Akpa Evelia—Kekelia Ƒe Keklẽwo—Gãawo Kple Sueawo

“Wò kekeli me míele kekeli kpɔm le.”—PSALMO 36:10.

 1. Agbagba kae wodze le gɔmedzedzea me be woase Nyaɖeɖefia ƒe agbalẽa me kpɔɖeŋuwo gɔme?

TSO blema ke la, Kristotɔwo di vevie be yewoase Biblia ƒe agbalẽ si nye Nyaɖeɖefia gɔme. Enye alesi nyateƒea ƒe kekelia me nɔa kɔkɔm ɖe edzi ɖaa ƒe kpɔɖeŋu nyui aɖe. Le ƒe 1917 me la, Yehowa ƒe amewo ta Nyaɖeɖefia gɔmeɖeɖe aɖe ɖe agbalẽ si nye The Finished Mystery me. Eklo nu le Kristodukɔa ƒe subɔsubɔhakplɔlawo kple dunyahela gãwo dzi vɔvɔ̃manɔmee, gake teƒe vovovowoe wokpɔ eƒe numeɖeɖe geɖe tsoe. Ke hã The Finished Mystery la do Biblia Nusrɔ̃viwo ƒe nuteƒewɔwɔ na mɔnu si wokpɔna si Yehowa nɔ zazãm la kpɔ.

 2. Kekeli kae nyati si nye “Dukɔ la ƒe Dzɔdzɔ” klẽ ɖe Nyaɖeɖefia ƒe agbalẽa dzi?

² Kekelia ƒe keklẽ ɖedzesi aɖe klẽ ɖe Nyaɖeɖefia ƒe agbalẽa dzi esi wota nyati si nye “Dukɔ la ƒe Dzɔdzɔ” ɖe March 1, 1925 ƒe Eŋlisigbe me Gbetakpɔxɔ me. Wosusui tsã be Roma Fiaɖuƒea me trɔ̃subɔlawo kple Roma Sɔlemeha la dome ʋa ŋue Nyaɖeɖefia ta 12 le nu ƒom le, eye be ŋutsuvi la tsi tre ɖi na papa ƒe dziɖuɖu. Gake nyati ma fia be Nyaɖeɖefia 11:15-18 me nyawo do ƒome kple ta 12 lia ƒe gɔmesese eye wòfia asii be eku ɖe Mawu ƒe Fiaɖuƒea ƒe dzɔdzɔ ŋu.

 3. Agbalẽ kawoe gakɔ Nyaɖeɖefia me ɖe dzi?

³ Esiawo katã kplɔ mí yi Nyaɖeɖefia la ƒe gɔmesese si me kɔ wu gbɔe esime wota agbalẽ si nye Light si le babla eve me le ƒe 1930 me. Gake numeɖeɖe siwo sɔ wu dze le “Babylon the Great Has Fallen!” God’s Kingdom Rules! (ƒe 1963) kple “Then Is Finished the Mystery of God” (ƒe 1969) me. Ke hã nu geɖe gakpɔtɔ li woasrɔ̃ le Nyaɖeɖefia ƒe nyagblɔɖigbalẽa ŋu. Ẽ, kekeli si me kɔ wu klẽ ɖe edzi le ƒe 1988 me, esime wota Nyaɖeɖefia—Etaƒoƒo Keŋkeŋ la Ðo Vɔ! Míate ŋu agblɔ be nusi gbɔ numekɔkɔ vivivii sia tsoe nye be “Aƒetɔ ƒe ŋkeke la” si dze egɔme le ƒe 1914 me ŋue Nyaɖeɖefia ƒe nyagblɔɖia ku ɖo. (Nyaɖeɖefia 1:10) Eyata woase Nyaɖeɖefia ƒe agbalẽa me eme nakɔ nyuie wu le esime ŋkeke ma va le yiyim.

Woɖe Nusi “Ŋusẽ Siwo Kɔ Wu” Fia Gɔme

 4, 5. (a) Aleke Biblia Nusrɔ̃viwo se Romatɔwo 13:1 gɔmee? (b) Nukae wova kpɔ emegbe be eyae nye Ŋɔŋlɔawo me gɔmesese si sɔ le “ŋusẽ siwo kɔ wu” ŋu?

