Aleke Nàwɔ Azu Mawu Xɔlɔ̃?

1, 2. Yehowa xɔlɔ̃wo dometɔ aɖewo ɖe?

AME kae nàdi be wòanye ye xɔlɔ̃? Àdi ame si ƒe nu dzɔa dzi na wò. Ame si wò kplii dome vivina. Ame si ƒe nuwɔnawo kple nɔnɔme nyuiwo doa dzidzɔ na wò.

² Yehowa Mawu tia amegbetɔ aɖewo be woanye ye xɔlɔ̃wo. Le kpɔɖeŋu me, Abraham nye Yehowa xɔlɔ̃. (Yesaya 41:8; Yakobo 2:23) Yehowa lɔ̃ David hã. Egblɔ be David nye ‘ŋutsu si ƒe nu dze yeƒe dzi ŋu.’ (Dɔwɔwɔwo 13:22) Eye nyagblɔɖila Daniel hã nye “ame vevi” na Yehowa.—Daniel 9:23.

 3. Aleke Abraham, David kple Daniel wɔ va zu Yehowa xɔlɔ̃wo?

³ Aleke Abraham, David kple Daniel wɔ va zu Yehowa xɔlɔ̃wo? Yehowa gblɔ na Abraham be: “Èɖo to nye gbe.” (1 Mose 22:18) Yehowa dzea xɔlɔ̃ ame siwo bɔbɔa wo ɖokuiwo heɖoa toe. Dukɔ blibo aɖe gɔ̃ hã te ŋu zu exɔlɔ̃wo. Yehowa gblɔ na Israel-dukɔa be: “Miɖo to nye gbe, ekema manye miaƒe Mawu, eye miawo mianye nye dukɔ.” (Yeremiya 7:23) Eya ta ne èdi vevie be ye hã yeazu Yehowa xɔlɔ̃ la, ele be nàɖo toe.

4, 5. Aleke Yehowa kpɔa exɔlɔ̃wo tae?

⁴ Biblia gblɔ be Yehowa le didim be yeazã yeƒe “ŋusẽ atsɔ axɔ na ame siwo ku ɖe eŋu kple woƒe dzi blibo.” (2 Kronika 16:9) Yehowa do ŋugbe na exɔlɔ̃wo le Psalmo 32:8 be: “Mana gɔmesese deto nasu asiwò, eye mafia mɔ si nàto la wò. Nye ŋku anɔ ŋuwò eye maɖo aɖaŋu na wò.”

⁵ Futɔ sẽŋu aɖe le didim be yeana be míaganye Mawu xɔlɔ̃wo o. Gake Yehowa di be yeakpɔ mía ta. (Xlẽ Psalmo 55:22.) Esi míenye Yehowa xɔlɔ̃wo ta la, míesubɔnɛ kple dzi blibo. Míewɔa nuteƒe nɛ le nɔnɔme sesẽtɔ kekeake gɔ̃ hã me. Míawo hã míeka ɖe edzi abe ale si hakpalaa ka ɖe edzi ene. Eŋlɔ tso Yehowa ŋu be: “Esi wòle nye ɖusime ta la, nyemaʋã akpɔ o.” (Psalmo 16:8; 63:8) Nu kawoe Satana wɔna be yeagblẽ mí kple Mawu ƒe xɔlɔ̃dzedzea me?

 6. Nya kae Satana tsɔ ɖe amegbetɔwo ŋu?

⁶ Míekpɔe le Ta 11 lia me be Satana tsɔ nya ɖe Yehowa ŋu hetso enu be enye alakpatɔ kple nu madzɔmadzɔ wɔla le esi meɖe mɔ na Adam kple Xawa be woatso nya me na wo ɖokuiwo le nu si nye nyui kple vɔ̃ ŋu o ta. Míekpɔe le Biblia-gbalẽ si nye Hiob hã me be Satana tsoa amegbetɔ siwo dina be yewoanye Mawu xɔlɔ̃wo hã nu. Satana gblɔna be nu siwo woate ŋu akpɔ tso Mawu gbɔ tae wosubɔnɛ ɖo, ke menye ɖe wolɔ̃e o. Satana gblɔ gɔ̃ hã be yeate ŋu ana ame sia ame nadze aglã ɖe Mawu ŋu. Na míakpɔ nu si míate ŋu asrɔ̃ tso Hiob ŋu kple ale si Yehowa kpɔ etae la ɖa.

7, 8. (a) Aleke Yehowa bua Hiob? (b) Nya kae Satana gblɔ tso Hiob ŋu?

