Gbe Satana Ƒe Alakpanyawo

‘MIGANA woable mi o. Miaƒe Mawu la maxɔ na mi o. Mina ta, ne menye nenema o la, míatu nu kpli mi!’ Gbedeasi siae Rabsake, si nye Asiria Fia Sanxerib ƒe amedɔdɔ la, tsɔ vae na Yerusalem nɔlawo. Fia sia ƒe asrafowo ho ɖe Yuda nyigba la ŋu. Amedɔdɔa trɔ asi le eƒe nyawo ŋu be wòaɖe dzi le Yerusalem nɔlawo ƒo keŋkeŋ ahado ŋɔdzi na wo woana ta.—2 Fia. 18:28-35.

Wonya Asiriatɔwo ɖe woƒe vɔ̃ɖivɔ̃ɖi kple tagbɔsesẽ ta. Be woana ŋɔdzi nalé woƒe futɔwo la, woɖea ami ɖe ale si wowɔa fu ame siwo woɖe aboyoe la ŋuti nyawo na woƒe futɔawo. Le ŋutinyaŋlɔla Philip Taylor ƒe nya nu la, nu si “wowɔna ye nye be wokakaa ŋɔdzidonamenyawo kple alakpanyawo tsɔ dea vɔvɔ̃ lãme na ame siwo dzi woɖu la bene woabɔbɔ wo ɖokuiwo ɖe yewo te, eye wozãa fu si gbegbe wofia ame bubuwo la ŋuti nyatakaka dovoɖinamewo tsɔ ɖea dzi le futɔ siwo ate ŋu aho ɖe wo ŋu la ƒo.” Alakpanyawo kaka nye aʋawɔnu sẽŋu aɖe. Aƒetɔ Taylor gblɔ be: “Taɖodzinu si le eŋue nye be wòana amewo ƒe susu natɔtɔ.”

Kristotɔ vavãwo ‘le kame tem, menye kple ʋu kpakple ŋutilã o, ke boŋ kple gbɔgbɔmeŋusẽ vɔ̃ɖi’ siwo nye gbɔgbɔmenuwɔwɔ siwo dze aglã ɖe Mawu ŋu. (Ef. 6:12) Satana Abosam ye nye míaƒe futɔ gãtɔ. Eya hã wɔa ŋɔdzidonamenya kple alakpanyawo siaa ŋu dɔ.

Satana ƒu asi akɔ be yeate ŋu ana mía dometɔ ɖe sia ɖe naɖe asi le eƒe fɔmaɖimaɖi ŋu. Le blemafofo Hiob ŋɔli la, Satana gblɔ na Yehowa Mawu be: ‘Amegbetɔ atsɔ nu siwo katã le esi la, ana ɖe eƒe agbe ta.’ Ne míagblɔe bubui la, ele gbɔgblɔm be, ne wowɔ fu amegbetɔ la, ava dzudzɔ nuteƒewɔwɔ na Mawu godoo mlɔeba. (Hiob 2:4) Nyateƒee Satana toa? Ðe seɖoƒe li na míaƒe fɔmaɖimaɖi me léle ɖe asi, ale be, ne wodo mí kpɔ vevie la, míadzudzɔ agbenɔnɔ ɖe gɔmeɖose siwo nu míenɔa agbe ɖo la nu be míatsi agbea? Satana adi be míasusui nenema. Eya ta etoa alakpanya vɔ̃ɖiwo dzi ƒãa nukpɔsusu ma ɖe míaƒe susu me vivivi. Mina míalé ŋku ɖe mɔ siwo dzi wòtona wɔa esia kple ale si míawɔ atsi tsitre ɖe eŋu la ŋu.

‘Wodzɔ Tso Anyi Me’

Satana to Elifaz, si nye Hiob xɔlɔ̃ etɔ̃ siwo va srãe kpɔ la dometɔ ɖeka, dzi gblɔ be amegbetɔwo nye gbɔdzɔgbɔdzɔtɔwo ale gbegbe be womate ŋu awɔ nuteƒe na Mawu le dodokpɔ me o. Eɖɔ amegbetɔwo be wonye “anyixɔ me nɔlawo,” eye wògblɔ na Hiob be: ‘Amegbetɔwo dzɔ tso anyi me, eye wolilia afɔ wo dzi abe agbagblaʋuiwo ene. Woatugu wo tso ŋdi va se ɖe fiẽ, eye woabu nigbi, ame aɖeke madze sii o.’—Hiob 4:19, 20.

