Dzo Nenɔ Mewò Ðe Tadedeagu Vavãtɔ Ŋu
“Nyateƒee, nuŋeŋe la sɔ gbɔ, gake dɔwɔlawo ya mesɔ gbɔ o.”—MAT. 9:37.
1. Kpɔɖeŋu kae nàwɔ atsɔ aɖe nu si nuwɔwɔ kpata fia me?
EHIÃ vevie be nàkpɔ ame aɖe be wòade asi agbalẽ aɖe te na wò hafi zã nado. Alekee nàwɔ nui? Àtso ɖe eŋu “KPATA!” Ne èle mɔ dzi yina ame vevi aɖe kpe ge gake ètsi megbe la, nu kae nèwɔna? Ègblɔna na ʋukulaa be, “Meɖe kuku, ku ʋua kaba; afi si yim mele la hiã KPATA!” Nyateƒee, ne ehiã be nàwɔ nane eye ɣeyiɣia va le yiyim la, àtsi dzimaɖi eye àtsi dzodzodzoe hã le ɖokuiwò me. Lãmetsi si woyɔna be adrenaline, si naa ame ƒe dzi nɔa ƒoƒom kabakaba eye wòna ŋusẽ geɖe ɖoa ame ŋu la, ate agbɔsɔsɔ ɖe lãme na wò eye àwɔ dɔa kaba ale si nàte ŋui kple wò ŋusẽ katã. Nɔnɔme siawo tɔgbie ɖea nuwɔwɔ kpata fiana!
2. Dɔ si hiã kpata wu kae wòle be Kristotɔ vavã siwo li egbea la nàwɔ?
2 Dɔ si hiã kpata wu ɖe sia ɖe si wòle be Kristotɔ vavã siwo li egbea nawɔe nye gbeƒãɖeɖe Fiaɖuƒe ŋuti nya nyui la kple dukɔwo katã me tɔwo wɔwɔ be woanye nusrɔ̃lawo. (Mat. 24:14; 28:19, 20) Nusrɔ̃la Marko yɔ Yesu ƒe nyawo esime woŋlɔ bena, ele be woawɔ dɔ sia si nye gbeƒãɖeɖe nya nyui la le dukɔwo katã me “gbã,” si fia be woawɔe hafi nuwuwua nava. (Mar. 13:10) Le nyateƒe me la, esia sɔ ŋutɔ. Yesu gblɔ be: “Nuŋeŋe la sɔ gbɔ, gake dɔwɔlawo ya mesɔ gbɔ o.” Ne nuŋeɣi ɖo la, nuŋelawo mewɔa alɔgblɔdɔ o; ele na wo be woaŋe nuawo kaba hafi nuŋeɣia nawu enu.—Mat. 9:37.
3. Esi gbeƒãɖeɖedɔa hiã kpata ta la, afɔ kawoe ame geɖewo ɖe?
3 Esi wònye be gbeƒãɖeɖedɔa le vevie na mí alea gbegbe ta la, edze be míazã ɣeyiɣi geɖe kple ŋusẽ ɖe eŋu ale si dze, eye míana míaƒe susu katã nànɔ eŋu. Nu si de dzi ƒoe nye be, nɔviŋutsu kple nɔvinyɔnu geɖewo le esia wɔm. Ame aɖewo trɔ asi le woƒe dɔwɔnawo ŋu heƒo wo ɖokuiwo ɖe ɣeyiɣiawo katã ƒe subɔsubɔdɔa me abe mɔɖelawo alo dutanyanyuigblɔlawo ene, eye ɖewo hã le dɔ wɔm le Betel-ƒewo me le xexea me godoo. Wowɔa dɔ geɖe ŋutɔ. Anɔ eme be wotsɔ nu geɖewo sa vɔ, eye wodoa go kuxi geɖewo. Ke hã, Yehowa yra wo ale gbegbe. Esia doa dzidzɔ na mí ŋutɔ. (Mixlẽ Luka 18:28-30.) Ame bubu siwo mate ŋu azu ɣeyiɣiawo katã ƒe gbeƒãɖelawo o la zãa ɣeyiɣi geɖe ale si nu woate ŋui ɖe agbeɖeɖedɔ sia ŋu—kpekpe ɖe mía viwo ŋu be woakpɔ agbe hã le eme.—5 Mose 6:6, 7.
