Gbɔdzɔgbɔdzɔ, Vɔ̃ɖivɔ̃ɖi, Kple Dzimetɔtrɔ Nyanya

NUVƆ̃ nye nusi Kristotɔwo tsri—enye Yehowa ƒe dzidzenu dzɔdzɔeawo gbɔ maɖomaɖo. (Hebritɔwo 1:9) Nublanuitɔe la, mí katã míewɔa nuvɔ̃ ɣeaɖewoɣi. Mí katã míewɔa avu kple gbɔdzɔgbɔdzɔ kple blibomademade si ƒe dome míenyi. Gake le go geɖe me la, ne míeʋu míaƒe nuvɔ̃ me na Yehowa hedze agbagba vevie be míagawɔ wo ake o la, míate ŋu atsɔ dzitsinya dzadzɛ ate ɖe eŋu. (Romatɔwo 7:21-24; Yohanes I, 1:8, 9; 2:1, 2) Míeda akpe na Yehowa be togbɔ be míenye gbɔdzɔgbɔdzɔtɔwo hã la, exɔa subɔsubɔ kɔkɔe si míetsɔna nɛ la le tafevɔsa la ta.

Ne ŋutilã ƒe gbɔdzɔgbɔdzɔ na ame aɖe wɔ nuvɔ̃ gã aɖe la, ehiã be woakplɔe wòasɔ ɖe ɖoɖo si wogblɔ le Yakobo 5:14-16 nu: “Ne mia dome ame aɖe ƒe lãme gblẽ [le gbɔgbɔ me] la, neyɔ hamemegãwo vɛ . . . ne ewɔ nuvɔ̃wo la, woatsɔ wo akee. Miʋu mia nuvɔ̃wo me na mia nɔewo, eye mido gbe ɖa ɖe mia nɔewo ta, bene miaƒe lãme nasẽ.”

Eyata ne Kristotɔ ɖeadzɔgbe wɔ nuvɔ̃ gã aɖe la, nusi hiã la wu ame ŋutɔ ƒe nuvɔ̃meʋuʋu na Yehowa ko. Ele be hamemegãwo naɖe afɔ aɖewo elabena hamea ƒe dzadzɛnyenye alo eƒe ŋutifafa ɖo afɔku me. (Mateo 18:15-17; Korintotɔwo I, 5:9-11; 6:9, 10) Ahiã be hamemegãwo nanya nusiawo: Ðe amea trɔ dzi mea? Nukae kplɔe de nuvɔ̃a me? Ɣeyiɣi aɖe ƒe gbɔdzɔgbɔdzɔe na wòwɔea? Ðe wònye nuvɔ̃ si wòwɔna ɖaa? Nusiawo nyanya menɔa bɔbɔe alo nɔa tẽ ɣesiaɣi o eye ebia gɔmesese deto.

Ne nu gbegblẽ kple nu vɔ̃ɖi wɔwɔ ƒe afɔ si wòɖee kplɔe de nuvɔ̃a me ya ɖe? Ke hamemegãwo ƒe agbanɔamedzi la dze ƒã. Esi apostolo Paulo nɔ mɔ fiam le nya sesẽ aɖe gbɔ kpɔkpɔ le Korinto-hamea me ŋu la, egblɔ be: “Miɖe ame vɔ̃ɖi la ɖa le mia ŋutɔ mia dome!” (Korintotɔwo I, 5:13) Gome aɖeke mele ame vɔ̃ɖiwo si le Kristo-hamea me o.

Gbɔdzɔgbɔdzɔ, Vɔ̃ɖivɔ̃ɖi, Kple Dzimetɔtrɔ Dada Kpɔ

Aleke hamemegãwo awɔ anya ne amea trɔ dzi me?a Biabia sia ŋuɖoɖo mele bɔbɔe o. Le kpɔɖeŋu me, bu Fia Dawid ŋu kpɔ. Ewɔ ahasi, emegbe esia na wòwu ame. Gake Yehowa ɖe mɔ nɛ wònɔ agbe. (Samuel II, 11:2-24; 12:1-14) Azɔ bu Anania kple Safira hã ŋu kpɔ. Woka aʋatso be yewoable apostoloawo, wowɔ nu alakpatɔe si na wodze dɔmenyotɔwo wu alesi tututu wole. Menye nya gãe nye esia oa? Ẽ. Ðe wòvɔ̃ɖi de amewuwu kple ahasiwɔwɔ nua? Kura o! Gake Anania kple Safira bu woƒe agbe le eta.—Dɔwɔwɔwo 5:1-11.

