Ne Dɔmenyowɔwɔ Bɔ
NE MƆNUKPƆKPƆ su asiwò be nàna nunana fia aɖe la, nukae nànae? Ke ne eyae nye dziɖula si si hotsui le wu eye wònya nu wu amesiame le xexeame ɖe? Àte ŋu abu nunana aɖe si adze eŋu ŋua? Anɔ ƒe akpe etɔ̃ enye si va yi la, eva hiã be Seba fianyɔnu nabu biabia mawo ŋu esime wònɔ dzadzram ɖo be yeayi aɖasrã dziɖula ma tututu—si nye Israel Fia Salomo—akpɔ.
Biblia gblɔ be eƒe nunanawo dometɔ aɖewo nye sika talento 120 “kple atike ʋeʋẽe [Balsam-mi] geɖe ŋutɔ kpakple kpe xɔasiwo.” Ne míabu sika la ɖeɖeko ƒe home ɖe egbe ƒe asi nu la, anɔ $40,000,000. Wobua Balsam-mi, si nye ami ʋeʋĩ heganye atike la kpakple sika be wonye adzɔnu xɔasiwo. Togbɔ be Biblia meyɔ ami agbɔsɔsɔme si fianyɔnua na Salomo o hã la, egblɔ na mí be nunana aɖeke megade etɔ nu o.—Fiawo I, 10:10.
Edze ƒã be Seba fianyɔnua nye kesinɔtɔ kple nyɔnu dɔmenyotɔ. Gawu la, woɖo eƒe dɔmenyonyoa teƒe nɛ. Biblia gblɔ be: “Fia Salomo hã na nusiwo katã Seba-fianyɔnu la di, eye wòbia lae hekpe ɖe nusiwo fia la nae le eɖokui si la ŋu.” (Kronika II, 9:12) Ele eme baa be anye kɔnu le fiahawo dome be woana nu wo nɔewo ya; ke hã, Biblia tɔ asi Salomo ƒe ‘asimeʋuʋu’ koŋ dzi. (Fiawo I, 10:13) Salomo ŋutɔ ŋlɔ be: “Woaɖi ƒo na luʋɔ dɔmenyotɔ la taŋ, eye woana tsi amesi na tsi wono.”—Lododowo 11:25.
Gake Seba fianyɔnua hã dze agbagba geɖe ŋutɔ be wòzã ɣeyiɣi kple ŋusẽ va srã Salomo kpɔ. Edze ƒã be Seba anɔ teƒe aɖe si le egbegbe Republic of Yemen; eyata fianyɔnua kple eƒe kposɔha la anya zɔ mɔ si didi kura wu kilometa 1,600 yi Yerusalem. Abe alesi Yesu gblɔe ene la, “etso anyigba seƒe ke va.” Nukata Seba fianyɔnua wɔ nu ma gbegbe? “Salomo ƒe nunya [sese]” koŋ tae wòva ɖo.—Luka 11:31.
Fiawo I, 10:1, 2 gblɔ be Seba fianyɔnua “[he] adzototowo ɖe asi, ne yeava [ado Salomo] akpɔ. . . . [Egblɔ] nya, siwo katã le eƒe dzi me la nɛ.” Aleke Salomo wɔ nui? “Salomo ɖo eƒe biabiawo katã ŋu nɛ; biabia aɖeke meli, si Salomo do kpo eŋu ɖoɖo nɛ o.”—Fiawo I, 10:3.
Esi nya siwo fianyɔnua se kple nusiwo wòkpɔ wɔ nuku nɛ ta la, eɖo eŋu ɖokuibɔbɔtɔe be: “Woayra wò dɔla, siwo le tsitre ɖe ŋkuwò me ɖaa, eye wosea wò nunya.” (Fiawo I, 10:4-8) Megblɔ be Salomo ƒe dɔlawo nye yayramewo le esi kesinɔnuwo ƒo xlã wo ta o—togbɔ be nusiawo ƒo xlã wo hã. Ke boŋ Salomo ƒe dɔlawo nye yayramewo le esi wote ŋu sea Salomo ƒe nunya si Mawu nae la ta. Kpɔɖeŋu nyui ka gbegbee nye si Seba fianyɔnua nye na Yehowa ƒe amewo egbea, amesiwo sea Wɔla la ŋutɔ kple Via, Yesu Kristo ƒe nunya!
