Srɔ̃ Woƒe Xɔse

Ekpɔ Akɔfafa Tso Eƒe Mawu Gbɔ

ELIYA nɔ du dzi le tsia me esi anyigba nɔ tsyɔtsyɔm. Mɔ legbe aɖe gale eŋgɔ hafi wòaɖo Yezreel, evɔ menye ɖekakpuie Eliya nye o. Ke hã, nu meti kɔ nɛ le dua ƒuƒu me o, elabena “Yehowa ƒe asi va” edzi. Ðikeke mele eme o be esiae nye zi gbãtɔ wòse le eɖokui me be ŋusẽ ɖo ye ŋu nenema gbegbe. Edze to sɔ siwo nɔ Fia Axab ƒe tasiaɖam la hem gɔ̃ hã ŋu!—1 Fiawo 18:46.

Fifia eɖe Fia Axab ɖe megbe ʋĩi, eye eya ɖeka nɔ dua dzi sesĩe. Àte ŋu akpɔ Eliya ɖaa le susu me, ale si wòle aɖaba ƒom le tsi si le hehlẽm ɖe eŋkume ta, eye wòle nu ɖedzesi si dzɔ teti koe nye ema la ŋu bum. Ðikekemanɔmee la, nu si dzɔ la he ŋutikɔkɔe vae na Eliya ƒe Mawu, Yehowa, eye wòdo tadedeagu vavãtɔ ɖe dzi. Egblẽ Karmel To la ɖe megbe ʋĩi azɔ, tsia le dzadzam vevie le afi ma hã, eye blukɔ do. To sia dzie Yehowa to Eliya dzi tu nu kple Baal subɔlawo le nukutɔe. Woɖe ha Baal nyagblɔɖila alafa geɖe be wonye alakpatɔ vɔ̃ɖiwo, eye esɔ be wowu wo. Eyome Eliya do gbe ɖa na Yehowa be wòana kuɖiɖi si va anyigba la dzi ƒe etɔ̃ kple afã la nu natso. Ale tsi dza!a—1 Fiawo 18:18-45.

Esi Eliya nɔ kilometa 30 ƒe du ma ƒum to tsia me ɖo ta Yezreel la, anya se le eɖokui me be tɔtrɔ gãwo le ŋgɔ gbɔna azɔ. Axab ƒe nɔnɔme atrɔ azɔ! Le nu siwo teƒe wòkpɔ fifia ta la, nu si wòate ŋu awɔ koe nye be wòadzudzɔ Baal subɔsubɔ, aɖo asi fiasrɔ̃ Izebel dzi, eye wòadzudzɔ Yehowa subɔlawo yome titi—aleae Eliya anya nɔ bubum le susu me.

Ne míaƒe didiwo le eme vam la, le dzɔdzɔme nu la, míenɔa mɔ kpɔm vevie be nuwo anyo. Ðewohĩ míanɔ bubum be nuwo ava de mía dzi wu, eye míaƒe kuxi sesẽwo ava zu gbeaɖegbenya. Mawɔ nuku na mí ne Eliya bu nuwo ŋu alea o, elabena enye “amegbetɔ si ƒe seselelãmewo sɔ kple mía tɔwo.” (Yakobo 5:17) Ke hã, kuxi geɖe gale ŋgɔ na Eliya. Le nyateƒe me la, gaƒoƒo aɖewo megbe la, vɔvɔ̃ aɖoe, eye dzi aɖe le eƒo ale gbegbe be ku adzroe. Nu kae va dzɔ? Eye nu kae Yehowa wɔ tsɔ do ŋusẽ eƒe nyagblɔɖilaa ƒe xɔse hena dzi ɖo eƒo? Na míakpɔe ɖa.

Nuwo Trɔ Bubui Kura

Esi Axab ɖo eƒe fiasã me le Yezreel la, ɖe wòwɔ nane si ɖo kpe edzi be etrɔ dzi me heva zu mawuvɔ̃la? Biblia gblɔ be: “Axab va to nu siwo katã Eliya wɔ kple ale si wòtsɔ yi wu nyagblɔɖilawo katãe la, na Izebel.” (1 Fiawo 19:1) De dzesii be Axab mehe susu yi Eliya ƒe Mawu, Yehowa dzi esi wònɔ ŋkekea me nudzɔdzɔwo dzi ɖem na srɔ̃a o. Axab nye ŋutilãmeme, eye ebu nukunu siwo dzɔ le ŋkekea me abe nu siwo dzɔ to amegbetɔ aɖe ƒe ŋusẽ me ko ene esi wògblɔ be ‘nu siwo Eliya wɔ.’ Edze ƒãa be mesrɔ̃ ale si wòle be wòade bubu Yehowa Mawu ŋu o. Ke aleke Izebel, hlɔ̃biala la, wɔ nui?

