“Fetu Li Na Miaƒe Dɔwɔwɔ La!”

FIA ASA si nɔ eƒe asrafowo nu la ɖe abla ɖi abu tso Yudea toawo dzi yina bali la me. Esi Asa ɖo gbadzaƒe aɖe la, etɔ eye nu si wòkpɔ la wɔ nuku nɛ. Ekpɔ futɔwo ƒe asaɖa aɖe le balia me ɖaa​—aʋakɔ gã aɖe ŋutɔe wonye! Le nyateƒe me la, Etiopiatɔwo ƒe asrafo mawo ade miliɔn ɖeka. Aʋakɔ ma ƒe afã kple nu vi aɖe koe Asa ƒe amewo nye.

Togbɔ be Asa yina aʋa wɔ ge hã la, nu kae nɔ vevie nɛ wu? Gbeɖeɖe na eƒe aʋafiawoa? Dzidede ƒo na eƒe asrafowoa? Alo lɛta ŋɔŋlɔ na eƒe ƒometɔwo ye nɔ vevie nɛa? Kura o! Le nɔnɔme sesẽ sia me la, Asa do gbe ɖa.

Hafi míalé ŋku ɖe gbedodoɖa ma ŋu eye míadzro nu si dzɔ ɣemaɣi me la, bu ame si ƒomevi Asa nye la ŋu kpɔ. Nu kae ʋãe wòwɔ nu nenema? Ðe susu aɖe li si tae wòakpɔ mɔ be Mawu nakpe ɖe ye ŋua? Nu kae Asa ƒe nuŋlɔɖia fia mí tso ale si Yehowa yrana ɖe Esubɔlawo ƒe dɔwɔnawo dzi la ŋu?

ASA ƑE AGBEMEŊUTINYA

Esi Israel ƒe fiaɖuƒea ma ɖe eve ƒe 20 megbe la, Yudatɔwo tsɔ trɔ̃subɔlawo ƒe kɔnuwo ƒo ɖi woƒe subɔsubɔ. Esi Asa zu fia le ƒe 977 D.M.Ŋ. me la, fiaŋumewo gɔ̃ hã nɔ ta dem agu na Kanaantɔwo ƒe vidzidzimawuwo. Ŋutinya si tso gbɔgbɔ me si ƒo nu tso Asa ƒe dziɖuɖu ŋu la gblɔ be, ewɔ “nu si nyo, eye wòdze Yehowa, eƒe Mawu la ŋu.” Asa “[ɖe] vɔsamlekpui tutɔwo kple nuxeƒewo ɖa, egbã aƒeliwo, eye wòlã Aserawo.” (2 Kron. 14:1, 2) Asa nya “ŋutsu siwo gbɔ ŋutsuwo dɔna le gbedoxɔ me, (NW)” wònye woƒe trɔ̃subɔsubɔ ƒe akpa aɖe la ɖa le Yuda fiaɖuƒea me. Asa wɔ nu wòyi ŋgɔ wu nu siawo ɖeɖe ɖa ko. Ede dzi ƒo na dukɔ la hã be “woadi Yehowa, wo fofowo ƒe Mawu la” eye “woawɔ eƒe nufiamewo kple eƒe sewo dzi.”​—1 Fia. 15:12, 13; 2 Kron. 14:3.

Esi Yehowa kpɔ ŋudzedze ɖe ale si Asa tsɔ dzo ɖe tadedeagu vavãtɔa ŋu la ŋuti ta la eɖo eteƒe nɛ hena ŋutifafa nɔ eƒe fiaɖuƒea me ƒe geɖe. Eya ta fia la te ŋu gblɔ be: “Míedi Yehowa, mía Mawu la. Esi míedii la, eya ta wòna gbɔdzɔe mí godoo.” Dukɔa wɔ mɔnukpɔkpɔ sia ŋu dɔ tsɔ li ke Yuda fiaɖuƒea ƒe duawo. Biblia gblɔ be: “Wotso [duawo], eye wowɔe de goe dedie.”​—2 Kron. 13:23; 14:5, 6.

