Nukae Dzɔna Ðe Luʋɔ Dzi le Ku Me?
“Nufiafia si nye be amegbetɔ ƒe luʋɔ mekuna o eye ayi edzi anɔ agbe le ame ƒe ku kple eƒe ŋutilã ƒe nyunyɔ vɔ megbe la nye Kristotɔwo ƒe dzixɔse kple mawuŋutinunyafiafia veviwo dometɔ ɖeka.”—“NEW CATHOLIC ENCYCLOPEDIA.”
1. Nya ka dzie New Catholic Encyclopedia lɔ̃ ɖo le luʋɔ ƒe anyinɔnɔ le ku megbe ŋu?
GAKE agbalẽ si me nya dze le etame la ke lɔ̃ ɖe edzi be “nukpɔsusu si ku ɖe luʋɔ ƒe anyinɔnɔ le ku megbe ŋu medze le Biblia me woakpɔ bɔbɔe o.” Ekema nuka tututue Biblia fia le nusi dzɔna ɖe luʋɔ dzi le ku me ŋu?
Ame Kukuwo Menya Naneke O
2, 3. Nɔnɔme ka mee ame kukuwo le, eye mawunyakpukpui kawoe ɖe esia fia?
2 Wona nɔnɔme si me ame kukuwo le dze ƒã le Nyagblɔla 9:5, 10, afisi míexlẽ le be: “Kukuawo menya naneke o . . . Nuwɔwɔ alo tamebubu, sidzedze alo nunya mele tsieƒe . . . o.” Eyata kue nye agbemanɔmanɔ. Hakpala la ŋlɔ be ne ame ku la, “egbugbɔna yia eƒe anyi gbɔ; gbemagbe eƒe tameɖoɖowo nu yina.”—Psalmo 146:4.
3 Eyata ame kukuwo menya naneke o eye womagate ŋu awɔ naneke o. Esime Mawu nɔ afia tsom na Adam la, egblɔ be: “Anyi nènye, eye anyi ke nagatrɔ azu!” (Mose I, 3:19) Hafi Mawu natsɔ anyi amè Adam eye wòana agbee la, menɔ afi aɖeke o. Esime Adam ku la, etrɔ yi nɔnɔme ma me. Kue wotsɔ he to nɛ—menye xexe bubu aɖe me yiyi o.
Luʋɔ Te Ŋu Kuna
4, 5. Gblɔ Biblia me kpɔɖeŋu siwo fia be luʋɔ te ŋu kuna.
4 Esime Adam ku la, nukae dzɔ ɖe eƒe luʋɔ dzi? Ðo ŋku edzi be zi geɖe le Biblia me la, nya “luʋɔ” fiaa ame. Eyata ne míegblɔ be Adam ku la, míele gbɔgblɔm be luʋɔ si woyɔ be Adam la ku. Esia masɔ to me na amesi xɔ luʋɔ makumaku dzi se o. Gake Biblia gblɔ be: “Luʋɔ, si wɔ nuvɔ̃ la, eyae aku.” (Xezekiel 18:4) Mose III, 21:1 ƒo nu tso “luʋɔ si ku” (NW) (“ame kuku”) ŋu. Eye wogblɔ na Nasiretɔwo be womegate ɖe “luʋɔ kuku aɖeke” (NW) (“nu kuku,” Lamsa) ŋu o.—Mose IV, 6:6.
5 Woƒo nu tso luʋɔ ŋu le mɔ sia tɔgbe nu le Fiawo I, 19:4 (NW). Eliya si dzi nu te ɖo vevie la ‘va nɔ biabiam be woana yeƒe luʋɔ naku.’ Nenema ke Yona “[di] ku na eƒe luʋɔ gblɔ bena: ‘Ne meku la, enyo wu esi manɔ agbe.’” (Yona 4:8, NW) Eye Yesu zã nyagbɔgblɔ ‘woawu luʋɔ,’ si gɔme The Bible in Basic English ya ɖe be “woawu ame.” (Marko 3:4, NW) Eyata nusi luʋɔ ƒe kuku fia koe nye ame ƒe ku.
