Aleke Agbea Wɔ Va Dzɔ?

‘Mawu gbɔe agbe dzɔ tso.’ (Psalmo 36:9) Ðe nèxɔ nya ma dzi sea? Ame aɖewo susu be ɖeko nu gbagbewo dzɔ le wo ɖokui si, eye menye ame aɖekee wɔ wo o. Ne nya ma nye nyateƒe la, ke efia be menye susu aɖeke tae míeli ɖo o; nudogoɖenunue wɔe be míeva dzɔ. Gake ne Yehowa Mawu gbɔe agbe dzɔ tso la, ke efia be, tameɖoɖo aɖe koŋ tae wòwɔ mí ɖo, alo?a Le nusɔsrɔ̃ sia me la, àkpɔ nya si Biblia gblɔ tso ale si nu gbagbewo wɔ va dzɔ ŋu kple susu nyui siwo tae míate ŋu axɔ nya si Biblia gblɔ la dzi ase.

1. Aleke anyigba kple xexe gbahooa wɔ va dzɔ?

Biblia gblɔ be: “Le gɔmedzedzea me Mawu wɔ dziƒo kple anyigba.” (1 Mose 1:1) Dzɔdzɔmeŋutinunyala akpa gãtɔ lɔ̃ ɖe edzi be gɔmedzedze li na xexea. Aleke Mawu wɔ xexeae? Ezã eƒe “dɔwɔŋusẽ,” si nye eƒe gbɔgbɔ kɔkɔe la, tsɔ wɔ nu sia nu si le xexea me—ɣletivihatsotsowo, ɣletiviwo, kple ɣletinyigbawo.—1 Mose 1:2, etenuŋɔŋlɔ.

2. Nu ka tae Mawu wɔ anyigba ɖo?

‘Menye ɖeko Yehowa wɔ anyigbaa dzodzro o, ke boŋ ɖe wòmèe be woanɔ edzi.’ (Yesaya 45:18) Ewɔ míaƒe anyigba be wòanye teƒe nyui aɖe si míase vivi na agbea le tegbee. (Xlẽ Yesaya 40:28; 42:5.) Dzɔdzɔmeŋutinunyalawo gblɔ be anyigbaa le etɔxɛ eye eto vovo na ɣletinyigba bubu ɖe sia ɖe. Womeke ɖe ɣletinyigba bubu aɖeke si ate ŋu alé amegbetɔwo ƒe agbe ɖe te la ŋu o.

3. Nu kae na amegbetɔwo to vovo na lãwo?

Esi Yehowa wɔ anyigbaa vɔ la, ewɔ nu gbagbewo ɖe edzi. Gbã la, ewɔ nu miemiewo kple lãwo. Eyome, “Mawu wɔ ame ɖe eƒe nɔnɔme nu.” (Xlẽ 1 Mose 1:27.) Nu kae na amegbetɔwo to vovo? Esi wònye be Mawu wɔ mí ɖe eƒe nɔnɔme nu ta la, míate ŋu aɖe eƒe nɔnɔme nyuiwo, abe lɔlɔ̃ kple dzɔdzɔenyenye ene, afia. Eye ewɔ mí kple ŋutetea be míate ŋu asrɔ̃ gbe vovovowo, eye nu siwo nya kpɔ kple hadzidzi nado dzidzɔ na mí. Azɔ hã, mí amegbetɔwo míate ŋu asubɔ mía Wɔlaa, gake lã aɖeke mate ŋu awɔ esia o.

SRƆ̃ NU BUBUWO

Míakpɔ nu siwo ɖo kpe edzi be agbea medzɔ le eɖokui si o kple nu si tae míate ŋu aka ɖe nuwɔwɔwo ŋuti nuŋlɔɖi si le Biblia me la dzi. Azɔ hã, míakpɔ nu si nɔnɔme nyui siwo le amegbetɔwo si la fiaa mí tso Mawu ŋu.

4. Ame aɖe gbɔe agbe dzɔ tso

Ne amegbetɔwo srɔ̃ nu tso dzɔdzɔmenuwo ŋu eye woto nane vɛ la, amewo kafua wo ɖe nu si wowɔ ta. Ke ame kae wòle be woakafu ɖe dzɔdzɔmenu siwo ŋu wosrɔ̃ nua tsoe la ta? Mikpɔ VIDEOA, eye miadzro biabia si gbɔna me.

VIDEO: Mawu Dzi Xɔxɔ Se (2:43)

• Nu kae aɖaŋudɔwɔlawo srɔ̃ tso dzɔdzɔmenuwo ŋu tsɔ wɔ nu bubuwo?

Aƒe sia aƒe la, ame aɖee tsonɛ. Ke ame kae wɔ dzɔdzɔmenuwo? Mixlẽ Hebritɔwo 3:4, eye miadzro biabia siawo me:

• Dzɔdzɔmenu kawo ƒe wɔwɔmee wɔa dɔ ɖe dziwò?

• Ðe susu le eme be míaxɔe ase be ame aɖee wɔ nu sia nu si le xexea mea? Nu ka tae?

Ènyaa?

Àte ŋu akpɔ nyatiwo kple video siwo ku ɖe nya sia ŋu le jw.org ƒe akpa siwo nye “Ðe Wowɔea?” kple “Nya Siwo Amewo Gblɔ Tso Afi Si Agbe Dzɔ Tso Ŋu.”

