Woɖɔa Li Fu Abe Hɔ̃ Ene

ALEKE ame ase le eɖokui me ne enɔ Nazi-fuwɔamesaɖawo me ƒe atɔ̃ sɔŋ? Dzi aɖe le eƒoa? Alé fu amewoa? Adi be yeawɔ wɔɖenuia?

Togbɔ be awɔ mo yaa hã la, ŋutsu aɖe si to nɔnɔme sia tɔgbe me la ŋlɔ bena: “Nye agbenɔnɔ ganyo wu esi mate ŋu akpɔ mɔ na.” Nukata wòse le eɖokui me nenema? Eɖe eme be: “Mekpɔ sitsoƒe le Dziƒoʋĩtɔ la ƒe aʋala te, eye nyagblɔɖila Yesaya ƒe nyawo va eme nam, esime wògblɔ be: ‘Ŋusẽ yeye ɖoa amesiwo kpɔa mɔ na Yehowa ya ŋu, woɖɔa li fu abe hɔ̃ ene, . . . wozɔa azɔli ɖiɖi metea wo ŋu o.’”—Yesaya 40:31.

Gbɔgbɔ si dzo yi dzi le kpɔɖeŋumɔ nu, gbɔgbɔ si dzi Nazitɔwo ƒe ŋutasesẽ mete ŋu ɖu o la nɔ ŋutsu Kristotɔ sia si ƒe ŋutilã wotsɔ ŋlɔmiwɔwɔ dziŋɔtɔ kekeake si nàte ŋu akpɔ le susu me wɔ fui la si. Ekpɔ sitsoƒe le Mawu ƒe “aʋala” ƒe vɔvɔli te abe Dawid ene. (Psalmo 57:2) Kristotɔ sia zã alobalo aɖe si nyagblɔɖila Yesaya zã, eye wòtsɔ eƒe gbɔgbɔmeŋusẽ sɔ kple hɔ̃ si dzona yia yame ʋĩ tɔ.

Èse le ɖokuiwò me kpɔ be kuxiwo te ɖe ye dzia? Ðikeke mele eme o be wò hã àdi be yeakpɔ sitsoƒe le Dziƒoʋĩtɔ la ƒe aʋala te, be ‘nàɖɔ li fu abe hɔ̃ ene.’ Be míase alesi esia anya wɔe gɔme la, anyo be míanya nane tso hɔ̃, si wozã le kpɔɖeŋumɔ nu zi geɖe le Ŋɔŋlɔawo me la ŋu.

Le Hɔ̃ ƒe Aflaga Te

Le xevi siwo ŋu blematɔwo lé ŋku ɖo katã dome la, ɖewohĩ hɔ̃e nye esi ŋu ame akpa gãtɔ kpɔ dzidzɔ ɖo le eƒe ŋusẽ kple eƒe dzodzo dzeania ta. Blemaʋakɔ geɖe, kple Babilon, Persia, kpakple Roma ʋakɔwo hã, zã aflaga si dzi wota hɔ̃ ɖo yi aʋae. Kores Gãtɔ ƒe aʋakɔ la nye esiawo dometɔ ɖeka. Biblia gblɔ ɖi be Persia-fia sia anɔ abe xe lénu si tso ɣedzeƒe be yeava lé Babilon Fiaɖuƒea avuvu ami ene. (Yesaya 45:1; 46:11) Esi woŋlɔ nyagblɔɖi sia ƒe alafa eve megbe la, Kores ƒe aʋakɔ siwo ƒe aʋaflagawo dzi wota hɔ̃ ɖo la nyẽ zi ɖe Babilon-dugã la dzi abe hɔ̃ si ƒo eƒe nuléle ene.

