Ame Kae Nye Ame Vevitɔ Kekeake Le Wò Agbe Me?
“Wò ɖeɖe koe ɖo kpo ɖe anyigba blibo la dzi!”—PS. 83:19.
1, 2. Nu ka tae Yehowa ƒe ŋkɔ ɖeɖe ko nyanya mesɔ gbɔ hena ɖeɖekpɔkpɔ o?
ÐEWOHĨ zi gbãtɔ si nèkpɔ Yehowa ƒe ŋkɔ lae nye gbe si gbe wotsɔe fia wò le Psalmo 83:19. Anya wɔ nuku na wò esi nèxlẽ nya siwo le afi ma be: “Ne woadze sii be, ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi!” Tso ɣemaɣi la, ɖikeke mele eme o be èzã mawunyakpukpui ma tsɔ kpe ɖe ame bubuwo ŋu wova nya mía Mawu lɔ̃ame, Yehowa.—Rom. 10:12, 13.
2 Togbɔ be ele vevie be amewo nanya Yehowa ƒe ŋkɔ hã la, ŋkɔa nyanya ɖeɖe ko mesɔ gbɔ o. De dzesi ale si hakpala la te gbe ɖe nyateƒe bubu aɖe si hiã vevie hena míaƒe ɖeɖekpɔkpɔ dzi, esi wògblɔ be: “Wò ɖeɖe koe ɖo kpo ɖe anyigba blibo la dzi!” Ɛ̃, Yehowa ye nye Ame vevitɔ kekeake le xexe bliboa katã me—tso dziƒo va se ɖe anyigba dzi. Esi wònye be eyae nye nu sia nu Wɔla ta la, gome le esi be wòabia tso eƒe nuwɔwɔwo katã si be woabɔbɔ ɖe yeƒe ŋusẽ te bliboe. (Nyaɖ. 4:11) Eya ta le susu nyui aɖe ta la, ele be míabia mía ɖokuiwo be, ‘Ame kae nye ame vevitɔ kekeake nam le nye agbe me?’ Ele be míade ŋugble le ale si míaɖo nyabiase ma ŋu la ŋu vevie!
Nya Si Do Mo Ða Le Eden Bɔa Me
3, 4. Nu ka tae Satana te ŋu ble Xawa, eye nu kae do tso eme?
3 Míate ŋu akpɔ ale si gbegbe nyabiase sia le vevie la kɔtɛ le nu siwo dzɔ le Eden bɔa me la me. Le afi ma la, mawudɔla dzeaglã, si wova yɔ emegbe be Satana Abosam, la ble nyɔnu gbãtɔ, Xawa, be wòawɔ eya ŋutɔ ƒe didiwo dzi le esi teƒe be wòawɔ ɖe Yehowa ƒe sedede be woagaɖu atsi aɖe ƒe tsetse o la dzi. (1 Mose 2:17; 2 Kor. 11:3) Xawa ɖe mɔ Satana blee, eye wòto esia me ɖee fia be yemedea bubu Yehowa ƒe dziɖulanyenye ŋu o. Xawa mebu Yehowa be eyae nye Ame vevitɔ kekeake na ye le yeƒe agbe me o. Gake alekee Satana wɔ te ŋu ble Xawa?
