Yesu Kristo—Amesi Dzi Mi̇́ato Adze Si Mawu — Gbetakpɔxɔ INTERNET DZI AGBALẼDZRAƉOƑE

Ta 4

Yesu Kristo—Amesi Dzi Mi̇́ato Adze Si Mawu

1, 2. Aleke xexeamesubɔsubɔhawo gblẽ nu le safui si kplɔa ame yia sidzedze Mawu gbɔ ŋui?

ÈTSI TRE ɖe wò xɔmɔnu nɔ wò safuiwo me tsam. Vuvɔ nɔ wɔwɔm eye viviti do, eye nèdi be yeage ɖe xɔa me kaba—gake safuia mete ŋu le ʋɔa ʋum o. Ewɔ abe safuia koe nye ma hafi, gake ʋɔa gbe ʋuʋu. Ati wò ŋutɔ! Ègalé ŋku ɖe wò safuiawo ŋu. Eya tututue nye ma zãm nèlea? Ðe ame aɖe gblẽ nane le safuia ŋua?

² Kpɔɖeŋu sia sɔ na nusi xexe sia me subɔsubɔhawo ƒe tɔtɔ wɔ le sidzedze Mawu ŋu. Le nyateƒe me la, wo dometɔ geɖe wɔ dzaa va gblẽ nu le safui si ʋua eƒe gɔmesese na mí ŋu—esi nye Yesu Kristo. Subɔsubɔha aɖewo ɖe safuia ɖa, esi wogbe Yesu kura. Bubuwo tɔtɔ ɖoƒe si Yesu le la, esi wodea ta agu nɛ abe Mawu Ŋusẽkatãtɔ ene. Le go evea siaa me la, wotu sidzedze Mawu ɖe mía nu elabena womena Yesu Kristo, ame vevi sia ŋuti gɔmesese vavãtɔ su mía si o.

3. Nukatae míate ŋu ayɔ Yesu be enye sidzedze Mawu ƒe safui?

³ Àɖo ŋku edzi be Yesu gblɔ be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Menye ɖe Yesu nɔ eɖokui dom ɖe dzi esi wògblɔ nya sia o. Ŋɔŋlɔawo te gbe ɖe Kristo ŋuti sidzedze vavãtɔ dzi zi geɖe. (Efesotɔwo 4:13; Kolosetɔwo 2:2; Petro II, 1:8; 2:20) Apostolo Petro gblɔ be: “[Yesu Kristo] ŋuti nyagblɔɖilawo katã ɖi ɖase le.” (Dɔwɔwɔwo 10:43) Eye apostolo Paulo ŋlɔ be: “[Yesu] me woɣla nunya kple sidzedze ƒe kesinɔnuwo katã ɖo.” (Kolosetɔwo 2:3) Paulo gblɔ gɔ̃ hã be Yesu tae Yehowa ƒe ŋugbedodowo katã ava eme ɖo. (Korintotɔwo II, 1:20) Eyata Yesu Kristo nye amesi le abe safui si tututu ʋua sidzedze Mawu ƒe ʋɔ na ame ene. Mele be nufiafia totro aɖeke natɔtɔ míaƒe sidzedze Yesu ƒe nɔnɔme alo teƒe si wòle le Mawu ƒe tameɖoɖowo me o. Gake nukatae Yesu yomedzelawo bunɛ be eyae le teƒe vevitɔ le Mawu ƒe tameɖoɖowo me?

MESIA SI ƑE ŊUGBE WODO

4, 5. Mɔkpɔkpɔ kawoe wotu ɖe Mesia la dzi, eye aleke Yesu ƒe nusrɔ̃lawo bu eyamae?

⁴ Tso nuteƒewɔla Abel ƒe ŋkekeawo me ke la, Mawu subɔlawo kpɔ mɔ na Dzidzimevi si ƒe ŋugbe Yehowa Mawu ŋutɔ do la ƒe vava vevie. (Mose I, 3:15; 4:1-8; Hebritɔwo 11:4) Woɖee fia be Dzidzimevi si awɔ Mawu ƒe tameɖoɖo dzi la anye Mesia, si gɔmee nye “Amesiamina.” “[Atsi] nuvɔ̃ nu,” eye wogblɔ eƒe Fiaɖuƒe ƒe ŋutikɔkɔe ŋu nyawo ɖe psalmowo me. (Daniel 9:24-26; Psalmo 72:1-20) Amekae ava nye Mesia la?