Nyitsɔ laa la, aʋawɔla sesẽwo abe Charlemagne kple Napoleon ene kpakple dukɔwo abe United States kple Germania ene hã tia hɔ̃ be wòanye yewoƒe dzesi. Wode se na Israel-viwo be womegasubɔ hɔ̃ ƒe nɔnɔme alo lã bubu aɖeke o. (Mose II, 20:4, 5) Ke hã la, Biblia-ŋlɔlawo tsɔ nuwo sɔ kple hɔ̃ ƒe nɔnɔmewo be woatsɔ awɔ woƒe gbedasi ƒe kpɔɖeŋui. Eyata wozã hɔ̃ si nye xe si ƒe ŋkɔ woyɔ edziedzi le Ŋɔŋlɔawo me la tsɔ wɔ nanewo abe nunya, Mawu ƒe ametakpɔkpɔ, kple ablaɖeɖe ene ƒe kpɔɖeŋui.

Hɔ̃ ƒe Ŋku

Wotsɔa hɔ̃ ƒe nukpɔkpɔ nyui la wɔa kpɔɖeŋui ɣesiaɣi. Togbɔ be ƒã hafi hɔ̃ dzeani la ƒe kpekpeme wua kilogram 5 hã la, eƒe ŋku lolo wu amegbetɔ tɔ, eye ekpɔa nu nyuie wu sã. Esime Yehowa ŋutɔ nɔ nu ƒom na Hiob tso alesi hɔ̃ te ŋu dia eƒe nuɖuɖu ŋu la, egblɔ be: “Eƒe ŋku kpɔa keke didiƒe ke.” (Hiob 39:27, 29) Alice Parmelee ka nya ta le eƒe agbalẽ si nye All the Birds of the Bible me be “hɔ̃ aɖe kpɔ tɔmelã kuku aɖe le tɔdzi le afisi didi tso egbɔ kilometa atɔ̃ eye wòɖi agba tẽ va ɖo teƒea tututu. Menye ɖeko hɔ̃ la te ŋu kpɔ nu sue le adzɔge ʋĩ wu alesi amegbetɔ ate ŋu akpɔ o, ke xevi la ƒe ŋku nɔ tɔmelã la dzi le eƒe agbaɖiɖi kilometa atɔ̃ la katã me.

Le hɔ̃ ƒe nukpɔkpɔ nyui ta la, esɔ be woatsɔe awɔ nunya si nye Yehowa ƒe nɔnɔme vevi ɖeka la ƒe kpɔɖeŋui. (Tsɔe sɔ kple Xezekiel 1:10; Nyaɖeɖefia 4:7.) Nukatae? Nunya ƒe akpa aɖee nye be míakpɔ nusiwo ado tso afɔɖeɖe ɖesiaɖe si míawɔ me adze sii. (Lododowo 22:3) Esi hɔ̃ te ŋu kpɔa nu yia didiƒe ʋĩ ta la, ete ŋu kpɔa afɔku dzea sii le didiƒe eye wòɖɔa ŋu ɖo, abe nunyala si le Yesu ƒe lododoa me ene, amesi kpɔe be ahom ate ŋu atu eye wòtu eƒe xɔ ɖe kpe gbadza dzi. (Mateo 7:24, 25) Enya se be le Spaniagbe me la, ne woɖɔ ame aɖe be eɖi hɔ̃ la, efia be sidzedze kple nugɔmesese le esi.

Ne mɔnukpɔkpɔ su asiwò nète ɖe hɔ̃ ŋu kpɔe nyuie la, lé ŋku ɖe alesi wòzãa eƒe ŋkuwoe ŋu. Menye ɖeko wòkpɔa wò gàa o; ke boŋ edze abe eléa ŋku ɖe wò dzedzeme ƒe akpa sia akpa ŋu nyuie ene. Nenema ke nunyala dzroa nya me kpɔna nyuie hafi tsoa nya me le esi teƒe be wòawɔ nu ɖe eƒe lãmenusese alo eƒe seselelãmewo nu. (Lododowo 28:26) Togbɔ be hɔ̃ ƒe nukpɔkpɔ nyui na wònye mawumenɔnɔme si nye nunya ƒe kpɔɖeŋu si sɔ hã la, Biblia-ŋlɔlawo zã eƒe dzodzo dzeania hã le kpɔɖeŋumɔ nu.