Nukata wodrɔ̃ ʋɔnu vovovo wo? Ŋutilã ƒe gbɔdzɔgbɔdzɔe na Dawid wɔ nuvɔ̃ gã ma. Esi wotsɔ nusi wòwɔ tui la, etrɔ dzi me eye Yehowa tsɔe kee—togbɔ be wotsɔ kuxi siwo va eƒeme he to nɛ vevie hã. Anania kple Safira wɔ nuvɔ̃ si fia be woɖoe koŋ te kpɔ be yewoable Kristo-hamea si wɔe be ‘woka aʋatso na gbɔgbɔ kɔkɔe la kple Mawu.’ Esia nye dzi vɔ̃ɖi. Eyata wodrɔ̃ ʋɔnu sesẽ wo wu ɖo.

Yehowae drɔ̃ nya eveawo eye edrɔ̃ ʋɔnu dzɔdzɔe elabena ete ŋu doa dziwo me kpɔna. (Lododowo 17:3) Hamemegã amegbetɔwo mate ŋu awɔ ema o. Ekema aleke hamemegãwo anya ne nuvɔ̃ gã si wowɔ nye gbɔdzɔgbɔdzɔ alo vɔ̃ɖivɔ̃ɖi?

Le nyateƒe me la, nuvɔ̃wo katã vɔ̃ɖi gake menye nuvɔ̃wɔlawo katãe vɔ̃ɖi o. Nuvɔ̃ ɖeka ƒomevi ate ŋu anye gbɔdzɔgbɔdzɔ le ame aɖe gome eye wòanye vɔ̃ɖivɔ̃ɖi le ame bubu gome. Nyateƒee, gbɔdzɔgbɔdzɔ kple vɔ̃ɖivɔ̃ɖi aɖe nɔa nuvɔ̃wɔwɔ me le nuvɔ̃wɔla la gome zi geɖe. Nusiwo woatsɔ anya ɖekae nye alesi nuvɔ̃wɔla la bua nusi wòwɔ kple nusi wòɖo be yeawɔ tso eŋui. Ðe wòɖe dzimetɔtrɔ fia? Hamemegãwo hiã gɔmesese be woate ŋu akpɔ esia. Aleke gɔmesese sia asu wo sii? Apostolo Paulo do ŋugbe na Timoteo be: “Bu nusi gblɔm mele la me kpɔ; elabena Aƒetɔ la ana gɔmesese wò le nuwo katã me.” (Timoteo II, 2:7) Ne hamemegãwo ‘bua’ Paulo kple Biblia-ŋlɔla bubuwo ƒe nya siwo tso gbɔgbɔ me ‘ŋu ɣesiaɣi’ ɖokuibɔbɔtɔe la, gɔmesese si wohiã la asu wo si woatsɔ akpɔ amesiwo wɔ nuvɔ̃ le hamea me nyuie. Ekema woƒe nyametsotsowo maɖe woa ŋutɔwo ƒe tamesusuwo afia o, ke boŋ woaɖe Yehowa tɔ afia.—Lododowo 11:2; Mateo 18:18.

Aleke woawɔ esiae? Mɔ ɖekae nye be woadzro alesi Biblia ƒo nu tso ame vɔ̃ɖiwo ŋu me ahakpɔe nenye be wosɔ ɖe amesi ƒe nya gbɔ kpɔm wole ŋu.

Agbanɔamedzi Tsɔtsɔ Kple Dzimetɔtrɔ

Adam kple Xawae nye ame gbãtɔ siwo tia vɔ̃ɖivɔ̃ɖi. Togbɔ be wode blibo eye wonya Yehowa ƒe se bliboe hã la, wodze aglã ɖe Mawu ƒe dziɖulanyenye ŋu. Esi Yehowa tsɔ nusi wowɔ tu wo la, anyo be míade dzesi alesi wowɔ nui—Adam bu fɔ Xawa, eye Xawa hã da fɔbubua ɖe da la dzi! (Mose I, 3:12, 13) Tsɔ esia sɔ kple Dawid ƒe ɖokuibɔbɔ deto la. Esi wotsɔ nuvɔ̃ gã si wòwɔ tui la, exɔ eƒe agba tsɔ heɖe kuku bia tsɔtsɔke be: “Mewɔ nuvɔ̃ ɖe Yehowa ŋu.”—Samuel II, 12:13; Psalmo 51:6, 11, 12.