4 Satana zã ayemɔ vovovo siwo menya kpɔna bɔbɔe o la le dze si wòɖo kple Xawa la me. (Mixlẽ 1 Mose 3:1-5.) Gbã la, Satana mezã Yehowa ƒe ŋkɔ ŋutɔŋutɔ o. Ðeko wòƒo nu tso “Mawu” ŋu ko. Gake nu si to vovo na ema ye nye be, ame si ŋlɔ Mose ƒe Agbalẽ Gbãtɔa ya zã Yehowa ƒe ŋkɔ ŋutɔŋutɔa le ta etɔ̃ lia ma ƒe kpukpui gbãtɔa me. Evelia, le esi Satana naƒo nu tso “se” si Mawu de la ŋu teƒe la, ɖeko wòbia nya tso nya si Mawu “gblɔ” ŋu. (1 Mose 2:16) To ayemɔ sia dzi la, Satana anya dze agbagba be yeana Xawa nabui be se ma menye ŋkubiãnya o. Etɔ̃lia, togbɔ be Xawa ɖeɖe ko wònɔ nu ƒom na hã la, ezã ŋkɔteƒenɔnya agbɔsɔsɔfiatɔ si nye “mi.” To esia wɔwɔ me la, Satana anya nɔ agbagba dzem be yeana dada nage ɖe Xawa me, kple susu be yeana wòase le eɖokui me be yele vevie kaka glo—abe ɖe eya, Xawa, ye nye woa kple srɔ̃aŋutsua ƒe nyanuɖela ene. Nu kae do tso eme? Edze ƒãa be Xawa ɖoe dadatɔe be yeaƒo nu ɖe ye kple ye srɔ̃a nu, esi wògblɔ na da la be: “Míeɖua abɔmetiawo ƒe tsetse faa.”
5. (a) Nu kawo ŋue Satana na Xawa tsɔ eƒe susu ɖo? (b) Esi Xawa ɖu atikutsetsea la, nu kae wòɖe fia?
5 Satana blu afɔ na nyateƒea hã. Enɔ fiafiam be Mawu tɔ medzɔ be wòade se na Adam kple Xawa be ‘wòagaɖu abɔmetiawo katã ƒe tsetse aɖeke o.’ Eyome la, Satana na Xawa va nɔ eya ŋutɔ ɖokui kple ale si wòawɔ nu nadze edzi nɛ wu, be yeava nɔ “abe Mawu ene,” ŋu bum, evɔ wòhenye ameflunya hafi. Mlɔeba la, ena wòva nɔ atia kple eƒe kutsetsea ŋu bum le esi teƒe be eƒe susu nanɔ woa kple Ame si na nu sia nui la dome ƒomedodoa ŋu. (Mixlẽ 1 Mose 3:6.) Nublanuitɔe la, esi Xawa ɖu atikutsetsea la, eto esia me ɖee fia be menye Yehowa ye yebuna Ame vevitɔ kekeake le yeƒe agbe me o.
Nya Si Fɔ Ðe Te Le Hiob Ƒe Ŋkekea Me
6. Aleke Satana tsɔ nya ɖe Hiob ƒe fɔmaɖimaɖi ŋu, eye le esia ta, mɔnukpɔkpɔ kae wona Hiob?
6 Ƒe alafa geɖewo megbe la, mɔnukpɔkpɔ su nuteƒewɔla Hiob si be wòaɖe ame si wòbuna Ame vevitɔ kekeake le eƒe agbe la afia. Esi Yehowa ƒo nu tso Hiob ƒe agbenɔnɔ fɔmaɖitɔe ŋu na Satana la, Satana ɖo eŋu dzikutɔe be: “Dzodzroe Hiob vɔ̃a Mawua?” (Mixlẽ Hiob 1:7-10.) Satana megblɔ be Hiob meɖoa to Mawu o. Ke boŋ susu si tae wòsubɔa Mawu ɖo la ŋue wòtsɔ nya ɖo. Etso Hiob nu ayetɔe be, ɖokuitɔdidi tae wòsubɔa Yehowa ɖo, ke menye esi wòlɔ̃e tae o. Hiob ɖeɖe koe ate ŋu aɖo amenutsonya ma ŋu, eye wona mɔnukpɔkpɔe be wòawɔ esia.
7, 8. Tetekpɔ kawo mee wònɔ na Hiob be wòato, eye nu kae wòɖe fia to eƒe dzidodo nuteƒewɔwɔtɔe la dzi?
