Woyra Ahosi Si Nɔ Zarpat Ðe Eƒe Xɔse Ta

AHOSI dahe aɖe wɔ atuu na via ŋutsuvi si nye vi ɖekɛ nɛ. Ahosia ƒe nu ku ale gbegbe. Ɣeyiɣi kpui aɖe do ŋgɔ la, elé ɖevi kukua ɖe abɔwo dome. Fifia eyae nye ema le via si wofɔ ɖe tsitre kpɔm, eye ɖevia ƒe alɔgbɔnukoko na wògli kple dzidzɔ. Amedzro si va dzee la gblɔ nɛ be, ‘Kpɔ ɖa, viwòa gbɔ agbe.’

Ƒe 3,000 kloe nye esia si nukunu ma dzɔ. Àte ŋu axlẽ nu tso eŋu le 1 Fiawo ta 17. Amedzroa ye nye Mawu ƒe nyagblɔɖila Eliya. Ke vidada la ya ɖe? Enye ahosi aɖe si ŋkɔ womeyɔ o, si nɔ Zarpat-dua me. Via fɔfɔ ɖe tsitre do ŋusẽ eƒe xɔse ale gbegbe. Míasrɔ̃ nu vevi aɖewo tso ahosia ƒe ŋutinya sia me.

Le Israel-fia vɔ̃ɖi Ahab ƒe dziɖuɣi la, Yehowa ɖoe be yeana ku naɖi ɣeyiɣi didi aɖe. Esi Mawu na Eliya gblɔ kuɖiɖi sia ŋu nya vɔ la, eɣla nyagblɔɖila la ɖe Ahab, eye wòto nukumɔ aɖe dzi na akpaviãwo tsɔa abolo kple lã vana na nyagblɔɖilaa wòɖuna. Emegbe Yehowa gblɔ na Eliya be: “Tso, nàyi Zarpat, si nye Zidontɔwo tɔ, eye nàtsi afi ma; kpɔ ɖa, mede se na ahosi aɖe le afi ma, be wòanyi wò.”​—1 Fia. 17:1-9.

Esi Eliya va ɖo Zarpat la, ekpɔ ahosi dahe aɖe wònɔ nake wuwluiwo fɔm. Nyɔnu siae anyi nyagblɔɖila la? Aleke wòate ŋu awɔ esia esi wòda ahe kolikoli? Nu ka kee ɖava susu me na Eliya o, ete dzeɖoɖo kple nyɔnua. Egblɔ nɛ be, “Taflatsɛ, ku tsi ɖe nane me vɛ nam mano.” Esi nyɔnua yina tsia ku ge la, Eliya yɔe ɖa gblɔ be: “Taflatsɛ, di abolo kakɛ aɖe ɖe asi vɛ nam.” (1 Fia. 17:10, 11) Tsinana amedzroa wòano meɖe fu na ahosia kura o, gake be wòatsɔ abolo akpee ya nye nu sesẽ.

Ahosia ɖo eŋu nɛ be: “Meta Yehowa, wò Mawu ƒe agbe: Ne abolo aɖe le asinye fĩ! Negbe wɔ asiʋlo ɖeka koe le ze me kple ami vi aɖe le goe me, eye kpɔ ɖa, meva nake wuwlui fɔ ge, be mayi aɖaɖae, ne mía kple vinyeŋutsu míaɖu, hafi míaku.” (1 Fia. 17:12) Mina míakpɔ nu si woƒe dzeɖoɖoa ɖe fia ɖa.

Ahosia kpɔe be Israel vi mawuvɔ̃lae Eliya nye. Esia dze le nya siwo wògblɔ me be, “meta Yehowa, wò Mawu ƒe agbe.” Edze abe togbɔ be enya nu tso Israel ƒe Mawu ŋu ene hã la, menya Yehowa nyuie ale gbegbe be wòate ŋu ayɔe be “nye Mawu” o. Zarpat si nye du si le Zidontɔwo te mee ahosia nɔ; eye Zidon nye Foiniketɔwo ƒe dugã. Anɔ eme be Baal ye Zarpat-dua me tɔwo subɔna. Ke hã, Yehowa kpɔ nu ɖedzesi aɖe le ahosia ŋu.

Togbɔ be Zarpat-hosi dahe la nɔ trɔ̃subɔlawo dome hã la, exɔ Mawu dzi se. Yehowa ɖo Eliya ɖe egbɔ kple susu be yeaxɔ na wo kple nyagblɔɖila la siaa. Míate ŋu asrɔ̃ nu vevi aɖe tso esia me.

