Akpa Si Gbɔgbɔ Kɔkɔea Wɔna Le Yehowa Ƒe Tameɖoɖo Me Vava Me

‘Nye nya, si do tso nye nu me la akpɔ dzidzedze le nu si gbe meɖoe ɖo la me kokoko.’—YES. 55:11, NW.

 1. Kpɔɖeŋu kae ɖe vovototo si le ɖoɖowɔwɔ kple tameɖoɖo dome fia?

TSƆE be ame eve le dzadzram ɖo be yewoatsɔ ʋu azɔ mɔ ayi teƒe aɖe. Ame ɖeka ta mɔ siwo wòdi be yeato aɖo teƒea la ƒe nɔnɔme ɖe agbalẽ dzi tsitotsito. Ame kemɛa nya afi si yim wòle la nyuie, eye wòganya mɔ vovovo siwo hã wòato aɖo afi ma. Ele klalo be, ne kuxi aɖe do mo ɖa le mɔ si tom yele dzi la, yeato mɔ bubu ne ehiã. Le mɔ aɖewo nu la, vovototo si le ale si ame eve siawo awɔ aɖo teƒe si yim wole dome la nye kpɔɖeŋu na vovototo si le ɖoɖowɔwɔ kple tameɖoɖo dome. Woate ŋu atsɔ ɖoɖowɔwɔ asɔ kple mɔ siwo dzi ame ato ayi teƒe aɖe la ƒe nɔnɔme tata ɖe agbalẽ dzi tsitotsito, gake tameɖoɖo ya fia be taɖodzinu aɖe nanɔ ame si si gbɔ wòdi be yeaɖo, evɔ maɖo mɔ aɖe koŋ si dzi wòato aɖo taɖodzinu ma gbɔ la ɖi kokoko o.

2, 3. (a) Nu ka ŋue Yehowa ƒe tameɖoɖoa ku ɖo, eye alekee wòkpɔ nɔnɔme si do mo ɖa esi Adam kple Xawa wɔ nu vɔ̃ la gbɔ? (b) Nu ka tae wòle be ale si Yehowa na eƒe tameɖoɖoa le eme vamee la nanɔ nyanya na mí?

² Le nu si Yehowa di be yeawɔ gome la, menye ɖoɖo si ŋu womate ŋu atrɔ asi le o ye le esi o, ke boŋ tameɖoɖo aɖe si ava eme vivivi ye le esi. (Ef. 3:11) Tameɖoɖo sia ku ɖe susu si nɔ esi tso gɔmedzedzea me ɖe ameƒomea kple anyigbaa ŋu la ŋu—si nye be anyigba sia nazu paradisoƒe, afi si amegbetɔ deblibowo ate ŋu anɔ agbe le ŋutifafa kple dzidzɔ me le tegbee. (1 Mose 1:28) Esi Adam kple Xawa wɔ nu vɔ̃ la, Yehowa tso ɖe nɔnɔme si do mo ɖa la ŋu eye wòɖe afɔ siwo hiã bene yeƒe tameɖoɖoa nava eme. (Mixlẽ 1 Mose 3:15.) Yehowa ɖoe be yeƒe kpɔɖeŋunyɔnu la nadzi ‘dzidzimevi,’ alo Viŋutsu aɖe, si ava tsrɔ̃ Satana, ame si nɔ megbe na woƒe aglãdzedzea la mlɔeba, eye wòaɖɔ nu siwo katã wògblẽ la ɖo.—Heb. 2:14; 1 Yoh. 3:8.

³ Ŋusẽ aɖeke mele dziƒo alo anyigba sia dzi si ate ŋu axe mɔ na Mawu ƒe tameɖoɖoa be wòagava eme o. (Yes. 46:9-11) Nu ka tae míegblɔe alea ɖo? Elabena gbɔgbɔ kɔkɔea ye nye ŋusẽ si zãm Yehowa le. Ŋusẽ triakɔ sia si womate ŋu axe mɔ na o la nye kpeɖodzi be Mawu ƒe tameɖoɖoa ‘ava eme godoo.’ (Yes. 55:10, 11, NW) Ele be míanya ale si Mawu na eƒe tameɖoɖoa le eme vamee eye míawɔ nu aduadu kplii. Nu siwo míele mɔ kpɔm na le etsɔme la nɔ te ɖe tameɖoɖo ma me vava dzi. Gakpe ɖe eŋu la, ne míekpɔ ale si Yehowa le gbɔgbɔ kɔkɔe la zãmee la, edoa ŋusẽ míaƒe xɔse. Azɔ na míadzro dɔ siwo gbɔgbɔ kɔkɔea wɔ—le blema, le egbeŋkekea me, kple esiwo wòawɔ le etsɔme—be Yehowa ƒe tameɖoɖo nava eme la me.