Eƒe ‘Dodo Kple Tɔtrɔ Va Ame Me’
6. Nuka gblɔm Biblia le esi wòbe Raxel ƒe luʋɔ “nɔ dodom le eme”?
6 Ke Raxel ƒe ku si wɔ nublanui le viaŋutsuvi evelia dziɣi ya ɖe? Míexlẽ le Mose I, 35:18 be: “Esi [eƒe luʋɔ nɔ dodom le eme, NW] eye wòkpɔ bena, yele kuku ge la, ena ŋkɔe bena Benoni; ke fofoa yɔe be Benyamin.” Ðe nya sia fia be nane nɔ Raxel me si do go le eme esi wòkua? Kura o. Ðo ŋku edzi be nya “luʋɔ” agate ŋu afia agbe si le ame me. Eyata le go sia me la, nusi Raxel ƒe “luʋɔ” fia koe nye eƒe “agbe.” Esia tae woɖe nyagbɔgblɔ “eƒe luʋɔ nɔ dodom le eme” gɔme le Biblia bubuwo me be “eƒe agbe nu nɔ tsotsom” (Knox), “egbɔ zi mamlɛtɔ” (Jerusalem Bible), kple “eƒe agbe do le eme” (Bible in Basic English). Naneke meli si fia be Raxel ƒe akpa ɣaɣla aɖe kpɔtɔ nɔ agbe le eƒe ku megbe o.
7. Mɔ ka nue ahosia ƒe viŋutsu si wofɔ ɖe tsitre ƒe luʋɔ “gagbugbɔ va eme” le?
7 Nenema ke wòle le ahosi aɖe ƒe viŋutsu si wofɔ ɖe tsitre gome, si woŋlɔ ɖe Fiawo I, ta 17. Míexlẽ le kpukpui 22 lia be esi Eliya do gbe ɖa ɖe ŋutsuvia ta la, “Yehowa se Eliya ƒe gbe, eye ɖevi la ƒe luʋɔ gagbugbɔ va eme, eye wògbɔ agbe.” Le afisia hã la, nya “luʋɔ” fia “agbe.” Eyata New American Standard Bible xlẽ be: “Ðevia ƒe agbe trɔ va eme eye wògbɔ agbe.” Ẽ, agbee trɔ va ŋutsuvia me, ke menye vɔvɔli aɖee o. Esia wɔ ɖeka kple nya si Eliya gblɔ na ŋutsuvia dada be: “Kpɔ ɖa, viwò la [ame bliboa] tsi agbe.”—Fiawo I, 17:23.
“Domedomenɔƒe” ƒe Kuxi La
8. Nuka dzie ame geɖe siwo gblɔna be yewonye Kristotɔwo xɔ se be adzɔ le tsitretsitsia me?
8 Ame geɖe siwo gblɔna be yewonye Kristotɔwo la xɔe se be woafɔ amewo ɖe tsitre le etsɔme esime luʋɔ makumakuwo ava wɔ ɖeka kple ŋutilã kukuwo. Emegbe woana amesiwo wofɔ ɖe tsitre naxɔ woƒe fetu mamlɛa—anye teƒeɖoɖo nyui na amesiwo nɔ agbe nyui alo fetu vɔ̃ na ame vɔ̃ɖiwo.
9. Nukae nya si nye “domedomenɔƒe” la fia, eye nukae ame aɖewo gblɔna be edzɔna ɖe luʋɔ dzi le ɣeyiɣi sia me?
9 Edze abe dzixɔse sia me kɔ ene. Gake esesẽna na amesiwo xɔ luʋɔ makumaku dzi se be woagblɔ nusi dzɔna ɖe luʋɔ dzi tso esime amea ku vaseɖe esime woafɔe ɖe tsitre. Le nyateƒe me la, amewo susu nyawo gblɔ le nusi woyɔ zi geɖe be “domedomenɔƒe” la ŋu ƒe alafa geɖe. Ame aɖewo gblɔ be le ɣeyiɣi sia me la, luʋɔa yia ŋutiklɔdzo me, afisi woate ŋu akɔ eŋu tso nuvɔ̃ ʋee siwo wòwɔ me ale be wòadze na dziƒoyiyi.a
10. Nukata mesɔ ɖe Ŋɔŋlɔawo nu be woaxɔe ase be luʋɔ nɔa ŋutiklɔdzo me le ku megbe o, eye aleke nusi dzɔ ɖe Lazaro dzi ɖo kpe esia dzii?