“Hɔ̃ Toƒe le Dziƒo”

“Hɔ̃ toƒe le dziƒo” ɖe dzesi le alesi wòdzona sesĩ fu aɖeke makpemakpee ta, eye mezɔna ɖe mɔ si woɖo da ɖi nu alo dea dzesi mɔ si wòato atrɔ gbɔ o. (Lododowo 30:19) Wotsɔ hɔ̃ ƒe dzodzo sesĩe wɔ kpɔɖeŋu le Konyifahawo 4:19 afisi woƒo nu tso Babilonia-ʋakɔwo ŋu le be: “Mía yometilawo ɖi du wu hɔ̃ le dziƒo ŋu; woyɔ mí ɖe nu le towo dzi.” Nyatakaka aɖewo ɖee fia be ne hɔ̃ si le dzodzom le yame ƒe ŋku kli eƒe nuléle la, exaa eƒe aʋalawo eye wòɖia agba vaa anyi, eye du si dzi wònɔna ɣemaɣi te ŋu ɖoa kilometa 130 gaƒoƒo ɖeka. Mewɔ nuku o be Ŋɔŋlɔawo zãa hɔ̃ tsɔ wɔa ablaɖeɖe ƒe kpɔɖeŋui, vevietɔ le asrafowo gome.—Samuel II, 1:23; Yeremya 4:13; 49:22.

Gake alesi hɔ̃ te ŋu dzona bɔbɔe dzie Yesaya ya he susu yii. “Ŋusẽ yeye ɖoa amesiwo kpɔa mɔ na Yehowa ya ŋu, woɖɔa li fu abe hɔ̃ ene, woƒua du metia wo o, wozɔa azɔli ɖeɖi metea wo ŋu o.” (Yesaya 40:31) Nukae na hɔ̃ te ŋu dzona bɔbɔe nenema? Hɔ̃ te ŋu yia dzi bɔbɔe elabena ezãa dzoxɔxɔ, alo ya xɔdzo si yia dzi tẽ. Womekpɔa ya xɔdzowo kple ŋku o, gake hɔ̃ bi ɖe wo didi me. Ne hɔ̃ kpɔ ya xɔdzo la, ekekea eƒe aʋalawo kple ble henɔa xlã ƒom le ya xɔdzo la me, eye ekɔa hɔ̃ la yia dzi ʋĩ. Ne eva ɖo kɔkɔƒe si sɔ la, edzona dzea ya xɔdzo bubu dzi, eye wògawɔa nu abe zi gbãtɔ ene. Hɔ̃ la toa mɔ sia nu nɔa dzi gaƒoƒo geɖe eye eƒe ŋusẽ sue aɖe ko wòzãna.

Hɔ̃wo bɔ ɖe Israel, vevietɔ le Bali Gã si keke tso Ezion-geber le Ƒudzĩa to vaseɖe Dan le dzigbe gome. Wosɔa gbɔ ŋutɔ le ada kple kele me si nye woƒe ʋuʋuɣi. Le ƒe aɖewo me la, woxlẽ hɔ̃wo kpɔ 100,000 kloe. Ne ŋdɔ ʋu le ŋdi me eye yame xɔdzo vie la, wote ŋu kpɔa xevi lénu sia alafa geɖe wonɔa agba sam le agakpe siwo le Bali Gã la nu dzi.

Alesi hɔ̃ te ŋu dzona bɔbɔe la nye alesi Yehowa ƒe ŋusẽ te ŋu kɔa mí ɖe dzi le gbɔgbɔ kple seselelãme gome ale be míate ŋu ayi míaƒe dɔa dzi la ƒe kpɔɖeŋu nyui aɖe. Abe alesi hɔ̃ mate ŋu adzo yi dzi ʋĩ alea le eya ŋutɔ ƒe ŋusẽ me o ene la, míawo hã míate ŋu akpe akɔ kple nɔnɔmeawo o ne míeɖo ŋu ɖe mía ŋutɔwo ƒe ŋutetewo ŋu. Apostolo Paulo ɖe eme be: “Metea ŋu wɔa nuwo katã le . . . amesi doa ŋusẽm la me.” (Filipitɔwo 4:13) Abe hɔ̃ si dia ya xɔdzo makpɔmakpɔ ɣesiaɣi ene la, ‘míeyia edzi biaa’ Yehowa ƒe dɔwɔŋusẽ makpɔmakpɔ la to míaƒe gbedodoɖa vevie me.—Luka 11:9, 13.

