Yehowa ƒe Nya la Le Agbe

Nya Vevi Siwo Tso Ezra ƒe Agbalẽ Me

BIBLIA ƒe agbalẽ si nye Ezra nye afisi nuŋlɔɖi si ŋu Kronika ƒe Agbalẽ Evelia ƒo nu va se la ƒe dziyiyi. Nunɔla Ezra ye ŋlɔe, eye edze egɔme kple se aɖe si Persia-fia Kores de, si ɖe mɔ na Yudatɔ siwo woɖe aboyoe yi Babilon la ƒe ame susɔe aɖewo be woatrɔ yi wo denyigba dzi. Le Ezra ƒe nuŋlɔɖia ƒe nuwuwu la, egblɔ afɔ siwo wòɖe tsɔ kɔ amesiwo tsɔ anyigbaa dzi nɔlawo ƒe nuwɔnawo ƒo ɖi wo ɖokuii ŋu. Le yi katã me la, agbalẽa ƒo nu tso ƒe 70 ƒe ŋutinya ŋu—tso ƒe 537 vaseɖe ƒe 467 D.M.Ŋ. me.

Taɖodzinu aɖe koŋue nɔ Ezra si le agbalẽa ŋɔŋlɔ me: be yeaɖee afia be Yehowa wɔ Eƒe ŋugbedodo be yeana ablɔɖe Yeƒe amewo tso aboyo me le Babilon, eye yeana woagbugbɔ tadedeagu vavãtɔ aɖo anyi le Yerusalem la dzi. Eyata nudzɔdzɔ siwo do ƒome kple taɖodzinu sia ŋu nya koe Ezra gblɔ. Ezra ƒe agbalẽa gblɔ alesi wogbugbɔ gbedoxɔa tu kpakple alesi wogbugbɔ Yehowa ƒe tadedeagua ɖo anyii togbɔ be Mawu ƒe amewo mede blibo o eye wodo go tsitretsiɖeŋuwo hã. Viɖe gã aɖe le nuŋlɔɖia ŋu na mí elabena míawo hã míele gbugbɔgaɖoanyi ƒe ɣeyiɣi aɖe me. Ame geɖe le zi ƒom ɖe “Yehowa ƒe aƒe ƒe to la” ŋu, eye eteƒe madidi o, “sidzedze Yehowa ƒe ŋutikɔkɔe” ayɔ anyigba bliboa dzi.—Yesaya 2:2, 3; Xabakuk 2:14.

WOGBUGBƆ GBEDOXƆA TU

(Ezra 1:1–6:22)

Yudatɔ aboyome 50,000 kloe wɔ ɖe Kores ƒe ablɔɖenana sea dzi hetrɔ yi Yerusalem le Mɔmefia Zerubabel, si wogayɔna be Sesbazar, ƒe mɔfiafia te. Eteƒe medidi o, wogbugbɔ ɖi vɔsamlekpuia hete vɔwo sasa na Yehowa.

Le ƒe si kplɔe ɖo me la, Israel-viwo dze Yehowa ƒe aƒea ƒe gɔmeɖokpeawo ɖoɖo gɔme. Futɔwo va nɔ fu ɖem na wo le xɔtudɔa wɔwɔ me, eye mlɔeba wona fia aɖe de se be woatɔ te dɔa. Nyagblɔɖila Xagai kple Zaxarya de dzo ameawo me ale be wogadze gbedoxɔa tutu gɔme ake, togbɔ be woxe mɔ ɖe enu hã. Togbɔ be medzɔ dzi na futɔawo o hã la, woƒe nu mesẽ le nyaa me boo o, elabena wonɔ vɔvɔ̃m be yewoava tsi tre ɖe Persiatɔwo ƒe se matrɔmatrɔ si Kores de gbaɖegbe ke la ŋu. Numekuku aɖe si wowɔ le fiaƒeme na wova kpɔe be Kores “de se be, woatu mawuxɔ ɖe Yerusalem.” (Ezra 6:3) Dɔa yi edzi nyuie, eye wowu enu hã.