Nu ɖedzesi bubue nye nya siwo fianyɔnua gagblɔ na Salomo, be: “Woakafu Yehowa, wò Mawu.” (Fiawo I, 10:9) Edze ƒã be ekpɔe be Yehowa ƒe asi le Salomo ƒe nunya kple nudzedzinamea me. Nusia wɔ ɖeka kple ŋugbe si Yehowa do na Israel do ŋgɔ. Egblɔ be: ‘Nye sewo dzi wɔwɔ nye miaƒe nunya kple gɔmesese le dukɔwo ŋku me, amesiwo ne wose ɖoɖo siawo katã la, woagblɔ bena: Ahã, dukɔ sia enye ame nyanuwo kple nugɔmeselawo vavã.’—Mose V, 4:5-7.
Nunyanala la Gbɔ Vava
Le egbeŋkekeawo me la, ame miliɔn geɖe va Yehowa ƒe habɔbɔa me elabena wodze sii be “Mawu ƒe Israel la” nye ‘dukɔ nyanu senugɔme,’ menye le dzɔdzɔme nu o, ke le esi Mawu ƒe se kple gɔmeɖose debliboawo fiaa mɔ wo ta. (Galatiatɔwo 6:16) Nyɔnyrɔxɔlawo ƒe xexlẽme fia be le míaƒe ƒe siawo me la, míagblɔe ko be nusrɔ̃la yeye akpe alafa geɖe gblɔna ƒe sia ƒe na gbɔgbɔ me Israel be: “Míayi kpli mi, elabena míese be, Mawu li kpli mi.” (Zaxarya 8:23) Ewɔa nuku na ame yeye siawo ale gbegbe ne wokpɔ gbɔgbɔmenuɖuɖu ƒe kplɔ̃ si Yehowa ɖo na esubɔlawo! Womekpɔ nusia tɔgbe le ha siwo me wonɔ tsã la me kpɔ o.—Yesaya 25:6.
Nunana Nunala Gãtɔ La
Esi nu gbogbo siawo gbegbe su wo si ta la, amesiwo kpɔa ŋudzedze ɖe nu ŋu bua eŋu be nukae yewoate ŋu ana Fia kple Nunala gãtɔ, Yehowa Mawu hã. Biblia ɖee fia be nunana nyuitɔ kekeake si míate ŋu ana Yehowae nye “kafukafuvɔsa.” (Hebritɔwo 13:15) Nukata? Elabena vɔsa sia do ƒome tẽ kple agbeɖeɖe, si nye nu vevi aɖe si ŋu Yehowa tsi dzi ɖo le nuwuɣi sia me. (Xezekiel 18:23) Gakpe ɖe ŋu la, ame ƒe ŋusẽ kple ɣeyiɣi tsɔtsɔna be woakpe ɖe dɔnɔwo, blanuilélawo, kple ame bubuwo ŋu nye vɔsa si dzea eŋu.—Tesalonikatɔwo I, 5:14; Hebritɔwo 13:16; Yakobo 1:27.
Gadzɔdzɔwo wɔa akpa vevi aɖe. Wona wote ŋu taa Bibliawo kple Biblia-srɔ̃gbalẽwo eye wote ŋu kpɔa teƒe siwo Kristotɔwo ate ŋu akpe ta ɖo. (Hebritɔwo 10:24, 25) Nudzɔdzɔawo gawɔnɛ be wokpɔa kpekpeɖeŋunaga tsɔ kpena ɖe amesiwo ŋu aʋawɔwɔwo kple dzɔdzɔmefɔkuwo gblẽ nu le ŋu.
Wona gɔmeɖose nyui aɖewo le Mawu ƒe Nya la me be woafia mɔ mí le nunana ƒe nya sia me. Le kpɔɖeŋu me, efia mí be menye ga si wokae Kristotɔwo dzɔna o, ke boŋ nusi sɔ si woate ŋu ana, eye wonanɛ faa kple dzidzɔ. (Korintotɔwo II, 9:7) Ame aɖewo te ŋu naa nu geɖe; eye abe ahosi dahe si nɔ anyi le Yesu ŋɔli ene la, nu sue aɖe koe ame bubuwo ate ŋu ana. (Luka 21:2-4) Ðe meɖe dzesi be Yehowa—xexeame katã ƒe Aƒetɔ—dea asixɔxɔ nunana kple vɔsa ɖesiaɖe si wona kple susu nyui le eƒe ŋkɔ me la ŋu oa?—Hebritɔwo 6:10.
