Amenuveve Gã Aɖee Wònye Be Míanye Yehowa Tɔ
“Yehowa tɔ ye míenye.”—ROM. 14:8.
1, 2. (a) Mɔnukpɔkpɔ gã kae su mía si? (b) Biabia kawo mee míadzro?
MƆNUKPƆKPƆ gã aɖe ŋutɔe Yehowa tsɔ ɖo Israel dukɔa ŋkume, esi wògblɔ na wo be: “Mianye tɔnye koŋ le dukɔwo katã dome.” (2 Mose 19:5) Egbea la, mɔnukpɔkpɔa su Kristo hamea me tɔwo hã si be woanye Yehowa tɔ. (1 Pet. 2:9; Nyaɖ. 7:9, 14, 15) Enye mɔnukpɔkpɔ aɖe si ate ŋu ahe viɖe mavɔwo avae na mí.
2 Ele eme be mɔnukpɔkpɔe wònye be míanye Yehowa tɔ ya, gake esia da agba aɖewo ɖe mía dzi. Ame aɖewo abia wo ɖokuiwo be: ‘Ðe mate ŋu awɔ nu siwo Yehowa di tso asinyea? Ne mewɔ nu vɔ̃ aɖe la, ɖe wòagbe nu le gbɔnyea? Ne mezu Yehowa tɔ la, ɖe esia axɔ ablɔɖe le asinyea?’ Enyo be míade ŋugble le nya siawo ŋu. Gake gbã la, biabia bubu aɖe li si ŋu wòle be míade ŋugble le vevie, si nye be: Viɖe kawoe sua ame si ne eva zu Yehowa tɔ?
Ame Siwo Nye Yehowa Tɔ La Kpɔa Dzidzɔ
3. Alekee tiatia si Raxab wɔ be yeasubɔ Yehowa la ɖe vi nɛ?
3 Ðe viɖe aɖe doa go tso eme na ame siwo va zu Yehowa tɔa? Bu Raxab, si nye gbolo aɖe si nɔ blema Yerixo, ŋu kpɔ. Ðikeke mele eme o be, ekpɔ gome le Kanaantɔwo ƒe trɔ̃subɔsubɔnuwɔna ɖigbɔwo me tso eƒe ɖevime. Ke hã, esi wòse nu tso ale si Yehowa na Israel viwo ɖu woƒe futɔwo dzii ŋu la, ekpɔe dze sii be Yehowae nye Mawu vavã la. Eya ta etsɔ eƒe agbe de afɔku me kpɔ Mawu ƒe ame tiatiawo ta heto esia me ɖo ŋu ɖe wo ŋu be woakpɔ yeƒe agbe ta. Biblia gblɔ be: “Ðe menye nenema kee wobu Raxab, gbolo la, be enye ame dzɔdzɔe, esi wòxɔ ame dɔdɔwo nyuie hena woto mɔ bubu dzo oa?” (Yak. 2:25) Bu viɖe siwo gbegbe wòkpɔ esi wòva zu Mawu subɔla vavã, siwo wotsɔ Mawu ƒe Se la fia lɔlɔ̃ kple dzɔdzɔenyenye ƒe mɔwoe la dometɔ ɖeka la ŋu kpɔ. Aleke gbegbee dzi anya dzɔe ye nye esi be wòɖe asi le eƒe tsã gbenɔnɔ ŋu! Eɖe Israel ŋutsu aɖe eye wodzi ŋutsuvi aɖe, si ŋkɔe nye Boas, ame si wònyi wòva zu Mawu vɔ̃la ɖedzesi aɖe.—Yos. 6:25; Rut 2:4-12; Mat. 1:5, 6.
