Míazɔ Fɔmaɖimaɖitɔe!
“Ke nyea mazɔ fɔmaɖitɔe!”—PS. 26:11.
1, 2. Nya kae Hiob gblɔ ku ɖe eƒe fɔmaɖimaɖi ŋu, eye nu kae nya siwo le Hiob ta 31 la ɖe fia le eŋu?
LE BLEMA la, nudanu dzie wodaa nuwo le. Zi geɖe la, enyea ati alo gakpo legbee aɖe si woŋɔ le eƒe titina, eye wotsɔnɛ kua nu ŋu wòli ɖi nyuie heda sɔna. Wotsia agba gbadzɛwo ɖe eƒe goawo kple evea me, eƒe ɖusi kple mia me siaa. Wotsɔa nu si da ge woala la dana ɖe agbaawo dometɔ ɖeka me eye wotsɔa nudakpe dana ɖe evelia me. Enɔ na Mawu ƒe amewo be woazã nudanu nyuitɔ.—Lod. 11:1.
2 Esime Satana dze mawuvɔ̃la Hiob dzi vɔ̃ɖitɔe eye Hiob nɔ fu kpem la, egblɔ be: “[Yehowa] nedam le nudanu nyuitɔ dzi, eye Mawu nadze si nye fɔmaɖimaɖi.” (Hiob 31:6) Le nya sia me la, Hiob ƒo nu tso nɔnɔme vovovo aɖewo siwo ate ŋu anye dodokpɔ na fɔmaɖila ŋu. Gake Hiob to dodokpɔ sia me do dzidzedzetɔe, abe ale si eƒe nya siwo le Hiob ta 31 la ɖee fia ene. Eƒe kpɔɖeŋu nyuia ate ŋu aʋã míawo hã míawɔ nu nenema ke eye míagblɔ kple kakaɖedzi abe hakpala David ene be: “Ke nyea mazɔ fɔmaɖitɔe!”—Ps. 26:11.
3. Nu ka tae wòle vevie be míawɔ nuteƒe na Mawu le nu gãwo kple nu suewo siaa me?
3 Togbɔ be Hiob to dodokpɔ sesẽwo me hã la, eyi edzi wɔ nuteƒe na Mawu. Ame aɖewo ate ŋu agblɔ gɔ̃ hã be Hiob ƒe dodokpɔ sesẽawo kple ale si wòlé fɔmaɖimaɖi me ɖe asi tamanamanae la tɔgbi mebɔ o. Míawo ya míele fu siwo gbegbe Hiob kpe la tututu kpem o. Ke hã, ele be míawɔ nuteƒe na Mawu le nu gãwo kple nu suewo me ne míedi be míalé míaƒe fɔmaɖimaɖi me ɖe asi sesĩe ahayi edzi anɔ eƒe dziɖulanyenye ƒe akpa dzi.—Mixlẽ Luka 16:10.
Ele Vevie Le Agbe Nyui Nɔnɔ Gome
4, 5. Abe fɔmaɖila ene la, nuwɔna kae Hiob ƒo asa na?
4 Be míalé míaƒe fɔmaɖimaɖi me ɖe asi na Yehowa la, ele be míanɔ agbe ɖe eƒe agbe nyui nɔnɔ ƒe dzidzenuwo nu, abe ale si ko Hiob wɔe ene. Egblɔ be: “Mebla nu kple nye ŋku, eye aleke lawɔ malé ŋku ɖe ɖetugbi ŋu? Ne woflu nye dzi ɖe nyɔnu ŋu, eye mede xa ɖe hanyevi ƒe ʋɔtru nu la, ekema srɔ̃nye netu wɔ na ame bubu, eye ame tutɔ nedɔ egbɔ.”—Hiob 31:1, 9, 10.
5 Esi Hiob ɖoe kplikpaa be yealé yeƒe fɔmaɖimaɖi me ɖe asi na Mawu ta la, eƒo asa na ŋkuléle ɖe nyɔnu ŋu ale gbegbe be wòadzroe. Abe srɔ̃ŋutsu ene la, Hiob meɖo ahiãmo na ɖetugbui aɖeke loo alo ti ame bubu srɔ̃ yome be yeadi ahiãe o. Yesu gblɔ nuxlɔ̃amenya sẽŋu aɖe ku ɖe agbe ɖɔʋu nɔnɔ le gbɔdɔnyawo gome ŋu le Todzimawunya la me—kakaɖedzitɔe la, enye nya vevi aɖe si wòle be wòanɔ susu me na fɔmaɖilawo.—Mixlẽ Mateo 5:27, 28.