4. Nu ka tae nuwɔwɔ kpata ƒe susu megava nɔa ame aɖewo si o?
4 Abe ale si míekpɔe ene la, zi geɖe la, nuwɔwɔ kpata ƒe susu doa ƒome kple ɣeyiɣi si woɖo ɖe dɔ aɖe ŋu, nane ƒe nuwuɣi, alo nane ƒe nuwuwu. Míele nuwuɣia me, eye Ŋɔŋlɔawo kple ŋutinya me kpeɖodzi gbogbo aɖewo le mía si míatsɔ aɖo kpe esia dzi. (Mat. 24:3, 33; 2 Tim. 3:1-5) Ke hã, ame aɖeke menya ɣeyiɣi si tututu dzie nuwuwu la ava o. Esi Yesu nɔ “nuɖoanyi sia ƒe nuwuɣi” ƒe “dzesi” ŋu nya gblɔm la, egblɔe kã be: “Le ŋkeke ma kple gaƒoƒo ma ŋuti la, ame aɖeke menyae o, mawudɔla siwo le dziƒo la menyae o, eye Vi la hã menyae o, negbe Fofo la ko.” (Mat. 24:36) Esi wòle nenema ta la, ate ŋu asesẽ na ame aɖewo be woayi edzi alé nuwɔwɔ kpata ƒe susu sia me ɖe asi esi ƒeawo va le yiyim, vevietɔ ne wole esia wɔm ɣeyiɣi didi aɖee nye esia. (Lod. 13:12) Ðe nèsena le ɖokuiwo me nenema ɣeaɖewoɣia? Nu kae ate ŋu akpe ɖe mía ŋu be nuwɔwɔ kpata ƒe susu nasu mía si ku ɖe dɔ si Yehowa Mawu kple Yesu Kristo di be míawɔ egbea la ŋu eye míakpɔtɔ alé eme ɖe asi?
Yesu, Míaƒe Kpɔɖeŋuɖola La Nenɔ Susu Me Na Wò
5. Mɔ kawo nue Yesu ɖee fia le be yebua gbeƒãɖeɖedɔa be ehiã kpata?
5 Yesu Kristoe nye kpɔɖeŋu ɖedzesitɔ kekeake le ame siwo katã wɔ nu kpata le subɔsubɔdɔ si wowɔ na Mawu me la dome. Susu ɖeka si tae wòwɔ nu kpata ɖoe nye be dɔ geɖe nɔ esi wòawɔ le ƒe etɔ̃ kple afã pɛ ko me. Ke hã, Yesu wɔ dɔ le tadedeagu vavãtɔa dodo ɖe ŋgɔ me wu ame bubu ɖe sia ɖe. Ena wonya Fofoa ƒe ŋkɔ kple tameɖoɖo, eɖe gbeƒã Fiaɖuƒe ŋuti nya nyuia, eklo nu le subɔsubɔhakplɔlawo ƒe ameŋkumenuwɔwɔ kple alakpanufiafiawo dzi, eye wòde Yehowa ƒe dziɖulanyenye dzi va se ɖe ku me gɔ̃ hã. Ezã eƒe ŋusẽ katã tsɔ fia nu, na kpekpeɖeŋu amewo, eye wòda gbe le amewo ŋu le afi sia afi si wòyi. (Mat. 9:35) Ame aɖeke mewɔ dɔ gbogbo alea gbegbe le ɣeyiɣi kpui aɖe me kpɔ o. Yesu wɔ dɔ kple eƒe ŋusẽ katã.—Yoh. 18:37.