Edo dziku vevie! Le eƒe dɔmedzoe me la, eɖo du sia ɖe Eliya bena: “Mawuwo afiam agafiam ɖe dzi, ne nyemewɔ wò agbe etsɔ wɔle siawo abe wo dometɔ ɖeka ƒe agbe ene o fĩ!” (1 Fiawo 19:2) Esia nye ku ƒe ŋɔdzidoname si vloe wu ɖe sia ɖe. Nya mawo fia be Izebel nɔ atam kam be ye ŋutɔ yeaku ne yemete ŋu wu Eliya le ŋkekea me tsɔ bia hlɔ̃ ɖe yeƒe Baal nyagblɔɖilawo ta o. Kpɔe ɖa le susu me be le zã si tsi gã ma nɔ dzadzam me la, Eliya nyɔ tso alɔ̃ me le aƒe kpokploe aɖe si me wòdze le Yezreel, ko kasia, fiasrɔ̃ ƒe amedɔdɔe nye ema he gbedeasi dovoɖiname ma vae. Aleke wòwɔ nui?

Dzi Ðe Le Eƒo Eye Vɔvɔ̃ Ðoe

Ne Eliya nɔ esusum be aʋa si woho ɖe Baal subɔsubɔ ŋu ke vɔ la, ke akpɔe enumake be yeda ƒu ŋutɔ. Izebel mena ta o. Ede se wowu Eliya nɔvi nyagblɔɖila wɔnuteƒe geɖe xoxo, eye fifia edze abe Eliya dzie wòɖo ene. Biblia gblɔ na mí be: “Tete wòvɔ̃.” Ðe Eliya kpɔ ale si Izebel adi be yeawui ŋutasesẽtɔe la le susu mea? Ne ebu nya ma ŋu la, ke mewɔ nuku be dzi ɖe le eƒo o. Aleke kee wòɖale o, Eliya ‘dze mɔ le eƒe agbe ta,’ si fia be esi, le esi wònɔ vɔvɔ̃m be woawu ye ta.—1 Fiawo 18:4; 19:3.

Menye Eliya ɖeɖe koe nye xɔsetɔ si mete ŋu ɖu vɔvɔ̃ dzi o. Ƒe geɖe megbe la, apostolo Petro hã do go kuxi sia. Le kpɔɖeŋu me, esi Yesu na Petro zɔ le tsia dzi abe ale si eya ŋutɔ hã nɔ edzi zɔm ene la, apostoloa ‘kpɔ ale si ya la le ƒoƒom sesĩe.’ Esia na wòvɔ̃, eye wòde asi toyiyi me. (Mateo 14:30) Eya ta nufiame vevi aɖe le Petro kple Eliya ƒe nuteƒekpɔkpɔa me na mí. Ne míedi be dzi nanɔ mía ƒo la, mele be míaɖe mɔ míaƒe susu nanɔ nu dovoɖinamewo ŋu o. Ele be míana míaƒe susu nanɔ Ame si naa mɔkpɔkpɔ mí hedoa ŋusẽ mí la ŋu boŋ.

“Esɔ Gbɔ!”

Le vɔvɔ̃ ta la, Eliya si ɖo ta anyieheɣetoɖoƒe gome hezɔ kilometa 150 ƒe mɔ yi Beer-Seba, si nye du aɖe si te ɖe Yuda ƒe anyieheliƒo ŋu. Egblẽ eƒe subɔvia ɖe afi ma hesi ɖo ta gbe dzi. Nuŋlɔɖia gblɔ be ezɔ “ŋkeke ɖeka ƒe azɔli,” eya ta míate ŋu akpɔe le susu me be edze mɔ esi ɣe dze, eye edze ƒãa be medo mɔzɔgba aɖeke na eɖokui o. Vɔvɔ̃ kple nuteɖeamedzi ƒoe ɖe enu be wòle azɔlia dzi hele ŋusẽ dom nu le gbedzimɔ dzekpodzeʋeea dzi le ŋudɔkutsu dzatsɛ. Kaka ɣea nagba amigo la, nu te Eliya ŋu. Esi ɖeɖi te eŋu belibeli la, ebɔbɔ nɔ anyi ɖe dzoŋgbalẽti aɖe te—eya koe ganye fafɛƒe si wòkpɔ le dzogbenyigba ma dzi.—1 Fiawo 19:4.