4. Viɖe kawoe do go tso nyametsotso si Rut wɔ be yeasubɔ Yehowa la me nɛ?
4 Rut si tso Moab hã tiae be yeasubɔ Yehowa. Ðewohĩ tso eƒe ɖevime ke la, esubɔ alakpamawu Kemos kple Moabtɔwo ƒe mawu bubuawo, gake eva dze si Yehowa, Mawu vavã la, eye wòɖe Israel ŋutsu aɖe si ʋu va tsi wo de le dɔ si to le Israel ta. (Mixlẽ Rut 1:1-6.) Emegbe esi Rut kpakple srɔ̃a nɔviŋutsu srɔ̃, Orpa, kplɔ wo lɔ̃xo Naomi ɖo yina Betlexem la, Naomi ƒoe ɖe ɖetugbui eveawo nu be woatrɔ ayi wo de. Elabena agbea manɔ bɔbɔe na wo le Israel o. Orpa ‘gbugbɔ yi eƒe dukɔ kple eƒe mawu gbɔ,’ gake Rut ya metrɔ o. Ewɔ nu le xɔse me, elabena enya ame si tɔ wòdi be yeanye. Egblɔ na Naomi be: ‘Megaƒoe ɖe nunye be, magblẽ wò ɖi agbugbɔ le yowòme o! Ke boŋ afi si nayi la, afi ma mayi; afi si natsi la, afi ma matsi; wò dukɔ anye nye dukɔ, eye wò Mawu anye nye Mawu.’ (Rut 1:15, 16) Esi Rut tiae be yeasubɔ Yehowa ta la, ɖoɖo tɔxɛ si le Mawu ƒe Sea me na ahosiwo, ame dahewo, kple ame siwo si anyigba mele o la, ɖe vi nɛ. Ekpɔ dzidzɔ, ametakpɔkpɔ, kple dedienɔnɔ le Yehowa ƒe aʋala te.
5. Nu kae nède dzesii le ame siwo subɔ Yehowa nuteƒewɔwɔtɔe la ŋu?
5 Ðewohĩ èdze si ame aɖewo siwo le nuteƒe wɔm na Yehowa ƒe geɖewoe nye esia, tso esime wotsɔ wo ɖokuiwo ɖe adzɔgbe nɛ. Bia wo ne woagblɔ ale si Yehowa subɔsubɔ le vi ɖem na woe la na wò. Togbɔ be mí katã míedoa go kuxiwo hã la, kpeɖodzi gbogbo aɖewo ɖee fia be hakpalaa ƒe nya siawo nye nyateƒe: “[Dzidzɔtɔe nye] dukɔ, si ƒe Mawu Yehowa nye!”—Ps. 144:15.
Yehowa Mebiaa Nu Si Gbɔ Míaƒe Ŋutete Ŋu La Tso Mía Si O
6. Nu ka tae mele be míavɔ̃ be míate ŋu awɔ nu siwo Yehowa di tso mía si la o?
6 Ðewohĩ èbiaa ɖokuiwò be ɖe yeate ŋu awɔ nu siwo Yehowa di tso asiwò la mahã. Ele bɔbɔe be vɔvɔ̃ naɖo ame ne ebu eŋu be yeava zu Mawu subɔla, si anɔ agbe nɔm ɖe eƒe seawo nu ahanɔ nu ƒom tso eƒe ŋkɔa ŋu. Le kpɔɖeŋu me, esi wodɔ Mose be wòayi aɖaƒo nu na Israel viwo kple Egipte fia la, ese le eɖokui me be yemedze o. Gake menye nu si gbɔ Mose ƒe ŋutete ŋue Mawu nɔ biabiam tso esi be wòawɔ o. Yehowa ‘fia nu si wòawɔ lae.’ (Mixlẽ 2 Mose 3:11; 4:1, 10, 13-15.) Esi wònye be Mose lɔ̃ xɔ kpekpeɖeŋu si wonae ta la, dzidzɔ si dona tso Mawu ƒe lɔlɔ̃nu wɔwɔ me la su esi. Yehowa mebiaa nu si gbɔ míaƒe ŋutete ŋu la tso míawo hã si o. Enyae be ame madeblibowoe míenye, eya ta edina be yeakpe ɖe mía ŋu. (Ps. 103:14) Mawu subɔsubɔ abe Yesu yomedzela ene menana nu tena ɖe mía dzi o, ke boŋ enana gbɔdzɔe mí, elabena eɖea vi na ame bubuwo hedoa dzidzɔ na Yehowa ƒe dzi. Yesu gblɔ be: “Miva gbɔnye, . . . eye mana gbɔdzɔe mi. Mitsɔ nye kɔkuti la ɖo mia ɖokui dzi, eye misrɔ̃ nu tso gbɔnye, elabena ame fafa menye, eye mebɔbɔ ɖokuinye ɖe anyi le dzi me.”—Mat. 11:28, 29.