Ŋɔŋlɔawo me Biabiawo Ŋuɖoɖo:

1:3-6—Israel-vi aɖewo melɔ̃ be yewoatrɔ ayi yewo denyigba dzi o; ɖe wòfia be woƒe xɔse mesẽ oa? Ðewohĩ ame aɖewo metrɔ yi Yerusalem o le ŋutilãmenudidi alo asixɔxɔ mademade tadedeagu vavãtɔa ŋu ta, gake menye nenemae wònɔ le amesiame gome o. Gbã la, ehiã ɣleti ene alo atɔ̃ ƒe mɔzɔzɔ hafi woaɖo Yerusalem si didi abe kilometa 1,600 ene la. Gawu la, dua zu aƒedo hena ƒe 70 sɔŋ; eyata be woayi ava tso aƒe ɖe afima ahawɔ xɔtudɔa abia be ŋusẽ nanɔ ame ŋu. Eyata ɖikeke mele eme o be nɔnɔme madeamedziwo, abe dɔléle, tsitsi, kple ƒomegbanɔamedziwo tae ame aɖewo metrɔ yi o ɖo.

2:43—Amekawoe nye Netinimwo? Woawoe nye amesiwo menye Israel-viwo o, siwo subɔ le gbedoxɔa me abe kluviwo kple subɔlawo ene. Wo dometɔ aɖewoe nye Gibeontɔ siwo nɔ anyi le Yosua ƒe ŋkekea me la ƒe dzidzimeviwo kpakple ame bubu “siwo Dawid kple amegãwo na ɖe Lewi-viwo ƒe subɔsubɔ ŋu.”—Ezra 8:20.

2:55—Amekawoe nye Salomo ƒe dɔwɔlawo ƒe viwo? Woawoe nye amesiwo menye Israel-viwo o, siwo wona mɔnukpɔkpɔ tɔxɛ aɖewo le Yehowa ƒe subɔsubɔdɔa me. Ðewohĩ wosubɔ abe agbalẽfialawo alo agbalẽ gbugbɔgaŋlɔlawo ene le gbedoxɔa me alo le dukɔa ƒe dɔwɔƒe bubuwo.

2:61-63—Ðe Urim kple Tumim siwo wozãna ne wohiã nya aɖe ƒe ŋuɖoɖo tso Yehowa gbɔ, la ganɔ anyi na amesiwo trɔ gbɔ tso aboyo mea? Amesiwo be yewonye nunɔlawo ƒe dzidzimeviwo, evɔ dzidzigbalẽ aɖeke meli woatsɔ aɖo kpe edzi o la ate ŋu azã Urim kple Tumim la atsɔ aɖo kpe woƒe nyawo dzi hafi. Ðeko Ezra gblɔ be ne woate ŋu akpɔ woa, anyo. Nuŋlɔɖi aɖeke mele Ŋɔŋlɔawo me si ƒo nu tso Urim kple Tumim la zazã ɣemaɣi loo alo emegbe ŋu o. Yudatɔwo ƒe xotutuwo gblɔ be Urim kple Tumim la bu esi wotsrɔ̃ gbedoxɔa le ƒe 607 D.M.Ŋ. me.

3:12—Nukatae “amegã ɖeɖi, siwo kpɔ xɔ gbãtɔ” si wotu na Yehowa la fa avi ɖo? Amesiawo ɖo ŋku alesi gbedoxɔ si Salomo tu la nya kpɔe dzi. Esi wotsɔ xɔ yeye si kpɔm wole la sɔ kple gbãtɔa la, “esia meɖi naneke le [woƒe] ŋku me o.” (Xagai 2:2, 3) Ðe woƒe agbagbadzedzewo ana ŋutikɔkɔe si nɔ xɔ gbãtɔa ŋu la nanɔ esia hã ŋua? Dzi anya ɖe le wo ƒo godoo; esia tae wofa avi ɖo.

3:8-10; 4:23, 24; 6:15, 16—Ƒe nenie wozã hafi gbugbɔ gbedoxɔa tu? Woɖo gbedoxɔa gɔme anyi le ƒe 536 D.M.Ŋ. me—“esi wogbɔ va . . . ƒe eve megbe.” Xɔtudɔa va tɔ te le Fia Artaxsasta ƒe ŋkekeawo me, le ƒe 522 D.M.Ŋ. me. Woxe mɔ ɖe dɔa nu vaseɖe ƒe 520 D.M.Ŋ., si nye Fia Dario ƒe ƒe evelia me. Wowu gbedoxɔa tutu nu le eƒe fiaɖuɖu ƒe ƒe adelia, si nye ƒe 515 D.M.Ŋ. me. (Kpɔ aɖaka si ƒe tanyae nye “Persia Fiawo—Tso Ƒe 537 Vaseɖe Ƒe 467 D.M.Ŋ. Me”) Eyata gbedoxɔ tutudɔa xɔ ƒe 20 kloe.