Akpa Si Gbɔgbɔ Kɔkɔea Wɔ Le Blema

 4. Alekee Yehowa ɖe eƒe tameɖoɖo la fia vivivi?

⁴ Le Biblia ƒe ɣeyiɣiwo me la, Yehowa ɖe eƒe tameɖoɖo la fia vivivi. Le gɔmedzedzea me la, ame si Dzidzimevi si ŋugbe wodo la ava nye la nye “nya ɣaɣla kɔkɔe aɖe.” (1 Kor. 2:7) Ƒe 2,000 aɖewo megbe hafi Yehowa gaƒo nu tso dzidzimevi aɖe ŋu. (Mixlẽ 1 Mose 12:7; 22:15-18.) Yehowa do ŋugbe aɖe si ava va eme le mɔ si lolo wu nu la na Abraham. Nya si nye, “to wò dzidzimeviwo me,” ɖee fia kɔtɛ be amegbetɔ ye Dzidzimevi si ŋugbe wodo la anye, eye anye Abraham ƒe dzidzimeviwo dometɔ aɖe. Míate ŋu agblɔ kple kakaɖedzi be Satana nɔ ŋku lém ɖe nuwo ŋu vevie esime Mawu ɖe nyateƒenya sia ɖe go. Ðikeke mele eme o be Adikãtɔ sia menɔ naneke dim wu be yeatsrɔ̃ Abraham ƒe dzidzimeviwo alo agblẽ nu le wo ŋu o, ale be yeato esia dzi agblẽ Mawu ƒe tameɖoɖoa me. Gake esia mate ŋu ava eme gbeɖe o, elabena Mawu ƒe gbɔgbɔ makpɔmakpɔ la nɔ dɔ dzi. Le mɔ kawo nu?

5, 6. Alekee Yehowa to eƒe gbɔgbɔa dzi kpɔ ame ɖekaɖekawo ta le ƒome si me Dzidzimevi la ava dzɔ tso la me?

⁵ Yehowa to eƒe gbɔgbɔa dzi kpɔ ame ɖekaɖekawo ta le ƒome si me Dzidzimevi la ava dzɔ tso mlɔeba la me. Yehowa gblɔ na Abram (Abraham) be: “Nye enye wò akpoxɔnu.” (1 Mose 15:1) Menye nya gbɔlowoe nya mawo nye o. Le kpɔɖeŋu me, bu nu si dzɔ ɖe Abraham kple Sara dzi le ƒe 1919 D.M.Ŋ. me lɔƒo, esime wonye amedzrowo le Gerar la, ŋu kpɔ. Esi Abimelex, si nye Gerar fia, menya be Abraham srɔ̃e Sara nye o ta la, ena wokplɔ Sara vae nɛ kple susu be yeaɖee. Ðe wòanye be Satanae nɔ megbe na nu sia henɔ agbagba dzem be yeana Sara nagadzi vi na Abraham oa? Biblia megblɔe na mí o. Nu si wògblɔ na mí koe nye be Yehowa de nu nyaa me. Egblɔ na Abimelex le drɔ̃e aɖe me be negade asi Sara ŋu o.—1 Mose 20:1-18.

⁶ Menye nudzɔdzɔ sia me koe Yehowa kpɔ wo ta le o. Eɖe Abraham kple eƒe ƒometɔwo zi gbɔ zi geɖe. (1 Mose 12:14-20; 14:13-20; 26:26-29) Esia tae hakpalaa te ŋu gblɔ tso Abraham kple eƒe dzidzimeviwo ŋu be: ‘Yehowa mena ame aɖeke te wo ɖe anyi o, eye wòhe to na fiawo le wo ta, hegblɔ bena: Migaka asi nye amesiaminawo ŋu o, eye migawɔ vɔ̃ aɖeke nye nyagblɔɖilawo o!’—Ps. 105:14, 15.