7 Yehowa ɖe mɔ Satana he afɔku vovovowo va Hiob dzi ɖe wo nɔewo yome. (Hiob 1:12-19) Aleke Hiob wɔ nui esi afɔku siawo va edzi? Nuŋlɔɖia gblɔ be, ‘mewɔ nu vɔ̃ o, eye mebu vɔ̃ aɖeke ɖe Mawu ŋu o.’ (Hiob 1:22) Gake ema mede eme na Satana o. Egato nyatoƒoe be: ‘Ŋutigbalẽ ɖe ŋutigbalẽ teƒe, eye amegbetɔ atsɔ nu siwo katã le esi la, ana ɖe eƒe agbe ta.’a (Hiob 2:4) Satana susui be, ne yehe fukpekpe va Hiob ŋutɔ dzi la, atso nya me be menye Yehowae nye Ame vevitɔ kekeake na ye le yeƒe agbe me o.
8 Dɔléle nyɔŋu aɖe na Hiob ƒe ŋuti katã gblẽ, eye srɔ̃a ƒo nya ɖe enu be wòagbe nu le Mawu gbɔ ne wòaku. Emegbe, yeaɖi akɔfala etɔ̃ aɖewo bu fɔe be agbe baɖa aɖee wòanya nɔ tae. (Hiob 2:11-13; 8:2-6; 22:2, 3) Gake le fukpekpe siawo katã me la, Hiob gbe be yemaɖe asi le yeƒe fɔmaɖimaɖi ŋu o. (Mixlẽ Hiob 2:9, 10.) Edo dzi to fukpekpeawo me nuteƒewɔwɔtɔe tsɔ ɖee fia be Yehowa ye nye Ame vevitɔ kekeake na ye le yeƒe agbe me. Hiob ɖee fia hã be anya wɔ be amegbetɔ madeblibo naɖo Abosam ƒe alakpanutsotso la ŋu, togbɔ be ŋuɖoɖoa made blibo o hã.—Tsɔe sɔ kple Lododowo 27:11.
Yesu Ƒe Nyaŋuɖoɖo Deblibo La
9. (a) Alekee Satana dze agbagba be yeawɔ dɔ si nɔ Yesu wum la ŋu dɔ atsɔ atee kpɔ? (b) Aleke Yesu wɔ nu le tetekpɔ sia me?
9 Ɣeyiɣi kpui aɖe le Yesu ƒe nyɔnyrɔxɔxɔ megbe la, Satana te kpɔ be yeablee wòadi eɖokui tɔ, tsɔ wu be wòakpɔtɔ abu Yehowa be eyae nye Ame vevitɔ kekeake na ye le yeƒe agbe me. Abosam te Yesu kpɔ zi etɔ̃. Gbã la, edze agbagba be yeawɔ ŋutilã ƒe nudzodzro ŋu dɔ atsɔ ate Yesu kpɔ wòatrɔ kpewo woazu abolo wòaɖu ne wòatsɔ atsi eƒe dɔwuamea nu. (Mat. 4:2, 3) Ðeko Yesu tsi nu dɔ ŋkeke 40 koe nye ema, eye dɔ nɔ ewum vevie. Eya ta Abosam de dzi ƒo nɛ be wòazã eƒe nukunuwɔwɔ ƒe ŋusẽa atsɔ awɔ nuɖuɖu aɖu. Alekee Yesu wɔ nui? To vovo na Xawa la, Yesu ƒe susu nɔ Yehowa ƒe Nya ŋu, eye wògbe nu si Satana tsɔ nɔ etem kpɔ la enumake.—Mixlẽ Mateo 4:4.