6. Nu ka dzie Yesu ƒe susu katã nɔ?
6 Nu kae ʋã Yesu wòwɔ dɔ kutrikukutɔe le eƒe subɔsubɔdɔa katã me? Le Daniel ƒe nyagblɔɖia nu la, Yesu nya ɣeyiɣi agbɔsɔsɔme si nɔ esi be wòatsɔ awɔ eƒe subɔsubɔdɔa awu enu le Yehowa ƒe ɣeyiɣi ɖoɖi nu. (Dan. 9:27) Eya ta abe ale si míekpɔe do ŋgɔ ene la, ele be eƒe anyigbadzisubɔsubɔdɔa nawu enu “le kwasiɖa afã me,” alo “ƒe etɔ̃ kple afã” megbe. Ɣeyiɣi kpui aɖe do ŋgɔ na Yesu ƒe Yerusalem yiyi abe aʋadziɖula ene, le ƒe 33 M.Ŋ. ƒe adame la, egblɔ be: “Gaƒoƒo la de be woado Amegbetɔvi la ɖe dzi.” (Yoh. 12:23) Togbɔ be Yesu nyae be yeƒe kuɣi gogo hã la, meɖe mɔ eƒe susu katã nɔ esia ŋu o, eye menye esiae nye susu vevi si ta wòwɔ dɔ sesĩe nenema ɖo o. Ke boŋ eƒe susu nɔ ale si wòazã mɔnukpɔkpɔ ɖe sia ɖe si aʋu ɖi nɛ la atsɔ awɔ Fofoa ƒe lɔlɔ̃nu eye wòaɖe lɔlɔ̃ afia ehavi amegbetɔwo la dzi. Lɔlɔ̃ sia ʋãe be wòƒo eƒe nusrɔ̃lawo nu ƒu eye wòna hehe wo heɖo wo ɖa be woaɖaɖe gbeƒã. Ewɔ esia ale be woayi dɔ si gɔme wòdze la dzi eye woawɔ dɔ siwo lolo wu esiwo eya ŋutɔ wɔ gɔ̃ hã.—Mixlẽ Yohanes 14:12.
7, 8. Alekee nusrɔ̃lawo wɔ nui esi Yesu kɔ gbedoxɔa ŋu, eye nu ka tae Yesu ɖe afɔ ma ɖo?
7 Yesu ƒe agbemenudzɔdzɔ aɖe na kpeɖodzi sẽŋu mí le dzo si gbegbe nɔ eme ŋu. Nu sia dzɔ le eƒe subɔsubɔdɔa ƒe gɔmedzedze, le ƒe 30 M.Ŋ. ƒe Ŋutitotoŋkekenyuia ɖuɣi. Yesu kple eƒe nusrɔ̃lawo va Yerusalem eye wokpɔ “ame siwo nɔ nyiwo kple alẽwo kpakple ahɔnɛwo dzram le gbedoxɔa me kpakple gaɖɔlila siwo nɔ anyi ɖe woƒe zikpuiwo dzi.” Alekee Yesu wɔ nui, eye dɔ kae wòwɔ ɖe eƒe nusrɔ̃lawo dzi?—Mixlẽ Yohanes 2:13-17.
8 Esɔ ŋutɔ be nu si Yesu wɔ kple nya siwo wògblɔ le nudzɔdzɔ ma me la na be nusrɔ̃lawo ɖo ŋku nyagblɔɖinya siwo le David ƒe psalmo aɖe me dzi, si gblɔ be: “Ŋuʋaʋã [alo dzonɔameme, NW] ɖe wò aƒe ŋu mim.” (Ps. 69:10) Nu ka tae? Elabena afɔku gã aɖe le nu si Yesu wɔ la me. Nyateƒeae nye be gbedoxɔa dzi kpɔlawo—siwo nye nunɔlawo, agbalẽfialawo, kple ame bubuwo—ye nɔ megbe na asitsatsa si me viɖe ƒoɖi le, si nɔ edzi yim le afi ma. Esi Yesu klo nu le woƒe tameɖoɖoa dzi hegblẽ eme na wo la, enɔ eɖokui wɔm subɔsubɔhakplɔlawo ƒe futɔ. Abe ale si nusrɔ̃lawo de dzesii nyuie ene la, ‘dzonɔameme ɖe Mawu ƒe aƒe la ŋu’ alo dzonɔameme ɖe tadedeagu vavã la ŋu dze kɔtɛ le Yesu ŋu. Gake nu kae nye dzonɔameme? Ðe vovototo aɖe le eya kple nuwɔwɔ kpata domea?