 7. Mɔ kawo nue Yehowa kpɔ Israel dukɔa ta le?

⁷ Yehowa to eƒe gbɔgbɔa dzi kpɔ blema Israel dukɔa, si me woava dzi Dzidzimevi si ŋugbe wodo ɖo, la ta. Yehowa to eƒe gbɔgbɔa dzi tsɔ eƒe Se si kpɔ tadedeagu vavãtɔ ta la na Israel, eye Se sia kpɔ Yudatɔwo ta tso gbɔgbɔ me, agbenɔnɔ, kple ŋutilãme ɖiƒoƒo me. (2 Mose 31:18; 2 Kor. 3:3) Le Ʋɔnudrɔ̃lawo ƒe ŋkekea me la, Yehowa tsɔ eƒe gbɔgbɔa do ŋusẽ ame aɖewo woɖe Israel viwo tso woƒe futɔwo si me. (Ʋɔn. 3:9, 10) Le ƒe alafa geɖe siwo kplɔe ɖo me va ɖo Yesu, si nye Abraham ƒe dzidzimevia ƒe akpa vevitɔ, dziɣi la, gbɔgbɔ kɔkɔea anya nɔ dɔ dzi vevie le Yerusalem, Betlexem, kple gbedoxɔa ta kpɔkpɔ me, elabena teƒe siawo katã awɔ akpa aɖe le nyagblɔɖi siwo ku ɖe Yesu ŋu la me vava me.

 8. Nu kae ɖee fia be gbɔgbɔ kɔkɔea wɔ akpa vevi aɖe le Mawu ƒe Vi la ƒe agbenɔnɔ kple subɔsubɔdɔa me?

⁸ Gbɔgbɔ kɔkɔea wɔ akpa vevi aɖe le Yesu ƒe agbenɔnɔ kple eƒe subɔsubɔdɔa me. Gbɔgbɔ kɔkɔea ƒe dɔwɔwɔ le ɖetugbui nɔaƒe, Maria, ƒe vidzidɔ me na be nane si medzɔ kpɔ o, si magadzɔ ake o, la dzɔ. Ena nyɔnu sia si nye ame madeblibo la fɔ fu eye wòdzi Ŋutsuvi deblibo, si menyi nu vɔ̃ ƒe dome o. (Luka 1:26-31, 34, 35) Emegbe gbɔgbɔa kpɔ Yesu, ɖevi la, ta be meku kukpo o. (Mat. 2:7, 8, 12, 13) Esi Yesu tsi xɔ abe ƒe 30 ene la, Mawu tsɔ gbɔgbɔ kɔkɔe la si ami nɛ heɖoe David ƒe fiazikpuia domenyilae, eye wòde dɔ asi nɛ be wòaɖe gbeƒã. (Luka 1:32, 33; 4:16-21) Mawu tsɔ gbɔgbɔ kɔkɔea do ŋusẽ Yesu wòwɔ nukunuwo, siwo dometɔ aɖewo nye dɔdada na dɔnɔwo, nuɖuɖunana amehawo, kple ame kukuwo fɔfɔ ɖe tsitre. Ŋusẽdɔ mawo nye vɔvɔli na yayra siwo míate ŋu akpɔ mɔ na le Yesu ƒe fiaɖuƒedziɖuɖua me.

9, 10. (a) Aleke wòdze ƒãa be gbɔgbɔ kɔkɔea nɔ kpekpem ɖe Yesu ƒe nusrɔ̃la siwo nɔ anyi le ƒe alafa gbãtɔ me la ŋu? (b) Tɔtrɔ yeye kae woɖe fia ku ɖe ale si Yehowa ana eƒe tameɖoɖoa nava emee ŋu le ƒe alafa gbãtɔ M.Ŋ. me?