⁵ Kpɔ dzidzɔ gã si wòanye na Yudatɔ ɖekakpui si ŋkɔe nye Andrea esime wòse Yesu Nazaretetɔ la ƒe nyawo ɖa. Andrea ƒu du yi ɖe nɔvia Simon Petro gbɔ va gblɔ nɛ be: “Míekpɔ Mesia la.” (Yohanes 1:41) Yesu ƒe nusrɔ̃lawo ka ɖe edzi be eyae nye Mesia si ƒe ŋugbe wodo. (Mateo 16:16) Eye Kristotɔ vavãtɔwo lɔ̃ faa be yewoatsɔ yewoƒe agbe ake ɖe dzixɔse si nye be Yesue nye Mesia, alo Kristo, si ƒe ŋugbe wodo la ta. Kpeɖodzi kae nɔ wo si? Mina míalé ŋku ɖe eƒe kpeɖodzi etɔ̃ ŋu kpɔ.

YESU ƑE MESIANYENYE ŊUTI KPEÐODZIWO

6. (a) Ƒome ka mee Dzidzimevi si ŋugbe wodo la adzɔ tso, eye aleke míewɔ nya be ƒome ma mee Yesu dzɔ tso? (b) Nukatae amesiwo nɔ agbe le ƒe 70 M.Ŋ. megbe dometɔ aɖeke mate ŋu aɖo kpe edzi be yee nye Mesia la o?

⁶ Ƒome si me Yesu dzɔ ɖo la nye gɔmeɖokpe gbãtɔ si fia be eyae nye Mesia si ƒe ŋugbe wodo la. Yehowa gblɔ na Eƒe subɔla Abraham be Dzidzimevia atso eƒe ƒomea me. Abraham vi Isak, Isak vi Yakob, kple Yakob vi Yuda, wo dometɔ ɖesiaɖe xɔ ŋugbedodo ma tɔgbe ke. (Mose I, 22:18; 26:2-5; 28:12-15; 49:10) Le ƒe alafa geɖe megbe la, wona ƒome si me Mesia la adzɔ tso dze nyuie wu esime wogblɔ na Fia Dawid be eƒe ƒomea mee Amesia adzɔ tso. (Psalmo 132:11; Yesaya 11:1, 10) Mateo kple Luka ƒe Nyanyuiawo me nuŋlɔɖiwo ɖo kpe edzi be dzidzime si to ƒome ma me mee Yesu dzɔ tso. (Mateo 1:1-16; Luka 3:23-38) Togbɔ be futɔ vɔ̃ɖi geɖe nɔ Yesu ŋu hã la, wo dometɔ aɖeke meke ɖi le ƒome si me wòdzɔ tso si ŋu nya woŋlɔ eye ame geɖe nya la ŋu o. (Mateo 21:9, 15) Eyata eme kɔ ƒã be womate ŋu ake ɖi aɖeke le dzidzime si me wòtso la ŋu o. Gake wogblẽ Yudatɔwo ƒe dzidzimenuŋlɔɖiwo dome esime Romatɔwo ha Yerusalem le ƒe 70 M.Ŋ. me. Le nudzɔdzɔ sia megbe la, ame aɖeke magate ŋu aɖo kpe edzi gbeɖe be yee nye Mesia la o.

7. (a) Nukae nye kpeɖodzi evelia si fia be Yesue nye Mesia la? (b) Aleke Mixa 5:1 va eme le Yesu gomee?

