To Tame Goglomiɖelawo
DZEƑUA ƒe ɣetoɖoƒe ƒutae blemadu si woyɔna be En-Gedi kple dzogbe siwo ƒo xlãe la nɔ. Teƒea ƒe agakpewo dome mɔwo dzi nye nɔƒe nyui aɖe na agamegbɔ̃ siwo nɔ Ŋugbedodonyigba la dzi, siwo le abe esia si kpɔm míele le afisia ene.
Lã sia si medzea anyi o la, kpe ɖe lã siwo wowɔ nukutɔe la ŋu. Mina míalé ŋku ɖe lã sia si ƒe nuwɔna doa dzidzɔ na ame ŋu nyuie wu le Biblia me.
“To Kɔkɔwo Li na Agamegbɔ̃wo”
Nenemae hakpala la dzi hae. (Psalmo 104:18) Wowɔ agamegbɔ̃wo ɖe teƒe kɔkɔwo nɔnɔ ŋu nyuie! Woɖea abla ale gbegbe, eye woƒua du sesĩe toa teƒe glidzaglidzawo kple kakaɖedzi. Alesi woƒe afɔkliwo le hã tae wote ŋu wɔna esia ɖo. Mɔ siwo le agamegbɔ̃ ƒe afɔkliwo me kena ne eɖo afɔ anyigba, nusia wɔnɛ be lãa tea afɔ ɖe anyi ne etɔ ɖi alo le zɔzɔm le agakpe lɛwo dzi.
Agamegbɔ̃wo medzea anyi ne wole nu lɛ dzi zɔm o wòwɔ nuku. Wote ŋu tia kpo didi dzea agakpe ƒe tsutsɔ̃eƒe si mekeke woaɖo woƒe afɔ eneawo katãe o gɔ̃ hã. Nugbagbeŋutinunyala Douglas Chadwick kpɔ agamegbɔ̃ ƒomevi aɖe kpɔ wòzã eƒe anyimadzemadze ŋutete si wɔe be mexaxa ɖe agakpe ƒe tsutsɔ̃eƒe aɖe si mekeke wòatrɔ eɖokui le o. Egblɔ be: “Esi agamegbɔ̃ la kpɔ agakpe bubu ƒe tsutsɔ̃eƒe si yi to meta 120 la, eƒo eƒe ŋgɔgbefɔwo ɖe anyi sesĩe eye wònɔ eƒe megbefɔwo trom ɖɔɖɔɖɔ le agakpea dzi abe goglomi ɖemee wònɔ ene. Gbɔ̃ la wɔ nenema vaseɖe esime wòɖo eƒe megbefɔwo anyi hetrɔ dze ŋgɔ afisi wòtso va, eye ewɔ nuku nam ŋutɔ.” (National Geographic) Mewɔ nuku be woyɔ agamegbɔ̃wo be “to tame goglomifefewɔlawo o”!
“Ènya Agamegbɔ̃ewo ƒe Vidziɣia?”
Agamegbɔ̃wo metena ɖe ame ŋu o. Wodina be yewoanɔ adzɔge na amegbetɔ. Le nyateƒe me la, mele bɔbɔe be ame nate ɖe wo ŋu le gbe me alé ŋku ɖe wo ŋu nyuie o. Eyatae Amesi tɔ “lã akpe nane, siwo le towo dzi” nye la te ŋu bia Hiob wòsɔ be: “Ènya agamegbɔ̃ewo ƒe vidziɣia?”—Psalmo 50:10; Hiob 39:1.
Lãmenusese si Mawu na lãwo dzie agamegbɔ̃nɔe tona nyana ɣeyiɣi si me wòadzi vi. Edia teƒe si le dedie eye wòdzia vi ɖeka alo eve ɖe afima, zi geɖe le May alo June ƒe nuwuwu. Wo vi fẽwo ƒe afɔ sɔa anyi le ŋkeke ʋee aɖewo ko me le wo dzidzi vɔ megbe.
‘Enye Zinɔ Dzeameŋu Kple Agamegbɔ̃ Si Nyo’
Nunyala Fia Salomo xlɔ̃ nu srɔ̃ŋutsuwo be: “[Kpɔ] dzidzɔ le wò ɖekakpui me srɔ̃ ŋu, eya, si nye zinɔ dzeameŋu kple [agamegbɔ̃, NW] si nyo.” (Lododowo 5:18, 19) Menye ɖe wogblɔ nya ma tsɔ da nyɔnuwo ɖe anyi o. Anye be lã siawo ƒe anidzedze, alesi woƒe nuwɔna nya kpɔnae, kple woƒe nɔnɔme ɖedzesi bubuwo ŋue Salomo gblɔe tsɔ ku ɖo.
“Luʋɔ gbagbe” siwo womate ŋu axlẽ o siwo ŋu agamegbɔ̃ kpe ɖo la nye ɖaseɖiɖi gã aɖe be nunya le Wɔla la si ŋutɔ. (Mose I, 1:24, 25) Ðe dzi medzɔa mí be Mawu tsɔ nuwɔwɔ siwo ƒe nuwɔna doa dzidzɔ na ame ƒo xlã mí fũ oa?
[Nɔnɔmetata Tsoƒe si le axa 24]
Le Athens University ƒe mɔɖeɖe nu