10 Gake abe alesi míekpɔe ene la, ame koe nye luʋɔ la. Ne amea ku la, luʋɔ lae ku. Eyata meganɔa agbe le ku megbe o. Le nyateƒe me la, esime Lazaro ku la, Yesu Kristo megblɔ be eyi ŋutiklɔdzo, Limbo, alo “domedomenɔƒe” bubu aɖe o. Ðe Yesu gblɔ boŋ be: “Lazaro le alɔ̃ dɔm.” (Yohanes 11:11) Edze ƒã be Yesu, amesi nya nyateƒe si ku ɖe nusi dzɔna ɖe luʋɔ dzi le ku me ŋu la xɔe se be Lazaro meganya naneke o, mele agbe o.
Nukae Nye Gbɔgbɔ La?
11. Nukata nya “gbɔgbɔ” mate ŋu afia ame ƒe akpa aɖe si le eɖokui si si yia edzi nɔa agbe le ku megbe o?
11 Biblia gblɔ be ne ame ku la, “eƒe gbɔgbɔ [dona le eme, NW], egbugbɔna yia eƒe anyi gbɔ.” (Psalmo 146:4) Ðe esia fia be gbɔgbɔ ŋutɔŋutɔ si le eɖokui si dona le ame me eye wòyia edzi nɔa agbe le ame ƒe ku megbea? Mate ŋu adzɔ nenema o, elabena hakpala la gagblɔ be: “Gbemagbe eƒe tameɖoɖowo nu yina” (“eƒe tamesusuwo katã wua enu,” New English Bible). Ekema nukae nye gbɔgbɔ la, eye aleke ‘wòdona’ le ame mee ne eku?
12. Nukae Hebri kple Hela gbe me nya siwo gɔme woɖe be “gbɔgbɔ” le Biblia me la fia?
12 Nya siwo gɔme woɖe be “gbɔgbɔ” le Biblia me (Hebrigbe, ruʹach; Helagbe, pneuʹma) gɔmeɖeɖe ŋutɔŋutɔe nye “ŋɔtimegbɔgbɔ.” Eyata le esi teƒe be R. A. Knox ƒe gɔmeɖeɖea nagblɔ be “eƒe gbɔgbɔ dona le eme” la, ezã nyagbɔgblɔ “ŋɔtimegbɔgbɔ do le ametia me.” (Psalmo 145:4, Knox) Gake nya “gbɔgbɔ” fia nu geɖe wu ya gbɔgbɔ to ŋɔti me ko. Le kpɔɖeŋu me, esi Mose I, 7:22 nɔ nu ƒom tso amegbetɔ kple lãwo ƒe agbe tsɔtsrɔ̃ le xexeame katã ƒe Tsiɖɔɖɔa me ŋu la, egblɔ be: “Nusianu, si agbegbɔgbɔ [alo, gbɔgbɔ; Hebrigbe, ruʹach] le eme, si gbɔna toa ŋɔti me, eye wònɔa agbe le anyigba ƒuƒui dzi la ku.” Eyata “gbɔgbɔ” ate ŋu afia agbeŋusẽ si le nu gbagbewo katã me, amegbetɔ kple lãwo siaa, si ŋɔtimegbɔgbɔ léna ɖe te.
13. Mɔ ka nue míate ŋu atsɔ gbɔgbɔ asɔ kple elektrikŋusẽ le?
13 Le kpɔɖeŋu me: Elektrikŋusẽ dea ŋusẽ mɔ̃ me. Ne ŋusẽa nu tso la, mɔ̃a megawɔa dɔ o. Ŋusẽa meva zua mɔ̃ bubu le eɖokui si o. Nenema ke ne ame ku la, eƒe gbɔgbɔ megadoa ŋusẽ eƒe lãmenugbagbeviwo o. Medzona le ametia me va nɔa xexe bubu me o.—Psalmo 104:29.
14, 15. Aleke gbɔgbɔ la trɔna yia Mawu gbɔ le ku mee?