Ƒomedodo Si Le Nuwɔwɔ Kpata Kple Dzonɔameme Dome
9. Alekee woate ŋu aɖe dzonɔameme gɔmee?
9 Nyagɔmeɖegbalẽ aɖe ɖe dzonɔameme gɔme be “enye didi vevie kple ɖetsɔleme si nu sẽ tsɔtsɔ ti nane yome,” eye nya siwo ŋu gɔmesese ɖeka tɔgbi le, siwo agbalẽa yɔe nye kukuɖenuŋu, veviedodo, kple dzotsɔtsɔ ɖe nu ŋu. Kakaɖedzitɔe la, woate ŋu azã nya siawo katã atsɔ aɖɔ Yesu ƒe subɔsubɔdɔae. Le esia ta, Biblia gɔmeɖeɖe aɖe ɖe kpukpui sia gɔme be: “Oo Mawu, nye lɔlɔ̃ na wò aƒe le bibim le menye abe dzo ene.” (Today’s English Version) Esɔ nyuie be le Ɣetoɖoƒetɔwo ƒe gbegbɔgblɔ aɖewo me la, nya si wozãna na “dzonɔameme” la nye nya eve ƒokpli siwo gɔme ɖeɖe le nya la ŋutɔŋutɔ nu fia “dzi xɔdzo,” abe ɖe dzia le bibim ene. Mewɔ nuku o be, esi nusrɔ̃lawo kpɔ nu si Yesu wɔ le gbedoxɔa me la, woɖo ŋku David ƒe nyawo dzi. Nu kae na Yesu ƒe dzi xɔ dzo, abe ɖe wònɔ bibim ene, eye wòʋãe wòwɔ nu le mɔ ma nu?
10. Gɔmesese kae le nya “dzonɔameme” ŋu le ale si wozãe le Biblia me nu?
10 Woɖe nya “dzonɔameme” si le David ƒe psalmoa me tso Hebrigbe me nya si gɔme woɖe be “ʋã ŋu” alo “ŋuʋaʋã” le Biblia ƒe akpa bubuwo zi geɖe la me. Xexe Yeye Gɔmeɖeɖe yevugbe me tɔ la ɖe eme le kpukpui aɖewo me be ɖokuitsɔtsɔna blibo. (2 Mose 20:5; 34:14; Yos. 24:19) Biblia ƒe nyagɔmeɖegbalẽ aɖe gblɔ tso nyagbɔgblɔ sia ŋu be: “Wozãnae zi geɖe wòdoa ƒome kple srɔ̃ɖekadodo . . . Abe ale si ko ŋuʋaʋã si sɔ, si nɔa srɔ̃ŋutsu alo srɔ̃nyɔnu me la, nyea ɖokuitsɔtsɔna si wòdze na la ta ʋiʋli vevie ene la, nenema kee Mawu hã dze na ame siwo nye etɔwo la ƒe ɖokuitsɔtsɔna blibo, eye eʋlia eƒe gomenɔamesi ma ta.” Eya ta le gɔmesese si nu wozã dzonɔameme ɖo le Biblia me nu la, efiaa nu si yi ŋgɔ wu didi vevie tsɔtsɔ ti nane yome, abe ale si amewo wɔna le kamedefefe si wolɔ̃na vevie gome ene. David ƒe dzonɔamemea nye ŋuʋaʋã nyuitɔ, efia mɔmaɖemaɖe ɖe tsitretsiɖeŋu alo vlodoame ŋu, didi vevie be woakpɔ ŋkɔ nyui aɖe ta alo woaɖɔ nu si wogblẽ le ame aɖe ŋu la ɖo.