7. Nu ka tae nàte ŋu aka ɖe edzi be Yehowa akpe ɖe ŋuwò nàwɔ nu si wòkpɔa mɔ be nàwɔ?
7 Zi ale si míenya le ŋu ɖom ɖe Yehowa ŋu be wòado ŋusẽ mí ko la, ana dzideƒo si hiã la mí. Le kpɔɖeŋu me, anɔ eme be esesẽna na Yeremiya be wòaƒo nu le amewo ŋkume. Eya tae esi Yehowa bia tso esi be wòanye yeƒe nyagblɔɖila la, egblɔ be: “Oo, Aƒetɔ Yehowa, kpɔ ɖa, nyemate ŋu aƒo nu o, elabena nyemetsi o.” Egblɔ emegbe gɔ̃ hã be: ‘Nyemagaƒo nu le eƒe ŋkɔ me o.’ (Yer. 1:6; 20:9) Gake Yehowa ƒe dzideƒoname wɔe be Yeremiya te ŋu ɖe gbeƒã gbedeasi si mesɔa to me na ame o la ƒe 40 sɔŋ. Yehowa tsɔ nya siawo de dzi ƒo nɛ enuenu be: “Meli kpli wò, ne maxɔ na wò, eye maɖe wò.”—Yer. 1:8, 19; 15:20.
8. Alekee míeɖenɛ fiana be míeɖoa ŋu ɖe Yehowa ŋu?
8 Abe ale si ko Yehowa do ŋusẽ Mose kple Yeremiya ene la, ate ŋu akpe ɖe míawo hã ŋu míawɔ nu siwo wòdi tso Kristotɔwo si egbea. Nu si le vevie ye nye be míaɖo ŋu ɖe Mawu ŋu. Biblia gblɔ be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.” (Lod. 3:5, 6) Míeɖenɛ fiana be míeɖoa ŋu ɖe Yehowa ŋu ne míeɖea mɔ wòkpena ɖe mía ŋu to eƒe Nya la kple hamea dzi. Ne míeɖea mɔ Yehowa fiaa mɔ mí le agbe me la, naneke mate ŋu ana míado kpo nuteƒewɔwɔ nɛ o.
Yehowa Tsɔa Ðe Le Eme Na Eƒe Amewo Dometɔ Ðe Sia Ðe
9, 10. Ametakpɔkpɔ ka ƒomevi ŋugbee wodo le Psalmo 91 lia me?
9 Ne ame aɖewo le ŋugble dem tso wo ɖokuiwo tsɔtsɔ ɖe adzɔgbe na Yehowa ŋu la, wovɔ̃na be yewoava wɔ nu vɔ̃, si ana be yewomagadze o, eye Yehowa agbe yewo. Gake dzidzɔtɔe la, Yehowa naa ametakpɔkpɔ si hiã la mí bena míakpɔ ƒomedodo xɔasi si le mía kplii dome la ta. Na míakpɔ ale si woƒo nu tso esia ŋu le Psalmo 91 lia mee ɖa.
10 Psalmo sia dze egɔme be: ‘Ame si bɔbɔ nɔ dziƒoʋĩtɔ la ƒe bebeƒe, eye wòle ŋusẽkatãtɔ la ƒe vɔvɔli te la, eya gblɔna na Yehowa be: Nye sitsoƒe kple nye mɔ̃ sesẽ nènye, nye Mawu, si ŋu meɖoa ŋu ɖo. Elabena aɖe wò tso xevimɔ̃trela ƒe adoboli me.’ (Ps. 91:1-3) De dzesii be Mawu do ŋugbe be yeakpɔ ame siwo lɔ̃ ye heɖoa ŋu ɖe ye ŋu la ta. (Mixlẽ Psalmo 91:9, 14.) Ametakpɔkpɔ ka ƒomevie wòwɔnɛ? Enye nyateƒe be, Yehowa kpɔ esubɔla siwo nɔ anyi le blema la dometɔ aɖewo ta le ŋutilã me—le wo dometɔ aɖewo gome la, be yeatsɔ akpɔ dzidzime si me Mesia la adzɔ tso la ta. Gake le esubɔla nuteƒewɔla bubu geɖewo gome la, eɖe mɔ wolé wo de ga me, wɔ funyafunya wo hewu wo tagbɔsesẽtɔe, esi Satana nɔ agbagba dzem be yeana woadzudzɔ nuteƒewɔwɔ na Mawu. (Heb. 11:34-39) Dzi nɔ wo ƒo wote ŋu do dzi, elabena Yehowa kpɔ wo ta le gbɔgbɔ me be womeɖe asi le woƒe fɔmaɖimaɖi me léle ɖe asi ŋu o. Eya ta míate ŋu ase egɔme be gbɔgbɔmetakpɔkpɔ ŋue wole nu ƒom tsoe le Psalmo 91 lia me.