Mègawɔ Ameflunu Gbeɖe O
6, 7. (a) Abe ale si wònɔ le Hiob gome ene la, nu kae Mawu zãna tsɔ doa míaƒe fɔmaɖimaɖi kpɔna? (b) Nu ka tae mele be míanye godzelawo alo ameflulawo o?
6 Ne míedi be woabu mí fɔmaɖilawoe la, mele be míanye godzelawo alo ameflulawo o. (Mixlẽ Lododowo 3:31-33.) Hiob gblɔ be: “Nenye ɖe metsɔ aʋatsokaka ɖo dɔe, eye nye afɔ tsɔna ɖe alakpadada ŋu la, ekema [Yehowa] nedam le nudanu nyuitɔ dzi, eye Mawu nadze si nye fɔmaɖimaɖi.” (Hiob 31:5, 6) Yehowa daa amegbetɔwo katã kple “nudanu nyuitɔ.” Abe ale si Mawu wɔe le Hiob gome ene la, etsɔa eƒe ʋɔnudɔdrɔ̃ ƒe dzidzenu deblibo la drɔ̃a ʋɔnu esubɔla ɖeadzɔgbewo.
7 Ke ne míeva zu godzelawo alo ameflulawo la, ekema afia be míele míaƒe fɔmaɖimaɖi me lém ɖe asi na Mawu o. Fɔmaɖilawo “[gbea] nu le bebemenu, siwo ta wòle be ŋu nakpe ame ɖo la gbɔ” eye “[womezɔna] le ayemenuwɔwɔ me o.” (2 Kor. 4:1, 2) Ke ne míenye ameflulawo le nyagbɔgblɔ alo nuwɔna me, si wɔe be nɔvi haxɔsetɔ aɖe ƒo koko na Mawu be wòakpe ɖe ye ŋu ya ɖe? Ekema, baba na mí! Hakpalaa dzi ha be: “Meyɔ Yehowa le nye xaxa me, eye wòɖo tom. Yehowa, ɖe nye luʋɔ tso aʋatsonuyi kple alakpaɖe si me!” (Ps. 120:1, 2) Anyo be míaɖo ŋku edzi be Mawu ate ŋu adzro ame si míenye le ememe la me, eye ‘edzroa míaƒe dziwo kple ayikuwo me kpɔna’ be fɔmaɖila anukwaretɔwoe míenye mahã.—Ps. 7:9, 10.
Nye Kpɔɖeŋu Nyui Ðola Le Nuwɔwɔ Kple Ame Bubuwo Me
8. Aleke Hiob wɔ nu ɖe amewo ŋu?
8 Be míalé míaƒe fɔmaɖimaɖi me ɖe asi la, ele be míanɔ abe Hiob, ame si nye ame dzɔdzɔe, ɖokuibɔbɔla, kple ameŋubula ene. Egblɔ be: ‘Ne nye dɔlaŋutsu kple nye dɔlanyɔnu ɖo nya me kplim, eye megbe woƒe nya dzɔdzɔe la, nu ka mawɔ, nenye be, Mawu tso? Eye ne edzro eme kpɔ la, aleke maɖo eŋu nɛ? Ðe menye ame si mem ɖe vidzidɔ me la, me eya hã, eye ame ɖekae wɔ mí ɖe dɔme oa?’—Hiob 31:13-15.
9. Nɔnɔme nyui kawoe Hiob ɖe fia le nuwɔwɔ kple eƒe dɔlawo me, eye aleke wòle be míawɔ nu le go sia me?
9 Edze abe ale si wokpɔa ʋɔnudrɔ̃nyawo gbɔ le Hiob ƒe ŋkekea me la mesesẽ o ene. Wokpɔa nyawo gbɔ le ɖoɖo nu, eye kluviwo gɔ̃ hã tea ŋu tsɔa woƒe nyawo yia ʋɔnu. Hiob wɔa nu dzɔdzɔe eye wòkpɔa nublanui na eƒe dɔlawo ne ele nu wɔm kpli wo. Ne míedi be míazɔ fɔmaɖitɔe la, ele be míaɖe nɔnɔme nyui siawo afia, vevietɔ ne míele subɔsubɔm abe hamemetsitsiwo ene le Kristo hamea me.