⁷ Ame kae nye Hiob? Enye ame nyui aɖe si nɔ agbe ƒe 3,600 aɖewoe nye esi va yi. Yehowa gblɔ be ɣemaɣi la, ame aɖeke menɔ anyigba dzi de enu o. Hiob dea bubu deto Mawu ŋu, eye wòtsri nu vɔ̃ɖi. (Hiob 1:8) Ɛ̃, Hiob nye Yehowa xɔlɔ̃ vavã.

⁸ Satana gblɔ be Hiob ŋutɔ ƒe viɖe siwo wòakpɔ le Mawu gbɔ tae wòsubɔnɛ ɖo. Satana gblɔ na Yehowa be: “Ðe menye wòe tɔ kpɔ ɖe eya ŋutɔ kple eƒe aƒe kpakple eƒe nuwo katã ŋu godoo va kpe oa? Èyra eƒe asinudɔwɔwɔwo, eye eƒe lãhawo gbagba ɖe anyigba la dzi. Gake ne èdo wò asi ɖa gblẽ nu siwo katã le esi dome la, aƒo fi ade wò le wò ŋutɔ wò ŋkume godoo.”—Hiob 1:10, 11.

 9. Nu kae Yehowa ɖe mɔ na Satana be wòawɔ?

⁹ Satana tso Hiob nu be nu siwo wòkpɔna tso Yehowa gbɔ ko tae wòsubɔnɛ ɖo. Satana gblɔ hã be yeate ŋu ana Hiob nadzudzɔ Yehowa subɔsubɔ. Yehowa meda asi ɖe Satana ƒe nyaa dzi o. Ke hã Yehowa ɖe mɔ na Satana be wòado Hiob kpɔ ne yewoakpɔe ɖa be esi Hiob lɔ̃ ye tae wònye ye xɔlɔ̃ ɖo mahã.

10. Nu kae Satana tu kple Hiob, eye aleke Hiob wɔ nui?

¹⁰ Gbã la, Satana fi alo tsrɔ̃ Hiob ƒe lãwo katã. Eyome Satana tsrɔ̃ Hiob ƒe dɔla akpa gãtɔ. Hiob ƒe nuwo katã dome gblẽ. Mlɔeba Satana na ahom aɖe tu wu Hiob vi ewoawo. Gake Hiob gakpɔtɔ nɔ nuteƒe wɔm na Yehowa ko. “Le nu siawo katã me la, Hiob mewɔ nu vɔ̃ alo bu fɔ Mawu be ewɔ nu gbegblẽ o.”—Hiob 1:12-19, 22.

11. (a) Nu bubu kae Satana wɔ Hiob? (b) Aleke Hiob wɔ nui?

¹¹ Satana mesee ɖe afi ma o. Etɔ gbe Mawu be: “Ne èdo wò asi ɖa ka asi eƒe ƒu kple eƒe ŋutilã ŋu la, aƒo fi ade wò le wò ŋutɔ wò ŋkume godoo.” Eya ta Satana tsɔ dɔléle vɔ̃ɖi aɖe ƒu Hiob. (Hiob 2:5, 7) Hiob gakpɔtɔ nɔ nuteƒe wɔm na Yehowa. Egblɔ be: “Nyemaɖe asi le nye fɔmaɖimaɖi ŋu va se ɖe esime maku o!”—Hiob 27:5.

12. Aleke Hiob ɖee fia be alakpatɔe Satana nye?

¹² Hiob menya naneke tso Satana ƒe nutsotsoawo alo nu si tae wòle fu kpem ɖo la ŋu o. Esusu be Yehowae na yele fu kpem. (Hiob 6:4; 16:11-14) Togbɔ be Hiob susui alea hã la, eyi edzi wɔ nuteƒe na Yehowa. Fifia edze ƒãa be menye Hiob ŋutɔ ƒe viɖewo tae wòle Mawu subɔm ɖo o. Esi wòlɔ̃ Mawu tae wòdze xɔlɔ̃e ɖo. Satana ƒe nutsotsoawo katã nye alakpa sɔŋ!

13. Nu kae do tso Hiob ƒe nuteƒewɔwɔ me nɛ?

¹³ Togbɔ be Hiob menya nu siwo le dzɔdzɔm le dziƒo o hã la, ewɔ nuteƒe na Mawu heɖee fia be ame vɔ̃ɖie Satana nye. Yehowa ɖo eteƒe na Hiob le esi wònye Yehowa xɔlɔ̃ hewɔ nuteƒe nɛ ta.—Hiob 42:12-17.

14, 15. Aleke Satana tso amegbetɔwo katã nui?