⁹ Tso ƒe 33 M.Ŋ. ƒe Pentekoste ŋkekea dzi la, Yehowa tsɔ eƒe gbɔgbɔa si ami na Abraham ƒe dzidzimevi la ƒe akpa evelia, si me tɔ akpa gãtɔ medzɔ tso Abraham ƒe ƒomea me o. (Rom. 8:15-17; Gal. 3:29) Edze ƒãa be gbɔgbɔ kɔkɔea nɔ kpekpem ɖe Yesu ƒe nusrɔ̃la siwo nɔ anyi le ƒe alafa gbãtɔ me la ŋu, elabena ena woɖe gbeƒã dzonɔamemetɔe eye wònɔ ŋusẽ dom wo be woawɔ ŋusẽdɔ geɖewo. (Dɔw. 1:8; 2:1-4; 1 Kor. 12:7-11) Nyateƒe si wònye be woxɔ gbɔgbɔa ƒe nukununana mawo la ɖee fia be tɔtrɔ yeye aɖe va le ale si Yehowa ana eƒe tameɖoɖoa nava eme la ŋu. Yehowa meganɔ tadedeagu ƒe ɖoɖo si nɔ anyi ƒe alafa geɖe enye ema, si me Yerusalem gbedoxɔa wɔ akpa vevi aɖe le, la zãm o. Kristo hame si woɖo anyi yeyee la ŋue wòva nɔ ŋudzedze kpɔm ɖo azɔ. Tso ɣemaɣi va de asi na fifia la, Yehowa le amesiaminawo ƒe hame ma zãm be yeatsɔ ana yeƒe tameɖoɖoa nava eme.

¹⁰ Yehowa zã eƒe gbɔgbɔa tsɔ kpɔ eƒe amewo ta, do ŋusẽ wo, hesi ami na wo—esiawo nye mɔ siwo dzi wòzã eƒe gbɔgbɔ kɔkɔea le le Biblia ƒe ɣeyiɣiwo me be yeatsɔ akpɔ egbɔ be yeƒe tameɖoɖo nava eme la dometɔ ʋɛ aɖewo ko. Ke le míaƒe ŋkekea me ya ɖe? Aleke Yehowa le eƒe gbɔgbɔa zãm fifia be yeana yeƒe tameɖoɖoa nava eme? Ele be míanya, elabena míedi be míawɔ nu le ɖekawɔwɔ me kple gbɔgbɔa ƒe mɔfiafia. Azɔ na míadzro mɔ siwo nu Yehowa le eƒe gbɔgbɔa zãm le egbea la dometɔ ene me.

Akpa Si Wɔm Gbɔgbɔ Kɔkɔea Le Egbea

11. Nu kae ɖee fia be Mawu ƒe gbɔgbɔa kpena ɖe eƒe amewo ŋu wonɔa dzadzɛ, eye alekee nàte ŋu aɖee afia be èle agbe nɔm le ɖekawɔwɔ me kple gbɔgbɔa ƒe mɔfiafia?

¹¹ Gbã la, gbɔgbɔ kɔkɔea kpena ɖe Mawu ƒe amewo ŋu be woanɔ dzadzɛ. Ele be ame siwo subɔa Yehowa le ɖekawɔwɔ me kple eƒe lɔlɔ̃nu la nanɔ agbe dzadzɛ. (Mixlẽ 1 Korintotɔwo 6:9-11.) Ame siwo va zu Kristotɔwo la dometɔ aɖewo ƒo wo ɖokuiwo ɖe gbɔdɔdɔ ƒe agbe gbegblẽ nɔnɔ nuwɔnawo, abe matrewɔwɔ, ahasiwɔwɔ, kpakple ŋutsu kple ŋutsu ƒe gbɔdɔdɔ ene, me tsã. Dzodzro siwo blea ame dea nu vɔ̃ wɔwɔ me la ate ŋu aƒo ke ɖe to sesĩe ɖe ame mawo me. (Yak. 1:14, 15) Ke hã, ‘wole tsi na ame siawo nyuie,’ si fia be wowɔ tɔtrɔ siwo wòhiã be woawɔ le woƒe agbenɔnɔ me bene woƒe nu nadze Mawu ŋu. Nu kae kpena ɖe ame siwo lɔ̃ Mawu la ŋu wotea ŋu ɖua dzodzro vɔ̃ mawo dzi dzidzedzetɔe? “Mía Mawu ƒe gbɔgbɔ la” ye, abe ale si 1 Korintotɔwo 6:11 gblɔe ene. Ne ènɔa agbe dzadzɛ la, ànɔ eɖem anɔ fiafiam be èle mɔ ɖem be gbɔgbɔ la nakpɔ ŋusẽ ɖe wò agbe dzi.