Dzi ɖe le Eliya ƒo keŋkeŋ, eye wòdo gbe ɖa. Ebia be Mawu nana yeaku. Egblɔ be: “Nyemenyo wu fofonyewo o.” Enyae be ye fofowo zu ke kple ƒu le yɔ me ɖaa, eye womate ŋu akpe ɖe ame aɖeke ŋu o. (Nyagblɔla 9:10) Eliya se le eɖokui me be viɖe aɖeke megale ye ŋu o, abe woawo ke ene. Eya ta mewɔ nuku o be wògblɔ be: “Esɔ gbɔ!” Nu ka tae yegakpɔtɔ le agbe ɖo?

Ðe wòle be wòawɔ nuku na mí be dzi ɖe le Mawu ƒe ame aɖe ƒo alea gbegbea? Ao. Biblia ƒo nu tso ŋutsu kple nyɔnu nuteƒewɔla geɖe siwo lé blanui ale gbegbe be ku dzro wo la ŋu—wo dometɔ aɖewoe nye Rebeka, Yakob, Mose, kple Hiob.—1 Mose 25:22; 37:35; 4 Mose 11:13-15; Hiob 14:13.

“Ɣeyiɣi sesẽ siwo me nɔnɔ sesẽ” mee míele, eya ta mewɔ nuku o be dzi ɖena le ame geɖe ƒo ɣeaɖewoɣi, eye mawusubɔla wɔnuteƒewo hã le eme. (2 Timoteo 3:1) Ne èkpɔ ɖokuiwò le nɔnɔme wɔnublanui sia tɔgbi me la, srɔ̃ Eliya ƒe kpɔɖeŋu le go sia me: Gblɔ wò dzimenyawo na Mawu. Nyateƒeae nye be Yehowa ye nye ‘akɔfafawo katã ƒe Mawu’ la. (2 Korintotɔwo 1:3) Ðe wòfa akɔ na Eliya?

Yehowa Lé Eƒe Nyagblɔɖilaa Ðe Te

Aleke nèsusu be Yehowa se le eɖokui me esi wòle dziƒo kpɔ eƒe nyagblɔɖila lɔlɔ̃a wòmlɔ anyi ɖe atia te le gbe dzi hele kuku ɖem be wòana yeaku? Biblia akpe ɖe mía ŋu míakpɔ ŋuɖoɖoa. Esi Eliya yi alɔ̃ me la, Yehowa dɔ mawudɔla aɖe ɖe egbɔ. Mawudɔlaa ka asi Eliya ŋu wònyɔ, eye wògblɔ nɛ be: “Fɔ naɖu nu!” Eliya wɔ nenema, eye mawudɔlaa tsɔ tatali tɔtɔe kple tsi nɛ. Ðe wòda akpe na mawudɔlaa gɔ̃ hã ya? Nuŋlɔɖia gblɔ ko be eɖu nu no nu, eye wògamlɔ anyi. Ðe dzi ɖe le eƒo ale gbegbe be menya nya si wòagblɔ oa? Aleke kee wòɖale o, mawudɔlaa gava nyɔe ake, ɖewohĩ le fɔŋli. Egagblɔ na Eliya be, “Fɔ naɖu nu,” eye wògblɔ nya wɔdɔɖeamedzi sia kpee be, “elabena wò mɔ didi akpa!”—1 Fiawo 19:5-7.

Mawudɔlaa nya afi si Eliya ɖo tae, elabena Mawu ɖee fiae. Enya hã be Eliya mate ŋu azɔ mɔ legbee ma le eya ŋutɔ ƒe ŋusẽ me o. Aleke gbegbe wòfaa akɔ na míi ye nye esi be míasubɔ Mawu si nya míaƒe tameɖoɖowo, eye wònya afi si míaƒe ŋutete se ɖo! (Psalmo 103:13, 14) Aleke nuɖuɖu ma ɖe vi na Eliyae?