LE AƲAGBEDZI

Le Asa ƒe nuteƒewɔwɔ ta la, mele be wòawɔ nuku na mí be edo gbe ɖa esi amegbetɔwo ƒe aʋakɔ gãtɔ kekeake si ŋu woƒo nu tsoe le Ŋɔŋlɔawo me la kpe aʋa kplii o. Asa nyae be Mawu ɖoa eteƒe na ame si ɖe xɔse fia. Le eƒe gbedodoɖaa me la, fia la ƒo koko bia Yehowa ƒe kpekpeɖeŋu. Asa nyae be ne yeɖo ŋu ɖe Mawu ŋu eye wòle megbe na ye la, yeƒe futɔwo mate ŋu aɖu dzi gbeɖe o, metsɔ le eme be futɔawo sɔ gbɔ eye ŋusẽ le wo ŋu o. Esi Asa nyae be aʋa sia me tsonu anye kafukafu alo vlododo Yehowa ƒe ŋkɔ tae wòdo gbe ɖa tso eŋu ɖo. Fia la do gbe ɖa be: “Yehowa, mía Mawu, xɔ na mí, elabena wòe míede mee, eye le wò ŋkɔ me míeho aʋa ɖe ame gbogbo siawo ŋu; Yehowa, wòe nye mía Mawu, eye amegbetɔ aɖeke mate ŋu axe mɔ na wò o.” (2 Kron. 14:10) Ðeko wòle abe enɔ gbɔgblɔm be: ‘Yehowa, Etiopiatɔwo ƒe aʋahoho ɖe mía ŋu nye aʋahoho ɖe ŋuwò. Mègaɖe mɔ amegbetɔ beli siawo naɖu wò dukɔ si ŋu wò ŋkɔ le la dzi ahato esia dzi ado vlo wò ŋkɔ o’ ene. “Tete Yehowa si Kusitɔwo [“Etiopiatɔwo,” NW] le Asa kple Yuda ŋgɔ, ale be Kusitɔwo si.”​—2 Kron. 14:11.

Egbea la, Yehowa ƒe amewo dzea ŋgɔ tsitretsiɖeŋula sẽŋu geɖewo. Menye aʋawɔnu ŋutɔŋutɔwo míazã atsɔ awɔ aʋa kpli wo o. Gake míate ŋu aka ɖe edzi be Yehowa aɖo eteƒe na nuteƒewɔla ɖe sia ɖe si le gbɔgbɔmeʋa wɔm le eƒe ŋkɔa ta la, eye wòana wòaɖu dzi. Ðewohĩ ehiã be mía dometɔ ɖe sia ɖe naʋli sesĩe ayi edzi awɔ aʋa kple agbe nyui manɔmanɔ gbɔgbɔ si xɔ aƒe ɖe xexea me la, alo awɔ avu kple míawo ŋutɔwo ƒe gbɔdzɔgbɔdzɔwo, alo aku kutri be míakpɔ míaƒe ƒomea ta tso ŋusẽkpɔɖeamedzi gbegblẽwo si me. Ke hã nɔnɔme sesẽ ka kee ɖava mía dzi o Asa ƒe gbedodoɖa la ate ŋu ado ŋusẽ mí. Yehowa ye na Asa ɖu dzi. Esia ɖe nu si ame siwo katã ɖoa ŋu ɖe Mawu ŋu la ate ŋu anɔ mɔ kpɔm na la fia. Amegbetɔwo ƒe ŋusẽ aɖeke mate ŋu anɔ te ɖe Yehowa nu o.

DZIDEƑONAME KPLE NUXLƆ̃AME

Esi Asa trɔ tso aʋagbedzi gbɔna la, Azariya va kpee. Nyagblɔɖila sia gblɔ dzideƒonamenya kple nuxlɔ̃amenya aɖe; egblɔ be: “Asa kple Yuda blibo la kpakple Benyamin, miɖo tom! Yehowa nɔ kpli mi, elabena mienɔ eŋu. Ne miedii la, ana be, miakpɔe; ke ne miegblẽe ɖi la, eya hã agblẽ mi ɖi. . . . Miawo milé dzi ɖe ƒo, eye miaƒe asi megado agblɔ o; elabena fetu li na miaƒe dɔwɔwɔ la!”​—2 Kron. 15:1, 2, 7.

Nya siawo ate ŋu ado ŋusẽ míaƒe xɔse. Woɖee fia be Yehowa anɔ kpli mí ne míeyi edzi subɔe nuteƒewɔwɔtɔe. Ne míedo gbe ɖa nɛ bia eƒe kpekpeɖeŋu la, míate ŋu aka ɖe edzi be aɖo to mí. Azariya gblɔ be: “Milé dzi ɖe ƒo.” Zi geɖe la, ebiana be dzi nanɔ mía ƒo geɖe ŋutɔ hafi míate ŋu awɔ nu si le eteƒe, gake míenyae be míate ŋu awɔ esia le Yehowa ƒe kpekpeɖeŋu me.

