Nufiame Nyuiwo tso Ŋugbedodonyigba la Dzi

ŊUGBEDODONYIGBA si ŋu Biblia ƒo nu le la nɔ etɔxɛ vavã. Anyigba ƒomevi vovovowo nɔ anyigba sia si le sue, ne wotsɔe sɔ kple bubuwo la dzi. To siwo dzi sno xɔna la le dziehe gome; anyigba xɔdzowo le anyiehe gome. Bali wɔnuwo, gbedadaƒonyigbawo, kple tonyigba siwo dzi woate ŋu ade atikutsetsegblewo ɖo eye lãhawo aɖu gbe le la li.

Alesi anyigba la ƒe kɔkɔme, yame ƒe nɔnɔme, kple ke le vovovoe la wɔe be atiwo, ati suewo, kple numiemie bubu hamehame bɔ ɖe edzi—kpakple esiwo miena le tonyigba fafawo dzi, bubuwo miena le dzogbenyigba xɔdzowo dzi, eye ɖewo hã nyona le tagbanyigbawo alo agakpenyigba gbadzawo dzi. Numiemieŋutinunyala aɖe gblɔ be woate ŋu akpɔ numiemie hamehame 2,600 le nuto sia me! Israel-vi gbãtɔ siwo va tsa ŋku le anyigba la dzi la ke ɖe kpeɖodzi si ɖe eƒe ŋutete fia la ŋu enumake. Wotsɔ weintsetse kpo ɖeka si lolo ale gbegbe be ŋutsu evee tsɔe ɖe abɔta tso bali aɖe me gbɔe! Esɔ be wotsɔ ŋkɔ na bali la be Eskol, si gɔmee nye “[Weintsetse] Kpo.”a—Mose IV, 13:21-24.

Gake mina míalé ŋku ɖe anyigba legbee tɔxɛ sia ƒe akpa vovovo aɖewo ŋu kpɔ azɔ̃, vevietɔ eƒe anyiehe kpa dzi.

Shephelah

Ŋugbedodonyigba la ƒe ɣetoɖoƒeƒuta le Mediterranea Ƒua to. Tso atsiaƒu gbɔ yi Shephelah anɔ abe kilometa 40 ene. Nya “Shephelah” gɔmee nye “Balime,” gake le nyateƒe me la, tonyigbae wònye eye ne wotsɔe sɔ kple Yuda ƒe to siwo le ɣedzeƒekpa dzi ko hafi woate ŋu agblɔ be enye bali me.

Kpɔ anyigbanɔnɔmetata si kpe ɖe nyati sia ŋu dzi eye nàde dzesi alesi Shephelah le anyigba siwo ƒo xlãe domee la ɖa. Yuda-towo le eƒe ɣedzeƒe; Filistia ƒe ƒutanyigba gbadzawo le eƒe ɣetoɖoƒe. Eyata Shephelah nye dometsonyigba, mɔxenu si mã Mawu ƒe amewo kple woƒe blema futɔwo dome le Biblia ƒe ɣeyiɣiwo me. Ele be aʋakɔ ɖesiaɖe si aho aʋa tso ɣetoɖoƒe gome la nato Shephelah hafi ate ŋu ava dze Yerusalem si nye Israel ƒe fiadu dzi.

Nu ma tɔgbe dzɔ le ƒe alafa asiekelia D.M.Ŋ. me. Biblia ka nya ta be Aram ƒe Fia Xazael “ho va wɔ aʋa kple Gat [anye Shephelah ƒe liƒo dzie wòanɔ], eye wòxɔe, eye Xazael ɖo be, yeaho ɖe Yerusalem ŋuti.” Fia Yoas tsɔ nu xɔasi hamehame tso gbedoxɔ kple fiaƒe la me tsɔ na zãnu Xazael ale be wòtsɔ tɔ tee. Gake nuŋlɔɖi sia fia be Shephelah nye teƒe vevi aɖe si kpɔa Yerusalem ƒe dedienɔnɔ ta.—Fiawo II, 12:18, 19.

