Exlẽlawo Bia Be . . .

Ame Kae Wɔ Mawu?

▪ Biblia ɖo eŋu be menye ame aɖekee wɔ Mawu o. Mawu li tso tititi ke. Esesẽna be míase egɔme be Mawu li tso mavɔ me yi mavɔ me, gake míate ŋu agbe lɔlɔ̃ ɖe nya sia dzi le esi egɔmesese sesẽ na mí ta ko o.

Ðe susu le eme be míadi be míase Mawu ƒe mɔwo katã gɔmea? Apostolo Paulo gblɔ be: “Oo, Mawu ƒe kesinɔnuwo kple nunya kpakple sidzedze me goglo loo! Aleke seɖoƒe meli na eƒe ʋɔnudɔdrɔ̃wo me dzodzro o, eye eƒe mɔwo mele nyanya me o ye nye esi!” (Romatɔwo 11:33) Míaƒe susu mate ŋu ase Mawu ƒe nunya kple eƒe sidzedze gɔme tsitotsito o, abe ale si ko ɖevi mate ŋu ase edzilawo ƒe mɔwo katã gɔme o ene. Togbɔ be Paulo ƒe nya mawo ku ɖe ale si Mawu ƒe nunya kple nublanuikpɔkpɔ le etɔxɛe ŋu hã la, egafia hã be míate ŋu ase Yehowa Mawu kple eƒe nuwɔnawo katã gɔme tsitotsito o. Eƒe kpɔɖeŋu ɖekae nye ale si wòwɔ va dzɔ. Gake míate ŋu aka ɖe nu si Biblia fia tso Mawu ŋu la dzi bliboe. Yesu Kristo gblɔ tso ŋɔŋlɔ kɔkɔeawo ŋu be wonye “nyateƒe.”—Yohanes 17:17.

Mose gblɔ na Yehowa le gbedodoɖa me be: “Wòe nye Mawu tso mavɔ me yi mavɔ me.” (Psalmo 90:2) Le afi sia la, Mose ƒe nyawo fia nu eve tso Mawu ƒe anyinɔnɔ ŋu. Gbãtɔe nye be anɔ anyi ɖaa tegbee. Yehowa nye “Ame si nɔa agbe tegbetegbe.” (Nyaɖeɖefia 4:10, Agbenya La) Esia fia be Mawu anɔ anyi ɖaa tegbetegbe. Eveliae nye be eli tso tititi. Esia fia be menye ame aɖekee wɔ Mawu o, eye menye ɖe wòva dzɔ hã o. Ke boŋ Mawu li tso mavɔmavɔ me ke.

Nu siwo míekpɔna o la gɔme sese sesẽna na mía dometɔ akpa gãtɔ. Gake míelɔ̃na ɖe nu siwo gɔme míesena bliboe o dzi ɣeaɖewoɣi.

Eya tae wòsɔ ŋutɔ be Mawu ɖeka koe wozãa dzesideŋkɔ si nye “Fia mavɔmavɔtɔ” na. (1 Timoteo 1:17) Bu eŋu kpɔ: Ðe wowɔ Yesu Kristo, mawudɔla akpeakpe siwo le dziƒo, kple amegbetɔ siwo le anyigba dzi la siaa. (Kolosetɔwo 1:15, 16) Gake menye nenemae wòle le Mawu ya gome o. Eya ta gbɔgblɔ be ame aɖe kokokoe anya wɔ Mawu si nye Wɔla la afɔ biabia si womate ŋu akpɔ ta na o ɖe te ku ɖe ame si wɔe ŋu. Nya lae nye be, Yehowa ɖeka koe nye ame si li “tso mavɔ me yi mavɔ me.” (Psalmo 90:2) Ne míagblɔe bubui la, Yehowa li hafi ‘ɣeyiɣi mavɔmavɔwo’ dze egɔme.—Yuda 25.

Gake menye ɖeko míalɔ̃ ɖe edzi dzro ko be Mawu li tso mavɔ me yi mavɔ me o. Ne míede ŋugble le gbe si Mose do ɖa ŋu nyuie la, ana míakpɔe be esi Mawu li tso mavɔ me yi mavɔ me ta la, míate ŋu aka ɖe ŋugbe nyui si wòdo na mí be míava nɔ agbe tegbee la dzi. Togbɔ be mí amegbetɔwo ƒe agbe nu mesẽna yina o hã la, wogblɔ le Mawu ya ŋu be enye ‘sitsoƒe na mí tso dzidzime yi dzidzime.’ Yehowa si nye mía Fofo lɔlɔ̃a la li tso mavɔmavɔ, eye anɔ anyi na eƒe amewo ɖaa tegbee. Ðe nya vavã sia mefa akɔ na wò ŋutɔ oa?—Psalmo 90:1.