Be Yehowa ƒe amewo nate ŋu ana nu kple dzidzɔ la, wona wonyaa nu vovovo siwo hiã kple mɔ nyuitɔ siwo dzi woato akpɔ nuhiahiã siawo gbɔe. Emegbe Yehowa ƒe gbɔgbɔ kɔkɔea ʋãa amesiwo lɔ̃ tso dzime faa ale be wotsona ɖe eŋu. Ðoɖo sia dzie wozɔ ɖo le blema Israel le avɔgbadɔa kple emegbe gbedoxɔa tutu me. (Mose II, 25:2; 35:5, 21, 29; 36:5-7; 39:32; Kronika I, 29:1-19) Le ƒe alafa gbãtɔ M.Ŋ. me la, ɖoɖo sia ke dzi zɔzɔ kpe ɖe Kristotɔwo ŋu be wokpɔ nusiwo hiã si wɔe be wotsɔ Fiaɖuƒenyanyuia yi na dukɔwo hedo alɔ nɔvi siwo nɔ Israel le dɔŋɔli.—Korintotɔwo I, 16:2-4; Korintotɔwo II, 8:4, 15; Kolosetɔwo 1:23.
Nenema ke egbea hã Yehowa yra eƒe amewo eye wòayi edzi ayra wo, ana nusiwo hiã la wo bene woawu gbeƒãɖeɖe kple nufiafia dɔ gãtɔ kekeake si teƒe xexeame kpɔ kpɔ la nu.—Mateo 24:14; 28:19, 20.
Nukawoe Gahiã Fifia?
Le ƒe siawo me la, wode Yehowa Ðasefowo agbalẽ me le dukɔ geɖe siwo me wode se ɖe woƒe dɔa nu tsã la me. Ewɔe be gbeƒãɖelawo ƒe xexlẽme dzi ɖe edzi ŋutɔ le dukɔ siawo dometɔ geɖe me. Eme kɔ be Bibliawo kple Biblia-srɔ̃gbalẽwo hiã ale gbegbe.
Nenema ke Fiaɖuƒe Akpatawo hã hiãe. Fifi laa la, Fiaɖuƒe Akpata abe 9,000 ene hiã le xexeame godoo. Ne woanɔ Fiaɖuƒe Akpata ɖeka tum gbesiagbe la, axɔ wu ƒe 24 hafi woakpɔ fifi ƒe nuhiahiãawo gbɔ! Le ɣeyiɣi ma ke me la, woɖoa hame yeye siwo anɔ adre gbesiagbe, eye xexeame ƒe akpa siwo ga mele o ye woɖoa wo dometɔ geɖe le. Evɔ la, xɔ siwo xɔ asi mehiã le teƒe siawo dometɔ geɖe o. Le teƒe aɖewo la, woate ŋu azã $6,000 pɛ ko atsɔ atu Fiaɖuƒe Akpata si akpɔ hiahiãa gbɔ eye wòanye ɖaseɖiɖi nyui le nutoa me la awu enu.
Le ƒe alafa gbãtɔ me la, ganyawo de Kristotɔ aɖewo dzi wu bubuwo, eyata apostolo Paulo ŋlɔ be: “Ɣeyiɣi sia me miaƒe agbɔsɔsɔ, si gba go la, nanɔ woamawo ƒe hiãtuame teƒe, bene woamawo ƒe agbɔsɔsɔ, si gba go la, hã nava nɔ miaƒe hiãtuame teƒe, bene wòasɔ pɛ.” (Korintotɔwo II, 8:13, 14) Egbea hã nuwo wɔwɔ be “wòasɔ pɛ” alea wɔe be wokpɔa ga si hiã tsɔ kpɔa Bibliawo, Biblia-srɔ̃gbalẽwo, Fiaɖuƒe Akpatawo, kpekpeɖeŋunana le afɔkuwo me, kple nu bubuwo gbɔ le xexeame ƒe akpa geɖe. Yayra ka gbegbee nye si nunana siawo nyena—na nunalawo kple exɔlawo siaa!—Dɔwɔwɔwo 20:35.
Abe alesi wòdzena le lɛta siwo Habɔbɔa xɔna tsoa dɔmenyotɔwo gbɔ me ene la, magazine sia xlẽlawo dometɔ geɖe dina be yewoana kpekpeɖeŋu gake womenya mɔ siwo tututu dzi woato awɔ nudzɔdzɔ siawo o. Ðikeke mele eme o be aɖaka si kpe ɖe nyati sia ŋu aɖo woƒe biabiaawo ŋu.