“Nyateƒee, aƒe sia aƒe la, amee tsonɛ, ke ame si wɔ nuwo katãe nye Mawu”

5. Susu nyuiwo li siwo tae míaxɔ nya si Biblia gblɔ tso nuwo wɔwɔ ŋu dzi ase

VIDEO: Aleke Xexe Wɔnuku Sia Wɔ Va Dzɔ?—Videoa Ƒe Akpa Aɖe (3:51)

• Ðe Biblia gblɔ be wowɔ anyigbaa kple nu gbagbe siwo le edzi la le ŋkeke ade siwo dometɔ ɖe sia ɖe nye gaƒoƒo 24 la mea?

• Ðe nèsusu be míate ŋu aka ɖe nya si Biblia gblɔ tso nuwo wɔwɔ ŋu la dzia? Nu ka tae nèɖo eŋu nenema?

Mixlẽ 1 Mose 1:1, eye miadzro nyabiase sia me:

• Dzɔdzɔmeŋutinunyalawo gblɔ be gɔmedzedze li na xexe gbahooa kple anyigbaa. Aleke nya ma wɔ ɖeka kple nya si míexlẽ le Biblia me fifia?

Ame aɖewo ƒe susue nye be, ɖe Mawu wɔ nugbagbevi sue aɖe eye wòtrɔ vivivi va zu nu gbagbe ƒomevi vovovo siwo li. Mixlẽ 1 Mose 1:21, 25, 27, eye miadzro nyabiase siawo me:

• Ðe Biblia gblɔ be Mawu wɔ nugbagbevi sue aɖe eye wòna wòtrɔ vivivi va zu ƒumelãwo, lã siwo nɔa anyigba ƒuƒui dzi, kple amegbetɔwoa? Alo Mawu ŋutɔe wɔ nu gbagbe ‘ƒomevi’ ɖe sia ɖea?

6. Amegbetɔwo ɖe dzesi le Mawu ƒe nuwɔwɔwo dome

Míeto vovo sãsãsã na Yehowa ƒe nuwɔwɔ siwo nye lãwo. Mixlẽ 1 Mose 1:26, eye miadzro nyabiase sia me:

• Esi Mawu wɔ mí ɖe eƒe nɔnɔme nu ta la, nu kae ŋutete si le mía si be míelɔ̃a ame hesea veve ɖe ame nu la ɖe fia le ame si tɔgbi Mawu nye ŋu?

NU SIWO MÍESRƆ̃

Yehowae wɔ xexe bliboa kple nu gbagbewo katã.

Numetoto

• Nya kae Biblia gblɔ tso ale si xexea wɔ va dzɔ ŋu?

• Ðe Mawu wɔ nugbagbevi aɖe eye wòna wòtrɔ vivivi va zu nu gbagbe vovovowo loo, alo Mawu ŋutɔe wɔ nu gbagbewo katã?

• Nu kae na amegbetɔwo to vovo na lãwo?

KU NU ME TSO NYATIA ŊU

Xlẽ nu tso nunya si ɖe dzesi le nuwɔwɔwo ƒe wɔwɔme ŋuti la ŋu.

“Dzɔdzɔmenuwɔwɔwo—Nu Kae Wofiaa Mí?” (Nyɔ! ƒe nyati)

Kpɔ ale si vifofo aɖe ate ŋu aɖe nya si Biblia gblɔ tso nuwo wɔwɔ ŋu me na via si nye ɖevi dzaa la le video sia me.

‘Yehowae Wɔ Nuwo Katã’ (2:37)

Kpɔe ɖa be ɖe amedzɔtsolãme ƒe nufiafiaa wɔ ɖeka kple nya si Biblia gblɔ hã.

“Nɔnɔmetɔtrɔ Dzie Mawu To Wɔ Nu Gbagbe Vovovoawoa?” (Nyati sia le jw.org)

Xlẽ nu tso blemanu siwo ŋu numekulawo ke ɖo kple dzɔdzɔmeŋutinunyalawo ƒe nudodokpɔwo ŋu ne nàkpɔe ɖa be ɖe wowɔ nuwo loo alo ɖe wodzɔ le wo ɖokui si hã.

Ale Si Nu Gbagbewo Wɔ Va Dzɔ—Nyabiase Vevi Atɔ̃ Siwo Ŋu Wòahiã Be Nàbu (agbalẽ gbadza)

1. Nu ka tae wòle be míade asixɔxɔ agbe ŋu?

Ele be míade asixɔxɔ agbe ŋu, elabe agbe nye nunana tso Yehowa, mía Fofo lɔ̃ame la gbɔ. Eyae nye “agbedzɔƒe”—eyae wɔ nu gbagbewo katã. (Psalmo 36:9) “Eya ŋutɔe naa agbe kple agbegbɔgbɔ kpakple nuwo katã ame sia ame.” (Dɔwɔwɔwo 17:25, 28) Yehowa naa nu siwo míehiã be míanɔ agbe la mí. Gake menye ema ɖeɖe koe o, nu siwo wòna mí la sɔ gbɔ eye wole hamehame, ale be míate ŋu ase vivi na agbea.—Xlẽ Dɔwɔwɔwo 14:17.