Ðe Wò Modzakaɖeɖe Ðea Vi Na Wòa?
“Miyi edzi mianɔ nuwo dom kpɔ, be wodze Aƒetɔ la ŋu hã.”—EF. 5:10.
1, 2. (a) Aleke Mawu ƒe Nya la ɖee fia be Yehowa di be míase vivi le agbe me? (b) Ne míebua modzakaɖeɖe be enye ‘Mawu ƒe nunana’ la, nu kae esia aʋã mí míawɔ?
BIBLIA na eme kɔ be Yehowa di be míase vivi na agbea. Le kpɔɖeŋu me, Psalmo 104:14, 15 gblɔ be Yehowa nana “nuɖuɖu [tsoa] anyigba me. Wain doa dzidzɔ na amegbetɔ ƒe dzi, eye wònana eƒe mo zrɔ̃na lãlãlã wu ami; ke abolo doa ŋusẽ amegbetɔ ƒe dzi.” Nyateƒee, Yehowa naa agblemenukuwo, ami, kple wain mí be woanye nuɖuɖu na mí. Gake wain ‘gadoa dzidzɔ na ame ƒe dzi’ hã. Togbɔ be míehiã wain hafi anɔ agbe o hã la, edzia míaƒe dzidzɔkpɔkpɔ ɖe edzi. (Nyagb. 9:7; 10:19) Ɛ̃, Yehowa di be míakpɔ dzidzɔ, eye “dzidzɔ” nayɔ míaƒe dziwo me fũu.—Dɔw. 14:16, 17.
2 Eya ta susu aɖeke meli si tae wòle be míabu fɔ mía ɖokuiwo ne míetiae ɣeaɖewoɣi be “[míalé] ŋku ɖe dziƒoxewo” kple “dzogbenya siwo le gbedadaƒo” la ŋu nyuie, alo akpɔ gome le modzakaɖenuwɔna bubu siwo ana míaƒe dzi nadze eme eye míakpɔ dzidzɔ geɖe wu le agbe me la me o. (Mat. 6:26, 28; Ps. 8:4, 5) Dzidzɔkpɔkpɔ kple vivisese le agbe me nye ‘Mawu ƒe nunana.’ (Nyagb. 3:12, 13) Ne míebua modzakaɖeɖe be enye Mawu ƒe nunana la, esia aʋã mí míawɔ eŋu dɔ le mɔ si ado dzidzɔ na Mawu nu.
Modzakaɖeɖe Hamehame Kpakple Woƒe Seɖoƒe
3. Nu ka tae susu le eme be ame sia ame nàtia modzakaɖeɖe si wòlɔ̃?
3 Ame siwo si nukpɔsusu dasɔ le le modzakaɖeɖe ŋu la nyae be modzakaɖeɖe hamehamee li, ke hã wode dzesii hã be seɖoƒe li na wo. Nu ka tae? Be míaɖo nya sia ŋu la, na míatsɔ modzakaɖeɖe asɔ kple nuɖuɖu. Nyateƒee, du sia du kple eƒe nuɖuɖue. Le nyateƒe me la, nuɖuɖu aɖe si vivina na du aɖe me tɔwo ŋutɔ la madzro du bubu me tɔwo o. Le mɔ ma ke nu la, modzakaɖeɖe siwo ŋu Kristotɔ siwo le xexea ƒe akpa aɖe kpɔa dzidzɔ ɖo la mado dzidzɔ na Kristotɔ siwo le xexea ƒe akpa bubu ya o. Le Kristotɔ siwo le nuto ɖeka me gɔ̃ hã gome la, nu si ame aɖe kpɔ be enaa dzidzeme ye (abe agbalẽ nyui aɖe xexlẽ ene) la manɔ alea le ame bubu ya gome o; eya akpɔe be etia ame. Nu si me ame aɖe sea vivi le (abe gasɔdodo ene) la anye nu si tea ɖeɖi ame ŋu na ame bubu ya. Ke hã míelɔ̃ ɖe edzi be, le nuɖuɖu kple modzakaɖeɖe ƒe nya gome la, ame sia ame ate ŋu atia esi wòlɔ̃.—Rom. 14:2-4.