4:8–6:18—Aramgbe mee woŋlɔ Ezra ƒe agbalẽa ƒe akpa sia ɖo gbã; nukatae? Lɛta siwo dziɖuɖumegãwo ŋlɔ na fiawo kple woƒe ŋuɖoɖowo ŋue agbalẽa ƒe akpa sia ku ɖo koŋ. Dukɔa ƒe nuŋlɔɖi siwo le Aramgbe, si nye gbe si wodona ɣemaɣi le asitsanyawo me kple le dziɖuɖudɔwɔƒewo, mee Ezra wɔ lɛta siawo ƒe kɔpiwo tsoe. Biblia ƒe akpa bubu siwo woŋlɔ ɖe blemagbe sia mee nye Ezra 7:12-26, Yeremya 10:11, kple Daniel 2:4b–7:28.

Nusɔsrɔ̃ Siwo Le Eme na Mí:

1:2. Nya si Yesaya gblɔ ɖi ƒe 200 kloe do ŋgɔ la va eme. (Yesaya 44:28) Nyagblɔɖi siwo le Yehowa ƒe Nya la me medoa kpo eme vava gbeɖe o.

1:3-6. Abe Israel-vi siwo susɔ ɖe Babilon ene la, Yehowa Ðasefowo dometɔ akpa gãtɔ mate ŋu awɔ ɣeyiɣiawo katã ƒe subɔsubɔdɔa alo asubɔ le afisi hiahiãa lolo wu le o. Ke hã, wokpea asi ɖe amesiwo ate ŋu awɔe la ŋu hedea dzi ƒo na wo, eye wowɔa lɔlɔ̃nu faa nudzɔdzɔwo hena Fiaɖuƒegbeƒãɖeɖe kple nusrɔ̃lawɔwɔ dɔa.

3:1-6. Le ƒe 537 D.M.Ŋ. ƒe ɣleti adrelia (Tishri, si sɔ kple September/October) me la, nuteƒewɔla siwo trɔ gbɔ la sa vɔ gbãtɔ. Ƒe 607 D.M.Ŋ. ƒe ɣleti atɔ̃lia (Ab, si sɔ kple July/August) mee Babilontɔwo va Yerusalem, eye le ɣleti eve megbe la, etsrɔ̃ dua keŋkeŋ. (Fiawo II, 25:8-17, 22-26) Abe alesi wogblɔe ɖi ene la, Yerusalem ƒe aƒedozuzua wu enu ɖe ɣeyiɣi si woɖo nɛ dzi pɛpɛpɛ. (Yeremya 25:11; 29:10) Nusianu si Yehowa ƒe Nya la gblɔ ɖi la vana eme godoo.

4:1-3. Nuteƒewɔla siwo trɔ gbɔ la gbe kpekpeɖeŋu si ana woava nɔ ƒomedodo me kple alakpa tadeagulawo la xɔxɔ. (Mose II, 20:5; 34:12) Nenema kee Yehowa subɔla siwo li egbea menɔa xɔsetsakatsaka ƒe habɔbɔ aɖeke me o.

5:1-7; 6:1-12. Yehowa ate ŋu atrɔ asi le nyawo ŋu be wòade eƒe amewo dzi.

6:14, 22. Gome kpɔkpɔ le Yehowa ƒe dɔa me dzonɔamemetɔe nana wòkpɔa ŋudzedze ɖe ame ŋu heyrana ame.

6:21. Esi Samariatɔ siwo nɔ Yudatɔwo ƒe anyigba dzi ɣemaɣi, kpakple amesiwo trɔ gbɔ la dometɔ siwo va nɔ trɔ̃subɔlawo ƒe nuwɔna srɔ̃m, la kpɔ alesi Yehowa ƒe dɔa nɔ ŋgɔ yimee la, wotrɔ woƒe agbenɔnɔ. Ðe mele be míatsɔ dzidzɔ anɔ dɔ si Mawu de mía si, si ƒe ɖee nye gbeƒãɖeɖe Fiaɖuƒea, la wɔm oa?

EZRA VA YERUSALEM

(Ezra 7:1–10:44)

Ƒe 50 va yi tso esime wokɔ Yehowa ƒe aƒe si wogbugbɔ tu la ŋu. Fifia míeɖo ƒe 468 D.M.Ŋ. me. Ezra tsɔ ga si amewo dzɔ la ɖe asi, hekplɔ Mawu ƒe ame siwo yi aboyo me la dometɔ susɔe aɖewo wodze mɔ tso Babilon yi Yerusalem. Nuka ŋue wòva ke ɖo le afima?