11. Nu kae ʋã Yesu wòwɔ nu dzonɔamemetɔe?
11 Menye vodadae Yesu ƒe nusrɔ̃lawo wɔ esi woɖo ŋku David ƒe nyawo dzi esime wokpɔ nu si Yesu wɔ le gbedoxɔa me o. Menye esi Yesu nyae be ele na ye be yeawɔ yeƒe subɔsubɔdɔa le ɣeyiɣi ɖoɖi aɖe me ta koe wòwɔ dɔ kutrikukutɔe nenema gbegbe ɖo o, ke boŋ dzonɔameme—alo ŋuʋaʋã—ɖe Fofoa ƒe ŋkɔ kple tadedeagu dzadzɛa ŋu ye ʋãe. Esi wòde dzesi vlodoame kple busunya siwo amewo li kɔ ɖe Mawu ƒe ŋkɔa dzi la, esɔ be wòwɔ nu kple dzonɔameme alo ʋã ŋu, eye wòɖe afɔ tsɔ ɖɔ nɔnɔmea ɖo. Esi Yesu kpɔ ɖokuibɔbɔla siwo subɔsubɔhakplɔlawo te ɖe anyi hewɔ fu wo la, dzo si le eme la ʋãe wòhe gbɔdzɔe vae na ame siawo, eye esia wɔe hã be wògblɔ fɔbuamenya siwo nu sẽ la na subɔsubɔhakplɔla siwo wɔa fu amewo.—Mat. 9:36; 23:2, 4, 27, 28, 33.
Dzo Nenɔ Mewò Ðe Tadedeagu Vavãtɔ Ŋu
12, 13. (a) Nu kae Kristodukɔa ƒe subɔsubɔhakplɔlawo wɔ Mawu ƒe ŋkɔa? (b) Eye nu kae wowɔ Mawu ƒe Fiaɖuƒea?
12 Nɔnɔme siwo ame siwo gblɔna be yewole Mawu subɔm egbea ɖena fiana la sɔ kple esiwo Yesu ƒe ɣeyiɣia me tɔwo ɖe fia, ɖewohĩ, míaƒe ŋkekea me tɔwo tɔ vɔ̃ɖi wu kura. Le kpɔɖeŋu me, ɖo ŋku edzi be esi Yesu nɔ gbedodoɖa fiam eyomedzelawo la, efia wo be nu gbãtɔ si ŋu woaƒo nu tso ye nye Mawu ƒe ŋkɔa, ahabia be wòna eƒe “ŋkɔ ŋuti nakɔ.” (Mat. 6:9) Ðe subɔsubɔhakplɔlawo, vevietɔ Kristodukɔa ƒe sɔlemehakplɔlawo, fiaa Mawu ƒe ŋkɔa amewoa? Eye ɖe wofiaa wo be woakɔ ŋkɔ ma ŋu alo ade bubu eŋua? Ðe ema teƒe la, wogblẽ Mawu ŋu to alakpanufiafiawo, abe Mawuɖekaetɔ̃, luʋɔ makumaku, kple dzo mavɔ ene dzi, si wɔe be Mawu va dzena na amewo abe ame manyatalenu aɖe, si gɔme womate ŋu ase o, abe ŋutasẽla, kple tagbɔsesẽtɔ gɔ̃ hã ene. Wohe vlodoame va Mawu dzi to woƒe ŋukpenanuwɔwɔ kple alakpanuwɔwɔwo dzi. (Mixlẽ Romatɔwo 2:21-24.) Gakpe ɖe eŋu la, wowɔ nu sia nu si woate ŋui be yewoaɣla Mawu ƒe ŋkɔ ŋutɔŋutɔa, ale gbegbe be woɖee ɖa le woƒe Biblia gɔmeɖeɖewo me gɔ̃ hã. Woto esia dzi xe mɔ na amewo be woagate ɖe Mawu ŋu alo anɔ ƒomedodo kplikplikpli me kplii o.—Yak. 4:7, 8.