Nye Dɔmenyola, Menye Ŋuklẽla O
10, 11. (a) Aleke míewɔ nya be Hiob nye dɔmenyola eye wòkpe ɖe amewo ŋu? (b) Ŋɔŋlɔawo me aɖaŋuɖoɖo siwo wova ŋlɔ emegbe kawo dzie Hiob 31:16-25 ate ŋu ana míaɖo ŋkui?
10 Hiob nye dɔmenyola eye wòkpe ɖe amewo ŋu, ke menye ɖokuitɔdila kple ŋuklẽla o. Egblɔ be: “Ðe . . . mena nu ti kɔ na ahosiwo ƒe ŋkuwoa? Ðe nye ɖeɖe meɖu nu, eye nyemena tsyɔ̃evi ɖui kplim oa? . . . Ne mekpɔ ame ɖoko avɔ mele eŋu o, eye nutsyɔtsyɔ mele ame dahe si o . . . Ne menyè nye asi ɖe tsyɔ̃evi ŋu, le esi xɔnametɔ le asinye le dua me ta la, ekema nye abɔta nege le abɔgba ŋu, eye nye abɔ netu ɖa le ekpeƒe!” Eye Hiob mazɔ le fɔmaɖimaɖi me ne egblɔ na sika be, “Wò ŋue mele ŋu ɖom ɖo” o.—Hiob 31:16-25.
11 Hakpanya siawo ate ŋu ana míaɖo ŋku nusrɔ̃la Yakobo ƒe nya siawo dzi: “Subɔsubɔ si le dzadzɛ, si ŋu ɖiƒoƒo mele o, le mía Mawu si nye mía Fofo ŋkume lae nye esi: be woakpɔ tsyɔ̃eviwo kple ahosiwo dzi le woƒe xaxa me, eye be ame nadzra eɖokui ɖo ɖimaƒomaƒoe tso xexea me.” (Yak. 1:27) Míate ŋu aɖo ŋku Yesu ƒe nuxlɔ̃amenya sia hã dzi: “Mina miaƒe ŋkuwo nanɔ ʋuʋu, eye mikpɔ nyuie, eye minɔ ŋudzɔ ɖe ŋukeklẽ ɖe sia ɖe ƒomevi ŋu, elabena ne nu gbogbo aɖewo le ame si hã la, eƒe agbe menɔa te ɖe nu siwo le esi la dzi o.” Emegbe Yesu wɔ kpɔɖeŋu ku ɖe kesinɔtɔ ŋuklẽla aɖe si ku, evɔ “menye kesinɔtɔ le Mawu gbɔ o” la ŋu. (Luka 12:15-21) Be míanye fɔmaɖilawo la, mele be míaɖe mɔ ŋukeklẽ alo ŋubiabiã ƒe nu vɔ̃ naɖu mía dzi o. Ŋukeklẽ nye trɔ̃subɔsubɔ, elabena nu si ŋuklẽlaa le ŋu biãmee la hea eƒe susu ɖa le Yehowa dzi eye esia wɔnɛ be nua zua trɔ̃ nɛ. (Kol. 3:5) Míate ŋu anye ŋuklẽlawo eye míakpɔtɔ anye fɔmaɖilawo o!
Ku Ðe Tadedeagu Vavã La Ŋu Goŋgoŋ
12, 13. Kpɔɖeŋu kae Hiob ɖo ɖi le asaƒoƒo na trɔ̃subɔsubɔ me?
12 Fɔmaɖilawo metrana ɖa tso tadedeagu dzadzɛa gbɔ o. Hiob mewɔ esia o, elabena egblɔ be: ‘Ne mekpɔ ale si ɣe le keklẽmi, kple ale si dzinu le yiyim le atsyɔ̃ mee, eye woflu nye dzi le adzame megbugbɔ nye asi ŋu na wo la, ekema esia hã anye se me dzedze le ʋɔnudrɔ̃lawo ŋkume; elabena meda alakpa na Mawu si le dziƒo.’—Hiob 31:26-28.