Esi wònye be Asa mama Maxa wɔ ‘legba nyɔŋu aɖe na Asera subɔsubɔ’ ta la, eva hiã be Asa naɖe mamaa ɖa be “magaɖu dzi” o, togbɔ be esia wɔwɔ sesẽ nɛ hã. Etɔ dzo mamaa ƒe legbawo hã. (1 Fia. 15:13) Yehowa yra Asa le ale si wòɖoe kplikpaa hewɔ nu si le eteƒe dzinɔameƒotɔe ta. Ele be míawo hã míaku ɖe Yehowa kple eƒe dzidzenu dzɔdzɔeawo ŋu goŋgoŋ, míaƒe ƒometɔwo ɖawɔ nuteƒe na Mawu loo, alo wogbe nuteƒewɔwɔ nɛ hã. Ne míewɔe alea la, Yehowa aɖo míaƒe nuteƒewɔwɔa teƒe na mí.

Asa ƒe teƒeɖoɖoa ƒe akpa aɖee nye be ekpɔ eteƒe Israel vi geɖewo tso dziehe fiaɖuƒe gbexɔsea me va Yuda bibibi esi wokpɔe be Yehowa li kplii ta. Wokpɔ dzidzɔ ɖe tadedeagu dzadzɛa ŋu ale gbegbe be wotiae be yewoagblẽ yewoƒe aƒewo ɖi ava nɔ Yehowa subɔlawo dome. Asa kple Yuda dukɔ blibo la ‘bla nu be yewoadi Yehowa, yewo fofowo ƒe Mawu la, tso dzi blibo kple luʋɔ blibo me.’ Nu kae do tso esia me? Mawu “na wokpɔe, eye Yehowa na gbɔdzɔe wo godoo va kpe.” (2 Kron. 15:9-15) Aleke míekpɔa dzidzɔe nye esi ne dzɔdzɔenyenyelɔ̃lawo va Yehowa ƒe tadedeagu dzadzɛa me!

Ke hã, nuxlɔ̃ame aɖe si nye ŋkubiãnya hã dze le nyagblɔɖila Azariya ƒe nyawo me. Exlɔ̃ nu be: “Ne [miegblẽ Yehowa] ɖi la, eya hã agblẽ mi ɖi.” Esia negadzɔ ɖe mía dzi gbeɖe o, elabena emetsonuawo ate ŋu awɔ nublanui ŋutɔ! (2 Pet. 2:20-22) Ŋɔŋlɔawo megblɔ nu si tae Yehowa na Azariya gblɔ nuxlɔ̃amenya sia na Asa o, gake fia la mewɔ ɖe edzi o.

“ÈWƆ BOMETSINU”

Le Asa ƒe dziɖuɖu ƒe ƒe 36 lia me la, Israel Fia Baesa ho ɖe Yuda ŋu. Ðewohĩ be Baesa naxe mɔ na eteviwo be woagayi aɖawɔ ɖeka kple Asa o eye be woagava zu tadedeagu dzadzɛa me tɔwo o ta la, ede asi gli kɔkɔwo ɖoɖo ɖe Rama du si didi tso Yerusalem kilometa 8 pɛ ko la ŋu. Le esi Asa nadi kpekpeɖeŋu tso Mawu gbɔ abe ale si wòwɔe esime Etiopiatɔwo va ɖe to ɖee ene teƒe la, Asa di kpekpeɖeŋu tso amegbetɔwo gbɔ. Eɖo nunanawo ɖe Siria fia hebia tso esi be wòaho ɖe Israel ƒe dziehefiaɖuƒea ŋu. Esi Siriatɔwo ho ɖe Baesa ŋu ko la, edzudzɔ Rama tsotso.​—2 Kron. 16:1-5.