⁷ Nyagblɔɖiwo ƒe emevava nye kpeɖodzi evelia. Hebri Ŋɔŋlɔawo me nyagblɔɖi geɖe ɖɔ Mesia la ƒe agbenɔnɔ ƒe akpa vovovowo. Le ƒe alafa enyilia D.M.Ŋ. me la, nyagblɔɖila Mixa gblɔe ɖi be du tsɛ si nye Betlexem mee woadzi dziɖulagã sia le. Du evee nɔ Israel woyɔna be Betlexem, gake nyagblɔɖi sia gblɔ wo dometɔ si wòanye: Betlexem Efrata, afisi wodzi Fia Dawid le. (Mixa 5:1) Nazaret si ƒe didime anye kilometa 150 tso Betlexem le eƒe anyiehekpa dzie Yosef kple Maria, Yesu dzilawo, nɔ. Gake esime Maria fɔ fu la, Roma-fia Kaisaro Augusto de se be amesiame neyi ɖaŋlɔ ŋkɔ le wo de.a Eyata Yosef kplɔ srɔ̃a funɔ la yi Betlexem, afisi wodzi Yesu ɖo.—Luka 2:1-7.

8. (a) Ɣekaɣie “kwasiɖa” 69 la dze egɔme, eye nudzɔdzɔ kae wòtsɔ dze egɔmee? (b) Ɣeyiɣi didi kae “kwasiɖa” 69 la xɔ, eye nukae dzɔ esime wòwu enu?

⁸ Le ƒe alafa adelia D.M.Ŋ. me la, nyagblɔɖila Daniel gblɔe ɖi be ‘Mesia, Kplɔla la’ ado le ɣeyiɣi si wode se be woagbugbɔ Yerusalem atso ƒe “kwasiɖa” 69 megbe. (Daniel 9:24, 25) “Kwasiɖa” siawo dometɔ ɖesiaɖe ƒe didimee nye ƒe adre.b Biblia kple xexemeŋutinya gblɔ be ƒe 455 D.M.Ŋ. mee wode se be woagatso Yerusalem. (Nexemya 2:1-8) Eyata Mesia la ado le ƒe 455 D.M.Ŋ. ƒe ƒe 483 (69 teƒe 7) megbe. Ema kplɔ mí va ƒe 29 M.Ŋ. me, ƒe si tututu me Yehowa tsɔ gbɔgbɔ kɔkɔe si ami na Yesu. Esia wɔe be Yesu zu “Kristo” (si gɔmee nye “Amesiamina”), alo Mesia.—Luka 3:15, 16, 21, 22.

9. (a) Aleke Psalmo 2:2 va emee? (b) Nyagblɔɖi bubu siwo va eme le Yesu me dometɔ aɖewo ɖe? (Kpɔ aɖaka la me nyawo.)

⁹ Nyateƒee, menye amesiamee xɔ Yesu be eyae nye Mesia si ƒe ŋugbe wodo la o, eye Ŋɔŋlɔawo gblɔe ɖi alea. Abe alesi woŋlɔe ɖe Psalmo 2:2 ene la, Mawu ƒe gbɔgbɔ ʋã Fia Dawid wògblɔ ɖi be: “Anyigba dzi fiawo tso, eye amegãwo ƒo takpli ɖe adaŋu me ɖe Yehowa kple eƒe amesiamina ŋu.” Nyagblɔɖi sia fia be fiawo atso du geɖe me awɔ ɖeka atsi tre ɖe Yehowa ƒe Amesiamina, alo Mesia, la ŋu. Eye nenema tututue wòdzɔe. Yudatɔwo ƒe subɔsubɔhakplɔlawo, Fia Herodes, kple Roma-mɔ̃mefia Pontio Pilato, wo katã ƒe asi nɔ eme wowu Yesu. Tso ɣemaɣi dzi la, Herodes kple Pilato, amesiwo nye futɔwo tsã la va zu xɔlɔ̃ siwo dome tsi metona o. (Mateo 27:1, 2; Luka 23:10-12; Dɔwɔwɔwo 4:25-28) Taflatse kpɔ aɖaka si ƒe tanyae nye “Mesia la Ŋuti Nyagblɔɖi Ðedzesi Aɖewo” be nàkpɔ nu bubu siwo ɖo kpe edzi be Yesue nye Mesia la.