Amegãwo gblɔ na Ezra bena: “Israel-dukɔ la, nunɔlawo kple Lewi-viwo meɖe wo ɖokui ɖa tso anyigba dzi [dukɔwo] . . . ƒe ŋunyɔnuwo me o.” Gawu la, “amegãwo kple dzikpɔlawo ƒe asiwo do ŋgɔ le nu tovo sia wɔwɔ me.” (Ezra 9:1, 2) Nya sia te ɖe Ezra dzi ŋutɔ. Wode dzi ƒo nɛ be: “Lé dzi ɖe ƒo, eye nawɔe!” (Ezra 10:4) Ezra wɔ afɔɖeɖe siwo aɖɔ nɔnɔmea ɖo, eye ameawo lɔ̃ ɖe wo dzi.

Ŋɔŋlɔawo me Biabiawo Ŋuɖoɖo:

7:1, 7, 11—Artaxsasta si na woxe mɔ ɖe xɔtudɔa nu ŋue kpukpui siawo katã le nu ƒom lea? Ao. Persia-fia eve sɔŋ ye woyɔ ŋkɔ alo dzesideŋkɔ Artaxsasta na. Wo dometɔ ɖekae nye Bardiya alo Gaumata, si na wotɔ te gbedoxɔ tutudɔa le ƒe 522 D.M.Ŋ. me. Artaxsasta si nɔ anyi le Ezra ƒe ɣeyiɣia me lae nye Artaxsasta Longimanus.

7:28–8:20—Nukatae Yudatɔ siwo nɔ Babilon la dometɔ geɖe melɔ̃ be yewoakplɔ Ezra ɖo ayi Yerusalem o? Togbɔ be ƒe 60 kple edzivɔ va yi tso esime Yudatɔwo ƒe ƒuƒoƒo gbãtɔa trɔ yi wo de hã la, amesiwo tso aƒe ɖe Yerusalem la mede ha o. Tɔtrɔ yi Yerusalem bia agbe bubu kura nɔnɔ le nɔnɔme madeamedzi dziŋɔwo me. Ŋutilã me kesinɔnuwo ƒe mɔnukpɔkpɔ aɖeke menɔ Yerusalem ɣemaɣi na Yudatɔ siwo ɖewohĩ nu nɔ edzi dzem na nyuie le Babilon la o. Azɔ hã, afɔku nɔ mɔ si woazɔ atrɔ agbɔe dzi. Ele be Yehowa dzixɔxɔse sẽŋu, dzonɔameme ɖe tadedeagu vavãtɔ ŋu, kple dzinɔameƒo nanɔ amesiwo atrɔ agbɔ la si. Yehowa ƒe asi si nɔ Ezra dzi ye do ŋusẽ eyama ŋutɔ hã. Ezra ƒe dzideƒoname wɔe be ƒome 1,500—ɖewohĩ siwo me tɔwo katã ade ame 6,000—lɔ̃ be yewoayi. Esi Ezra gawɔ afɔɖeɖe bubuwo kpee la, Lewi-vi 38 kple Netinim 220 hã lɔ̃ be yewoayi.

9:1, 2—Ðe wònye afɔku nenema gbegbe be ameawo ɖe srɔ̃ tso dukɔ siwo nɔ anyigbaa dzi la me tɔwo domea? Ele be dukɔ si Yehowa gbugbɔ ɖo te la nalé eƒe tadedeagu me ɖe asi vaseɖe esime Mesia la nava. Srɔ̃ɖeɖe le dukɔ bubu me tɔwo dome nye afɔku gã aɖe na tadedeagu vavãtɔa. Esi ame aɖewo ɖe trɔ̃subɔlawo dometɔ aɖewo ta la, ɖeko dukɔ bliboa ava tsaka kple trɔ̃subɔdukɔwo mlɔeba. Esia ate ŋu awɔe be tadedeagu dzadzɛtɔa nu nayi le anyigba dzi keŋkeŋ. Ekema, amekawo gbɔe Mesia la ava? Eyatae mewɔ nuku o be nusi nɔ edzi yim kpɔkpɔ ɖe fu na Ezra nenema!

10:3, 44—Nukatae wonya ɖeviawo hã kpe ɖe nyɔnuawo ŋu? Ne wogblẽ ɖeviawo ɖi la, ekema nyɔnu siwo ŋu woɖe asi le la ate ŋu ava xa ɖe wo ta atrɔ agbɔ. Gawu la, ehiã be ɖevi siwo metsi o la nanɔ wo dada ƒe dzikpɔkpɔ te.