11. Nu kae nye “Dziƒoʋĩtɔ la ƒe bebeƒe,” eye ame kawo tae Mawu kpɔna le afi ma?
11 Eya ta “Dziƒoʋĩtɔ la ƒe bebeƒe,” si ŋu hakpalaa ƒo nu tsoe, la nye kpɔɖeŋunyagbɔgblɔ si fia gbɔgbɔmededienɔƒe. Le afi ma la, Mawu kpɔa ame siwo dzea egbɔ, le kpɔɖeŋunyagbɔgblɔ nu, la ta tso ame alo nu bubu ɖe sia ɖe si ate ŋu agblẽ nu le lɔlɔ̃ kple xɔse si le wo si na eyama ŋu la si me. (Ps. 15:1, 2; 121:5) Enye bebeƒe, elabena dzimaxɔsetɔwo mate ŋu akpɔe adze sii o. Le afi ma la, Yehowa kpɔa ame siwo toa woƒe nuwɔna dzi gblɔna be, ‘Wòe nye nye Mawu, si ŋu meɖoa ŋu ɖo’ la ta. Ne míeyi edzi nɔ bebeƒe sia la, mahiã be míanɔ dzimaɖi tsim be míava ge dze Satana, “xevimɔ̃trela” la, ƒe mɔ̃ me, si awɔe be Mawu magakpɔ ŋudzedze ɖe mía ŋu o.
12. Nu kawoe ate ŋu agblẽ nu le mía kple Mawu dome ƒomedodoa ŋu?
12 Nu kawoe ate ŋu agblẽ nu le ƒomedodo xɔasi si le mía kple Mawu dome la ŋu? Hakpala la ƒo nu tso afɔku vovovowo ŋu, eye wo dometɔ aɖewoe nye “dɔvɔ̃, si le zɔzɔm le blukɔ me, kple dɔ xɔleameŋua, si le nu gblẽm le ŋdɔ.” (Ps. 91:5, 6) “Xevimɔ̃trela” la ƒe mɔ̃ si nye ɖokuisinɔnɔ ƒe dzodzro vɔ̃a ɖe ame geɖewo. (2 Kor. 11:3) Etoa ŋukeklẽ, dada, kple ŋutilãmenudidi vivivo dzi nana eƒe asi sua ame bubuwo hã dzi. Eto dulɔlɔ̃, amedzɔtsolãme ƒe nufiafia, kple alakpasubɔsubɔ dzi ble ame aɖewo hã. (Kol. 2:8) Eye eƒe mɔ̃ si nye gbɔdɔdɔ ƒe agbe gbegblẽ nɔnɔ la hã ɖe ame gbogbo aɖewo. Gbɔgbɔmedɔvɔ̃ mawo na ame miliɔn geɖe gblẽ lɔlɔ̃ si nɔ wo si na Mawu la ɖi.—Mixlẽ Psalmo 91:7-10; Mat. 24:12.