10. Mɔ kawo nue Yehowa ɖi ɖase le be Yesue nye yeƒe Amesiamina si ŋugbe yedo la?

¹⁰ Yehowa Mawu ƒe ɖaseɖiɖi ye nye kpeɖodzi etɔ̃lia si fia Yesu ƒe Mesianyenye. Yehowa dɔ mawudɔlawo ɖa be woana amewo nanya be Yesue nye Mesia si ŋugbe wodo. (Luka 2:10-14) Le nyateƒe me, le Yesu ƒe anyigbadzigbenɔnɔ me la, Yehowa ŋutɔ ƒo nu tso dziƒo gblɔ be yekpɔ ŋudzedze ɖe Yesu ŋu. (Mateo 3:16, 17; 17:1-5) Yehowa Mawu na ŋusẽ Yesu be wòatsɔ awɔ nukunuwoe. Nukunu siawo dometɔ ɖesiaɖe ganye kpeɖodzi bubu tso Mawu gbɔ be Yesue nye Mesia la, elabena Mawu mana ŋusẽ ameflula aɖeke be wòatsɔ awɔ nukunui gbeɖe o. Yehowa zã gbɔgbɔ kɔkɔe hã tsɔ ʋã amewo woŋlɔ Nyanyuiawo me nudzɔdzɔwo ɖi, ale be Yesu ƒe Mesianyenye ŋuti kpeɖodziwo va zu Biblia, agbalẽ si gɔme woɖe hemã wu le ŋutinya katã me, ƒe akpa aɖe.—Yohanes 4:25, 26.

11. Kpeɖodzi nenie li be Yesu ye nye Mesia si ƒe ŋugbe wodo?

¹¹ Le wo katã me la, nudzɔdzɔ alafa geɖe le kpeɖodzi ƒe hatsotso siawo me siwo ɖee fia be Yesue nye Mesia si ƒe ŋugbe wodo. Eyata eme kɔ ƒã be esɔ be nyateƒe Kristotɔwo bunɛ ‘amesi ŋu nyagblɔɖilawo katã ɖi ɖase le’ kple amesi nye sidzedze Mawu ƒe safui. (Dɔwɔwɔwo 10:43) Gake nu geɖe gali míasrɔ̃ le Yesu Kristo ŋu wu eƒe Mesianyenye la ko. Afikae wòdzɔ tso? Nɔnɔme ka mee wònɔ?

YESU ƑE ANYINƆNƆ DO ŊGƆ NA EƑE AMEGBETƆZUZU

12, 13. (a) Aleke míewɔ nya be Yesu nɔ dziƒo kpɔ hafi va anyigba dzi? (b) Amekae nye “Nya la,” eye nukae wòwɔ do ŋgɔ na eƒe amegbetɔzuzu?

¹² Míate ŋu amã Yesu ƒe agbenɔnɔ ɖe akpa gã etɔ̃ me. Gbãtɔ dze egɔme ɣeyiɣi didi aɖe hafi woava dzii ɖe anyigba dzi. Mixa 5:1 gblɔ be Mesia la dzɔ “tso tititi gbaɖegbe ʋĩ ke.” Eye Yesu gblɔe, meɣlae o, be “dziƒo” yetso. (Yohanes 8:23; 16:28) Ɣeyiɣi didi kae wònɔ dziƒo hafi va anyigba dzi?

¹³ Woyɔ Yesu be Mawu ƒe “tenuvi” elabena Yehowa wɔe tẽ. (Yohanes 3:16) Esi Yesu nye “nuwɔwɔwo katã ƒe ŋgɔgbevi” ta la, Mawu zãe le nu bubuwo katã wɔwɔ me. (Kolosetɔwo 1:15; Nyaɖeɖefia 3:14) Yohanes 1:1 gblɔ be “Nya la” (Yesu le eƒe anyinɔnɔ do ŋgɔ na amegbetɔzuzu me) nɔ anyi kple Mawu “le gɔmedzedzea me.” Eyata Nya la nɔ anyi kple Yehowa esime wowɔ “dziƒo kple anyigba.” Nya lae Mawu nɔ nu ƒom na esime Wògblɔ be: ‘Na míawɔ ame ɖe míaƒe nɔnɔme nu.’ (Mose I, 1:1, 26) Eye Nya la kokokoe anye Mawu ƒe “dɔnunɔla” lɔlɔ̃tɔ si ŋu woƒo nu le le Lododowo 8:22-31 abe nunya si wobu amee ene, eye enɔ Yehowa gbɔ wɔ dɔ kplii le nuwo katã wɔwɔ me. Esi Yehowa wɔ Nya la vɔ megbe la, enɔ Mawu gbɔ le dziƒo ɣeyiɣi didi aɖe si míenya o hafi va zu amegbetɔ le anyigba dzi.