Le Ŋɔŋlɔawo ƒe akpa bubu la, wotsɔ mí sɔ kple “anyigoewo”—anyize siwo ate ŋu agbã bɔbɔe. (2 Kor. 4:7) Míenye gbɔdzɔgbɔdzɔtɔwo le nu vɔ̃ kple blibomademade si ƒe dome míenyi la ta. (Rom. 5:12) Mawu ƒe kpekpeɖeŋu manɔmee la, Satana ate ŋu akpe mía dzi bɔbɔe. Gake esi míenye Kristotɔwo ta la, míate ŋu aɖo ŋu ɖe Mawu ƒe kpekpeɖeŋu ŋu. Togbɔ be gbɔdzɔgbɔdzɔwo le mía ŋu hã la, Mawu dea asixɔxɔ mía ŋu. (Yes. 43:4) Gawu la, Yehowa naa gbɔgbɔ kɔkɔe la ame siwo bianɛ. (Luka 11:13) Eƒe gbɔgbɔ la ate ŋu ana “ŋusẽ si gbɔ dzɔdzɔmetɔ ŋu” la mí, si akpe ɖe mía ŋu míanɔ te ɖe nɔnɔme sesẽ ɖe sia ɖe si Satana ahe ava mía dzi la nu. (2 Kor. 4:7; Flp. 4:13) Ne míetsi tsitre ɖe Abosam ŋu ‘henɔ te sesĩe le xɔse me’ la, Mawu ana míali ke ahasẽ ŋu. (1 Pet. 5:8-10) Eya ta mele be míavɔ̃ Satana Abosam o.

Amegbetɔ “Noa Nu Vlo Wɔwɔ Abe Tsi Ene”

Elifaz bia be: ‘Nu ka nye amegbetɔ, be wòadza, kple nyɔnu tɔ dzidzia, be wòanye ame dzɔdzɔe?’ Eya ŋutɔ yi edzi ɖo eŋu be: ‘Kpɔ ɖa, [Mawu] meɖoa dzi ɖe eƒe ame kɔkɔewo ŋu o, eye dziƒo medza le eŋkume o, ʋuu keke ne wòahayi ame nyɔŋu, ame gbegblẽ, ame si noa nu vlo wɔwɔ abe tsi ene la, nye ge?’ (Hiob 15:14-16) Elifaz nɔ gbɔgblɔm na Hiob be Yehowa mebua amegbetɔ aɖeke ame dzɔdzɔe o. Abosam hã wɔa nuŋububu siwo mesɔ o ŋu dɔ. Edina be míanɔ dzimaɖi tsim ɖe vodada siwo míewɔ va yi la ŋu, anɔ fɔ bum mía ɖokui madzemadzee, ahanɔ esusum be womate ŋu atsɔ wo ake mí o. Edina hã be míasusui be Yehowa biaa nu geɖe fũu akpa tso mía si, eye be eƒe dɔmetɔtrɔ, tsɔtsɔke, kple kpekpeɖeŋu maɖe vi na mí o.

Nyateƒee, mí katã ‘míewɔ nu vɔ̃, eye míate ŋu aɖo Mawu ƒe ŋutikɔkɔe la gbɔ o.’ Amegbetɔ madeblibo aɖeke mate ŋu aɖo Yehowa ƒe dzidzenu debliboawo gbɔ o. (Rom. 3:23; 7:21-23) Ke hã, esia mefia be míeɖi naneke le eŋkume o. Yehowa nyae be “da xoxo la, si woyɔna be Abosam kple Satana,” ye dina be yeana míasusui be esi míenye amegbetɔ nuvɔ̃mewo ta la, viɖe aɖeke mele mía ŋu o. (Nyaɖ. 12:9, 10) Gake esi Mawu nyae be “kewɔ míenye” ta la, esea nu gɔme na mí eye ‘menɔa dzre dzi kpli mí o.’—Ps. 103:8, 9, 14.