4. Nu ka tae wòhiã be míaɖo seɖoƒe na nu siwo míetsɔ ɖea modzakae? Wɔ eƒe kpɔɖeŋu.
4 Ke hã míede dzesii hã be nyateƒe si wònye be mía dometɔ ɖe sia ɖe ate ŋu atia modzakaɖeɖe si wòlɔ̃ la mefia be míanyrɔ mía ɖokui ɖe ɖe sia ɖe si dzro mí la me vĩi o. Le kpɔɖeŋu me, gabu nuɖuɖu ƒe kpɔɖeŋua ŋu ake. Togbɔ be míalɔ̃ be míaɖu nuɖuɖu ƒomevi vovovowo hã la, míalɔ̃ gbeɖe aɖu nuɖuɖu si gblẽ o. Nuɖuɖu ma ƒomevi ate ŋu ana míadze dɔ. Nenema kee togbɔ be míadi be míatia dzidzɔdonamenu ɖɔʋu ƒomevi vovovowo hã la, míaƒo mía ɖokui ɖe modzakaɖenuwɔna siwo ate ŋu ade míaƒe agbe afɔku me, kple esiwo me ŋutasesẽ alo agbe ƒaƒã nɔnɔ nuwɔnawo le la me o. Modzakaɖeɖe siawo ƒomevi tsi tsitre ɖe Biblia ŋu eye woagblẽ nu le mía ŋu le ŋutilã me alo gbɔgbɔ me. Be míaka ɖe edzi be míeda sɔ la, anyo be míadae kpɔ gbã akpɔe ɖa be modzakaɖeɖe si le mía dzrom la aɖe vi na mí loo alo maɖe vi o. (Ef. 5:10) Aleke míate ŋu awɔ esiae?
5. Aleke míate ŋu awɔ anya ne modzakaɖeɖe aɖe sɔ ɖe Mawu ƒe dzidzenuwo nu alo mesɔ o?
5 Ne míedi be modzakaɖeɖe siwo me míekpɔa gome le la naɖe vi na mí eye woadze Yehowa ŋu la, ele be woasɔ ɖe dzidzenu aɖewo koŋ siwo le Mawu ƒe Nya la me nu. (Ps. 86:11) Be nànya ne aleae wòle le modzakaɖeɖe ƒomevi aɖe si dzro wò gome la, àte ŋu atsɔ mɔfiame bɔbɔe si gbɔna la adae kpɔ. Mɔfiamea lɔ nyabiase etɔ̃ ɖe eme; woawoe nye: nu kae wòlɔ ɖe eme?, ɣeyiɣi didi kae wòaxɔ, kple ame kawoe wòlɔ ɖe eme? Na míadzro wo me ɖekaɖeka.
Nu Kae Wòlɔ Ðe Eme?
6. Modzakaɖeɖe kawoe wòle be míatsri, eye nu ka tae?
6 Hafi nàkpɔ gome le dzidzɔdonameɖokuinuwɔna aɖe me la, nya gbãtɔ si wòle be nàbia ɖokuiwòe nye, Nu kae wòlɔ ɖe eme?—si fia, ‘Dzidzɔdonameɖokuinuwɔna ka ƒomevie le dzroyem?’ Ne èle ŋuɖoɖoa dim la, anyo be wòanɔ susu me na wò be modzakaɖeɖe ƒe ha ƒomevi evee li. Míeda asi ɖe gbãtɔa dzi kura o; evelia ya, ɖewohĩ míalɔ̃ akpɔ gome le eme. Nu kawo ŋue gbãtɔa ku ɖo? Le xexe vɔ̃ɖi sia me la, nuwɔna siwo tsia tsitre ɖe Biblia me gɔmeɖosewo ŋu gaglãa alo wonyea dada le Mawu ƒe sewo dzi la sɔŋ koe nɔa modzakaɖeɖe geɖe me. (1 Yoh. 5:19) Kristotɔ vavãwo gbea modzakaɖeɖe mawo katã kura. Esiawo lɔ modzakaɖeɖe siwo me woɖea tagbɔsesẽnuwɔna, adzewɔwɔ alo gbɔgbɔyɔyɔ, alo ame siwo si vidzinu ɖeka tɔgbi le ƒe gbɔdɔdɔ, amamaɖeɖenuwɔnawo, alo ŋutasẽnuwo, alo esiwo doa nu vɔ̃ɖi kple nuwɔna nyɔŋu bubuwo ɖe ŋgɔ le la ɖe eme. (1 Kor. 6:9, 10; mixlẽ Nyaɖeɖefia 21:8.) Afi ka kee míeɖale o, ne míegbe gomekpɔkpɔ le modzakaɖeɖe siawo ƒomevi me la, ekema míele kakaɖedzi nam Yehowa be “[míenyɔa] ŋu nu vɔ̃ɖi.”—Rom. 12:9; 1 Yoh. 1:5, 6.