¹⁴ Àte ŋu asrɔ̃ nu vevi aɖe tso nu si dzɔ ɖe Hiob dzi la me. Egbea la, Satana gatsoa mía nu be viɖe siwo míakpɔ tso Yehowa gbɔ tae míele esubɔm ɖo. Satana gblɔ le Hiob 2:4 be: “Amegbetɔ atsɔ nu sia nu si le esi la ana ɖe eƒe agbe ta.” Esia fia be Satana tso amegbetɔwo katã nu be wonye ɖokuitɔdilawo, ke menye Hiob ɖeɖe ko o. Ƒe alafa geɖe le Hiob ƒe ku megbe la, Satana gakpɔtɔ le alɔme ɖem le Yehowa ŋu hele esubɔlawo nu tsom. Le kpɔɖeŋu me, Lododowo 27:11 gblɔ be: “Vinye, dze nunya, be nàdo dzidzɔ na nye dzi, ne mate ŋu aɖo nya ŋu na ame si le alɔme ɖem le ŋunye.”

¹⁵ Àte ŋu atiae be yeaɖo to Yehowa ahanye exɔlɔ̃ wɔnuteƒe atsɔ aɖee afia be alakpatɔe Satana nye. Ne ahiã be nàwɔ tɔtrɔ gãwo le wò agbe me be nàzu Mawu xɔlɔ̃ gɔ̃ hã la, esiae nye afɔ nyuitɔ kekeake si nàte ŋu aɖe! Esia nye afɔɖeɖe vevi aɖe ŋutɔ. Satana gblɔ be ne kuxiwo ɖe kpe na wò la, màwɔ nuteƒe na Mawu o. Edina be yeaflu mí míado kpo nuteƒewɔwɔ na Mawu. Aleke wòwɔnɛ?

16. (a) Mɔnu kawoe Satana zãna be yeatsɔ ana míadzudzɔ Yehowa subɔsubɔ? (b) Nu kae Abosam ate ŋu awɔ be yeana wò ŋutɔ nàdzudzɔ Yehowa subɔsubɔ?

¹⁶ Satana zãa mɔnu vovovowo be yeatsɔ ana be mímaganye Mawu xɔlɔ̃wo o. Edzea mía dzi abe “dzata si le gbe ɖem eye wòle ame dim be yeavuvu ami ene.” (1 Petro 5:8) Megawɔ nuku na wò ne xɔ̃wòwo, ƒowòmetɔwo alo ame bubuwo dze agbagba be yewoaxe mɔ na wò ale be màgasrɔ̃ Biblia ahawɔ nu si le eteƒe o. Àse le ɖokuiwò me be wotso ɖe ye ŋu.a (Yohanes 15:19, 20) Satana wɔa eɖokui hã “abe kekeli ƒe dɔla ene.” Eya ta ate ŋu atee kpɔ be yeable mí míagbe toɖoɖo Yehowa.(2 Korintotɔwo 11:14) Mɔ bubu si dzi Satana tona be yeana míadzudzɔ Yehowa subɔsubɔe nye ale si wònana míesusunɛ be mímedze asubɔ Mawu o.—Lododowo 24:10.

17. Nu ka tae míeɖoa to Yehowa?

¹⁷ Ne míewɔ Yehowa ƒe sewo dzi la, míaɖee afia be alakpatɔe Satana nye. Nu kae akpe ɖe mía ŋu míanye toɖolawo? Biblia gblɔ be: “Tsɔ wò dzi blibo kple wò luʋɔ blibo kpakple wò ŋusẽ blibo lɔ̃ Yehowa wò Mawu la.” (5 Mose 6:5) Míeɖoa to Yehowa, elabe míelɔ̃e. Ne ale si míelɔ̃ Yehowa nu le sesẽm ɖe edzi la, míalɔ̃ awɔ nu sia nu si wòbia tso mía si. Apostolo Yohanes ŋlɔ bena: “Nu si lɔlɔ̃ na Mawu fiae nye esi, be míalé eƒe seawo me ɖe asi; eye eƒe seawo menye agba o.”—1 Yohanes 5:3.

18, 19. (a) Nu siwo Yehowa gblɔ be womenyo be míawɔ o la dometɔ aɖewo ɖe? (b) Aleke míewɔ nya be Yehowa mebiana nu si míate ŋu awɔ o la tso mía si o?

