Yehu Do Tadedeagu Dzadzɛ Ðe Ŋgɔ

YEHU nye ame si do tadedeagu dzadzɛ ɖe ŋgɔ. Le dɔ sia wɔwɔ me la, eɖe veviedodonu, nuwɔwɔ ɖe game dzi, tameɖoɖo kplikpaa, dzonɔameme, kple dzinɔameƒo fia. Yehu ɖe nɔnɔme siwo wòanyo be míawo hã míasrɔ̃ la fia.

Wode dɔ asi na Yehu esime Israel dukɔa nɔ ɣeyiɣi sesẽ aɖe me tom. Izebel si zu ahosi le srɔ̃a Axab ƒe ku megbe, si ganye Yoram, ame si nye fia si nɔ dzi ɖum ɣemaɣi la dada, ƒe ŋusẽkpɔɖeamedzi vɔ̃ɖia nɔ nu gblẽm le dukɔa ŋu. Eƒoe ɖe Israel viwo nu be woasubɔ Baal, ke menye Yehowa o; ewu Mawu ƒe nyagblɔɖilawo eye wòna be “ahasiwɔwɔ” kple “dzosasa” va xɔ aƒe ɖe dukɔa me. (2 Fia. 9:22; 1 Fia. 18:4, 13) Yehowa de se be woatsrɔ̃ Axab ƒe aƒe blibo la, Yoram kple Izebel hã le eme. Yehu ye wòle na be wòaxɔ ŋgɔ le dɔ sia wɔwɔ me.

Zi gbãtɔ si woyɔ Yehu ŋkɔ le Ŋɔŋlɔawo me la, enɔ anyi ɖe aʋakplɔlawo dome le ŋkeke siwo me Israel viwo nɔ aʋa wɔm kple Siriatɔwo le Ramot-Gilead. Asrafomegã xɔŋkɔ aɖee Yehu nye, ne menye eyae nye Israel ƒe aʋafia o fĩ. Nyagblɔɖila Elisa dɔ nyagblɔɖilawo ƒe nusrɔ̃viwo dometɔ ɖeka be wòayi aɖasi ami na Yehu wòazu fia eye wòagblɔ nɛ be wòawu ŋutsu ɖe sia ɖe le xɔsegbela Axab ƒe me.—2 Fia. 8:28; 9:1-10.

Esi Yehu hati asrafomegãwo bia nyae ku ɖe susu si tae nyagblɔɖilawo ƒe nusrɔ̃via va srãe kpɔ ŋu la, Yehu medi be yeagblɔe na wo o. Gake esi woƒo nya ɖe enu la, egblɔ nyateƒea na wo, eye eya kple eƒe zɔhɛwo dze adaŋudede gɔme le ale si woawɔ awu Yoram ŋu. (2 Fia. 9:11-14) Anɔ eme be asrafo aɖewo tsi tsitre ɖe fiaƒome si nɔ dzi ɖum la ƒe dziɖuɖu kple Izebel ƒe ŋusẽkpɔkpɔ ɖe dukɔa dzi ŋu xoxoxo. Aleke kee wòɖale o, Yehu de ŋugble vevie be yeakpɔ mɔ nyuitɔ si dzi yeato awɔ dɔ si wode ye si la ade goe.

Wode abi Fia Yoram ŋu le aʋagbedzi eye wògbugbɔ yi Yezreel, henɔ mɔ kpɔm be aka ɖe eme na ye. Yehu nyae be ne yeƒe ɖoɖoa akpɔ dzidzedze la, mele be nu si yeɖo be yeawɔ la ŋu nya naɖo Yezreel o. Yehu gblɔ be: “Ame aɖeke megasi tso dua me ayi aɖagblɔe le Yezreel o.” (2 Fia. 9:14, 15) Anya kpɔe do ŋgɔ be asrafo siwo de Yoram dzi la atsi tsitre ɖe ye le mɔ aɖewo nu. Eya ta Yehu di be yeakpɔ egbɔ be ame aɖeke nagatsi tsitre ɖe ye ŋu o.

EDO TASIAÐAM ŊKUBIÃTƆE!