Yehowa mekpɔ ŋudzedze ɖe Asa ƒe nuwɔna sia ŋu o, eya ta edɔ nyagblɔɖila Xanani be wòaɖagblɔe nɛ. Esi Asa nya ale si Yehowa tu nu kple Etiopiatɔwo ta la, ɖe wòle be wòanyae be “Yehowa ƒe ŋku kpɔa anyigba blibo la dzi, eye wòdoa ŋusẽ ame siwo ku ɖe eŋu kple woƒe dzi blibo.” Ðewohĩ Asa xɔ aɖaŋuɖoɖo vɔ̃ tso amewo gbɔ alo ebu Baesa kple eƒe aʋakɔa be womesesẽ boo o, eye wòsusui be yeate ŋu akpɔ nya sia gbɔ le ye ɖokui si. Aleke kee wòɖale o, Asa tsɔ amegbetɔ ƒe susu kpɔ nuwoe eye meɖo ŋu ɖe Yehowa ŋu o. Xanani gblɔ nɛ be: “Èwɔ bometsinu; eya ta tso fifi la aʋa anɔ dowòme.”​—2 Kron. 16:7-9.

Asa mewɔ nu ɖe nya sia ŋu nyuie kura o. Dzi kui vevie, eye wòlé nyagblɔɖila Xanani de gaxɔ me. (2 Kron. 16:10) Ðe wòanye be Asa nɔ gbɔgblɔm na eɖokui be, ‘Ðe wòdze be woaka mo nam esi mesubɔ nuteƒewɔwɔtɔe ƒe geɖe megbea?’ Alo ɖe wòanye be esi wòtsi le ƒe me ta la, megava nɔ nuwo ŋu bum nyuie oa? Biblia megblɔe o.

Le Asa ƒe dziɖuɖu ƒe ƒe 39 lia me la, edze dɔ ɖe afɔ eye dɔ la do gã ɖe edzi. Nuŋlɔɖia gblɔ be, “Mebia gbe Yehowa se le eƒe dɔléle la me o, negbe atikewɔlawo ko.” Ɣemaɣi la, edze abe Asa megatsɔ ɖeke le eƒe gbɔgbɔmelãmesẽ me o ene. Edze ƒãa be ekpɔtɔ nɔ nɔnɔme ma me eye mewɔ tɔtrɔ hafi ku le eƒe dziɖuɖu ƒe ƒe 41 lia me o.​—2 Kron. 16:12-14.

Ke hã edze abe Asa ƒe nɔnɔme nyuiwo kple dzonɔameme ɖe tadedeagu dzadzɛa ŋu dzie woɖoa ŋkui ke menye eƒe vodadawo o ene. Medzudzɔ Yehowa subɔsubɔ gbeɖe o. (1 Fia. 15:14) Eya ta nu kae míate ŋu asrɔ̃ tso Asa ƒe agbemeŋutinya me? Ate ŋu akpe ɖe mía ŋu míakpɔe be ele be míanɔ ŋugble dem le ale si Yehowa kpe ɖe mía ŋu va yi la ŋu, elabena ŋkuɖoɖo ɣeyiɣi vevi mawo dzi ate ŋu aʋã mí míado gbe ɖa abia eƒe kpekpeɖeŋu ne míedze ŋgɔ dodokpɔwo. Gake mele be míasusui be esi míesubɔ Mawu nuteƒewɔwɔtɔe hena ƒe geɖewo ta la, míehiã na Ŋɔŋlɔawo me aɖaŋuɖoɖowo o. Ɣeyiɣi didi kae míeɖawɔ nuteƒe o, Yehowa aɖɔ mí ɖo ne míewɔ vodada. Ele be míalɔ̃ axɔ ɖɔɖɔɖo mawo ɖokuibɔbɔtɔe ale be woaɖe vi na mí. Esi gale vevie wue nye be mía Fofo si le dziƒo la anɔ kpli mí zi ale si míeyi edzi wɔ nuteƒe nɛ. Yehowa ƒe ŋkuwo le ame siwo katã le nuteƒe wɔm nɛ le anyigba bliboa dzi la ŋu. Eɖoa eteƒe na wo to ale si wòzãa eƒe ŋusẽ tsɔ kpena ɖe wo ŋu me. Yehowa wɔ esia na Asa, eye ate ŋu awɔe na míawo hã.

[Nya si ɖe dzesi si le axa 9]

Yehowa aɖo eteƒe na nuteƒewɔla ɖe sia ɖe si le gbɔgbɔmeʋa wɔm

[Nya si ɖe dzesi si le axa 10]

Ebiana be dzi nanɔ mía ƒo hafi míate ŋu awɔ nu si le eteƒe le Yehowa ŋkume