Míate ŋu asrɔ̃ nu nyui aɖe tso nusia me. Xazael di be yeadze Yerusalem dzi, gake ele be wòato Shephelah gbã. Nenema ke Satana Abosam hã le Mawu subɔlawo “dim, be yeavuvu ami,” gake zi geɖe la, ele be wòato dometsonyigba aɖe dzi hafi—Biblia ƒe gɔmeɖose siwo ŋu wokuna ɖo goŋgoŋ, abe esiwo ƒo nu le hadede kple ŋutilãmenudidi ŋu ene. (Petro I, 5:8; Korintotɔwo I, 15:33; Timoteo I, 6:10) Zi geɖe la, dada le Biblia ƒe gɔmeɖosewo dzie nye nu gbãtɔ si naa wowɔa nuvɔ̃ gãwo. Eyata na dometsonyigba ma nanɔ dedie. Wɔ ɖe Biblia ƒe gɔmeɖosewo dzi fifia, eye màda le Mawu ƒe sewo dzi le etsɔme o.

Yuda-tonyigba La

Yuda-tonyigba la le ŋgɔ tso Shephelah gbɔ ɖo ta anyigba la me. Enye tonyigba si dzi wokpɔa nuku, amiti ƒe ami kple wein nyuiwo tsoe. Esi Yuda le to dzi ta la, enye sitsoƒe nyui aɖe hã. Eyatae Fia Yotam tu “mɔ̃wo kple xɔ tsralawo” ɖe afima ɖo. Amewo te ŋu sina yia afima le xaxaɣiwo.—Kronika II 27:4.

Yerusalem, si woyɔna be Zion la, nye Yuda-tonyigba la ƒe akpa ɖedzesi aɖe. Edze abe Yerusalem nɔ dedie ene, elabena bali ɖiagawo ƒo xlã eƒe go etɔ̃awo katã godoo, eye ƒe alafa gbãtɔ me ŋutinyaŋlɔla Josephus gblɔ be gli etɔ̃ xe eƒe dziehekpa dzi. Gake hafi sitsoƒe nakpɔtɔ anɔ dedie la, nu geɖe hiã wu gliwo kple aʋawɔnuwo ko. Ele be tsi hã nanɔ anyi. Esia hiã ŋutɔ, vevietɔ ne woɖe to ɖe wo, elabena ne tsi meli o la, azi dumevi siwo woxaxa ɖo la dzi be woana ta kaba.

Yerusalem kpɔa tsi aɖe sinu tsoa Siloam-ta me. Gake, le ƒe alafa enyilia D.M.Ŋ. me esime Fia Xizkiya nɔ mɔ kpɔm be Asurtɔwo ava ɖe to ɖe yewo la, eɖo gli ɖe gota ɖe Siloam-ta ŋu ale be wòva le dua me, wòtsɔ kpɔ etae. Exe tsivudo siwo nɔ dua godo hã bene tsi kpɔkpɔ nasesẽ na Asurtɔ siwo ava ɖe to ɖe yewo. (Kronika II, 32:2-5; Yesaya 22:11) Menye ema ɖeɖekoe o. Xizkiya te ŋu trɔ mɔ na tsi gbogbo aɖe wòge ɖe Yerusalem hã!

Xizkiya ɖe tɔʋu tso Gixon-tɔ la gbɔ yi keke Siloam-tab la gbɔ, eye wogblɔna be enye mɔ̃ɖaŋudɔ gã siwo wowɔ le blema la dometɔ ɖeka. Tɔʋu sia si ƒe goglome ade meta 1.8 la didi meta 533. Bu eŋu kpɔ—woɖe tɔʋu si didi kilometa afã kloe la tsɔ to agakpe domee! Egbea si nye ƒe 2,700 megbe la, amedzro siwo yia Yerusalem te ŋu toa mɔ̃ɖaŋudɔ deŋgɔ sia si woyɔna be Xizkiya ƒe Tɔʋu la me.—Fiawo II, 20:20; Kronika II, 32:30.