Esi Yehu di be yeawɔ yeƒe tameɖoɖoa dzi le vo me ta la, edo tasiaɖam tso Ramot-Gilead yi Yezreel, si nye kilometa 72 sɔŋ ƒe mɔzɔzɔ. Esi wònɔ du dzi sesĩe ɖo ta dua me la, gbetakpɔla aɖe si nɔ gbetakpɔxɔ aɖe tame la kpɔ “Yehu ƒe ameha la gbɔna.” (2 Fia. 9:17) Anɔ eme be Yehu tsɔ aʋakɔ gã aɖe kpe ɖe eɖokui ŋu ale be yeate ŋu aɖo yeƒe taɖodzinua gbɔ.

Esi gbetakpɔlaa de dzesii be Yehu, ŋutsu kalẽtɔ la, le tasiaɖamawo dometɔ ɖeka me la, egblɔ le eŋu be: “Edoa tasiaɖam abe aɖaʋatɔ ene.” (2 Fia. 9:20) Ne nenemae Yehu doa tasiaɖam zi geɖe la, ke ale si wòdi vevie be yeawɔ dɔdeasi siae afɔtsɔtsɔe la awɔe be wòado tasiaɖam la ŋkubiãtɔe vavã.

Yehu meɖo nya aɖeke ŋu na dɔla eve siwo wodɔ ɖe egbɔ la o, eyi ɖado go Fia Yoram kpakple Yuda Fia Axazya, si wɔ ɖeka kplii la; wo dometɔ ɖe sia ɖe le eya ŋutɔ ƒe tasiaɖam me. Yoram bia Yehu be: “Yehu, ŋutifafaea?” Eɖo eŋu nɛ dzikutɔe be: “Ŋutifafa ka? Esi dawò Izebel ƒe ahasiwɔwɔ kple dzosasa ta le agbɔ sɔm ɖaa ko laa?” Esi ŋuɖoɖoa na Yoram nyɔ le eɖokui me la, etrɔ hesi dzo yina. Gake Yehu wɔ kaba! Evu eƒe da me, eye wòté megbe na Yoram, eye aŋutrɔ la ŋɔ eƒe dzi ɖi go, eye wòmu dze eƒe tasiaɖam me heku. Togbɔ be Axazya si hã la, Yehu ti eyome eye wòna wowu eya hã.—2 Fia. 9:22-24, 27.

Axab ƒe aƒemetɔ evelia si wòle be woawue nye Fianyɔnu Izebel vɔ̃ɖi la. Esɔ ŋutɔ be Yehu yɔe be “fiƒodeme.” Esi Yehu va ɖo Yezreel la, ekpɔe wòdo mo ɖa to fiasã la ƒe frese nu nɔ anyime kpɔm. Yehu mehe ɖe megbe kura o, eɖe gbe na fiaŋumewo be woatutu Izebel to fresea nu aƒu anyi. Eyome Yehu na eƒe sɔwo fanya Izebel si gblẽ kɔ ɖo na Israel la. Le esia megbe la, Yehu wu Axab vɔ̃ɖi la ƒe aƒemetɔ gbogbo aɖewo.—2 Fia. 9:30-34; 10:1-14.

Togbɔ be míekpɔa dzidzɔ ɖe ŋutasẽnuwɔwɔ ŋu o hã la, ele be míade dzesii be, le ŋkeke mawo me la, Yehowa zãa esubɔlawo tsɔ drɔ̃a ʋɔnu amewo. Ŋɔŋlɔawo gblɔ be: ‘Ke Mawue tɔtɔ tame na Axazya, be wòayi Yoram gbɔ. Esi wòva la, eya kple Yoram do yi ɖakpe Yehu, Nimsi vi, ame si Yehowa si ami na, be yeatsrɔ̃ Axab ƒe aƒe la.’ (2 Kron. 22:7) Esi Yehu kɔ Yoram ƒe kukua le eƒe tasiaɖam la me ƒu gbe vɔ la, ekpɔe dze sii be nudzɔdzɔ sia na ŋugbe si Yehowa do be yeabia xlɔ̃ ɖe ale si Axab wu Nabot ta la va eme. Gawu la, wode se na Yehu be ‘wòabia hlɔ̃ ɖe Mawu ƒe dɔlawo ƒe ʋu’ siwo Izebel kɔ ɖi la ta.—2 Fia. 9:7, 25, 26; 1 Fia. 21:17-19.