Anyo be hamemegãwo nabu kpɔɖeŋu siawo ŋu ne wole nuvɔ̃ gãwo ŋu nya gbɔ kpɔm, vevietɔ le ame tsitsiwo gome. Ðe nuvɔ̃wɔla la—abe Dawid ene esime wòse eƒe nuvɔ̃ gɔme—xɔ fɔbubua enumake hetrɔ dzi me kpɔ Yehowa sinu hena kpekpeɖeŋu kple tsɔtsɔkea, alo ɖe wòdze be ebu nusi wòwɔ la nu tsɛea, ɖewohĩ hetsɔ fɔbubua da ɖe ame bubu dzia? Nyateƒee, nuvɔ̃wɔla la adi be yeaɖe nusi kplɔe de nuwɔna ma me la me, eye ɖewohĩ nɔnɔme aɖewo anɔ anyi do ŋgɔ alo anɔ anyi fifia siwo ŋu wòahiã be hamemegãwo nabu ne wole alesi woakpe ɖe eŋui la dam kpɔ. (Tsɔe sɔ kple Hosea 4:14.) Gake ele be wòalɔ̃ ɖe edzi be yee wɔ nuvɔ̃ eye be ye dzie agba le le Yehowa gbɔ. Ðo ŋku edzi be: “Yehowa tsɔ ɖe amesiwo ƒe dzi gbã gudugudu la gbɔ, eye wòxɔna na amesiwo ƒe gbɔgbɔ woƒo ƒu anyi.”—Psalmo 34:19.

Nugbegblẽwɔwɔ

Woƒo nu tso ame vɔ̃ɖiwo ŋu zi geɖe le Psalmowo ƒe agbalẽa me. Ŋɔŋlɔ siawo agate ŋu akpe ɖe hamemegãwo ŋu woanya ne amea ɖe wòvɔ̃ɖi koŋ loo, alo ɖe wògbɔdzɔ. Le kpɔɖeŋu me, bu Fia Dawid ƒe gbedodoɖa si tso gbɔgbɔ me ŋu kpɔ: “Megakplɔm kpe ɖe ame vɔ̃ɖi kple nu vlo wɔlawo ŋu o, amesiwo ƒoa nu kple wo xɔlɔ̃viwo fafɛ, ke vɔ̃ɖivɔ̃ɖi le woƒe dzi me la o!” (Psalmo 28:3) Mide dzesii be woyɔ ame vɔ̃ɖiwo tsɔ sɔ kple “nu vlo wɔlawo.” Anɔ eme be amesi wɔ nuvɔ̃ le ŋutilã ƒe gbɔdzɔgbɔdzɔ ta la adzudzɔ enumake ne ekpɔe dze sii. Gake ne ame aɖe ‘wɔa nu vɔ̃ɖi’ atraɖii la, esia ate ŋu anye dzi vɔ̃ɖi ƒe dzesi.

Dawid yɔ vɔ̃ɖivɔ̃ɖi ƒe nɔnɔme bubu le kpukpui ma me. Ame vɔ̃ɖi gblɔa nya nyuiwo abe Anania kple Safira ene, gake vɔ̃ɖivɔ̃ɖi nɔa eƒe dzi me. Ate ŋu anye alakpanuwɔla—abe alesi Farisitɔ siwo nɔ anyi le Yesu ŋɔli nɔ ene, amesiwo ‘dzena ame dzɔdzɔewo na amewo le gota gake wo me yɔ fũ kple alakpanuwɔwɔ kple sedzimawɔmawɔ.’ (Mateo 23:28; Luka 11:39) Yehowa lé fu alakpanuwɔwɔ. (Lododowo 6:16-19) Ne ame aɖe tsɔ alakpanuwɔwɔ dze agbagba be yeasẽ nu ɖe nuvɔ̃ gã siwo wòwɔ dzi le ʋɔnudrɔ̃kɔmiti gɔ̃ hã ŋkume, alo bebli hafi wòva lɔ̃ ɖe nusi ko amewo nya xoxo dzi hegbe nuvɔ̃meʋuʋu bliboe la, esia ate ŋu anye dzi vɔ̃ɖi ƒe dzesi.