Ale Si Míakpɔ Lɔlɔ̃ Si Le Mía Si Na Mawu La Tae
13. Alekee Yehowa kpɔa mía ta tso nu siwo ate ŋu agblẽ nu le míaƒe gbɔgbɔmededienɔnɔ ŋu me?
13 Alekee Yehowa kpɔa eƒe amewo ta tso gbɔgbɔmefɔku siawo me? Hakpala la gblɔ be: “Adɔ eƒe dɔlawo ɖe ŋuwò, ne woakpɔ tawò le wò mɔwo katã dzi.” (Ps. 91:11) Dziƒodɔlawo fiaa mɔ mí hekpɔa mía ta bene míate ŋu aɖe gbeƒã nya nyuia. (Nyaɖ. 14:6) Tsɔ kpe ɖe eŋu la, Kristotɔ hamemetsitsiwo toa ale si wozãa Ŋɔŋlɔawo ɣesiaɣi le woƒe nufiafia me dzi kpɔa mía ta be ame aɖeke nagatsɔ alakpanufiafiawo able mí o. Woate ŋu akpe ɖe mía dometɔ ɖe sia ɖe si le avutri gbãm be xexea me ƒe nɔnɔmewo nagakpɔ ŋusẽ ɖe ye dzi o la ŋu. (Tito 1:9; 1 Pet. 5:2) “Kluvi nyateƒetɔ kple aɖaŋudzela” la hã naa gbɔgbɔmenuɖuɖu mí tsɔ kpɔa mía ta tso amedzɔtsolãme ƒe nufiafia, nu siwo ate ŋu able mí ade agbe gbegblẽ nɔnɔ me, ŋkɔxɔxɔ kple kesinɔnuwo yome titi, kpakple dzodzro vɔ̃ kple ŋusẽkpɔɖeamedzi gbegblẽ bubu geɖewo si me. (Mat. 24:45) Nu kae kpe ɖe ŋuwò be nète ŋu ƒo asa na afɔku siawo dometɔ aɖewo?
14. Nu kawoe míawɔ be Mawu ƒe ametakpɔkpɔ naɖe vi na mí?
14 Nu kae wòle be míawɔ be míate ŋu ayi edzi anɔ Mawu ƒe “bebeƒe” la bene míanɔ dedie? Abe ale si ko míedzea agbagba ɣesiaɣi be míakpɔ mía ɖokuiwo ta tso ŋutilãmefɔkuwo, abe ʋufɔkuwo, nu vlo wɔlawo, alo dɔlélewo ene si mee la, nenema kee wòle be míanɔ agbagba dzem ɣesiaɣi be míakpɔ mía ɖokuiwo ta tso gbɔgbɔmefɔkuwo hã si me. Eya ta ele be míayi edzi anɔ wɔwɔm ɖe mɔfiame siwo Yehowa naa mí to míaƒe agbalẽwo, hame ƒe kpekpewo, kple takpekpewo dzi la dzi ɣesiaɣi. Míexɔa aɖaŋuɖoɖowo tso hamemetsitsiwo hã gbɔ. Eye ɖe nɔnɔme nyui vovovo siwo mía nɔvi Kristotɔwo ɖena fiana la meɖea vi na mí ŋutɔ oa? Vavãe, míaƒe hadede kple hamea kpena ɖe mía ŋu míedzea nunya.—Lod. 13:20; mixlẽ 1 Petro 4:10.
15. Nu ka tae nàte ŋu aka ɖe edzi be Yehowa ate ŋu akpɔ tawò tso nu sia nu si ate ŋu ana magakpɔ ŋudzedze ɖe ŋuwò o la si me?
15 Susu aɖeke meli si tae míasusui be Yehowa mate ŋu akpɔ mía ta tso nu sia nu si ate ŋu ana magakpɔ ŋudzedze ɖe mía ŋu o la si me o. (Rom. 8:38, 39) Ekpɔ Kristo hamea ta tso mawusubɔsubɔ kple dunyahehe me futɔ sẽŋu siwo ƒe taɖodzinu koŋue nye be yewoana míagbe nu le mía Mawu kɔkɔe la gbɔ, ke menye be woawu mí kokoko o, la si me. Yehowa ƒe ŋugbedodo sia ƒe nyateƒenyenye dze ƒãa: “Lãnu sia lãnu, si wotu ɖe ŋuwò la, madze edzi o.”—Yes. 54:17.
Ame Kae Naa Ablɔɖe Mí?
16. Nu ka tae xexea mate ŋu ana ablɔɖe mí o?
16 Ne míenye Yehowa tɔ la, ɖe esia axɔ ablɔɖe le mía sia? Kura o, ne míenye xexea tɔ boŋue míaganɔ ablɔɖe me o. Xexe sia ɖe ɖe aga tso Yehowa gbɔ, eye mawu vɔ̃ɖi aɖe si wɔa amewo kluvii lae le edzi ɖum. (Yoh. 14:30) Le kpɔɖeŋu me, Satana ƒe nuɖoanyi sia toa ganyawo ƒe amemiamiawo dzi xɔa ablɔɖe le amewo si. (Tsɔe sɔ kple Nyaɖeɖefia 13:16, 17.) Nu vɔ̃ ƒe amebleŋusẽ hã wɔa ame kluvii. (Yoh. 8:34; Heb. 3:13) Eya ta togbɔ be dzimaxɔsetɔwo agblɔ be agbenɔnɔ le mɔ si mewɔ ɖeka kple Yehowa ƒe nufiafiawo o nu ana ablɔɖe mí hã la, eteƒe madidi hafi ame sia ame si ɖoa to wo la, ava kpɔe adze sii be yezu kluvi na nu vɔ̃ gbenɔnɔ kple nuwɔna ɖigbɔwo o.—Rom. 1:24-32.