Ne míeɖe asi le mɔ vɔ̃ aɖe ŋu, eye míese veve ɖe míaƒe nu vɔ̃a ta hete ɖe Yehowa ŋu dzimetɔtrɔtɔe la, ‘atsɔ nu vɔ̃a ake mí’ faa. (Yes. 55:7; Ps. 51:19) Biblia gblɔ be, ne míaƒe nu vɔ̃wo ‘le abe nyagadzĩ ene gɔ̃ hã la, woafu abe sno ene.’ (Yes. 1:18) Eya ta mina míaɖoe kplikpaa be míagana ta gbeɖe le agbagba si dzem míele be míawɔ Mawu ƒe lɔlɔ̃nu la me o.

Esi míenye amegbetɔ nuvɔ̃mewo ta la, míate ŋu anye ame dzɔdzɔe le Mawu ŋkume to míawo ŋutɔwo ƒe agbagbadzedze me gbeɖe o. Adam kple Xawa bú blibodede kple agbe tegbee nɔnɔ ƒe mɔnukpɔkpɔa, menye na woawo ŋutɔwo ɖeɖe ko o, ke na mí katã hã. (Rom. 6:23) Ke hã, le lɔlɔ̃ gã si le Yehowa si na ameƒomea ta la, ewɔ ɖoɖo aɖe si dzi wòanɔ te ɖo atsɔ míaƒe nu vɔ̃wo ake mí ne míeɖee fia be míexɔ Via, Yesu Kristo, ƒe tafevɔsa la dzi se. (Mat. 20:28; Yoh. 3:16) “Amenuveve” gã ka gbegbee nye esi Mawu ɖe fia mí! (Tito 2:11) Ɛ̃, woate ŋu atsɔ míaƒe nu vɔ̃wo ake mí! Ekema nu ka tae wòle be míaɖe mɔ Satana nana míasusui be womate ŋu atsɔ míaƒe nu vɔ̃wo ake mí o?

‘De Asi Eƒe Ʋu Kple Eƒe Ŋutilã Ŋu Kpɔ’

Satana gblɔ be Hiob agbe Mawu subɔsubɔ nenye be edze dɔ vevie. Esi Abosam nɔ gbe tɔm Yehowa la, egblɔ be: ‘De asi eƒe ʋu kple eƒe ŋutilã ŋu kpɔ, be magbe wò nya ɖe ŋkuwòme keŋ ene oa?’ (Hiob 2:5) Ðikeke mele eme o be dzi adzɔ Mawu ƒe Futɔ la, nenye be ete ŋu na míese le mía ɖokui me be viɖe aɖeke mele mía ŋu o le míaƒe lãmesẽkuxiwo ta.

Gake Yehowa megbea mí nenye be míegate ŋu le nu siwo katã míewɔna tsã le esubɔsubɔ me la wɔm o. Le kpɔɖeŋu me, ne nu vlo wɔlawo dze mía xɔlɔ̃ vevi aɖe dzi hewɔ nuvevii la, ɖe esia ana míaɖe asixɔxɔ si míedea eŋu la dzi kpɔtɔ le esi megate ŋu le nu siwo wòwɔna na mí tsã wɔm o ta? Ao ɖe! Míayi edzi anɔ elɔ̃m ahanɔ kpekpem ɖe eŋu—vevietɔ nenye be nanee wònɔ agbagba dzem be yeawɔ na mí hafi afɔkua dzɔ ɖe edzi. Ekema ɖe mele be míakpɔ mɔ be Yehowa awɔ wu ema oa? Biblia gblɔ be: ‘Mawu menye madzɔmadzɔtɔ, be wòaŋlɔ miaƒe dɔwɔwɔ kple lɔlɔ̃ si mieɖe fia le eƒe ŋkɔ la ta la be o.’—Heb. 6:10.

Ŋɔŋlɔawo ƒo nu tso “ahosi dahe aɖe” si anya kpe asi ɖe Mawu subɔsubɔdɔwo ŋu hena ƒe geɖe la ŋu. Esi Yesu kpɔe wònɔ “gaku sue eve, siwo ƒe home le sue ŋutɔ la” dem gbedoxɔ me nudzɔɖaka aɖe me la, ɖe wòbu ahosia kple eƒe nudzɔdzɔa siaa be asixɔxɔ aɖeke mele wo ŋu oa? Ao, ke boŋ ekafui le esi wòwɔ nu si wòate ŋui tsɔ do alɔ tadedeagu vavãtɔa ta.—Luka 21:1-4.