Le Salomo ƒe ŋutikɔkɔe dziɖuɣia me la, ‘anyigba dzi fia siwo katã’ se eŋkɔ la va srãe kpɔ. Ke hã dziɖula ɖeka ko ƒe ŋkɔe Biblia yɔ—si nye Seba fianyɔnua. (Kronika II, 9:23) Agbagba ka gbegbee nye si wòdze! Gake woɖo eteƒe nɛ geɖe—ale gbegbe be le eƒe sasrãkpɔa ƒe nuwuwu la, “gbɔgblɔ bu ɖee.”—Kronika II, 9:4.
Le etsɔ si gbɔna me la, Yehowa, Fia kple Nunala gãtɔ, awɔ nu gbogbo aɖewo na amesiwo tsɔa nuwo saa vɔe ɖe Eta wòasɔ gbɔ awu nusiwo Salomo te ŋu wɔ kpɔ. Awɔe be ‘gbɔgblɔ abu ɖe’ amesiawo, elabena menye ɖeko Yehowa akpɔ wo ta woatsi agbe le eƒe ʋɔnudrɔ̃ŋkeke dziŋɔa me o ke le ema megbe la, ‘aʋu eƒe asime eye wòatsɔ nugbagbewo katã ƒe nudidiwo aɖi ƒo na woe.’—Psalmo 145:16.
[Aɖaka si le axa 22]
Mɔ Siwo Dzi Ame Aɖewo Tona Dzɔa Nu
NUDZƆDZƆ HENA XEXEAME KATÃ ƑE DƆA
AME geɖe ɖoa ga home aɖe ɖi koŋ si wodana ɖe nudzɔɖaka siwo dzi woŋlɔ ɖo be “Nudzɔdzɔ Hena Habɔbɔa ƒe Xexeame Katã ƒe Dɔa—Mateo 24:14” me. Hameawo ɖoa ga siawo ɖe xexeame katã ƒe dɔwɔƒea ƒe ta le Brooklyn, New York, alo ɖe alɔdzedɔwɔƒe si le wo gbɔ la ɣleti sia ɣleti.
Woate ŋu aɖo lɔlɔÞnu faa gadzɔdzɔwo ɖe Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, alo ɖe Habɔbɔa ƒe alɔdzedɔwɔƒe si kpɔa dɔa dzi le miaƒe dukɔa me. Woate ŋu adzɔ sikanuwo alo kesinɔnu bubuwo hã. Ele be woaŋlɔ lɛta kpui aɖe si aɖe eme be wotsɔ nunana siawo ke keŋkeŋ akpe ɖe nudzɔdzɔ siawo ŋu.
NUDZƆDZƆ SIWO WOAGATE ŊU AXƆ ƑE ÐOÐO
Woate ŋu awɔ ɖoɖo tɔxɛ aɖe ale be woatsɔ ga ana Gbetakpɔxɔ Habɔbɔa, eye ne ga la hiã amea la, woagatrɔe nɛ. Ne èdi numeɖeɖe bubuwo la, taflatse ŋlɔ agbalẽ ɖo ɖe Treasurer’s Office, nàzã adrɛs si le etame.
NUNANA SI ŊU WOWƆ ÐOÐO ÐO
Tsɔ kpe ɖe ga siwo woatsɔ ake kple gadzɔdzɔ siwo woagate ŋu axɔ ŋu la, nunana ƒe mɔnu bubuwo li woatsɔ akpe ɖe xexeame godoo ƒe Fiaɖuƒe subɔsubɔdɔa ŋui. Esiawo ƒe ɖewoe nye:
Nugblẽfewo Xexe: Woate ŋu ayɔ Gbetakpɔxɔ Habɔbɔa ƒe ŋkɔ be eyae woaxe yeƒe nugblẽfega na ne yeku alo be woaxe yeƒe dzudzɔxɔledɔmega nɛ.
Ga si Le Gadzraɖoƒe: Woate ŋu ana Gbetakpɔxɔ Habɔbɔa nanɔ ga si woda ɖe gadzraɖoƒe, ga la dada ɖi ƒe ɖaseɖigbalẽwo, alo ga si woaxe na ame ne wodzudzɔ dɔwɔwɔ la zãm gbɔ alo woana woaxe wo nɛ ne nunala la ku, le mia gbɔ gadzraɖoƒea ƒe ɖoɖowo nu.
Ga si Wode Dɔ aɖe Me Kple Esi Wodo na Dɔwɔƒe aɖe ƒe Gomewo: Woate ŋu atsɔ ga si wode dɔ aɖe me kple esi wodo na dɔwɔƒe aɖe ƒe gome ana Gbetakpɔxɔ Habɔbɔa abe nusi wotsɔ kee keŋkeŋ ene alo woawɔ ɖoɖo be woanɔ viɖea xem na gaa nala.
