Ðe ‘Dzi Ðoto’ Le Asiwòa?

ESIME Salomo zu fia ɖe blema Israel dzi la, ekpɔ be enye dɔ si tri akɔ wu ye. Eyata ebia Mawu be wòana nunya kple sidzedze ye. (Kronika II, 1:10) Salomo gado gbe ɖa hã be: “Na [dzi si ɖoa to, NW] wò dɔla, ne wòadrɔ̃ ʋɔnu wò dukɔ.” (Fiawo I, 3:9) Ne “dzi si ɖoa to” su Salomo si la, awɔ Mawu ƒe sewo kple gɔmeɖosewo dzi eye Yehowa ayrae.

Menye agbae dzi si ɖoa to ƒe amesinɔnɔ nye o ke boŋ nusi naa wokpɔa dzidzɔ boŋ ye wònye. Apostolo Yohanes ŋlɔ be: “Lɔlɔ̃ na Mawu enye si bena, míalé eƒe seawo me ɖe asi, eye eƒe seawo mesesẽ o.” (Yohanes I, 5:3) Ðikekemanɔmee la, ele be míaɖo to Mawu. Yehowae nye mía Wɔla Wɔnuku la ɖe. Etɔe anyigba la kple edzinuwo katã, klosalo kple sika gɔ̃ hã nye. Eyata le nyateƒe me la, míate ŋu ana ŋutilãmenu aɖeke Mawu o, togbɔ be eɖea mɔ be míazã ga atsɔ aɖe míaƒe lɔlɔ̃ afia ye hã. (Kronika I, 29:14) Yehowa di tso mía si be míalɔ̃ ye azɔ kple ye le ɖokuibɔbɔ me eye míawɔ yeƒe lɔlɔ̃nu.—Mixa 6:8.

Esi wobia Yesu Kristo be se kae nye vevitɔ le Sea me hã la, eɖo eŋu be: “Lɔ̃ Aƒetɔ [Yehowa], wò Mawu, kple wò dzi blibo kple wò luʋɔ blibo kpakple wò tamesusu blibo. Esia enye se gbãtɔ, si le vevie.” (Mateo 22:36-38) Mɔ siwo nu míaɖe lɔlɔ̃ ma afia le dometɔ ɖekae nye toɖoɖo Mawu. Eyata ele be wòanye mía dometɔ ɖesiaɖe ƒe gbedodoɖa be Yehowa nena dzi ɖoto mí.

Dzi Ðoto Nɔ Wo Si

Amesiwo si dzi ɖoto nɔ ƒe kpɔɖeŋuwo bɔ ɖe Biblia me fũ. Le kpɔɖeŋu me, Yehowa gblɔ na Noa be wòakpa aɖakaʋu gã aɖe na agbeɖeɖe. Dɔ sia nye dɔ gã aɖe si axɔ ƒe 40 alo 50. Togbɔ be egbea dɔwɔnu siwo zãa elektrikŋusẽ kple mɔ̃ vovovowo li hã la, anye mɔ̃ɖaŋudɔ gã aɖe be woakpa aɖaka gã sia si ate ŋu aho ɖe tsi dzi. Tsɔ kpe ɖe eŋu la, ele be Noa nana amesiwo ɖikekemanɔmee nɔ fewu ɖum henɔ alɔme ɖem le eŋu la nanya. Gake eɖo to le nu suetɔ kekeake hã me. Biblia gblɔ be: “Nenema pɛ wòwɔ.” (Mose I, 6:9, 22; Petro II, 2:5) Noa ɖe eƒe lɔlɔ̃ na Yehowa fia to toɖoɖo nuteƒewɔwɔtɔe ƒe geɖe me. Kpɔɖeŋu nyui kae nye si wòɖo ɖi na mí katã!