12. (a) Le ŋutega si woɖe fia Ezekiel nu la, alekee Yehowa fiaa mɔ eƒe habɔbɔa? (b) Alekee nàte ŋu aɖee afia be èle nu wɔm le ɖekawɔwɔ me kple gbɔgbɔa ƒe mɔfiafia?

¹² Evelia, Yehowa zãa eƒe gbɔgbɔa tsɔ fiaa mɔ eƒe habɔbɔa be nuwo nazɔ ɖe ɖoɖo si wòdi la nu. Le ŋutega aɖe si woɖe fia Ezekiel me la, woɖe Yehowa ƒe habɔbɔa ƒe akpa si le dziƒo la fia abe dziƒotasiaɖam si le zɔ ɖem matɔmatɔe be Yehowa ƒe tameɖoɖo nava eme ene. Nu kae fiaa mɔ tasiaɖam la? Gbɔgbɔ kɔkɔe lae. (Eze. 1:20, 21) Mina míaɖo ŋku edzi be Yehowa ƒe habɔbɔa le akpa eve me, akpa ɖeka le dziƒo, eye evelia le anyigba dzi. Ne gbɔgbɔ kɔkɔea ye fiaa mɔ akpa si le dziƒo la, ekema eya kee fiaa mɔ akpa si le anyigba dzi la hã. Ne èɖoa to Mawu ƒe habɔbɔa ƒe akpa si le anyigba dzi hewɔna ɖe mɔfiame siwo wònana la dzi nuteƒewɔwɔtɔe la, ànɔ eɖem anɔ fiafiam be èle zɔzɔm le akasa nu kple Yehowa ƒe dziƒotasiaɖam la hele nu wɔm le ɖekawɔwɔ me kple eƒe gbɔgbɔ kɔkɔea ƒe mɔfiafia.—Heb. 13:17.

13, 14. (a) Ame kawoe nye “dzidzime sia” si ŋu Yesu ƒo nu tsoe la? (b) Wɔ kpɔɖeŋu aɖe si ɖee fia be gbɔgbɔ kɔkɔea le dɔ dzi hele kpekpem ɖe mía ŋu be míase Biblia me nyateƒewo gɔme. (Kpɔ aɖaka si nye “Ðe Nèle Tɔtrɔm Ðe Nyateƒea Ƒe Kekeli Si Le Kɔkɔm Ðe Edzi La Ŋua?”)

¹³ Etɔ̃lia, gbɔgbɔ kɔkɔea le dɔ dzi vevie le kpekpeɖeŋu nam mí be míase Biblia me nyateƒewo gɔme. (Lod. 4:18) Ƒe geɖee nye esia la, magazine siae nye mɔ vevitɔ si dzi “kluvi nyateƒetɔ kple aɖaŋudzela” la tona naa nyateƒe ƒe kekelia nɔa kɔkɔm ɖe edzi. (Mat. 24:45) Le kpɔɖeŋu me, bu gɔmesese si su mía si ku ɖe ame siwo “dzidzime sia,” si ŋu Yesu ƒo nu tsoe la, nye ŋu kpɔ. (Mixlẽ Mateo 24:32-34.) Dzidzime ka ŋue Yesu nɔ nu ƒom tso? Nyati si ƒe tanyae nye “Kristo Ƒe Anyinɔnɔ—Gɔmesese Kae Le Eŋu Na Wò?” ɖe eme be, menye ame vɔ̃ɖiwoe Yesu wɔnɛ o, ke boŋ eƒe nusrɔ̃lawo, siwo woatsɔ gbɔgbɔ kɔkɔe la asi ami na kpuie lae wòwɔnɛ.a Yesu yomedzela amesiaminawo, siwo nɔ anyi le ƒe alafa gbãtɔ me kple esiwo le míaƒe ŋkekea me siaa, woe anye ame siwo, akpɔ dzesia ahase nu si wòfia la hã gɔme, si nye be Yesu ‘gogo, le ʋɔtruawo nu.’