Biblia gblɔ be: “[Etsi tre] ɖu nu no nu, eye nuɖuɖu sia do ŋusẽe wòzɔ ŋkeke blane kple zã blane va se ɖe Mawu ƒe to Xoreb gbɔ.” (1 Fiawo 19:8) Abe ale si Mose wɔe ƒe alafa ade do ŋgɔ, eye Yesu hã wɔe ƒe akpe ɖeka kloe ene megbe la, Eliya hã tsi nu dɔ ŋkeke 40 kple zã 40. (2 Mose 34:28; Luka 4:1, 2) Nuɖuɖu ma meɖe eƒe kuxiwo katã ɖa o, gake edo ŋusẽe nukutɔe. Kpɔe ɖa le susu me be ŋutsu tsitsi ma le azɔli dzi le gbe dzi, afi si mɔdodowo mele o tso ŋkeke yi ŋkeke, hena kwasiɖawo va se ɖe esime wòzɔ ɣleti ɖeka kple afã kloe!

Yehowa doa ŋusẽ esubɔlawo egbea hã, menye to nuɖuɖu si doa ŋusẽ ame nukutɔe dzi o, ke boŋ le mɔ si le vevie wu nu. Enaa gbɔgbɔmenunyiame esubɔlawo. (Mateo 4:4) Nusɔsrɔ̃ tso Mawu ŋu le eƒe Nya la kple agbalẽ nyui siwo wotu ɖe Biblia dzi me doa ŋusẽ mí le gbɔgbɔ me. Gbɔgbɔmenunyiame mawo maɖe míaƒe kuxiwo katã ɖa ya o, gake woate ŋu akpe ɖe mía ŋu míado dzi le nɔnɔme sesẽ siwo ate ŋu awu tsɔtsɔ na mí hafi la me. Wokplɔa ame yia “agbe mavɔ” me hã.—Yohanes 17:3.

Eliya zɔ kilometa 320 kloe va se ɖe esi wòɖo Xoreb Toa gbɔ, si nye afi si Yehowa Mawu to eƒe dɔla aɖe dzi ɖe eɖokui fia Mose le ŋuve si le bibim la me le, eye wòganye afi si Yehowa wɔ Se ƒe nubabla la kple Israel viwo le emegbe. Eliya kpɔ agado aɖe le afi ma hebe ɖe eme.

Ale Si Yehowa Fa Akɔ Na Eƒe Nyagblɔɖilaa Hedo Ŋusẽ

Le Xoreb Toa gbɔ la, Yehowa ƒe “gbe,” si anɔ eme be eva na Eliya to mawudɔla aɖe dzi la, bia nya bɔbɔe sia: “Eliya, nu ka wɔm nèle le afi sia?” Anɔ eme be eƒo nu kple gbe blewu, elabena Eliya se egɔme be ɖe woɖe mɔ na ye be yeaɖe yeƒe dzimenyawo agblɔ. Eye eɖee gblɔ hã vavã! Egblɔ be: “Ðe meʋã ŋu ɖe Yehowa, aʋakɔwo ƒe Mawu la nu, elabena Israel-viwo gblẽ wò nubabla ɖi, wogbã wò vɔsamlekpuiwo ƒu anyi, eye wowu wò nyagblɔɖilawo kple yi; ke nye ɖeka koe kpɔtɔ, eye wole nye agbe dim be yewoaɖe ɖa.” (1 Fiawo 19:9, 10) Eliya ƒe nyawo na míekpɔ susu etɔ̃ ya teti siwo ta dzi ɖe le eƒo ɖo.