13 Hiob mesubɔ nu siwo me agbe mele o. Ne elé ŋku ɖe dziƒonuwo, abe dzinu ene, ŋu eye eƒe dzi ku ɖe wo ŋu le adzame, eye ne ‘egbugbɔ eƒe asi,’ ɖewohĩ egbugbɔe hedoe ɖe dzi abe ale si trɔ̃subɔlawo wɔna ene la, ekema azu trɔ̃subɔla si gbe Mawu. (5 Mose 4:15, 19) Be míalé míaƒe fɔmaɖimaɖi me ɖe asi na Mawu la, ele be míatsri trɔ̃subɔsubɔ ƒomevi ɖe sia ɖe.—Mixlẽ 1 Yohanes 5:21.
Mègaɖo Vɔ̃ Vɔ̃ Teƒe Alo Anye Ameŋkumenuwɔla O
14. Nu ka tae míate ŋu agblɔ be Hiob menye tame vɔ̃ ɖola o?
14 Hiob menye tame vɔ̃ ɖola kple ŋutasẽla o. Enyae be nɔnɔme mawo aɖee afia be yemenye fɔmaɖila o, elabena egblɔ be: ‘Ðe mekpɔ dzidzɔ le nye ketɔ ƒe dzɔgbevɔ̃e ŋu, eye meti kpo, esime vɔ̃ dzɔ ɖe edzia? Kpao, nyemena nye nu wɔ nu vɔ̃ o, eye nyemedi eƒe ku to ɖiŋudodo nɛ me o.’—Hiob 31:29, 30.
15. Nu ka tae wònye nu gbegblẽ be míakpɔ dzidzɔ ne vɔ̃ dzɔ ɖe ame aɖe si lé fu mí la dzi?
15 Ame dzɔdzɔe Hiob mekpɔ dzidzɔ kpɔ gbeɖe ne vɔ̃ dzɔ ɖe eƒe futɔ dzi o. Lododo aɖe si wova ŋlɔ emegbe la xlɔ̃ nu be: “Ne wò futɔ dze anyi la, dzi megadzɔ wò o, eye ne ekli nu la, wò dzi megatso aseye o, bena ne Yehowa nakpɔe, madze eŋu o, eye wòaklo eƒe dɔmedzoe ɖa le eŋu o.” (Lod. 24:17, 18) Esi wònye be Yehowa ate ŋu akpɔ nu si le míaƒe dzi me ta la, enyana ne míele dzidzɔ kpɔm le dzi me ɖe vɔ̃ aɖe si dzɔ ɖe ame aɖe dzi la ŋu, eye kakaɖedzitɔe la, mekpɔa ŋudzedze ɖe nɔnɔme sia ƒomevi ŋu o. (Lod. 17:5) Mawu ate ŋu awɔ nu ɖe mía ŋu le ale si dzi ƒe nɔnɔme le nu, elabena egblɔ be: “Tɔnye enye hlɔ̃biabia kple teƒeɖoɖo.”—5 Mose 32:35.
16. Ne ga geɖe mele mía si o gɔ̃ hã la, aleke míate ŋu anye amedzrowɔlawo?
16 Hiob nye amedzrowɔla. (Hiob 31:31, 32) Togbɔ be ga geɖe manɔ mía si o hã la, “[míate ŋu anɔ] amedzrowɔwɔ dzi.” (Rom. 12:13) Míate ŋu adi nuɖuɖu tsɛ aɖe ko mía kple ame bubuwo míaɖu, elabena míenyae be “ama agba ɖeka, si ŋu lɔlɔ̃ kpe ɖo la, nyo wu nyitsu dami, si ŋu fuléle kpe ɖo.” (Lod. 15:17) Nuɖuɖu kple hati nuteƒewɔlawo ɖekae le lɔlɔ̃ me ana nu tsɛ aɖe ɖuɖu nado dzidzɔ na mí, eye atu ɖo mí le gbɔgbɔ me godoo.