Nusɔsrɔ̃ Siwo Le Eme na Mí:

7:10. Esi Ezra nye Mawu ƒe Nya la srɔ̃la dovevienu kple nufiala nyui ta la, enye kpɔɖeŋu na mí míasrɔ̃. Edo gbe ɖa, hedzra eƒe dzi ɖo ɖe Yehowa ƒe Sea me dzodzro ŋu. Esi wònɔ eme dzrom la, eƒe susu nɔ nya si gblɔm Yehowa nɔ la ŋu vevie. Ezra tsɔ nusi wòsrɔ̃ la de dɔwɔwɔ me, eye edo vevie nu fiae ame bubuwo hã.

7:13. Amesiwo lɔ̃ faa be yewoasubɔ ye Yehowa dina.

7:27, 28; 8:21-23. Ezra kafu Yehowa, ɖe kuku nɛ tso dzi me hafi dze Yerusalem yiyi ƒe mɔ legbee si dzi afɔku nɔ la zɔzɔ gɔme, eye elɔ̃ faa be yeatsɔ yeƒe agbe ade afɔku me ɖe Mawu ƒe ŋutikɔkɔe ta. Eto esia me ɖo kpɔɖeŋu nyui aɖe ɖi na mí.

9:2. Ele be míatsɔ nuxlɔ̃ame si nye be míaɖe srɔ̃ “le Aƒetɔ la me” ko la nya vevii.—Korintotɔwo I, 7:39.

9:14, 15. Hadede gbegblẽwo ate ŋu ana Yehowa magava kpɔ ŋudzedze ɖe mía ŋu o.

10:2-12, 44. Amesiwo ɖe dutanyɔnuwo la trɔ dzime ɖokuibɔbɔtɔe eye woɖɔ woƒe nuwɔna gbegblẽawo ɖo. Woƒe nɔnɔme kple nuwɔna nye kpɔɖeŋu.

Yehowa Wɔa Eƒe Ŋugbedodowo Dzi

Viɖe gã aɖe le Ezra ƒe agbalẽa ŋu na mí vavã! Esi ɣeyiɣia de pɛpɛpɛ la, Yehowa wɔ ŋugbe si wòdo be yeaɖe yeƒe amewo tso aboyo me le Babilon ahaɖo tadedeagu vavãtɔa anyi le Yerusalem la dzi. Ðe esia medoa ŋusẽ mí be míaxɔ Yehowa kple eƒe ŋugbedodowo dzi ase geɖe wu oa?

Bu kpɔɖeŋu siwo le Ezra ƒe agbalẽa me na mí ŋu kpɔ. Ezra kple amesiwo trɔ gbɔ va kpɔ gome le tadedeagu vavãtɔa gbugbɔgaɖoanyi le Yerusalem me la, ɖo kpɔɖeŋu ɖi na mí le ɖokuitsɔtsɔ na Mawu me. Agbalẽ sia ɖe xɔse si nɔ amedzro mawuvɔ̃lawo hã si fia, eye ena míekpɔ ɖokuibɔbɔ ƒe dzimetɔtrɔ ƒe nɔnɔme si nugbegblẽwɔlawo ɖe fia la hã. Nyateƒee, nya siwo gbɔgbɔ ʋã Ezra wòŋlɔ la na kpeɖodzi geɖe ŋutɔ mí be “Mawu ƒe nya la le agbe, eye wòsẽa ŋu.”—Hebritɔwo 4:12.

[Chart/Picture on page 18]

Persia Fiawo—tso Ƒe 537 Vaseɖe Ƒe 467 D.M.Ŋ. Me

Kores Gãtɔ (Ezra 1:1) ku le ƒe 530 D.M.Ŋ. me

Cambyses, alo Axasweros (Ezra 4:6) ƒe 530-22 D.M.Ŋ.

ccDario I (Ezra 4:24) ƒe 522-486 D.M.Ŋ.

Artaxsasta Longimanus (Ezra 7:1) ƒe 475-24 D.M.Ŋ.

[Etenuŋɔŋlɔwo]

[Nɔnɔmetata]

Axasweros

[Nɔnɔmetata si le axa 17]

Kores

Nuŋlɔɖikpe: Photograph taken by courtesy of the British Museum

[Nɔnɔmetata si le axa 17]

Kores ƒe Nuŋlɔɖikpea gblɔ be wona aboyomewo trɔ yi wo de

[Nɔnɔmetata si le axa 20]

Ènya nusi na Ezra nye nufiala bibi nenema gbegbea?