawu ƒe gbɔgbɔ kɔkɔe la ŋu, si nye eɖoɖo koŋ adze aglã ɖe Mawu ƒe gbɔgbɔ kɔkɔea ƒe dɔwɔwɔ ŋu, abe nuvɔ̃ gã si Yuda Iskariot kple agbalẽfialawo kpakple Farisitɔwo dometɔ geɖe wɔ la ene.—Mateo 12:24, 31, 32; 23:13, 33; Yohanes 17:12.

Yehowa ƒe Dzɔdzɔenyenye me Lelé ɖe Asi

Tso esime wogaɖo gbɔgbɔ me Israel-viwo ƒe ame susɔewo te ɖe Yehowa ƒe ŋudzedzekpɔkpɔ me le ƒe 1919 me la, wodo wo ɖe dzi geɖe wu tso xexeme si ƒo xlã wo gbɔ. Menye le woƒe nunyuiwɔwɔ tae o ke alesi wolɔ̃ faa bɔbɔ wo ɖokui ɖe Yehowa ƒe sewo kple dzidzenuwo te la tae. Esia na Kristo ƒe ‘alẽ bubu’ miliɔn geɖe va le ha dem kple gbɔgbɔ me Israel eye wonye zɔhɛ nuteƒewɔlawo. (Yohanes 10:16) Amesiawo hea ŋutikɔkɔe kple bubu vɛ na Yehowa le xexe si ɖe eɖokui ɖa xaa tso Mawu ƒe dzidzenu dzɔdzɔeawo gbɔ la me. Ele ko abe alesi South Africa magazine si nye Personality gblɔ ɣeaɖeɣi ene be: “Ewɔ abe nɔnɔme nyuiwo gba go le Yehowa Ðasefowo me eye wovo keŋkeŋ tso nusi nye vɔ̃ gbɔ kloe ene.”

Be woalé nɔƒe kɔkɔ si le wo si le xexe mavɔ̃mawu sia me ɖe asi la, ele be Kristo-hamea me tɔ ɖesiaɖe nanɔ agbe dzadzɛ, si le dzɔdzɔe, le Yehowa ŋkume. Nusiwo le dzadzɛ ye wotsɔ ɖɔ Yehowa ƒe dziƒohabɔbɔ lae le Biblia me. Wokpɔe abe nyɔnu dzetugbe aɖe si wotsɔ ɣe wɔ leke na eye ɣleti le eƒe afɔ te ene. (Nyaɖeɖefia 12:1) Woƒo nu tso Yerusalem Yeyea ŋu be enye du kɔkɔe dzeani aɖe. (Nyaɖeɖefia 21:2) Wona Kristo ƒe ŋugbetɔ nuteƒewɔlawo “aklalabiɖibiɖiwu dzadzɛ, si le dzo sim.” (Nyaɖeɖefia 19:8) Wokpɔ ameha gã la me tɔwo be “wodo awu ʋlaya ɣiwo.” (Nyaɖeɖefia 7:9) Amesiwo lɔ̃a dzɔdzɔenyenye la nyea zi vaa habɔbɔ si le dzadzɛ me. Gake Satana ƒe habɔbɔa mele dzadzɛ ne wotsɔe sɔ kplii o. Woƒo nu tso eƒe subɔsubɔnuɖoanyia ŋu be enye gbolo, eye woɖɔ amesiwo le du kɔkɔe la godo be wonye ame ƒoɖi makɔmakɔwo.—Nyaɖeɖefia 17:1; 22:15.

Wodo agbe mavɔ ŋugbe na ame dzɔdzɔewo. Mɔkpɔkpɔ le ameha si léa Yehowa ƒe dzɔdzɔenyenye me ɖe asi la si be woatsi agbe atso nuɖoanyi vɔ̃ɖi sia ƒe nuwuwu. Mawu do ŋugbe le Lododowo 1:33 be: “Amesi ɖoa tom la, anɔ anyi bɔkɔɔ, eye dzɔgbevɔ̃e ƒe ŋɔdzidoname maɖe dzi le eƒo o.”

Dzidzeme ka gbegbee nye si wòanye ne Salomo Gãtɔ, Kristo Yesu, le xexe yeyea dzi ɖum le dzɔdzɔenyenye kple Yehowa vɔvɔ̃ me! (Petro II, 3:13) Anɔ abe ŋdi si kɔna ne ɣe dze, ŋdi si alilikpo aɖeke medo o ene. Ne míagblɔe la, anyigbadzinɔlawo katã anɔ anyi le dedienɔnɔ me, amesiame abɔbɔ nɔ anyi ɖe eƒe weinka kple gboti te bɔkɔɔ. Ameƒome dzɔdzɔe la awɔ anyigba la wòadze ani eye woanɔ edzi le eƒe nɔƒe si sɔ nɛ le xexeame godoo la me be wòanye kafukafu mavɔ na mía Mawu Yehowa.—Mixa 4:3, 4; kpɔ Yesaya 65:17-19, 25 hã.

[Nɔnɔmetata Tsoƒe si le axa 26]

Garo Nalbandian