Zi geɖe la, hɔ̃ siwo ʋuna yia teƒe bubu la kpɔa ya xɔdzowo to ŋkuléle ɖe xe lénu bubuwo ŋu me. Dzɔdzɔmenuwo ŋuti nunyala D. R. Mackintosh ka nya ta be ɣeaɖeɣi la, wokpɔ hɔ̃ kple akagã 250 wonɔ dzodzom nɔ dzi yim le ya xɔdzo ma ke me. Kristotɔ siwo li egbea hã ate ŋu aɖo ŋu ɖe Yehowa ƒe ŋusẽ ŋu to mawusubɔla bubuwo ƒe nuteƒewɔwɔ ƒe kpɔɖeŋuwo sɔsrɔ̃ me.—Tsɔe sɔ kple Korintotɔwo I, 11:1.

Le Hɔ̃ ƒe Aʋala ƒe Vɔvɔli Te

Hɔ̃ ƒe afɔkudzeɣi vevitɔwo dometɔ ɖekae nye esime wòsrɔ̃a dzodzo. Hɔ̃ geɖe kuna le etetekpɔ me. Israel-dukɔ makpɔnuteƒe la hã ɖo afɔku me esime wodzo le Egipte. Eyata nya siwo Yehowa gblɔ na Israel-viwo la sɔ nyuie be: “Mia ŋutɔwo miekpɔ nusi mewɔ Egiptetɔwo, kple alesi metsɔ mi ɖe hɔ̃ ƒe aʋalawo dzi, eye mekplɔ mi va gbɔnyee.” (Mose II, 19:4) Woka nya ta be hɔ̃wo tsɔa wo vi suewo ɖe tume ale be xevi fẽ la mage le agbagba gbãtɔ siwo wòadze be yeadzo me o. Esi G. R. Driver nɔ nu ƒom tso nyatakaka siawo tɔgbe ŋu le agbalẽ si nye Palestine Exploration Quarterly me la, egblɔ be: “Ekema menye nukpɔkpɔ le susu me ƒe dzodzo dzro aɖe koe nudzɔdzɔ [si ŋu Biblia ƒo nu tsoe] la nye o ke boŋ nyateƒenya ŋutɔŋutɔ dzie wònɔ te ɖo.”

Hɔ̃wo nye dzila nyuiwo le mɔ bubuwo hã nu. Menye ɖeko wonaa nuɖuɖu vi fẽ si le atɔ me ɖe ɣeyiɣi dzi o ke hɔ̃nɔ la flia lã si hɔ̃tsu la tsɔ vaa atɔa mee la me nyuie ale be hɔ̃vi la nate ŋu amii. Esi wowɔa woƒe atɔwo ɖe agakpewo alo ati kɔkɔwo dzi ta la, ŋdɔ ɖua xevi fẽawo. (Hiob 39:27, 28) Ŋdɔ sesẽ si ʋuna le Biblia-nyigbawo dzi la ate ŋu awu xevi fẽ ne edzilawo melé be nɛ o. Hɔ̃ tsitsi la kekea eƒe aʋalawo gaƒoƒo geɖe ɣeaɖewoɣi tsɔ tsyɔa via si le atɔ me la dzi.

