Mía Tɔgbui Kukuwo Agava Nɔ Agbe Ake

ÐE MAWU ƒe Nya, Biblia, fia nu be amesiame yia agbenɔnɔ dzi le gbɔgbɔxexeame le ku megbea? Ao, mefia nenema o. Biblia ƒo nu tso agbenɔnɔ le ku megbe ƒe mɔkpɔkpɔ wɔnuku aɖe ŋu gake menye abe alesi ame geɖe buna be egblɔe ene o.

Bu nusi Biblia gblɔ le mía tɔgbui kuku gbãtɔ, Adam, ŋu kpɔ. Yehowa “tsɔ anyi mè” eyama. (Mose I, 2:7) Mɔnukpɔkpɔ nɔ Adam si be wòanɔ agbe tegbee le dzidzɔkpɔkpɔ me le anyigba dzi. (Mose I, 2:16, 17) Gake edze aglã ɖe Ewɔla lɔlɔ̃tɔ la ŋu, eye ku do tso eme nɛ.

Afikae Adam yi esi wòku? Mawu gblɔ nɛ be: “[Àgatrɔ] azu anyi, elabena eya mee woɖe wò tsoe. Anyi nènye, eye anyi ke nagatrɔ azu!”—Mose I, 3:19.

Afikae Adam nɔ hafi Yehowa tsɔ anyi mèe? Menɔ afi aɖeke o. Menɔ agbe o. Eyata esi Yehowa gblɔ be Adam ‘agatrɔ zu anyi’ la, nusi wòfia koe nye be Adam agayi ɖe agbemanɔmanɔ me, abe anyi ke ene. Adam ‘meyi xexe bubu me’ va zu tɔgbui kukuwo ƒe gbɔgbɔxexea gɔmeɖoanyila o. Meyi ɖe dzidzɔgbenɔnɔ me le dziƒo alo fukpekpe mavɔ me le funyafunyawɔƒe aɖeke hã o. Tɔtrɔ si va eŋu koe nye be etso agbenɔnɔ me yi ɖe agbemanɔmanɔ me, tso anyinɔnɔ me yi ɖe anyimanɔmanɔ me.

Ke amegbetɔƒomea me tɔ susɔeawo ya ɖe? Ðe Adam ƒe dzidzimeviwo hã meganɔa agbe le ku megbe oa? Biblia ɖo eŋu be: “Wo katã [amegbetɔ kple lãwo siaa] woyina teƒe ɖeka; anyi me wo katã wotso, eye anyi wo katã woagazu.”—Nyagblɔla 3:19, 20.

Nɔnɔme si Me Ame Kukuwo Le

Ẽ, agbe mele ame kukuwo me o, womete ŋu sea nu, kpɔa nu, ƒoa nu, alo bua tame o. Le kpɔɖeŋu me Biblia gblɔ be: “Agbagbeawo nyae be, yewogbɔna kuku ge, ke kukuawo menya naneke o . . . Woƒe amelɔlɔ̃ kple fuléle kpakple ŋuʋaʋã nu yi gbaɖegbe ke.” Biblia gagblɔ be: “Nuwɔwɔ alo tamebubu, sidzedze alo nunya mele tsiẽƒe, afisi yi ge nala o.”—Nyagblɔla 9:5, 6, 10.

Eyata Mawu ƒe Nya la gblɔ be ne amewo le agbe la, wonya be yewogbɔna kuku ge. Gake ne woku la, womeganya naneke o. Wometsia tre ɖe woƒe ŋutilã kukua gbɔ nɔa alesi wole ewɔmee teƒe kpɔm o. Vivisese alo vevesese, dzidzɔ alo nuxaxa mele agbemanɔmanɔ me o. Ame kukuwo menya be ɣeyiɣi va le yiyim o. Woƒe numanyamanya yi eme ʋĩ wu alɔ̃dɔdɔ ɖesiaɖe.