17. Ne míewɔ nu vɔ̃ gã aɖe la, nu ka tae mele be míadze agbagba be míaɣlae o?
17 Hiob ƒe amedzrowɔwɔ anya tu ame ɖo le gbɔgbɔ me ŋutɔ, elabena menye ameŋkumenuwɔlae wònye o. Menɔ abe ame mavɔ̃mawu siwo va tra ɖe hame si nɔ anyi le ƒe alafa gbãtɔ me la me eye “wodea bubu amewo ŋu le woawo ŋutɔwo ƒe viɖe ta” la ene o. (Yuda 3, 4, 16) Eye Hiob metsɔ nu tsyɔ eƒe vodadawo dzi alo ‘ɣla eƒe fɔɖiɖi ɖe akɔnu’ le vɔvɔ̃ be amewo magade bubu ye ŋu ne wonya o ta o. Ke boŋ elɔ̃ faa be Mawu, ame si wòahiã be yeaʋu nu vɔ̃ me na la, nadzro ye me. (Hiob 31:33-37) Ne míewɔ nu vɔ̃ gã aɖe la, migana míadze agbagba be míatsyɔ nu edzi kple susu be míagaɖu ŋukpe o. Ke alekee míate ŋu aɖee afia be míele agbagba dzem be míanye fɔmaɖilawo? Eyae nye be míaʋu míaƒe nu vɔ̃a me, atrɔ dzi me, adi gbɔgbɔmekpekpeɖeŋu, eye míawɔ nu sia nu si míate ŋui be míatsɔ aɖɔ nɔnɔmea ɖo.—Lod. 28:13; Yak. 5:13-15.
Hiob Di Be Yeaɖo Kpe Yeƒe Fɔmaɖimaɖi Dzi Le Ʋɔnu
18, 19. (a) Nu ka tae míate ŋu agblɔ be Hiob metafa ame aɖeke kpɔ o? (b) Nu kae Hiob nɔ klalo be yeawɔ ne wokpɔe be yeɖi fɔ?
18 Hiob nye anukwareɖila eye wòwɔa nu si le eteƒe. Eya ta ete ŋu gblɔ be: “Ne nye agble nɔa ɣli dom ɖe ŋunye, eye eƒe boliƒowo katã nɔa avi fam, ne meɖu eme nu femaxemaxe, eye mena gbɔgbɔ do le agbletɔ me la, ekema ŋu nemie ɖe lu teƒe, eye gbe vɔ̃e nemie ɖe ƒo teƒe!” (Hiob 31:38-40) Hiob mexɔ ame bubuwo ƒe anyigba le wo si kpɔ o, eye metafa agbledɔwɔlawo o. Ehiã be míalé fɔmaɖimaɖi me ɖe asi na Yehowa le nu gãwo kple nu suewo me abe ale si wòwɔe ene.
19 Hiob gblɔ agbe si ƒomevi wònɔ la ŋu nya le eƒe zɔhɛ etɔ̃awo kpakple ɖekakpui Elihu siaa ŋkume. Hiob di be ne tsitretsiɖeŋula aɖe li si tsɔ nya ɖe ye ŋu le ʋɔnu la, neku yeƒe agbemeŋutinya si le abe yeƒe “nuŋɔŋlɔ” alo yeƒe asibidenudzesi ene la me. Ne woɖo kpe edzi be Hiob ɖi fɔ la, enɔ klalo be yeaxɔ tohehe ɖe eta. Eya ta etsɔ eƒe nyaa de asi na Mawu be wòadrɔ̃e henɔ afiatsotsoa lalam. Azɔ, ‘Hiob ƒe nyawo wu enu.’—Hiob 31:35, 40.
Àte Ŋu Alé Fɔmaɖimaɖi Me Ðe Asi
20, 21. (a) Nu kae na Hiob te ŋu lé fɔmaɖimaɖi me ɖe asi? (b) Alekee míate ŋu atu lɔlɔ̃ na Mawu ɖo?
20 Esi Hiob lɔ̃ Mawu tae wòte ŋu lé fɔmaɖimaɖi me ɖe asi ɖo, eye esia wɔe be Yehowa lɔ̃e hekpe ɖe eŋu. Hiob gblɔ be: ‘[Yehowa] èna agbem eye [nèɖe nuteƒewɔwɔ ƒe lɔlɔ̃ fiam], eye wò ametakpɔkpɔ dzra nye gbɔgbɔ ɖo.’ (Hiob 10:12) Gakpe ɖe eŋu la, Hiob lɔ̃ amewo, elabena enyae be ne ame aɖe gbe nuteƒewɔwɔ ƒe lɔlɔ̃ ɖeɖe fia ehavi amegbetɔwo la, efia be egbe Ŋusẽkatãtɔ la vɔvɔ̃. (Hiob 6:14) Fɔmaɖilawo lɔ̃a Mawu kple wo havi.—Mat. 22:37-40.