Eyata esɔ ŋutɔ be wozã hɔ̃ ƒe aʋalawo tsɔ wɔ Mawu ƒe ametakpɔkpɔ ƒe kpɔɖeŋui le Ŋɔŋlɔawo me. Mose V, 32:9-12 ƒo nu tso alesi Yehowa kpɔ Israel-viwo ta le woƒe mɔzɔzɔ le gbedadaƒo me ŋu be: “Yehowa tɔ enye eƒe dukɔ, eye Yakob enye domenyinu, si womã nɛ. Efɔe le gbedzi kple gbedadaƒo, afisi gbemelãwo le xɔxlɔ̃m le. Ekpla asi kɔ nɛ, eye wòkpɔ edzi helé be nɛ abe eƒe ŋkuvi ene. Alesi hɔ̃ dea dzo viawo me ɖe dzodzo ŋu, eye wòsa agba ɖe viawo dzi, ekekea eƒe aʋalawo hekɔ wo, eye wòtsɔ wo ɖe eƒe aʋalawo dzi la, nenema Yehowa ɖeɖe kplɔe.” Yehowa akpɔ mía ta lɔlɔ̃tɔe nenema ke ne míeɖo ŋu ɖe eŋu.

Gododo le Eme

Ɣeaɖewoɣi ne kuxiwo dze ŋgɔ mí la, míakpɔe be míedi be míasi le míaƒe nɔnɔme sesẽwo katã nu. Nenema tututue Dawid se le eɖokui me. (Tsɔe sɔ kple Psalmo 55:7, 8.) Gake togbɔ be Yehowa do ŋugbe be yeakpe ɖe mía ŋu ne míedze ŋgɔ dodokpɔwo kple fukpekpewo le nuɖoanyi sia me hã la, meɖea mí le eme keŋkeŋ o. Biblia na kakaɖedzi mí be: “Tetekpɔ aɖeke meva mia dzi kpɔ o negbe ame tɔ ɖeɖeko, gake nuteƒewɔla enye Mawu, amesi mana mɔ bena, woate mi akpɔ awu alesi miate ŋui la o; ke ana gododo le eme hã akpe ɖe tetekpɔ ŋuti, bene miate ŋu atsɔe.”—Korintotɔwo I, 10:13.

“Gododo le eme” alo “sisi le eme” bia be míasrɔ̃ alesi míaɖo ŋu ɖe Yehowa ŋu. Nusiae Max Liebster si ƒe nyawo míeyɔ le nyati sia ƒe gɔmedzedze la kpɔ. Le ƒe siwo me wònɔ fuwɔamesaɖawo me la, eva nya Yehowa eye wòɖo ŋu ɖe eŋu. Abe alesi Max kpɔe ene la, Yehowa doa ŋusẽ mí to eƒe Nya, eƒe gbɔgbɔ, kple eƒe habɔbɔa dzi. Esi Ðasefoawo nɔ asaɖawo me gɔ̃ hã la, wodi woƒe haxɔsetɔwo eye wona gbɔgbɔmekpekpeɖeŋu wo, wogblɔ Ŋɔŋlɔawo me nya na wo nɔewo hemã Biblia-srɔ̃gbalẽ ɖesiaɖe si li la kpli wo. Eye abe alesi nuteƒewɔla siwo tsi agbe la ɖo kpe edzi enuenu ene la, Yehowa do ŋusẽ wo nyateƒe. Max ɖe eme be: “Mebia Yehowa edziedzi be wòakpe ɖe ŋunye, eye eƒe gbɔgbɔ lém ɖe te.”

Eɖanye dodokpɔ kae adze ŋgɔ mí o, míawo hã míate ŋu aɖo ŋu ɖe Mawu ƒe gbɔgbɔ kɔkɔe ŋu, ne míeyi ebiabia dzi ko. (Mateo 7:7-11) Ne “ŋusẽ ƒe agbɔsɔsɔ, si gbã go” sia de dzo mía me la, míayi dɔ dzi tsɔ wu be míaƒe kuxiwo naɖe dzi le mía ƒo. Míayi edzi azɔ le Yehowa ƒe mɔ dzi, eye ɖeɖi mate mía ŋu o. Míaɖɔ li fu abe hɔ̃wo ene.—Korintotɔwo II, 4:7; Yesaya 40:31.

[Nya si ɖe dzesi si le axa 10]

Menye ɖeko wòkpɔa wò gãa o

[Nɔnɔmetata Tsoƒe si le axa 9]

Foto: Cortesía de GREFA

[Nɔnɔmetata Tsoƒe si le axa 10]

Foto: Cortesía de Zoo de Madrid