Bubumademade Yehowa Ŋu Dadatɔe

Woyɔ nu bubu siwo gadea dzesi ame vɔ̃ɖi le Psalmo 10. Míexlẽe le afima be: “Ame vɔ̃ɖiwo ƒe dada doa dzikatsoƒoe na hiãtɔwo: . . . [woɖea] alɔme le [Yehowa] ŋu.” (Psalmo 10:2, 3) Aleke wòle be míabu Kristotɔ xɔnyɔnyrɔ̃ si dana eye medea bubu Yehowa ŋu o lae? Míeka ɖe edzi be esiawo nye tamesusu vɔ̃wo. Amesi gbɔdzɔgbɔdzɔ na wòwɔ nuvɔ̃ la trɔa dzi me hetrɔa eƒe nɔnɔme ne ekpɔe dze sii alo wohe eƒe susu yi edzii ko. (Korintotɔwo II, 7:10, 11) Gake ne bubumademade Yehowa ŋu na ame wɔ nuvɔ̃ la, nukae axe mɔ nɛ be maganɔ eƒe nugbegblẽwɔwɔa dzi o? Ne wotsɔ gbɔgbɔ fatu xlɔ̃ nui evɔ wògale dadam la, aleke wòate ŋu abɔbɔ eɖokui alesi dze be wòatrɔ dzi me ŋutɔŋutɔ anukwaretɔe?

Azɔ de ŋugble le nya siwo Dawid gagblɔ emegbe le psalmo ma ke me ŋu kpɔ: “Nukaŋuti ame vɔ̃ɖi le alɔme ɖem le Mawu ŋu le gbɔgblɔm le eƒe dzi me be, mabia eta ase oa?” (Psalmo 10:13) Le ɖoɖo si le Kristo-hamea me la, ame vɔ̃ɖi nya vovototo si le nyui kple vɔ̃ dome, gake madzudzɔ nugbegblẽwɔwɔ o ne esusu be yeate ŋu awɔe tohehe maxɔmaxɔe. Ne mevɔ̃na be yeƒe nuwɔna adze o ko la, ewɔa eƒe didi vɔ̃wo dzi faa. Ne eƒe nuvɔ̃wo dze go la, mawɔ nu abe Dawid ene o, adze aɖaŋu be yeasi le tohehe nu. Ame ma tɔgbe medea bubu Yehowa ŋu kura o. “Mawu ƒe vɔvɔ̃ aɖeke metso ga ɖe ŋku me nɛ o. . . . Metsria nu vɔ̃ɖi o.”—Psalmo 36:2, 5.

Nugbegblẽ le Ame Bubuwo Ŋu

Zi geɖe la, menye ame ɖeka ŋu koe nuvɔ̃ gblẽa nu le o. Le kpɔɖeŋu me, ahasiwɔla wɔ nuvɔ̃ ɖe Mawu ŋu; ede abi srɔ̃a kple viawo ŋu; ne nyɔnu srɔ̃tɔe wòwɔ ahasia kple la, egblẽ nu le eƒe ƒomea ŋu; eye wògblẽ ŋkɔ nyui si le hamea ŋu hã. Aleke wòbua nu mawo katãe? Ðe wòse veve vevie hetrɔ dzi me anukwaretɔea? Alo gbɔgbɔ si ŋu woƒo nu tsoe le Psalmo 94 ye wòɖe fia: “Ame vɔ̃ɖiwo katã le ɖadzra ɖam. Yehowa, wogbã wò dukɔ la nyanyanya, eye wote wò domenyinu la ɖe anyi, wowu ahosiwo kple amedzrowo, eye wodo hlɔ̃ ɖe tsyɔ̃eviwo ŋu hele gbɔgblɔm be: Yehowa mele ekpɔm o, Yakob ƒe Mawu la medze sii o.”—Psalmo 94:4-7.

Anɔ eme be nuvɔ̃nya siwo gbɔ woakpɔ le hamea me la maku ɖe amewuwu ŋu o. Gake gbɔgbɔ si woɖe fia le afisia—gbɔgbɔ si nye eɖoɖo koŋ agblẽ nu le ame bubuwo ŋu ɖe ame ŋutɔ ƒe viɖe ta—ate ŋu adze ƒã ne hamemegãwo le nuvɔ̃wɔnya aɖe me kum. Esia hã nye dada, ame vɔ̃ɖi ƒe dzesi. (Lododowo 21:4) Eto vovo sã na Kristotɔ vavã si lɔ̃na be yeatsɔ eɖokui asa vɔ ɖe nɔvia ta ƒe gbɔgbɔ.—Yohanes 15:12, 13.

