Ne Mawu Fiaɖuƒea Va La, Nu Kawo Nue Ayi?

1, 2. (a) Aleke míate ŋu atsɔ nuɖoanyi sia asɔ kple nu vlo wɔla si wotso kufia na? (Kpɔ nɔnɔmetata si le nyati sia ƒe gɔmedzedze.) (b) Ne wotsrɔ̃ nuɖoanyi vɔ̃ɖi sia la, aleke eteƒekpɔlawo awɔ nui?

BU NUDZƆDZƆ sia ŋu kpɔ. Nu vlo wɔla vɔ̃ɖi aɖee nye ema wokplɔ tso gaxɔ me va yina eye dzɔlawo do ɣli le gbɔgblɔm be “Ame kuku si le zɔzɔm!” Nu ka tae wole nya sia gblɔm ɖe eŋu? Edze ƒãa be nu vlo wɔlaa le lãmesẽ me, eye medze dɔ si na wòle kuku ge o. Ke hã, dzɔlawo kplɔe yina afi si woawui le. Ðeko wòle abe ɖe nu vlo wɔla ma si wotso kufia na la ku xoxo ene.a

² Le gɔmesese aɖe nu la, nɔnɔme si me fifi nuɖoanyia le la sɔ kple ŋutsu si wotso kufia na la tɔ. Tso keke gbe aɖe gbe kee wodrɔ̃ ʋɔnu xexe vɔ̃ɖi sia, eye eƒe nuwuwu gogo. Biblia gblɔ be: ‘Xexea nu va yina.’ (1 Yoh. 2:17) Nuɖoanyi sia awu enu godoo. Ke hã, vovototo vevi aɖe le xexe sia ƒe nuwuwu kple nu vlo wɔlaa tɔ dome. Ne ɣeyiɣia de be woawu nu vlo wɔlaa la, ɖewohĩ ame aɖewo atsɔ nya ɖe ame siwo drɔ̃ ʋɔnui la ŋu be womedrɔ̃ nyaa nyuie o, alo woanɔ mɔ kpɔm be woahe ewuwu ɖe megbe. Gake le xexe sia gome la, xexea katã ƒe Dziɖulagã si tsoa afia dzɔdzɔe ɣeawokatãɣi lae drɔ̃ ʋɔnua. (5 Mose 32:4) Womahe nuɖoanyi vɔ̃ɖi sia tsɔtsrɔ̃ ɖe megbe o, eye ame aɖeke make ɖi vie teti gɔ̃ hã be womedrɔ̃ nyaa nyuie o. Ne wotsrɔ̃e vɔ la, ame sia ame si le dziƒo kple anyigba dzi alɔ̃ ɖe edzi kple dzidzɔ be wodrɔ̃ ʋɔnu dzɔdzɔe. Gbɔdzɔe bliboe wòanye!

 3. Nu ene aɖewo siwo nu ayi ne Mawu Fiaɖuƒea va kawo ŋue míaƒo nu tsoe le nyati sia me?

³ Ke nu vovovo kawoe ‘xexe’ si ŋu Biblia gblɔ le be ‘enu va yina’ la le tsitre ɖi na? Xexe sia me nu siwo amewo buna egbea be woanɔ anyi ɖaa la ƒe akpa gãtɔ nu ayi. Nublanuinyae esia nyea? Kura o! Le nyateƒe me la, enye “Fiaɖuƒe ŋuti nya nyui” la ƒe akpa vevi aɖe. (Mat. 24:14) Eya ta, na míatrɔ susu ɖe nu siwo nu ayi ne Mawu Fiaɖuƒea va la ŋu. Míadzro nu siawo dometɔ ene aɖewo me. Woawoe nye: ame vɔ̃ɖiwo, habɔbɔ siwo wɔa nu baɖawo, nu gbegblẽ wɔwɔwo kple nɔnɔme wɔnublanuiwo. Le wo dometɔ ɖe sia ɖe gome la, míadzro (1) ale si nɔnɔme mawo le nu gblẽm le mía ŋu fifia, (2) nu si Yehowa ava wɔ tso wo ŋu, kple (3) ale si wòatsɔ nu nyuiwo aɖo wo teƒe la me.