21 Míate ŋu atu lɔlɔ̃ na Mawu ɖo to eƒe Nya la xexlẽ gbe sia gbe kple ŋugbledede le nu si wòɖe fia le eyama ŋu dzi. Míate ŋu ado gbe ɖa tso dzi blibo me na Yehowa akafui ahada akpe nɛ ɖe ale si wònyoa dɔme na mí ta. (Flp. 4:6, 7) Míate ŋu adzi ha na Yehowa eye hadede kple eƒe amewo edziedzi ate ŋu aɖe vi na mí. (Heb. 10:23-25) Gakpe ɖe eŋu la, míaƒe lɔlɔ̃ na Mawu anɔ tsitsim ɖe edzi ne míele gome kpɔm le subɔsubɔdɔa me hele gbeƒã ɖem “eƒe xɔname.” (Ps. 96:1-3) Ne míewɔa nu siawo la, míate ŋu alé fɔmaɖimaɖi me ɖe asi, abe ale si hakpalaa dzi ha ene, esi wògblɔ be: “Ke nye la, Mawu ƒe gbɔnyenɔnɔ enye nye dzidzɔ; meɖo ŋu ɖe Aƒetɔ [Dziɖulagã] Yehowa ŋu.”—Ps. 73:28.
22, 23. Esi míele Yehowa ƒe dziɖulanyenye ƒe akpa dzi ta la, alekee míaƒe dɔwɔnawo sɔ kple fɔmaɖila siwo nɔ anyi le blema la tɔwo?
22 Le ƒe alafa siwo va yi me la, Yehowa de dɔ vovovowo asi na fɔmaɖilawo. Noa kpa aɖakaʋu aɖe eye wònye “dzɔdzɔenyenye ƒe gbeƒãɖela.” (2 Pet. 2:5) Yosua kplɔ Israel viwo yi Ŋugbedodonyigbaa dzi, gake esi wòxlẽ ‘segbalẽ la zã kple keli’ eye wòlé nu siwo woŋlɔ ɖe eme la me ɖe asi hewɔ wo dzi tae wòkpɔ dzidzedze ɖo. (Yos. 1:7, 8) Kristotɔ siwo nɔ anyi le ƒe alafa gbãtɔ me la wɔ nusrɔ̃lawo eye wokpena edziedzi srɔ̃a Ŋɔŋlɔawo.—Mat. 28:19, 20.
23 Míeɖenɛ fiana be míele Yehowa ƒe dziɖulanyenye ƒe akpa dzi heléa míaƒe fɔmaɖimaɖi me ɖe asi to gbeƒãɖeɖe dzɔdzɔenyenye, nusrɔ̃lawo wɔwɔ, Ŋɔŋlɔawo ƒe aɖaŋuɖoɖowo dzi wɔwɔ, kpakple takpekpe suewo kple gãwo dede me. Dɔwɔna siawo kpena ɖe mía ŋu dzi nɔa mía ƒo, míesẽa ŋu le gbɔgbɔ me, eye míekpɔa dzidzedze le Mawu ƒe lɔlɔ̃nu wɔwɔ me. Dɔ siawo wɔwɔ mesesẽ na mí akpa o, elabena mía Fofo si le dziƒo la kple Via kpena ɖe mía ŋu. (5 Mose 30:11-14; 1 Fia. 8:57) Gakpe ɖe eŋu la, “nɔviwo ƒe habɔbɔ blibo la katã,” siwo hã zɔna fɔmaɖitɔe eye wodea bubu deto Yehowa ŋu abe woƒe Aƒetɔ Dziɖulagã ene la, le megbe na mí.—1 Pet. 2:17.
Aleke Nàɖo Wo Ŋui?
• Alele wòle be míabu Yehowa ƒe agbe nyui nɔnɔ ƒe dzidzenuwo?
• Hiob ƒe nɔnɔme nyui kawo koŋue do dzidzɔ na wò?
• Abe ale si woɖee fia le Hiob 31:29-37 ene la, aleke Hiob nɔ agbee?
• Nu ka tae wòate ŋu anya wɔ be míalé míaƒe fɔmaɖimaɖi me ɖe asi na Mawu?
[Nɔnɔmetata si le axa 29]
Hiob lé eƒe fɔmaɖimaɖi me ɖe asi na Yehowa. Míawo hã míate ŋui!
[Nɔnɔmetata si le axa 32]
Míate ŋu alé míaƒe fɔmaɖimaɖi me ɖe asi!