⁴ Woxɔ kekelia ƒe keklẽ si me kɔ nyuie le ƒe 1962 me ku ɖe Romatɔwo 13:1 ŋu, si gblɔ be: “Amesiame nabɔbɔ eɖokui na ŋusẽ siwo kɔ wu [“dziɖuɖu, siwo ŋusẽ li na,” Eʋegbe Biblia].” (King James Version) Biblia Nusrɔ̃vi gbãtɔwo se egɔme be “ŋusẽ siwo kɔ wu” si woyɔ le afima la fia xexemedziɖuɖuwo. Wotsɔe be ŋɔŋlɔ sia fia be ne wozi asrafodɔ ɖe Kristotɔ aɖe dzi le aʋaŋɔli la, ele be wòalɔ̃ ado asrafowu, akpla tu ayi aʋagbeadzi, ayi do si me asrafowo bena ɖo le aʋa me la me. Wosusui be esi Kristotɔ mate ŋu awu ehavi amegbetɔ o ta la, ne eglo la, ke ɖe wòada eƒe tu ɖe yame.a

⁵ November 15 kple December 1, 1962 ƒe Eŋlisigbe me Gbetakpɔxɔ kɔ nya sia me esi wonɔ Yesu ƒe nya siwo le Mateo 22:21 si gblɔ be: “Mitsɔ nusi enye kaisaro tɔ la na kaisaro, eye nusi enye Mawu tɔ la, na Mawu” la me dzrom. Apostoloawo ƒe nya si le Dɔwɔwɔwo 5:29 la ku ɖe nya siawo ŋu, be: “Ele be, [míabu] Mawu awu amewo.” Ne nusi Kaisaro—“ŋusẽ siwo kɔ wu”—di tso Kristotɔwo si la mebia be woawɔ nusi tsi tre ɖe Mawu ƒe se ŋu o koe wòle be woabɔbɔ wo ɖokui ɖe ete. Ðokuibɔbɔ ɖe Kaisaro te se ɖe afi aɖe ko, menye le nusianu me o. Nusiwo metsi tre ɖe Mawu ƒe nudidiwo ŋu o koe Kristotɔwo tsɔna na Kaisaro. Aleke gbegbe woƒe dzi dze emee nye si be nya ma me kɔ na wo nyuie!

Kekelia Klẽ ɖe Ðoɖowɔnyawo Dzi

 6. (a) Be woaɖe asi le nɔƒekɔkɔnɔnɔ ƒe ɖoɖo si bɔ ɖe Kristodukɔa me ŋu la, gɔmeɖose kae wotsɔ wɔ dɔe? (b) Nukae wova kpɔ mlɔeba be eyae nye mɔ nyuitɔ si dzi woato atia amesiwo anye dzikpɔlawo le hamea me?

⁶ Amesiwo anye hamemegãwo kple subɔlawo ƒe nya hã nɔ anyi. Be woaɖe asi le nɔƒekɔkɔnɔnɔ ƒe ɖoɖo si bɔ ɖe Kristodukɔa me ŋu la, wotso nya me be woatia wo to amehawo ƒe asidadaɖedzi me le hamea me tɔwo ƒe akɔdada me. Gake kekeli si me nɔ kɔkɔm ɖe edzi si dze le September 1 kple October 15, 1932 ƒe Eŋlisigbe me Gbetakpɔxɔ me la ɖee fia be akɔdada atsɔ atia hamemegãwoe mesɔ ɖe Ŋɔŋlɔawo nu o. Eyata wova ɖo subɔsubɔkɔmiti, kple subɔsubɔdɔdzikpɔla siwo Habɔbɔa ŋutɔ ɖona la ɖe eteƒe.

 7. Ðɔɖɔɖo kawoe kekelia ƒe keklẽ na wowɔ le mɔ si nu woɖoa subɔlawo le le hamea me ŋu?