7, 8. Aleke míate ŋu ada modzakaɖenuwɔna aɖe ƒe nyonyome kpɔ? Wɔ eƒe kpɔɖeŋu.
7 Modzakaɖeɖe ƒe ha evelia lɔ modzakaɖeɖe siwo meku ɖe nuwɔna siwo ŋu Mawu ƒe Nya la ƒo nu tsi tre ɖo kã ŋu o la ɖe eme. Hafi míatia modzakaɖeɖe siawo dometɔ aɖe la, ele be míatsɔ nu siwo le eme la asɔ kple Biblia me gɔmeɖose siwo kpe ɖe mía ŋu míenya nu siwo Yehowa buna be wonyo eye wole dzɔdzɔe la. (Lod. 4:10, 11) Eyome ehiã be míawo ŋutɔwo míawɔ nyametsotso siwo ana dzitsinya nyui nakpɔtɔ anɔ mía si. (Gal. 6:5; 1 Tim. 1:19) Aleke míate ŋu awɔ esiae? Bu nya sia ŋu kpɔ: Hafi míaɖu nane si míeɖu kpɔ o la, míadi be míanya nu siwo wotsɔ ɖae la gbã. Nenema kee, hafi míakpɔ gome le dzidzɔdonameɖokuinuwɔna ƒomevi aɖe me la, ele be míaku nu me tso nu siwo koŋ wòlɔ ɖe eme la ŋu.—Ef. 5:17.
8 Le kpɔɖeŋu me, ɖewohĩ kamedefefee dzɔa dzi na wò, eye ame sia ame ase egɔme na wò. Elabena kamedefefe doa dzidzɔ na ame eye wòvivina ŋutɔ. Gake ne kamedefefe aɖe si me wowɔa akpasesẽnuwo le, si me hoʋiʋli le, si me woate ŋu adze afɔku le bɔbɔe, eye ame geɖewo dzea afɔku le eme, ɣlidodo kple ʋunyaʋunyawɔwɔ yia edzi le eme, eye wòdoa dulɔlɔ̃ ƒe gbɔgbɔ alo esiawo tɔgbi ɖe ŋgɔ la dzro wò ɖe? Ne ède ŋugble le nu siwo wòlɔ ɖe eme ŋu vɔ la, ɖewohĩ àkpɔe be asesẽ na wò be nàna wò susu nawɔ ɖeka kple Yehowa ƒe nukpɔsusuwo kpakple ŋutifafa kple lɔlɔ̃ ƒe gbedeasi si míeɖea gbeƒãe na amewo la. (Yes. 61:1; Gal. 5:19-21) Le go bubu me la, ne nu ɖɔʋu siwo sɔ le Yehowa ŋkume ye le dzidzɔdonameɖokuinuwɔna aɖe me la, ekema modzakaɖeɖe ma ƒomevi ate ŋu aɖe vi na wò ahana dzidzeme wò.—Gal. 5:22, 23; mixlẽ Filipitɔwo 4:8.
Ɣeyiɣi Didi Kae Wòaxɔ?
9. Nu kae nyabiase si nye, ‘Ɣeyiɣi didi kae modzakaɖeɖea axɔ?’ la ŋu ɖoɖo aɖe afia le mía ŋu?
9 Nya evelia si wòle be nàbia ɖokuiwòe nye, Ɣiyiɣi didi kae wòaxɔ?—si fia, ‘Ɣeyiɣi didi kae wòahiã be mazã ɖe modzakaɖeɖea ŋu?’ Nyabiase si nye nu kae wòlɔ ɖe eme? la ƒe ŋuɖoɖo na míekpɔ nu siwo ŋu míaƒe dzi ku ɖo—nu siwo míebuna be wonyo kple esiwo míebuna be womenyo o. Ke hã nyabiase si nye ɣeyiɣi didi kae wòaxɔ? la ƒe ŋuɖoɖo aɖe nu siwo míetsɔ ɖoa nɔƒe gbãtɔ—si nye, nu siwo míebuna be wole vevie kple esiwo míebuna be womele vevie o—la afia. Ke aleke míawɔ anya ne ale si gbegbe míebua dzidzɔdonameɖokuinuwɔna aɖe be ele vevie la sɔ loo alo mesɔ o?