Agbagba si Xizkiya dze be yeakpɔ Yerusalem ƒe tsi ta ahana wòasɔ gbɔ ɖe edzi la ate ŋu afia nu nyui aɖe mí. Yehowae nye “tsi gbagbe vudo.” (Yeremya 2:13) Eƒe nukpɔsusu siwo le Biblia me la léa ame ƒe agbe ɖe te. Susu ma tae ɖokuisi Biblia nusɔsrɔ̃ le vevie ɖo. Gake vovokpɔkpɔ ɖe nusɔsrɔ̃ ŋu, kple sidzedze si ado tso eme la masu asiwò dzro ko o. Hafi nàte ŋu akpɔ ɣeyiɣi ɖe eŋu la, ɖewohĩ ahiã be ‘nàɖe tɔʋuwo,’ abe ɖe nètsɔe to wò gbesiagbe ɖoɖowɔɖi si me vovoɣi mele o la ene me. (Lododowo 21:1-5; Efesotɔwo 5:15, 16) Ne èdze egɔme ko la, yi edzi nàwɔ ɖe wò ɖoɖowɔɖia dzi, atsɔ ɖokuisinusɔsrɔ̃ aɖo nɔƒe gbãtɔ. Kpɔ nyuie be ame aɖeke alo naneke nagaxɔ tsidzɔƒe xɔasi sia le asiwò o.—Filipitɔwo 1:9, 10.

Gbedzi Nutowo Me

Yuda-gbedzi le Yuda-towo ƒe ɣedzeƒekpa si woyɔna be Jeshimon, si gɔmee nye “Gbedzi” la dzi. (Samuel I, 23:19, NW ƒe etenuŋɔŋlɔ) Aga globowo kple agakpe kɔkɔ klitsaklitsawo le kuɖiɖinuto sia me le Dzeƒua to. Tsiya siwo tso ɣetoɖoƒe gome la mete ŋu ɖoa Yuda-gbedzi si ɖi abu abe meta 1,200 ene le kilometa 24 ko me o, eyata ƒã hafi tsi dzana le afima. Ðikeke mele eme o be gbedzi afisiae woɖona Azazel ƒe gbɔ̃tsu ɖa le ƒe sia ƒe ƒe Avuléŋkeke la dzi. Afisia hãe Dawid si le Saul gbɔ yi. Afisiae Yesu tsi nu dɔ ŋkeke 40 eye emegbe Abosam va tee kpɔ le.—Mose III, 16:21, 22; Psalmo 63:1; Mateo 4:1-11.

Paran-gbedzi didi tso Yuda-gbedzi ƒe anyiehe ɣetoɖoƒekpa dzi abe kilometa 160 ene. Teƒe geɖe siwo Israel-viwo ƒu asaɖa anyi ɖo esime wonɔ woƒe ƒe 40 mɔ zɔm tso Egipte yina Ŋugbedodonyigba la dzi la nɔ afisia. (Mose IV, 33:1-49) Mose ŋlɔ nu le “gbe gã dziŋɔ ma dzi, afisi da vɔ̃wo kple dziɖegbewo le, afisi tsi vena le” la ŋu. (Mose V, 8:15) Ewɔ nuku be Israel-vi miliɔn geɖe te ŋu tsi agbe! Gake Yehowae lé wo ɖe te.

Mina esia nana míaɖo ŋku edzi be Yehowa ate ŋu alé míawo hã ɖe te, le gbɔgbɔmekuɖiɖi ƒe xexe sia gɔ̃ hã me. Ẽ, míawo hã míele da vɔ̃wo kple dziɖegbewo dome zɔm, togbɔ be menye da kple dziɖegbe ŋutɔŋutɔwoe wonye o gake. Ðewohĩ ahiã be míade ha kple amesiwo mebua tame le nya vɔ̃ siwo wogblɔna siwo ate ŋu agblẽ míaƒe susu ŋu o la gbesiagbe. (Efesotɔwo 5:3, 4; Timoteo I, 6:20) Amesiwo kua kutri toa kplamatsedonu siawo me subɔa Mawu la dze na kafukafu. Woƒe nuteƒewɔwɔ nye kpeɖodzi sẽŋu si fia be Yehowa lé wo ɖe te vavã.