⁷ Kekelia ƒe keklẽ siwo dze le June 1 kple June 15, 1938 ƒe Eŋlisigbe me Gbetakpɔxɔ me fia be mele be woatia subɔlawo le hamea me o, ke boŋ ɖe wòle be woaɖo wo, egɔmee nye be woaɖo wo le teokrasiɖoɖo nu. Le ƒe 1971 me la, kekelia ƒe keklẽ bubu fia be menye hame ƒe subɔla ɖeka koe akpɔ hame ɖesiaɖe dzi o. Ke boŋ ele be hamemegãwo, alo dzikpɔlawo, ƒe ha si Yehowa Ðasefowo ƒe Dziɖuha la ɖo nanɔ hame ɖesiaɖe me. Eyata to kekeli si me le kɔkɔm ɖe edzi le ƒe 40 kple edzivɔ me la, eva dze ƒã be “dɔla nuteƒewɔla kple aɖaŋudzela” lae wòle be wòaɖo hamemegãwo kpakple subɔlawo, siwo míeyɔna fifia be subɔsubɔdɔwɔlawo, to eƒe Dziɖuha la dzi. (Mateo 24:45-47) Esɔ kple nusi dzɔ le apostoloawo ŋɔli. Ƒe alafa gbãtɔ me dziɖuha lae ɖo ŋutsuwo, abe Timoteo kple Tito ene, be woanye dzikpɔlawo. (Timoteo I, 3:1-7; 5:22; Tito 1:5-9) Esiawo katã nye Yesaya 60:17 mevava ɖedzesi aɖe, be: “Mahe sika vɛ ɖe akɔbli teƒe kple klosalo ɖe gayibɔ teƒe, akɔbli ɖe ati teƒe, eye gayibɔ ɖe kpewo teƒe, matsɔ ŋutifafa aɖo tatɔe na wò kple dzɔdzɔenyenye aɖo wò dɔnunɔlae.”

 8. (a) Ðɔɖɔɖo kawoe alesi nyateƒea me kɔ ɖe edzi na wowɔ le mɔ si nu Habɔbɔa wɔa dɔ ɖo tsã la ŋu? (b) Kɔmiti kawoe le Dziɖuha la me, eye dɔ vovovo alo dzikpɔkpɔdɔ kawoe wowɔna?

⁸ Gbetakpɔxɔ Habɔbɔa ƒe dɔwɔwɔ ŋu nyawo hã nɔ anyi. Wobua Yehowa Ðasefowo ƒe Dziɖuha la be esɔ kple Watch Tower Bible and Tract Society of Pennsylvania ƒe dɔdzikpɔha me tɔwo, eye nyawo ƒe akpa gãtɔ kpɔ eƒe zimenɔla ŋkume. Abe alesi wogblɔe le 1977 Yearbook of Jehovah’s Witnesses (axa 258-9) mee ene la, tso ƒe 1976 me la, Dziɖuha la dze dɔwɔwɔ gɔme to kɔmiti ade dzi, eye wode dɔ asi na wo dometɔ ɖesiaɖe be wòakpɔ xexeame katã ƒe dɔa ƒe akpa aɖewo dzi. Dɔwɔlawo ƒe Kɔmiti kpɔa dɔwɔlawo, siwo dometɔ aɖewoe nye amesiwo katã le subɔsubɔm le xexeame katã ƒe Betel-ƒomea me, ƒe nyawo gbɔ. Agbalẽtata Kɔmiti kpɔa nuhiahiãwo kple senyawo katã, abe anyigba kple xɔtunyawo kple agbalẽtata ene gbɔ. Subɔsubɔ Kɔmiti kpɔa ɖaseɖiɖidɔa dzi eye wòkpɔa dzikpɔla mɔzɔlawo, mɔɖelawo, kple hamea me gbeƒãɖelawo ƒe dɔwo gbɔ. Nufiafia Kɔmiti ƒe dɔe nye be wòakpɔ hamea ƒe kpekpewo, ŋkeke ɖeka takpekpe tɔxɛwo, nutome sue takpekpewo, kple nutome gã kpakple dukɔwo dome takpekpewo kple suku vovovo siwo woɖona be woatsɔ ahe Mawu ƒe amewoe la dzi. Agbalẽŋɔŋlɔ Kɔmiti kpɔa agbalẽ hamehame siwo katã wotana la ŋɔŋlɔ kple wo gɔmeɖeɖe gbɔ, eye wòkpɔa egbɔ be nusianu nasɔ pɛpɛpɛ kple Ŋɔŋlɔawo. Zimenɔla ƒe Kɔmiti kpɔa nudzɔdzɔ kpatawo kple nya siwo gbɔ wòhiã be woakpɔ kpata la gbɔ.b Eye le ƒe 1970 ƒe ƒeawo me hã la, kɔmiti va dze Gbetakpɔxɔ Habɔbɔa ƒe alɔdzewo ƒe nyawo gbɔkpɔkpɔ gɔme eye meganye dzikpɔla ɖeka ko o.