Gbã, Eliya se le eɖokui me be yewɔ dɔ vlo. Togbɔ be Eliya subɔ Yehowa ‘heʋã ŋu ɖe enu,’ eye wòdo Mawu ƒe ŋkɔ kɔkɔea kple eƒe tadedeagua ɖe dzi wu nu wo katã hã la, ekpɔe be ɖeko nɔnɔmeawo gavloe ɖe edzi. Dukɔ la mexɔ Mawu dzi se o kokoko, eye wodze aglã, ke alakpasubɔsubɔ ya le ta kekem. Evelia, Eliya se le eɖokui me be yetsi akogo. Egblɔ be, “nye ɖeka koe kpɔtɔ,” abe ke ɖe eya koe ganye Yehowa subɔla si kpɔtɔ ɖe dukɔa me ene. Etɔ̃lia, Eliya nɔ vɔvɔ̃m. Wowu nɔvia nyagblɔɖila geɖe xoxo, eye eka ɖe edzi be ye dzie wòɖo. Manya nɔ bɔbɔe na Eliya be wòagblɔ eƒe dzimenyawo o, gake meɖe mɔ dada alo ŋukpe wɔe be wògbe egbɔgblɔ o. Ale si wòɖe eƒe dzimenyawo gblɔ na Mawu le gbedodoɖa me la nye kpɔɖeŋu nyui aɖe na nuteƒewɔlawo katã.—Psalmo 62:9.

Nu kae Yehowa wɔ tso Eliya ƒe vɔvɔ̃ kple dzimaɖeɖia ŋu? Mawudɔlaa gblɔ na Eliya be wòava tsi tre ɖe agadoa nu. Eɖo to, gake menya nu si le ŋgɔ gbɔna o. Ya ʋuduʋudu aɖe ƒo! Yaƒoƒoa anya ɖe gbe sesĩe ŋutɔ, elabena enu sẽ ale gbegbe be towo wo, eye agakpewo tu wɔ. Kpɔe ɖa le susu me be Eliya tsyɔ asi ŋkume hele eƒe lãgbalẽwu titria xatsam ɖe eɖokui ŋu esime ya ʋuduʋudua le eƒe awua ƒom sesĩe. Ema yome la, ele be wòakpɔ nyuie be yemagadze anyi o, elabena anyigba te ʋuʋu sesĩe ale gbegbe! Ema yome teti ko la, dzo gã aɖe bi, si ƒoe ɖe enu be wòtrɔ yi ɖe agadoa me, bene yeakpɔ ye ɖokui ta tso dzogbɔgbɔ sesẽa nu.—1 Fiawo 19:11, 12.

Le nukunuawo dometɔ ɖe sia ɖe me la, nuŋlɔɖia ɖo ŋku edzi na mí be Yehowa menɔ nu siwo Eliya kpɔ la me o. Eliya nyae be Yehowa menye mawu siwo wobe wonye dzɔdzɔmeŋusẽwo ƒe mawuwo le xotutuwo me o. Le kpɔɖeŋu me, Baal subɔlawo kafua woƒe mawua be enye “Alilikpowo Dola,” si fia be enana tsi dzana. Yehowa gbɔe dzɔdzɔmeŋusẽ triakɔwo tso, ke hã, elolo akpa be wòanɔ nu si eya ŋutɔ wɔ me. Dziƒo gbahoo si míekpɔna la gɔ̃ hã melolo nɛ o! (1 Fiawo 8:27) Gake aleke nu siawo kpɔkpɔ kpe ɖe Eliya ŋu? Ðo ŋku edzi be enɔ vɔvɔ̃m. Esi wònye be Yehowa Mawu ŋutɔ li kplii, eye ŋusẽ triakɔ sia gbegbe le esi ta la, mehiã kura be Eliya navɔ̃ Axab kple Izebel o!—Psalmo 118:6.

Le dzoa yome la, ɖoɖoe gã aɖe zi, eye Eliya se “gbe bɔbɔe aɖe ɖi blewu” (NW). Ame si nɔ nua ƒom la ɖe mɔ na Eliya be wòagaƒo nu ake. Ale wògaƒo nu tso nu siwo ŋu wòtsi dzi ɖo ŋu zi evelia.b Ðewohĩ esia na wògakpɔ gbɔdzɔe vie. Gake ɖikeke mele eme o be ‘gbe bɔbɔe si ɖi blewu’ la ƒe nya si kplɔe ɖo lae fa akɔ nɛ wu. Yehowa ka ɖe edzi na Eliya be yedea asixɔxɔ eŋu vevie. Aleke wòwɔe? Mawu ɖe nu geɖe fiae ku ɖe tame si wòɖo be yeaɖe Baal subɔsubɔ ɖa le Israel mlɔeba ŋu. Edze ƒãa be Eliya mewɔ dɔ vlo o, elabena Mawu ƒe tameɖoɖoa le eme vam, eye naneke mate ŋu axe mɔ nɛ o. Gawu la, Eliya awɔ akpa aɖe le tameɖoɖo ma me vava me, elabena Yehowa na wòyi eƒe nyagblɔɖidɔa dzi, eye wònae mɔfiame siwo dzi wòazɔ ɖo.—1 Fiawo 19:12-17.