10. Nu ka tae Satana te Yesu kpɔ be wòati kpo tso gbedoxɔa tame?
10 Satana dze agbagba hã be yeate Yesu kpɔ wòawɔ nu dadatɔe. Edo adikã kple Yesu be wòati kpo tso gbedoxɔa tame. (Mat. 4:5, 6) Nu kae nye Satana ƒe taɖodzinu? Satana le gbɔgblɔm be, ne Yesu ti kpo dze anyigba eye nu vevi aɖeke mewɔe o la, esia aɖo kpe edzi be “Mawu ƒe vie” wònye. Edze ƒãa be Abosam di be yeana Yesu natsi dzi ɖe ŋkɔ si le eŋu la ŋu ale gbegbe be wòawɔ nu be amewo nakpɔ, ne woakafu ye. Satana nyae be dada ate ŋu awɔe be ame nalɔ̃ be yeawɔ nu si me afɔku le gɔ̃ hã kple susu be yemagaɖu ŋukpe le ame bubuwo ŋkume o. Satana wɔ mawunyakpukpui aɖe ŋu dɔ le mɔ gbegblẽ nu, gake Yesu ɖee fia be yese Yehowa ƒe Nya la gɔme bliboe. (Mixlẽ Mateo 4:7.) Esi Yesu gbe adikã ma la, eto esia me gaɖo kpe edzi be Yehowa ye nye Ame vevitɔ kekeake na ye le yeƒe agbe me.
11. Nu ka tae Yesu gbe be yemaxɔ xexea me fiaɖuƒewo katã si Satana tsɔ ɖo eŋkume la o?
11 Satana tsɔ ŋkubiã te Yesu kpɔ zi mamlɛtɔ hetsɔ xexea me fiaɖuƒewo katã ɖo eŋkume. (Mat. 4:8, 9) Yesu gbe nu mawo enumake. Ekpɔe be, ne yexɔ nu mawo la, afia be yegbe Yehowa ƒe dziɖuɖu—anye nugbegbe le gome si le Mawu si be wòanye Dziƒoʋĩtɔ la gbɔ. (Mixlẽ Mateo 4:10.) Le dodokpɔawo dometɔ ɖe sia ɖe me la, Yesu yɔ mawunyakpukpui siwo me Yehowa ƒe ŋkɔ ŋutɔŋutɔ dze le la tsɔ ɖo nya ŋu na Satana.
12. Nyametsotso sesẽ kae dze ŋgɔ Yesu esi eƒe anyigba dzi subɔsubɔdɔa ƒe nuwuwu gogo, eye nu kae míesrɔ̃ tso ale si wòwɔ nui le nyametsotsoa wɔwɔ me la me?
12 Esi Yesu ƒe anyigba dzi subɔsubɔdɔa ƒe nuwuwu gogo la, nyametsotso vevi aɖe ŋutɔ dze ŋgɔe. Le eƒe subɔsubɔdɔa katã me la, egblɔ be yelɔ̃ faa be yeatsɔ yeƒe agbe ana abe vɔsa ene. (Mat. 20:17-19, 28; Luka 12:50; Yoh. 16:28) Ke hã Yesu kpɔe dze sii be wole ye nu tso ge alakpatɔe, eye Yudatɔwo ƒe ʋɔnudrɔ̃ƒea abu fɔ ye, eye woawu ye abe busunyagblɔla ene. Eƒe ku le mɔ sia nu te ɖe edzi vevie ŋutɔ. Edo gbe ɖa be: “Fofonye, ne anya wɔ la, na kplu sia nato ŋunye ayi.” Gake egblɔ yi edzi be: “Ke hã, menye abe ale si medi ene o, ke boŋ abe ale si nèdi ene.” (Mat. 26:39) Ɛ̃, Yesu ƒe nuteƒewɔwɔ yi ɖase ɖe keke ku me ke ɖe ame si nye Ame vevitɔ kekeake nɛ le eƒe agbe me la fia kɔtɛ ɖikekemanɔmee!