14. Nukatae woyɔ Yesu be “Mawu makpɔmakpɔ ƒe nɔnɔme”?

¹⁴ Eyata mele be wòawɔ nuku na mí be Kolosetɔwo 1:15 yɔ Yesu be “Mawu makpɔmakpɔ ƒe nɔnɔme” o! Le ƒe gbogbo siwo Vi ɖoto sia tsɔ nɔ anyi kplikplikpli kple Fofoa Yehowa me la, eva zu abe eya tututu ene. Esia hã ganye nu bubu si tae Yesu nye ame vevi si dzi míato adze si Mawu ɖo. Nusiwo katã Yesu wɔ le eƒe anyigbadzinɔɣi la, ne ɖe Yehowa ŋutɔ hã nɔ anyigba dzi la, anye nenema tututue wòawɔ woe. Eyata Yesu nyanya fia hã be míele míaƒe sidzedze Yehowa dzim ɖe edzi. (Yohanes 8:28; 14:8-10) Eyata eme kɔ ƒã be ehiã vevie be míasrɔ̃ nu geɖe tso Yesu Kristo ŋu.

YESU ƑE ANYIGBADZIGBENƆNƆ

15. Aleke wowɔ dzi Yesu wònye vi deblibo?

¹⁵ Yesu ƒe agbenɔnɔ ƒe akpa eveliae nye esime wònɔ anyigba dzi afisia. Elɔ̃ faa bɔbɔ eɖokui esime Mawu trɔ eƒe agbe tsɔ de Yuda-ɖetugbi nɔaƒe si ŋkɔe nye Maria ƒe vidzidɔ me. Yehowa ƒe gbɔgbɔ kɔkɔe, alo dɔwɔŋusẽ, triakɔ la ‘do vɔvɔli’ ɖe Maria dzi, si na be wòfɔ fu va dzi vi deblibo. (Luka 1:34, 35) Yesu menyi blibomademade aɖeke ƒe dome o, elabena Teƒe debliboe eƒe agbe dzɔ tso. Wonyii le aƒe dahe aɖe me abe atikpala Yosef si xɔe nyi ƒe vi ene eye eyae nye vi gbãtɔ le ƒome ma si me ɖevi geɖe va nɔ la me.—Yesaya 7:14; Mateo 1:22, 23; Marko 6:3.

16, 17. (a) Afikae Yesu kpɔ ŋusẽ tsoe tsɔ wɔ nukunuwo, eye nukunu siwo wòwɔ dometɔ aɖewo ɖe? (b) Nɔnɔme siwo Yesu ɖe fia dometɔ aɖewo ɖe?

¹⁶ Yesu ƒe ɖokuitsɔtsɔna Yehowa Mawu bliboe dze xoxo le eƒe ƒe 12 xɔxɔ me. (Luka 2:41-49) Le Yesu ƒe tsitsime kple eƒe subɔsubɔdɔa gɔmedzedze le ƒe 30 xɔxɔ me la, eɖe lɔlɔ̃ deto si le eme na ehavi amegbetɔwo hã fia. Esime Mawu ƒe gbɔgbɔ kɔkɔe do ŋusẽe be wòawɔ nukunuwo la, etsɔ veveseseɖeamenu da dɔ na dɔnɔwo, lãmetututɔwo, nuwɔametɔwo, ŋkuagbãtɔwo, tokunɔwo, anyidzelawo. (Mateo 8:2-4; 15:30) Yesu na nuɖuɖu dɔwuitɔ akpe geɖewo. (Mateo 15:35-38) Etsi ahomya si do ŋɔdzi na exɔlɔ̃wo ƒe agbe nu. (Marko 4:37-39) Le nyateƒe me la, efɔ ame kukuwo gɔ̃ hã ɖe tsitre. (Yohanes 11:43, 44) Kpeɖodzi blibo le nukunu siawo ŋu be wonye ŋutinya me nudzɔdzɔwo ŋutɔŋutɔ. Yesu ƒe futɔwo ke hã lɔ̃ ɖe edzi be ‘ewɔ dzesi geɖewo.’—Yohanes 11:47, 48.