¹⁴ Gɔmesese kae le numeɖeɖe sia ŋu na mí? Togbɔ be míate ŋu abu ɣeyiɣi ƒe didime si tututu “dzidzime” la axɔ o hã la, nu vevi aɖewo li siwo wòle be woanɔ susu me na mí ku ɖe nya, “dzidzime” ŋu: Zi geɖe la, efiaa ame siwo xɔ ƒe vovovo, siwo le agbe le ɣeyiɣi ɖeka aɖe me; le kpɔɖeŋu me, vifofo aɖe kple via alo tɔgbui aɖe kple tɔgbuiyɔvia wonye dzidzime ɖeka me tɔwo; menɔa anyi wòdidina fũu akpa o, eye nuwuwu li nɛ. (2 Mose 1:6, NW) Ekema, aleke wòle be míase “dzidzime sia” si ŋu Yesu ƒo nu tso la gɔme? Edze ƒãa be nu si wòwɔnɛ ye nye be amesiamina siwo anɔ agbe akpɔ xaxa gã la ƒe gɔmedzedze la atso amesiamina siwo nɔ anyi esime nuwuɣia ƒe dzesia dze egɔme le ƒe 1914 me la ɖo, eye woƒe agbenɔƒewo ade nu wo nɔewo me. Gɔmedzedze li na dzidzime ma, eye nuwuwu anɔ anyi nɛ godoo. Ale si dzesia ƒe akpa vovovowo le eme vamee la ɖee fia kɔtɛ be xaxa gã la gogo vavã. Ne èyi edzi na nuwɔwɔ kpata ƒe susu le asiwò eye nènɔa ŋudzɔ la, ànɔ eɖem anɔ fiafiam be ètrɔna ɖe nyateƒe ƒe kekeli si le kɔkɔm ɖe edzi la ŋu, eye èle mɔ ɖem be gbɔgbɔa nafia mɔ wò.—Mar. 13:37.

15. Nu kae ɖee fia be gbɔgbɔ kɔkɔea ye doa ŋusẽ mí be míaɖe gbeƒã nya nyuia?

¹⁵ Enelia, gbɔgbɔ kɔkɔea doa ŋusẽ mí be míaɖe gbeƒã nya nyuia. (Dɔw. 1:8) Nu ka gbɔe wòagate ŋu atso be wote ŋu le gbeƒã ɖem nya nyuia le anyigba katã dzi? Bu eŋu kpɔ ko. Ðewohĩ wò hã ènye ame siwo ŋu kpena vevie, alo ame siwo le vɔvɔ̃ ta, wogblɔ kpɔ be, ‘Nyemate ŋu aɖe gbeƒã tso aƒe me yi aƒe me gbeɖe o!’ la dometɔ ɖeka. Gake fifia èkpɔa gome le dɔ sia me dzonɔamemetɔe.b Yehowa ƒe Ðasefo wɔnuteƒe geɖewo yi edzi ɖe gbeƒã le yometiti alo tsitretsitsi ɖe wo ŋu me. Mawu ƒe gbɔgbɔ kɔkɔea koe ate ŋu ado ŋusẽ mí míaɖu mɔxenu gãwo dzi ahawɔ nu siwo míate ŋu awɔ le míawo ŋutɔwo ƒe ŋusẽ me o. (Mixa 3:8; Mat. 17:20) Ne èkpɔa gome le gbeƒãɖeɖedɔa me bliboe la, ekema èle eɖem le fiafiam be èle nu wɔm aduadu kple gbɔgbɔ ma.

Akpa Si Gbɔgbɔ Kɔkɔea Awɔ Le Etsɔme

16. Nu ka tae míate ŋu aka ɖe edzi be Yehowa akpɔ eƒe amewo ta le xaxa gã la me?

¹⁶ Le etsɔme la, Yehowa azã eƒe gbɔgbɔ kɔkɔea le mɔ ɖedzesi aɖewo nu atsɔ ana eƒe tameɖoɖoa nava eme. Gbã la, bu eƒe amewo ta kpɔkpɔ ŋu kpɔ. Abe ale si míedzro eme va yi ene la, Yehowa to eƒe gbɔgbɔa dzi kpɔ ame ɖekaɖekawo kpakple Israel dukɔ bliboa ta le blema. Eya ta susu geɖewo li siwo ta míate ŋu aka ɖe edzi be azã gbɔgbɔ triakɔ ma ke atsɔ akpɔ eƒe amewo ta le xaxa gã si le aƒe tum la me. Mehiã be míasusu naneke agblɔ le ale si tututu Yehowa le mía ta kpɔ ge ɣemaɣi la ŋu o. Ke boŋ míate ŋu akpɔ mɔ na etsɔme kple kakaɖedzi, elabena míenyae be afi ka kee Yehowa ƒe amewo ɖale o, eƒe ŋku anɔ wo ŋu, eye ato eƒe gbɔgbɔ kɔkɔea dzi akpɔ wo ta.—2 Kron. 16:9; Ps. 139:7-12.