Aƒewo Kple Anyigbawo: Woate ŋu atsɔ aƒe alo anyigba siwo woate ŋu adzra la ana Gbetakpɔxɔ Habɔbɔa abe nusi ŋu woɖe asi le keŋkeŋ ene alo woagblẽ xɔawo dometɔ aɖe ɖi na nunala la be wòanɔ eme le eƒe agbe me. Ele be woana Habɔbɔa nanya hafi woawɔ agbalẽ ɖe aƒe alo anyigba siawo dzi na Habɔbɔa.
Domenyinumagbalẽwo Kple Nunɔamesi Siwo Woanɔ Zazãm Gbɔ: Woate ŋu ato domenyinumagbalẽ si wowɔ le setɔwo gbɔ dzi atsɔ nunɔamesi alo ga si anye domenyinu ana Gbetakpɔxɔ Habɔbɔa, alo woate ŋu ayɔ Habɔbɔa ŋkɔ be wòanɔ amesiwo anɔ nunɔamesi aɖewo ƒe viɖe zãm gbɔ la dome. Womexɔa adzɔ aɖewo ɖe nunɔamesi siwo wotsɔ na subɔsubɔha aɖe la ta o.
Abe alesi nyagbe “nunana si ŋu wowɔ ɖoɖo ɖo” fia ene la, ehiã be nunala la nawɔ ɖoɖo le nunana siawo tɔgbe ŋu. Habɔbɔa ta Eŋlisigbe me gbalẽ gbadza si ƒe ŋkɔe nye Planned Giving to Benefit Kingdom Service Worldwide be wòakɔ nu me na amesiwo di be yewoakpe ɖe Habɔbɔa ŋu to nunana siwo ŋu wowɔ ɖoɖo ɖo ƒomevi aɖewo dzi. Wota agbalẽ gbadza sia be woatsɔ aɖo biabia geɖe siwo wobiaa Habɔbɔa ku ɖe nunanawo, domenyinumagbalẽwo, kple nunɔamesi siwo woanɔ zazãm gbɔ ŋu la ŋu. Nyatakaka nyui bubuwo gale eme ku ɖe aƒe alo anyigba, ga, kple adzɔxexe ŋuti ɖoɖowɔwɔ ŋu. Eye ɖe wotae be wòakpe ɖe amesiwo le United States siwo le ɖoɖo wɔm be yewoawɔ nunana tɔxɛ na habɔbɔa fifia alo wòanyi eƒe dome le yewoƒe ku megbe la ŋu bene woatia mɔnu si aɖe vi wu eye wònyo ale be woabu woƒe ƒomea kple woawo ŋutɔwo ƒe nɔnɔme ŋu le ewɔwɔ me. Agbalẽ gbadza sia ate ŋu asu asiwò ne èbia ɖeka tẽ tso Nunana si Ŋu Wowɔ Ðoɖo Ðo Dzikpɔƒea gbɔ.
Le agbalẽ gbadza la xexlẽ kple numedzodzro kple amesiwo le dɔ wɔm le Nunana si Ŋu Wowɔ Ðoɖo Ðo Dzikpɔƒea me la, ame geɖe te ŋu kpe ɖe Habɔbɔa ŋu eye le ɣeyiɣi ma ke me la, egaɖe vi geɖe le adzɔxexenyawo gome le esi wowɔe nenema ta. Ele be woana Nunana si Ŋu Wowɔ Ðoɖo Ðo Dzikpɔƒea nanya eye woaɖo ɖoɖo sia ŋuti nuŋlɔɖiwo ƒe ɖeka ɖee. Ne èdi numekɔkɔ le nunana siawo siwo ŋu wowɔ ɖoɖo ɖo dometɔ aɖe ŋuti la, ke zã adrɛs si le ete nàtsɔ aŋlɔ agbalẽ na Nunana si Ŋu Wowɔ Ðoɖo Ðo Dzikpɔƒea, alo nàƒo ka na wo alo na Habɔbɔa ƒe dɔwɔƒe si kpɔa dɔa dzi le dukɔ si me nèle me.
CHARITABLE PLANNING OFFICE
Watch Tower Bible and Tract Society of Pennsylvania
100 Watchtower Drive, Patterson, New York 12563-9204
Telephone: (914) 306-1000
[Nɔnɔmetata siwo le axa 23]
Lɔlɔ̃nu faa nudzɔdzɔwoe wotsɔ kpɔa Yehowa Ðasefowo ƒe dɔwɔnawo gbɔe