¹⁷ Yesu tsa le wo denyigba katã dzi fia nu amewo le Mawu Fiaɖuƒea ŋu. (Mateo 4:17) Eɖo dzigbɔgbɔ blewu kple nugɔmesesename ƒe kpɔɖeŋu kɔkɔtɔ kekeake hã ɖi. Esime eƒe nusrɔ̃lawo gblẽe ɖi gɔ̃ hã la, egblɔ veveseseɖeamenutɔe be: “Gbɔgbɔ la le lɔlɔ̃m, gake ŋutilã la gbɔdzɔ.” (Marko 14:37, 38) Gake Yesu ƒoa nu dzideƒotɔe eye wògblɔa nya siwo le tẽ na amesiwo daa nyateƒea ɖe anyi eye wotea wɔnamanɔŋuitɔwo ɖe to. (Mateo 23:27-33) Ƒo wo katã ta la, esrɔ̃ Fofoa ƒe lɔlɔ̃ kpɔɖeŋu la. Yesu lɔ̃ kura gɔ̃ hã be yeaku bene etsɔme mɔkpɔkpɔ nasu ameƒome madeblibo la si. Eyata mewɔ nuku be míayɔ Yesu be enye amesi dzi míato adze si Mawu, alo sidzedze sia ƒe safui o! Nyateƒee, eyae nye safui gbagbe la! Gake nukata míele eyɔm be safui gbagbe ɖo? Esia kplɔ mí va eƒe agbenɔnɔ ƒe akpa etɔ̃lia gbɔ.

ÐOƑE SI YESU LE FIFIA

18. Aleke wòle be míabu Yesu Kristoe egbea?

¹⁸ Togbɔ be Biblia gblɔ Yesu ƒe ku ŋu nya hã la, ele agbe fifia! Le nyateƒe me, ame alafa geɖe siwo nɔ anyi le ƒe alafa gbãtɔ M.Ŋ. me kpɔ eƒe tsitretsitsi ƒe nyateƒenyenye teƒe. (Korintotɔwo I, 15:3-8) Abe alesi wogblɔe ɖi ene la, eva bɔbɔ nɔ Fofoa ƒe nuɖusime le ema megbe eye wònɔ lalam be yeaxɔ fiaɖuƒeŋusẽ le dziƒo. (Psalmo 110:1; Hebritɔwo 10:12, 13) Eyata aleke wòle be míabu Yesui egbea? Ðe wòle be míabui vidzĩ kokoe si le lãwo ƒe nuɖunu mea? Alo abe ame aɖe si le veve sem helĩhelĩ si woyina wuwu ge enea? Kura o. Fia triakɔ aɖe si le dzi ɖum ye wònye! Eye eteƒe magadidi kura o, aɖe eƒe fianyenyea afia le míaƒe anyigba sia si dzi xaxawo bɔ ɖo fũ la dzi.

19. Afɔ kae Yesu aɖe kpuie?

¹⁹ Wogblɔ nya siwo me kɔ nyuie le Fia Yesu Kristo ŋu le Nyaɖeɖefia 19:11-15 be egbɔna kple ŋusẽ gã be yeava tsrɔ̃ ame vɔ̃ɖiwo. Aleke gbegbe Dziƒofia lɔ̃ame sia adi be yeahe fukpekpe siwo le fu ɖem na ame miliɔn geɖe egbea la ava nuwuwui enye esi! Eye nenema ke wòdi vevie be yeakpe ɖe amesiwo le agbagba dzem be yewoasrɔ̃ eƒe kpɔɖeŋu delibo si wòɖo le anyigba dzi la hã ŋui. (Petro I, 2:21) Edi be yeakpɔ wo ta le “Mawu, ŋusẽkatãtɔ la, ƒe ŋkeke gã la ƒe aʋawɔwɔ,” si míelɔ̃a yɔyɔ be Harmagedon, si le aƒe tum kabakaba la me, ale be woanye Mawu ƒe Dziƒofiaɖuƒea tevi siwo ate ŋu anɔ agbe tegbee le anyigba dzi.—Nyaɖeɖefia 7:9, 14; 16:14, 16.