 4. Aleke ame vɔ̃ɖiwo ƒe nuwɔnawo le nu gblẽm le mía ŋu fifia?

⁴ Aleke ame vɔ̃ɖiwo ƒe nuwɔnawo le nu gblẽm le mía ŋu fifia? Esi apostolo Paulo gblɔe ɖi be le míaƒe ŋkekeawo me la “ɣeyiɣi sesẽ siwo me nɔnɔ asesẽ” ava la, gbɔgbɔ ʋãe wòŋlɔ bena: “Ame vɔ̃ɖiwo kple ameblelawo anɔ vɔɖivɔ̃ɖim ɖe edzi.” (2 Tim. 3:1-5, 13) Ðe nèkpɔe be nyagblɔɖi siawo le eme vama? Ame vɔ̃ɖiwo, abe ŋutasẽla siwo wɔa nu vevi ame, nazãbula siwo léa fu ame kple nu vlo wɔlawo ene ƒe nuwɔnawo gblẽ nu le mía dometɔ geɖe ŋu tẽe. Wo dometɔ aɖewo wɔa nu tovowo gaglãa; ame bubuwo hã nye ameflula siwo wɔa nu abe ɖe wonye ame dzɔdzɔewo ene, evɔ le nyateƒe me la, wovɔ̃ɖi hafi. Ne ame siawo tɔgbi mewɔ nu vevi mí tẽe kpɔ o hã la, woƒe nuwɔnawo gblẽa nu le mía ŋu le mɔ aɖe nu. Egbãa dzi na mí ne míese nu tso woƒe nuwɔna dziŋɔwo ŋu. Ale si ame vɔ̃ɖiwo sẽa ŋuta le ɖeviwo, ame tsitsiwo kple wɔnamanɔŋutɔwo ŋu la dzia ŋɔ na mí ŋutɔ. Ame vɔ̃ɖiwo wɔa nu abe lãwo ene, eye woƒe nuwɔnawo ɖia gbɔgbɔ vɔ̃wo tɔ. (Yak. 3:15) Dzidzɔtɔe la, Yehowa ƒe Nya la naa mɔkpɔkpɔ mí.

 5. (a) Mɔnukpɔkpɔ kae gale ʋuʋu ɖi na ame vɔ̃ɖiwo? (b) Nu kae ava dzɔ ɖe ame vɔ̃ɖi siwo gbe tɔtrɔwɔwɔ la dzi mlɔeba?

⁵ Nu kae Yehowa awɔ tso eŋu? Fifia ya Yehowa le mɔnukpɔkpɔ nam ame vɔ̃ɖiwo be woatrɔ woƒe agbenɔnɔ. (Yes. 55:7) Abe ame ɖekaɖekawo ene la, Mawu medrɔ̃ ʋɔnu woamawo be wodze na tsɔtsrɔ̃ haɖe o. Nuɖoanyiae Mawu drɔ̃ ʋɔnui xoxo be enu ayi. Ke ame siwo gbe be yewomatrɔ o eye woyi edzi do alɔ nuɖoanyi sia va de asi na esime xaxa gã la va ya ɖe? Yehowa do ŋugbe be yeava ɖe ame vɔ̃ɖiwo ɖa le anyigba dzi keŋkeŋ tegbee. (Xlẽ Psalmo 37:10.) Ame vɔ̃ɖiwo asusu be yewoate ŋu asi le ʋɔnudɔdrɔ̃ ma nu. Ame geɖe nya ale si woaɣla woƒe nu gbegblẽ wɔwɔwo, eye le xexe sia me la, edze abe wotea ŋu sina le tohehe kple woƒe nuwɔnawo me tsonuwo nu zi geɖe ene. (Hiob 21:7, 9) Ke hã, Biblia ɖoa ŋku edzi na mí be: “Mawu ƒe ŋku le amegbetɔ ƒe mɔwo ŋu, eye wòkpɔa eƒe afɔɖeɖewo katã. Viviti alo blukɔ aɖeke meli, si me nu vlo wɔlawo abe ɖo o.” (Hiob 34:21, 22) Womate ŋu aɣla naneke ɖe Yehowa Mawu o. Alakpanuwɔla aɖeke mate ŋu aflui o; vivitimenuwɔna aɖeke mate ŋu anɔ ɣaɣla ale gbegbe be Mawu si tea ŋu kpɔa nu sia nu la mate ŋu akpɔ nu siwo le edzi yim la tsitotsito o. Ekema le Armagedon megbe la, ne míeɖe ŋku ɖe afi si ame vɔ̃ɖiwo nɔ tsã la, míakpɔ wo o. Wo nu ayi tegbee!—Ps. 37:12-15.