Kekelia Klẽ ɖe Kristotɔwo ƒe Zɔzɔme Dzi

 9. Aleke kekelia ƒe keklẽwo wɔ dɔ ɖe Kristotɔwo kple xexeamedziɖuɖuwo dome ƒomedodo dzii?

⁹ Kekelia ƒe keklẽ geɖe ku ɖe Kristotɔwo ƒe agbenɔnɔ ŋu. Le kpɔɖeŋu me, bu akpaɖekedzimademadenya la ŋu kpɔ. Kekeli aɖe si me kɔ ŋutɔ klẽ ɖe nya sia dzi le nyati si nye “Akpaɖekedzimademade” si dze le November 1, 1939 ƒe Eŋlisigbe me Gbetakpɔxɔ me. Aleke gbegbe wòsɔ ɖe ɣeyiɣia dzi nyuie nye si, esi wòva le Xexemeʋa II ƒe gɔmedzedze ƒe ɣeyiɣi kpui aɖe ko megbe! Nyatia ɖe nusi akpaɖekedzimademade nye me eye wòɖee fia be mele be Kristotɔwo nade nu dunyawo kple dukɔwo dome dzrehehewo me o. (Mixa 4:3, 5; Yohanes 17:14, 16) Esia hã tae dukɔwo katã alé fu wo ɖo. (Mateo 24:9) Aʋa siwo blema Israel-viwo wɔ la menye kpɔɖeŋu si Kristotɔwo nasrɔ̃ le nya sia me o, abe alesi Yesu na eme kɔe le Mateo 26:52 ene. Tsɔ kpe ɖe eŋu la, egbea dunyahedukɔ ɖeka hɔ̃ hã menye teokrasi si dzi ɖum Mawu le abe alesi wòɖu blema Israel dzii ene o.

10. Nukae kekelia ƒe keklẽwo ɖe fia le alesi Kristotɔwo abu ʋu ŋui?

¹⁰ Kekelia klẽ ɖe ʋu ƒe nu kɔkɔe nyenye hã dzi. Biblia Nusrɔ̃vi aɖewo susui be tsã Yudatɔ Kristotɔwo koe wode ʋuɖuɖuse si le Dɔwɔwɔwo 15:28, 29 na. Gake Dɔwɔwɔwo 21:25 ɖee fia be wode se sia na dukɔwo me tɔ siwo zu xɔsetɔwo hã. Eyata ʋu ƒe kɔkɔenyenye la ku ɖe Kristotɔ ɖesiaɖe ŋu, abe alesi wofiae le July 1, 1945 ƒe Eŋlisigbe me Gbetakpɔxɔ mee ene. Efia be menye lãwo ƒe ʋu, abe ʋubloŋ alo agbodzomle ene, ko ɖuɖue wòle be woatsri o, ke boŋ woatsri amegbetɔ ƒe ʋu hã ɖuɖu, abe le ʋudodo me ene.

11. Nukae wokpɔ le Kristotɔwo ƒe nukpɔsusu le atamazazã ŋu la ŋuti?

¹¹ Le kekelia ƒe kɔkɔ ɖe edzi ta la, wotsɔ ŋkubiã si sɔ kpɔ nuwɔna siwo wobuna tsã ko be womesɔ o lae. Esia ƒe kpɔɖeŋu aɖee nye atama zazã. Le August 1, 1895 ƒe Zion’s Watch Tower me la, Nɔviŋutsu Russell ƒo nu tso Korintotɔwo I, 10:31 kple Korintotɔwo II, 7:1 ŋu eye wòŋlɔ be: “Nyemate ŋu akpɔ alesi wòanye Mawu ƒe ŋutikɔkɔee, alo alesi wòaɖe vi na Kristotɔ aɖe ŋutɔe be wòazã atama eɖanye le nɔnɔme ka ke mee o.” Tso ƒe 1973 me la, wose egɔme nyuie be atamazãla aɖeke mate ŋu anye Yehowa Ðasefo o. Le ƒe 1976 me la, woɖe eme be Ðasefo aɖeke mate ŋu awɔ dɔ le tsyatsyadadɔ me aganɔ hamea me o.