17. Ablɔɖe kae Yehowa tsɔ ɖo mía ŋkume?
17 Gake Yehowa ate ŋu ana ablɔɖe mí tso nu sia nu si ate ŋu agblẽ nu le mía ŋu la si me, ne míetsɔ mía ɖokuiwo nɛ heɖo ŋu ɖe eŋu. Le mɔ aɖewo nu la, míaƒe nɔnɔmea ɖi ame aɖe si ɖe mɔ le eɖokui ŋu na amekola bibi aɖe, si ate ŋu awɔ dɔ nɛ aɖe dɔléle vɔ̃ɖi aɖe si na eƒe agbe ɖo afɔku me la ɖa nɛ be wòatsi agbe la tɔ. Dɔ vɔ̃ aɖe na mí katã míaƒe agbe ɖo afɔku me—eyae nye nu vɔ̃ si ƒe dome míenyi. Ne míetsɔ mía ɖokuiwo na Yehowa, to Kristo ƒe tafevɔsa la dzi, ko hafi míate ŋu akpɔ mɔ be míavo tso nu vɔ̃ me tsonuwo si me ahanɔ agbe tegbee. (Yoh. 3:36) Abe ale si ko míagaka ɖe amekola aɖe dzi geɖe wu, ne míenya be ete ŋu koa ame dzidzedzetɔe ene la, nenema kee míaƒe kaka ɖe Yehowa dzi hã me agasẽ ɖe edzi wu ne míeyi edzi le nu geɖe srɔ̃m tso eŋu. Eya tae míeyia edzi srɔ̃a Mawu ƒe Nya la moveviɖoɖotɔe, elabena esia akpe ɖe mía ŋu míalɔ̃e ale gbegbe be míavɔ̃ na mía ɖokui tsɔtsɔ na eyama azu etɔ o.—1 Yoh. 4:18.
18. Ne míenye Yehowa tɔ la, viɖe kae ado tso eme na mí?
18 Yehowa na tiatiawɔblɔɖe ame sia ame. Eƒe Nya la gblɔ be: “Mitia agbe, be mia kple wò dzidzimeviwo mianɔ agbe, eye nalɔ̃ Yehowa, wò Mawu la.” (5 Mose 30:19, 20) Edi be míaɖe lɔlɔ̃ si le mía si na ye la afia to etiatia le mía ɖokui si be míasubɔ ye me. Ne míenye Mawu si míelɔ̃na la tɔ la, esia maxɔ ablɔɖe le mía si o, ke ɖe wòana míayi edzi anɔ dzidzɔ kpɔm ɖaa boŋ.
19. Nu ka tae wònye amenuveve be míanye Yehowa tɔ?
19 Esi míenye nu vɔ̃ wɔlawo ta la, míedze anye Mawu deblibo la tɔ o. Mawu ƒe amenuveve ta koe mɔnukpɔkpɔ sia su mía si ɖo. (2 Tim. 1:9) Esia tae Paulo ŋlɔ bena: “Ne míele agbe la, míele agbe na Yehowa, eye ne míeku la, míeku na Yehowa. Eya ta ne míele agbe alo míeku la, Yehowa tɔ ye míenye.” (Rom. 14:8) Mave mí akpɔ gbeɖe be míetiae be míanye Yehowa tɔ o.
Aleke Nàɖo Wo Ŋui?
• Viɖe kawoe míekpɔna ne míenye Yehowa tɔ?
• Nu ka tae míete ŋu wɔa nu siwo Mawu di tso mía si?
• Mɔ kawo nue Yehowa kpɔa esubɔlawo ta le?
[Nɔnɔmetata siwo le axa 8]
Bia amewo ne woagblɔ viɖe siwo wokpɔ esi wova zu Yehowa tɔ la na wò
[Nɔnɔmetata si le axa 10]
Mɔ siwo nu Yehowa kpɔa mía ta le la dometɔ aɖewo ɖe?