20. Nukae Yesu awɔ na ameƒomea le eƒe Ƒe Akpe Ðeka Dziɖuɖua me?

²⁰ Le Yesu ƒe Ƒe Akpe Ðeka Dziɖuɖu si ƒe nya wogblɔ ɖi me la, awɔ nukunuwo na ameƒomea katã. (Yesaya 9:5, 6; 11:1-10; Nyaɖeɖefia 20:6) Yesu ada dɔlélewo katã eye wòaɖe ku ɖa. Afɔ ame kuku biliɔn geɖe ɖe tsitre bene mɔnukpɔkpɔ nasu woawo hã si be woanɔ agbe mavɔ le anyigba dzi. (Yohanes 5:28, 29) Anye dzidzɔ gã aɖe na wò be nàsrɔ̃ nu le eƒe Mesia Fiaɖuƒea ŋu le ta aɖe si le ŋgɔ me. Ka ɖe nya sia dzi: Míate ŋu akpɔ alesi míaƒe agbe awɔ nukui le Fiaɖuƒea ƒe dziɖuɖu te la le susu me gɔ̃ hã o. Aleke gbegbe wòle vevie be míanya Yesu Kristo ɖe edzi nyuie enye si! Ẽ, ele vevie be míaƒe ŋku nagadzo le Yesu, ame vevi si dzi sidzedze Mawu si kplɔa ame yia agbe mavɔ mee to, dzi gbeɖe o.

[Etenuŋɔŋlɔwo]

a Ŋkɔŋɔŋlɔ sia na adzɔxɔxɔ va nɔ bɔbɔe na Roma Fiaɖuƒea wu. Eyata Augusto na nyagblɔɖi si ku ɖe fia aɖe si ana ‘nudzɔdzɔxɔla natsa le fiaɖuƒea katã me’ la va eme le eya ŋutɔ ƒe manyamanya me. Nyagblɔɖi sia ke gblɔe ɖi be ‘woatsrɔ̃ nubabla ƒe Ŋgɔnɔla’ alo Mesia la le amesi axɔ ɖe fia sia teƒe ƒe ŋkekewo me. Tiberio, amesi xɔ ɖe Augusto teƒe ƒe dziɖuɣie wowu Yesu.—Daniel 11:20-22.

b Blema Yudatɔwo lɔ̃a ɣeyiɣi bubu le ƒewo ƒe kwasiɖawo me. Le kpɔɖeŋu me, abe alesi ŋkeke adrelia ɖesiaɖe nyea Sabat ŋkeke ene la, ƒe adrelia ɖesiaɖe hã nyea Sabat ƒe.—Mose II, 20:8-11; 23:10, 11.

DO WÒ SIDZEDZE KPƆ

Aleke ƒome si me Yesu dzɔ tso la ɖo kpe nya si wògblɔ be yee nye Mesia la dzii?

Mesia ŋuti nyagblɔɖi siwo va eme le Yesu me la dometɔ aɖewo ɖe?

Aleke Mawu ɖee fia tẽe be Yesue nye yeƒe Amesiamina la?

Nukatae Yesu nye Mawu ŋuti sidzedze ƒe safui gbagbe?

[Nyaɖoɖo si le 37]

MESIA LA ŊUTI NYAGBLƆÐI ÐEDZESI AÐEWO

NYAGBLƆÐI NUDZƆDZƆ EMEVAVA

EƑE ÐEVIMEGBENƆNƆ

Yesaya 7:14 Ðetugbi nɔaƒee dzii Mateo 1:18-23

Yeremya 31:15 Wowu vidzĩwo le eƒe Mateo 2:16-18

dzidzi megbe