Karmel-towo

Ŋkɔ Karmel gɔmee nye “Atikutsetsebɔ.” Weingblewo, amitigblewo, kple atikutsetsetiwo ɖo atsyɔ̃ na nuto wɔnu sia si le dziehe, si ƒe didime ade kilometa 50 la me. Togbaka sia ƒe togbɛ dzi ƒe atsyɔ̃ kple nyonyo nye nusi womate ŋu aŋlɔ be o. Yesaya 35:2 ƒo nu le “Karmel . . . ƒe atsyɔ̃” ŋu tsɔ fia alesi Israel-nyigba si wogbugbɔ ɖo anyi awɔ nu le ŋutikɔkɔe mee la ƒe kpɔɖeŋu.

Nya ɖedzesi geɖe dzɔ le Karmel. Afisiae Eliya tɔ gbe Baal ƒe nyagblɔɖilawo le eye “dzo tso Yehowa gbɔ va,” tsɔ ɖo kpe Eƒe gãnyenye dzi. Karmel-toa tame hãe Eliya ƒo nu le alilikpovi si trɔ zu tsidzadza gã aɖe la ŋu le, eye wòna kuɖiɖi si va Israel dzi la nu tso nukutɔe. (Fiawo I, 18:17-46) Karmel-toa dzie Elisa si va xɔ ɖe Eliya teƒe la nɔ esime Sunem nyɔnua va ɖe kuku nɛ be wòakpe ɖe ye vi kukua ŋu, amesi Elisa fɔ ɖe tsitre emegbe.—Fiawo II, 4:8, 20, 25-37.

Atikutsetsebɔwo, amitigblewo, kple weinkawo gakpɔtɔ le Karmel-toa ŋu. Seƒoƒo dzeani vovovowo nɔa to siawo ŋu le adame. Ðewohĩ esi Salomo nɔ Sulamit ɖetugbia ƒe taɖa ƒe nyonyo ɖɔm alo alesi eƒe ta nyui la ɖo atsyɔ̃ tso eƒe kɔ gbɔ tae wògblɔ nɛ be, “Wò ta, si le nuwò, ɖi Karmel.”—Hawo ƒe Ha 7:6.

Atsyɔ̃ɖoɖo si nɔ Karmel-towo dzi la na míeɖoa ŋku gbɔgbɔmenyonyo si Yehowa na wòle eƒe egbegbe subɔlawo ƒe habɔbɔ la dzi. (Yesaya 35:1, 2) Yehowa Ðasefowo le gbɔgbɔmeparadiso me nyateƒe, eye woƒe seselelãme wɔ ɖeka kple Fia Dawid tɔ, eya amesi ŋlɔ be: “Dzidzenu la dze nyuiaƒe nam; domenyinu la dze ŋunye.”—Psalmo 16:6.

Nyateƒe, kuxi geɖe li siwo wòle be Mawu ƒe egbegbe gbɔgbɔmedukɔ la nadze ŋgɔe, abe alesi blema Israel-viwo dze ŋgɔ tsitretsiɖeŋu enuenu tso Mawu ƒe futɔwo gbɔ ene. Gake alesi Yehowa yra nyateƒe Kristotɔwoe la mebuna le ŋku dzi na wo gbeɖe o—esiwo ƒe ɖewoe nye Biblia me nyateƒe si me nɔa kɔkɔm ɖe edzi, xexeame katã ƒe nɔviwo ƒe habɔbɔ, kple agbe mavɔ nɔnɔ le paradisonyigba dzi ƒe mɔnukpɔkpɔ.—Lododowo 4:18; Yohanes 3:16; 13:35.