 6. Ame kawoe asusɔ ne ame vɔ̃ɖiwo megava li o, eye nu ka tae esia nye nya nyui?

⁶ Ame kawoe asusɔ ne ame vɔ̃ɖiwo megava li o? Yehowa do ŋugbe dodzidzɔname sia na mí be: “Ame fafawo anyi anyigba la dome, eye dzi adzɔ wo geɖe ɖe ŋutifafa gbogbo la ŋuti.” Wogagblɔ le psalmo ma ke dzi yiyi me be: “Ame dzɔdzɔewo anyi anyigba la dome, eye woanɔ edzi tegbee.” (Ps. 37:11, 29) Ame kawoe nye “ame fafawo” kple ‘ame dzɔdzɔeawo’? Ame fafawoe nye ame siwo bɔbɔa wo ɖokui xɔa Yehowa ƒe nufiafiawo kple mɔfiamewo; ame dzɔdzɔeawoe nye ame siwo lɔ̃a nu si dzɔ le Yehowa Mawu ŋkume la wɔwɔ. Egbea, ame vɔ̃ɖiwo sɔ gbɔ wu ame dzɔdzɔewo sãsãsã. Gake le xexe yeyea me la, ame fafawo sɔ gbɔ wu loo alo ame vɔ̃ɖiwo sɔ gbɔ wu ƒe nya aɖeke maganɔ anyi o, elabena ame fafawo kple ame dzɔdzɔewo koe anɔ anyi. Ame siawoe ana anyigba nanye paradiso!

 7. Aleke habɔbɔ siwo wɔa nu baɖawo ƒe nuwɔnawo gblẽa nu le mía ŋu egbea?

⁷ Aleke habɔbɔ siwo wɔa nu baɖawo ƒe nuwɔnawo gblẽa nu le mía ŋu egbea? Nu dziŋɔ siwo le edzi yim le xexea me ƒe akpa gãtɔ metso ame ɖekaɖekawo gbɔ o, ke boŋ wotso habɔbɔwo gbɔ. Le kpɔɖeŋu me, subɔsubɔhawo blea ame miliɔn geɖewo, si wɔe be susu totrowo va le wo si ku ɖe Biblia ƒe nufiafia siwo ku ɖe Mawu ƒe amenyenye kpakple amegbetɔwo kple anyigba ƒe etsɔme ŋu hekpe ɖe nya bubu geɖewo ŋu, eye wona hã be amewo megaka ɖe Biblia dzi o. Ke dziɖuɖu siwo doa aʋawɔwɔ kple gbevovovodolawo dome ʋunyaʋunyawɔwɔ ɖe ŋgɔ, eye wotea ame dahewo kple wɔnamanɔŋutɔwo ɖe anyi hetoa zãnuxɔxɔ kple amedzidede nuwɔnawo dzi kpɔa ŋusẽ kpakple kesinɔnu geɖe ya ɖe? Ke asitsaha siwo ƒe ŋukeklẽ wɔnɛ be woƒoa ɖi anyigba kple yamenutowo me, wogblẽa avewo kple anyigbadzinuwo dome, eye woblea nuƒlela siwo mele ɖeke me nyam o hetoa esia dzi nana ame ʋɛ aɖewo ko zua kesinɔtɔ gãwo, evɔ ame miliɔn geɖewo ya daa ahe kolikoli ya ɖe? Ðikeke mele eme o be habɔbɔ gblẽkuwo gbɔe fukpekpe si xɔ aƒe ɖi egbea la ƒe akpa gãtɔ tso.