Mawu ƒe Gɔmeɖosewo Ŋudɔwɔwɔ

Menye sewoe míebe míatsɔ afɔɖoƒe siawo ade o. Gake wona míekpɔ nane siwo Yehowa buna be wonye nu vɔ̃ɖi ŋutɔŋutɔwo la dze sii. Ðe wògbe be yematsɔ nuvɔ̃ si yewɔ la ƒe agba oa? Ðe nuvɔ̃wɔla la tsɔ dada do toku aɖaŋu siwo woɖo nɛ le nya sia ke ŋu va yi laa? Ðe wòwɔ nuvɔ̃ ga gbogbo aɖewo atraɖiia? Ðe wòdze gaglãa be nugbegblẽwɔla la ɖe bubumademade Yehowa ƒe se ŋu fia? Ðe wòte kpɔ de aɖaŋu aɖewo be yeaɣla nuvɔ̃a, ɖewohĩ anɔ ame bubuwo gblẽm le ɣeyiɣi ma ke mea? (Yuda 4) Ðe nu gbegblẽa ƒe godzedze na eƒe agbagbadzedze siawo gado gã ɖe edzi boŋua? Ðe nugbegblẽwɔla la metsɔ ɖeke le nusi wògblẽ le ame bubuwo kple Yehowa ƒe ŋkɔa ŋu la me kura oa? Aleke eƒe nuwɔna le? Ðe dada kple ɖokuidodoɖedzi gale eme esi wotsɔ Ŋɔŋlɔawo xlɔ̃ nui dɔmenyotɔe vɔa? Ðe medina tso dzi me be yeadzudzɔ nu gbegblẽa wɔwɔ oa? Ne hamemegãwo kpɔ nusiawo siwo ɖe dzimematrɔmatrɔ fia kɔte la, woaƒo nya ta be nuvɔ̃ siwo wòwɔ la nye vɔ̃ɖivɔ̃ɖi, ke menye ŋutilã ƒe gbɔdzɔgbɔdzɔ ko o.

Ne hamemegãwo le amesi edze abe susu vɔ̃wo le dzi me nɛ ene ƒe nya gbɔ kpɔm hã la, womedzudzɔa nuxɔxlɔ̃e o be wòati nudzɔdzɔewɔwɔ yome. (Hebritɔwo 3:12) Ame vɔ̃ɖiwo ate ŋu atrɔ dzi me ahatrɔ. Ne mele alea o ɖe, ke nukata Yehowa ƒoe ɖe Israel-viwo nu be: “Ame vɔ̃ɖi neɖe asi le eƒe mɔ ŋu, eye nu vlo wɔla neɖe asi le eƒe susuwo ŋu, ne wòatrɔ ɖe Yehowa ŋu, ekema akpɔ nublanui nɛ, eye wòatrɔ ɖe mía Mawu ŋu, elabena etsɔa nuvɔ̃ kena geɖe”? (Yesaya 55:7) Ðewohĩ le ʋɔnudɔdrɔ̃a me la, hamemegãwo akpɔ tɔtrɔ aɖe le eƒe dzi me abe alesi wòadze le eƒe dzimetɔtrɔ ƒe nuwɔna kple nɔnɔme me ene.

Ne hamemegã alẽkplɔlawo le ame ɖem le ha me gɔ̃ hã la, woade dzi ƒo nɛ be wòatrɔ dzi me ahadze agbagba atrɔ va be Yehowa nagakpɔ ŋudzedze ɖe eŋu. Miɖo ŋku “ame vɔ̃ɖi” si nɔ Korinto dzi. Edze ƒã be etrɔ eƒe nɔnɔme, eye Paulo kafui emegbe be woagaxɔe. (Korintotɔwo II, 2:7, 8) Bu Fia Manase hã ŋu kpɔ. Evɔ̃ɖi ŋutɔŋutɔ nyateƒe, gake esi wòtrɔ dzi me mlɔeba la, Yehowa xɔ eƒe dzimetɔtrɔ.—Fiawo II, 21:10-16; Kronika II, 33:9, 13, 19.

Nyateƒee, nuvɔ̃ aɖe li womatsɔ ake o—nuvɔ̃ si wowɔ ɖe gbɔgbɔ kɔkɔea ŋu. (Hebritɔwo 10:26, 27) Yehowa koe nyana amesi wɔ nuvɔ̃ sia tɔgbe. Ŋusẽ aɖeke mele amegbetɔwo si be woawɔ esia o. Agba si le hamemegãwo dzie nye be woana hamea nanɔ dzadzɛ eye woakpe ɖe nuvɔ̃wɔla trɔdzimewo ŋu agaɖo wo te. Ne wotsɔ gɔmesese kple ɖokuibɔbɔ wɔ esiae, wona woƒe nyametsotsowo ɖe Yehowa ƒe nunya fia la, ekema Yehowa ayra ɖe woƒe alẽkpɔkplɔdɔ ƒe akpa sia dzi.

[Etenuŋɔŋlɔ]

[Nɔnɔmetata si le axa 29]

Anania kple Safira ka aʋatso na gbɔgbɔ kɔkɔe la tsɔ ɖe dzi vɔ̃ɖi si le wo si fia