Bu blemafofo Abraham hã ŋu kpɔ. Mawu gblɔ nɛ be wòaʋu le Ur le Kaldea si me kesinɔnuwo bɔ ɖo ayi anyigba si menya o dzi. Abraham ɖo to numakemakee. (Hebritɔwo 11:8) Le eƒe agbemeŋkeke mamlɛawo me la, wo kple eƒe ƒomea wonɔ agbadɔ me. Esi wònye amedzro le anyigba la dzi ƒe geɖe megbe la, Yehowa tsɔ ŋutsuvi si ŋkɔe nye Isak yra wo kple srɔ̃a Sara si ɖoa to lae. Aleke gbegbe Abraham si xɔ ƒe 100 la alɔ̃ via si wòdzi le eƒe tsitsime lae nye si! Le ƒe aɖewo megbe la, Yehowa bia tso Abraham si be wòatsɔ Isak asa numevɔe. (Mose I, 22:1, 2) Eŋububu ɖeɖe ate ɖe Abraham dzi ŋutɔ. Gake eɖo to le alesi wòlɔ̃ Yehowa eye wòka ɖe edzi be dzidzimevi si ƒe ŋugbe wòdo la ato Isak dzi ava ta, ne afia be Mawu afɔe tso ame kukuwo dome gɔ̃ hã. (Hebritɔwo 11:17-19) Gake esime Abraham di be yeawu via la, Yehowa ɖo asi edzi be: “Menyae azɔ bena, èvɔ̃a Mawu, elabena mète wò tenuvi lam o.” (Mose I, 22:12) Le Abraham si vɔ̃a Mawu ƒe toɖoɖo ta wova yɔe be ‘Yehowa xɔlɔ̃.’—Yakobo 2:23.

Yesu Kristoe nye míaƒe kpɔɖeŋu nyuitɔ kekeake le toɖoɖo me. Hafi wòava zu amegbetɔ la, ekpɔ dzidzɔ ɖe Fofoa subɔsubɔ toɖoɖotɔe le dziƒo ŋu. (Lododowo 8:22-31) Esi Yesu va zu amegbetɔ la, eɖo to Yehowa le nusianu me, eye wòkpɔa dzidzɔ ɣesiaɣi le eƒe lɔlɔ̃nu wɔwɔ me. (Psalmo 40:9; Hebritɔwo 10:9) Eyata Yesu te ŋu gblɔ nyateƒetɔe be: “Nyemewɔa naneke le ɖokuinye si o, ke boŋ abe alesi Fofonye fiam ene la, nu mawo ke megblɔna. Eye amesi dɔm ɖa la, li kplim, eye megblẽ nye ɖeka ɖi o; elabena nye la mewɔa nusi dzea eŋu ɖaa.” (Yohanes 8:28, 29) Mlɔeba be Yesu naʋli Yehowa ƒe fianyenye ta eye wòaɖe ameƒomea me tɔ siwo nye toɖolawo la, elɔ̃ faa tsɔ eƒe agbe na, eye wòku vevesese helĩhelĩ ƒe vlodoameku. Le nyateƒe me, ‘edzɔ ɖe amewo ƒe nɔnɔme me, ebɔbɔ eɖokui ɖe anyi, eye wòɖo to yi ɖaseɖe ku me, ẽ, yiɖase fuwɔameti ŋuti ku la me ke.’ (Filipitɔwo 2:8) Dzi si ɖoa to ƒe kpɔɖeŋu nyui kae nye esi wòɖe fia!

Toɖoɖo Afãfã Mesɔ Gbɔ O

Menye amesiwo katã gblɔ be yewoɖoa to Mawu lae ɖo toe vavã o. Bu blema Israel-fia Saul ƒe kpɔɖeŋu ŋu kpɔ. Mawu gblɔ nɛ be wòatsrɔ̃ Amalekitɔ vɔ̃ɖiwo gbidii. (Samuel I, 15:1-3) Togbɔ be Saul tsrɔ̃ dukɔa hã la, egblẽ woƒe fia kple woƒe alẽ kple nyi aɖewo ɖi. Samuel bia be: “Nukaŋuti mèɖo to Yehowa ƒe gbe o?” Saul ɖo eŋu bena: ‘Meɖo to Yehowa ƒe gbe tso. Negbe Israel-dukɔ la koe ha alẽwo kple nyiwo, siwo nye busunuawo ƒe nyuitɔwo, be woatsɔ asa vɔ na Yehowa.’ Samuel ɖo eŋu tsɔ te gbe ɖe alesi wòhiãe be woatsɔ toɖoɖo blibo ana Yehowa dzi be: “Ã, numevɔwo kple akpedavɔsawoe dzea Yehowa ŋu wu toɖoɖo Yehowa ƒe gbea? Kpɔ ɖa, toɖoɖo nyo wu vɔsa, eye nusese nyo wu agbo ƒe ami. Elabena tosesẽ enye afakaka ƒe nuvɔ̃, eye tamesesẽ enye legbawo kple aklama kpakpɛwo subɔsubɔ. Esi nègbe Yehowa ƒe gbe sese la, eyata eya hã gbe wò be, màgaɖu fia o.” (Samuel I, 15:17-23) Nu gbogbo ka gbegbe nye si Saul bu le esi dzi ɖoto mele esi o ta!