 8. Le Biblia ƒe nya nu la, nu kae adzɔ ɖe habɔbɔ siwo dzena na ame geɖe egbea be woli ke sesĩe la dzi?

⁸ Nu kae Yehowa awɔ tso eŋu? Xaxa gã la adze egɔme ne dziɖuɖuwo tso ɖe gbolo si Biblia yɔ be Babilon Gã la, si le tsitre ɖi na alakpasubɔsubɔhawo katã la ŋu. (Nyaɖ. 17:1, 2, 16; 18:1-4) Woatsrɔ̃ subɔsubɔha mawo gbidigbidi. Ke nu kae adzɔ ɖe habɔbɔ gblẽku mamlɛawo dzi? Biblia zã towo kple togbɛwo tsɔ ɖɔ habɔbɔ geɖe siwo dzena na amewo be woli ke sesĩe la. (Xlẽ Nyaɖeɖefia 6:14.) Mawu ƒe Nya la gblɔe ɖi be woava gbã dziɖuɖuwo kple habɔbɔ siwo katã wodoa alɔe. Xaxa gã la ava ɖo eƒe yɔyrɔea nu kple sesẽaƒe ne wotsrɔ̃ xexe xoxo sia me dziɖuɖuwo katã kple ame siwo katã dea wo dzi wotsia tsitre ɖe Mawu Fiaɖuƒea ŋu. (Yer. 25:31-33) Esia yome la, habɔbɔ gblẽku aɖeke maganɔ anyi o!

 9. Nu ka tae míate ŋu aka ɖe edzi be anyigba yeye la anɔ ɖoɖo nyui nu?

⁹ Nu kae axɔ ɖe habɔbɔ gblẽkuwo teƒe? Le Armagedon-ʋaa megbe la, ɖe habɔbɔ aɖe akpɔtɔ ɖe anyigba dzia? Biblia gblɔ na mí be: “Míele dziƒo yeye kple anyigba yeye, siwo me dzɔdzɔenyenye anɔ la, lalam le eƒe ŋugbedodo la nu.” (2 Pet. 3:13) Dziƒo tsãtɔ kple anyigba tsãtɔ, siwo le tsitre ɖi na dziɖuɖu gblẽkuwo kple anyigbadzinɔla siwo le woƒe ŋusẽ te la nu ayi. Nu kae ava xɔ ɖe wo teƒe? Nya “dziƒo yeye kple anyigba yeye” fia dziɖuɖu yeye kple anyigba dzi nuɖoanyi yeye si me tɔwo anye dziɖuɖu ma te viwo. Fiaɖuƒe ma si anɔ Yesu Kristo ƒe kpɔkplɔ te la ana nuwo nanɔ ɖoɖo nu wòasɔ ɖe Yehowa Mawu, ame si nye ɖoɖo ƒe Mawu la, ƒe amenyenye nu pɛpɛpɛ. (1 Kor. 14:33) Esia fia be nuwo anɔ ɖoɖo nu le “anyigba yeye” la me. Ame nyuiwo axɔ ŋgɔ le nyawo gbɔ kpɔkpɔ me. (Ps. 45:16) Kristo kple eƒe hatidziɖula 144,000 la afia mɔ wo. Bu eŋu kpɔ ko, habɔbɔ ɖeka pɛ si me mama aɖeke mele o, si mawɔ nu baɖa gbeɖe o la ava xɔ ɖe dziɖuɖu gblẽkuwo katã teƒe!

10. Nuwɔna gbegblẽ kawoe bɔ ɖe nuto si me nèle me, eye aleke wòle nu gblẽm le mia kple wò ƒomea ŋu?

¹⁰ Aleke amewo ƒe nu gbegblẽ wɔwɔwo le nu gblẽm le mía ŋu fifia? Míele xexe si me nu gbegblẽ wɔwɔ bɔ ɖo ŋutɔ me. Agbe gbegblẽ nɔnɔ, anukwaremaɖimaɖi kple ŋutasẽnuwɔwɔwo xɔ aƒe ɖi. Dzilawo koŋ kpɔnɛ be menɔa bɔbɔe kura be yewoakpɔ yewo viwo ta tso ŋusẽkpɔɖeamedzi gbegblẽ mawo me o. Le xexe sia ƒe modzakaɖeɖewo me la, wonana nu gbegblẽ ƒomevi vovovowo dzena abe ɖe wonye nu nyuiwo ene, eye woɖea alɔme le Yehowa ƒe mɔfiame siwo ku ɖe nyui kple vɔ̃ ŋu la ŋu. (Yes. 5:20) Kristotɔ vavãwo dzea agbagba be nu mawo nagakpɔ ŋusẽ ɖe yewo dzi o. Eye wokua kutri be yewoayi edzi awɔ nuteƒe le xexe sia si me ame geɖe ŋea aɖaba ƒua Yehowa ƒe nudidiwo dzi la me.