Ðɔɖɔɖo Bubuwo

12. (a) Nukae kekelia ƒe keklẽ aɖe ɖe fia le Fiaɖuƒea ƒe safui xexlẽme si Petro zã ŋu? (b) Nudzɔdzɔ kawo mee Petro zã safuiawo dometɔ ɖesiaɖe le?

¹² Kekelia gaklẽ ɖe kpɔɖeŋu safui xexlẽme si Yesu tsɔ na Petro hã dzi. Biblia Nusrɔ̃viawo susu tsã be safui evee Petro xɔ tsɔ ʋu mɔ na amesiwo ava zu Fiaɖuƒe domenyilawo—ezã ɖeka na Yudatɔwo le ƒe 33 M.Ŋ. ƒe Pentekoste-ŋkekea dzi eye evelia nye na Dukɔwo me tɔwo, si wòzã zi gbãtɔ le ƒe 36 M.Ŋ. me esime Petro ɖe gbeƒã na Kornelio. (Dɔwɔwɔwo 2:14-41; 10:34-48) Le ɣeyiɣi aɖe megbe la, wova kpɔe be ƒuƒoƒo etɔ̃lia aɖe gali—Samariatɔwo. Petro zã safui evelia esime wòʋu Fiaɖuƒe mɔnukpɔkpɔ na wo. (Dɔwɔwɔwo 8:14-17) Eyata wozã safui etɔ̃lia esime Petro ɖe gbeƒã na Kornelio.—August 1, 1980 Gbetakpɔxɔ, ƒe axa 4-10, 13.

13. Nukae kekelia ƒe keklẽwo ɖe fia le alẽkpo siwo woyɔ le Yohanes ta 10 me ŋu?

¹³ Edze le kekelia ƒe keklẽ bubu me be menye alẽkpo eve ŋu koe Yesu ƒo nu le o ke boŋ etɔ̃e. (Yohanes, ta 10) Woawoe nye (1) Yudatɔwo ƒe alẽkpo la si ƒe agbonudzɔlae nye Yohanes Amenyrɔ̃ɖetsimela, (2) Fiaɖuƒea ƒe domenyila amesiaminawo ƒe kpo, kple (3) ‘alẽ bubuawo,’ amesiwo si anyigbadzigbenɔnɔ ƒe mɔkpɔkpɔ le, ƒe kpo.—Yohanes 10:2, 3, 15, 16; August 1, 1984 Gbetakpɔxɔ, axa 19-28.

14. Aleke kekelia ƒe keklẽ si me kɔ ɖe edzi la kɔ ɣeyiɣi si me Aseyetsoƒea ŋutɔŋutɔ dze egɔme la mee?

¹⁴ Wokɔ gɔmesese si le Aseyetsoƒe si nye egbegbe tɔ hã me. Le Sea te la, wobua ƒe 50 lia ɖesiaɖe Aseyetsoƒe gã si me wogbugbɔa nuwo naa amesiwo tɔ wonye tsã la. (Mose III, 25:10) Wobui ɣeyiɣi didi aɖe do ŋgɔ be enye vɔvɔli na Kristo ƒe Ƒe Akpe Ðeka Dziɖuɖua. Le ƒe siwo va yi eteƒe medidi boo o me la, wokpɔe be egbegbe aseyetsoƒea dze egɔme ŋutɔŋutɔ le ƒe 33 M.Ŋ. ƒe Pentekostea dzi, esime amesiwo xɔ gbɔgbɔ kɔkɔe si wokɔ ɖi la zu ablɔɖeviwo tso Mose ƒe Se ƒe nubabla la me.—May 1, 1987 ƒe Gbetakpɔxɔ, axa 21-31.