Nunyala Fia Salomo si do gbe ɖa be woana dzi ɖoto ye kura gɔ̃ hã megayi edzi ɖo to Yehowa o. Ewɔ nusi Mawu melɔ̃ o esi wòɖe dutanyɔnuwo, amesiwo na wòwɔ nuvɔ̃ ɖe Mawu ŋu. (Nexemya 13:23, 26) Mawu ƒe ŋudzekpɔkpɔ dzo le Salomo dzi elabena meyi edzi wɔ nu kple dzi ɖoto o. Nuxlɔ̃ame kae enye esi esia nye na mí!

Esia mefia be Yehowa bia blibodede tso amegbetɔ siwo subɔnɛ si o. “Eɖoa ŋui be, kewɔ míenye.” (Psalmo 103:14) Ðikekemanɔmee la, mía dometɔ ɖesiaɖe awɔ vodada ɣeaɖewoɣi, gake Mawu ate ŋu akpɔe ne enye míaƒe dzimedidi be míawɔ nusi dzea ye ŋu. (Kronika II, 16:9) Ne míewɔ nuvɔ̃ le amegbetɔ ƒe blibomademade ta, gake hetrɔ dzime la, míate ŋu anɔ te ɖe Kristo ƒe tafevɔsa la dzi abia tsɔtsɔke, kple kakaɖedzi be Yehowa ‘atsɔ nuvɔ̃a ake geɖe.’ (Yesaya 55:7; Yohanes I, 2:1, 2) Míahiã Kristotɔ hamemegã lɔ̃amewo ƒe kpekpeɖeŋu hã, ale be míate ŋu akpɔ gbɔgbɔmelãmesẽ, eye xɔse sẽŋu kple dzi ɖoto nanɔ mía si.—Tito 2:2; Yakobo 5:13-15.

Aleke Wò Toɖoɖo De Bliboe?

Mí Yehowa subɔla akpa gãtɔ míesenɛ le mía ɖokui me ɖikekemanɔmee be dzi si ɖoa to le mía si. Míasusui be, Ðe nyemele gome kpɔm le Fiaɖuƒe gbeƒãɖeɖedɔa me oa? Ðe nyemenɔa te sesĩe ne akpaaɖekedzimademadenya gã mawo do mo ɖa oa? Eye ɖe nyemedea Kristotɔwo ƒe kpekpeawo edziedzi abe alesi apostolo Paulo xlɔ̃ nui ene oa? (Mateo 24:14; 28:19, 20; Yohanes 17:16; Hebritɔwo 10:24, 25) Nyateƒee, abe ƒuƒoƒo ene la, Yehowa subɔlawo ɖea toɖoɖo si tso dzi me fiana le nya vevi mawo me.

Gake míaƒe nuwɔna le gbesiagbe nudzɔdzɔwo me, le nusiwo dze nu suewo ya me ɖe? Yesu gblɔ be: “Amesi wɔa nuteƒe le nu suetɔ ke me la, enyea nuteƒewɔla le nu geɖewo hã me, eye amesi wɔa nu madzɔmadzɔ le nu suetɔ ke me la, enyea nu madzɔmadzɔ wɔla le nu geɖewo hã me.” (Luka 16:10) Eyata anyo be mía dometɔ ɖesiaɖe nabia eɖokui be, Ðe dzi ɖoto le asinye le nu suetɔwo alo nusiwo ŋu ame bubuwo menya nu le kura gɔ̃ hã o mea?