11. Nufiame kae le ʋɔnu si Yehowa drɔ̃ Sodom kple Gomora me na mí?

¹¹ Nu kae Yehowa awɔ tso nu gbegblẽ wɔwɔwo ŋu? Bu nu si wòwɔ esime nu gbegblẽ wɔwɔ xɔ aƒe ɖe Sodom kple Gomora ŋu kpɔ. (Xlẽ 2 Petro 2:6-8.) Nu gbegblẽ wɔwɔ siwo katã teƒe ame dzɔdzɔe Lot kple eƒe ƒomea kpɔ la wɔ fu eƒe luʋɔ. Esi Yehowa tsrɔ̃ nuto blibo ma la, menye ɖeko wòtsi nu gbegblẽ wɔwɔ siwo nɔ edzi yim ɣemaɣi la nu ko evɔ o, ke nu si wòwɔ la nye “nu siwo ava va la ƒe kpɔɖeŋu na ame mavɔ̃mawuwo.” Abe ale si ko Yehowa tsi nu baɖa wɔwɔwo katã nu ɣemaɣi ene la, nenema kee wòaɖe nu gbegblẽ wɔwɔ si le edzi yim egbea hã ɖa ne eva le ʋɔnu drɔ̃m nuɖoanyi sia.

12. Nu siwo nèle mɔ kpɔm be yeawɔ ne nuɖoanyi xoxo sia megava li o la dometɔ aɖewo ɖe?

¹² Nu kae ava xɔ ɖe nu gbegblẽ wɔwɔwo teƒe? Nu dodzidzɔnamewo wɔwɔ axɔ aƒe ɖi le Paradisoa me. Bu dzidzɔ si gbegbe wòanye be míatrɔ anyigba wòazu paradiso kple dzidzɔ si wòanye be míatu xɔwo na mía ɖokuiwo kple míaƒe ame lɔlɔ̃wo ŋu kpɔ. Azɔ hã, míaxɔ ame miliɔn geɖe siwo wofɔ ɖe tsitre la atuu ahafia nu wo tso Yehowa ƒe mɔwo kple ale si wòwɔ nu ɖe amegbetɔwo ŋu va yi ŋu. (Yes. 65:21, 22; Dɔw. 24:15) Nu siwo míanɔ wɔwɔm ɣesiaɣi la ana míakpɔ dzidzɔ eye wòahe kafukafu vɛ na Yehowa!

13. Nɔnɔme wɔnublanui kawoe Satana, Adam kple Xawa ƒe aglãdzedzea he vɛ egbea?

¹³ Aleke nɔnɔme wɔnublanuiwo le nu gblẽm le mía ŋu fifia? Ame vɔ̃ɖiwo, habɔbɔ siwo wɔa nu baɖawo kple nu gbegblẽ wɔwɔwo wɔe be ameƒomea le nɔnɔme wɔnublanuiwo me tom. Mía dometɔ kae ate ŋu agblɔ be aʋawɔwɔ, ahedada alo nazãbubu ɖe dukɔ bubu me tɔwo ŋu ƒe nyaa meɖe fu na ye le mɔ aɖeke nu kpɔ o? Ke dɔléle kple ku ya ɖe? Nu siawo ɖea fu na mí katã. Ame etɔ̃ aɖewo, siwo nye Satana, Adam kple Xawa ƒe aglãdzedze ɖe Yehowa ŋu gbɔe kuxi mawo tso tẽe. Fifia, mía dometɔ aɖeke mate ŋu asi le woƒe aglãdzedzea me tsonu wɔnublanuiawo nu o.