14 Ekema nukata Nyagblɔla 12:7 gblɔ be ne ame ku la, ‘gbɔgbɔa gbugbɔ yia Mawu vavã si tsɔe na la gbɔ’? Ðe esia fia be gbɔgbɔa toa yame ŋutɔŋutɔ yia Mawu gbɔa? Ao, mefia nenema kura o. Ðo ŋku edzi be agbeŋusẽe gbɔgbɔa nye. Ne agbeŋusẽ ma do ko la, Mawu si koe ŋutete gale be wòagadee eme. Eyata gbɔgbɔa ‘gbugbɔ yia Mawu vavã la’ gbɔ le gɔmesesea nu be agbe si ame ma agava nɔ le etsɔme ƒe mɔkpɔkpɔ ɖesiaɖe le Mawu si me.
15 Mawu koe ate ŋu agade gbɔgbɔa, alo agbeŋusẽa eme, si ana ame nagbɔ agbe. (Psalmo 104:30) Gake ɖe Mawu ɖoe be yeawɔ nenemaa?
[Etenuŋɔŋlɔwo]
a New Catholic Encyclopedia gblɔ be “[Sɔlemeha la ƒe] Fofowo katã lɔ̃ ɖe edzi wòdze ƒã be ŋutiklɔdzo li.” Ke hã agbalẽ sia lɔ̃ ɖe edzi hã be “xotutu dzie wotu Katolikotɔwo ƒe ŋutiklɔdzo ƒe nufiafia la ɖo, ke menye Ŋɔŋlɔ Kɔkɔea dzi o.”
[Aɖaka si le axa 23]
Ŋkuɖoɖo Agbe Si Wonɔ Kpɔ Va Yi Dzi
NE NANEKE menɔa agbe le ametia ƒe ku megbe o la, ke nya si ame aɖewo gblɔna be yewoɖoa ŋku agbe si yewonɔ kpɔ va yi dzi ya ɖe?
Hindutɔ agbalẽnyalagã Nikhilananda gblɔ be ‘womate ŋu abu tame ko agblɔ nusiwo dzɔna le ku megbe o.’ Le mawunyaŋutinunyala Hans Küng ƒe nuƒo si ƒe tanyae nye “Subɔsubɔhawo ƒe Makumakunyenye Dzixɔse ƒe Kpɔɖeŋuwo” me la, eɖee fia be: “Womate ŋu aɖo kpe ŋkuɖoɖo agbe si wonɔ kpɔ va yi ƒe nya siwo wogblɔna—si ɖeviwo alo dukɔ siwo me tɔwo xɔ gbugbɔgadzɔ dzi se koŋ gblɔna—la dometɔ aɖeke dzi o.” Egblɔ kpe ɖe eŋu be: “[Numekula siwo le dzɔdzɔmeŋutinunya ƒe mɔnu zãm tsɔ le nya sia me kum vevie la] ƒe akpa gãtɔ lɔ̃ ɖe edzi be nusiwo teƒe wobe yewokpɔ la menye kpeɖodzi si ŋu kakaɖedzi ŋutɔŋutɔ le be wonɔ agbe kpɔ hafi gava le agbe le anyigba dzi o.”
Ke ne èkpɔe be yeɖoa ŋku edzi be yenɔ agbe kpɔ va yi ɖe? Seselelãme sia ate ŋu atso nu vovovowo gbɔ. Míaƒe susua dzraa nyatakaka siwo míexɔna dometɔ geɖe ɖo ɖe eƒe akpa aɖe si mewɔa dɔ kabakaba o le esi míehiã nya mawo tẽ alo fifi laa o ta. Ne ame aɖewo va ɖo ŋku nya aɖewo siwo woŋlɔ be dzi la, wotsɔnɛ be enye agbe si yewonɔ tsã ƒe kpeɖodzi. Gake nyateƒe lae nye be agbe bubu aɖe nɔnɔ ŋuti nuteƒekpɔkpɔ siwo ŋu kpeɖodzi le aɖeke megale mía si wu agbe si míele fifia o. Amesiwo le agbe le anyigba dzi ƒe akpa gãtɔ meɖoa ŋku naneke dzi si fia be wonɔ agbe kpɔ o; womebunɛ be ate ŋu anɔ eme be yewonɔ agbe kpɔ va yi hã o.