Hiob si nye Mawu subɔla le blemaɣeyiɣiwo me nya be amewo meyia edzi nɔa agbe le ku megbe o. Enya hã be ne Mawu mede asi eme o la, mɔkpɔkpɔ aɖeke megali be woagava nɔ agbe ake o. Hiob gblɔ be: “Ne ŋutsu ku la, emlɔa anyi drana ɖi, eye ne amegbetɔ mia nu la, afika wògale? Ne [emlɔ] anyi la, megafɔna o.” (Hiob 14:10, 12) Edze ƒã be Hiob mekpɔ mɔ be ne yeku la, yeayi tɔgbui kukuwo gbɔ le gbɔgbɔwo ƒe xexe aɖe me o.

Tsitretsitsi ƒe Mɔkpɔkpɔ La

Esi agbagbeawo meganɔa agbe le ku megbe o ta la, biabia vevi aɖee Hiob fɔ ɖe te esi wòyi edzi bia be: “Ne ŋutsu ku la, ɖe wògagbɔa agbea?” Hiob ŋutɔ ɖo eŋu ale: “Le nye aʋamenɔɣiwo [tsiẽƒenɔɣi] katã la manɔ asiɖeɖe le ŋunye lalam. [Wò Yehowa] àyɔm, eye matɔ na wò, ne wò asinudɔwɔwɔ ƒe nu le dzrowòm.”—Hiob 14:14, 15.

Ne míagagblɔe le mɔ bubu nu la, togbɔ be Hiob ayi ɖe agbemanɔmanɔ me hã la, Mawu maŋlɔe be o. Hiob xɔe se be ɣeyiɣi aɖe ava esime Yehowa Mawu ‘ayɔ ye’ yeagava nɔ agbe to tsitretsitsi me.

Yesu Kristo, Mawu ƒe Vi la, ɖee fia be Hiob ƒe mɔkpɔkpɔ na tsitretsitsia nye nu ŋutɔŋutɔ. Yesu ɖee fia be woate ŋu afɔ ame kukuwo ɖe tsitre. Alekee? To alesi wòfɔ amewo ɖe tsitree me! Yesu menɔ anyi afɔ Hiob ɖe tsitre o, gake esime wònɔ anyigba dzi la, efɔ ahosi aɖe si tso Nain-dua me ƒe viŋutsu ɖe tsitre. Yesu fɔ ŋutsu aɖe si woyɔ be Yairo vinyɔnu si xɔ ƒe 12 la hã ɖe tsitre. Eye efɔ xɔlɔ̃a Lazaro si ku ŋkeke ene la ɖe tsitre.—Luka 7:11-15; 8:41, 42, 49-56; Yohanes 11:38-44.

Tsɔ kpe ɖe nukunu siawo siwo Yesu wɔ ŋu la, eƒo nu tso etsɔ me tsitretsitsi wɔnuku aɖe hã ŋu. Egblɔ be: “Gaƒoƒo gbɔna, le esi me amesiwo katã le yɔdowo me la, woase eƒe gbe; eye . . . woado go.” (Yohanes 5:28, 29) Emegbe apostolo Paulo si dzi Yehowa to fɔ ɖekakpui aɖe ɖe tsitre hã ɖe eƒe dzixɔse ɖe etsɔ me tsitretsitsi aɖe me fia. Egblɔ be: “Mɔkpɔkpɔ . . . le asinye na Mawu . . . bena, tsitretsitsi li na ame dzɔdzɔewo kple ame madzɔmadzɔwo siaa.”—Dɔwɔwɔwo 20:7-12; 24:15.

Ŋɔŋlɔawo me nya siawo siwo ƒo nu tso etsɔ me tsitretsitsi ŋu la, meku ɖe agbenɔnɔ dzi yiyi le gbɔgbɔxexeame ŋu o. Wofia asi ɣeyiɣi si me ame kuku miliɔn geɖe atrɔ va agbe me le ŋutilã me le anyigba dzi afisia. Amesiawo siwo wofɔ ɖe tsitre la manye amesiwo maɖo ŋku woƒe tsãgbenɔnɔ le anyigba dzi la dzi o. Womagbugbɔ wo adzi woazu vidzĩwo o. Ke boŋ woakpɔtɔ anye amesiwo wonye hafi ku la ke, eye ŋkuɖoɖonudzi kple amenyenye ma ke anɔ wo si. Woadze si wo ɖokui eye ame bubuwo hã adze si wo. Dzidzɔ ka gbegbee nye si wòanye ne amesiawo va wɔ ɖeka kple woƒe xɔlɔ̃ kple ƒometɔwo! Eye aleke wòavivie nye si be míado go mía tɔgbui kukuwo!