14. Nu kae Yehowa ava wɔ tso nɔnɔme wɔnublanuiwo ŋu? Gblɔ eƒe kpɔɖeŋu.

¹⁴ Nu kae Yehowa ava wɔ tso nɔnɔme wɔnublanuiwo ŋu? Bu aʋawɔwɔ ŋu kpɔ. Yehowa do ŋugbe be yeatsi enu tegbee. (Xlẽ Psalmo 46:8, 9.) Ke dɔléle ya ɖe? Aɖee ɖa keŋkeŋ. (Yes. 33:24) Ke ku hã ɖe? Yehowa amii tegbee! (Yes. 25:8) Aɖe ahedada hã ɖa. (Ps. 72:12-16) Aleae wòawɔ le nɔnɔme wɔnublanui bubu siwo na míele fu kpem egbea hã gome. Aɖe Satana kple eƒe gbɔgbɔ vɔ̃wo ƒe ŋusẽkpɔɖeamedzi gbegblẽa gɔ̃ hã ɖa keŋkeŋ.—Ef. 2:2.

15. Nu siwo nu ayi keŋkeŋ le Armagedon megbe dometɔ aɖewo ɖe?

¹⁵ Bu ale si xexea anɔ ne aʋawɔwɔ, dɔléle kple ku megali o ŋu kpɔ. Asrafo afɔzɔlawo, ƒudzisrafowo kple aʋawɔyameʋuwo maganɔ anyi o! Ame siwo ku le aʋa me ƒe ŋkuɖodzikpewo maganɔ anyi o. Kɔdziwo, ɖɔkitawo, dɔnɔdzikpɔlawo kple lãmesẽnyawo ƒe nugblẽfexeɖoɖowo nu ayi; ame siwo dzraa ame kukuwo ɖo, ame kuku dzraɖoƒewo kple ameɖiƒewo hã azu gbeaɖegbenya! Eye esi nu vlo wɔwɔ maganɔ anyi o ta la, dedienɔnɔ ƒe dɔwɔƒewo, elektrik-toklãnagawo kple kpovitɔwo maganɔ anyi o, eye ɖewohĩ gametiwo kple safuiwo hã nu ayi! Bu eŋu kpɔ ko, míagatsi dzimaɖi gbeɖe o, eye míakpɔ tomefafa.

16, 17. (a) Gbɔdzɔe kae ame siwo atsi agbe le Armagedon me akpɔ? Gblɔ eƒe kpɔɖeŋu. (b) Nu kae ate ŋu ana míaka ɖe edzi be míatsi agbe ne xexe xoxo sia megava li o?

¹⁶ Aleke agbea anɔ ne nɔnɔme wɔnublanuiwo nu yi? Mele bɔbɔe be míakpɔe le susu me o. Ɣeyiɣi didi si míele nɔnɔme madeamedziwo teƒe kpɔm la wɔe be míegadea dzesi ale si gbegbe xexea ƒe nɔnɔmewo le tetem ɖe mía dzii o. Mɔ ma ke nue ame siwo ƒe aƒewo te ɖe ketekedzeƒewo ŋu megadea dzesi toɣliɖeɖe si ƒo xlã wo o, eye ame siwo te ɖe aɖukpowo ŋu hã megasea eƒe ʋeʋẽ o. Gake gbɔdzɔe ka gbegbee nye esi wòanye ne nɔnɔme madeamedzi mawo katã nu yi!

¹⁷ Nu kae ava xɔ ɖe fu siwo kpem míele fifia teƒe? Psalmo 37:11 gblɔ be: “Dzi adzɔ wo geɖe ɖe ŋutifafa gbogbo la ŋuti.” Ðe nya mawo mewɔa dɔ ɖe dziwò oa? Aleae Yehowa di be agbea nanɔ na wò. Eya ta, wɔ wò ŋutete ɖe sia ɖe be nànɔ Yehowa Mawu kple eƒe habɔbɔa ŋu kplikplikpli le ŋkeke mamlɛ sesẽ siawo me! De asixɔxɔ mɔkpɔkpɔ si le asiwò la ŋu, nɔ eŋu bum, na wòawɔ dɔ ɖe wò dzi kple susu dzi, eye nàdo vevie eŋunya gbɔgblɔ na amewo! (1 Tim. 4:15, 16; 1 Pet. 3:15) Esia wɔwɔ ana nàka ɖe edzi be ne xexe xoxo sia si wodrɔ̃ ʋɔnui la nu le yiyim la, wò ya màyi kplii o. Ke boŋ àtsi agbe ahanɔ dzidzɔ kpɔm yi mavɔmavɔ me!