13 Yesu gafia eyomedzelawo be woado gbe ɖa abia Mawu Fiaɖuƒea ale: “Wò fiaɖuƒe nava. Wò lɔlɔ̃nu nava eme le dziƒo, kple anyigba dzi hã.” (Mat. 6:10) Togbɔ be Kristodukɔa ƒe subɔsubɔhakplɔlawo gblɔa gbedodoɖa sia me nyawo edziedzi hã la, wodea dzi ƒo na amewo be woade dunyahehabɔbɔwo kple amegbetɔwo ƒe nuɖoanyi bubuwo dzi. Gawu la, woɖia gbɔ ame siwo dzea agbagba vevie be yewoaɖe gbeƒã ahaɖi ɖase tso Mawu Fiaɖuƒea ŋu. Nu si do tso emee nye be ame siwo gblɔna be Kristotɔwo yewonye la dometɔ geɖe megaƒoa nu tso Mawu Fiaɖuƒea ŋu kaka ahayi edzi xɔ ge ase o.
14. Aleke Kristodukɔa ƒe sɔlemehakplɔlawo tɔ tsi Mawu ƒe Nya lae?
14 Yesu gblɔ na Mawu le gbedodoɖa me be: “Wò nya la nye nyateƒe.” (Yoh. 17:17) Eye hafi Yesu nadzo le anyigba dzi ayi dziƒo la, egblɔe eme kɔ be yeaɖo “kluvi nyateƒetɔ kple aɖaŋudzela” aɖe be wòana gbɔgbɔmenuɖuɖu yeƒe amewo. (Mat. 24:45) Togbɔ be Kristodukɔa ƒe sɔlemehakplɔlawo ƒua asi akɔ be yewoe fiaa Mawu ƒe Nyaa amewo hã la, ɖe wote ŋu wɔ nuteƒe le dɔ si Aƒetɔ la de kluvia si mea? Ao. Ðe wogblɔna boŋ be nu siwo le Biblia me la nye gliwo kple nya kpakpawo. Le esi woanyi woƒe hameviwo kple gbɔgbɔmenuɖuɖu si ana dzidzeme kple numekɔkɔ wo teƒe la, hakplɔlawo tsɔ amegbetɔwo ƒe xexemenunya lũ to me na wo yomedzelawo. Tsɔ kpe ɖe eŋu la, wotɔ tsi Mawu ƒe agbe nyui nɔnɔ ƒe dzidzenuwo ale be woadze woƒe hameviwo ŋu.—2 Tim. 4:3, 4.
15. Aleke nèsena le ɖokuiwò me ɖe nu siwo katã sɔlemehakplɔlawo wɔ le Mawu ƒe ŋkɔ me la ŋu?
15 Nu siwo katã wowɔ, hegblɔ be Mawu si na amewo ŋlɔ Biblia ƒe ŋkɔ mee yewowɔ wo le, la na dzi ɖe le dzianukwaretɔ geɖe ƒo eye womegaxɔ Mawu kpakple Biblia dzi se kura o. Satana kple eƒe nuɖoanyi vɔ̃ɖi sia ƒe mɔ̃ ɖe wo. Ne èkpɔ nu siawo siwo le dzɔdzɔm tso ŋkeke yi ŋkeke alo nèse nu tso wo ŋu la, alekee nèsena le ɖokuiwò me? Abe Yehowa subɔla ene la, ne ède dzesi vlodoame kple busunya siwo woli kɔ ɖe Mawu ƒe ŋkɔa dzi la, ɖe esia meʋãa wò be nàwɔ nu sia nu si nàte ŋui atsɔ aɖɔ nu gbegblẽa ɖo oa? Ne èkpɔ dzianukwaretɔ siwo blem wole eye wole wo bam la, ɖe mèsena le ɖokuiwò be yeafa akɔ na luʋɔ siwo tem wole ɖe anyi la oa? Esi Yesu kpɔ ame siwo “wowɔ fu” eye “woka hlẽ abe alẽ siwo nu kplɔla aɖeke mele o la ene” la, menye ɖeko woƒe nu wɔ nublanui nɛ ko evɔ o, ke “[ete] nu geɖewo fiafia wo” hã. (Mat. 9:36; Mar. 6:34) Susu geɖe li siwo tae wòle be dzo nanɔ mía me ɖe tadedeagu vavãtɔ ŋu abe ale si wònɔ le Yesu gome ene.