Tsitretsitsi Yi Dziƒogbenɔnɔ Me

Ðe Yesu megblɔ be ame aɖewo ayi dziƒo oa? Ẽ, egblɔe. Egblɔ le fiẽ si do ŋgɔ na ewuwu me be: “Fofonye ƒe me la nɔƒe geɖewo li; . . . meyina, be madzra teƒe ɖo ɖi na mi. Eye ne meyi, eye medzra teƒe ɖo ɖi na mi la, magava, eye maxɔ mi ɖe nye ŋutɔ gbɔnye, bena afisi nye la mele la, miawo hã mianɔ afima.” (Yohanes 14:2, 3) Yesu ƒe apostolo nuteƒewɔlawoe wònɔ nu ƒom na, gake eƒe nyawo mefia be ame nyuiwo katã ayi dziƒo o.

Yesu ɖee fia be ele be amesiwo woafɔ yi dziƒo la naɖo nudidiwo gbɔ tsɔ wu be woanɔ agbe nyui ko. Nudidi ɖekae nye be Yehowa kple eƒe tameɖoɖowo ŋuti sidzedze vavãtɔ nasu wo si. (Yohanes 17:3) Nudidi bubue nye be woaxɔ Yesu Kristo ƒe tafevɔsa la dzi ase eye woaɖo to Mawu. (Yohanes 3:16; Yohanes I, 5:3) Nudidi bubu hãe nye be ‘woagbugbɔ wo adzi’ woazu Kristotɔ xɔnyɔnyrɔ̃ siwo wotsɔ Mawu ƒe gbɔgbɔ kɔkɔe si ami na. (Yohanes 1:12, 13; 3:3-6) Nu bubu si hã wogadi hena dziƒogbenɔnɔe nye be woado dzi abe alesi Yesu do dzii ene, ahawɔ nuteƒe na Mawu vaseɖe ku me.—Luka 22:29; Nyaɖeɖefia 2:10.

Nane tae wobia nudidi kɔkɔ siawo tso wo si ɖo. Dɔ vevi aɖe li amesiwo wofɔ yi dziƒo la awɔ. Yehowa nya be amegbetɔ dziɖuɖuwo mate ŋu akpɔ anyigba dzi nyawo gbɔ dzidzedzetɔe o. Eyata ewɔ ɖoɖo ɖe dziƒo dziɖuɖu, alo Fiaɖuƒe aɖe, si aɖu ameƒomea dzi ŋu. (Mateo 6:9, 10) Yesue anye Fiaɖuƒe ma ƒe Fia. (Daniel 7:13, 14) Ame aɖewo siwo wotia tso anyigba dzi siwo wofɔ yi dziƒo la aɖu dzi kpakplii. Biblia gblɔ ɖi be amesiawo siwo wofɔ ɖe tsitre la ava zu “fiawo kple nunɔlawo na míaƒe Mawu, eye woaɖu fia [ɖe] anyigba la dzi.”—Nyaɖeɖefia 5:10.

Ame gbogbo aɖewoe aɖo nudidiawo gbɔ be woafɔ wo ayi dziƒoa? Ao. Amesiwo dɔ alɔ̃ le ku me la dometɔ akpa gãtɔ medze o, gake menye woƒe vodada wònye o. Mɔnukpɔkpɔ vi aɖe koe su wo dometɔ geɖe si be woasrɔ̃ nu tso Yehowa kple eƒe tameɖoɖowo ŋuti nyateƒea ŋu, alo ɖeke kura mesu wo si o. Wonɔ agbe heku Yesu Kristo alo Mawu ƒe Fiaɖuƒea ŋuti sidzedze aɖeke manɔmee.