Ne míelé míaƒe fɔmaɖimaɖi me ɖe asi la, míate ŋu aka ɖe edzi be ƒomedodo si le mía kple Yehowa dome la anɔ dedie nu ka kee míaƒe blibomademade agblẽ le mía ŋu o, eɖanye le tsitsi alo lãmegbegblẽ gome, o. Mawu magblẽ eƒe nuteƒewɔlawo ɖi gbeɖe le esi nɔnɔme sesẽwo wɔe be womegate ŋu le geɖe wɔm le subɔsubɔdɔa me abe tsã ene o ko ta o.—Ps. 71:9, 17, 18.

Xɔ “Xɔxɔ Ƒe Gakuku La”

Alekee míate ŋu akpɔ mía ɖokuiwo ta be Satana ƒe alakpanyawo nagaflu mí o? Apostolo Paulo ŋlɔ bena: “Miyi edzi mianɔ ŋusẽ xɔm le Aƒetɔ la kple eƒe ŋutete ƒe ŋusẽ gã la me. Mido aʋawɔnu blibo si tso Mawu gbɔ la, bene miate ŋu anɔ te sesĩe ɖe Abosam ƒe aɖaŋu vɔ̃wo nu.” Gbɔgbɔmeʋawɔnu mawo dometɔ ɖekae nye “xɔxɔ ƒe gakuku la.” (Ef. 6:10, 11, 17) Be Satana ƒe alakpanyawo nagakpɔ ŋusẽ ɖe mía dzi o la, ele be míaxɔ gakuku ma ahaɖɔe ɣeawokatãɣi. Asrafo ƒe gakuku kpɔa eƒe ta ta. Míaƒe “xɔxɔ ƒe mɔkpɔkpɔ,” si nye kakaɖedzi si le mía si be ŋugbe siwo Mawu do ku ɖe eƒe ŋutikɔkɔexexe yeyea ŋu la ava eme la, akpɔ mía ta tso Satana ƒe ameblenyawo si me. (1 Tes. 5:8) Ehiã be míayi edzi anɔ ŋusẽ dom míaƒe mɔkpɔkpɔ ma to Ŋɔŋlɔawo sɔsrɔ̃ le mía ɖokui si veviedodotɔe me.

Satana lé fu Hiob hedze edzi tagbɔsesẽtɔe, gake Hiob do dzi. Hiob xɔ tsitretsitsi la dzi se ale gbegbe be ku ƒe ŋɔdzidoname gɔ̃ hã mete ŋu na dzi ɖe le eƒo o. Ke boŋ egblɔ na Yehowa be: “Àyɔm, eye matɔ na wò, ne wò asinudɔwɔwɔ ƒe nu le dzrowòm.” (Hiob 14:15) Ne ɖe Hiob ku le eƒe fɔmaɖimaɖi me léle ɖe asi ta gɔ̃ hã la, kakaɖedzi nɔ esi be lɔlɔ̃ si le Mawu si na esubɔla wɔnuteƒewo la aʋãe wòafɔ wo tso ku me.

Neva eme be míawo hã míaka ɖe Mawu vavã la dzi nenema ke. Yehowa ate ŋu aɖɔ nu ɖe sia ɖe si Satana kple edzidelawo agblẽ le mía ŋu la ɖo. Ðo ŋku edzi hã be, Paulo ka ɖe edzi na mí be: “Nyateƒetɔe Mawu nye, eye maɖe mɔ be woate mi kpɔ wu esi nu miate ŋu anɔ te ɖo o, ke hã, ne tetekpɔa va la, ana mɔ si dzi miato ado le eme la mi, bene miate ŋu ado dzi atsɔe.”—1 Kor. 10:13.

[Nɔnɔmetata si le axa 20]

Yehowa dea asixɔxɔ wò subɔsubɔ nuteƒewɔwɔtɔe la ŋu

[Nɔnɔmetata si le axa 21]

Xɔ xɔxɔ ƒe gakuku la, eye nàɖɔe ɣeawokatãɣi