10, 11. Aleke Yesu ƒe nya si dze le Mateo 6:33 la kpena ɖe mía ŋu le ɣeyiɣi agbɔsɔsɔme si míazã ɖe modzakaɖeɖe ŋu la ŋuti nyametsotsowɔwɔ me?
10 Yesu Kristo gblɔ na eyomedzelawo be: “Ele be nàlɔ̃ Yehowa wò Mawu, kple wò dzi blibo kple wò luʋɔ blibo kple wò tamesusu blibo kpakple wò ŋusẽ blibo.” (Mar. 12:30) Eya ta míaƒe lɔlɔ̃ na Yehowa ye nye nu vevitɔ na mí le agbe me. Míeɖenɛ fiana be míelɔ̃ ɖe nya sia dzi ne míewɔna ɖe Yesu ƒe nuxlɔ̃amenya si nye, “Eya ta miyi edzi mianɔ fiaɖuƒe la kple Mawu ƒe dzɔdzɔenyenye dim gbã, eye woatsɔ nu bubu siawo katã akpe ɖe eŋuti na mi” la dzi. (Mat. 6:33) Aleke nya ma ate ŋu akpe ɖe mía ŋu míanya ɣeyiɣi agbɔsɔsɔme si wòle be míazã ɖe modzakaɖeɖe ŋu kpakple vevienyenye si wòle be míatsɔ anae?
11 De dzesi numeɖeɖe sia: Yesu xlɔ̃ nu mí be ‘míayi edzi anɔ fiaɖuƒea dim gbã.’ Megblɔ be ‘míayi edzi anɔ fiaɖuƒe la ɖeɖe ko dim’ o. Edze ƒãa be, Yesu nyae be ahiã be míadi nu geɖewo le agbe me akpe ɖe Fiaɖuƒe la ŋuti. Míehiã aƒe, nuɖuɖu, nudodo, sukudede va se ɖe afi aɖe, dɔwɔɖui, modzakaɖeɖe, kple bubuawo. Ke hã le nu siawo katã siwo míedina dome la, nu ɖeka pɛ koe míetsɔ ɖoa nɔƒe gbãtɔ—eyae nye Fiaɖuƒea ƒe nuwo. (1 Kor. 7:29-31) Ele be nyateƒenya vevi sia naʋã mí míadi nu siwo le nɔƒe evelia, abe modzakaɖeɖe ene, le mɔ aɖe nu be míate ŋu akpɔ vovo ɖe nu si le vevie na mí wu la ŋu—si nye Fiaɖuƒea ƒe nuwo. Ne míewɔe alea la, gomekpɔkpɔ le modzakaɖeɖe me va se ɖe afi aɖe aɖe vi na mí.
12. Aleke míate ŋu awɔ gɔmeɖose si le Luka 14:28 la ŋu dɔ le modzakaɖeɖe gome?
12 Eya ta le ɣeyiɣi si míazã ɖe modzakaɖeɖe ŋu me la, anyo be míabu eŋuti kɔnta do ŋgɔ. (Luka 14:28) Ehiã be míanya ɣeyiɣi agbɔsɔsɔme si dzidzɔdonameɖokuinuwɔna aɖe axɔ. Eyome ele be míatso nya me le ɣeyiɣi agbɔsɔsɔme si dze be míazã ɖe eŋu la ŋu. Ne gomekpɔkpɔ le modzakaɖeɖe aɖe me awɔe be míagblẽ dɔ veviwo abe ɖokuisi Biblia nusɔsrɔ̃, ƒometadedeagu, Kristotɔwo ƒe kpekpewo dede, alo gomekpɔkpɔ le gbeƒãɖeɖedɔa me ɖi la, ke efia be medze be míazã ɣeyiɣi ma gbegbe ɖe eŋu o. (Mar. 8:36) Gake ne míekpɔa gome le dzidzɔdonameɖokuinuwɔna aɖe me tso ɣeyiɣi yi ɣeyiɣi eye wòdoa ŋusẽ mí míetia Fiaɖuƒea ƒe nuwo yome la, ke míate ŋu atso nya me be ɣeyiɣi si míezãna ɖe modzakaɖeɖe ma ƒomevi ŋu la ɖea vi.