Yesu yɔ amesiwo ayi dziƒo la be “ha sue.” (Luka 12:32) Emegbe woɖee fia be amesiwo “woƒle tso anyigba dzi” be woaɖu fia kple Kristo le dziƒo la ƒe xexlẽme anye ame 144,000. (Nyaɖeɖefia 14:1-3; 20:6) Togbɔ be ame 144,000 nye xexlẽme si sɔ gbɔ ayɔ ‘nɔƒe geɖe’ siwo ŋu nya Yesu gblɔ hã la, ele sue ne míetsɔe sɔ kple ame biliɔn geɖe siwo do tso Adam me.—Yohanes 14:2.

Nusiwo Adzɔ Do Ŋgɔ na Anyigba Dzi Tsitretsitsi La

Mina míato nusiwo me míedzro vaseɖe fifia la me. Biblia gblɔ be, amesiwo ku la megale agbe o vaseɖe esime Yehowa Mawu afɔ wo ɖe tsitre. Wofɔa ame aɖewo wova nɔa agbe le dziƒo afisi woaɖu fia kple Yesu Kristo le le Fiaɖuƒedziɖuɖua me. Woafɔ ame akpa gãtɔ ɖe tsitre le anyigba dzi be woava zu Fiaɖuƒe ma teviwo.

Yehowa ato anyigba dzi tsitretsitsia me ana eƒe tameɖoɖo na anyigba sia ƒe akpa aɖe nava eme. Ðe Yehowa wɔe be “woanɔ edzi.” (Yesaya 45:18) Ewɔe be wòanye ameƒomea ƒe aƒe ɖaa. Eyata hakpala la dzi ha be: “Dziƒo enye dziƒo na Yehowa, ke etsɔ anyigba na amegbetɔviwo.”—Psalmo 115:16.

Ele be tɔtrɔ gãwo nava hafi woadze egɔme afɔ amewo ɖe tsitre be woava nɔ agbe le anyigba dzi. Ðewohĩ àlɔ̃ ɖe edzi be menye Mawu ƒe tameɖoɖoe wònye be aʋawɔwɔ, ɖiƒoƒo, nuvlowɔwɔ, kple ʋunyaʋunyawɔwɔ nayɔ anyigba dzi o. Amesiwo medea bubu aɖeke Mawu kple eƒe se dzɔdzɔeawo ŋu o ye hea kuxi siawo vɛ. Eyata Mawu ƒe Fiaɖuƒea ‘atsrɔ̃ amesiwo gblẽa anyigba la’—afɔɖeɖe gã aɖe le eƒe lɔlɔ̃nu hehe va anyigba dzi me. (Nyaɖeɖefia 11:18) Fiaɖuƒea atsrɔ̃ ame vɔ̃ɖiwo katã, eye wòasusɔ ame dzɔdzɔewo be woanɔ agbe le anyigba dzi tegbee.—Psalmo 37:9, 29.

Paradiso le Anyigba Dzi

Amesiwo woafɔ ɖe anyigba si ŋu wokɔ dzi la anye ame fatu siwo tsɔa ɖe le eme na ame hewɔa nu nyui. (Tsɔe sɔ kple Mateo 5:5.) Woanɔ agbe akpɔ dzidzɔ le dedienɔnɔ me le Mawu ƒe Fiaɖuƒea ƒe dzikpɔkpɔ lɔlɔ̃tɔe te. Biblia ƒo nu tso nɔnɔme wɔnuku siwo anɔ anyi ɣemaɣi ŋu ale: “Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:4.

Ẽ, woatrɔ anyigba la wòazu paradiso. (Luka 23:43) Bu nusi ema afia ŋu kpɔ! Kɔdziwo kple ame tsitsiwo dzi kpɔƒewo maganɔ anyi o. Ŋusẽ agaɖo amesiwo ŋu amegã alo nyagã kuku gblẽ nu le la ŋu eye woƒe lãme agasẽ ake le Paradiso me. (Hiob 33:25; Yesaya 35:5, 6) Kuteƒewo, ameɖiƒewo, kple yɔdodzikpewo maganɔ anyi o. Yehowa ato eƒe Fiaɖuƒea dzi “ami ku saɖagatsi tegbee.” (Yesaya 25:8) Nyateƒee, yayra siawo ana agbe yeye mía kple mía tɔgbui kukuwo.

[Nɔnɔmetata si le axa 7]

Amesiwo woafɔ ɖe tsitre le anyigba dzi anye Fiaɖuƒea teviwo