17. Alekee Yehowa azã eƒe gbɔgbɔ kɔkɔea le xexe yeyea me?

¹⁷ Alekee Yehowa azã eƒe gbɔgbɔ kɔkɔea le xexe yeye si gbɔna la me? Gbɔgbɔ mae anye ŋusẽ si dzi woato aŋlɔ agbalẽ xatsaxatsa yeye siwo woaʋu ɣemaɣi la. (Nyaɖ. 20:12) Nya kawoe anɔ wo me? Edze ƒãa be nu siwo katã Yehowa adi tso mía si le ƒe akpe ɖeka la mee anɔ wo me. Ðe nèle mɔ kpɔm vevie be yeava dzro nya siwo anɔ agbalẽ xatsaxatsa mawo me la mea? Míele mɔ kpɔm na xexe yeye ma vevie. Yayra manyagblɔ aɖee wòanye be míanɔ agbe le ɣeyiɣi wɔnuku ma, si me Yehowa ato eƒe gbɔgbɔ kɔkɔea dzi ana tame si wòɖo ɖe anyigba la kple amegbetɔ siwo le edzi ŋu la nava eme la, me.

18. Nu kae nèɖo kplikpaa be yeawɔ?

¹⁸ Mina míagaŋlɔ be gbeɖe o be Yehowa ƒe tameɖoɖoa ava eme godoo, elabena eƒe gbɔgbɔ kɔkɔe, si nye ŋusẽ triakɔtɔ kekeake le xexea me godoo, la zãm wòle be esia nava eme. Tameɖoɖo ma lɔ wò hã ɖe eme. Eya ta na wòanye wò tameɖoɖo kplikpaa be yeaƒo koko na Yehowa be wòana eƒe gbɔgbɔ kɔkɔea wò eye nàwɔ nu le ɖekawɔwɔ me kple eƒe mɔfiafia. (Luka 11:13) Esia awɔe be mɔkpɔkpɔ anɔ asiwò be nàva nɔ agbe tegbee le Paradiso me le anyigba dzi, abe ale si Yehowa ɖoe na amegbetɔwo ene.

[Etenuŋɔŋlɔwo]

Èɖo Ŋku Wo Dzia?

• Mɔ kawo nue Yehowa zã eƒe gbɔgbɔ kɔkɔea le le blema tsɔ kpɔ egbɔ be yeƒe tameɖoɖo nava eme?

• Aleke Yehowa le eƒe gbɔgbɔa zãm egbeae?

• Alekee Yehowa azã eƒe gbɔgbɔ kɔkɔea le etsɔme atsɔ ana eƒe tameɖoɖo nava eme?

[Aɖaka si le axa 10]

Ðe Nèle Tɔtrɔm Ðe Nyateƒea Ƒe Kekeli Si Le Kɔkɔm Ðe Edzi La Ŋua?

Yehowa na Biblia me nyateƒea me le kɔkɔm ɖe edzi na eƒe amewo. Numekɔkɔ siwo dze le Gbetakpɔxɔ me la dometɔ aɖewoe nye kawo?

▪ Nufiame nyui si ku ɖe ale si ame wɔa ŋgɔyiyi va zua Kristo ƒe nusrɔ̃la ka dzie amɔwɔʋãnu ŋuti kpɔɖeŋu si Yesu wɔ la te gbe ɖo? (Mat. 13:33)—July 15, 2008, axa 19-20.

▪ Ɣekaɣie Kristotɔwo tiatia hena dziƒomɔkpɔkpɔa wu enu?—May 1, 2007, axa 30-31.

▪ Nu kae wòfia be woade ta agu na Yehowa ‘le gbɔgbɔ me’? (Yoh. 4:24)—July 15, 2002, axa 15.

▪ Gbedoxɔa ƒe xɔxɔnu ka mee ameha gã la subɔna le? (Nyaɖ. 7:15)—May 1, 2002, axa 30-31.

▪ Ɣekaɣie alẽwo kple gbɔ̃wo me mama ava eme? (Mat. 25:31-33)—October 15, 1995, axa 18-28.