Menye Zarpat-dua me tɔ siwo subɔa Baal la katãe nye ame vɔ̃ɖiwo o. Esi Yehowa ɖo Eliya ɖe ahosia gbɔ la, eɖee fia be yekpɔa dzinyuitɔ siwo mele ye subɔm haɖe o la dzea sii. Vavãe “Le dukɔ sia dukɔ me la, ame si [vɔ̃a Mawu] eye wòwɔa nu dzɔdzɔe la, eyae dzea eŋu.”​—Dɔw. 10:35.

Ame nenie le wò anyigbamama me siwo le abe ahosi si nɔ Zarpat la ene? Togbɔ be ame siwo le alakpasubɔsubɔhawo me domee wole hã la, ɖewohĩ wole nu si nyo wu dim. Anɔ eme be Yehowa ŋuti sidzedze vi aɖe koe su wo si alo ɖeke kura mesu wo si o, eya ta wohiã na kpekpeɖeŋu hafi ate ŋu axɔ nyateƒea. Ðe nèle ame siawo tɔgbi dim hele kpekpem ɖe wo ŋua?

De ŋugble tso nu si Eliya bia tso ahosia si la ŋu vie nàkpɔ. Ðeko nyɔnua gblɔ na Eliya be yeyina wɔ susɔea ɖa ge ne ye kple ye via yewoaɖu hafi aku tetie nye ema. Ke hã nya kae Eliya gblɔ? Egblɔ nɛ be: “Mègavɔ̃ o! Yi nàwɔ, abe ale si nègblɔ ene; ke tsɔ ɖe tɔ tatali vi aɖe nam gbɔ, eye nàtsɔe vɛ nam, emegbe hafi nàwɔ mia kple viwò tɔ. Elabena ale Yehowa, Israel ƒe Mawu la gblɔ esi: Wɔze la maɖi gbɔlo o, eye ami, si le goea me la, mavɔ o, va se ɖe esime Yehowa nana tsi nagadza ɖe anyigba dzi.”​—1 Fia. 17:11-14.

Ame aɖewo agblɔ be: ‘Nu ka? Matsɔ míaƒe nuɖuɖu susɔea na wòa? Fefem nèlea?’ Gake ahosia ya mewɔ nu nenema o. Togbɔ be menya nu boo tso Yehowa ŋu o hã la, exɔ Eliya ƒe nyaa dzi se eye wòwɔ nu si wòbia tso esi. Xɔse ƒe dodokpɔ gã aɖee nye esia. Eye nyametsotso nyui kae nye esi ahosia wɔ!

Mawu megblẽ ahosi dahe sia ɖi o. Abe ale si Eliya do ŋugbe nɛ ene la, Yehowa na nuɖuɖu sue si nɔ esi la dzi ɖe edzi ale gbegbe be Eliya, ahosia kple via siaa nɔ agbe ɖe enu va se ɖe esime kuɖiɖia nu tso. Nyateƒee, “wɔze la meɖi gbɔlo o, eye ami, si le goea me la, mevɔ o, le Yehowa ƒe nya, si wògblɔ to Eliya dzi la nu.” (1 Fia. 17:16; 18:1) Ne ɖe nyɔnu sia mewɔ ɖe Eliya ƒe nyaa dzi o la, anye ne wɔ kple ami sue mae wòatsɔ aɖa eƒe nuɖuɖu mamlɛa. Gake ewɔ nu le xɔse me, eɖo ŋu ɖe Yehowa ŋu eye wòna nuɖuɖu Eliya gbã.

Nu si míasrɔ̃ tso esia mee nye be, Mawu yraa ame siwo ɖea xɔse fiana. Ne èɖe xɔse fia le nuteƒewɔwɔ ƒe dodokpɔwo me la, Yehowa alé wò ɖe te. Ayi edzi anye Nunala, Ametakpɔla, kple Xɔlɔ̃ vevi si akpe ɖe ŋuwò nàdo dzi le xaxawo me.​—2 Mose 3:13-15.

Le ƒe 1898 me la, Gbetakpɔxɔ ɖe nufiame sia tso ahosia ƒe ŋutinyaa me: “Ne xɔse nɔ ahosia si ale gbegbe be wòɖo to la, ke Aƒetɔ la ato Nyagblɔɖilaa dzi akpe ɖe eŋu; gake ne ɖe xɔse menɔ esi o la, anye ne wokpɔ ahosi bubu si si xɔse le. Nenemae wòle le míawo hã gome. Le agbemɔ si zɔm míele ƒe akpa vovovowo la, Aƒetɔ la doa míaƒe xɔse kpɔna. Ne míeɖe xɔse fia la, ayra mí; gake ne míeɖe xɔse fia o la, nu ato mía ŋu.”