Egbea la, Yehowa subɔla aɖeke metsɔa lãnu ɖe ame siwo tsi tre ɖe tadedeagu vavãtɔ ŋu la ŋu o. Mawu gblɔ be: “Tɔnyee nye hlɔ̃biabia.” (Heb. 10:30) Ke hã be woakpɔ hamea ta tso ŋusẽkpɔɖeamedzi gbegblẽwo me la, ahiã be Kristotɔ hamemetsitsiwo nawɔ nu kple dzideƒo abe Yehu ene. (1 Kor. 5:9-13) Eye ehiã be hamea me tɔwo katã naɖoe kplikpaa aƒo asa na hadede kple ame siwo woɖe le ha me.—2 Yoh. 9-11.

YEHU ƲÃ ŊU ÐE YEHOWA NU

Nu si ʋã Yehu wòwɔ dɔ sia si wode esi la dze le nya siwo wògblɔ na nuteƒewɔla Yonadab emegbe la me be: “Va míyi, ne nàkpɔ, ale si mele ŋu ʋãm ɖe Yehowa nui.” Yonadab lɔ̃ be yeayi kplii, eɖo Yehu ƒe tasiaɖam la, eye woa kplii woyi Samaria. Esi woɖo afi ma la, Yehu wɔ ‘ayemenu, ale be wòatsrɔ̃ Baal-subɔlawo.’—2 Fia. 10:15-17, 19.

Yehu ɖe gbeƒã be yeɖoe be yeaɖu “vɔsaŋkeke gã aɖe” na Baal. (2 Fia. 10:18, 19) Agbalẽnyala aɖe gblɔ be: “Yehu zã aɖaŋu le eƒe nya siawo gbɔgblɔ me ale gbegbe.” Eyi edzi gblɔ be togbɔ be “nya si wozã le afi sia fiaa ‘vɔsa’ zi geɖe hã la, wozãnɛ na xɔsegbelawo ‘tsɔtsrɔ̃’ hã.” Esi wònye be Yehu medi be Baal subɔlawo dometɔ aɖeke nagbe wɔna ma teƒe vava o ta la, eƒo wo katã nu ƒu ɖe Baal ƒe gbedoxɔ me eye wòna wodo awu si to vovo na ame bubuwo tɔ. “Esime wòwu numevɔsa nu” ko la, Yehu na asrafo 80 wu Baal subɔlaawo. Eyome ena wogba Baal ƒe aƒea, eye wotsɔ teƒea wɔ kpɔxadeƒee, si wɔe be magate ŋu anye tadeaguƒe o.—2 Fia. 10:20-27.

Enye nyateƒe be Yehu kɔ ʋu geɖe ɖi ya. Ke hã Ŋɔŋlɔawo gblɔ be enye dzinɔameƒotɔ si ɖe Israel tso Izebel kple eƒe ƒomea ƒe ŋutasẽdziɖuɖua te. Hafi Israel amegã aɖe nawɔ nu si Yehu wɔ la dzidzedzetɔe la, ele be wòanye dzinɔameƒotɔ si ɖoa tame kplikpaa, si wɔa nu dzonɔamemetɔe. Biblia ŋuti numeɖegbalẽ aɖe ka nya ta be: “Enye dɔ sesẽ aɖe si wowɔ de goe tsitotsito afɔtsɔtsɔe. Ne ame aɖe be yeawɔ nu blewuu la, ado kpo nu, mate ŋu atsrɔ̃ Baal subɔlawo ɖa le Israel o.”

Ðikeke mele eme o be àte ŋu akpɔe be nɔnɔme siwo me tom Kristotɔwo le egbea la bia be Yehu ƒe nɔnɔme aɖewo nanɔ wo si. Le kpɔɖeŋu me, aleke wòle be míawɔ nui ne wote mí kpɔ be míakpɔ gome le nuwɔna aɖe si Yehowa lé fui la me? Ele be míawɔ nu kpata dzinɔameƒotɔe kple ŋkubiã agbe ewɔwɔ. Le tadedeagu na Mawu ƒe nyawo gome la, ele be míaʋã ŋu ɖe Yehowa nu.

LÉ ŊKU ÐE YEHOWA ƑE SEAWO ŊU, NE NÀZƆ ÐE WO NU

Ŋutinya sia ƒe nuwuwu nye nuxlɔ̃ame na mí. ‘Yehu meɖe asi le sikanyivi siwo le Betel kple Dan la ŋu o.’ (2 Fia. 10:29) Aleke wòdzɔe be ame aɖe si me dzo nɔ nenema gbegbe ɖe tadedeagu dzadzɛa ŋu la ɖe mɔ ɖe trɔ̃subɔsubɔ ŋu?