Ale Si Míawo Hã Míaɖo Nya La Ŋu
13. Va se ɖe afi sia la, nu kae míesrɔ̃ tso Xawa, Hiob, kple Yesu Kristo ƒe kpɔɖeŋuawo me?
13 Nu kae míesrɔ̃ va se ɖe fifia? Le Xawa ƒe nyaa me la, nu si míesrɔ̃ ye nye be, ame siwo naa ta le ɖokuitɔdidi ƒe nudzodzrowo alo ame ɖokui ŋu dzedze ƒe tetekpɔwo me la ɖenɛ fiana be menye Yehowa ye nye Ame vevitɔ kekeake le yewoƒe agbe me o. To vovo na ema la, nu si míesrɔ̃ tso Hiob ƒe nuteƒewɔwɔa mee nye be, amegbetɔ madeblibowo gɔ̃ hã ate ŋu aɖee afia be Yehowa ƒe lɔlɔ̃nu wɔwɔ ye le vevie na yewo wu le agbe me ne wodo dzi le fukpekpewo me nuteƒewɔwɔtɔe—nenye be womese susu si tae nɔnɔme sesẽ mawo le wo dzi vam ɖo gɔme bliboe o gɔ̃ hã. (Yak. 5:11) Eye mlɔeba Yesu ƒe kpɔɖeŋua fia mí be, míalɔ̃ faa be woado ŋukpe mí eye míagatsi dzi fũu akpa ɖe ale si amewo abu míi la ŋu o. (Heb. 12:2) Gake aleke míate ŋu awɔ nufiame siawo ŋu dɔ?
14, 15. Aleke Yesu ƒe nuwɔna le tetekpɔ me to vovo na Xawa tɔe, eye alekee míate ŋu asrɔ̃ Yesu ƒe kpɔɖeŋu? (Ƒo nu tso nɔnɔmetata si le axa 18 lia ŋu.)
14 Mègaɖe mɔ gbeɖe be tetekpɔwo nana nàŋlɔ Yehowa be o. Xawa ɖe mɔ wona eƒe susu va nɔ nu si wotsɔ nɔ etem kpɔ la ŋu. Ekpɔe be atikutsetsea “nyo na ɖuɖu, ebiã ŋu na ame, eye wòdzroa ame.” (1 Mose 3:6) Aleke eƒe nuwɔna to vovo na ale si Yesu wɔ nu le tetekpɔ etɔ̃awo mee nye esi! Le tetekpɔawo dometɔ ɖe sia ɖe me la, Yesu kpɔa nu yia ŋgɔ wu nu si wotsɔ le etem kpɔ, eye wòbua nu siwo ado tso eƒe nuwɔnawo me ŋu. Eɖo ŋu ɖe Mawu ƒe Nya la ŋu, eye wòzã Yehowa ƒe ŋkɔ hã.
15 Ne wote mí kpɔ be míawɔ nu siwo medzea Yehowa ŋu o la, nu ka ŋue míetsɔa míaƒe susu ɖona? Zi ale si míetsɔ míaƒe susu ɖo nu si wotsɔ le mía tem kpɔ dzi la, zi nenemae nu gbegblẽa wɔwɔ adzro mí vevie. (Yak. 1:14, 15) Ele be míawɔ nu kpata aho dzodzro ma ɖa le míaƒe dzi me, ne afɔ ma ɖeɖe adze nu sesẽ ŋutɔ, abe míaƒe ŋutinu aɖe hoho alo elalã ɖa ene, gɔ̃ hã. (Mat. 5:29, 30) Abe Yesu ene la, ele be míabu nu siwo ado tso míaƒe nuwɔnawo me, si nye ale si woakpɔ ŋusẽ ɖe mía kple Yehowa dome ƒomedodoa dzi, la ŋu. Ele be míaɖo ŋku nya si eƒe Nya, Biblia la, gblɔ dzi. Mɔ sia dzi koe míate ŋu ato aɖee afia be Yehowa ye nye Ame vevitɔ kekeake na mí le míaƒe agbe me.
16-18. (a) Nu kawoe ate ŋu awɔe be nu nate ɖe mía dzi vevie? (b) Nu kae akpe ɖe mía ŋu be míado dzi le nɔnɔme donuxaxanamewo me?