¹⁸ Nu siwo Yehowa gblɔ na mí be womenyo o la dometɔ aɖewo ɖe? Wo dometɔ aɖewoe nye esiwo woyɔ le aɖaka si nye “Tsri Nuwɔna Siwo Yehowa Lé Fui” la me. Ne mèbu nu siawo ŋu nyuie o la, àsusui be nu boo aɖeke megblẽ le wo dometɔ aɖewo ŋu o. Gake ne èxlẽ mawunyakpukpuiawo eye nède ŋugble tso wo me nyawo ŋu nyuie la, àkpɔe be nunya le eme be míawɔ ɖe Yehowa ƒe sewo dzi. Àkpɔe hã be ehiã be yeawɔ tɔtrɔ aɖewo le yeƒe agbenɔnɔ me. Togbɔ be esia wɔwɔ manɔ bɔbɔe ɣeaɖewoɣi o hã la, ne èwɔ tɔtrɔ siawo la, àkpɔ dzidzɔ kple ŋutifafa si dona tso nuteƒewɔwɔ na Mawu kple exɔlɔ̃nyenye me. (Yesaya 48:17, 18) Aleke míewɔ nya be míate ŋu awɔ tɔtrɔ siawo?

¹⁹ Yehowa mebiaa nu si míate ŋu awɔ o la tso mía si gbeɖe o. (5 Mose 30:11-14) Esi wònye mía Xɔlɔ̃ vavã ta la, enya mí nyuie wu ale si míenya mía ɖokuiwo. Enya míaƒe ŋutetewo kple gbɔdzɔgbɔdzɔwo. (Psalmo 103:14) Apostolo Paulo de dzi ƒo na mí be: “Nuteƒewɔlae Mawu nye, eye maɖe mɔ woate mi akpɔ wu esi nu miate ŋu anɔ te ɖo o, gake ne tetekpɔa va la, ana mɔ si dzi miato ado le eme la hã, ale be miate ŋu ado dzi atsɔe.” (1 Korintotɔwo 10:13) Míate ŋu aka ɖe edzi be Yehowa ana ŋusẽ si míehiã be míawɔ nu si le eteƒe la mí ɣesiaɣi. Ana “ŋusẽ si gbɔ dzɔdzɔmetɔ ŋu” la wò be nàdo dzi le nɔnɔme sesẽwo me. (2 Korintotɔwo 4:7) Esi apostolo Paul kpɔ ale si Yehowa kpe ɖe eŋu le ɣeyiɣi sesẽwo me la, egblɔ be: “Metea ŋu wɔa nuwo katã to ame si doa ŋusẽm la dzi.”—Filipitɔwo 4:13.

20. Nɔnɔme kawoe wòle be míasrɔ̃, eye nu ka tae?

²⁰ Ne míedi be míanye Yehowa xɔlɔ̃wo la, ele be míadzudzɔ nu siwo Yehowa gblɔ be womenyo o la wɔwɔ. Gake ahiã be míawɔ nu siwo yi ŋgɔ wu ema. (Romatɔwo 12:9) Mawu xɔlɔ̃wo lɔ̃a nu siwo wòlɔ̃na. Woƒo nu tso wo ŋu le Psalmo 15:1-5. (Xlẽe.) Yehowa xɔlɔ̃wo srɔ̃a eƒe nɔnɔmewo eye woɖea “lɔlɔ̃, dzidzɔ, ŋutifafa, dzigbɔgbɔ blewu, dɔmenyonyo, nyuiwɔwɔ, xɔse, tufafa, ɖokuidziɖuɖu” fiana.—Galatiatɔwo 5:22, 23.

21. Aleke nàwɔ aɖe nɔnɔme siwo Mawu lɔ̃na la afia?

²¹ Aleke nàwɔ aɖe nɔnɔme nyui mawo afia? Ele be nàxlẽ Biblia ahasrɔ̃e edziedzi ale be nànya nu siwo Yehowa lɔ̃na. (Yesaya 30:20, 21) Ne èle esia wɔm la, àgalɔ̃ Yehowa geɖe wu, eye esia ana nàdi vevie be yeaɖo toe.

22. Ne èɖo to Yehowa la, vi kawoe wòaɖe na wò?

²² Míate ŋu atsɔ tɔtrɔ siwo nàwɔ le wò agbenɔnɔ me la asɔ kple ale si ko nàɖe awu xoxo ɖi ado yeye. Biblia gblɔ be ele be nàɖe “amenyenye xoxo la” ɖa eye nàdo “amenyenye yeye la.” (Kolosetɔwo 3:9, 10) Togbɔ be tɔtrɔ siawo wɔwɔ manɔ bɔbɔe o hã la, Yehowa do ŋugbe be yeana “fetu gã” mí ne míete ŋu wɔ wo heɖo to ye. (Psalmo 19:11) Ɛ̃, tiae be yeaɖo to Yehowa atsɔ aɖee afia be alakpatɔe Satana nye. Subɔ Yehowa le esi nèlɔ̃e ɖokuitɔmadimaditɔe ta, ke menye ɖe etsɔmeyayrawo ta o. Ekema ànye Mawu xɔlɔ̃ vavã!