Yehu anya susui be ne Israel fiaɖuƒea kple Yuda fiaɖuƒea ƒe subɔsubɔwo to vovo tso wo nɔewo gbɔ la, awɔe be Israel fiaɖuƒea nanɔ eɖokui si. Eya ta abe Israel fia siwo do ŋgɔ nɛ ke ene la, edze agbagba be yeana Israel fiaɖuƒea nakpɔtɔ anɔ eɖokui si esi wòyi edzi do nyivisubɔsubɔ ɖe ŋgɔ. Gake esia ɖee fia be meɖo ŋu ɖe Yehowa, ame si ɖoe fia la, ŋu o.

Yehowa kafu Yehu le esi ‘wòwɔ nu si dze Mawu ŋu pɛpɛpɛ’ ta. Ke hã Yehu “melé ŋku ɖe Yehowa ƒe seawo ŋu, ne wòazɔ ɖe wo nu kple eƒe dzi blibo o.” (2 Fia. 10:30, 31) Ne èbu nu bubu siwo katã Yehu wɔ do ŋgɔ ŋu la, nya sia awɔ nuku na wò eye wòawɔ nublanui hã na wò. Ke hã nusɔsrɔ̃ aɖe le eme na mí. Míate ŋu abu ƒomedodo si le mía kple Yehowa dome la nu tsɛe gbeɖe o. Ehiã be míanɔ Mawu ƒe Nya la srɔ̃m, anɔ ŋugble dem le eŋu ahanɔ gbe dom ɖa na mía Fofo si le dziƒo la gbe sia gbe be míate ŋu awɔ nuteƒe nɛ. Eya ta mina míawɔ míaƒe ŋutete katã be míalé ŋku ɖe Yehowa ƒe seawo ŋu, ne míazɔ ɖe wo nu tso míaƒe dzi blibo me.—1 Kor. 10:12.

[Aɖaka si le axa 4]

Nu Siwo Wogblɔ Tso Yehu Ŋu Le Ŋutinyagbalẽwo Me

Zi geɖe la, ɖeklemiɖelawo kea ɖi be ame siwo ŋkɔwo woyɔ le Ŋɔŋlɔawo me la menɔ anyi kpɔ o. Ekema to vovo na Biblia la, ɖe nuŋlɔɖi bubu aɖe li si ɖo kpe Yehu ƒe anyinɔnɔ dzia?

Ne mede ɖeke o la, blema Asiriatɔwo ƒe nuŋlɔɖi etɔ̃ ya teti yɔ Israel fia sia ƒe ŋkɔ tẽe. Wo dometɔ ɖeka ƒe nɔnɔmetata ɖee fia be Yehu, alo ɖewohĩ eƒe amedɔdɔwo dometɔ ɖeka, bɔbɔ ɖe Asiria Fia Shalmaneser III lia ŋkume hele adzɔ xem nɛ. Nu si woŋlɔ ɖe exa la xlẽ be: “Yehu (Ia-ú-a), Omri (Hu-um-ri) vi ƒe adzɔ; mexɔ klosalo, sika, sika saplu-gba goboe, sikaze si te le tsutsuẽ, sikakpluwo, sikatɔkpowo, ganugoe, fiatikplɔ ɖeka, (kple) ati puruhtu [womenya nu si nu mamlɛtɔ sia si woyɔ la fia o].” Menye “Omri vi” ŋutɔŋutɔe Yehu nye o, gake wozã nyagbɔgblɔ sia tsɔ ɖɔ Israel fia siwo va ɖe Omri yome, eye anɔ eme be esi Omri xɔ ŋkɔ eye wòtso Israel ƒe fiadu si nye Samaria tae.

Womate ŋu aɖo kpe nya si Asiria fia gblɔ be Yehu xe adzɔ na ye la dzi o. Togbɔ be ele alea hã la, eyɔ Yehu ŋkɔ zi etɔ̃—ɖeka dze le nuŋlɔɖikpe aɖe dzi, ɖeka dze le Shalmaneser ƒe kpetata aɖe dzi, eye mamlɛa dze le Asiria fiawo ƒe ŋutinyagbalẽ me. Nuŋlɔɖigbalẽ siawo ɖo kpe edzi be womate ŋu ake ɖi be ame sia si woyɔ le Biblia me la menɔ anyi kpɔ o.