16 Mègaɖe mɔ gbeɖe be afɔku siwo dzɔ ɖe dziwò nana nàdo dziku ɖe Yehowa ŋu o. (Lod. 19:3) Esi xexe vɔ̃ɖi sia ƒe nuwuwu le aƒe tum la, dzɔdzɔmefɔkuwo kple afɔku bubuwo le nu gblẽm le Yehowa ƒe ame geɖewo ŋu wu tsã. Míekpɔa mɔ le ɣeyiɣi sia me be woakpɔ mía ta nukutɔe o. Togbɔ be ele alea hã la, abe Hiob ene la, nu ate ŋu ate ɖe mía dzi vevie ne míaƒe ame veviwo ku alo míawo ŋutɔwo míele nɔnɔme sesẽ aɖewo me tom.
17 Hiob mese nu si tae Yehowa ɖe mɔ nanewo dzɔ ɖo la gɔme o, eye ɣeaɖewoɣi la, míate ŋu ase nu si tae nu baɖa aɖewo dzɔ ɖo la gɔme o. Ðewohĩ míesee be mía nɔvi wɔnuteƒe aɖewo ku le anyigbaʋuʋu aɖe me, abe ale si wòdzɔ le Haiti ene, alo woku le dzɔdzɔmefɔku bubu aɖe me. Alo ɖewohĩ míesee be wowu mía nɔvi wɔnuteƒe aɖe ŋutasesẽtɔe, alo eku le afɔku dziŋɔ aɖe me. Alo kura gɔ̃ hã, ate ŋu adzɔ be nɔnɔme donuxaxaname aɖe, alo nane si míebu be enye nu madzɔmadzɔ wɔwɔ ɖe mía ŋu la nawɔe be míanɔ veve sem. Míaƒe vevesesea ate ŋu ana míagblɔ le míaƒe dzi me be: ‘Yehowa, nu ka tae? Nu ka ta dzinyee wòadzɔ ɖo? Nu vɔ̃ kae mewɔ?’ (Xab. 1:2, 3) Nu kae akpe ɖe mía ŋu míado dzi le ɣeyiɣi siawo tɔgbi me?
18 Ele be míakpɔ nyuie be míagasusu be nudzɔdzɔ mawo nye kpeɖodzi be Yehowa megakpɔ ŋudzedze ɖe mía ŋu o. Yesu te gbe ɖe nya sia dzi esi wòƒo nu tso afɔku eve aɖewo siwo dzɔ le eƒe ŋkekea me ŋu. (Mixlẽ Luka 13:1-5.) Afɔku geɖewo nyea “azãgbe kple nuɖiɖeame.” (Nyagb. 9:11) Gake nu ka kee ɖana míele nu xam o, míate ŋu ado dzi ne míaƒe susu le “akɔfafa katã ƒe Mawu” la ŋu. Ana ŋusẽ si hiã la mí míayi edzi awɔ nuteƒe.—2 Kor. 1:3-6.
19, 20. Nu kae kpe ɖe Yesu ŋu wòdo dzi le gbɔɖiamenu siwo wowɔ ɖe eŋu me, eye nu kae ate ŋu akpe ɖe mía ŋu míawɔ nu nenema ke?
19 Mègaɖe mɔ gbeɖe dada alo vɔvɔ̃ na ŋukpe nana nàtsi dzi fũu akpa o. Yesu ƒe ɖokuibɔbɔ na ‘wòɖi gbɔlo eɖokui, eye wòtsɔ kluvi ƒe nɔnɔme ɖo eɖokui dzi.’ (Flp. 2:5-8) Ete ŋu do dzi to gbɔɖiamenu geɖe siwo wowɔ ɖe eŋu la me, elabena eɖo ŋu ɖe Yehowa ŋu. (1 Pet. 2:23, 24) To esia wɔwɔ me la, Yesu tsɔ Yehowa ƒe lɔlɔ̃nu wɔwɔ ɖo nɔƒe gbãtɔ, eye esia wɔe be wodoe ɖe dzi wòle nɔƒe kɔkɔ aɖe. (Flp. 2:9) Yesu de dzi ƒo na eƒe nusrɔ̃lawo be woawo hã nawɔ nenema ke.—Mat. 23:11, 12; Luka 9:26.