“Ele abe Yehowa ƒe Abɔ me Ene”

Blema Ŋugbedodonyigba la nya kpɔ ŋutɔ. Esɔ be wogblɔ be enye afisi “notsi kple anyitsi bɔ ɖo.” (Mose I, 13:10; Mose II, 3:8) Mose yɔe be enye “anyigba nyui, si dzi tɔʋuwo, vudowo kple tawo, siwo dzɔ tso towo dzi kple baliwo me le la dzi, anyigba, si dzi lu kple mɔli, weinkawo, gbotiwo kple yevuboɖatiwo le, anyigba, si dzi amitiwo kple anyitsi le, anyigba si dzi nàkpɔ nu geɖe aɖu le, eye naneke mahiã wò o, anyigba, si ƒe kpewo nye ga yibɔ, eye nàku ga tso towo me.”—Mose V, 8:7-9.

Ne Yehowa te ŋu tsɔ denyigba nyui si dzi nuwo bɔ ɖo na eƒe blema dukɔa la, ke míeka ɖe edzi be ate ŋu atsɔ ŋutikɔkɔe ƒe paradiso si axɔ anyigba katã dzi la ana eƒe egbegbe subɔla nuteƒewɔlawo—si me towo, baliwo, tɔsisiwo, kple tawo anɔ. Ẽ, Ŋugbedodonyigba la kple edzi nu vovovoawo katã nye gbɔgbɔmeparadiso si me eƒe Ðasefowo le egbea kpakple Paradiso si ava le xexeme yeyea me la ƒe kpɔɖeŋu. Afimae nyagblɔɖi si woŋlɔ ɖe Psalmo 37:29 ava eme le be: “Ame dzɔdzɔewo anyi anyigba la dome, eye woanɔ edzi tegbee.” Ne Yehowa tsɔ Paradisoƒe ma na amegbetɔ siwo nye toɖolawo la, dzidzɔ ka gbegbee nye si wòanye na wo be woalé ŋku ɖe eƒe “xɔwo” me eye be woayi ema wɔwɔ dzi tegbee!

[Etenuŋɔŋlɔwo]

[Anyigbatata si le axa 4]

(Edze nyuie le agbalẽa ŋutɔ me)

GALILEA

Karmel-to

Galilea-ƒu

SHEPHELAH

SAMARIA

Yuda-towo

Dzeƒu

[Afi Si Míexɔ Mɔɖeɖe Tso]

NASA ƒe foto

[Anyigbatata si le axa 4]

(Edze nyuie le agbalẽa ŋutɔ me)

Shephelah nye mɔxenu nɔ Mawu ƒe dukɔ kple woƒe futɔwo dome

MI 0 5 10

KM 0 8 16

Filistia-gbadzaƒe

Shephelah

Yuda-tonyigba

Yuda-gbedzi

Bali Gã

Dzeƒu

Amon kple Moab nyigba

[Anyigbatata/Nɔnɔmetata si le axa 5]

Xizkiya ƒe Tɔʋu: Edidi meta 533, woɖee to agakpe sesẽ me

Tyropoeon Bali

Siloam

DAWID ƑE DU

Kidron Bali

Gixon

[Nɔnɔmetata siwo le axa 6]

Dawid va kpɔ sitsoƒe le Yuda-gbedzi tso Saul si me. Emegbe Abosam va te Yesu kpɔ le afisia

[Afi Si Míexɔ Mɔɖeɖe Tso]

Pictorial Archive (Near Eastern History) Est.

[Nɔnɔmetata siwo le axa 7]

Karmel-to, afisi Eliya do ŋukpe Baal ƒe nunɔlawo le

[Afi Si Míexɔ Mɔɖeɖe Tso]

Pictorial Archive (Near Eastern History) Est.

[Nɔnɔmetata siwo le axa 8]

“Yehowa, wò Mawu, le kplɔ wò ge ava anyigba nyui, si dzi tɔʋuwo, vudowo kple tawo, siwo dzɔ tso towo dzi kple baliwo me le la dzi.”—Mose V, 8:7