Ne dodokpɔwo dze ŋgɔ mí la, ele be míadi Mawu ƒe mɔfiafia tso Ŋɔŋlɔawo kple míaƒe Biblia-srɔ̃gbalẽwo me. Eyome míawɔ ɖe Yehowa ƒe mɔfiameawo dzi aleke kee wo dzi wɔwɔ asesẽ na míi o. Woayra mí geɖe ne míewɔ ɖe lododo sia si me nunya le dzi, be: “Ðo ŋu ɖe Yehowa ŋu tso dzi blibo me, ke mègaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.”​—Lod. 3:5, 6.

Xɔse ƒe dodokpɔ bubu gadze ŋgɔ ahosia. Biblia gblɔ be: “Eye wòva me le nya siawo megbe bena, aƒeanɔ ƒe vi dze dɔ, eye eƒe dɔ la nu sẽ ɖe dzi, ale be megate ŋu le gbɔgbɔm o.” Esi vidada sia di be yeanya nu si gbɔ vɔ̃ sia anya tso ta la, ebia Eliya be: “Mawu ƒe ame! Nya ka le mía kpli wò dome? Ðe nèva gbɔnye, be nàɖo ŋku nye nu vɔ̃wo dzi, eye nàwu vinyea?” (1 Fia. 17:17, 18) Eƒe dzivenya siawo gɔme ɖe?

Ðe nyɔnua ɖo ŋku nu vɔ̃ aɖe si wòwɔ va yi si le fu ɖem na eƒe dzitsinya dzia? Ðe wòsusu be Mawue le yeƒe nu vɔ̃wo teƒe ɖom na ye, eye be Mawu ƒe hlɔ̃bialae Eliya nyea? Biblia megblɔe o, gake eme kɔ ƒãa be, ahosia mebu fɔ Mawu ɖe nu madzɔmadzɔ aɖeke ta o.

Ahosia ƒe vi ƒe kua anya dze Eliya kpo, eye wòawɔ moya nɛ be nyɔnua susu be yeƒe afi ma vava gbɔe ɖevia ƒe ku gbãdziname sia tso. Esi Eliya kɔ ɖevi kukua yi xɔtaxɔa me la, edo ɣli na Yehowa be: “Yehowa, nye Mawu, ahosi, si gbɔ menye amedzro le, hã ŋue nèbe, yeawɔ vɔ̃ ɖo, eye nàwu via?” Ete ɖe nyagblɔɖilaa dzi vevie be woado vlo Mawu ƒe ŋkɔ nenye be Eɖe mɔ vɔ̃ sia dzɔ ɖe dɔmenyola kple amedzrowɔla sia dzi. Eya ta Eliya ƒo koko na Yehowa be: “Yehowa, nye Mawu, gbugbɔ ɖevi sia ƒe luʋɔ [alo, agbe] gava emee dzro!”​—1 Fia. 17:20, 21.

Yehowa nɔ to ɖom. Ahosi siae nyi eƒe nyagblɔɖila la, eye wòɖe xɔse fia. Edze ƒãa be Mawu mexe mɔ na ŋutsuvia ƒe ku o, eɖe mɔ dɔlélea wui le esi wònya be yele efɔ ge ɖe tsitre ale be wòana mɔkpɔkpɔ dzidzime siwo ava va la ta. Eye emae anye tsitretsitsi gbãtɔ si ŋu nya dze le Ŋɔŋlɔawo me. Esi Eliya do ɣli yɔ Yehowa la, esee, eye wògbɔ agbe ɖevia. Wò ya kpɔ ale si gbegbe ahosia akpɔ dzidzɔe esi Eliya gblɔ nɛ be, ‘Kpɔ ɖa, viwòa gbɔ agbe’ la ɖa ko! Ahosia gblɔ na Eliya be: “Azɔ medze sii bena, Mawu ƒe amee nènye, eye Yehowa ƒe gbe, si le nuwò la, nye nyateƒe.”​—1 Fia. 17:22-24.

Nuŋlɔɖi si le 1 Fiawo ta 17 megagblɔ nya bubu aɖeke tso nyɔnu sia ŋu o. Gake ale si Yesu ƒo nu nyuie tso eŋu la ɖee fia be anya subɔ Yehowa nuteƒewɔwɔtɔe tso ekema dzi. (Luka 4:25, 26) Míesrɔ̃e le eƒe ŋutinyaa me be Mawu yraa ame siwo wɔa nyui na esubɔlawo. (Mat. 25:34-40) Eɖo kpe edzi be Mawu kpɔa esubɔla wɔnuteƒewo ƒe nuhiahiãwo gbɔ na wo, le nɔnɔme sesẽwo gɔ̃ hã me. (Mat. 6:25-34) Nuŋlɔɖi sia gaɖo kpe ale si didia le Yehowa me eye ŋutetea le esi be wòafɔ kukuawo ɖe tsitre la hã dzi na mí. (Dɔw. 24:15) Ðikeke mele eme o be esiawo katã nye susu nyui siwo ta míaɖo ŋku ahosi si nɔ Zarpat dzi ɖo.