Ame Kawoe Wòlɔ Ðe Eme?
13. Nu ka tae wòle be míabu ame siwo akpɔ gome le modzakaɖeɖe me kpli mí la ŋu nyuie?
13 Nya etɔ̃lia si wòle be nàbia ɖokuiwòe nye, Ame kawoe wòlɔ ɖe eme?—si fia, ‘Mía kple ame kawoe akpɔ gome le modzakaɖeɖea me?’ Ele vevie be nàde ŋugble tso nya sia ŋu. Nu ka tae? Elabena modzakaɖeɖe ƒe nyonyome nɔa te ɖe ame siwo akpɔ gome le eme kpli mí la ƒe nɔnɔme nyuiwo dzi. Ale si ko nuɖuɖu ɖekae kple xɔlɔ̃ nyuiwo gavivina geɖe wu ene la, nenema kee dzidzɔ geɖe wu nɔa modzakaɖeɖe me ne míekpɔ gome le eme kple xɔlɔ̃ nyuiwo. Eya ta eme kɔ be mía dometɔ geɖewo, vevietɔ sɔhɛwo, kpɔa gome le modzakaɖeɖe me kple ame bubuwo. Ke hã be míakpɔ egbɔ be dzidzɔdonameɖokuinuwɔna la naɖe vi na mí la, nunya le eme be míatso nya me le ame siwo ƒomevi míakpe kple esiwo ƒomevi míakpe o la ŋu do ŋgɔ.—2 Kron. 19:2; mixlẽ Lododowo 13:20; Yak. 4:4.
14, 15. (a) Kpɔɖeŋu kae Yesu ɖo ɖi le zɔhɛ nyuiwo tiatia me? (b) Nya kawoe wòle be míabia mía ɖokuiwo ku ɖe ame siwo míedea ha kplii la ŋu?
14 Yesu ƒe kpɔɖeŋu sɔsrɔ̃ akpe ɖe mía ŋu míakpɔ xɔlɔ̃ nyuiwo. Tso keke xexemewɔwɔ dzi la, Yesu lɔ̃ amegbetɔwo. (Lod. 8:31) Esime wònɔ anyigba dzi la, lɔlɔ̃ ʋãe wòve ame ƒomeviwo katã nu. (Mat. 15:29-37) Ke hã Yesu na wòdze ƒãa be vividodo ɖe ame ŋu xɔlɔ̃wɔwɔtɔe to vovo na xɔlɔ̃dzedze. Togbɔ be edoa vivi ɖe amewo katã ŋu hã la, ame siwo ɖo nudidi aɖewo koŋ gbɔ la ɖeɖe koe nyea exɔlɔ̃ kplikplikpliwo. Esi Yesu nɔ nu ƒom na eƒe apostolo wɔnuteƒe 11-awo la, egblɔ be: “Ne miewɔa nu siwo ƒe se dem mele na mi la, ekema xɔ̃nyewoe mienye.” (Yoh. 15:14; kpɔ Yohanes 13:27, 30 hã.) Ame siwo dze Yesu yome eye wosubɔa Yehowa la ɖeɖe koe Yesu lɔ̃ be woanye ye xɔlɔ̃wo.
15 Eya ta ne èle eŋu bum nenye be asɔ be ame aɖe nanye xɔwò alo masɔ o la, nunya anɔ eme be nàde ŋugble le Yesu ƒe nyaa ŋu. Bia nya siawo tɔgbi ɖokuiwò: ‘Ðe ame sia ɖenɛ fiana to eƒe nyagbɔgblɔ kple nuwɔnawo me be yewɔna ɖe Yehowa kple Yesu ƒe sededewo dzia? Biblia ƒe dzidzenu siwo nu menɔa agbe ɖo la nue eya hã nɔa agbe ɖoa? Ðe hadede kplii ade dzi ƒo nam be matsɔ Fiaɖuƒea aɖo nɔƒe gbãtɔ le nye agbe me eye makpɔtɔ anye Yehowa subɔla wɔnuteƒea?’ Ne èka ɖe edzi be nyabiase siawo dometɔ ɖe sia ɖe ƒe ŋuɖoɖoe nye ɛ̃ la, ekema efia be ame sia nye zɔhɛ nyui aɖe si nàɖe modzaka kplii.—Mixlẽ Psalmo 119:63; 2 Kor. 6:14; 2 Tim. 2:22.