Hakpala la ɖee fia be le yeƒe aƒeme, afisi ame bubuwo makpɔ ye le o kura gɔ̃ hã, ‘yezɔ le yeƒe dzi ƒe fɔmaɖimaɖi me.’ (Psalmo 101:2) Esi nèle wò aƒeme la, ɖewohĩ àʋu television adze sinima kpɔkpɔ gɔme. Le afima ke la, woate ŋu ado wò toɖoɖo akpɔ. Ðewohĩ agbegbegblẽnɔnɔ ava dze le sinima la me. Ðe nàyi ekpɔkpɔ dzi anɔ bubum alakpatɔe be sinima siawo tɔgbe koe woɖena le ŋkeke siawo mea? Alo ɖe wò dzi si ɖoa to aʋã wò be nàwɔ ɖe Ŋɔŋlɔawo ƒe nuxɔxlɔ̃ dzi be ‘migana woayɔ ahasiwɔwɔ kple makɔmakɔnyenye ŋkɔ gɔ̃ hã le mia dome o’ la dzia? (Efesotɔwo 5:3-5) Ðe nàtsi television la ne nusi ɖem wole la le nuwò vivim kura gɔ̃ hã? Alo ne ŋutasẽnuwɔnawo va ge ɖe nusi ɖem wole me ɖe, àʋu teƒe bubua? Hakpala la dzi ha be: “Yehowa doa ame dzɔdzɔe kpɔna, ke eƒe luʋɔ léa fu ame vɔ̃ɖi kple amesi lɔ̃a ŋutasẽnuwɔwɔ la.”—Psalmo 11:5.

Dzi Ðoto Hea Yayra Vanɛ

Enye nyateƒe be agbememɔnukpɔkpɔ geɖe si me míate ŋu adzro mía ɖokui me le akpɔ be míele to ɖom Mawu tso dzi me vavãa la li eye ne míewɔe alea la, aɖe vi na mí. Ele be lɔlɔ̃ si le mía me na Yehowa naʋã mí be míawɔ nusi dzea eŋu, eye míawɔ nusi wògblɔna na mí le eƒe Nya, Biblia la me. Dzi si ɖoa to akpe ɖe mía ŋu míayi edzi anɔ ƒomedodo nyui me kple Yehowa. Nyateƒee, ne míeɖoa to vavã la, ‘míaƒe numenyawo kple míaƒe dzimesusuwo adze Yehowa ŋu.’—Psalmo 19:15.

Esi Yehowa lɔ̃ mí ta la, efiaa toɖoɖo mí be wòanyo na mía ŋutɔwo. Eye ne míetso dzi blibo me ɖo to Mawu ƒe nufiafia la, míakpɔ viɖe geɖe. (Yesaya 48:17, 18) Eyata mina míaxɔ kpekpeɖeŋu si míaƒe dziƒo Fofo la naa mí to eƒe Nya, eƒe gbɔgbɔ, kple eƒe habɔbɔa dzi la kple dzidzɔ. Wofiaa nu mí nyuie ale gbegbe be, ɖeko wòle abe ɖe míele gbe aɖe sem le mía megbe le gbɔgblɔm ene be, “Mɔ la enye si, mito edzi!” (Yesaya 30:21) Esi Yehowa fiaa nu mí to Biblia, Kristotɔwo ƒe agbalẽwo, kple hamea ƒe kpekpewo dzi la, mina míalé to ɖe wo ŋu, míawɔ nusiwo míesrɔ̃ la dzi, eye míanye ‘toɖolawo le nusianu me.’—Korintotɔwo II, 2:9.

Dzi ɖoto ahe dzidzɔkpɔkpɔ kple yayra geɖe vɛ na mí. Ana susu me ƒe akɔdzeanyi mí, elabena míanyae be míaƒe nu dzea Yehowa Mawu ŋu ale gbegbe, eye míenaa eƒe dzi kpɔa dzidzɔ. (Lododowo 27:11) Dzi ɖoto anye ametakpɔnu na mí ne wote mí kpɔ be míawɔ nu gbegblẽ. Eyata ɖikekemanɔmee la, ele be míaɖo to míaƒe dziƒo Fofoa, eye ele be míado gbe ɖa be: ‘Na dzi si ɖoa to wò dɔla.’

[Nɔnɔmetata Tsoƒe si le axa 29]

Etso Self-Pronouncing Edition of the Holy Bible, si me King James kple Revised version gɔmeɖeɖewo le me.