Kekelia Klẽ ɖe Nyawo Yɔyɔ Dzi

15. Kekeli kae klẽ ɖe nya si nye “ɖoɖowɔwɔ” la zazã dzi?

¹⁵ “Nyagblɔla la di nya viviwo be, yeakpɔ, eye nyateƒenya, siwo woŋlɔ ɖi la, wole eteƒe.” (Nyagblɔla 12:10) Nya siawo sɔ na míaƒe nyati sia hã, elabena menye nufiafia kple agbenɔnɔ ŋuti nyawo dzi koe kekelia klẽ ɖo o ke boŋ eklẽ ɖe Kristotɔwo ƒe nuwo yɔyɔ kple woƒe gɔmesese si de pɛpɛpɛ hã dzi. Le kpɔɖeŋu me, agbalẽ siwo Biblia Nusrɔ̃viwo lɔ̃na vevie wu dometɔ ɖekae nye Studies in the Scriptures ƒe bablawo dometɔ gbãtɔ si ƒe ŋkɔe nye The Divine Plan of the Ages (Mawu ƒe Ðoɖowɔwɔ ɖe Ɣeyiɣiwo Ŋu). Gake le ɣeyiɣi aɖe megbe la, wova kpɔe be amegbetɔwo ŋu koe Mawu ƒe Nya la gblɔna le be wowɔa ɖoɖo. (Lododowo 19:21) Ŋɔŋlɔawo megblɔ le Yehowa ŋu kpɔ be ewɔa ɖoɖo o. Ðoɖowɔwɔ mehiã nɛ o. Nusianu si ƒe tame wòɖo la ava eme godoo le eƒe nunya kple ŋusẽ siwo seɖoƒe meli na o ta, abe alesi míexlẽe le Efesotɔwo 1:9, 10, NW, ene be: “Esi wòna míenya eƒe lɔlɔ̃nu ƒe nya ɣaɣla la le eƒe ŋudzedze, si ƒe tame wòɖo ɖi hena azãgbewo ƒe ɖoɖo ƒe dukplɔɖoɖo.” Eyata vivivi la, wova kpɔe be nya “tameɖoɖo” ye sɔ wu be míazã ne míele nu ƒom tso Yehowa ŋu.

16. Vivivi la, nukae wova kpɔ be eyae nye Luka 2:14 ƒe gɔmesese nyuitɔ?

¹⁶ Ehiã be míase Luka 2:14 hã me nyuie wu. Exlẽ le Eʋegbe Biblia me be: “Ŋutikɔkɔe woana Mawu le dziƒo boo, eye ŋutifafa ava anyigba dzi; amegbetɔwo ŋu woakpɔ ŋudzedze nyui le.” Wokpɔ be gɔmeɖeɖe sia mena nya si le eme la dze nyuie o, elabena Mawu ƒe ŋudzedzekpɔkpɔ menɔa ame vɔ̃ɖiwo dzi o. Eyata Ðasefowo bu nya sia be enye ŋutifafa na amesiwo si lɔlɔ̃nu nyui le ɖe Mawu ŋu. Eyata wonɔ amesiwo tsɔ ɖe le Biblia me yɔm be lɔlɔ̃nunyuitɔwo. Gake wova se egɔme be menye amewo ƒe lɔlɔ̃nu nyui ŋue nya la ku ɖo o, ke boŋ Mawu ƒe lɔlɔ̃nu nyui boŋ ŋue. Eyata New World Translation ƒe etenuŋɔŋlɔ si ku ɖe Luka 2:14 ŋu la ƒo nu tso “amesiwo ŋu [Mawu kpɔa] ŋudzedze ɖo” ŋu. Mawu ƒe lɔlɔ̃nu nyui nɔa Kristotɔ siwo katã nɔa agbe ɖe woƒe adzɔgbeɖeɖe nu dzi.

17, 18. Nuka tae Yehowa aʋli, eye nuka ŋue wòakɔ?

¹⁷ Nenema ke Ðasefowo ƒo nu tso Yehowa ƒe ŋkɔa taʋiʋli ŋu ɣeyiɣi didi aɖe. Gake ɖe Satana ke ɖi le Yehowa ƒe ŋkɔa ŋua? Eyata ɖe Satana ƒe amewo dometɔ aɖe ke ɖi le eŋu, abe ɖe gome mele Yehowa si be wòatsɔ ŋkɔ ma ene oa? Kura o. Menye Yehowa ŋkɔe wotɔ gbee o eye eyata mehiã be woaʋli eta o. Eyatae le Gbetakpɔxɔ Habɔbɔa ƒe agbalẽ yeyetɔwo me la, womegagblɔna be woʋli Yehowa ƒe ŋkɔ ta o. Nusi wogblɔnae nye be woaʋli Yehowa ƒe dziɖulanyenye ta eye woakɔ eƒe ŋkɔa ŋu. Esia wɔ ɖeka kple nusi Yesu gblɔ na mí be míado gbe ɖa abia be: “Wò ŋkɔ ŋuti nakɔ!” (Mateo 6:9) Yehowa gblɔ zi geɖe be yeakɔ yeƒe ŋkɔ si Israel-viwo ƒo ɖii ke menye ɖe wotɔ gbee o la ŋu.—Xezekiel 20:9, 14, 22; 36:23.