Ðe Míaƒe Modzakaɖeɖewo Sɔ Ðe Dzidzenu Siawo Nua?
16. Nu kawoe wòle be míanya ku ɖe míaƒe modzakaɖeɖe ŋu?
16 Míedzro nu etɔ̃ me ku ɖe modzakaɖeɖe ŋu—eƒe nyonyome, eƒe agbɔsɔsɔme, kple hadedewo. Hafi míaƒe modzakaɖeɖe naɖe vi na mí la, ele be wòasɔ ɖe Biblia ƒe dzidzenuwo nu tututu le nu etɔ̃ siawo gome. Eya ta hafi míakpɔ gome le modzakaɖeɖe aɖe me la, ehiã be míadoe kpɔ. Le eƒe nyonyome gome la, nyabiase si míedi be míakpɔ ŋuɖoɖo nae nye: ‘Nu kae wòlɔ ɖe eme? Ðe wònye modzakaɖeɖe ɖɔʋua alo menyo o?’ (Lod. 4:20-27) Ku ɖe eƒe agbɔsɔsɔme ŋu la, nyabiase si míedi be míakpɔ ŋuɖoɖo nae nye: ‘Ɣeyiɣi didi kae wòahiã be mazã ɖe eŋu? Ðe ɣeyiɣi agbɔsɔsɔme ma sɔa alo mesɔ o?’ (1 Tim. 4:8) Eye ku ɖe hadedewo ŋu la, nyabiase si míadi be míakpɔ ŋuɖoɖo nae nye: ‘Ame kawoe akpɔ gome le modzakaɖeɖea me kplim? Ðe ame siawo nye hadede nyuiwo alo hadede vɔ̃woa?’—Nyagb. 9:18; 1 Kor. 15:33.
17, 18. (a) Aleke míate ŋu ada nuwo kpɔ ahakpɔe ɖa be míaƒe modzakaɖenuwɔna sɔ ɖe Biblia ƒe dzidzenuwo nu loo alo womesɔ ɖe wo nu o? (b) Nu kae wò ŋutɔ nèɖo kplikpaa be yeawɔ le modzakaɖeɖe ƒe nyaa me?
17 Ne modzakaɖeɖe aɖe meɖo Biblia ƒe dzidzenuwo gbɔ le nu etɔ̃ siawo me o la, ekema mesɔ na mí kura o. Le go bubu me la, ne míeka ɖe edzi be modzakaɖenuwɔna siwo dzɔa dzi na mí la sɔ ɖe Biblia ƒe dzidzenuwo nu le nu etɔ̃ siawo me la, ekema míaƒe modzakaɖeɖe ade bubu Yehowa ŋu eye wòaɖe vi na mí.—Ps. 119:33-35.
18 Eya ta le modzakaɖeɖe gome la, mina míawɔ nu si le eteƒe le ɣeyiɣi nyuitɔ dzi kple ame ɖɔʋuwo. Ɛ̃, mina mía dometɔ ɖe sia ɖe nawɔ ɖe Biblia ƒe aɖaŋuɖoɖo sia dzi tso dzi blibo me: “Miele nu ɖum alo le nu nom, alo ɖale nu bubu aɖe wɔm o, miwɔ nuwo katã hena Mawu ƒe kafukafu.”—1 Kor. 10:31.
Àte Ŋu Aɖe Wo Mea?
Aleke nàte ŋu awɔ mawunyakpukpui siwo gbɔna ŋu dɔ le modzakaɖeɖe gome?
[Nuwo ƒe nɔnɔme si le axa 9]
(Edze nyuie le agbalẽa ŋutɔ me)
✔Nu kae wòlɔ ɖe eme?
[Nuwo ƒe nɔnɔme si le axa 10]
(Edze nyuie le agbalẽa ŋutɔ me)
✔Ɣeyiɣi didi kae wòaxɔ?
[Nuwo ƒe nɔnɔme si le axa 12]
(Edze nyuie le agbalẽa ŋutɔ me)
✔Ame kawoe wòlɔ ɖe eme?
[Nuwo ƒe nɔnɔme si le axa 10]
Aleke míate ŋu asrɔ̃ Yesu ƒe kpɔɖeŋu le xɔlɔ̃wo kple modzakaɖenuwɔnawo tiatia me?