20 Ɣeaɖewoɣi la, xɔse ƒe dodokpɔ aɖewo ate ŋu aɖe fu na mí vevie. Ke hã ele be kakaɖedzi nanɔ mía si abe apostolo Paulo ene, ame si gblɔ be: “Nu sia tututu tae nye hã mele nu siawo ƒe fu kpem ɖo, gake ŋu mekpeam o. Elabena menya ame si dzi mexɔ se, eye meka ɖe edzi be ate ŋu adzɔ nu si metsɔ de esi la ŋu va se ɖe ŋkeke ma dzi.”—2 Tim. 1:12.
21. Togbɔ be xexea ɖea ɖokuitɔdidi ƒe gbɔgbɔ fiana hã la, nu kae nèɖo kplikpaa be yeawɔ?
21 Biblia gblɔ ɖi be, le míaƒe ŋkekea me la, amewo anye “ɖokuilɔ̃lawo.” (2 Tim. 3:2) Eya ta ɖikeke mele eme o be, tɔnye-ko-nenyo ƒe gbɔgbɔ koe ame siwo dome míele la ɖena fiana. Migana míaɖe mɔ gbeɖe be ɖokuitɔdidi ƒe gbɔgbɔ sia nage ɖe mía me o! Ke boŋ míeɖale tetekpɔwo me tom o, afɔkuwoe ɖadzɔ ɖe mía dzi o, alo amewoe ɖadze agbagba be yewoaɖi gbɔ mí o, mina mí katã míaɖoe kplikpaa aɖee afia be Yehowa ye nye Ame vevitɔ kekeake na mí le míaƒe agbe me vavã!
[Etenuŋɔŋlɔ]
a Biblia ŋuti nunyala aɖewo susu be nyagbɔgblɔ si nye ‘ŋutigbalẽ ɖe ŋutigbalẽ teƒe’ la ate ŋu afia be, ɖokuitɔdidi ana Hiob nalɔ̃ be ye viwo kple yeƒe lãwo nabu woƒe ŋutigbalẽ, alo woƒe agbe, ne akpɔ eya ŋutɔ ƒe ŋutigbalẽ, alo eƒe agbe ta ko. Nunyala bubuwo susu be, nyagbɔgblɔ ma le gbe tem ɖe edzi be, ame alɔ̃ abu eƒe ŋutilã ƒe akpa aɖe, ne esia ana wòakpɔ eƒe agbe ta. Le kpɔɖeŋu me, ame ate ŋu ado eƒe abɔ ɖe dzi atsɔ axɔ kɔ aɖe si wodi be woatu ta nɛ, eye esia fia be ebu eƒe ŋutilã ƒe akpa aɖe tsɔ kpɔ eɖokui ta. Nu ka kee adagana la ɖafia o, edze ƒãa be, efia be, Hiob alɔ̃ faa be yeaɖe asi le nu sia nu ŋu, ne ema ana yeakpɔ yeƒe agbe ta ko.
Nu Kae Míate Ŋu Asrɔ̃ Tso . . .
• ale si Satana ble Xawa la me?
• ale si Hiob wɔ nu le afɔku siwo dzɔ ɖe edzi me?
• nu si nye nu vevitɔ kekeake na Yesu la me?
[Nɔnɔmetata si le axa 17]
Xawa mete ŋu tsɔ eƒe susu ɖo woa kple Yehowa dome ƒomedodoa ŋu o
[Nɔnɔmetata si le axa 18]
Yesu gbe nu siwo Satana tsɔ ɖo eŋkume la, eye eƒe susu nɔ Yehowa ƒe lɔlɔ̃nu wɔwɔ ŋu
[Nɔnɔmetata si le axa 20]
Ðaseɖiɖi tso agbadɔ me yi agbadɔ me le Haiti ƒe anyigbaʋuʋua megbe
Le xaxaɣiwo la, míate ŋu atsɔ míaƒe susuwo aɖo “akɔfafa katã ƒe Mawu” la ŋu