16, 17. (a) Nu kae wòle be wòaʋã mí míaku kutri le subɔsubɔdɔa me? (b) Nu ka mee míadzro le nyati si kplɔe ɖo me?
16 Ne dzo nɔa mía me ɖe subɔsubɔdɔa ŋu la, gɔmesese tɔxɛ va sua mía si ku ɖe apostolo Paulo ƒe nya siwo le 1 Timoteo 2:3, 4 la ŋu. (Xlẽe.) Menye esi míenya be míele ŋkeke mamlɛawo me ta koe míewɔa dɔ kutrikukutɔe le gbeadzi ɖo o, ke esi míenyae be enye Mawu ƒe lɔlɔ̃nu hã tae. Edi be nyateƒe ƒe sidzedze vavãtɔ la nasu amewo si ale be woasrɔ̃ ale si woade ta agu nɛ ahasubɔe bene wòayra wo. Eye menye esi ɣeyiɣi vi aɖe koe susɔ ta koe míaƒe dzi ʋãa mí be míaku kutri le subɔsubɔdɔa me o, ke esi míedi be míade bubu Mawu ƒe ŋkɔa ŋu ahakpe ɖe amewo ŋu be woanya eƒe lɔlɔ̃nu tae. Ɛ̃, dzo le mía me ɖe tadedeagu vavãtɔa ŋu.—1 Tim. 4:16.
17 Abe Yehowa ƒe amewo ene la, wotsɔ tameɖoɖo si le Mawu si na ameƒomea kple anyigba la ŋuti nyateƒea ƒe sidzedze yra mí. Míate ŋu akpe ɖe amewo ŋu woakpɔ dzidzɔ eye etsɔmemɔkpɔkpɔ si ŋu kakaɖedzi le la nasu wo si. Míate ŋu afia nu si woawɔ be woakpɔ wo ta ne tsɔtsrɔ̃ va Satana ƒe nuɖoanyi sia dzi la wo. (2 Tes. 1:7-9) Le esi míatsi dzimaɖi alo dzi naɖe le mía ƒo, le esi wòdze abe ɖe Yehowa ƒe ŋkekea le hehem ɖe megbe ene teƒe la, ele be wòanye dzidzɔ na mí boŋ be ɣeyiɣi gakpɔtɔ li be míatsɔ dzo ɖe tadedeagu vavãtɔa ŋu. (Mixa 7:7; Xab. 2:3) Alekee míatu dzonɔameme sia ɖo? Míadzro esia me le nyati si kplɔe ɖo me.
Àte Ŋu Aɖe Wo Mea?
• Nu kae ʋã Yesu wòwɔ dɔ kutrikukutɔe le eƒe subɔsubɔdɔa katã me?
• Gɔmesese kae le nya “dzonɔameme” ŋu le ale si wozãe le Biblia me nu?
• Nu kawo kpɔm míele egbea si wòle be wòaʋã mí be dzo nanɔ mía me ɖe tadedeagu vavãtɔ ŋu?
[Nɔnɔmetata si le axa 8]
Yesu ƒe susu katã nɔ Fofoa ƒe lɔlɔ̃nu wɔwɔ kple lɔlɔ̃ɖeɖefia ehavi amegbetɔwo ŋu
[Nɔnɔmetata si le axa 10]
Susu geɖewo li siwo tae wòle be dzo nanɔ mía me ɖe tadedeagu vavãtɔ ŋu