Ke Eliya ƒe akogotsitsia ya ɖe? Yehowa wɔ nu eve tso eŋu. Gbã la, egblɔ na Eliya be wòasi ami na Elisa bene wòava nye nyagblɔɖila si axɔ ɖe eteƒe. Ŋutsu sia si metsi abe Eliya ene o la ava nye Eliya ƒe zɔhɛ kple kpeɖeŋutɔ hena ƒe aɖewo. Esia afa akɔ nɛ ŋutɔ! Evelia, Yehowa gblɔ nya dodzidzɔname sia nɛ be: “[Mekpɔtɔ] ame akpe adre ɖi le Israel, ame siwo katã medze klo na Baal o kple ame siwo katã megbugbɔ nu nɛ o.” (1 Fiawo 19:18) Menye Eliya ɖeka koe kpɔtɔ o. Esese be nuteƒewɔla akpe adre mawo mede ta agu na Baal o anya de dzi ƒo nɛ ŋutɔ. Wohiã na ame abe Eliya ene be wòayi eƒe subɔsubɔ nuteƒewɔwɔtɔe dzi, eye wòaɖo kpɔɖeŋu ɖi to ale si wòalé nuteƒewɔwɔ me ɖe asi na Yehowa goŋgoŋ le blukɔ ƒe ɣeyiɣi mawo me. Nya mawo siwo wòse to Yehowa ƒe dɔlaa dzi wònye eƒe Mawu ƒe ‘gbe bɔbɔe si ɖi blewu’ la anya wɔ dɔ ɖe edzi ŋutɔ.

Ðewohĩ dzɔdzɔmeŋusẽ triakɔ si dzena le nuwɔwɔwo me la awɔ dɔ ɖe mía dzi ŋutɔ abe ale si wònɔ le Eliya gome ene, eye esɔ nenema hã. Ŋusẽ si le Wɔlaa si dzena kɔtɛ le nuwɔwɔwo me. (Romatɔwo 1:20) Yehowa galɔ̃na faa be yeazã yeƒe ŋusẽ si seɖoƒe meli na o la atsɔ akpe ɖe esubɔla wɔnuteƒewo ŋu. (2 Kronika 16:9) Ke hã, Mawu ƒoa nu na mí eme kɔna nyuie wu to eƒe Nya, Biblia dzi. (Yesaya 30:21) Le mɔ aɖe nu la, Biblia le abe ‘gbe bɔbɔe si ɖi blewu,’ si dzi Yehowa tona fiaa mɔ mí, ɖɔa mí ɖo, dea dzi ƒo na mí, heɖoa kpe eƒe lɔlɔ̃ dzi na mí egbea ene.

Ðe Eliya ɖe mɔ Yehowa ƒe akɔfaname le Xoreb Toa dzi ɖo eƒe dzi gbɔa? Ɛ̃! Eyi eƒe nyagblɔɖidɔa dzinɔameƒotɔe, ewɔ nuteƒe, eye wòtsi tsitre ɖe vɔ̃ɖinyenye kple alakpasubɔsubɔ ŋu. Ne míawo hã míena nya siwo tso Mawu gbɔ, siwo nye “akɔfafa si míekpɔna le Ŋɔŋlɔawo me,” de dzi gbɔ na mí la, ekema míate ŋu asrɔ̃ Eliya ƒe xɔse.—Romatɔwo 15:4.

[Etenuŋɔŋlɔwo]

[Nɔnɔmetata si le axa 19]

Yehowa yra Eliya geɖe, le ɣeyiɣi nyuiwo kple ɣeyiɣi vɔ̃wo siaa me

[Nɔnɔmetata si le axa 20]

Esi Eliya ɖo xaxa me la, egblɔ eƒe dzimenyawo na Yehowa

[Nɔnɔmetata si le axa 21]

Yehowa to eƒe ŋusẽ triakɔa dzi fa akɔ na Eliya hede dzi ƒo nɛ