¹⁸ Enyo be míade dzesii be le ƒe 1971 me la, agbalẽ si nye “The Nations Shall Know That I Am Jehovah”—How? de vovototo nya siawo me be: “Yesu Kristo awɔ aʋa . . . na Yehowa ƒe xexeame katã ƒe Dziɖulanyenye taʋiʋli kple na Yehowa ƒe ŋkɔa ŋutikɔkɔ.” (Axa 364-5) Le ƒe 1973 me la, God’s Kingdom of a Thousand Years Has Approached gblɔ be: “‘Xaxa gã’ si gbɔna lae nye ɣeyiɣi si me Mawu Ŋusẽkatãtɔ Yehowa aʋli eƒe xexeame katã ƒe dziɖulanyenye ta eye wòakɔ eƒe ŋkɔ xɔasi la ŋu.” (Axa 409) Eye le ƒe 1975 me la, Man’s Salvation Out Of World Distress at Hand! gblɔ be: “Ekema nudzɔdzɔ gãtɔ kekeake le xexeame katã ƒe ŋutinya me adzɔ, esi nye Yehowa ƒe xexeame katã ƒe dziɖulanyenye taʋiʋli kple eƒe ŋkɔ kɔkɔe la ŋutikɔkɔ.”—Axa 281.

19, 20. Aleke míate ŋu aɖee afia be míekpɔ ŋudzedze ɖe gbɔgbɔmekekelia ŋu?

¹⁹ Yayra gã kae nye si wònye be Yehowa ƒe amewo le gbɔgbɔmekekeli gbogbo siawo xɔm! Vovototo gã si le woawo kple Kristodukɔa kplɔla siwo le gbɔgbɔmeviviti me dome la dze le nunɔla aɖe ƒe nya siawo me, be: “Nukatae nuvɔ̃ li ɖo? Nukatae fukpekpe li? Nukata abosam li? Nya siawoe medi be mabia Aƒetɔ la ne meɖo dziƒo.” Gake Yehowa Ðasefowo ate ŋu agblɔ nusiwo tae la nɛ: Yehowa ƒe dziɖulanyenye ƒe dzedze ŋuti nyaʋiʋli kple nyabiabia si fɔ ɖe te be nuwɔwɔ siwo nye amegbetɔwo ate ŋu alé nuteƒewɔwɔ me ɖe asi na Mawu togbɔ be Abosam atsi tre ɖe wo ŋu hã ŋuti tae.

²⁰ Le ƒeawo me la, kekelia ƒe keklẽ gãwo kple suewo kɔ Yehowa subɔla adzɔgbeɖelawo ƒe toƒe. Esia nye ŋɔŋlɔawo abe Psalmo 97:11 kple Lododowo 4:18 ene mevava. Gake migana míaŋlɔ be gbeɖe o be zɔzɔ le kekelia me fia be míakpɔ ŋudzedze ɖe kekeli si me le kɔkɔm ɖe edzi ŋu eye míanɔ agbe si asɔ ɖe enu. Abe alesi míekpɔe ene la, kekelia ƒe keklẽ sia si me kɔ ɖe edzi la ku ɖe míaƒe agbenɔnɔ kple míaƒe gbeƒãɖeɖedɔa ŋu.

[Etenuŋɔŋlɔwo]

Èɖo Ŋku Wo Dzia?

◻ Kekeli kae woklẽ ɖe ɖokuibɔbɔ ɖe “ŋusẽ siwo kɔ wu” dzi?

◻ Ðoɖowɔwɔ ƒe tɔtrɔ kawoe kekelia ƒe keklẽwo he vɛ?

◻ Dɔ kae kekeli si me kɔ ɖe edzi la wɔ ɖe Kristotɔwo ƒe agbenɔnɔ dzi?

◻ Ðɔɖɔɖo kawoe gbɔgbɔmekekelia na míewɔ le alesi míesea Ŋɔŋlɔawo me nya aɖewo gɔmee ŋu?

[Nɔnɔmetata Tsoƒe si le axa 25]

Safui siwo le axa 24: Foto si National Design Museum, Smithsonian Institution ɖe le Cooper-Hewitt dzie wonɔ te ɖo tae